1. Ka uagu luéyuri lubéi Aritaguagülei súdinitimabei lidan irumu? (Lúkasi 22:​19, 20).

 LARITAWAGÚN lounwen Kristu, ligía weyu le súdinitimabei lidan irumu houn lubúeingu Heowá. Ligíarügüñein aritaguagülei lariñagun Hesusu lunti lan haritaguni lani disipulugu (aliiha huméi Lúkasi 22:​19, 20). Busenhadiwa lun lachülürün weyu espechaliti le. Ka uagu? Ariha waméi.

2. Ka burí lébunabei wayumahan lun lachülürün luéyuri Aritaguagülei?

² Íderagua lumutiwa Aritaguagülei lun wararamagun asaminara luagu lebegi wesefuragüle. Haritaguagüda lumutiwa luagu fiu lídangiñe igaburi le ídanbei gayara lan warufuduni weteingiradi lun Hesusu luagu lani sákürifisiu (2 Ko. 5:​14, 15). Gachansintiwa giñe lun wóundaragun hama wábirigu lun wíchugun gurasu wóuniwagua (Rom. 1:12). Chülütiña saragu hádangiñe íbirigu ha dilihañabaña lidoun Aritaguagülei sagü irumu, añahein hádangiñe, aba hagiribudun lun Heowá ladüga ínsiñeni le harufudubei íbirigu houn ñein. Lanwoun lira, aba burí taweiridun hanigi saragu gürigia lau le harihibei luma le haganbubei ñein, ábati hagumeserun aturiahoun Bíbülia. Chóuruti adüga lan sun lira lun aban lan weyu espechaliti Aritaguagülei woun.

3. Ida liña líderaguniwa Aritaguagülei lun warihini úarani le hádanbei lumutiña Heowá? (Ariha humóun giñe iyawaü)

³ Ayumahatiwa giñe lun lachülürün weyu ligía ladüga ligía lan aban chansi lun warihini úarani le hádanbei lumutuniña Heowá. Lidan sun ubóu, hóundaraguba sun gefentiña luagu Heowá éibume lálüdün Weyu lidan kada fulasu ubouagu. Súngubei aganbatiwa aban yanu le afuranguagüdübalin lisudinin lebegi esefuruni, eremuhatiwa bián uremu, sügügüda wamutu fein tuma diwéin ani ariñagatiwa “ítarala” tídangiñe sun wanigi dan lagumuchun kada aban lídangiñe gádürü furíei le adügǘbei. Lídanrügü 24  oura, adüga laali burí sun damuriguaü le ubouagubei ligiaméme. Saminatiwa san luagun ugundani le lasandirubei Heowá luma Hesusu lau harihiniwa íchiga uéiriguni houn lidan gádürügubei larigei ubóu?

4. Kaba wariha lidan aturiahani le?

⁴ Lidan aturiahani le, wóunabubei álügüdahani burí le: ida luba waranserunu wanigi lubá Aritaguagülei?, ida luba wíderaguniña amu lun hasagarun buiti lídangiñe? ani ida luba wíderaguniña íbirigu ha dilihañabaña? Líderagubadiwa wakutihani ariñahani le lun aranseñu wamá lubá weyu espechaliti le.

IDA LUBA WARANSERUNU WANIGI LUBÁ LUÉYURI ARITAGUAGÜLEI?

5. a) Ka uagu lunti lubéi wararamagun asaminara luagu lebegi esefuruni? (Sálumu 49:​7, 8). b) Írida huméi ka lan hafurendeirubei lídangiñe bidéu Ka uagu lounwe Hesusu?

⁵ Aban lídangiñe igaburi le súdinitimabei lun waranserunu wanigi lubá luéyuri Aritaguagülei, lau wararamagun asaminara luagu lebegi sákürifisiu le ladügübei Hesusu. Wagía wábugua siñabei hamuga wesefuragun woungua luéi lubafu figóu luma óunweni (aliiha huméi Sálumu 49:​7, 8; ariha huméi giñe bidéu Ka uagu lounwe Hesusu?). a Ligía lanúadirubei Heowá lun lederegeruni Lisaani libagari wawagu, ani biángubei hagía fáyeitiña aban lanarime ebegi (Rom. 6:23). Éibutimaame wararamagun asaminara luagu le ladügübei Heowá luma Hesusu wawagu, ábatimaame gebegi lan lebegi esefuruni woun. Wariha fiu lídangiñe katei le meha aranseñu lubéi Heowá luma Hesusu lun hadügüni wawagu. Furumiñe, wayanuha luagu le adügübei lun ñein lan esefuruni.

6. Ka adügübei lun ñein lan lebegi esefuruni?

⁶ Lebegi esefuruni, ligía ebegi le afayeirúbei lun lagañeihóun o lun lesefurúniwa somu katei. Dan meha le ladügǘnbei Adán, le furumiñeti wügüri, aban meha gürigia le mafigounti ligía. Danti le lafigouhanbei, aba leferidiruni chansi lun lawinwandun lun sun dan ani féridigüda lumuti giñe chansi ligía hawéi sun lisaanigu. Lun libihín le leferidirubei Adán, mosu meha lederegeruni Hesusu libagari, aban ibagari le mafigounti. Sun meha dan le laubei ubouagu, “madügünti Kristu ni aban figóu, meyeehan ligía ni aban wéiyaasu” (1 Fe. 2:22). Mafigounti meha Kristu lóunwenbei, ligíati, aban meha lebegi libagari kei lebegi ibagari le leferidirubei Adán (1 Ko. 15:45; 1 Tim. 2:6).

7. Írida humá lídangiñe lénrengunga le úmabei lagagibudagua Hesusu.

