1. Bays pahn Look 22:​19, 20, wai di Memoaryal da di moas impoatant day a di yaa?

 DI MEMOARYAL da di moas impoatant day a di yaa fi Jehoava peepl. Dat da wen wi selibrayt di sakrifais weh Jeezas mek wen ih ded fi wi. Dis da di onli ivent weh Jeezas mi koman ih falowaz fi selibrayt eech yaa. (Reed Look 22:​19, 20.) Wi ga lata reezn wai wi luk faawod fi di Memoaryal. Mek wi taak bowt som a dehn.

2. Wai di Memoaryal soh speshal tu wee?

² Di Memoaryal help wi fi tink bowt wai di ransom sakrifais impoatant, di blesinz weh wi get, ahn di difrent wayz how wi ku shoa dat wi tankful fi Jeezas sakrifais. (2 Kor. 5:​14, 15) Ih gi wi wahn chaans fi “inkorij wan anada.” (Roam. 1:12) Evri yaa, sohn inaktiv bradaz ahn sistaz kohn da di Memoaryal. Som a dehn eevn disaid fi kohn bak tu Jehoava bikaaz a di lov weh di bradaz ahn sistaz shoa dehn. Ahn lata peepl weh kohn fi di fers taim wuda staat stodi di Baibl bikaaz a weh dehn si ahn hyaa da di Memoaryal. Aala dehndeh tingz mek di Memoaryal speshal tu wi!

3. How di Memoaryal bring aala wi tugeda? (Koment pahn di picha.)

³ Wi luk faawod tu di Memoaryal bikaaz wi noa dat pahn da day az di son di goh dong aala wi bradaz ahn sistaz rong di werl di selibrayt it tu, ahn dat mek wi feel eevn moa laik wi da wan big hapi famili. Weh hapm da di Memoaryal? Wi staat aaf wid wahn sang ahn wahn pryaa. Den, wi lisn tu wahn taak weh rimain wi wai di ransom sakrifais soh impoatant. Joorin di taak, dehn seh too moa pryaa, wan bifoa dehn paas di bred ahn wan bifoa dehn paas di wain. Den wi en di proagram wid wahn nada sang ahn pryaa. Wi seh “aymen” afta eech pryaa fi shoa  apreeshiayshan fi weh Jehoava ahn Jeezas du fi wi. Aala di kangrigayshan dehn rong di werl selibrayt dis ivent eena di saym way pahn di saym day. Yoo ku imajin how hapi Jehoava ahn Jeezas wen dehn luk dong ahn si wi di selibrayt dis speshal day tugeda fi aana dehn?

4. Weh wi wahn taak bowt eena dis aatikl?

⁴ Eena dis aatikl, wi wahn ansa dehnya kweschan: How wi ku ga di rait atichood ahn shoa dat wi tankful fi di Memoaryal? How wi ku help adaz fi benifit fan it? Ahn how wi ku help wi bradaz ahn sistaz weh inaktiv? Di ansaz tu dehnya kweschan ku help wi fi bee redi fi dis speshal ivent.

HOW WI KU GA DI RAIT ATICHOOD FI DI MEMOARYAL?

5. (a) Wai wi shuda tink bowt di ransom az sohnting preshos? (Psalm 49:​7, 8) (b) Weh yu laan fahn di veedyo weh naym Wai Jeezas Mi Ded fi Wi?

⁵ Wan a di moas impoatant way wi ku pripyaa wiself fi di Memoaryal da fi tink bowt wai Jeezas ransom sakrifais soh preshos tu wee. If yu reeli tink bowt it, wi kyaahn du notn fi sayv wiself fahn sin ahn det. (Reed Psalm 49:​7, 8; si di veedyo weh naym Wai Jeezas Mi Ded fi Wi?) a Jehoava mi mek araynjments fi mek Jeezas giv op ih laif fi sayv wi. Dis da-mi wahn big sakrifais fi di too a dehn. (Roam. 6:23) Di moa wi tink bowt weh Jehoava ahn Jeezas mi du fi wi, di moa wi wahn apreeshiayt di ransom. Wi wahn taak bowt som a di tingz weh Jehoava ahn Jeezas mi wilin fi du eevn doa dehn neva eezi. Bot fers, wat da di ransom, ahn wai Jeezas mi haftu bee di wan fi pay di ransom sakrifais?

