1. ¿Chuchi am ti doi falin antü tripantu meu? ¿Chumngelu cai? (Luc. 22:19, 20).

 TI Trahun Jesús tañi lan ñi acordangeal rume falin-ngei Jehová tañi troquiñche mu. Tüfa tati doi falin antü tripantu meu. Fei müten Jesús feipicünui taiñ femal fill tripantu (papeltunge Lucas 22:19, 20). Ngüneduamaiñ chumngelu llihuatulequeiñ ñi acual feichi falin antü.

2. ¿Chumngelu llihuatulequeiñ ñi acual tüfachi falin trahun?

² Ti Trahun Jesús tañi lan ñi acordangeal quelluqueiñmu taiñ falintuafiel Jesús taiñ montuleteu ca raquiduameleiñmu chumngechi taiñ mañumafiel (2 Cor. 5:14, 15). Ca quelluqueiñmu taiñ hueluquentu yafültucuhual taiñ pu peñi, pu lamngen iñchiñ (Rom. 1:12). Fentren peñi ca lamngen amuhuenolu trahun mu, amuqueingün ñi acordayafiel Jesús tañi lan. Piuqueyenquechi lloungelu engün, feimu quiñeque eluuqueingün ñi huiñotual Jehová ñi troquiñche mu. Cafei fentren pu che ayüfilu ñi peel ca ñi allcütuel trahun mu, fei eluhuingün ñi quimeltungeal Biblia. Feimu rume falin-ngei feitachi trahun iñchiñ mu.

3. Feichi falin trahun mu, ¿chumngechi pengelquei ñi quiñeucülen Jehová ñi pu che? (Ca inaduamnge ti adentun).

³ Feitachi trahun mu, ca quiñeucüleiñ com taiñ pu peñi pu lamngen huall mapu meu. Com püle pu Dunguquelu Ineingen Jehová trahuluuqueiñ feichi antü epe concülechi antü meu. Com iñchiñ allcütuqueiñ quiñe hueupin, feipi chumngelu fente falin-ngei Jesús tañi lan, epuchi ülcantuqueiñ, rulpangequei tati cofque ca ti pulcu, meli rupa ngillatuqueiñ ca com piuque mu “felepe mai” piqueiñ. Femngechi femquei pu trahunche huall mapu mu quiñe antü mu müten. ¿Ayüucülepelai Jehová engu Jesús  feichi antü com püle tañi püramyengequen?

4. ¿Chem peaiñ tüfachi troquiñ mu?

⁴ ¿Chumngechi pepicayafuiñ taiñ piuque ñi amual tüfachi falin trahun? ¿Chumngechi quelluafuiñ caquelu che ñi amual? Ca, ¿chumngechi quelluafuiñ pu amuhuenolu trahun mu? Tüfachi troquiñ mu, ngüneduamaiñ feichi cüla ramtun. Femngechi pepicaucüleaiñ acule taiñ acordayafiel ta Jesús.

¿CHUMNGECHI PEPICAYAFUIÑ TAIÑ PIUQUE?

5. 1) ¿Chumngelu piuquentucuafuiñ ñi rume falin-ngen Jesús tañi lan? (Salmo 49:7, 8). 2) Ti video feipilelu ¿Chumngelu lai Jesús?, ¿chem quimeltueiñmu?

⁵ ¿Chumngechi pepicayafuiñ taiñ piuque? Hunelu mu, raquiduamafiyiñ fente ñi falin-ngen Jesús tañi lan. Iñchiñ taiñ duam mu, montul-layafuiñ culpan ca lan dungu meu (papeltunge Salmo 49:7, 8; ca inaduamnge ti video ¿Chumngelu lai Jesús?). a Feimu Jehová huli tañi saquin Fotüm taiñ montulaeteu. Femün mu tüfa, rume cutrancahuingu (Rom. 6:23). Doi raquiduamliyiñ ñi femün Jehová ca tañi Fotüm Jesús, doi falintuafiyiñ taiñ montuleteu. Inaduamaiñ tañi femün engu. Hunelu mu, peaiñ chumngechi montuleiñmu Jesús.

