ICIPANDE CA KUSAMBILILAMO 2
ULWIMBO 19 Umulaalilo wa kwa Shikulu
Bushe Namuipekanya ku Bushiku Ubwacindama Sana mu Mwaka?
“Mulecita ici ku kunjibukisha.”—LUKA 22:19.
IFYO TWALALANDAPO SANA
Twalalanda sana pa fyo Icibukisho cacindamina, ifyo twingaipekanya e lyo ne fyo twingalenga bambi ukusangwako.
1. Mulandu nshi ubushiku bwa Cibukisho bwabela bushiku ubwacindama mu mwaka? (Luka 22:19, 20)
ABANTU ba kwa Yehova bamona ubushiku bwa Cibukisho ukuti e bushiku bwacindama sana mu mwaka. E bushiku fye ubo Yesu aebele abasambi bakwe ukulaibukisha. (Belengeni Luka 22:19, 20.) Kwaliba ifingi ifilenga tulefwaisha ukusangwa ku Cibukisho. Lekeni tulandeko pali fimo.
2. Mulandu nshi tufwaila ukusangilwa ku Cibukisho?
2 Icibukisho cilalenga tuletontonkanya pa fyo icilubula cacindama, e lyo na pa mapaalo tukakwata pa mulandu wa cilubula. Cilalenga no kuti tuletontonkanya pa fyo twingalanga ukuti tulatasha pa fyo Yesu aipeele. (2 Kor. 5:14, 15) Kabili Icibukisho cilalenga ‘tulekoseleshanya’ na ba bwananyina. (Rom. 1:12) Cila mwaka abengi abaleka ukulongana balasangwa ku Cibukisho. Bamo balabwelela na kuli Yehova pa mulandu ne fyo babapokelela bwino. Kabili abengi balafwaisha ukusambilila icine pa mulandu ne fyo bamona e lyo ne fyo bomfwa pa bushiku bwa Cibukisho. E mulandu wine Icibukisho cacindamina sana kuli ifwe.
3. Bushe Icibukisho cilenga shani twaba abaikatana isonde lyonse? (Moneni ne cikope.)
3 Tulafwaya sana ukuti ubushiku bwa Cibukisho bufike pantu pali iyi nshita tulaba sana abaikatana na bamunyinefwe mwi sonde lyonse. Inte sha kwa Yehova mwi sonde lyonse balakumana pamo lilya akasuba kalewa. Bonse tulomfwa kwi lyashi ililanda sana pa fyo icilubula cacindamina. Tulemba inyimbo shibili isha kulumbanya Yehova, tulapishamo umukate no mwangashi kabili tulalanda no mweo onse ukuti “ameni” ku mapepo yonse 4. Mu bushiku bumo ifilonganino fyonse mwi sonde lyonse filacita ifi twalandapo. Elenganyeni ifyo Yehova na Yesu bomfwa nga bamona ifyo tuba abaikaatana ilyo tulepepa.
Icibukisho cilalenga twaikatana mwi sonde lyonse (Moneni paragrafu 3) f
4. Finshi twalasambilila muli cino cipande?
4 Muli cino cipande twala-asuka ifi fipusho: Kuti twapekanya shani imitima yesu ku Cibukisho? Kuti twalenga shani bambi banonkelamo mu Cibukisho? Kuti twa-afwa shani abanaka ukusangwa ku Cibukisho? Ifyasuko kuli ifi ifipusho fyalalenga tube abaipekanya ukusangwa kuli uku ukulongana ukwacindama.
KUTI TWAPEKANYA SHANI IMITIMA YESU KU CIBUKISHO?
5. (a) Mulandu nshi tulingile ukulatontonkanisha pa fyo icilubula cacindamina? (Amalumbo 49:7, 8) (b) Finshi mwasambilile muli Vidio itila Mulandu Nshi Yesu Afwilile?
5 Cimo icacindama ico twingacita pa kupekanya umutima ukusangwa ku Cibukisho, kutontonkanya pa fyo icilubula ca kwa Yesu Kristu cacindama. Fwe bantu tapali ifyo twingacita pa kuilubula ku lubembu ne mfwa. (Belengeni Amalumbo 49:7, 8; Tanbeni na Vidio itila Mulandu Nshi Yesu Afwilile?) a E ico Yehova alipekenye ukuti Yesu apeele ubumi bwakwe pa kutulubula. (Rom. 6:23) Nga tuletontonkanya sana pa fyo Yehova na Yesu baipeleeshe, cikalenga tukaletasha sana pa cilubula. Twalalandako pa fintu fimo ifya-afya ifyo Yehova na Yesu bashipikishe pa mulandu wesu. Nomba apo tatulalanda pali ifi, intanshi tufwile ukwishiba ifyali mu cilubula.