6. Wat da di ransom, ahn wai Jeezas mi haftu bee di wan fi pay di ransom sakrifais?

⁶ Wahn ransom da wahn prais weh sombadi wuda pay fi bai bak sohnting. Adam da-mi wahn perfek man wen Jehoava mi mek ahn, bot wen hihn mi sin, hihn mi giv op evalastin laif. Dis neva onli afek hihn. Ih mi afek aala fi hihn pikni dehn tu. Soh fi bai bak weh Adam laas, Jeezas mi giv op fi hihn oan perfek laif az wahn sakrifais. Joorin Jeezas hoal laif pahn ert, hihn “neva komit no sin ner chrik enibadi.” (1 Peet. 2:22) Wen Jeezas mi ded, ih mi perfek, jos laik how Adam mi stan bifoa ih sin. Soh hihn kuda mi pay fi di perfek laif weh Adam laas wid di perfek laif weh hihn mi giv op.—1 Kor. 15:45; 1 Tim. 2:6.

7. Wat da som a di chraiyalz Jeezas mi haftu fays wen hihn mi deh pahn ert?

⁷ Wen Jeezas mi deh pahn ert, hihn mi aalwayz obay Jehoava, eevn wen dat mi haad fi du. Eevn doa Jeezas mi perfek, hihn mi stil obay ih payrents weh neva perfek. (Look 2:51) Wen hihn da-mi wahn teenayja, hihn mi haftu fait gens eni presha weh kuda mi mek hihn disobay ih payrents er Jehoava. Den, wen hihn da-mi wahn man, Saytan mi chrai temp ahn fi sin, an ih mi eevn chrai get Jeezas fi wership hihn insteda Gaad. (Mach. 4:​1-11) Saytan neva waahn Jeezas pay di ransom prais, soh hihn mi du evriting weh ih kud fi chrai stap ahn.

8. Wat da sohn ada chraiyalz Jeezas mi gaahn chroo?

⁸ Wen Jeezas mi staat ih minischri, hihn mi gaahn chroo eevn moa chraiyalz. Ih enimiz mi persikyoot ahn, an  eevn chretn fi kil ahn. (Look 4:​28, 29; 13:31) Hihn mi haftu put op wid di mistayk dehn weh ih disaiplz mek. (Maak 9:​33, 34) Ahn wen dehn mi put ahn pahn chraiyal bifoa dehn kil ahn, tingz mi geh eevn wers far ahn. Joorin da taim, dehn mi taacha ahn, tek ahn mek papishoh, ahn mek ih sofa wahn lat bifoa dehn fainali kil ahn laik wahn kriminal. (Heeb. 12:​1-3) Ahn den ih mi haftu sofa ahn ded pahn di taacha stayk hihn wan, widowt Jehoava help. b—Mach 27:46.

9. How wi feel bowt di sakrifais weh Jeezas mek fi wi? (1 Peeta 1:8)

⁹ Ih klyaa fi si dat Jeezas mi haftu gaahn chroo wahn lat fi giv ih laif az wahn ransom fi wi. Wen wi tink bowt aal di sakrifais weh Jeezas mi mek fi wi, wi lov ahn eevn moa, noh chroo?—Reed 1 Peeta 1:8.

10. Weh Jehoava mi wilin fi goh chroo fi mek ih Son giv ih laif fi wi?

¹⁰ How bowt Jehoava? Weh hihn mi wilin fi sakrifais fi mek Jeezas kuda mi pay di ransom? Jehoava ahn Jeezas mi ga di kloasis rilayshanship weh kuda eva egzis bitween wahn pa ahn wahn son. (Prov. 8:30) Soh wen Jehoava mi si ih son di goh chroo soh moch payn ahn sofarin, fi shoar dat mi payn ahn wahn lat wen ih si how bad dehn chreet ih son.

