LALENGOEN LALAKAW 2
RADIW 19 Lafi no Tapang
Pakayni Sakalimlaan a Romiˈad i Cecay Miheca Maharekayto Kiso Misaday Han?
‘Ka padadotoc kamo mihaen to demak a miharateng i takowanan.’—LUKA 22:19.
KALIMLAAN NO LALAKAW
Miharateng to Piharatengan to Kinafalah ni Yis a Saˈopo hano mikiriwiˈay, sasamaan kita pakayni toniya saˈopo ngaˈay ko pisaday, ato sasamaan kita padama to romaroma tamdaw mirienang toniya saˈopo.
1. O Piharatengan to Kinafalah ni Yis a romiˈad hano o sakalimlaan a romiˈad i lalomaˈ no cecay miheca hani? (Luka 22:19, 20)
PAKAYNIEN i finawlan no Kawas, Miharateng to Kinafalah ni Yis to ˈOrip a romiˈad o sakalimlaan i lalomaˈ no cecay miheca, samanen edengan koniya romiˈad na palimoˈotan ni Yis ko nisawawaan to haharatengen. (ˈOsien ko Luka 22:19, 20.) Halamhamay kita mirienang to Piharatengan to Kinafalah ni Yis to ˈOrip a Saˈopo. Misamaanay hani? Nengnengen ita ko pina lalangian.
2. Halamhamay kita mirienang to Piharatengan a Saˈopo, o pina lalangian o maanan hani?
2 Piharatengan a Saˈopo papadama kitaanan misongilaˈ midotim to epoc no sapatefoc, patalipaˈelalayho kitaanan tatano maanan a pakayraan paihkal to piakoˈid ita to patafangan ni Yis a sapatefoc. (2 Korinto 5:14, 15) Itini toniya saˈopo wa ira ko toki ita ‘masasipakalalok’ to salikaka. (Loma 1:12) To mihecahecaan, ˈalomanay misawaday mitosil a salikaka mirienangay toniya saˈopo. Ilalomaˈay nangra romaroma tamdaw matinakoay ko sapadiheko no salikaka, matemeray ko falocoˈ, makahiay miliyaw tayni tatihi ni Yihofa. Roma i, ˈalomanay maolahay to Fangcalay Cudad a tamdaw ikor no mirienang toniya saˈopo, pakayni maˈaraway matengilay no niyah masolotay ko falocoˈ, oranto misatapangay romakat i midaˈocay ˈorip a lalan. Mihaenay, itini falocoˈ ita o Piharatengan to Kinafalah ni Yis to ˈOrip a romiˈad tada o mikiriwiˈay.
3. O Piharatengan a Saˈopo sasamaan mikedec a palacecay to paro no kakarayan a salikaka? (Nengnengen ko coka.)
3 Ka piharateng, o Piharatengan a Saˈopo samaanay mikedec a palacecay to salikaka i paro no kakarayan. Toniya romiˈad ikor no micerem ko cidal, malisopsopay ko Misawacayay Tamdaw ni Yihofa i paro no kakarayan. Mamitengil kita to cecay kimad, oniya kimad misaˈicelay somowal to kalimlaan ko sapatefoc. Raromadiw kita to tosa radiw pakahemek ci Yihofaan, paparakatho to tahapinangan a dafong i Piharatengan a Saˈopo. Toniya saˈopo kinasepatay mitolon, o kahacecay mamalacafay kita mikifalocoˈ a somowal to “amin.” Itini lalomaˈ no 24 tatokian, o kasakopang i paro no kakarayan mitooray to malecaday a pakayraan misikay to Piharatengan a Saˈopo. Haratengen hena, maˈaraw ni Yihofa aci Yis ko nika kedec a malacecay kita a pakahemek Cangranan, hahakowa ko kahemek Nangra!
O Piharatengan a Saˈopo palacecayay a makakedec ko itiniay i paro no kakarayan a salikaka (Nengnengen ko saka 3 fatac) f
4. Onini a lalakaw mamilengo to maanan?
4 Onini lalakaw mamilengo to tolo salicay: Sapirienangaw to Piharatengan a Saˈopo, sasamaan kita itini falocoˈ maharek a misaday? Sasamaan kita padama to maolahay to Fangcalay Cudad a tamdaw mikitini Piharatengan a Saˈopo milifok to haepoc? Sasamaan kita padama to misawaday mitosil a salikaka? Cipinang kita to caˈof nonini a salicay ikor, o mamafanaˈ sasamaan maharek a misaday mirienang tonini kalimlaan a saˈopo.