6. Bushe icilubula calola mwi?
6 Icilubula malipilo ayo balipila pa kubweseshapo iconaike. Umwaume wa kubalilapo Adamu ali uwapwillilika ilyo bamubumbile. Kanshi ilyo abembwike alipanishe ishuko lya kwikala umuyayaya pamo na bana bakwe. Pa kubweseshapo ifyo Adamu apanishe, Yesu alipeele ubumi bwakwe ubwapwililika nge lambo. Ilyo Yesu ali pano isonde, “tacitile ulubembu, kabili tatalile alanda ifya bucenjeshi.” (1 Pet. 2:22) Ilyo Yesu afwile ali uwapwililika nga filya fine Adamu ali uwapwililika ilyo talabembuka. Kanshi filya Yesu apeele ubumi bwakwe nge lambo, alibweseshepo ifyo Adamu apanishe.—1 Kor. 15:45; 1 Tim. 2:6.
7. Mafya nshi Yesu akwete Ilyo ali pano isonde?
7 Ilyo Yesu ali pano isonde aleumfwila Yehova na lintu ca-afishe ukucite fyo. Ilyo ali pano isonde aleumfwila abafyashi bakwe abashapwililika nangu ca kuti ena ali uwapwililika. (Luka 2:51) Lintu ali umulumendo alingile ukuba uwashipa pa kukaana amatunko ayali no kulenga afilwa ukuba uwa cishinka. Kabili ilyo akulile, alingile ukukaana Satana Kaseebanya uwalemutunka ukuti etwalilila ukuba uwa cishinka kuli Lesa. (Mat. 4:1-11) Satana alefwaisha sana ukuti Yesu abembuke pa kuti ekalipila icilubula.
8. Mafya nshi yambi ayo Yesu ashipikishe?
8 Ilyo Yesu alebomba umulimo wakwe pano isonde kwali amafya na yambi ayo alingile ukushipikisha. Abalwani bakwe balemucusha kabili balefwaya ukumwipaya. (Luka 4:28, 29; 13:31) Alingile ukushipikisha ukukanapwililika ukwa basambi bakwe. (Marko 9:33, 34) Ilyo balemulubulwisha, balimumine kabili balemupumya. Lyena balimwipeye kwati cipondo kabili alyumfwile sana ubukali pa mulandu ne nshila bamwipailemo. (Heb. 12:1-3) Alishipikishe ubwesho bwa kulekeleshako ukwabula ukuti Yehova amucingilile. b—Mat. 27:46.
9. Tumfwa shani pa fyo Yesu aipeeleshe? (1 Petro 1:8)
9 Ukwabula no kutwishika, Yesu aliculile sana pa kuti atulubule. Nga twatontonkanya pa fyo Yesu aipeeleshe ukupeela icilubula pa mulandu wesu, tulamutemenwako.—Belengeni 1 Petro 1:8.
10. Finshi Yehova acitile pa kuti kube icilubula?
10 Finshi Yehova aipeeleshe ukucita pa kuti Yesu apeele icilubula? Yehova na Yesu balitemwana icine cine nga filya wishi atemwana no mwana umwaume. (Amapi. 8:30) Kanshi kuti mwaelenganya ifyo Yehova aleumfwa ilyo alemona Yesu aleshipikisha amafya pano calo. Ukwabula no kutwishika Yehova alyumfwile sana ububi ilyo amwene umwana wakwe balemucusha kabili bamukaana.
11. Langilileni ifyo Yehova aumfwile ilyo Yesu afwile.
11 Abafyashi bonse abafwilwapo balishiba ifyo cikalipa ukufwilwa umwana. Twalikwata icitetekelo icakosa ica kuti abafwa bakabuuka, lelo ici tacifumyapo ubukali tumfwa lupwa lwesu nga afwa. Ici cilangililo cilalenga twaumfwikisha ifyo Yehova aleumfwa ilyo alemona umwana wakwe alecula no kufwa muli ulya mwaka wa 33 C.E. c—Mat. 3:17.
12. Finshi twingacita mu milungu ya kubalilapo ilyo kushilaba Icibukisho?
12 Kanshi ilyo ubushiku bwa Cibukisho bushilafika, mukeshe ukuisambilishako pa cilubula pe sambililo lya pa lwenu, nelyo pa mapepo ya lupwa. Kuti mwabomfya Icitabo ca Kwafwa Inte sha kwa Yehova Ukusanga Ifyebo nelyo impapulo shimbi ukufwailapo ifyebo na fimbi ilyo muleisambilisha. d Lyena mukashininkishe ukuti mulekonka programu ya kubelenga Baibo mu nshiku sha Cibukisho iiba mu Akatabo ka Kubomfya pa Kulongana kwa Imikalile ya Bwina Kristu no Mulimo Tubomba. E lyo pa bushiku bwa Cibukisho mwikalaba ukutamba amapepo ya lucelo ayaibela. Nga twaipekanishisha limo ukusangwa ku Cibukisho cikatwangukila ukwafwako bambi ukuti nabo bakanonkelemo.—Esra 7:10.