11. Gi wahn egzampl fi shoa how Jehoava mosi mi feel wen dehn mi taacha ahn kil ih son.

¹¹ Enitaim wahn pikni ded, dehn payrents feel lata payn ahn saro. An eevn doa wi noa di rezorekshan wahn hapm, wi stil feel wahn lata payn wen sombadi wi lov ded. Dis help wi andastan how Jehoava mi feel wen ih si ih Son weh ih lov soh moch sofa ahn ded pahn Naisan 14, 33 CE. c—Mach. 3:17.

12. Weh wee ku du fi pripyaa fi di Memoaryal?

¹² Fahn now til di Memoaryal, chrai stodi moa bowt di ransom sakrifais. Yoo ku du dis az paat a yu persnal stodi er az wahn Famili Wership proajek. Yu ku yooz di poblikayshan dehn er di Risaach Gaid fi Jehoava Witnisiz if ih deh eena yu langwij. d Chrai fala di Memoaryal Baibl reedin skejul weh deh eena di Laif ahn  Minischri Meetin Werkbuk. Ahn pahn di day a di Memoaryal, memba fi wach di speshal Maanin Wership proagram. Wen wi du dehnya tingz bifoa di Memoaryal, ih wahn help wi fi ga di rait atichood, ahn wi wahn ku help adaz fi benifit tu.—Ezra 7:10.

HELP ADAZ FI BENEFIT

13. Wat da di fers ting wi need fi du soh dat adaz ku benifit fahn di Memoaryal?

¹³ Wan a di fers ting wi ku du fi help peepl benifit fahn di Memoaryal da fi invait dehn fi kom. Wi ku invait peepl weh wi meet eena di minischri, ahn wi ku mek wahn lis a ada peepl weh wi wuda waahn invait. Dehn ku bee wi famili, peepl wi werk wid er goh da skool wid, er ada peepl wi noa. Eevn if wi noh ga inof invitayshan fi giv owt, wi ku shayr wahn link fi di invitayshan weh deh pahn wi websait. Wi mait bee sopraiz fi noa humoch peepl wi invait kohn da di Memoaryal!—Eccl. 11:6.

14. Wai wahn persnal invitayshan ku mek sombadi waahn goh da di Memoaryal?

¹⁴ Wen yu gi sohnbadi wahn persnal invitayshan fi di Memoaryal, dat ku reeli inkorij dehn fi goh. Fi egzampl, evri yaa wahn sista wuda aks ih hozban, hoo da noh wahn Witnis, fi goh wid ahn da di Memoaryal, bot ih neva goh. Bot wan yaa, ih hozban mi sopraiz ahn wen ih tel ahn dat ih mi gwehn wid ahn da di Memoaryal. Weh mi difrent dis taim? Hihn seh, “Ai geh wahn persnal invitayshan fi di Memoaryal.” Wahn elda weh hihn mi noa mi giv ahn wahn invitayshan. Di hozban mi aten di Memoaryal da yaa, an ih mi kantinyu fi goh fi yaaz afta dat.

15. Wen wi invait peepl da di Memoaryal, weh wi shuda ekspek?

¹⁵ Peepl weh wi invait tu di Memoaryal mait ga kweschanz, espeshali if da dehn fers taim. If wi tink bowt weh kweschanz dehn mait aks heda taim, den wi ku bee redi fi ansa dehn. (Kol. 4:6) Fi egzampl, dehn mait wanda: ‘Weh hapm da  di Memoaryal?ʼ ‘How lang di proagram wahn laas?ʼ ‘Weh Ah shuda wayr?ʼ ‘Dehn chaaj fi goh een?ʼ ‘Dehn tek op kalekshan?ʼ Wen wi invait sohnbadi da di Memoaryal, maybi wi ku aks dehn if dehn ga eni kweschan, ahn den ansa dehn. Wi ku aalso yooz di veedyo dehn weh naym Memba di Det a Jeezas ahn Weh Aal Hapm da Wahn Kingdom Haal? fi mek di persn noa weh fi ekspek. Lesn 28 eena di Injai Laif Fareva! buk ga lata gud points weh wi ku shayr wid dehn tu.

