1. Taano ta an Memoryal an pinakaimportanteng aldaw kan taon? (Lucas 22:19, 20)

 PARA sa mga lingkod ni Jehova, an Memoryal kan kagadanan ni Cristo iyo an pinakaimportanteng aldaw kan taon. Iyan sana an okasyon na espesipikong ipinagbuot ni Jesus na iselebrar kan saiyang mga parasunod. (Basahon an Lucas 22:19, 20.) Hinahalat-halat ta an Memoryal sa dakul na dahilan. Pag-ulayan ta an nagkapira sa mga iyan.

2. Ano an nagkapirang dahilan kaya hinahalat-halat ta an Memoryal?

² Tinatabangan kita kan Memoryal na hurop-hurupon an halaga kan pantubos. Ipinapagirumdom kaiyan an mga paagi kun paano ta maipapahiling an satong pagpapahalaga sa atang ni Jesus. (2 Cor. 5:14, 15) Tinatawan man kita kaiyan nin oportunidad na “magpakinurusog-kusugan” bilang magturugang. (Roma 1:12) Kada taon, dakul na mga inaktibo an nag-aatender. An iba pa ngani sainda napahiro na bumalik ki Jehova huli sa maugmang pag-welcome sa sainda. Asin dakul na interesado an nadadagka na punan an paglakaw sa dalan pasiring sa buhay huli sa saindang nahiling asin nadangog. Kaya bako nanggad makangangalas na espesyal na marhay sa sato an Memoryal!

3. Paano kita pinagkakasararo kan Memoryal bilang magturugang sa bilog na kinaban? (Hilingon man an ritrato.)

³ Pag-isipan man kun paano kita pinagkakasararo kan Memoryal bilang magturugang sa bilog na kinaban. An mga Saksi ni Jehova nagtitiripon mantang luway-luway na nagsusulnop an saldang sa bilog na kinaban. Gabos kita nakakadangog nin sarong pahayag na nagduduon kan kahalagahan kan pantubos. Nagkakanta kita nin duwang kanta nin pag-umaw, ipinapasa an mga emblema, asin bilog na pusong nagsasabi nin “amen” sa apat na pamibi. Sa laog nin haros 24 oras, arog kaiyan an ginigibo  kan gabos na kongregasyon. Naiimahinar mo daw kun gurano kaugma si Jehova asin si Jesus mantang nahihiling ninda kita na sararong nagtatao nin onra sa sainda sa paaging ini?

4. Ano an pag-uulayan ta sa artikulong ini?

⁴ Sa artikulong ini, pag-uulayan ta an mga hapot na: Paano ta aandamon an satong puso para sa Memoryal? Paano ta matatabangan an iba na makinabang diyan? Asin paano ta matatabangan an mga inaktibo? An simbag sa mga hapot na iyan makakatabang sa sato na magin andam para sa sagradong okasyon na ini.

PAANO TA AANDAMON AN SATONG PUSO PARA SA MEMORYAL?

5. (a) Taano ta dapat tang hurop-hurupon an halaga kan pantubos? (Salmo 49:7, 8) (b) Ano an nanudan mo sa video na Taano ta Nagadan si Jesus?

⁵ An saro sa pinakaimportanteng paagi para maandam an satong puso para sa Memoryal iyo an paghurop-hurop sa halaga kan atang na pantubos ni Jesu-Cristo. Kun sa sadiri ta sana, dai ta lamang magigibo na tubuson an satong sadiri sa kasalan asin kagadanan. (Basahon an Salmo 49:7, 8; hilingon man an video na Taano ta Nagadan si Jesus?) a Kaya dawa dakulaon an kaipuhan na isakripisyo ni Jehova saka kan saiyang namumutan na Aki, isinugo niya si Jesus tanganing itao an saiyang buhay alang-alang sa sato. (Roma 6:23) Mantang mas hinuhurop-hurop ta an sakripisyong ginibo ni Jehova asin ni Jesus para sa sato, mas lalo ta man na mapapahalagahan an pantubos. Pag-uulayan ta an pira sana sa sakripisyong iyan na ginibo ni Jehova asin ni Jesus. Pero bago iyan, ano an kalabot sa pantubos?

