1. ¿Xigony rioʼ ór labúu guidzuibyno?

 RIOʼ ÓR guiráno radzuibyno. La Biblia ma bisuidy lóono que diti guidzuibyno gueʼet, demony nili ni gac ló dzú ni sietra. Per ná scú, nabanyno ló toib Gudxlio ro bidzagoluʼ «cós nadzuʼpy», xomod guerr, galrradíil né galguitz (Luc. 21:11). Sigory láaca radzuibyno buñchiin, xfamilno o stipnés buñ ni diti rioʼ de acuerdo né religión ni nigolú. Né noʼ ni radzuiby que diti labúu sacalóyibu prueby ni cacalóyibu nigoreʼ o ni guicalóyibu ló dzú ni sietra.

2. ¿Xí láani góc órni David bidxin gudx Gat?

² Gonyno pensary ló toib xpiin Dios ni goyoʼ ór bidzuiby. Láabu ngú David. Órni rey Saúl cuanal láabu par nagaity láabu, bixonybu goyeebu toib gudx filistea ni góc laa Gat. Órni goyoʼ ni góoch Akís ni nac rey xtuny gudx Gat, que David nac toib ni nan radíil ló guerr né ma bigaitybu xidal mil buñ filisteos, David bidzuibygolú (1 Sam. 21:10-12). Goyoʼbu ló galrrasaʼ xi labúu ñony rey láabu. ¿Xí láani buny David par ma diti nadzuibybu?

3. Mod ná Salmo 56:1-3, 11, ¿xí láani buny David par ma diti nadzuiby?

³ Ló Salmo 56, David goniʼ ximod gosacbu laʼga goyoʼbu lainy gudx Gat. Ló salmo cu bisetlabu xigony bidzuibybu né xi gocné láabu par ma diti nadzuibybu: gopbu confianz lóo Jehová (bíil Salmo 56:1-3, 11). Né galán goyeeni láabu ni goloʼbu guicbu ñonybu. Né xcalnasác Jehová, noʼ ni bitzanló ló xpensary David ñony: bunybu suusi nacá yoʼob láabu. ¡Né gocnéni láabu! Par  Akís ma diti gócbu toib riesga, por ngú David biyopy mod par naxony (1 Sam. 21:13–22:1).

4. ¿Ximod labúu gony nadipno confianz ni napno lóo Jehová? Bisetlaa toib ejemplo.

⁴ Confianz ni napno lóo Jehová láaca labúu gacnéni lóono par ma diti guidzuibyno. Per ¿ximod labúu gony nadipno confianz ni napno lóo Jehová, máspa órni cadzuibyno? Guisetlano toib ejemplo. Pal raibyibu lóono que napno toib galguitz, sigory primer radzuibyno. Per ni nanno que noʼno nisló toib doctor sigory ngú labúu sacné lóono par diti guidzuibyno. Pentzi gocnébu xidal buñ ni bixoné galguitz ni caxonéno. Pentzi racadiagtzaybu lóono né radudyno cuent que riembu yoʼob ni cadudyno ló. Né sigory raibybu lóono que sadudybu remeidy ni ma gocné xidal buñ. Scúca rac né Jehová: sapno más confianz lóbu pal ronyno pensary ló ni ma bunybu, ló ni cayonybu nigoreʼ né ni gonybu. Ngú ni buny David ló Salmo 56. Laʼga guisuidyno tipnés versículos cu, gonyno pensary ximod labúu gony nadipno confianz ni napno lóo Jehová par ma diti guidzuibyno.

¿XÍ LÁANI BUNY JEHOVÁ LÓ DZÚ NI SEE?

5. ¿Ló xí láani buny pensary David par ma diti nadzuiby? (Salmo 56:12, 13).

⁵ Ná xcalnabany David goyoʼni ló riesga, goloʼbu guicbu ni buny Jehová né láabu ló dzú ni see (bíil Salmo 56:12, 13). David guirá ór bunybu ngú laʼga bibanybu. Por ejemplo, goyoʼ ór bunybu pensary ló ni bisaʼ Jehová, né ngú buny que nasetnaladxbu que Jehová nap xiroʼ galnadip né que nigolú ronladxbu buñ (Sal. 65:6-9). Láaca bunybu pensary ló ni ma buny Jehová por stipnés (Sal. 31:19; 37:25, 26). Né máspa la, goleʼbu tiemp bunybu pensary ló ni ma buny Jehová por láabu. Jehová gocné, né bilaa láabu dzú gócbu badaʼ (Sal. 22:9, 10). Ni buny David pensary ló guirá ndeʼ, gocnéni láabu par gopbu confianz lóo Jehová né guidopy xcalnabanybu.

