1. ¿Xiñee zándaca ziuu biaje zadxíbinu?

 GUIRANU nga ridxíbinu. Dxandíʼ, maʼ bizíʼdinu lu Biblia cadi naquiiñeʼ guidxíbinu ca gueʼtuʼ, ca demonio ninca ni chiguizaaca despué. Peru nabáninu ti tiempu ra cazaaca stale cosa ni ruchibi laanu, casi guerra, guendaquéiquiiñeʼ ne ca guendahuará ca (Luc. 21:11). Ne laaca zándaca ridxíbinu ca gobiernu, ca familia stinu o xcaadxi binni ni cucaalú religión ni rusiidiʼ ni dxandíʼ. Ne nuu tu laa ridxibi purtiʼ riníʼ ique qué zanda gudxiilú xiixa guendanagana ni cadiʼdiʼ yanna o ni gapa despué.

2. ¿Xi bizaaca dxi yendá David ndaaniʼ guidxi Gat?

² Guininu de David ti xpinni Dios ni guyuu biaje bidxibi. Dxi canazananda rey Saúl laabe para guuti laabe, bixooñebe ne guyebe ndaaniʼ guidxi Gat, xquidxi ca filisteu. Guizáʼ bidxibi David ora gúdxicabe Akís, rey stiʼ Gat, naca David ti hombre ni guizáʼ nanna tinde ne maʼ biiti «stale mil» de filisteu (1 Sam. 21:​10-12). Nabé guyuube xizaa de xi zanda gueeda guni rey que laabe. ¿Xi biʼniʼ David para maʼ cadi guidxibi yaʼ?

3. Casi ná Salmo 56:​1-3, 11, ¿xi gucané David para maʼ cadi guidxibi?

³ Lu Salmo 56 bizeeteʼ David ximodo biʼniʼ sentir dxi nuu ndaaniʼ guidxi Gat. Lu Salmo ca bisiene chaahuibe xiñee cadxíbibe ne xi gucané laabe para maʼ cadi guidxíbibe: gápabe confianza Jehová (biindaʼ Salmo 56:​1-3, 11). Ne jneza guyé ni laabe pur decisión ni gucuaabe. Cumu gucané Jehová  David la? guníʼ íquebe gúnibe xiixa ni zándaca guidxagayaaluʼ: bíʼnibe laabe casi ti loco. ¡Ne ni bíʼnibe ca guizáʼ gucané ni laabe! Zaqué maʼ qué ñuuyaʼ Akís laabe casi tobi ni zanda gucaalú laa, sínuque casi tuuxa ni cuchiiñaʼ. Ngue gucané David para gunda bixooñeʼ (1 Sam. 21:13–22:1).

4. ¿Ximodo zanda guquídxinu confianza ni nápanu Jehová? Bizeeteʼ ti ejemplu.

⁴ Sti cosa ni zacané laanu para maʼ cadi guidxíbinu nga gápanu confianza Jehová. Peru ¿ximodo zanda guquídxinu confianza ni nápanu Jehová, jmaruʼ si ora cadxíbinu yaʼ? Guzéʼtenu ti ejemplu. Pa gábicabe laanu nápanu ti guendahuará, zándaca primeru ga zadxíbinu, peru zatadxí ladxidoʼno ora gánnanu chiguni tender ti buen doctor laanu. Zándaca maca huayuuyabe xcaadxi binni ni napa laaca guendahuará ni nápanu ca. Ne yanna maʼ cucaadiaga chaahuibe laanu, ne ridúʼyanu dxandíʼ peʼ riénebe ni cayuni sentirnu ne cayábibe laanu chigudiibe laanu ti tratamientu ni huayacané xcaadxi binni. Zacaca nga rizaaca né Jehová, jma rápanu confianza laabe ora riníʼ íquenu ni maʼ bíʼnibe ne ni chigúnibe pur laanu. Ne nga peʼ nga ni biʼniʼ David casi riete lu Salmo 56, ora maʼ cadúʼndanu ca versículo riʼ, galán guiníʼ íquenu ximodo zanda guquídxinu confianza ni nápanu Jehová ne maʼ cadi guidxíbinu.

¿XI BIʼNIʼ JEHOVÁ DXIQUÉ?

5. ¿Xi biʼniʼ David para maʼ cadi guidxibi? (Salmo 56:​12, 13).

