1. Engkai maka acara peringeten acara si pentingna tiap tahun? (Lukas 22:​19, 20)

 ACARA si pentingna man umat Jahwe tiap tahun eme acara Peringet-ingeten Kematen Kristus. E ngenca acara si iperentahken Jesus guna ilakoken pengikutna. (Baca Lukas 22:​19, 20.) Lit piga-piga alasen engkai maka tertima-tima kita nandangi acara Peringeten. Mari sibahas piga-piga alasenna.

2. Kai saja si erban kita tertima-tima nandangi acara Peringeten?

² Bas acara Peringeten, banci siukuri kerna uga ergana korban tebusen Jesus. Bas acara e, iingetken ka kita kerna erbage cara bas ncidahken pengerganta nandangi tebusen. (2 Kor. 5:​14, 15) Bas acara e, banci kita mpegegehi sada ras si debanna. (Rom. 1:12) Tiap tahun, enterem turang senina si la aktip reh ku acara e. Perban kalak e ialo-alo alu mehuli, piga-piga arah kalak e teriahken guna mulihken man Jahwe. Enterem peminat si reh ku acara e dungna nggit erlajar Pustaka perban kai si idahna ras si ibegina bas acara e. Jelas me istimewa kel acara Peringeten e man banta.

3. Uga acara Peringeten mpersada kita ras turang seninata i sebelang doni? (Nen ka gambar.)

³ Cuba ka ukuri uga acara Peringeten mpersada kita ras turang seninata i sebelang doni. I sebelang doni, Saksi-Saksi Jahwe pulung kenca matawari terbenam guna ngikuti acara e. Sibegiken khotbah si nuriken uga pentingna korban tebusen, siendeken ka dua lagu pujin, siedarken  lambang-lambang Peringeten, janah alu bulat ukur sikataken “amin” guna empat toto si ipeseh. Bas waktu kira-kira 24 jam, kerina runggun enggo ngelakoken si e. Bayangken uga riahna ukur Jahwe ras Jesus sanga idahna kita kerina ersada guna ncidahken pengerganta bas acara e.

4. Kai kari sibahas bas artikel enda?

⁴ Bas artikel enda, sibahas kari uga carata nikapken pusuhta guna ngikuti acara Peringeten? Uga kita banci nampati kalak si deban ndatken manpaat arah acara e? Ras uga kita banci nampati kalak si la aktip? Jawapen arah penungkunen-penungkunen e banci nampati kita ersikap ngikuti acara si seh kel pentingna.

UGA CARATA NIKAPKEN PUSUHTA GUNA ACARA PERINGETEN?

5. (a) Engkai maka perlu siukuri uga ergana korban tebusen? (Masmur 49:​7, 8) (b) Kai si ipelajarindu arah video Engkai Jesus Mate?

⁵ Salah sada si pentingna si banci silakoken guna nikapken pusuhta eme alu ngukuri uga ergana korban tebusen Jesus Kristus. Labo kita banci selamat arah dosa ras kematen alu gegehta sendiri. (Baca Masmur 49:​7, 8; nen ka video Engkai Jesus Mate?) a Emaka iaturken Jahwe gelah Anak si ikelengiNa mereken geluhna guna nelamatken kita. Mbelin kel pengorbanen si iban Jahwe ras Jesus. (Rom. 6:23) Adi terus siukuri kerna si e, reh belinna me pengerganta nandangi tebusen. Mari sibahas pengorbanen si enggo ban Jahwe ras Jesus guna kita. Tapi sope si e, mari sibahas lebe kai kin ertina tebusen.

6. Kai kin tebusen e janah engkai maka Jesus banci jadi korban tebusen man manusia?

⁶ Tebusen eme erga si igalari guna ndatken mulihi sada hal. Manusia si pertama, Adam, iciptaken sempurna. Tapi sanga ilakokenna dosa, ia ras keturunenna lanai dat kesempaten nggeluh rasa lalap. Guna ndatken mulihi kai si enggo bene ban Adam, ikorbanken Jesus geluhna selaku manusia si sempurna. Sanga Jesus nggeluh i doni, “la lakokenna dosa, la pernah ia erbual.” (1 Pet. 2:22) Emaka sanga ia mate, banci korbankenna geluhna si sempurna si sebanding ras kegeluhen si bene ban Adam.—1 Kor. 15:45; 1 Tim. 2:6.

7. Percuban kai saja si iadapi Jesus sanga ia nggeluh i doni?

⁷ Sanga Jesus i doni, lalap ia patuh man Bapakna si i surga amin pe adapina mbue percuban. Sanga Jesus kitik denga, patuh ia man orang tuana si la sempurna amin pe ia sempurna. (Luk. 2:51) Sanga Jesus remaja, banci saja arus ilawanna tekanen gelah la patuh ntah pe la setia. Kenca Jesus dewasa, arus adapina godan arah Setan si Iblis. Pernah ka alu terus terang ipindo Setan gelah ilakoken Jesus kai si erban ia la setia man Dibata. (Mat. 4:​1-11) Usahaken Setan kel erban Jesus ngelakoken dosa gelah la ia banci jadi korban tebusen.

