1. Inyuki Mbigda nyemb Yésu i yé hilo hi nwii hi nlôôha ba mahee? (Lukas 22:19, 20)

 INYU bagwélél ba Yéhôva, Mbigda nyemb Kristô i yé hilo hi nwii hi nlôôha ba mahee. Hilo hi hion Yésu a bi ti banigil bé oda le ba tééda. (Añ Lukas 22:19, 20.) Ngandak manjom i ntinde bés i bem hilo hi ni maséé. Di wan le mahogi.

2. Mambe manjom ma ntinde bés i bem Mbigda nyemb Yésu ni maséé?

² Mbigda nyemb Yésu i nhôla bés i ôt pék i nseñ u binoñ. I mbigdaha yak bés lelaa di nla ti mayéga inyu sesema i Yésu. (2 Korintô 5:14, 15) I nti yak bés pôla le di “tina makénd” ni lôk kéé yés i bôda ni i bôlôm. (Rôma 1:12) Hiki nwii, ngandak lôk kéé i i bi waa lo makoda i yé i lo i Mbigda nyemb Yésu. Bahogi ba yé ba témb yak Yéhôva inyule ba nleege bo loñge. Yak ngandak bôt ipe i i yé i ba ha yokel, i yé i ba maséé ni i yom ba ntehe ni i ba nok, hala a ntinde bo i bôdôl nigil Bibel. Hala a nhélés bé bés i yi le Mbigda nyemb Yésu i yé hilo hi tôbôtôbô inyu yés!

3. Lelaa Mbigda nyemb Yésu i nkônde at bagwélél ba Djob ba nkoñ ’isi wonsôna? (Béñge yak titii.)

³ Hoñol yak lelaa Mbigda nyemb Yésu i nkônde at bilôk bikéé bi nkoñ ’isi wonsôna. Mbôgi Yéhôva i nkoñ ’isi wonsôna i yé i nkodba i manañle ma hiañgaa ndék ni ndék. Bésbobasôna di ñemble nkwel u u mpôdôl mahee ma binoñ, di tôp tjémbi di bibégés diba, di tégbaha bret ni wai, di soohe ngélé ina, di timbhe ki ni ñem wés wonsôna le “amen.” Yom kiki bo 24 ma ngeñ, makoda momasôna ma mboñ nlélém jam. Baa u nla hégda maséé Yéhôva bo Yésu  ba nôgda i ngéda ba ntehe bagwélél ba Yéhôva ni nkoñ ’isi wonsôna ba nti bo lipém ni i njel i?

4. Kii di ga tehe munu yigil ini?

⁴ Munu yigil ini, di ga wan mana mambadga: Lelaa di nla kôôba ñem wés inyu Mbigda nyemb Yésu? Lelaa di nla hôla bôt bape i ôt nseñ ni Mbigda nyemb Yésu? Ni lelaa di nla hôla lôk kéé i i bi waa lo makoda? Ndimbhe i mambadga mana i ga hôla bés i ba nkôôbaga inyu hilo hi tôbôtôbô hini.

LELAA DI NLA KÔÔBA MIÑEM NWÉS INYU MBIGDA NYEMB YÉSU?

5. (a) Inyuki di nlama ôt pék i nseñ binoñ bi gwé? (Tjémbi 49:7, 8) (b) Kii di nla nigil munu i vidéô ini le Inyuki Yésu a bi wo?

⁵ Njel yada i i nlôôha ba mahee inyu kôôba miñem nwés inyu Mbigda nyemb Yésu i le di ôt pék mu nseñ binoñ bi sesema i Yésu Kristô bi gwé. Di bé bé le di kobol bésbomede i mok mi nyemb ni mi béba. (Añ Tjémbi 49:7, 8; béñge yak i vidéô ini le Inyuki Yésu a bi wo?) a Yéhôva ni Man wé nu gwéha ba bi ti ndamba ikeñi inyu kobol bés, hala wee niñ i Yésu. (Rôma 6:23) Ibale di ntibil soñda i jam Yéhôva bo Yésu ba bi boñ inyu yés, hala a ga boñ le di kônde diihe binoñ. Di ga wan ndigi ndék bisesema Yéhôva bo Yésu ba bi ba bebee i boñ inyu yés. Ndi, di béñge ndugi kii i yé binoñ.