16. Weh ada kweschanz peepl weh goh da di Memoaryal mait gat?

¹⁶ Peepl mait ga moa kweschanz afta dehn goh da di Memoaryal fi di fers taim. Dehn mait wanda wai nobadi, er maybi jos lee bit a peepl, eet di bred ahn jrink di wain. Dehn mait wanda how aafn wi du di Memoaryal, er if aala wi meetin da di saym laik di Memoaryal. Eevn doa di Memoaryal taak wahn ansa lata dehnya kweschanz, wi mait stil need fi eksplayn wahn lee bit moa tu peepl weh kohn fi di fers taim. Di aatikl pahn jw.org weh naym “Why Do Jehovahʼs Witnesses Observe the Lordʼs Supper Differently From the Way Other Religions Do?” ku help wi ansa som a dehn kweschanz. Soh, weda da bifoa, joorin, er afta di Memoaryal, wi waahn du evriting wi kud fi help peepl wid di “rait haat kandishan” fi benifit fahn di Memoaryal.—Aks 13:48.

HELP WI BRADAZ AHN SISTAZ WEH INAKTIV

17. Weh eldaz ku du fi help inaktiv bradaz ahn sistaz? (Ezekiel 34:​12, 16)

¹⁷ How eldaz ku help inaktiv bradaz ahn sistaz joorin di Memoaryal seezn? Eldaz, unu ku shoa dat unu kyaa bowt dehn. (Reed Ezekiel 34:​12, 16.) Bifoa di Memoaryal, unu need fi kantak az moch inaktiv bradaz ahn sistaz az pasabl. Mek dehn noa dat unu lov dehn ahn reeli waahn help dehn. Invait dehn da di Memoaryal. An if dehn kohn, shoa dehn dat yu hapi fi si dehn. Afta di  Memoaryal, kantinyu fi shoa unu bradaz ahn sistaz dat unu lov dehn. Kip in toch wid dehn, soh dat unu ku help dehn kohn bak tu Jehoava.—1 Peet. 2:25.

18. Bays pahn Roamanz 12:​10, how aala wi ku help wi inaktiv bradaz ahn sistaz?

¹⁸ How aala wi ku help inaktiv bradaz ahn sistaz weh kohn da di Memoaryal? Wi ku chreet dehn wid lov, kainis, ahn rispek. (Reed Roamanz 12:10.) Memba dat maybi ih neva eezi fi mek dehn kohn da meetin agen. Dehn mait frayd fi weh adaz eena di kangrigayshan mait seh bowt dehn. e Chrai noh fi aks dehn kweschanz weh mait mek dehn feel shaym, er seh sohnting weh ku hert dehn. (1 Tes. 5:11) Wi noh waahn ferget dat dehn da wi bradaz ahn sistaz, ahn wi hapi fi wership Jehoava wid dehn agen.—Ps. 119:176; Aks 20:35.

19. How wee benifit wen wi memba weh Jeezas mi du fi wi?

¹⁹ Wi andastan wai Jeezas mi tel wi fi selibrayt di Memoaryal evri yaa. Ahn wi tankful dat wee an adaz ku benifit wahn lat wen wi obay dis koman. (Isa. 48:​17, 18) Fi egzampl, wi lov fi Jehoava ahn Jeezas wahn groa, ahn wi ku shoa dehn dat wi tankful fi weh dehn du fi wi. Wi wahn geh kloasa tu wi bradaz ahn sistaz. Ahn wi ku aalso help adaz fi laan bowt di blesinz weh dehn ku injai sayka di ransom sakrifais. Soh mek wi du aal weh wi kud fi geh redi fi di moas impoatant day a di yaa!