1. Нениҥ учун Кайраканныҥ Эҥири эҥ ле аҥылу туштажу болот? (Лука 22:19, 20).

 ИЕГОВАНЫҤ албатызына Иисус Христостыҥ ӧлӱмин эске алатан Эҥир эҥ аҥылу туштажу болот. Бу туштажуны ӧткӱрзин деп, Иисус бойы јакарган. (Лука 22:19, 20 кычырыгар.) Бис бу Эҥирди нениҥ учун сӱреен тыҥ сакып турганысты шӱӱжип ийектер.

2. Нениҥ учун бис Кайраканныҥ Эҥирин тыҥ сакып турганыс?

² Кайраканныҥ Эҥири толынты керегинде шӱӱп сананарга болужат. Анайда ок Иисуска тайылгазы учун быйанысты канайып кӧргӱзеристи эске алындырып јат (2 Кор. 5:14, 15). Бого коштой, кожо јуулыжып турзаас, бой-бойыстыҥ бӱдӱмјибисти тыҥыдадыс (Рим. 1:12). Кажы ла јыл Кайраканныҥ Эҥирине туштажуларга јӱрбей барган ака-эјелер келет. Олор бистиҥ сӱӱжисти кӧрӱп, јӱректери томулып, Иеговага кайра јанар деп сананат. Кезик улус Кайраканныҥ Эҥирине баштапкы катап келет. Олор бу туштажуны кӧргӧн лӧ уккан кийнинде Агару Бичикти ӱренерге јӧпсингилейт. Оныҥ да учун бис Кайраканныҥ Эҥирин сӱреен тыҥ баалап јадыс!

3. Кайраканныҥ Эҥири телекейлик карындаштыгысты канайып бирлик эдет? (Јурукты база кӧрӱгер.)

³ Кайраканныҥ Эҥири бастыра јердиҥ ӱстинде ака-эјелерди бирлик эдет. Иегованыҥ Керечилери бу кӱнде, кӱн ашкан ла кийнинде Кайраканныҥ Эҥирине јуулыжат. Бу туштажуда толынты тайылга нениҥ учун керектӱ болгоны керегинде куучын-эрмек айдылат. Иегованы мактап турган эки кожоҥ кожоҥдойдыс ла бой-бойыска калашты ла кызыл аракыны берип јадыс. Анайда ок тӧрт мӱргӱӱл айдылат, олордыҥ кажызыныҥ ла кийнинде бис акту јӱрегистеҥ «аминь» деп айдадыс. Анайып, бу туштажу бастыра јуундарда, 24 сааттыҥ туркунына, ээчий-деечий ӧткӱрилип калат. Иегова ла Иисус албатызыныҥ бирлик  болгонын кӧрӱп, не аайлу тыҥ сӱӱнедилер!

4. Бу јӧрмӧлдӧ нени шӱӱжерис?

⁴ Бис бу јӧрмӧлдӧҥ мындый сурактардыҥ карууларын билип аларыс: Кайраканныҥ Эҥирине бойыстыҥ јӱрегисти белетеп аларга нени эдерис? Улуска канай болужарыс? Јуунга јӱрбей барган ака-эјелерге канай болужарыс? Бу сурактардыҥ карууларын билип алзаас, аҥылу туштажуга белен болорыс.

КАЙРАКАННЫҤ ЭҤИРИНЕ ЈӰРЕГИСТИ КАНАЙЫП БЕЛЕТЕЕР?

5. а) Толынты керегинде нениҥ учун шӱӱп сананар керек? (Сарын 49:7, 8). б) «Иисус нениҥ учун божогон?» деген видеоноҥ нени билип алдаар?

⁵ Кайраканныҥ Эҥирине јӱрегисти белетеп аларга, биске Иисус Христостыҥ толынты тайылгазы керегинде шӱӱп сананар керек. Нениҥ учун дезе бис ӧлӱмнеҥ ле кинчектеҥ бойыс качан да айрылып болбос эдис. (Сарын 49:7, 8 кычырыгар; «Иисус нениҥ учун божогон?» деген видеоны база кӧрӱгер a.) Оныҥ да учун Иегова бис учун бойыныҥ Уулын берген. Анайып, Иегова да, Иисус та коркышту јаан тайылга эткен (Рим. 6:23). Бу керегинде кӧптӧдӧ шӱӱп сананзаас, толынтыны оноҥ тыҥ баалаарыс. Бу јӧрмӧлдӧҥ толынты ол не деп билип аларыс. Анайда ок Иегова ла Иисуска толынтыны эдерге, нени ӧдӧргӧ келишкенин эске аларыс.