6. Ano an kalabot sa pantubos?

⁶ An pantubos iyo an halaga na ibinabayad para tubuson an sarong bagay. An inot na tawo, si Adan, perpekto kan siya lalangon. Kan nagkasala siya, naiwara niya an paglaom na mabuhay nin daing katapusan, bako sana para sa saiya kundi para man sa gabos niyang aki. Tanganing maibalik an naiwara ni Adan, idinulot ni Jesus an sadiri niyang perpektong buhay bilang atang. Sa bilog na buhay ni Jesus digdi sa daga, “dai siya nakagibo nin kasalan, ni may nakua man na pandadaya sa saiyang nguso.” (1 Ped. 2:22) Kan oras na magadan si Jesus, an saiyang perpektong buhay nagin eksaktong katumbas kan buhay na naiwara ni Adan.​—1 Cor. 15:45; 1 Tim. 2:6.

7. Ano an nagkapirang pagbalo na inagihan ni Jesus kan yaon siya digdi sa daga?

⁷ Si Jesus nagdanay na masinunod ki Jehova sa gabos na bagay sa ibong kan dakul na mga pagbalo na inagihan niya kan yaon siya digdi sa daga. Bilang sarong aki, kinaipuhan ni Jesus na magpasakop sa awtoridad kan saiyang bakong perpektong mga magurang dawa namundag siyang perpekto. (Luc. 2:51) Bilang sarong hoben, kinaipuhan niyang labanan an ano man na panggigipit kan iba na tibaad gusto siyang impluwensiyahan na magin masinuway o dai magin maimbod. Asin bilang sarong adulto, kinaipuhan ni Jesus na manindugan sa mga sugot ni Satanas na Diyablo, kaiba na an direktang mga pag-atake sa kaimbudan niya sa Diyos. (Mat. 4:1-11) Determinado si Satanas na papagkasalaon si Jesus tanganing dai niya maitao an pantubos.

8. Ano pang mga pagbalo an tinagalan ni Jesus?

⁸ Durante kan saiyang ministeryo digdi sa daga, dakul pang pagbalo an tinagalan ni Jesus. Napaatubang siya sa persekusyon asin mga huma. (Luc. 4:28, 29; 13:31) Kinaipuhan niyang pagpasensiyahan an pagkabakong perpekto kan saiyang mga parasunod. (Mar. 9:33, 34) Kan bistahon siya, pinasakitan siya asin tinuya-tuya. Dangan ginadan siya sa makulugon asin makasusupog na paagi. (Heb. 12:1-3) Asin sa huring parte kan saiyang pagsakit, kinaipuhan niyang tagalan  iyan nin solo, na mayo kan pagprotektar ni Jehova. b—Mat. 27:46.

9. Ano an namamati ta kun manungod sa atang ni Jesus? (1 Pedro 1:8)

⁹ Malinaw nanggad, dakulaon na sakripisyo an ginibo ni Jesus para maitao an pantubos. Kaya pag hinuhurop-hurop ta an gabos na sakripisyong gikan sa buot na ginibo niya para sa sato, bako daw na nakakamati kita nin grabeng pagkamuot sa saiya?​—Basahon an 1 Pedro 1:8.

10. Ano an isinakripisyo ni Jehova tanganing maitao an pantubos?

¹⁰ Kumusta man si Jehova? Ano an gikan sa buot niyang isinakripisyo tanganing maitao ni Jesus an pantubos? Si Jehova asin si Jesus an pinakadayupot na mag-ama. (Tal. 8:30) Kaya isipa na sana kun gurano kasakit para ki Jehova mantang nahihiling niya si Jesus na tinatagalan an dakul na kasakitan mantang yaon ini sa daga. Siguradong nakulgan na marhay si Jehova na mahiling an saiyang Aki na minamaltrato, isinisikwal, asin pinapasakitan.

11. Magtao nin halimbawa para ipahiling kun ano an namatian ni Jehova kan gadanon si Jesus.

¹¹ Aram na marhay kan siisay man na magurang na nagadanan nin aki kun gurano kakulog na mawaran nin aki. Nagtutubod kitang marhay sa pagkabuhay liwat, alagad pag nagadanan kita nin mahal sa buhay, nakakamati pa man giraray kita nin kamunduan. An halimbawang iyan makakatabang sa sato na masabutan kun ano an namatian ni Jehova kan mahiling niya an saiyang namumutan na Aki na nagsasakit asin nagadan kan aldaw na idto nin tigsuli kan 33 C.E. c—Mat. 3:17.