6. Órni radzuibyno, ¿xí láani gacné lóono gapno confianz lóo Jehová?

 ⁶ Órni guidzuibylo, gonabdiitz ndeʼ looy: «¿Xí láani ma buny Jehová ló dzú ni see?». Buny pensary ló ni ma bisaʼ Jehová. Por ejemplo, órni racaano cuidad ximod ran Jehová manybiguin né guieʼ ni diti goyaʼ xomod láabu né ni diti labúu guieen láabu, rac nadip confianz ni napno lóbu né que láaca labúu sacnébu lóono (Mat. 6:25-32). Láaca buny pensary ló ni ma buny Jehová por xpiin. Sigory labúu guisuidylo de fe de buñ ni ritlaa ló la Biblia o goʼolo toib experiencia de xpiin Jehová ni noʼ ló xtzúno. a Láaca buny pensary ximod ma gon Jehová looy dada nigoreʼ. ¿Ximod gocnébu looy par bimbulo galnigolú? (Juan 6:44). ¿Ximod ma cuapy Jehová oración xtunylo? (1 Juan 5:14). ¿Ximod racnéni looy guirá dzú ni bunycuent Jehová Xiin goity por looy? (Efes. 1:7; Heb. 4:14-16).

7. ¿Ximod gocné experiencia xtuny profeta Daniel a Vanessa?

⁷ Toib hermana de Haití ni laa Vanessa b godudybu ló toib galrrioʼob ni bitzuiby láabu. Toib buñguieeu ni bibany ro golésbu bixel mensaj lóbu guirá dzú né bikíil láabu par ñacbu ximbiox gonaʼ buñguieeu reʼ. Láabu gochbu buñguieeu reʼ que yaca, per buñguieeu reʼ bidzuitz né dada góc nadox. ¿Xí láani buny Vanessa par ma diti nadzuʼpy? Noʼ ni bunybu par diti nasaclobu xitcal, né toib anciano gocné láabu par nayopybu buñchiin. Per láaca bisetnaladxbu ximod gop Jehová xpiin ló dzú ni see. Láabu nábu: «Primerdiguieʼ buñ ni bisetnaladxi láabu ngú profeta Daniel. Ná diti bunybu cós mal, bisal buñ láabu ronoʼ betz ni calangoluʼ, per Jehová bilaa láabu. Goodxi Jehová que buni rutigoygaʼlni naʼ né gonaba láabu ñacnébu naʼ. Después de ngú ma diti bidzubi» (Dan. 6:12-22).

¿XÍ CAYONY JEHOVÁ NIGOREʼ?

8. ¿Xí láani gop David confianz? (Salmo 56:8).

⁸ Ná goyoʼ David ló riesga laʼga goyoʼbu gudx Gat, diti bidzuibybu. Xalagary ngú, goloʼbu guicbu ni cayony Jehová por láabu órcu. Bidudybu cuent que Jehová cayan né cayap láabu né que rasacbu ni rasac David (bíil Salmo 56:8). Láaca biquiimbu xcalrracné ximigbu ni buny animar láabu xomod Jonatán né sumo sacerdote Ahimélec (1 Sam. 20:41, 42; 21:6, 8, 9). Ná rey Saúl goniiny nagaity láabu, David labúu bilaa. Gondxichbu que Jehová nantzay xi ni casaclobu né ximod casacbu.

9. ¿Xí láani nantzay Jehová de tigaagano?

⁹ Pal cacalólo toib galnagandaʼ né radzuibylo bisetnaladx que Jehová diti nosi nan xi ni casaclolo, láaca nanbu ximod rasaclo. Por ejemplo, órni xpiin Dios goyoʼbu xan xomandary buñ Egipto, Jehová bimbutzaay galrrioʼob ni godudyibu ló (Éx. 3:7). Ló toib canción, David goniʼ que Jehová bibiʼ xcalrrioʼobu né galrrasaʼ ni goyoʼbu ló (Sal. 31:7). Né órni xcudx Dios godudy ló galrrioʼob por guirá ni goloʼyibu guicyibu ñonyibu, Jehová «láaca bioʼobni láabu» (Is. 63:9). Rialdó xcalnabanyno ni nanno que, órni  cadzuibyno, Jehová rien né nainy láabu gacnébu lóono par ma diti guidzuibyno.

10. ¿Xí radudy confianz looy que Jehová rioʼ galrrasaʼ por looy né que guirá ór sioʼbu cu par gacnébu looy?