6. ¿Chumngelu duamniefuiñ ñi montulngeal? Ca, ¿chumi Jesús?

⁶ Jehová huli tañi Fotüm ñi lapayal iñchiñ mu, femngechi culli reque Adán ñi ñamümel. Ti hunen huentru Adán ellaca mu culpan chengelafui, rumel mongeleafui. Huelu allcütunofilu ta Jehová, müntuñmangei tañi rumel mongeleal quisu ca com tañi cüpanche. Feimu Jesús huli tañi culpan-ngenochi mongen, femngechi huiño nietuafuiñ com ñi ñamümel ta Adán. Jesús com tañi mongen mu “turpu culpalai, ngünencan dungulai rume” (1 Ped. 2:22). Lalu Jesús culpan chengelafui, femngechi mongen niequefui ta Adán ellaca mu. Feimu Jesús tañi lan mu culli reque tañi mongen ñi niequefel ta Adán (1 Cor. 15:45; 1 Tim. 2:6).

7. ¿Chem cüdaungechi dungu rupai Jesús?

⁷ Jesús rupafulu rume fentren huesaque dungu mapu mu, inafi com tañi feipieteu tañi Chau. Pichicalu Jesús, culpan chengelafui, huelu tañi pu chau culpafe chengeingu. Femfulu rume, Jesús allcütufi engu (Luc. 2:51). Huechengelu Jesús, ¿feipingepelafui ñi allcütunofiel tañi pu chau ca ñi püntütripayal Jehová mu? Huelu Jesús femlai. Deu tremlu, Huecüfü eluhui ñi ngünencayafiel tañi culpayal, ca feipifi ñi famtripayal Jehová mu. Huelu Jesús famentueyu (Mat. 4:1-11). Huecüfü ayüfui Jesús ñi culpayal, femngechi taiñ montulnoaeteu.

8. ¿Ca chem huesaque dungu mu rupai ta Jesús?

⁸ ¿Ca chem huesaque dungu mu rupai ta Jesús? Tañi pu caiñe inacaeyu ca ayüfuingün tañi langümafiel (Luc. 4:28, 29; 13:31). Ca inaduamquefui chumngechi ñi huelulcauquen tañi pu discipulo (Mar. 9:33, 34). Feichi antü juiciantucungelu ta Jesús, tañi pu caiñe hulelcaeyu ca ayentueyu engün. Fei langümngei chumngechi ñi langümfiel pu huesaque che ca rume cutrancahui (Heb. 12:1-3). Ca epe puulu ñi layal ta Jesús, quisu tañi duam mu aguantai, tañi Chau incalaeyu (Mat. 27:46). b

9. Jesús hultucui tañi mongen, ¿chem raquiduamelqueiñmu tüfa? (1 Pedro 1:8).

 ⁹ Jesús rume sufrifui taiñ montulaeteu. Raquiduamliyiñ com ñi cutrancahun Jesús iñchiñ mu, doi piuqueyerpuquefiyiñ (papeltunge 1 Pedro 1:8).

10. ¿Chem cüdaungechi dungu rupai Jehová taiñ montulaeteu?

¹⁰ Taiñ montulaeteu Jesús, ¿chem cüdaungechi dungu rupai ta Jehová? Jehová ca tañi Fotüm rume quiñeucüleingu (Prov. 8:30). Feimu Jehová rume hueñancüi pefiel mu tañi Fotüm ñi hulelcangen, illamcangen ca fente ñi cutrantulen.

11. ¿Chum duami Jehová lalu tañi Fotüm? ¿Chem mu trürümafuiñ?