6. Kii i yé binoñ?

⁶ Binoñ bi yé ndamba ba nsaa inyu tiimba somb ngim yom. Adam, mut bisu, a bé peles i ngéda Nyambe a bi hek nye. I ngéda a bi boñ béba, a bi nimis botñem i niñ boga, he inyu yé nyetama bé, ndi yak inyu bon bé bobasôna. Inyu tiimba somb i yom Adam a bi nimis, Yésu a bi ti niñ yé kiki sesema inyu bôt bobasôna. Niñ yé yosôna hana ’isi, Yésu “a bi boñ bé béba to yada, ba bi léba bé to tembee yo ki yo mu nyo wé.” (1 Pétrô 2:22) I ngéda Yésu a bi wo, niñ yé i peles i bé i kôli inyu saa i yom Adam a bi nimis.—1 Korintô 15:45; 1 Timôtéô 2:6.

7. Mambe manoodana mahogi Yésu a bi boma i ngéda a bé hana ’isi?

⁷ I ngéda a bé hana ’isi, Yésu a bi nôgôl Yéhôva yak i ngéda i bé ndutu i boñ hala. I ngéda a bé mañge, Yésu a bi lama suhus nyemede isi kunde i bagwal bé ba ba bé bôt ba binam, ba ban-ga libak li ngi yon, to hala kiki nye a bé peles. (Lukas 2:51) Nye njohok, a bi lama keñgle bilôñ bibe bi bi bé le bi boñ le a ndogbene bagwal bé, a waa téñbe ni Yéhôva. Nye nhôôlak mut, Yésu a bi lama kolba Satan Nsohop nu a bé tinde nye i boñ béba ni i ndogbene Yéhôva. (Matéô 4:1-11) Satan a bé yéñ ndik le a tinde Yésu i boñ béba kayéle a laa ha bé saa binoñ.

8. Mambe mandutu mape Yésu a bi hônba?

⁸ I ngéda a bé gwel nson wé likalô hana ’isi, Yésu a bi hônba manoodana mape. Ba bi tééñga nye, ba yéñ yak le ba nol nye. (Lukas 4:28, 29; 13:31) A bi hônba yak libak li ngi yon li banigil bé. (Markô 9:33, 34) I ngéda a bé kôs manoodana i niñ yé, ba bi kép nye mbai, ba nol ki nye hiol. I mbus, ba bi nol nye kiki ntonba, a nok ki njôhge kiyaga. (Lôk Héber 12:1-3) Nyemede nyen a bé lama hônba mandutu ma nsôk ma niñ yé ibabé le Yéhôva a sôñ nye. b—Matéô 27:46.

9. Sesema i Yésu i ntinde bés i boñ kii? (1 Pétrô 1:8)

 ⁹ Ibabé pééna, binoñ bi bi hee Yésu diye ngandak. I ngéda di ñôt pék mu bisesema gwobisôna Yésu a bi ba bebee i boñ inyu yés, baa hala a ntinde bé bés i gwés nye bañga bañga?—Añ 1 Pétrô 1:8.

10. Imbe sesema Yéhôva a bi boñ inyu saa binoñ?

¹⁰ Imbe sesema Yéhôva a bé bebee i boñ inyu boñ le Yésu a saa binoñ? Yéhôva bo Yésu ba yé libal bo ’isi, di nla hégda maada ma bas bas ma yé ipôla Man bo Isañ. (Bingéngén 8:30) Noode le hégda i yom Yéhôva a bé nôgda i ngéda a bé tehe Man wé a nson njonok hana ’isi. Ibabé pééna, hala a bé tééñga nye ngandak i tehe kiki ba ntééñga Man wé.

11. Ti hihéga hi hi ñunda i yom Yéhôva a bi nlama nôgda i ngéda ba bi nol Yésu.

¹¹ Ngwal nu a ma nimis man a nyi i njôhge i yé mu i ngéda i jam li li mpémél ngwal. I yé maliga le di nhémle le bitugne bi ga ba, ndi i botñem i, i nsas bé i njôhge i yé i ngéda u nimis mut. Hihéga hi, hi nhôla bés i nok i yom Yéhôva a bi lama nôgda i ngéda Man wé nu gwéha a bi nok ndutu, a wo i nwii 33 N.Y. c—Matéô 3:17.

