1. ?From wanem Memoriol i wan impoten dei long yia? (Luk 22:​19, 20)

 OL MAN blong Jehova oli tingbaot Memoriol blong ded blong Kraes olsem wan impoten dei long yia. Mo hemia nomo dei we Jisas i talem stret long ol man blong hem se oli mas tingbaot. (Ridim Luk 22:​19, 20.) Taswe, i gat plante risen we i mekem yumi luk fowod long Memoriol. Naoia, bambae yumi luk sam long ol risen ya.

2. ?Wanem sam risen we i mekem se yumi luk fowod long Memoriol?

² Memoriol i halpem yumi blong tingbaot se ransom i sas tumas. Mo i mekem yumi tingbaot ol rod we yumi save soemaot se yumi gat bigfala tangkiu from sakrefaes blong Jisas. (2 Kor. 5:​14, 15) Mo tu, i givim janis long yumi blong joen wetem ol brata mo sista, blong ‘lefleftemap tingting’ blong yumi. (Rom 1:12) Evri yia, plante brata mo sista we oli stop blong kam long ol miting, oli joen long Memoriol. Samfala oli jusum blong kambak long Jehova, from yumi soemaot lav long olgeta. Mo plante man we oli gat intres, oli stat blong wokbaot long rod blong laef, from samting we oli luk mo oli harem. !Hemia nao from wanem yumi luk Memoriol se i spesel tumas!

3. ?Olsem wanem Memoriol i mekem se ol brata mo sista raon long wol oli joen wanples? (Mo tu, yu luk pija.)

³ Memoriol i mekem se ol brata mo sista raon long fulwol oli joen wanples tu. Ol Witnes blong Jehova raon long fulwol oli joen tugeta taem san i godaon. Yumi evriwan i harem wan tok we i makemaot se ransom i impoten tumas. Yumi singsing long tu singsing blong presem Jehova, yumi pasem bred mo  waen, mo yumi talem “amen” long fo prea. Mo samwe long 24 aoa nomo, evri kongregesen bambae oli mekem sem samting. Traem tingbaot glad we Jehova mo Jisas i gat, taem tufala i luk we yumi joen wanples blong mekem samting ya we i givim ona long tufala.

4. ?Bambae yumi tokbaot wanem long stadi ya?

⁴ Long stadi ya, bambae yumi tokbaot ol kwestin ya: ?Olsem wanem yumi save rerem hat blong yumi from Memoriol? ?Olsem wanem yumi save halpem ol narafala blong kasem ol gudfala samting from Memoriol? ?Mo olsem wanem yumi save halpem olgeta we oli stop blong kam long ol miting mo prij? Ansa blong ol kwestin ya bambae i halpem yumi blong rere from impoten taem ya.

?OLSEM WANEM YUMI SAVE REREM HAT BLONG YUMI FROM MEMORIOL?

5. (1) ?From wanem yumi mas tingbaot se ransom i sas? (Ol Sam 49:​7, 8) (2) ?Long video ya ?From Wanem Jisas i Ded? yu lanem wanem?

⁵ Wan impoten rod blong rerem hat blong yumi from Memoriol, hemia taem yumi tingbaot se ransom sakrefaes blong Jisas Kraes i sas tumas. Yumi no save mekem wan samting blong sevem yumi wan long sin mo ded. (Ridim Ol Sam 49:​7, 8; mo tu yu luk video ya ?From Wanem Jisas i Ded?) a Taswe, Jehova i mekem plan blong Jisas i givim laef blong hem from yumi, mo hemia i wan bigfala sakrefaes we tufala i mekem. (Rom 6:23) Taem yumi tingting dip moa long wanem we Jehova mo Jisas i mekem blong yumi, bambae yumi tinghae moa long ransom. Naoia bambae yumi tokbaot sam long ol had samting we Jehova mo Jisas i glad nomo blong mekem from yumi. Be fastaem, ?ransom hem i wanem?