¹¹ Quiñe chau, ñuque lan mu tañi püñeñ, rume cutrantupiuqueafui. Trürümngelayafui chem hueñancün no rume. Maneluucüleliyiñ rume iñchiñ taiñ huiño petuafiel taiñ piuqueyenieelchi che, hueñancüleafuiñ mai. Feimu lalu Jesús nisan 33 tripantu meu, ¿ca femngechi hueñancüpelai Jehová pefiel mu tañi cutrancahun ca ñi lan mu tañi poyen Fotüm? (Mat. 3:17). c

12. Petu ñi acunon ti Trahun Jesús tañi lan ñi acordangeal, ¿chumafuimi?

¹² Petu ñi acunon ti Trahun Jesús tañi lan ñi acordangeal, ¿chumafuimi? Quisulen cam tami familia eimün papeltuafuimi Biblia mu ñi femün Jesús taiñ montulaeteu. ¿Chem papeltuafuimi? Quintuafuimi ti Guía de estudio para los testigos de Jehová huincadungun mu. Cam caquelu publicacion nütramcalu Jesús tañi lan mu. d Cafei tami pepicahual ñi acordayal Jesús tañi lan, fill antü inayafuimi ti papeltun tripalu Taiñ Mongen ca Taiñ Amuldunguqueel, ti papel taiñ pepicahuam. Ca feichi antü ñi acordangeal Jesús tañi lan, peafimi ti falin video feipilu pulihuen taiñ poyeafiel ta Jehová. Pepicaliyiñ taiñ piuque, quelluafiyiñ caquelu che tañi ca quellueteu feitachi falin trahun (Esd. 7:10).

QUELLUAFIYIÑ CAQUELU ÑI CÜMELCAYAETEU TI TRAHUN

13. Caquelu che ñi cümelcayaeteu ti trahun, ¿chumafuiñ?

¹³ ¿Chumafuiñ caquelu che ñi cümelcayaeteu ti falin trahun? Hunelu mu, mülei  taiñ mangelafiel. Amuldungun mu mangelafiyiñ pu che. Ca huirintucuafuiñ inei taiñ mangelafiel: taiñ pu che, compañ cüdau ca colegio cam caquelu che. Niehuenoliyiñ pichique papel taiñ mangelafiel, huercülelafuiñ quiñe enlace telefono mu, femngechi tañi peafiel. Afmatuafuiñ chi fentren che tañi amual (Ecl. 11:6).

14. Mangelfiliyiñ quiñe che, ¿chumafui? Feipinge ñi rupan quiñe lamngen ñi füta.

¹⁴ Ayüliyiñ taiñ mangelafiel quiñe che, ¿amupeafui feitachi che? pilayaiñ. Mangelfiliyiñ, amucayafui chi. Quiñe lamngen tañi füta testigongelai, fei feipieyu tañi amual ti trahun mu. Ti lamngen afmatulehuei. Taiñ lamngen rumel mangelquefui tañi füta, huelu amuquelafui. ¿Chemu feula ayüfui tañi amual? Quiñe loncolelu mangeleneu ñi amual ta trahun mu pi tati huentru. Fei feichi huentru amui ti falin trahun feichi tripantu, ca cüpalechi tripantu mu.

15. Mangelfiliyiñ quiñe che, ¿chumafuiñ?

¹⁵ Mangelfiliyiñ quiñe che ñi acordayal Jesús tañi lan, fentren dungu ramtuafeiñmu chi, doi mai pu hue amulu. Feimu raquiduamafuiñ chem taiñ ramtuaeteu ca pepicahuafuiñ taiñ huiñoldungual (Col. 4:6). Pu che ramtuhuafui: “¿Chumqueimün trahun mu? ¿Chumteñmaquei tati trahun? ¿Chumngechi tucutuhuafun? ¿Cofrangequei ñi conal? ¿Pedingequei plata?”. Feimu ramtuafiyiñ tati pu che chem ayüniei tañi quimal. Fei huiñoldunguafiyiñ com ñi ramtun. Cafei pengelelafiyiñ ti video feipilelu Acordayafiyiñ Jesús ñi lan. Ca ti video ¿Chumqueingün am pu Dunguquelu Ineingen Jehová tañi Trahunhue Ruca mu? Ca feipiafiyiñ quiñeque dungu ñi feipin ti lifru ¡Rumel ayüucüleaimi! quimeltun 28.