⁵ Neca guyuu xquendanabani David ra naxoo, guníʼ íquebe ca cosa galán ni biʼniʼ Jehová dxiqué (biindaʼ Salmo 56:​12, 13). Ne qué nusaana de ñúnibe ni biaʼ dxi bibánibe. Stale biaje guníʼ íquebe lu ca ni bizáʼ Jehová, ne ngue bisietenalaʼdxiʼ laabe pabiáʼ napa Dios poder ne guizáʼ nadxii binni (Sal. 65:​6-9). Laaca guníʼ íquebe xi maʼ biʼniʼ Jehová pur xcaadxi binni (Sal. 31:19; 37:​25, 26). Ne ni jma risaca, guleebe tiempu para guiníʼ íquebe ni maʼ biʼniʼ Jehová pur laabe. Gucané Jehová laabe ne bilá laabe dede dxi nácabe ti baʼduhuiiniʼ (Sal. 22:​9, 10). Nanna dxíchinu, ora guníʼ ique David guiráʼ ndiʼ gucané ni laa gapa confianza Jehová de guidubi ladxidóʼ.

6. ¿Xi zacané laanu gápanu confianza Jehová ora maʼ cadxíbinu?

 ⁶ Ora maʼ cadxíbiluʼ, guníʼ ique: «¿Xi biʼniʼ Jehová dxiqué?». Zanda guiníʼ íqueluʼ ca cosa ni bizaʼbe. Casi ora ridúʼyanu ximodo rapa Jehová ca pájaru ne ca guieʼ, qué nuzáʼ Jehová ca ni casi laa ne qué zanda guni adorar ca ni laabe. Racané ndiʼ laanu chuʼnu seguru laaca zápabe laanu (Mat. 6:​25-32). Ne laaca zanda guiníʼ íqueluʼ ni maʼ biʼniʼ Jehová pur ca xpinni. Zanda gúʼndaluʼ ejemplu stiʼ ca xpínnibe ni riete lu Biblia o ni bizaaca ca xpínnibe de ca dxi stinu riʼ. a Laaca galán guiníʼ íqueluʼ ximodo huayapa Jehová lii. ¿Rietenaláʼdxiluʼ ximodo gucanebe lii gunibiaʼluʼ ni dxandíʼ la? (Juan 6:44). ¿Ximodo huacábibe ca oración stiluʼ? (1 Juan 5:14). ¿Xi ribeenduluʼ guiráʼ dxi pur bidiibe Xiiñibe guti pur lii? (Efes. 1:7; Heb. 4:​14-16).

7. ¿Ximodo gucané ejemplu stiʼ Daniel Vanessa?

⁷ Ti hermana de guidxi Haití láʼ Vanessa b gupa ti guendanagana ni guizáʼ bichibi laa. Ti hombre ni nabeza gaxha de ra nabézabe guiráʼ dxi riniʼné ne ruseendaʼ mensaje ra nuube para gucaa laabe gácacabe novio. Peru qué niná Vanessa, ngue runi guizáʼ bidxiichi hombre que dede guníʼ zuniná laabe. ¿Xi biʼniʼ Vanessa para maʼ cadi guidxibi yaʼ? Bíʼnibe guiráʼ ni nuu lu nabe para cadi guniná hombre que laabe ne gucané ti ancianu laabe para guiníʼnebe ca autoridad. Peru laaca bietenaláʼdxibe ximodo gucané Jehová ca xpinni de dxiqué. Laabe guniʼbe: «Primeca de profeta Daniel nga bietenaladxeʼ, laa qué ñuni xiixa cosa malu, neca zaqué bilaacabe laa ndaaniʼ ti bizé ra nuu stale lión, peru bilá Jehová laabe. Gudxeʼ Jehová maʼ bineʼ guiráʼ ni nuu lu nayaʼ ne gunabaʼ laa gacané naa, despué de ngue gutadxí ladxiduáʼ ne maʼ qué nidxibeʼ» (Dan. 6:​12-22).

¿XI CAYUNI JEHOVÁ YANNA?

8. ¿Xi gunna David? (Salmo 56:8).

⁸ Neca nuu xquendanabani David ra naxoo dxi guyuu ndaaniʼ guidxi Gat, qué nudiibe lugar nucueeza dxiibi que laabe. Sínuque guníʼ íquebe guiráʼ ni cayuni Jehová pur laabe óraque. Biiyabe ximodo cayuni dirigir ne cayapa Jehová laabe ne riene ni cayuni sentirbe (biindaʼ Salmo 56:8). Laaca gúpabe xhamígube ni qué nusaana, ni gucané ne ni guluu gana laabe, casi Jonatán ne sumo sacerdote Ahimélec (1 Sam. 20:​41, 42; 21:​6, 8, 9). Neca gucalaʼdxiʼ rey Saúl ñuuti laabe, gunda bilabe de lu náʼ, gunna dxíchibe nanna Jehová guiráʼ ni cazaacabe ne xi cayuni sentirbe.