12. Kii di nla boñ ilole Mbigda nyemb Yésu i nkola?

¹² Ilole Mbigda nyemb Yésu i nkola, mu i yigil yoñ wemede tole i yigil i ndap lihaa, baa ni ta bé le ni kônde nigil mam mape inyu binoñ? Gwélél Ñéga inyu nyiña u bikaat bi Mbôgi Yéhôva (ibale i yé ni hop woñ) tole bikaat bipe bi bi mpôdôl binoñ. d Boñ ki biliya i noñ ntjega u lisoñgol li Bibel inyu Bilôp bi Nwet ikété kaat yés ini le Niñ yés ni nson wés u bikristen—Kaat likoda li ñem sonde. I kel Mbigda nyemb Yésu, u hôya bañ béñge buk kel i tôbôtôbô. Ibale di nkôôba miñem nwés inyu Mbigda nyemb Yésu, hala a ga ba jam li ntomb i hôla bôt bape i ôt nseñ ni hilo hi.—Ésra 7:10.

HÔLA BÔT BAPE I ÔT NSEÑ NI BILÔP BI NWET

13. Limbe jam li bisu u nla boñ inyu hôla bôt bape i ôt nseñ ni Mbigda nyemb Yésu?

¹³ Lelaa di nla hôla bôt bape i ôt nseñ ni Mbigda nyemb Yésu? Jam li bisu u nla  boñ li yé le u naña bo. U héya i bôt di mbéna boma i ngéda di yé likalô hiki ngéda, di nla ki tila môl ma bôt di nla naña. I nla ba bôt bés ba lihaa, bôt bés ni bo di nsal, mawanda més ma suklu, tole bôt bape ki. To di gwé bé mapep ma nsébla, di nla ômle bo lien. Hala a yé le a hélés bés i tehe nsoñgi u bôt u ga neebe nsébla wés!—Ñañal 11:6.

14. Ti hihéga hi hi ñunda le i ngéda di naña mut i Bilôp bi Nwet hala a nlôôha ti nye makénd i ba ha.

¹⁴ I ngéda di naña mut di nyi i Mbigda nyemb Yésu, hala a nla ti nye makénd i ba ha. Kel yada, sita i nlôm a ta bé Mbôgi Yéhôva i bi hel i ngéda nlô wé a bi kal nye le a ga ke i Mbigda nyemb Yésu lôñni nye. Hala a bi hélés nye inyule, ngandak ngélé, a bi ti nye makénd i ke i Mbigda nyemb Yésu, ndi kekikel a bi ke bé. Inyuki mam ma bi héñha? Nlôm a bi kal nye le: “Ba nti me lipep li nsébla.” A bi toñol le mañ wada u likoda u a bé yi loñge loñge u bi naña nye. Nlôm i sita i, a bi lo Bilôp bi Nwet i nwii u, a tééda ki i lem i ngandak nwii i mbus.

15. Kii di nlama bé hôya i ngéda di naña bôt i Mbigda nyemb Yésu?

¹⁵ Di hôya bañ le i bôt di naña i Mbigda nyemb Yésu, ba nla bat bés mambadga, téntén ibale ngélé yap i bisu i le ba loo. Di noode hoñol mambadga ba nla badba, di kôôba ki inyu timbhe bo. (Kôlôsé 4:6) Kiki hihéga, bahogi ba nla bat le: ‘Kii y’a tagbe mu i ngand nan i?’ ‘I nom ngeñ yañen?’ ‘Inyu ba ha, me nlama haba lelaa?’ ‘Inyu jôp, baa me nlama saa?’ ‘Baa njañgi i yé?’ I ngéda u naña mut i Mbigda nyemb Yésu, u nla ndik bat nye le: “Baa u gwé ngim mbadga?” i mbus u timbhe ki mambadga mé. U nla gwélél bividéô bini, Mbigda nyemb Yésu, ni Kii i ntagbe i ndap Ane? inyu hôla nye i nok lelaa makoda més ma ntagbe. I kaat yés ini le Niñ ilam i boga ni boga! i pes 28, di nléba matode malam ma di nla kwel ni bôt bape.