12. Ano an puwede tang gibuhon bago an Memoryal?

¹² Bago an Memoryal, taano ta dai purbaran na mas pag-adalan pa an manungod sa pantubos sa saimong personal na pag-adal o sa saindong Pampamilyang Pagsamba? Gamiton an Giya sa Pag-research Para sa Mga Saksi ni Jehova o iba pang mga pantabang sa pag-adal nin Bibliya para mas urog pang masiyasat an manungod sa temang iyan. d Siguraduhon man na sundan an iskedyul nin babasahon sa Bibliya para sa Memoryal na yaon sa An Satong Kristiyanong Pamumuhay Asin Ministeryo—Workbook Para sa Pagtiripon. Asin sa aldaw kan Memoryal, dai paglingawan na hilingon an espesyal na programa nin Pang-agang Pagsamba. Pag inaandam niyato an satong puso para sa Memoryal, magigin andam kita na tabangan an iba na makinabang man diyan.​—Esd. 7:10.

 TABANGAN AN IBA NA MAKINABANG

13. Ano an inot na lakdang para tabangan an iba na makinabang sa Memoryal?

¹³ Paano ta matatabangan an iba na makinabang sa Memoryal? An inot na lakdang, siyempre, imbitaran sinda. Apuwera sa pag-imbitar sa mga nanunumpungan ta sa satong regular na pagmiministeryo, puwede kitang gumibo nin lista kan mga tawo na iimbitaran niyato. Puwedeng kaiba diyan an satong mga kaparyente, katrabaho, kaeskuwela, asin iba pa. Dawa mayo kitang igong imprentadong kopya kan imbitasyon, puwede kitang mag-share nin link kan elektronikong bersiyon kaiyan. Dai ta nanggad aram kun gurano kadakul an posibleng mag-atender!—Ecl. 11:6.

14. Magtao nin halimbawa kun ano an nagigibo kan pag-imbitar nin personal.

¹⁴ Nungkang pagbaliwalaon an magigibo kan pag-imbitar nin personal. Sarong aldaw, sarong sister na may agom na bakong Saksi an nabigla kan maugmang sabihon kan saiyang agom na maiba ini sa saiya sa Memoryal. Taano ta nabigla siya? Dakul na beses niya na kaya kaidtong inagda an agom niya na mag-atender, pero dai pa ini nag-iba. Ano an nakapabago sa isip niya? “Igwa nin personal na nag-imbitar sako,” an sabi kan agom na lalaki mantang ipinapaliwanag na sarong elder sa kongregasyon kan agom niya na kabisto niya an nag-imbitar sa saiya. An agom na lalaking iyan nag-atender kan taon na idto asin sa nagsurunod pang taon.

15. Ano an dapat tang tandaan pag nag-iimbitar kita para sa Memoryal?

¹⁵ Tandaan na an mga naimbitaran ta posibleng may mga hapot—lalo na kun dai pa sinda nakaatender sa satong mga pagtiripon. Marahay na patiinot ta nang pag-isipan an mga hapot ninda asin magin andam na simbagon an mga iyan. (Col. 4:6) Halimbawa, tibaad iniisip kan nagkapira: ‘Ano daw an ginigibo sa okasyon na iyan?’ ‘Gurano daw iyan kalawig?’ ‘Ano an kaipuhan na isulot?’ ‘May bayad daw an pag-atender?’ ‘Igwa daw nin pangungulekta?’ Pag may iniimbitaran kita sa Memoryal, puwede tang ihapot saiya, “May hapot ka manungod sa okasyon?” dangan simbagon an ano man na hapot niya. Puwede ta man gamiton an mga video na Girumdumon  an Kagadanan ni Jesus asin Paano Ginigibo an Pagtiripon sa Kingdom Hall? para tabangan siya na masabutan kun ano an ginigibo sa satong mga pagtiripon. Asin an leksiyon 28 kan librong Mabuhay nin Maugma Sagkod Pa Man! nagtatao sato nin magayon na mga punto na puwede tang ipakipag-ulay sa saiya.

