1. Eeghe kụ iḍighi kụ aḍio aMemorial phọ eḍighi bọ ḍigbogh aḍio siphẹ alhạ phọ? (Luk 22:​19, 20)

 ESI Abugbaanhaạn AZihova, aḍio ootughiạn aḍuugh phọ aKraist kụ aḍigbogh aḍio siphẹ alhạ phọ. Ephẹn phọ bịn kụ eḍighieeny dị aZizọs akạr atọ mọ abumatuạn phọ odị oḍighi ghan. (Bạl Luk 22:​19, 20.) R’ikpukpụ yira rogon ghan ni ḍio aMemorial phọ loor ibadị ariphigh. Uguạ, ooḅeghiọn iniin ariphigh phọ.

2. Ighẹn kụ iniin ariphigh phọ yira otụ bọ rogon ghan ḍio aMemorial phọ?

² AMemorial phọ rulhoghonhaạn ghan iyira ḍighaạgh ogbirima ipẹ ekiạ etagharạn phọ emhạn bọ maạr iboom. Righiọm ghan iyira olhoghi reten dị yira kotue oḍeenhaan mọ yira osereghiạn ni ekiạ phọ aZizọs. (2 Kọr. 5:​14, 15) Ringọ ghan kẹn iyira eepoogh dị omheeraam mọ ayira ‘kaloghonaạn ḍighaạgh oomo’ abumor r’abumaranhi phọ. (Rom. 1:12) Torobọ alhạ, ibadị abuphẹ moophoọm bọ rotu aani ghan ni aMemorial phọ. Abuniin abidị roḅilhẹ ghan ni koḅula esi aZihova loor esi eenyuụm mọ r’oghuraam mọ ongọ bọ bidị. Ḅilhẹ kẹn ibadị dị oḍeenhaan ḍiḅeraạn romiigh ghan ni orelhe aani isiẹn eten aghuḍum mọ loor ipẹ bidị omhiịn bọ oḅilhẹ onhaghạn. Pọ kụ iyaạr phọ aMemorial phọ amhạn bọ maạr esi ayira!

3. Ika kụ idị aMemorial phọ ruḅophoghị ghan iyira siẹn oomo aḅirinhi phọ? (Miịn kẹn afoto phọ.)

³ Tuutughiạn kẹn ipẹ aMemorial phọ ruḅophoghị ghan bọ iyira r’oomo abumor r’abumaranhi phọ siẹn aḅirinhi phọ. Abugbaanhaạn AZihova rookpomhoghan ghan ni mem dị erumuḍio remeel ighool siẹn oomo aḅirinhi phọ. Oomo ayira roḅophoghạn ghan ni konhaghạn oghaạph dị rakaạph ghan kalhọgh iiphaghamhiọm ipẹ ekiạ etagharạn phọ emhạn bọ maạr iboom. Yira roḅophoghạn ghan ni komhoọr iyạl asuọr, komhiịn mem dị rotelheom abrẹd r’amiim mọ, koḅilhẹ oḅophoghạn oḅẹm mọ “erọl li idiphọ” esi inya iiḅereghị phọ ooḅereghị bọ. Esi 24 awạ, oomo arookpomhoghan phọ mophạm aMemorial phọ omạn. Nạ katue ni agbiom olhoghi ibo phọ aZihova r’aZizọs romoọgh ghan bọ mem dị bidị omhiịn dị  yira oḅophoghạn rokuenhi bidị eten phọ ephẹn phọ ḍughụm?

4. Yira kooḅeghiọn eeghe siẹn emhuoghaạph phọ ephẹn phọ?

⁴ Siẹn emhuoghaạph phọ ephẹn phọ, yira kooḅeghiọn sipuru phọ iphẹn: Ika kụ idị yira kotue ookolhobian ekpom ayira ilọ aMemorial phọ? Ika kụ edị yira kotue ologhonhaạn ḍighaạgh bunhọn omhooghọm aani asuọ? Ḅilhẹ ika kụ idị yira kotue ologhonhaạn ḍighaạgh buphẹ moophoọm bọ? Olhegheri ophanyanhaạn asipuru phọ iphẹn phọ kilhoghonhaạn iyira ḍighaạgh ookolhobian ilọ aḍio phọ aḍiphẹ phọ egbatanhaạn bọ.

IKA KỤ IDỊ YIRA KOTUE OOKOLHOBIAN EKPOM AYIRA ILỌ AMEMORIAL PHỌ?