16. Mambe mambadga mape i bôt ba nlo i Mbigda nyemb Yésu ba nla bat?

 ¹⁶ I mbus Mbigda nyemb Yésu, i bôt ba, ba nla bana mambadga mape. Hala a nla hélés bo i tehe le mut nye ki nye a nje bé bret to nyo wai i Mbigda nyemb Yésu, tole ndigi ndék bôt yon i nje, i nyo ki. Ba nla ki hel le inyuki ngélé yada i ngim nwii nyen ba ntégbaha Bilôp bi Nwet. Ba nla ki yéñ yi too makoda ma Mbôgi Yéhôva momasôna ma ntagbe nlélém. To hala kiki ngandak matode i bi pôda mu nkwel i kel Mbigda nyemb Yésu, i bôt ba nlo yokela, ba nla bana ngôñ le ba toñle bo mam mape. I jw.org, i yigil ini le, “Inyuki Bilôp bi Nwet bi Mbôgi Yéhôva bi yé maselna ni bi bibase bipe?” i nla hôla bés i timbhe mambadga map mahogi. Di nlama boñ kii yosôna di nla ilole Mbigda nyemb Yésu i ntagbe, i ngéda i mba i ntagbe, tole i mbus i mal tagbe inyu hôla ba bobasôna ba gwé “libak lilam” i ôt nseñ ni Mbigda nyemb Yésu.—Minson mi baôma 13:48.

HÔLA LÔK KÉÉ I I NTOMB I PES MBUU

17. Lelaa mimañ mi nla hôla i bôt ba ntomb i pes mbuu? (Ézékiel 34:12, 16)

¹⁷ I ngéda Bilôp bi Nwet, lelaa mimañ mi nla hôla i bet ba ntomb i pes mbuu? Ni unda bo le ni ntôñ bo, ni ngwés ki bo. (Añ Ézékiel 34:12, 16.) Ilole Mbigda nyemb Yésu i nkola, ni boñ biliya i boma libim ikété yap, ni yis bo le ni ntôñ bo ni le ni gwé ngôñ i boñ kii yosôna ni nla inyu hôla bo. Ni naña ki bo i Mbigda nyemb Yésu. Ibale ba nlo, ni leege bo loñge. I mbus Mbigda nyemb Yésu, ni kee ni bisu i yuuga i lôk kéé i bôlôm ni i bôda i, ni séblak bo i téléfôn. Ni lona ki bo mahôla momasôna ba gwé ngôñ inyu boñ le ba témb yak Yéhôva.—1 Pétrô 2:25.

18. Lelaa bésbobasôna di nla hôla lôk kéé i i ntomb i pes i mbuu? (Rôma 12:10)

¹⁸ Bésbobasôna di nla hôla bilôk bikéé  bi ntomb i pes mbuu bi bi nlo i Mbigda nyemb Yésu. Lelaa? I ngéda di nleege bo ni gwéha, loñgeñem, ni lipém jolisôna. (Añ Rôma 12:10.) Di bigda le, hala a mba bé i lôk kéé i gwéha ini jam li ntomb i tiimba lo i likoda. Bebek le ba bé kon woñi le ba ga leege bé bo loñge. e Jon di keñgle i bat bo mambadga ma ma nla tééñga bo tole i pot mam ma ma nla babaa bo. (1 Tésalônika 5:11) I bôlôm ba ni i bôda ba, ba yé lôk kéé yés. Di yé maséé le di ntémb di bôdôl ki bégés Yéhôva ni bo!—Tjémbi 119:176; Minson mi baôma 20:35.

19. Bimbe bisai di nkôs i tégbaha Mbigda nyemb Yésu?

¹⁹ Baa hala a nlama hélés bés i yi le Yésu a bi yoñ bitelbene le di tégbaha Mbigda i nyemb yé hiki nwii? I ngéda di mboñ hala, hala a nlona bés ni bôt bape, ngandak bisai. (Yésaya 48:17, 18) Di nkônde gwés Yéhôva bo Yésu. Di ñunda le di nlôôha diihe i jam ba bi boñ inyu yés. Di nkônde kôôge bebee ni lôk kéé i bôda ni i bôlôm. Di nla ki hôla bôt bape i yi le yak bo ba nla kôhna bisai bi nlôl ni binoñ. Di boñ kii yosôna di nla inyu ba nkôôbaga inyu Mbigda nyemb Yésu i nwii unu, hilo hi nwii hi hi nlôôha ba nseñ!