SASAMAAN ITINI FALOCOˈ MAHAREK A MISADAY?
5. (1) Hano mamisongilaˈ kita miharateng to tada kalimlaan ko sapatefoc hani? (ˈOlic 49:7, 8) (2) Mikitini Misamaanay Hano Mapatay ci Yis Hani? onini a apotoˈay ika mananamay iso ko maanan?
5 Sapirienangaw to Piharatengan a Saˈopo, sasamaan kita itini falocoˈ maharek a misaday hani? O cecay kalimlaan a pakayraan i, songilaˈen miharateng hakowaay ko kalimlaan no patafangan ni Yis Kristo a sapatefoc. Ano o niyah ko tiˈeren, cowa ko mamahepol ita ko pifakec no raraw ato patay. (ˈOsien ko ˈOlic 49:7, 8; nengnengen ko ika Misamaanay Hano Mapatay ci Yis Hani?) a Pakayni sapilidongaw kitaanan, milimasmasay ci Yihofa, papikinafalah ci Yisan to ˈorip no niyah. Pakaynien ci Yihofaan aci Yisan, o taˈangayay a kinafalah konini. (Loma 6:23) Saadihayen ita miharateng to kinafalahay ci Yihofa aci Yis pakayni kitaanan to maanan, o mamatongal ko pisalimla to sapatefoc. Dotoc, nengnengen ita o sapatefoc mahawpay ko maanan, ato pakayni sapisadakaw to sapatefoc mihadakay ci Yihofa aci Yis to maanan.
6. O sapatefoc mahawpay ko maanan?
6 O sapatefoc o sapiˈaca to cecay dafong a mihadakan a dafong. Masangaˈ ko saka cecay tamdaw ci Atam i, o malefotay, kawra ikor no ciraraw cingra, malahdawayto ko sakatahadaˈoc no niyah a maˈorip, ano telotelocto ningra mafiyoray, malahdaway konini a hatokel. Sapiˈacaaw to malahdaway ni Atam a kihcod, kinafalahay ci Yis to malefotay a ˈorip. Tayni ci Yis i fafekang no sera ikor, hakelong no ˈorip ‘cowa ka raraw, cowa ka somowal to misamangahay a sowal,’ mansa mapatay cingra o malefotay a ˈorip ko patafangan, maroyaroyay to malahdaway ni Atam a ˈorip.—1 Pitiro 2:22; 1 Korinto 15:45; 1 Timoti 2:6.
7. Itini i fafekang no sera ci Yis tahalifaay to maanan a sapalifet?
7 Itiniho i fafekang no sera ci Yis adihayay ko malifaay a sapalifet, kawra padotocay cingra midofdof to kakarayan Wama, cowa pisafelit to araaw no Wama. Soˈliˈlin o malefotay a tamdaw cingra, kawra i kaemangan a tatokian padotocay cingra midofdof to cowa ka lefot a wama wina. (Luka 2:51) Itini kalakapahan a tatokian, o mamicoˈay cingra to saroero, hongaˈ padadotoc midofdof to wama wina ato madimadi ci Yihofaan. Matoˈasto ci Yis ikor, misaliyaliyaway ci Satan mikayhid cingranan, mangalef hamaanto a madimadi to Kawas saan. (Matay 4:1-11) Misamacayay ci Satan mikayhid ci Yisan mararaw, ho ecato ka ngaˈay ci Yis patafang to sapatefoc, kawra cowa ka ngiyangi ci Yis.
8. Mamiememho ci Yis to maanan a sapalifet?
8 Tiya itiniho i fafekang no sera ci Yis milahci to mitosilay tayal i, o mamihadidiho cingra to romaroma sapalifet. Miroeroan no ˈada cingra, kinapinapinaay tahasiˈayaw to patay. (Luka 4:28, 29; 13:31) Oha mamihadidiho cingra to dangoc no nisawawaan. (Marko 9:33, 34) Itini pisawkitan, masamsamay ato milokesan cingra. Ikorto i, sano mararaway a tamdaw cingra macaˈit itini i hecek, pakidem ko kaadada palidlid sa mapatay. (Hipray 12:1-3) Itini salikoray a nokaˈorip ningra, cecayay cingra miemem to sapalifet, samanen paliyasan ni Yihofa ko pidipot cingranan. b—Matay 27:46.