6. ?Ransom hem i wanem?

⁶ Ransom i praes blong pembak wan samting. Fas man ya Adam, hem i stretgud olgeta taem Jehova i wokem hem. Taem hem i mekem sin, hemia i mekem se hem mo ol pikinini blong hem oli lusum janis ya blong laef olwe. Blong pembak wanem we Adam i lusum, Jisas i givim laef blong hem we i stretgud olsem wan sakrefaes. Long ful laef blong Jisas long wol, hem “i no mekem sin, mo i no gat wan giaman tok i kamaot long maot blong hem.” (1 Pita 2:22) Taem Jisas i ded, hem i stretgud olgeta olsem Adam bifo we hem i mekem sin. Taswe, Jisas i naf blong pembak samting we Adam i lusum.—1 Kor. 15:45; 1 Tim. 2:6.

7. ?Wanem sam long ol traem we Jisas i fesem taem hem i stap long wol?

⁷ Taem Jisas i stap long wol, oltaem hem i obei long Papa blong hem nating se hem i fesem plante traem. Jisas i wan pikinini we i stretgud olgeta, be hem i gohed blong obei long perens blong hem we oli sinman. (Luk 2:51) Taem hem i yangfala, maet ol narafala oli traem pulum hem blong no obei long perens blong hem mo Jehova. Mo taem Jisas i kam bigman, hem i mas stanap strong agensem Devel Setan we i traem pulum hem blong mekem sin, mo i talem stret long hem se i mas stop blong wosipim Jehova. (Mat. 4:​1-11) Setan i traehad blong pulum Jisas blong mekem sin, olsem nao bambae hem i no naf blong pem praes blong ransom.

8. ?Wanem ol narafala traem we Jisas i mas stanap strong long olgeta?

⁸ Taem Jisas i stap prij long wol, hem i stanap strong long plante moa defren traem. Ol enemi oli agensem hem mo oli traem blong kilim hem i ded. (Luk 4:​28, 29; 13:31) Mo tu, hem i mas dil wetem slak fasin blong ol man blong hem. (Mak 9:​33, 34) Long taem ya we oli jajem hem, oli kilim nogud hem mo oli jikim hem. Biaen, oli kilim hem olsem wan man blong brekem loa mo hem i safa bigwan. (Hib. 12:​1-3)  Long en blong laswan traem blong hem, hem i mas stanap strong hem wan from Jehova i no protektem hem. b—Mat. 27:46.

9. ?Wanem tingting blong yu long sakrefaes blong Jisas? (1 Pita 1:8)

⁹ I klia se Jisas i safa bigwan blong i save gat ransom. Taem yumi tingbaot olgeta samting we Jisas i mekem blong yumi, hemia i mekem se yumi lavem hem moa.—Ridim 1 Pita 1:8.

10. ?Jehova i lego wanem blong i save gat ransom?

¹⁰ ?Jehova i rere blong lego wanem, blong Jisas i save givim wan ransom? Jehova mo Jisas i fren gud sem mak olsem wan papa mo boe blong hem. (Prov. 8:30) Traem tingbaot filing blong Jehova, taem hem i luk Jisas i stanap strong long plante traem taem hem i stap long wol. I sua se Jehova i mas harem nogud bigwan taem i luk we oli tritim nogud Boe blong hem, oli sakemaot hem, mo oli mekem hem i safa.

11. Talem wan eksampol blong soemaot filing we Jehova i gat taem oli kilim Jisas i ded.

¹¹ Eni perens we i lusum wan pikinini long ded, i kasemsave long filing ya blong harem nogud taem wan pikinini i ded. Yumi bilif strong long promes blong laef bakegen. Be taem wan we yumi lavem i ded, yumi harem nogud yet blong longtaem long hat blong yumi. Eksampol ya i halpem yumi blong kasemsave se Jehova i mas harem nogud bigwan, taem i wajem Boe blong hem we i lavem tumas i safa mo i ded long 33 K.T. c—Mat. 3:17.