5. (a) Uḍighi ika kụ ewạ bọ dị yira kogbirima iyaạr phọ eḍighi bọ kụ ekiạ etagharạn phọ emhạn bọ maạr? (Psalm 49:​7, 8) (b) Avidio phọ AJizọs Atụ Eeghe Kụ Amhugh Bọ atughemhị nyinhạ eeghe?

⁵ Eniin eten dị emhạn maạr dị yira kotue ookolhobian ekpom mọ ayira ilọ aMemorial phọ pọ ogbirima ghan ipẹ ekiạ etagharạn phọ aZizọs Kraist emhạn bọ maạr. Onyọ ayira o/lho dị katue atagharạn loor odị esi ikarạph r’aḍuugh. (Bạl Psalm 49:​7, 8; poghom vidio phọ AJizọs Atụ Eeghe Kụ Amhugh Bọ?) a Esi iduọn phọ aZihova amiteom ni iikolhobian dị oọny phọ odị kangọ ghuḍum odị otagharạn omhạr awe, epẹ phọ ekạr kụ eḍighi egbogh ekiạ dị aZihova r’Oọny phọ odị ophighirọn. (Rom. 6:23) Rebughẹ ghan ni osereghiạn phọ ayira esi ekiạ etagharạn phọ mem dị yira ogbirima ipẹ aZihova r’aZizọs moḍighi bọ. Yira kooḅeghiọn iyạl ikpo araraạr dị aZihova r’aZizọs uḍighinhaan iyira. Iwạ eeghe orue omiteom ekiạ etagharạn phọ?

6. Iwạ eeghe orue omiteom ekiạ etagharạn phọ?

⁶ Ekiạ etagharạn phọ eḍighi iyaạr dị okpẹ ogho oḅulhemhi iyaạr. Oḅẹl oye phọ Adạm, aḍighi oye dị amhunhughan mem mọ olhẹm bọ nyodị. Mem mọ odị aḅaạr bọ emhụ phọ, odị r’anmụny phọ odị uroph ni oḍuom olhoghi omhoọgh aghuḍum k’agee-pọ. AZizọs asighẹ ghuḍum mọ odị amhunhughan bọ aphighironhọm ekiạ, orue ogho oḅulhemhi ipẹ Adạm aroph bọ. Siphẹ oomo adọl aghuḍum mọ odị siẹn ade phọ, aZizọs “ikarạph o/ḍighi. Oghaạph iigbegheḍiom o/ḍuạ onhụ odị omite.” (1 Pit. 2:22) Mem mọ aZizọs amhugh bọ, odị amhunhughan idiphọ Adạm mem mọ Adạm ko/gbagharạn bọ Enhaạn. Esi iduọn phọ, ekiạ phọ ikạr ekasiẹn ogho oḅulhemhi aghuḍum mọ Adạm aroph bọ.—1 Kọr. 15:45; 1 Tim. 2:6.

7. Eeghe odẹgh ophogh kirokirọ kụ edị aZizọs asoman siẹn ade phọ?

⁷ Mem mọ aZizọs arọl bọ siẹn ade phọ, odị adaphạn ghan ni oomo itọ Odẹ phọ odị ghalhamọ r’amem dị ekparanhaạn ni nyodị. Mem mọ odị aḍighi bọ obumoọny, odị asooromhi ni loor anhaghanhạn ghan odẹ r’onhiin phọ odị ghalhamọ r’iduọn bidị u/munughan bọ ni. (Luk 2:51) Idiphọ oḍoọgh, odị aghel li odẹgh ophogh oḅaạr emhụ oghị esi odẹ r’onhiin odị obobọ aZihova. Kụ idiphọ oye dị mamhanhạm, aZizọs aghị ni ghisigh aghel odẹgh ophogh oḍighi ikarạph r’ogbagharạn Enhaạn, aSetan anyu bọ aruom. (Mat. 4:​1-11) ASetan aḍighi ni oomo ilọ odị katue omhiịn mọ aZizọs aḍighi ikarạph pidị ekikima nyodị ongọ aghuḍum mọ odị idiphọ ekiạ etagharạn.

8. Eeghe inhọn odọ ikpuuroghọm kụ edị aZizọs akparạm?

⁸ Siphẹ oḍighi oghaạph iiḅi iinhaghạn phọ odị, aZizọs aḅilhẹ ni akparaghạm inhọn ikpuuroghọm. Amulhọgh ḍien odị ugbiphoghọm ghan ni nyodị kụ owạ ghan oghiigh odị. (Luk 4:​28, 29; 13:31) Odị akparaghạm ghan ni e/munughan abumatuạn phọ odị. (Mạk 9:​33, 34) Kụ osiph nyodị, omhiinhẹ, oḅilhẹ ogilaạm. Kụ eekunha phọ osophonhaan nyodị ooruẹn aḍuugh idiphọ osoroghuom iilhogh kụ amhiinhọm eboom eephinha  r’aroofolha. (Hib. 12:​1-3) AZihova o/ghoph nyodị osighẹ esi imhinhimhiịn phọ odị asoman bọ kụ agbi bọ omhugh. b—Mat. 27:46.