6. Толынты ол не, ол нениҥ учун керектӱ болгон?

⁶ Толынты — јылыйткан немени кайра јандырарга тӧлӧлип турган баа. Адам деп кижи толо кемдӱ эдип јайалган. Је кинчек эдип ийеле, ол јӱк ле бойыныҥ эмес, је бала-барказыныҥ да ӱргӱлјиге јӱретен аргазын јылыйтып салган. Иисус дезе Адамныҥ јылыйтып салганын кайра јандырарга, толо кемдӱ јӱрӱмин тайылга эдип берген. Агару Бичикте айдылганыла, Кудайдыҥ Уулы «кинчек этпеген, Оныҥ сӧстӧринде тӧгӱн јок болгон» (1 Пётр 2:22). Анайып, Иисустыҥ јӱрӱминиҥ баазы ла Адамныҥ јылыйтып салган јӱрӱминиҥ баазы тӱҥей болгон (1 Кор. 15:45; 1 Тим. 2:6).

7. Иисус јерде болордо, ондо кандый кӱчтер болгон?

⁷ Иисус јерде јӱрерде јаантайын, керек дезе кӱч те болзо, теҥеридеги Адазына сӧсуккур болгон. Ол толо кемдӱ кижи болуп чыккан. Андый да болзо Иисус толо кеминде эмес ада-энезиниҥ сӧзин угуп јӱретен (Лука 2:51). Ол јаандап келерде оны кем-кем ада-энезиниҥ сӧзин эмезе Кудайдыҥ јасагын бузуп ийзин деп јӱткӱткен болор. Је Иисус олордыҥ сӧзин укпаган. Иисусты Дьявол до коркышту тыҥ ченеген. Керек дезе оны Кудайды садып ийзин деп кӱӱнзеткен (Матф. 4:1—11). Сатана, канайда да болзо, Иисусты кинчек этсин деп албаданган. Иисус оныҥ сӧзин уккан болзо, толынтыны тӧлӧп болбос эди.

8. Иисуста база кандый ченелтелер болгон?

⁸ Иисус јерде ижин бӱдӱрип баштаарда, оныҥ ченелтелери оноҥ ары улалган. Ӧштӱлер оны истежип, канча катап ӧлтӱрерге де санангылаган (Лука 4:28, 29; 13:31). Анайда ок ого ӱренчиктериниҥ јастыраларын чыдажарга келишкен (Марк 9:33, 34). Јаргы тушта оны шоодып каткыргандар. Оны каршулу керек эткен деп, коркышту тыҥ кыйнагандар (Евр. 12:1—3). А калганчы ченелтени Иисуска Кудайдыҥ болужы јок јаҥыскан ӧдӧргӧ келишкен (Матф. 27:46) b.

9. Иисустыҥ тайылгазын шӱӱп сананзаас, бисте кандый сезимдер болот? (1 Пётр 1:8).

 ⁹ Чын ла, толынты эдерге Иисуска кӧп кӱчтер ӧдӧргӧ келишкен. Оныҥ бис учун нени эдерге белен болгонын шӱӱп сананзаас, ого сӱӱжис ле быйаныс тыҥып јат. (1 Пётр 1:8 кычырыгар.)

10. Иегова толынты эдерге нени эткен?

¹⁰ Иегова толынты берерге нени эткен? Иегова ла Иисустыҥ ортозындагы сӱӱштеҥ артык сӱӱш јок (Укаа 8:30). Иисуска коркышту тыҥ ченелтелер болуп турарда Иеговада кандый сезимдер болгонын сананып ийигер. Ого оныҥ Уулын, Иисусты, бир де тообой шоодып, кыйнагылап турганын кӧрӧргӧ коркышту ачу болгон.

11. Иисус божоордо, Иеговада кандый сезимдер болгонын оҥдоорго не болужат?

¹¹ Ада-энеге эҥ ле јаан ачуны балазыныҥ ӧлӱми экелет. Олор тирилишке бӱдӱп те турган болзо, олордыҥ ачу сызы ӧтпӧй јат. Бу тем, сӱӱген Уулыныҥ шыралап божоп јатканын кӧрӱп, Иеговага коркышту кӱч болгонын оҥдоорго болужат (Матф. 3:17) c.