9. Samaanay ko pinengneng ita to kinafalah ni Yis to ˈorip? (1 Pitiro 1:8)
9 Pakayni sapatafangaw to sapatefoc a milidong kitanan, hayi sanay ci Yis mikinafalah to ˈorip. Ano songilaˈen ita miharateng konini, tada maolahay kita cingranan.—ˈOsien ko 1 Pitiro 1:8.
10. Sapisadakaw to sapatefoc, kinafalahay ci Yihofa to maanan?
10 Ano ci Yihofato i, samaanay hani? Pakayni to sapisadakaw to sapatefoc, hayi sanay ci Yihofa kinafalah to maanan hani? Tada tangongolay ko noka lalaˈed ni Yihofa aci Yis mikikakaay to kalalaˈed no wama ato wawa itini hekal. (Taneng 8:30) Haratengen hena, maˈaraw ni Yihofa ko piemem ni Yis to adihayay a sapalifet, samaanay ko harateng Ningra hani? Maˈaraw ko kaolahan a Wawa misemsem a makariˈang, maedeng hato mikeritan no poˈot ko falocoˈ.
11. Tiya patayen ci Yis i, maedeng samaanay ko nafalocoˈan ni Yihofa hani? Tadtaden.
11 O tahalifaayto to kapatay no wawa a wama wina mafanaˈay to hakowaay ko pisemsem no falocoˈ. Soˈliˈlin pakasoˈlinay kita to iraay ko patikolay maˈorip a hatokel, kawra ano mapatay sato ko kaolahan ita a paro no lomaˈ i, adadaan nanay ko falocoˈ ita. Padamaay kitanan konini cipinang, i Kongyen saka 33 miheca toya romiˈad, maˈaraw ni Yihofa ko kaolahan a Wawa misemsem a mapatay i, hakowaay ko nika adada no falocoˈ Ningra. c—Matay 3:17.
12. ˈAyaw no Piharatengan a Saˈopo, mamidemak kita to maanan hani?
12 ˈAyaw no Piharatengan a Saˈopo, ngaˈayay kiso itini notekedan a picekiw anca Pakalomaˈay Pidoko, ˈosien ko milingatay to sapatefoc a lalakaw. Ngaˈayay sakadademaken iso ko Pirorodan to Mitepangan Cudad no Misawacayay Tamdaw ni Yihofa anca romaroma sapicekiw a lalosidan, micalep a mikingkiw tonini a lalangian. d Roma i, doedoen ko Mitosilay ato Nikaˈorip—Rayray no Saˈopo, Piharatengan Saˈopo a Sinael micekiw to Fangcalay Cudad. Piharatengan a Saˈopo toya romiˈad iraay ko mikiriwiˈay tono papacem pidoko a kamok, maraodto koya romiˈad i, aka matawal a minengneng. Ano maharekayto kita i falocoˈ a misaday, o ngangaˈay padama to tao mikitini i Piharatengan a Saˈopo milifok to epoc.—Icra 7:10.
PADAMAEN KO MAOLAHAY TO FANGCALAY CUDAD A TAMDAW
13. Sapadamaaw to maolahay to Fangcalay Cudad a tamdaw mikitini Piharatengan a Saˈopo milifok to epoc, salakat mamidemak kita to maanan?
13 Sasamaan kita padama to maolahay to Fangcalay Cudad a tamdaw mikitini tonini Piharatengan a Saˈopo milifok to epoc hani? Salakat, tahidangen cangra mirienang tonini saˈopo. Cowa ko malitemohay aca ita i pitosilan a tamdaw, ngaˈayho tahidangen ita kafanaˈan a tamdaw, tinakoen o salawina, cafay micudad, cafay a matayal, tahidangen cangra mirienang tonini a saˈopo. O ngaˈayay i, tiliden iso ko ngangan no maharatengay iso a tamdaw, tanamen mitahidang cangra. Soˈlinto caay ka adihay ko matolicay a satahidang a tancang, ngaˈayay pafelien iso to i tingnaway a satahidang. Alatek wa fahkaˈen kiso, ˈalomanay ko makahiay micada to satahidang no miso!—Patnakay 11:6.