IFYO TWINGALENGA BAMBI UKUNONKELAMO MU CIBUKISHO
13. Cinshi ica kubalilapo ico tufwile ukucita pa kwafwa abantu ukunonkelamo mu Cibukisho?
13 Kuti twacita shani pa kwafwa bambi ukunonkelamo mu Cibukisho? Ica kubalilapo, kubeta ukwisasangwa ku cibukisho. Na kabili kuti twalemba amashina ya bantu twaishiba abo tulefwaya ukwitako ku Cibukisho. Pali aba kuti paba ba lupwa lwesu, abo tubomba nabo, abo tusambilila nabo, e lyo na bantu bambi. Nangu ca kuti tatukwete utupepala utwapulintwa utwingi, kuti twatumina umuntu linki ya kapepala. Kuti twapapa ukumona uko abengi bengasumina ukwisasangwa ku Cibukisho.—Luk. Mil. 11:6.
14. Landeni pa cacitike icilelangilila ukuti ukupeela umuntu akapepala ka kumwitilapo ku Cibukisho kwalicindama.
14 Nga twapeela umuntu akapepala ka kumwitilapo ku Cibukisho, kuti afwaya ukwisasangwako. Bushiku bumo, nkashi alipapile sana ilyo umwina mwakwe uushili Nte ya kwa Yehova amwebele ukuti bakaya nankwe ku Cibukisho. Mulandu nshi apapiile? Pantu pa miku iingi alyebelepo umwina mwakwe ukuya nankwe mu kulongana lelo alekaana. Nomba cinshi calengele uno muku umwina mwakwe ukufwaya ukuya ku Cibukisho? Umwina mwakwe atile, “Balimpeela akapepala kakwitilapo abantu ku Cibukisho.” Balondolwele ukuti uwabapeele akapepala ni eluda uo baishibene nankwe. Abena mwakwe balisangilwe ku Cibukisho kabili balitwalilile ukusangwa pa myaka iingi.
15. Finshi tufwile ukulaibukisha ilyo tuleita umuntu ukwisasangwa ku Cibukisho?
15 Muleibukisha ukuti abo twingeta ukwisasangwa ku Cibukisho kuti bakwata ifipusho ifingi, maka maka nga tabatala abalonganapo na ifwe. Kanshi kuti twatontonkanya pa fipusho bengepusha e lyo no kufwaya ifyasuko. (Kol. 4:6) Ku ca kumwenako, bamo kuti batontonkanya abati: ‘Finshi fikacitika pa bushiku bwa Cibukisho?’ ‘Ni nshita nshi ukulongana ku kapwa?’ ‘Finshi ningile ukufwala?’ ‘Bushe kukaba ukulipila pa kwingila?’ ‘Bushe kukaba ukutuula umutuulo pa bushiku bwa Cibukisho?’ Nga tuleita umuntu ukwisasangwa ku Cibukisho kuti twamwipusha ukuti, “Bushe pali ifipusho ifyo ukwete?” lyena tufwile no kwasuka ifipusho akwete. Kuti twabomfya vidio itila Muleibukisha Imfwa ya kwa Yesu e lyo ne itila Finshi Ficitika pa Ng’anda ya Bufumu? Pa kuti uo twaita eshibe ificitika nga kuli ukulongana. Isambililo 28 mu citabo citila Kuti Mwaba ne Nsansa Umuyayaya! lyalikwata ifishinka na fimbi ifyo twingalandapo no muntu uo twaita ku Cibukisho.
16. Finshi fimbi ifyo abasangwa ku Cibukisho bengafwaya ukwishiba?
16 Pa numa ya kusangwa ku Cibukisho, abasangwako pa muku wa kubalilapo kuti bakwata ifipusho na fimbi ifingi. Kuti balatontonkanya umulandu abanono fye (nga kwaciba abacilyako) bacililako umukate no kunwako umwangashi. Na kabili kuti balatontonkanya pa miku tukwata Icibukisho. Kabili kuti balafwaya ukwishiba nga ca kuti ukulongana kwa Nte sha kwa Yehova kwaba fye cimo cine. Nangu ca kuti ifyasuko kuli ifi fipusho kuti bafilandapo mu lyashi lya Cibukisho, uwasangwa ku Cibukisho pa muku wa kubalilapo kuti alafwaya ukwishibilapo na fimbi. Pa kwasuka ifi fipusho kuti twabomfya icipande icaba pa jw.org icitila: “Mulandu Nshi Ifyo Inte sha kwa Yehova Bacita Umulaalilo wa kwa Shikulu Fyapusanina ne fyo Imipepele Imbi Icita?”. Tufwaya ukubombesha ilyo kushilaba Icibukisho, ilyo kuli Icibukisho, na pa numa ya Cibukisho, ukulenga ababa “no mutima uusuma” ukunonkelamo mu Cibukisho.—Imil. 13:48.