9. ¿Xi nanna Jehová de cada tobi de laanu?

⁹ Pa cadxíbiluʼ purtiʼ cadíʼdiluʼ lu xiixa guendanagana, bietenalaʼdxiʼ nanna Jehová xi cazaacaluʼ ne xi cayuni sentirluʼ. Casi dxi nuu ca xpinni Dios de esclavu ndaaniʼ guidxi Egipto, biiyaʼ Jehová pabiáʼ naná nuucabe ne «xi guendananá cadíʼdicabe» (Ex. 3:7). Lu ti canción gudxi David Jehová: «Maʼ biiyaluʼ guendananá stinneʼ; [ . . . ] guiráʼ yuubaʼ cadideʼ» (Sal. 31:7). Ne ora gucaná xquidxi Dios pur ca decisión ni gucuaa, laaca gucaná Jehová (Is. 63:9). Pabiáʼ ratadxí ladxidoʼno gánnanu riene Jehová laanu ora cadxíbinu ne racalaʼdxiʼ gacané laanu para maʼ cadi guidxíbinu.

10. ¿Xi racané lii gánnaluʼ rizaalaʼdxiʼ Jehová lii ne nuuca listu para gacané lii?

¹⁰ Yanna, pa cadídinu lu xiixa guendanagana ni nabé cuchibi laanu, zándaca gaca nagana para laanu guidúʼyanu ximodo cayacané  Jehová laanu. ¿Xi zanda gúninu para cadi guizaaca nga yaʼ? Zanda guinábanu Jehová gacané laanu guidúʼyanu xi cayúnibe para gacanebe laanu (2 Rey. 6:​15-17). Despué, galán guiníʼ íquenu: ¿Ximodo huayacané xiixa discursu o comentariu ni huayunadiáganu ra reunión laanu? ¿Ñee guyuʼnu gana ora bidúʼndanu xiixa publicación, bidúʼyanu ti videu o bicaʼdiáganu ti canción la? ¿Ñee huayuundané tuuxa laanu xiixa textu ni guluu gana laanu o huayábicabe laanu xiixa diidxaʼ ni gudixhedxí ladxidoʼno la? Guiráʼ guendaró espiritual ni ricaanu ne modo nadxii ca hermanu stinu laanu nácacani regalu nabé sicarú stiʼ Jehová, peru riuu biaje riaandaʼ laanu guiníʼ íquenu pa zacá ni (Is. 65:13; Mar. 10:​29, 30). Rusihuinni ca regalu ca guizáʼ rizaaláʼdxibe laanu ne laasibe nga zanda gápanu confianza de guidubi ladxidoʼno (Is. 49:​14-16).

11. ¿Xi gucané Aida para maʼ cadi guidxibi?

¹¹ Ti hermana de guidxi Senegal láʼ Aida gudiʼdiʼ lu ti guendanagana ne biiyaʼ ximodo gucané Jehová laa. Cumu laabe nga baʼduʼ primé la? guleza bixhózebe ne jñaabe ñuni ganarbe bueltu para guibaninebe ne para gápabe laacaʼ. Peru gudixhe íquebe guchaabe modo nabánibe para gácabe precursora ne maʼ huaxiéʼ bueltu runi ganarbe. Pur ngue bidxiichiné familia stibe laabe ne riniʼcaʼ mal de laabe. Sicaríʼ bizeeteʼ Aida de modo cayuni sentir: «Bidxibeʼ maʼ qué ganda gacaniáʼ bixhozeʼ ne jñaa ne gudxiideche guiráʼ familia stinneʼ naa. Guníʼ iqueʼ Jehová ngue napa donda purtiʼ bidiibe lugar guiroobaʼ guendanagana que». Peru ti dxi biziidibe ti cosa ni guizáʼ gucané laabe lu ti discursu. Laabe guniʼbe: «Bisietenalaʼdxiʼ hermanu que laadu rietenalaʼdxiʼ Jehová guiráʼ ca herida ni nápanu ndaaniʼ ladxidoʼno. Ca ancianu ne xcaadxi hermanu laaca gúdxicaʼ naa diidxaʼ galán para gacanecaʼ naa guuyaʼ nadxii Jehová naa, ne chaahuiʼ chaahuiʼ maʼ bineʼ sentir jma galán. Ra zidiʼdiʼ dxi jma maʼ runeʼ orar Jehová de guidubi ladxiduáʼ, ne ora biiyaʼ modo ricábibe ca oración stinneʼ la? guizáʼ gutadxí ladxiduáʼ». Ra gudiʼdiʼ tiempu maʼ bidxélabe ti dxiiñaʼ ni gucané laabe gácabe  precursora, peru cadi nga si, laaca gucané ni laabe para gudiibe ni caquiiñeʼ bixhózebe ne jñaabe ne xcaadxi binni. Ne guníʼrube: «Maʼ biziideʼ gapaʼ confianza Jehová de guidubi ladxiduáʼ. Ora runeʼ orar racané ni naa para maʼ cadi lica guidxibeʼ».