9. Ika kụ edị ekiạ phọ aZizọs etir nyinhạ? (1 Pita 1:8)

⁹ Dị eegholhaan ni, aZizọs akạr kụ amhiinhọm orue omiteom ekiạ etagharạn phọ. Mem dị yira ootughiạn oomo araraạr phọ aZizọs uḍighinhaan bọ iyira eten dị nyodị u/kpaariọm, relọgh ghan ni kephophe ephomhoghiạn phọ yira omhoọgh bọ oghị esi odị.—Bạl 1 Pita 1:8.

10. Eeghe ekiạ kụ edị aZihova aphighirọn orue omiteom ekiạ etagharạn phọ?

¹⁰ Kokaạph ika ilọ aZihova? Eeghe ekiạ dị u/kpaariọm kụ edị aZihova aphighirọn pidị aZizọs arue akpẹ ekiạ etagharạn phọ? AZihova r’aZizọs omoọgh siya odẹ r’oọny dị ekpạr epu idị ketue etọl igbo onhọn odẹ r’oọny. (Prov. 8:30) Gbiom olhoghi anạ, ipẹ aZihova alhoghoma bọ mem mọ odị amhiịn bọ dị aZizọs ramiinhọm imhinhimiịn kirokirọ siẹn ade phọ. Dị iikạ i/lo akạr kụ alhoghoma egbogh eephinha omhiịn dị rokpiloghọm, ḅilhẹ omhiịn dị odị ramiinhọm.

11. Kaaphọm r’eḍeenhaan amạ amiteom ipẹ aZihova alhoghoma bọ mem mọ oghiigh bọ Zizọs.

¹¹ Odẹ r’onhiin dị oọny abidị mamhugh ghan olegheri ni eboom eephinha dị aḍuugh obumoọny rekọm ghan. Ii, yira oḍuom ni olhoghi mọ oḅetenhu esi aḍuugh katọl li, kuolọ ipẹ phọ re/sighẹ ghan eephinha phọ retọl ghan bọ mem dị oye ephomhoghiạn ayira amhugh. Iphẹn phọ ilhoghonhaạn iyira ḍighaạgh onhaghanhạn ipẹ aZihova alhoghoma bọ mem mọ odị amhiịn bọ dị ooḅi Oọny phọ odị amhiinhọm kụ aḅilhẹ amhugh lhạ phọ 33 C.E. c—Mat. 3:17.

12. Eeghe kụ edị yira koḍighi siḍughul otu aMemorial phọ?

¹² Nạ ragbi mọ ke”nighẹ dị nạ katuughạ abughẹ ilọ ekiạ etagharạn phọ mem dị nạ aphạm ituughạ ogina anạ obobọ iiseeny eghunotu, emhiigh nyiidiphọ kụ eteẹny ḍio aMemorial phọ? Sighẹ aḍighinhom Research Guide for Jehovah’s Witnesses obobọ inhọn arinyạ dị egbạ Baibul phọ, atuughaạm abughẹ ilọ etagharạn phọ. d Ḅilhẹ kẹn, miịn ni mọ nạ adaphạn ni edeọm ibạl aBaibul aMemorial phọ edi bọ siphẹ Aḍinyạ Ituughạ—Adọl Aghuḍum Onyọ Akristẹn r’Oghaạph Ilọ Omhạr Phọ. Kụ ḍio aMemorial phọ, u/bula ghan ophogh aani Iiseeny Aḍiroọr AMemorial phọ. Mem dị yira ookolhobian ekpom ayira ilọ aḍio aMemorial phọ, pọ yira kotue ni ologhonhaạn bunhọn ḍighaạgh omhooghọm aani asuọ.—Ezra 7:10.