12. Кайраканныҥ Эҥирине јетире арткан ӧйди канайып тузаланар керек?

¹² Кайраканныҥ Эҥирине јетире кӧп ӧй артпады. Оныҥ учун толынты керегинде тереҥжиде не шӱӱп кӧрбӧс? Темдектезе, таҥынаҥ ӱренип јатсаас, ол эмезе билелик бажырыш тужында «Путеводитель по публикациям Свидетелей Иеговы» ол эмезе ӧскӧ дӧ материалдарды тузаланарга јараар d. Анайда ок Агару Бичикти «Бистиҥ христиан јӱрӱмис ле ижибис» деген тетрадьтагы графикле кычырыгар. А Кайраканныҥ Эҥири болотон кӱнде эртен турагы бажырыштыҥ аҥылу программазын кӧрӱп алыгар. Бис јӱрегисти јакшы белетеп алзаас, улуска Кайраканныҥ Эҥириниҥ тузазын оҥдоп алзын деп болужарга белен болорыс (Езд. 7:10).

УЛУСКА БОЛУЖЫГАР

13. Улусты Кайраканныҥ Эҥири керегинде билзин деп, бис нени эдер аргалу?

¹³ Бис улуска Кайраканныҥ Эҥирине келерге канайып болужарыс? Эҥ ле озо олорды бу туштажуга кычырарыс. Темдектезе, јарлаар иште јолыккан улуска Кайраканныҥ Эҥири керегинде айдарыс. Анайда ок бу Эҥирге таныштарыстыҥ кемизин кычырарга јараарын  озодоҥ шӱӱп сананарыс. Темдектезе, ол тӧрӧӧндӧр, кожо иштеп турган улус, эмезе кожо ӱренип турган балдар болор аргалу. Кайраканныҥ Эҥирине кепке базылган кычыртулар божоп калза, бу кычыртуныҥ электронный бӱдӱминиҥ ссылказын аткарып ийерге јараар. Сананып ийзеер де, кычырган улузыстыҥ ончозы једип келзе, не аайлу кайкаар болорыс! (Эккл. 11:6).

14. Кычыртуны кижиге бойына берзе, тузазы кандый болот?

¹⁴ Кычыртуны кижиге бойына берзе, тузазы кандый болот? Бир тем кӧрӱп ийектер. Бир катап эјениҥ Иеговага бӱтпей турган эш-нӧкӧри оныла кожо Кайраканныҥ Эҥирине барарга турум деп айдарда, ол сӱреен тыҥ кайкаган. Нениҥ учун? Нениҥ учун дезе мынаҥ озо эје ӧбӧӧнин бу Эҥирге кычырып турарда ол јӧпсинбей туратан. Је бу тушта не солына берген? Ӧбӧӧни ого: «Кӧрзӧҥ, меге кычырту берген» — деп айткан. Кӧрӧр болзо, ого кычыртуны таныш аксагал берген эмтир. Анайып, олор экӱ Кайраканныҥ Эҥирине барган. Мыныҥ кийнинде ол Кайраканныҥ Эҥирине база да барып туратан.

15. Улусты Кайраканныҥ Эҥирине кычырзаас, нени ундыбас керек?

¹⁵ Кайраканныҥ Эҥирине кычырган улуста, анчада ла баштапкы катап келген болзо, кӧп сурактар чыгардаҥ айабас. Оныҥ учун кезик сурактардыҥ карууларын озодоҥ белетеп аларга јараар (Кол. 4:6). Темдектезе, мындый сурактар: «Туштажу канай ӧдӧр? Ол канча кире ӧйгӧ болор? Ого канайып кийинип алар керек? Кирер алдында акча тӧлӧӧр бӧ? Ондо улустаҥ акча јууп турган ба?» Айдарда, Кайраканныҥ Эҥирине келген улуста кандый бир сурактар бар болор бо деп сурап угар керек. Сурактар бар болзо, каруузын айдып берзеес, јакшы болор. Анайда ок «Иисус Христостыҥ ӧлӱмин эске алары» ла «Каандыктыҥ Туразында не болуп турган?» деп видеолорды кӧргӱзип ийерге јараар. Олордоҥ кижи туштажуларда не болуп турганын билип алар. А база бир болужатан арга  «Јажын-чакка ырысту јӱригер!» деген бичиктиҥ 28-чи урогындагы сурактарга ајару эдери.

16. Баштапкы катап келген улуста Кайраканныҥ Эҥириниҥ кийнинде кандый сурактар чыгар болор?