¿XI CHIGUNI JEHOVÁ HUIDXE?

12. Casi riete lu Salmo 56:​9, ¿xi gunna David zuni Jehová?

¹² (Biindaʼ Salmo 56:9). Lu versículo riʼ riete sti cosa ni biʼniʼ David para maʼ cadi guidxibi ora guyuu xquendanabani ra naxoo: guníʼ íquebe xi zuni Jehová pur laabe despué. Nánnabe zulá Jehová laabe ora peʼ caquiiñeʼ gaca ni. Purtiʼ maca guníʼ Jehová maʼ laabe nga chigácabe rey stiʼ guidxi Israel (1 Sam. 16:​1, 13). Ne nanna David pa Jehová nga guníʼ ni la? seguru zuni ni.

13. ¿Xi nánnanu zuni Jehová?

¹³ ¿Xi maʼ guníʼ Dios zuni pur laanu? Dxandíʼ, qué ñuni prometer diʼ Jehová zabáninu sin gápanu guendanagana yanna. c Peru intiica si guizaaca lu sistema riʼ, maʼ biʼniʼ prometer Jehová laanu maʼ qué ziuu nin ti guendanagana ndaaniʼ guidxilayú cubi ca (Is. 25:​7-9). Nanna dxíchinu nápabe stale poder para gusibánibe ca ni maʼ guti, para gusiándabe laanu ne para gunitilube ca enemigu stinu (1 Juan 4:4).

14. ¿Xi zanda guiníʼ íquenu?

¹⁴ Ora maʼ cadxíbiluʼ, guníʼ ique xi chiguni Jehová huidxe si. Guníʼ ique ximodo zabani binni ora maʼ qué guinni Binidxabaʼ, ora maʼ qué chuʼ binni malu ne chuʼ puru si binni nachaʼhuiʼ. Ora chaahuiʼ chaahuiʼ maʼ gaca binni perfectu. Lu asamblea regional ni gúpanu lu iza 2014 que gudiʼdiʼ ti demostración ni zanda gacané laanu guiníʼ íquenu de esperanza ni nápanu. Luni gudiʼdiʼ ti hermanu ni cayuundané familia stiʼ 2 Timoteo 3:​1-5 peru biindabe ni casi ti profecía de modo zabani binni ndaaniʼ paraísu: «Lu guidxilayú cubi ca ziuu tiempu para guibani binni nayecheʼ, purtiʼ zannaxhiicaʼ binni, zannaxhiicaʼ ca cosa stiʼ Dios, nánnacaʼ ziuu ni qué zanda gúnicaʼ, zácacaʼ humilde, zusisácacaʼ Dios, zuzuubacaʼ stiidxaʼ jñaacaʼ ne stiidxaʼ bixhózecaʼ, zácacaʼ agradecidu ne leal, zápacaʼ cariñu familia sticaʼ, ziuucaʼ de acuerdu, siempre zaniʼcaʼ bien de sti binni, zucueezacaʼ laca laacaʼ, zácacaʼ nadóʼ, zannaxhiicaʼ ni jneza, zapa binni confianza laacaʼ ne ziuucaʼ razón, qué zácacaʼ orgulloso, zannaxhiicaʼ Dios lugar de gúnicaʼ ni riuuláʼdxisicaʼ, zusihuínnicaʼ runi adorarcaʼ Dios pur modo nabánicaʼ, siempre biyubi chuʼluʼ gaxha de ca clase binni riʼ». ¿Ñee maʼ biaʼnu guinínenu familia stinu o ca hermanu de modo chiguibáninu ndaaniʼ guidxilayú cubi ca la?