14. Tano tinakoan a mitadtad, padeteng sa mitahidang to cecay tamdaw aira ko ngaˈayay a minaroˈan alatek.
14 Padetengen ita mitahidang ko cecay tamdaw, ngangaˈay ira ko minaroˈan alatek. O faˈinay no cecay fafahiyan salikaka cowa ko Misawacayay Tamdaw ni Yihofa, cecay romiˈad fahal sanay a pasowal to fafahi to mamihakelong cingra mirienang to Piharatengan a Saˈopo. Fahkaˈan nanay konini salikaka. Misamaanay hani? Samanen kinapinapinaayto koni fafahiyan salikaka mitahidang cingranan, kawra cowa ka pihayi cingra. Hano hayi sato cingra nohatini hani? Sanay cingra: “Iraayto ko mikiriwiˈay mitahidang takowanan,” sanay. ˈArawhan pafelianto noya kafanaˈan ningra a malohemay malitengay to cecay satahidang a tancang. Oranto i cowa ko kinacecay aca, padadotocayto cingra mirienang to mihecahecaan a Piharatengan a Saˈopo.
15. Mitahidang to tamdaw mirienang to Piharatengan a Saˈopo i, haharatengen ita ko maanan?
15 Haratengen, alatek iraay ko sasa no falocoˈ no mitahidangan ita a tamdaw, ano cowaho ka pirienang cangra to saˈopo ita i, mangalef aira ko hatiniay a falocoˈ ningra. Paisalakaten ita misaharaterateng to aira ko masamaanay a salicay nangra, paliˈayawen a misaday pacaˈof to salicay nangra. (Kolosay 4:6) Tinakoen, o roma tamdaw alatek sakafanaˈaw cingra: “To samaanay ko kalingad nonini Piharatengan a Saˈopo? Hakowaay ko kakoˈedaw no toki? Iraay ko maanan a saali pakayni caˈedong han? O papaycien han? O papakiyaho kako han?” Mihaenay haw i, ano mitahidang kita to tamdaw mirienang to Piharatengan a Saˈopo i, ngaˈayay licayen cingra: “Iraay ko maanan lalicayen iso han?” Ikor pacaˈofen cingra. Ngaˈayay sakadademaken ita ko Haratengen ko Nano Demak ni Yis Kitaanan, ato Samaanay ko Saˈopo Itini i Hongti Kitakit Kasaˈopoan? onini tosa apotoˈay a ika, padama to tamdaw cipinang to samaanay ko kalingad no saˈopo. O roma i, saka 28 fedengan no Layapen ko Midaˈocay ˈOrip! adihayay ko kalimlaan ngangaˈay lengoen ko tao.
16. Mirienangay to Piharatengan a Saˈopo a tamdaw aira ko maanan salicay alatek?
16 Satapang sanayho maolahay to Fangcalay Cudad a tamdaw maharekto mirienang to Piharatengan a Saˈopo ikor, aira ko romaroma salicay nangra alatek. Sakafanaˈaw cangra hano awa ko komaenay to epang ato epah, anoca hano papina aca ko komaenay to epang ato epah wa saan. Alatek sakafanaˈaw cangra, hakowa ko halafin kinacecay a misikay to Piharatengan a Saˈopo, ato mahecahecaday ko pakayraan no Misawacayay Tamdaw a masaˈopo hokira. Soˈliˈlin maherekayto mitadtad i kimad konini a demak, kawra saka cecay mirienangay a tamdaw alatek misaaliayho to satongal no mita a mitadtad. Ngaˈayay sakadademaken ko jw.org wangcan “Misawacayay Tamdaw Samaanay Misikay to ‘Lafi no Tapang’? Hano Caka Lecad to Romaroma Kiyokay Hani?” Onini a lalakaw papacaˈof to salicay nangra. ˈAyaw no Piharatengan a Saˈopo, kasaˈopoan a tatokian ato ikor, saˈicelen ita padama ko ‘iraay ko matatodongay waywayan’ a tamdaw milifok to epoc mikitini tonini a saˈopo.—Dmak 13:48.