¹⁰ Pal cadudyno ló galnagandaʼ ni ratzuiby lóono, sigory rasacnaganno guidudyno cuent ximod cayacné Jehová lóono. ¿Xí labúu gonyno? Guinabno láabu gacnébu lóono guibiʼno xi cayonybu por lóono (2 Rey. 6:15-17). De ngú gonyno pensary: ¿Ma buny nadip lóono toib discurs o comentario ni bicadiagno ló reunión la? ¿Ma buny animar lóono toibtica publicación, toib video o toib canción la? ¿Ma goyoʼ toib herman ni bilné toib texto o ma góoch lóono tipnés diitz ni bisialdó xcalnabanyno la? Rioʼ ór rasacnaganno guisetnaladxno que galrronladx ni racaʼno de xhermanno né guirá galrro espiritual nacni galrrascad ni rasac ni radudy Jehová lóono (Is. 65:13; Mar. 10:29, 30). Guirá galrrascad reʼ raslooyni que rioʼbu galrrasaʼ por lóono né que láasibu non gapno confianz (Is. 49:14-16).

11. ¿Xí láani gocné a Aida par ma diti nadzuiby?

¹¹ Toib hermana de Senegal ni laa Aida godudybu ló toib galnagan né bibiʼbu ximod cayacné Jehová láabu. Bixiosbu né xinaʼbu golésbu que láabu ñony ganarbu xiroʼ bidxiich par labúu ñacnébu xfamilbu, portín láabu lagol. Per láabu goloʼbu guicbu ma diti ñonybu pórsi dxiin par labúu ñacbu precursora, por ngú ma diti buny ganarbu xiroʼ bidxiich. Né xfamilbu bidzuitz né goniʼ mal de láabu. Aida raniʼ ximod gosac: «Bidzubi que ma diti labúu ñacnéya xfamila né ma diti nagobioyibu naʼ. Dada bigotz dool Jehová portín bidudybu lagary que guirá cós reʼ ñacxiroʼni más». Per toibtica dzú bicadiagbu ni godudy ló toib discurs ni gocné láabu: «Hermanocu bisetlabu guirá galrrioʼob ni noʼ lainy xcalnabanyno. Láaca ancianos né stipnés herman gochyibu naʼ cós ni labúu ñacné naʼ par nabiʼya que Jehová nadxiʼ naʼ, né dxoga dxoga gosaca sacró. Gosalóya buni oración Jehová né gopa más confianz láabu, né  ni bibiʼya ximod cuapy Jehová oración ni buni bunyni que gosaca más sacró». Bidxin midid bidzelbu toib dxiin ni bidudy lagary ñacbu precursora, né labúu ñacnébu xfamilbu né stipnés buñ. Láabu nábu: «Bisudi ñapa confianz lóo Jehová. Ni roni oración ronyni que ma diti guidzubi».

¿XÍ GONY JEHOVÁ LÓ DZÚ NI SIETRA?

12. Mod ná Salmo 56:9, ¿xí láani gondxich David?

¹² (Bíil Salmo 56:9). Versículo reʼ raslooyni stoib cós ni buny David par ma diti nadzuiby pal ñaitybu o yaca: bunybu pensary ló ni gony Jehová por láabu ló dzú ni sietra. Gonbu que Dios nalaa láabu órni naquiimbu láani. Jehová goniʼ que David nadxin ñac rey de gudx Israel (1 Sam. 16:1, 13). David gon que, pal Jehová goniʼ láani labúu ñac cumplirbu.

13. ¿Xí láani nanno que sony Jehová ló dzú ni sietra?

¹³ ¿Xí láani ma bidudy Jehová xtiitz gony né lóono? Diti ma goniʼbu que guibanyno ló naareʼ sin guicalóno galnagan. c Per nac nitisi ni tudyno ló gudxliogoxreʼ, Jehová ma bidudy xtiitz que ló Gudxlio copy ma diti sadudyno ló galnagan (Is. 25:7-9). Jehová nap xiroʼ galnadip par guilísbu buñ ni ma goity, par guisialbu né par guinitlóbu guirá xienemigno (1 Juan 4:4).

14. ¿Ló xí láani labúu gonyno pensary?