8. Percuban kai deba nari si adapi Jesus?

⁸ Segedang pelayanen Jesus i doni, adapina mbue percuban si deban. Isiksa ia janah iancam guna ibunuh. (Luk. 4:​28, 29; 13:31) Arus ka adapina kelemahen murid-muridna. (Mrk. 9:​33, 34) Sanga Jesus iadili, ihina ia ras isiksa. Kenca si e, ihukum mate ia bali bagi penjahat janah mesui kel akapna. (Heb. 12:​1-3)  Sanga ia nandangi mate, arus ia megenggeng ngadapi percuban janah la ia ilindungi Jahwe. b—Mat. 27:46.

9. Uga nge perasanta sanga siukuri pengorbanen Jesus? (1 Petrus 1:8)

⁹ Jelas me, enggo iban Jesus pengorbanen si seh kel belinna guna nebus kita. Sanga siukuri kerina pengorbanenna e, pasti reh kelengna ateta ia.—Baca 1 Petrus 1:8.

10. Pengorbanen kai si iban Jahwe guna mereken tebusen?

¹⁰ Uga kerna Jahwe? Pengorbanen kai si iban Jahwe gelah banci itebus Jesus kita? Jahwe ras Jesus eme bapak ras anak si rembakna si pernah lit bas alam semesta enda. (Kua. 8:30) Emaka, bayangken uga perasan Jahwe sanga idahNa iadapi Jesus erbage-bage percuban i doni. Pasti ceda kel ukur Jahwe ngidah AnakNa ngadapi perbahanen si la adil, irendahken, ras isiksa.

11. Ban contohna si nggambarken perasan Jahwe sanga Jesus ihukum mate.

¹¹ Orang tua si pernah mate anakna pasti tehna uga sedihna situasi e. Amin pe tek kita nandangi arapen kekeken, si e labo banci nasapken ceda ate si lit bas pusuhta sanga mate kalak si keleng ateta. Arah contoh enda, banci sibayangken uga perasan Jahwe sanga idahNa Anak si keleng ateNa rate mesui janah mate bas tanggal 14 Nisan tahun 33 M. c—Mat. 3:17.

12. Kai saja si banci silakoken bas minggu-minggu sope Peringeten?

¹² Kai saja si banci silakoken guna nikapken pusuhta sope reh ku acara Peringeten? Cuba pelajari terbagesen topik kerna tebusen sanga ngelakoken pelajaren pribadi ntah pe Ibadah Keluarga. Gunakenlah Panduan Riset untuk Saksi-Saksi Yehuwa ntah pe publikasi si debanna. d Ikutilah jadwal pembacan Pustaka guna Peringeten si lit bas Agenda Perpulungen Pelayanen ras Kegeluhen Kristen. Janah bas wari Peringeten, ula lupa nonton acara Ibadah Pagi si istimewa. Adi enggo sisikapken pusuhta, banci ka sisampati kalak si deban guna ndatken manpaat arah acara e.—Esa. 7:10.

 SAMPATILAH KALAK SI DEBAN NDATKEN MANPAATNA

13. Kai tangtangna si perlu silakoken gelah kalak si deban ndatken manpaat arah acara Peringeten?

¹³ Uga carata nampati kalak si deban guna ndatken manpaat arah acara Peringeten? Si pertama, perlu siundang kalak e. Selain ngundang kalak si deban sanga erberita, banci ka siban daftar kerna ise si banci siundang. Bagi anggota keluarga, teman erdahin, teman sekolah, ras si debanna. Adi la bias undangen tercetak si lit bas kita, banci sikirimken undangen elektronikna. Banci saja reh kari kalak e!—Peng. 11:6.

14. Ban contoh si ncidahken maka lit pengaruhna adi sibereken undangen secara pribadi.

¹⁴ Adi sibereken undangen secara pribadi mbelin kel pengaruhna. Cuba perdiateken pengalamen sekalak turang senina si perbulangenna lenga Saksi Jahwe. Bas sada wari, sengget ia perban ikataken perbulangenna man bana maka ikut atena ku acara Peringeten. Enggo ertahun-tahun dekahna ajak turang senina e perbulangenna gelah reh ku acara Peringeten, tapi la pernah ia nggit. Engkai makana sekalenda nggit ia ikut? Bagenda nina perbulangenna e, “Lit si ngundang aku.” Ijelaskenna maka lit sekalak pertua si itandaina si ngundang ia. Reh me ia ku acara Peringeten bas tahun e bage pe bas tahun-tahun seterusna.