¹⁶ Кайраканныҥ Эҥири ӧткӧн кийнинде, келген улуста јаҥы сурактар чыгардаҥ айабас. Темдектезе, олор мынайда сураар болор: «Нениҥ учун кызыл аракыны ла калашты кем де амзабаган эмезе јӱк ле тоолу ла кижи амзаган?» Анайда ок Кайраканныҥ Эҥири канча катап ӧткӱрилип турган ла ӱзе туштажулар мынайда ӧдӱп турган ба деп јилбиркеердеҥ айабас. Бу сурактардыҥ кӧп сабазы Кайраканныҥ Эҥириниҥ куучын-эрмегинде јарталат. Је бу туштажуга баштапкы катап келген кижи бу керегинде кӧптӧдӧ билерге кӱӱнзеер болор. Оныҥ учун слерге «Почему Свидетели Иеговы отмечают Вечерю Господню не так, как это принято в других религиях?» деген статья болужар аргалу. Кандый да болзо, бис чындыкты алынгадый улуска Кайраканныҥ Эҥиринеҥ озо, туштажуныҥ ӧйинде ле кийнинде канча кире аргабыс бар болужарга албаданарыс (Ап. ижи 13:48).

ТУШТАЖУЛАРГА ЈӰРБЕЙ БАРГАНДАРГА БОЛУЖЫГАР

17. Аксагалдар туштажуларга јӱрбей баргандарга канайып болужар аргалу? (Иезекииль 34:12, 16).

¹⁷ Аксагалдар Кайраканныҥ Эҥириниҥ ӧйинде јуунга келбей барган ака-эјелерге канайып болужар аргалу? Олорго ајару эдерге албаданыгар. (Иезекииль 34:12, 16 кычырыгар.) Кайраканныҥ Эҥиринеҥ озо олордыҥ кажызына ла телефон согуп, куучындажып кӧрӱгер. Бу ака-эјелер слердиҥ олорды сӱӱп турганаарды ла олорго јакшы неме эдерге турганаарды сезип турзын. Олорды бу аҥылу туштажуга кычырыгар. Олор Кайраканныҥ Эҥирине келзе, јылу уткыгар. Је Кайраканныҥ Эҥириниҥ кийнинде де, олорды Иеговага кайра јанзын деп болужарга, бу кару ака-эјелерди ундыбай туругар (1 Пётр 2:25).

18. Туштажуларга јӱрбей барган улуска бистиҥ кажыбыс ла канайып болужар аргалу? (Римдегилерге 12:10).

 ¹⁸ Јуундарга јӱрбей барган ака-эјелерге бистиҥ кажыбыс ла канай болужар аргалу? Андый улуска, олор Кайраканныҥ Эҥирине келзе, сӱӱжигерди кӧргӱзип, тоомјылу ла јалакай баштаныгар. (Римдегилерге 12:10 кычырыгар.) Ундыбагар, Иегованыҥ бу баалу койлорына Кайраканныҥ Эҥирине келерге јеҥил эмес болгон болор. Ол эмезе улус олорды соок уткыыр деп коркыган болор e. Оныҥ учун олорды эби јок айалгага тургускадый эмезе олорго ачу болгодый сурактар сурабагар (1 Фес. 5:11). Бу ака-эјелер бистиҥ кӧгӱс биле. Бис Иегова Кудайыска олорло кожо бажырарга кӱӱнзейдис! (Сар. 119:176; Ап. ижи 20:35).

19. Иисустыҥ јакарузын нениҥ учун бӱдӱрер керек?

¹⁹ Иисустыҥ биске оныҥ ӧлӱмин эске алзын деп јакарганы кандый јакшы! Нениҥ учун дезе бу биске де, улуска да јаан тузазын берет (Иса. 48:17, 18). Темдектезе, Иегова ла Иисуска бистиҥ сӱӱжис тыҥыйт, олордыҥ биске эткен сыйын баалап турганыс кӧрӱнет. Ака-эјелерисле бирлигис тыҥыйт. А база бир неме, улуска Иисус Христостыҥ толынты тайылгазы кандый арга берип турганын куучындап јадыс. Айдарда, Кайраканныҥ ӧлӱмин эске алар Эҥир јылдыҥ ичинде болуп турган эҥ ле аҥылу туштажу! Ол туштажуда бистиҥ кажыбыска ла болор керек. Оныҥ учун бу Эҥирге јакшы белетенип алактар.