12. ?Yumi save mekem wanem long ol wik bifo long Memoriol?

¹² Stat naoia go kasem Memoriol, long pesnel stadi o Famle Wosip i gud yu stadi moa long ransom. I gud yu yusum Buk Blong Mekem Risej o wan narafala buk blong yumi, blong save moa long saed blong ransom. d Mo tu, i gud yu folem Baebol riding blong Memoriol we i stap long Kristin Wok Mo Laef—Miting Wokbuk. Mo long dei blong Memoriol, no foget blong wajem spesel program blong Moning Wosip. Taem yumi rerem hat blong yumi from Memoriol, bambae yumi naf blong halpem ol narafala tu blong kasem ol gudfala samting from Memoriol.—Esra 7:10.

 HALPEM OL NARAFALA BLONG KASEM OL GUDFALA SAMTING FROM MEMORIOL

13. ?Wanem faswan samting we yumi save mekem blong halpem ol narafala, blong oli kasem ol gudfala samting from Memoriol?

¹³ ?Olsem wanem yumi save halpem ol narafala blong kasem ol gudfala samting from Memoriol? Faswan step hemia blong invaetem olgeta. Antap long hemia, yumi save mekem wan lis blong ol man we yumi save olgeta mo invaetem olgeta blong joen long Memoriol. Hemia ol famle, ol fren long wok, skul, mo ol narafala. Nating sipos yumi no gat naf invetesen, yumi save yusum elektronik divaes blong yumi blong serem link blong invetesen long ol narafala. Maet yumi sapraes long namba blong ol man we bambae oli kam.—Pri. 11:6.

14. Tokbaot olsem wanem invetesen we yumi givim i gat paoa long man.

¹⁴ Taem yu givim invetesen long wan man, hemia i save pulum hem blong wantem joen long Memoriol. Wan sista we hasban blong hem i no stap long trutok, i sapraes bigwan taem hasban blong hem i talem se bambae i folem hem i go long Memoriol. ?From wanem sista ya i sapraes? Hemia from we plante taem finis hem i askem hasban blong hem blong kam long Memoriol, be hem i neva kam. ?Be from wanem naoia hem i wantem kam long Memoriol? Hasban ya i talem se: “Mi kasem wan invetesen.” Wan elda we i savegud hem i invaetem hem. Hasban ya i joen long Memoriol blong yia ya mo long ol yia biaen hem i gohed blong joen long ol Memoriol.

15. ?Yumi mas tingbaot wanem taem yumi invaetem man i kam long Memoriol?

¹⁵ Tingbaot se olgeta we yumi invaetem olgeta, maet oli gat ol kwestin speseli sipos oli neva kam long ol miting blong yumi. Taswe, yumi save tingbaot ol kwestin we maet oli save askem mo rere blong ansa long olgeta. (Kol. 4:6) Eksampol, maet sam oli askem se: ‘?Wanem bambae i hapen long taem ya?’ ‘?Bambae miting ya i longfala olsem wanem?’ ‘?Bambae mi werem wanem?’ ‘?Mi mas pem blong kam insaed?’ ‘?I gat kleksin?’ Taem yumi invaetem man i kam long Memoriol, yumi save askem long hem se: “?Yu gat eni kwestin?” mo biaen  yumi save ansarem kwestin blong hem. Mo tu yumi save yusum video ya, Tingbaot Ded Blong Jisas mo ?Wanem i Stap Hapen Insaed Long Haos Kingdom? blong givhan long man blong i kasemsave long ol miting blong yumi. Mo long lesen 28 blong buk ya !Enjoem Laef Olwe! i gat plante gudfala poen we yumi save tokbaot long man.

16. ?Wanem sam moa kwestin we maet olgeta we oli kam long Memoriol oli gat?