16. Tati amulu trahun mu, ¿chem ramtuhuafui?

¹⁶ Deu rupalu ti trahun, ti che doi ramtun nieafui. Ramtuhuafui: “¿Chumngelu com pu che pütocolafi pulcu ca ilafi ti cofque? ¿Tunten rupa femqueimün ti trahun ñi acordayal Jesús ñi lan? Tamün femün fachantü, ¿fill trahun mu femqueimün?” piafui. Ti che allcütulu ti  hueupin ñi acordayal Jesús tañi lan, doi ayüafui chi tañi quimal. Taiñ cüme huiñoldunguafiel, ¿chem quelluafeiñmu? Conafuiñ jw.org mu, ca peafiyiñ ti troquiñ feipilelu “Pu Dunguquelu Ineingen Jehová chumngechi ñi acordaquefiel Jesús tañi lan mu, huelu ¿chumngelu trürlai ñi femquen caquelu pu religion mu?”. Petu puunolu ti Trahun Jesús tañi lan ñi acordangeal, feichi antü ca rupachi antü mu, com nehuen mu quelluafiyiñ pu “ayünielu ñi llohual ti rüf dungu”. Femngechi quelluaeyu feitachi falin trahun (Hech. 13:48).

QUELLUAFIYIÑ PU AMUHUENOLU TRAHUN MU

17. Tati pu loncolelu, ¿chumngechi quelluafuingün tati pu amuhuenolu trahun mu? (Ezequiel 34:12, 16).

¹⁷ Tati pu loncolelu, ¿chumngechi quelluafui pu amuhuenolu trahun mu? Pengelelafingün tañi piuqueyeniefiel ca tañi duamtuniefiel (papeltunge Ezequiel 34:12, 16). Pu loncolelu, petu ñi acunon ti falin trahun, fentren rupa mütrümafimün ca pemeafimün pu trahuhuenolu. Feipiafimün tamün raquiduamtucuniefiel ca eluucüleimün tamün quelluafiel. Mangelafimün ñi amual ti Trahun Jesús tañi lan ñi acordangeal. Amule engün, piuqueyenquechi llohuafimün. Rupale ti trahun, fentecünulayaimün tamün mütrümafiel ca pemeafiel. Quelluafimün tañi huiñotual ta Jehová mu (1 Ped. 2:25).

18. ¿Chumngechi com iñchiñ quelluafuiñ pu amuhuenolu trahun mu? (Romanos 12:10).

¹⁸ Com ti trahunche quelluafui pu amuhuenolu trahun mu, ¿chumngechi? Amule engün ñi acordayal Jesús tañi lan, piuqueyenquechi llohuafiyiñ, ca pengelelafiyiñ taiñ yamniefiel (papeltunge Romanos 12:10). Feitachi pu peñi, pu lamngen ¿cüdautupelafui ñi huiñotual trahun mu? ¿Raquiduampelafuingün chumngechi tañi llohuaeteu tañi pu peñi, pu lamngen? e Feimu ramtucadungulayafiyiñ taiñ yehuelcanoafiel.  Chem no rume feipilayafiyiñ tañi huesa duamelnoafiel (1 Tes. 5:11). Feitachi pu amuhuenolu trahun mu iñchiñ taiñ peñi, lamngen-ngeingün. Ayüucüleiñ taiñ trür poyenieafiel ta Jehová (Sal. 119:176; Hech. 20:35).

19. ¿Chumngechi cümelcaqueiñmu acordayal Jesús tañi lan?

¹⁹ Quimnieiñ fente ñi falin-ngen acordayal Jesús tañi lan. Feimu Jesús feipieiñmu ñi femal fill tripantu. Amun mu feitachi trahun, rume cümelcaqueiñmu iñchiñ ca caquelu che (Is. 48:17, 18). Quelluqueiñmu taiñ doi piuqueyeafiel ta Jehová ca tañi Fotüm Jesús. Amun mu pengelqueiñ fente ñi mañumniefiel com ñi femün engu iñchiñ mu. Doi quiñeucülequeiñ taiñ pu peñi, pu lamngen iñchiñ. Quelluafiyiñ caquelu che ñi chumal engün, femngechi ñi cümelcayaeteu Jesús tañi lan. Feimu eluucüleaiñ taiñ pepicahual ñi acordayal Jesús tañi lan, fei tati doi falin trahun tripantu meu.