16. Ano pa an tibaad ihapot kan mga nag-atender sa Memoryal?

¹⁶ Pagkatapos kan Memoryal, tibaad may mga hapot pa an mga interesado na primerong beses pa sanang nag-atender. Tibaad ihapot ninda kun taano ta dikit sana (kun igwa man) an nagkakan asin nag-inom kan mga emblema. Tibaad maisip man ninda kun gurano ta kaparating ginigibo an Memoryal. Asin tibaad ihapot ninda kun arog kaiyan pirmi an gabos na pagtiripon kan Mga Saksi ni Jehova. Dawa ngani dakul sa mga puntong iyan an naipaliwanag na sa pahayag sa Memoryal, tibaad mangaipo pa sinda nin mas detalyadong paliwanag. An artikulo sa jw.org na may titulong “Taano ta Bakong Arog sa Ibang Relihiyon an Paagi nin Paggirumdom kan Mga Saksi ni Jehova sa Pamanggihan kan Kagurangnan?” makakatabang sa sato na masimbag an nagkapira sa mga hapot ninda. Gusto tang gibuhon an ano man na magigibo ta—bago, durante, asin pagkatapos kan Memoryal—na tabangan an mga “igwang pusong nasa tamang kamugtakan” na makinabang sa okasyon na iyan.​—Gibo 13:48.

TABANGAN AN MGA INAKTIBO

17. Paano matatabangan kan mga elder an mga inaktibo? (Ezekiel 34:12, 16)

¹⁷ Sa panahon kan Memoryal, paano matatabangan kan mga elder an mga inaktibo? Ipamati sainda an saindong pagkamuot. (Basahon an Ezekiel 34:12, 16.) Bago an Memoryal, siguraduhon na makontak sinda gabos sagkod na posible. Sabihon sa sainda na nagmamalasakit ka sainda asin na gusto mong tabangan sinda sa ano man na paaging makakaya mo. Imbitaran sinda na mag-atender sa Memoryal. Pag nag-atender sinda, maugma sindang i-welcome. Pagkatapos kan Memoryal, padagos na dalawon o apudan an namumutan na mga tugang na ini, asin tawan sinda kan ano man na espirituwal na tabang na kaipuhan ninda para makabalik ki Jehova.​—1 Ped. 2:25.

18. Paano kita gabos makakatabang sa mga inaktibo? (Roma 12:10)

 ¹⁸ An gabos sa kongregasyon puwedeng makatabang sa mga inaktibo na nag-atender sa Memoryal. Paano? Paagi sa pagpahiling sa sainda nin pagkamuot, kabuutan, asin paggalang. (Basahon an Roma 12:10.) Tandaan na an namumutan na mga karnerong ini tibaad nag-aalangan na mag-atender giraray sa mga pagtiripon. Posibleng natatakot sinda na tibaad bakong marahay an magin pag-ako sa sainda. e Kaya likayan na maghapot o magkomento nin mga bagay na puwedeng makapasupog o makakulog kan buot ninda. (1 Tes. 5:11) Mga kapagtubod niyato an mga tugang na ini. Nauugma nanggad kitang makaibanan giraray sinda sa pagsamba!—Sal. 119:176; Gibo 20:35.

19. Paano kita nakikinabang sa paggirumdom kan kagadanan ni Jesus?

¹⁹ Kaya mangalas daw kita kun taano ta pinagbutan kita ni Jesus na girumdumon an saiyang kagadanan kada taon? Pag nag-aatender kita diyan, nakikinabang kita asin an iba pa sa dakul na paagi. (Isa. 48:17, 18) Mas nag-uurog an satong pagkamuot ki Jehova asin ki Jesus. Ipinapahiling ta an dakulang pagpapahalaga sa ginibo ninda para sa sato. Napapakusog ta an satong relasyon sa satong mga kapagtubod. Asin makakatabang kita sa iba na makamtan man an mga bendisyon na nagin posible huli sa pantubos. Kun siring, gibuhon ta an gabos na magigibo ta na magin andam sa Memoryal sa taon na ini—an pinakaimportanteng aldaw kan taon!