¹⁴ Órni guidzuibylo, buny pensary ló ni gony Jehová ló dzú ni sietra. Buny pensary ximod guibany buñ órni ma diti sioʼ Buñdzab, órni ma nosi buñtzay sioʼ cu, né órni galkié dxoga dxoga ma diti sioʼ. Ló samblia de tzón govitz ni góc ló íz 2014 godudy toib demostración ni labúu gacné lóono gonyno pensary ló esperanza xtunyno. Loni toib hermano goniné xfamil ni ritlaa ló 2 Timoteo 3:1-5 pal ñacni toib profecía ro ritlaa de Gudxlio móz: «Ló Gudxlio copy sieed dzú nakit portín buñ sonladx saʼ; sonladxyibu cós espiritual, sacyibu buñdxo, sonyxiroʼyibu Dios, sasobyibu bixiosyibu né xinaʼyibu, sadudyibu guixquix, sonladxyibu xfamilyibu, sadxinyibu toib acuerdo, guirá ór saniʼyibu cós tzaay de stipnés, sony mandaryibu láacayibu, sacyibu buñ nadaʼa, sonladxyibu cós tzaay, sap buñ confianz layibu né sioʼyibu ló razón, diti sacyibu buñ farmay, sonladxyibu Dios xalagary bidxiich né sony adoraryibu Dios. Guirá ór goyoʼ gax de layibu». ¿Ma biaʼno raninéno xfamilno né herman ximod sac ló Gudxlio copy la?

15. ¿Xí láani gocné a Tanja par ma diti nadzuiby?

¹⁵ Tanja nacbu toib hermana de Macedonia del Norte ni ma diti bidzuiby portín bunybu pensary ló galnasác ni guitné Jehová. Láabu nábu que, órni gosalóbu bisuidybu la Biblia, bixiosbu né xinaʼbu bidzuitz: «Godudi ló ni nigolú bidzubi. Xinaʼya godin naʼ guirá ór ni bibigueta ni goyaʼya reunión. Láabu né bixiosa goniʼyibu que sagaityibu naʼ pal ñaca Testigo». Dada bixonyibu naʼ lidxyibu. ¿Xí láani bunybu? Láabu nábu: «Goloʼya guica ñoni pensary, que pal ñaca fiel Jehová, nabani nakit por tipzó. Goodxi naʼca, ná pal nasnita cós ló gudxliogoxreʼ Jehová nadudy xcalnasác naʼ né ñaladxi guirá ni godudi ló». Tanja diti bisiambu Jehová, né xcalrracnébu bidzelbu toib lagary  ro golésbu. Nigoreʼ láabu né tzeelbu nodieʼyibu cayonyibu xchiin Dios.

GONY NADIPNO NIGOREʼ CONFIANZ NI NAPNO JEHOVÁ

16. ¿Xí láani sadudy balory lóono órni gac cumplir ni ná Lucas 21:26-28?

¹⁶ Ló gran tribulación, casi guirá buñ «saitycay de galdzuiby». Per xpiin Dios sapno balory né diti sioʼ xi sacno (bíil Lucas 21:26-28). ¿Xigony? Portín ma biaʼno rapno confianz lóo Jehová. Tanja ná que cós ni godudybu ló dzú ni see racné láabu tudybu ló galnagan nigoreʼ: «Ma bisudi, par Jehová diti noʼ cós nagan ro diti labúu gacnébu lóono né guisiabbu xcalnasácbu. Rioʼ ór ralooyni que tipnés buñ rony mandary guiráni, per diti nacni scú, rony mandaryibu midid ni radudy Jehová lagary gonyibu. Ná xiroʼ nac toib prueby sioʼ dzú sanitlóni».

17. ¿Ximod sacné texto de íz 2024 lóono? (Bibiʼ retrat ni sieed laidy guiich reʼ).

¹⁷ Ná ló Gudxlio reʼ noʼ xidal cós ni ratzuiby lóono, nacno xomod David né diti radudyno lagary que guitzuibyni lóono. Texto de íz 2024 nacni tipnés diitz ni góoch David a Jehová: «Órni cadzubi, raapa confianz looy» (Sal. 56:3). Toib obra de consulta golexa versículo reʼ modreʼ: «David diti bunygoluʼbu pensary ló galdzuiby né ló galnagan ni gopbu, xalagary ngú gopbu confianz ló ni labúu ñacné láabu». Guirá ór bisetnaladx texto de íz reʼ, né máspa la, órni guicalólo toib galnagandaʼ. Goleʼ tiemp buny pensary ló ni ma buny Jehová ló dzú ni see, ló ni cayonybu ló naareʼ né ló ni gonybu ló dzú ni sietra. Né modcu susica David, labúu guiniʼlo: «Raapa confianz lóo Dios, [...] diti radzubi» (Sal. 56:4).