 LOGHONHAẠN BUNHỌN ḌIGHAẠGH OMHOOGHỌM ASUỌ

13. Eeghe kụ eḅẹl iyaạr dị yira kotue oḍighi olhoghonhaạn abunhọn ḍighaạgh omhooghọm aani asuọ aMemorial phọ?

¹³ Ika kụ edị yira kotue ologhonhaạn ḍighaạgh bunhọn omhooghọm asuọ aMemorial phọ? Eḅẹl phọ pọ, omhạgh aani abidị oru aani. Etigheri omhạgh abuphẹ yira rozuan ghan bọ mem dị yira omite epẹ erugh phọ, yira otue ni ogẹ siḍien awe dị yira olhegheri obọ yira otue omạgh aani bidị. Abuẹn phọ oḅaramaạm siya ayira, buọ otu oḍighi ayira, buọ askul ayira, r’abunhọn dị yira olhegheri. Ghalhamọ yira u/moọgh ni ḍinyạ aḍimhạgh phọ iboom, yira otue ni ongọ oye phọ opọ afon phọ. Eeni bidị otue ni otu aani!—Eccl. 11:6.

14. Kaạph amaaniọm iikpọ dị ongọ oye ḍinyạ aḍimhạgh emhoọgh.

¹⁴ Awe otue ni otu aMemorial loor esi dị yira kụ ukạr omhạgh bidị. Ḍiniin aḍio, oniin onyọ umaranhi dị olom mọ u/ḍighi onyọ ogbaanhaạn r’oḅaạl olhoghi aḅenhị onyọ umaranhi phọ m’onọ kadạph nyodị akị aani aMemorial phọ. Iphẹn phọ iḍighi ni iikia esi onyọ umaranhi phọ. Loor esi dị odị mamhạgh ni nyodị ibadị amem epẹ omhạn oru aani aMemorial phọ kuolọ i/ḅọph. Eeghe kụ iḍighi bọ iyaạr phọ olom mọ odị rawạ bọ oru anyiidiphọ? Olom mọ aḅẹm mọ: “Oye kụ ungọ imhị ḍinyạ aḍimhạgh phọ.” Ii okumor oye ookpomhoghan dị odị alhegheri kụ amhạgh nyodị oru aani. Olom mọ ophọn phọ aghiọm ni ghisigh aghị ghan aMemorial phọ esi ibadị asiạ.

15. Eeghe kụ edị nạ kalọgh olhoghi mem dị nạ ramạgh we oru aani aMemorial phọ?

¹⁵ Legheri mọ abuphẹ yira omhạgh bọ eeni komoọgh ni sipuru opuru—ekạr ekpaariọm mem dị eghịgh mudị bidị ko/ru ghan ituughạ ayira. Esi iduọn phọ, ootughiạn ni ilọ asipuru dị bidị kotue ni opuru kụ ookolhobian ophagharanhaạn abidị. (Kọl. 4:6) Esi omaạm, abuniin otue ni opuru mọ: ‘Eeghe kụ kemite siphẹ aMemorial phọ?’ ‘Kebia ni ḍughụm?’ ‘Emoọgh ni odọ iinmenian dị oye phọ kaanmenian?’ ‘Kokpẹ ni ikpoki kụ ogbi oḍigh?’ ‘Kokirom ni ekpạ?’ Mem dị yira romạgh oye oru aani aMemorial phọ, yira otue ni opuru oye phọ mọ, “Nạ amoọgh ni sipuru ḍughụm?” kụ angọ nyodị torobọ ophagharanhaạn aḍipuru dị odị amhoọgh. Orue olhoghonhaạn  aḍighaạgh oye phọ onhaghanhạn ipẹ ropạm ghan bọ ituughạ phọ ayira, nạ atue ni aḍeenhaan sividio phọ: Eeghe kụ Remite Ghan Siphẹ aKindọm Họl Phọ? ḅilhẹ Tuutughiạn Ḍuugh Phọ aJizọs. Esi ituughạ phọ 28 aḍinyạ phọ Kelhọm Ghuḍum K’agee-pọ! eekaragh ni imạ araraạr dị yira kotue ni okaạph oḅenhị bidị.