¹⁶ Afta long Memoriol, maet plante niuwan we oli kam oli gat plante kwestin. Maet oli stap tingting se from wanem i no gat man i kakae bred mo dring waen, o sam nomo oli kakae bred mo dring waen. Maet oli wantem save se hamas taem yumi mekem Memoriol. Mo tu, maet oli wantem save sipos ol Witnes blong Jehova oli mekem evri miting blong olgeta long sem fasin. Nating sipos tok blong Memoriol i tokbaot ol poen ya, be maet ol niuwan oli nidim we yumi eksplenem moa long olgeta. Atikol ya “?From Wanem Ol Witnes Blong Jehova Oli Mekem Lodsapa i Defren Long Ol Narafala Jos?” we i stap long jw.org, i save halpem yumi blong ansarem sam long ol kwestin blong olgeta. Bifo long Memoriol, long taem Memoriol, mo afta long Memoriol, yumi wantem mekem bes blong yumi blong halpem olgeta we “oli soemaot se oli stret,” blong oli kasem ol gudfala samting from Memoriol.—Wok 13:48.

HALPEM OLGETA WE OLI NO MOA KAM LONG MITING MO PRIJ

17. ?Olsem wanem ol elda oli save halpem olgeta we oli no moa kam long ol miting mo prij? (Esikel 34:​12, 16)

¹⁷ Long taem blong Memoriol, ?olsem wanem ol elda oli save halpem olgeta we oli no moa kam long ol miting mo prij? Soemaot long olgeta se yu kea long olgeta. (Ridim Esikel 34:​12, 16.) Bifo long Memoriol, i gud yu traem kasem plante long olgeta. Soemaot se yu kea long olgeta mo yu wantem halpem olgeta. Invaetem olgeta blong joen long Memoriol. Sipos oli kam, welkamem gud olgeta. Afta long Memoriol, gohed blong visitim o ringim olgeta, mo givim samting we oli nidim long saed blong spirit blong oli save kambak long Jehova.—1 Pita 2:25.

18. ?Olsem wanem yumi evriwan i save halpem olgeta we oli no moa kam long ol miting mo prij? (Rom 12:10)

 ¹⁸ Evriwan long kongregesen i save halpem wan we i no moa kam long ol miting mo prij, we i bin kam long Memoriol. ?Oli mekem samting ya olsem wanem? Hemia taem oli soemaot lav, oli kaen, mo respektem olgeta. (Ridim Rom 12:10.) Tingbaot se maet oli sem blong kambak long miting. Maet oli fraet se bambae yumi no welkamem gud olgeta. e Taswe, yu no mas askem ol kwestin we i save mekem oli sem, o talem wan samting we i save mekem oli harem nogud. (1 Tes. 5:11) Olgeta ya, oli ol brata mo sista blong yumi. !Mo yumi glad tumas blong joen wetem olgeta bakegen blong wosipim Jehova!—Sam 119:176; Wok 20:35.

19. ?Yumi kasem wanem gudfala samting taem yumi joen long Memoriol?

¹⁹ Yumi glad tumas we Jisas i talem long yumi blong tingbaot ded blong hem evri yia, mo yumi kasemsave from wanem i impoten blong mekem olsem. Taem yumi joen long Memoriol, hemia i givhan long yumi wan mo ol narafala long plante rod. (Aes. 48:​17, 18) Yumi mekem lav we yumi gat long Jehova mo Jisas i kam strong moa. Yumi soemaot se yumi glad tumas long samting we tufala i mekem blong yumi. Yumi kam klosap moa long ol brata mo sista. Mo tu, maet yumi save halpem ol narafala blong lanem samting we oli save mekem, blong olgeta tu oli save harem gud long ol blesing we i kamaot from ransom. !I gud yumi mekem bes blong yumi naoia blong rere from Memoriol blong yia ya, we i wan impoten dei blong yia!