PADAMAEN KO MISAWADAY MITOSIL A SALIKAKA
17. Sasamaan ko malohemay malitengay padama to misawaday mitosil a salikaka? (Icikil 34:12, 16)
17 ˈAyaw no Piharatengan a Saˈopo ato ikor a pina lipay, o malohemay malitengay sasamaan padama to misawaday mitosil a salikaka hani? Kifalocoˈen a ciharateng cangranan. (ˈOsien ko Icikil 34:12, 16.) ˈAyaw no Piharatengan a Saˈopo, saˈicelen a mirinnak ko kahacecay misawaday mitosil a tamdaw. Pakafanaˈen cangra to ciharatengay kamo cangranan, sapisarocodaw a padama cangranan. Tahidangen cangra mirienang to Piharatengan a Saˈopo. Ano tayraayto cangra i, fanekfeken a mihamham cangra. Ikor no Piharatengan a Saˈopo i, padadotocen a milisoˈ cangra, sarocoden a padama cangra minokay tayni i tatihi ni Yihofa.—1 Pitiro 2:25.
18. O kahacecay no kasakopang a tamdaw sasamaan misarocod padama to misawaday mitosil a salikaka hani? (Loma 12:10)
18 Ano mirienangayto to Piharatengan a Saˈopo ko misawaday mitosil a salikaka i, polong a tamdaw i kasakopang mamisaˈicel a padama cangranan. Sasamaan ko demak hani? Patalahkalen cangra to olah, sidaˈitay, kangodoen a micada cangranan. (ˈOsien ko Loma 12:10.) Haratengen, i ˈayaw matalaway cangra patikol a mirienang to saˈopo, alatek calemcemay to aira ko tatiihay noka pinengneng no tao cangranan. e Mankora, aka a pakangodoen cangra, milicay to kangodoan a salicay, anoca somowal to mamidokaˈ cangranan a sowal. (1 Tisalonika 5:11) Cangra i, o kanonoˈan no mita a salikaka, miliyawto cangra kalacafay kitanan midoko ci Yihofaan, tada o kalipahakan ita.—ˈOlic 119:176; Dmak 20:35.
19. Miharateng to kinafalah ni Yis papaira to maanan a epoc hani?
19 To mihecahecaan midoedoan ita ko sapalimoˈot ni Yis miharateng to ka pikinafalah ningra, cowa ko kita aca ko caciepoc, o papadamaho to roma tamdaw milifok to adihayay sapalemed. (Isaya 48:17, 18) Ano mirienang kita tonini a saˈopo i, mamatongal ko kaolah ci Yihofaan aci Yisan, hanaca paihkalay to piakoˈiday ita to kihcod a nano demak Nangra. O kalalaˈed ita ato salikaka mamatongal ko kaˈangongol. O ngangaˈayho padama kita to tao, sasamaan ngaˈ milifok to sapalemed no sapatefoc. Nanay kita maemin ka pisaˈicel, misaday to aniniay miheca a Piharatengan a Saˈopo, samanen onini a romiˈad o sakalimlaan i lalomaˈ no cecay a miheca!
SASAMAAN KO CAˈOF ISO?
-
Sapirienangaw to Piharatengan a Saˈopo, sasamaan kita itini i falocoˈ maherekto misaday?
-
Sasamaan kita padama to maolahay to Fangcalay Cudad a tamdaw mikitini Piharatengan a Saˈopo milifok to haepoc?
-
Sasamaan kita padama to misawaday mitosil a salikaka?
RADIW 18 Akoˈiday ko Sapatefoc a Sidaˈit
a Ano sapikilimaw to misowalan a lalakaw ato ika, nengnengen ko jw.org wangcan, itini pisolapan a mikeniˈ to lalangian no lalakaw ato ika.
b Nengnengen ko Mikecolay Saka 4 Folad, 2021, “Salicay no Miˈosiay Tamdaw.”
c Nengnengen ko Miingid ci Yihofaan, saka 23 fedengan, saka 8-9 fatac.
d Nengnengen ko sapatongal lalakaw “ Ciepocay a Cacekiwen a Salicay.”
e Nengnengen ko coka ato sapatongal lalakaw “ Samaanay ko Piharateng no Kasakopang?” O cecay misawadayto mitosil a faˈinayan salikaka matalaway a micomod i Kasaˈopoan, ikor maremoayto ningra ko hatiniay a falocoˈ. Fanekfekay ko falocoˈ no salikaka mihamham cingranan, mahemekay cingra caciyaw to salikaka.
f TATODONG NO COKA: Ta misatapang malisopsop ko finawlan ni Yihofa misikay to Piharatengan a Saˈopo i cecay pala i, itiniay i romaroma pala a salikaka misadayay tonini saˈopo.