IFYO TWINGAAFWA ABANAKA UKUSANGWA KU CIBUKISHO
17. Bushe baeluda kuti ba-afwa shani abanaka? (Esekiele 34:12, 16)
17 Bushe baeluda kuti ba-afwa shani abanaka mu nshita ya Cibukisho? Bafwile ukulababikako amano. (Belengeni Esekiele 34:12, 16.) Ilyo takulaba Icibukisho mulelandako na banaka abo mwingakumanisha ukulanda nabo. Mulebeba ukuti mwalibatemwa kabili mulefwaisha no kubaafwa. Mulebeta ukwisasangwa ku Cibukisho. Nga baisa ku Cibukisho mulebapokelela bwino. Pa numa ya Cibukisho muletwalilila ukubapempula nelyo ukubatuminako foni kabili mulebakoselesha pa kuti bakabwelele kuli Yehova.—1 Pet. 2:25.
18. Bushe ifwe bonse kuti twa-afwa shani abanaka? (Abena Roma 12:10)
18 Bonse mu cilonganino kuti twa-afwa abanaka abasangilwe ku Cibukisho. Kuti twabafwa shani? Nga tulebatemwa, tuleba ne cikuuku kuli bena kabili tulebacindika. (Belengeni Abena Roma 12:10.) Muleibukisha ukuti nalimo tacacibangukila ukwisa mu kulongana. Nalimo bacilatontonkanya pa fyo abantu ababa mu cilonganino balayalanda nga babamona. e Kanshi mwilabepusha ifipusho ifingalenga baumfwa insoni nelyo ukulanda fimo ifigalenga bafulwa. (1 Tes. 5:11) Aba ababwananyina bantu basumina banensu. Kanshi tulatemwa ukupepela pamo nabo na kabili!—Amalu. 119:176; Imil. 20:35.
19. Mapaalo nshi tukwata nga tuleibukisha imfwa ya kwa Yesu?
19 Tulatasha sana ifi Yesu atwebele ukulaibukisha imfwa yakwe cila mwaka, kabili twalishiba no mulandu ukucitile fi kwacindamina. Nga tuleibukisha imfwa ya kwa Yesu tulanonkelamo kabili tulalenga na bantu bambi ukunonkelamo. (Esa. 48:17, 18) Tulatemenwako sana Yehova na Yesu. Tulalanga ifyo tutasha pa fyo batucitila. Tulaba ifibusa sana na babwananyina. Kabili kuti twalenga na bambi ukusambilila ifyo bengaipakisha amapaalo ayo tukwata pa mulandu ne cilubula. Kanshi natutwalile ukubombesha pa kuti tuipekanye ukusangwa ku Cibukisho ca mfwa ya kwa Yesu uno mwaka, ubushiku ubwacindama mu mwaka.
KUTI TWACITA SHANI . . .
-
pa kupekanya imitima yesu ku Cibukisho?
-
pa kulenga bambi ukunonkelamo mu Cibukisho
-
pa kwafwa abanaka?
ULWIMBO 18 Tulatasha pa Cilubula
a Pa kuti musange ifipande e lyo na mavidio ayo balandilepo muli cino cipande, kabiyeni pa jw.org, lyena lembeni umwakufwaila ifyebo imitwe ya cipande na mavidio.
b Moneni icipande citila “Amepusho Ukufuma ku Babelenga” mu Ulupungu lwa kwa Kalinda ulwa April 2021.
c Moneni icitabo citila Palameni Kuli Yehova, icipa. 23, amapara. 8-9.
d Moneni akabokoshi kaleti “ Fimo ifyo Mwingabelenga pa cilubula.”
e Moneni ifikope e lyo na akabokoshi akaleti “ Finshi Aba mu Cilonganino Bacitile?” Munyinefwe aleshimunuka ukwingila mu Ing’anda ya Bufumu, lelo ashipa no kwingila. Bamupokelela bwino kabili aleumfwa bwino ukuba pamo na babwananyina.
f UBULONDOLOSHI BWA FIKOPE: Ilyo ababwananyina mu fyalo fimo baleibukisha imfwa ya kwa Yesu, bambi bena balepekanishisha ubushiku bwa Cibukisho. Munyinefwe uwanaka alewayawaya ukwingila mu Ng’anda ya Bufumu, lelo ashipa no kwingila. Aba bwananyina bamupokelela bwino, kabili aumfwa bwino sana ukuba pamo nabo.