15. Kai si perlu siinget sanga siundang kalak reh ku acara Peringeten?

¹⁵ Banci saja kalak si enggo siundang lit penungkunenna kerna acara Peringeten, apai ka adi kalak e lenga pernah reh ku perpulungenta. Emaka, banci siukuri penungkunen kai saja si lit bas ukur kalak e janah uga cara njawapsa. (Kol. 4:6) Contohna, banci saja merhat kalak e meteh: ‘Uga acarana?’ ‘Asa dekahna?’ ‘Pake baju si uga?’ ‘Lit nge biaya masuk?’ ‘Lit nge kolekte?’ Sanga siundang sekalak jelma, banci sisungkun lit ntah lang penungkunenna. Kenca si e, jawaplah penungkunenna e. Guna ncidahken uga acara ibadahta,  banci sigunaken video Mperingeti Kematen Jesus ras Kai si Ilakoken i Bale Kerajan? Selain si e, banci ka sibahas piga-piga pelajaren si mejile arah pelajaren 28 bas buku Ermeriah Ukur Seh Rasa Lalap!

16. Banci saja kai deba nari si ukuri kalak si reh ku acara Peringeten?

¹⁶ Kenca reh ku acara Peringeten, kalak si berminat banci saja lit denga penungkunenna. Contohna, engkai maka la lit ntah pe sitik ngenca kalak si man roti ras minem anggur? Piga kali nge acara Peringeten iban? Kerina nge perpulungen Saksi-Saksi Jahwe iban alu cara si seri? Memang, piga-piga penungkunen e enggo ibahas bas khotbah Peringeten, tapi kalak si tangtangna denga reh ku acara e banci saja perlu penjelasen tambahen. Banci ka sicidahken artikel bas jw.org si erjudul “Mengapa Cara Saksi Yehuwa Memperingati Perjamuan Kudus Berbeda dengan Gereja Lainnya?” guna njawap penungkunen kalak e. Pasti nggit kita nampati kalak e asa ngasupta sope acara, sanga acara, ras kenca dung acara. Alu bage, “kalak si pusuh ras perbahanenna ngaloken kebenaren” banci tuhu-tuhu ndatken manpaat arah acara Peringeten.—Perb. 13:48.

SAMPATILAH KALAK SI LA AKTIP

17. Uga pertua-pertua banci nampati turang senina si la aktip? (Esekiel 34:​12, 16)

¹⁷ Bas minggu-minggu sope ras kenca Peringeten, uga pertua-pertua banci nampati turang senina si la aktip? Cidahkenlah maka ermediate kam man kalak e. (Baca Esekiel 34:​12, 16.) Sope Peringeten, rusurlah hubungi turang senina si la aktip. Petetap ukur kalak e maka ermediate kam man kalak e janah merhat kam nampati kalak e asa ngasupndu. Undang kalak e ku acara Peringeten. Adi reh kalak e, alo-alolah kalak e alu mehuli. Kenca Peringeten, teruslah dahi ntah pe hubungi kalak e. Bereken penampat kai pe si iperluken kalak e secara rohani gelah banci mulihken ku Jahwe.—1 Pet. 2:25.

18. Uga kita kerina banci nampati turang senina si la aktip? (Roma 12:10)

 ¹⁸ Kerina kita banci nampati turang senina si la aktip si reh ku acara Peringeten. Uga carana? Mehulilah perbahanenta man kalak e, perkeleng, ras dem pengergan. (Baca Roma 12:10.) Ingetlah maka banci saja ragu kalak e reh mulihi ku perpulungen. Banci saja kuatir kalak e nandangi tanggapen turang senina bas runggun. e Emaka ula sungkun kai si banci erban kalak e mela ntah pe tersinggung. (1 Tes. 5:11) Kalak e turang seninata ras biri-biri Jahwe si meherga. Pasti meriah ukurta banci ka mulihi nembah Jahwe radu ras kalak e.—Ms. 119:176; Perb. 20:35.

19. Kai saja manpaatna mperingeti kematen Jesus?

¹⁹ Enggo sibahas maka acara Peringeten kematen Jesus seh kel pentingna. Lanai ateta mamang engkai maka isuruh Jesus siperingeti acara e tiap tahun. Alu ngelakoken si e, kita ras kalak si deban ndatken mbue manpaatna. (Jes. 48:​17, 18) Kekelengenta man Jahwe ras Jesus banci reh belinna. Banci ka sicidahken pengerganta nandangi kai si enggo ilakoken Jahwe ras Jesus man banta. Reh kompakna ka kita ras turang seninata. Selain si e, banci sisampati kalak si deban meteh uga kalak e banci ndatken manpaat arah korban tebusen. Emaka, mari siusahaken asa ngasupta gelah ersikap kita reh ku acara Peringeten, eme acara si pentingna bas tahun enda!