15. ¿Xi gucané Tanja para maʼ cadi guidxibi?

¹⁵ Ti hermana de Macedonia del Norte láʼ Tanja, bizeeteʼ ora guníʼ ique lu ca promesa stiʼ Jehová gucané ni laa para maʼ cadi nidxibi. Laabe guniʼbe guizáʼ bidxiichi bixhózebe ne jñaabe dxi bizulú bíʼndabe Biblia. Guniʼbe: «Ni peʼ jma cadxibeʼ guizaaca que, ngue peʼ bizaaca. Gudiñe jñaaʼ naa cada biaje guibiguetaʼ de reunión. Laabe ne bixhozeʼ guníʼcabe zuuticabe naa pa gacaʼ testigu stiʼ Jehová». Ne al fin si guládxicabe laabe de ra lídxibe. ¿Xi bíʼnibe yaʼ? Laabe guniʼbe: «Guníʼ iqueʼ pa gaca fiel Jehová, zabaneʼ nayecheʼ para siempre. Neca guniteʼ caadxi cosa lu sistema riʼ, zudii Jehová naa stale cosa lu guidxilayú cubi ca, ne zacanebe naa gusiaandaʼ ca cosa feu ni bizaacaʼ». Cumu qué nusaana Tanja Jehová la? gucané Jehová laabe guidxélabe ti lugar ra cuézabe. Yanna maʼ bichaganabe  ti hermanu fiel ne guirópacabe nuucabe nayecheʼ ne cayúnicabe xhiiñaʼ Jehová de tiempu completu.

YANNA NGA JMA NAQUIIÑEʼ GUIROOBAʼ CONFIANZA NI NÁPANU JEHOVÁ

16. ¿Xi zacané laanu gácanu nadxibalú ora gaca cumplir ni riete lu Lucas 21:​26-28?

¹⁶ Lu gran tribulación ca «zieeguʼ binni de tantu cadxibi». Peru ca xpinni Jehová zácanu nadxibalú ne zuzuhuaʼnu dxiichiʼ (biindaʼ Lucas 21:​26-28). ¿Xiñee qué zadxíbinu yaʼ? Purtiʼ maʼ biaʼnu gápanu confianza Jehová. Ca cosa ni bidxaagalú Tanja dxiqué racané ni laabe gudxiilube xcaadxi guendanagana ni rápabe. Laabe guniʼbe: «Maʼ biziideʼ zanda gacané Jehová ne cuʼ ndaayaʼ laanu lu intiica guendanagana ni guidxaagalunu. Nuu biaje ruluíʼ nga xcaadxi binni runi controlar xquendanabáninu, peru ni dxandíʼ nga runi controlárcabe ca cosa ca peru biaʼ gudii si Jehová lugar laacabe gúnicabe ni. Neca ruluíʼ guizáʼ nadipaʼ guendanagana ra cadíʼdiluʼ, peru zedandá dxi zaree ni».

17. ¿Ximodo zacané textu stiʼ iza 2024 laanu? (Biiyaʼ foto ni zeeda lu portada).

¹⁷ Neca nuu stale cosa ndaaniʼ guidxilayú riʼ ni zanda guchibi laanu, peru cásica David qué zudiʼnu lugar gucueeza dxiibi ca laanu. Lu textu stiʼ iza 2024 zeeda ca diidxaʼ ni gudxi David Jehová: «Ora cadxibeʼ, rapaʼ confianza lii» (Sal. 56:3). Sicaríʼ cusiene ti libru ni caníʼ de Biblia de versículo riʼ:«Qué riníʼ ique David de ca ni ruchibi laa ne qué ricá ique xhaataʼ ca guendanagana stiʼ, sínuque rápabe confianza tobi lucha ni zanda gulá laabe». Cadi guiaandaʼ lii textu stiʼ iza riʼ ca beeu zeeda ca, jmaruʼ si pa cadíʼdiluʼ lu ti guendanagana ni guizáʼ cayuniná lii. Gulee tiempu para guiníʼ íqueluʼ ni maʼ biʼniʼ Jehová, ni cayuni ne ni chiguni. Cásica David, zanda guininu: «Riguixheʼ confianza stinneʼ lu náʼ Dios, qué ridxibeʼ diaʼ» (Sal. 56:4).