16. Eeghe inhọn asipuru kụ edị abuphẹ oru aani bọ aMemorial phọ kotue opuru?

¹⁶ Awe dị omhegheron ḍimhạgh phọ kụ oru aani aMemorial phọ, komoọgh ni ibadị asipuru mem dị omhạn. Bidị otue ni ookia iyaạr phọ eḍighi bọ kụ iyạl ikpo awe bịn kụ olhe bọ (eru maạr dị olhe ni) abrẹd r’amiim aMemorial phọ. Bidị otue ni opuru ilọ onhụ amem mọ yira ropạm ghan bọ aMemorial phọ. Eeni bidị kowạ kẹn ni olhegheri mughumọ eniin phọ eten phọ ophạm bọ aMemorial phọ kụ edị ropạm ghan inhọn ituughạ. Ghalhamọ r’iduọn ropanyanhaạn ghan bọ ni ibadị asipuru phọ iphẹn phọ siphẹ oghaạph phọ, bulọ ephẹn kụ eḍighi eḅẹl amem abidị otue ni owạ olhegheri obughẹ. Emhuoghaạph phọ “Why Do Jehovah’s Witnesses Observe the Lord’s Supper Differently From the Way Other Religions Do?” edi bọ jw.org ketue ni eloghonhaạn ḍighaạgh ophanyanhaạn iniin asipuru phọ iphẹn phọ. Oḍighi ipẹ yira kotue bọ—kụ aMemorial phọ agbi oteẹny, mem dị mateẹny, ḅilhẹ r’amem dị aMemorial phọ maten—pidị yira ologhonhaạn ḍighaạgh buọ ‘iiḅi arokpom mọ’ oru aani aMemorial phọ.—Iiḍ. 13:48.

LOGHONHAẠN ḌIGHAẠGH BULỌ MOOPHOỌM

17. Ika kụ edị ikumor awe phọ kotue ologhonhaạn ḍighaạgh buphẹ moophoọm bọ? (Ezekiel 34:​12, 16)

¹⁷ Ika kụ edị ikumor awe phọ kotue ologhonhaạn ḍighaạgh buphẹ moophoọm bọ, siḍughul otu aMemorial phọ? Ḍeenhaan bidị ogbolomaam. (Bạl Ezekiel 34:​12, 16.) Kụ egbi oteẹny aMemorial phọ, kparaghạ oteẹny abidị ibadị amem lọ edugh ni. Ḅenhị bidị idị nạ asereghiạn bidị ḅilhẹ rawạ ongọ abidị torobọ olhoghonhaạn aḍighaạgh. Kụ amhạgh bidị oru aani aMemorial phọ. Eru maạr dị bidị oru, mạgh bidị r’eenyuụm. AMemorial phọ roten, kụ aghị ghisigh angọ ghan buuḅi abumor r’abumaranhi phọ abuẹn phọ torobọ olhoghonhaạn aḍighaạgh dị bidị omhoghi eten aruwaloor oḅula esi aZihova.—1 Pit. 2:25.

18. Ika kụ edị yira kologhonhaạn ḍighaạgh buphẹ moophoọm bọ? (Rom 12:10)

 ¹⁸ Oomo abuọ ookpomhoghan phọ kotue ni ologhonhaạn ḍighaạgh bulọ moophoọm dị oru aani aMemorial phọ. Ika? Esi oḍeenhaan ghan abidị ephomhoghiạn, kụ ozoọm ghan abidị eyoghoyoghọ eten r’olhọgh eegu. (Bạl Rom 12:10.) Ka/bula mọ eeni ikparanhaạn ni iyool phọ abuẹn phọ oḅilhẹ oru ituughạ. Eeni bidị ughiilhaan ghan ni mọ ko/kuraam bidị. e Esi iduọn phọ, ka/puruyogh bidị sipuru dị kesiphe bidị umugholoor obobọ ka/kaaphọgh raraạr dị kepin ilhoghi abidị. (1 Tẹs. 5:11) Abumor r’abumaranhi phọ abuẹn phọ abuḅaramạ omheeraam ayira. Eḅaạl li olhoghi ayira agey oḅilhẹ ooseeny aZihova r’abidị!—Ps. 119:176; Iiḍ. 20:35.

19. Eeghe asuọ kụ raḍuạ ghan karu esi ootughiạn aḍuugh phọ aZizọs?

¹⁹ Eḍighi ni iyaạr ibo iduọn aZizọs amiteom bọ iikolhobian oḍighi ghan ootughiạn aḍuugh phọ odị torobọ alhạ. Loor esi dị yira ḅilhẹ r’abunhọn romooghọm ghan ni suọ esi ibadị areten. (Isa. 48:​17, 18) Ephomhoghiạn phọ ayira esi aZihova r’aZizọs rebụgh ghan. Yira roḍeenhaan ghan idị yira osereghiạn ipẹ bidị uḍighinhaan bọ iyira. Yira rokparamhị ghan ogọ ephomhoghiạn phọ edi bọ igbo abumor r’abumaranhi phọ. Etue ni kẹn emiteom eepoogh dị yira kologhonhaạn bunhọn ḍighaạgh oghelhọm aani aḍisẹph kirokirọ phọ ekiạ etagharạn phọ emiteom bọ. Esi iduọn phọ, oḍighi oomo ipẹ yira kotue bọ ookolhobian ilọ aMemorial arolhool phọ—eḍighi bọ ḍigbogh aḍio alhạ phọ!