⁷ Sun meha ya lubéi Hesusu ubouagu, gaganbaditi meha lun sun le lariñagubei Lúguchi le siélubei lun íbini gagibugua lan luma saragu óuchawaguni. Lidan liñüraü, mosu meha gaganbadi lan lun hagumadin lagübürigu ha charabaña íbini machara lan (Luk. 2:51). Dan meha le nibureingili Hesusu, másiñati mosu lan meha lawanduni hadügüdarun amu luagu lun maganbadi lan houn lagübürigu o lun múaragun lan lun Heowá. Dan le meha wéiriaali, mosu meha giñe lagagibudagun luma Satanási, ani hóuchagua lumuti Satanási lúaragun Hesusu lun Heowá (Mat. 4:​1-11). Aranseñu liña meha Satanási lun ladügüni sun liyaraati lun lafigougüdüni Hesusu lun mafayeirun lani Hesusu lebegi esefuruni.

8. Ka amu óuchawaguni lawandubei Hesusu?

⁸ Awandati meha giñe Hesusu amu burí lénrengunga lidan lani ministeriu. Kei hénpulu, éibaaha hamuti láganigu ani siadi haméi háfarubei lan hilagubei (Luk. 4:​28, 29; 13:31). Mosu meha giñe lageidihan luma hachara lani disipulugu (Mar. 9:​33, 34). Lidan aguseragüdüni le ñein lubéi hasiadirei lun lounwen, súfurigüda hamuti ani adüga hagía bula lau. Lárigiñe, aba háfaruni kamá hamuga aban gürigia salufuriti ligía ani súfurigüda hamuti saragu (Ebü. 12:​1-3). Dan le yarafamémeeli lun lounwen, aba ladiñuruni  Heowá lídehan luéi, ligíati mosu lubéi meha lawanduni lagumuhóun lóurate lasufurirun ligía lungua (Mat. 27:46). b

9. Ka wasandirubei lau wasaminarun luagu lani Hesusu sákürifisiu? (1 Féduru 1:8).

⁹ Furanguti fayei lan Hesusu aban ebegi wéiriti lun gayara lan lesefuruniwa. Dan le wasaminarun luagun sun sákürifisiu le meha ladügübei Hesusu wawagu, aba tabuinchun wanigi lau ínsiñeni luagu (aliiha huméi 1 Féduru 1:8).

10. Ka aranseñu lubéi Heowá lun ladügün lun lesefuruniwa?

¹⁰ Ka meha aranseñu lubéi Heowá lun ladügüni lun gayara lan lafayeiruni Hesusu lebegi esefuruni? Kei le aubei warihei, gamadaguati Heowá luma Lisaani buidu buidu (Ari. 8:30). Ligíati, samina wamá luagu ida liña lan meha lasandiragun Heowá lungua dan le larihinbalin Lisaani le hínsiñebei lun ásügüra lídangiñe saragu asufuriruni ya ubouagu. Chóuruti weiri lan meha ligari lun larihini lóuserawagun Lisaani luma lasufurirawagüdün.

11. Ka hénpulu gayaraabei líderaguniwa lun gunfuranda wamani ida liña lan meha lasandiragun Heowá lungua dan le láfarunbei Hesusu hilagubei?

¹¹ Ha féridihañabaña hasaani lidan óunweni, subudi hamuti lanarime ligari leferidirún aban isaani. Íbini afiñe wamá luagu águyuguni, magida lumuti lira gáriti le wasandirubei dan le lounwen somu waduhe le hínsiñeti woun. Íderagua lumutiwa sügǘ le lun gunfuranda wamani ida liña lan meha lasandiragun Heowá lungua lidan irumu 33, dan le larihinbalin lasufurirun luma lounwen Lisaani (Mat. 3:17). c

12. Ida luba wayusuruni dan buidu lubaragiñe lachülürün luéyuri Aritaguagülei?

¹² Ka uagu mayusurun hubalin dan buidu lubaragiñe lachülürün luéyuri Aritaguagülei lúntima haturiahan luagu lebegi esefuruni lidan haturiahan hábugua luma lidan háhuduragun keisi iduheñu? Yusu humóun garüdia Adundehani lun haturiahan gefentiña luagu Heowá o amu burí agumeiraguagüdüni lúntima hasubudirun luagu tema le. d Lanwoun lira, falá huméi aliihani tídangiñeti Bíbülia le lubaabei Aritaguagülei, le áfuachubei tidan garüdia to gíriboun Le lunbei ladügǘniwa lidan adamuridaguni Habagari Kristiánugu luma Heseriwidun. Ani mabulieida huméi harihini áhuduraguni espechaliti le lánina binaafin le adügǘbei lubá luéyuri Aritaguagülei. Ánhawa aransehoun wanigi lubá Aritaguagülei, gayaraabei wíderaguniña amu asagara buiti lídangiñe (Ésüd. 7:10).

 ÍDERAGUA WAMAÑA AMU GÜRIGIA ASAGARA BUITI LÍDANGIÑE ARITAGUAGÜLEI

13. Ka furumiñeti katei lunbei wadügüni lun wíderaguniña amu asagara buiti lídangiñe Aritaguagülei?

¹³ Ida luba wíderaguniña amu asagara buiti lídangiñe Aritaguagülei? Furumiñe, agunbiraha wamaña. Amu luéi wagunbirahaniña gürigia lidan apurichihani, másiñati gayara lan wadügün aban lísüta lau hiri gürigia ha wabusenrubaña wagunbirahan, kéiburi waduheñu, wapanaagu lidan wadagimanu o leskuelarugu, o amu burí gürigia ha wasubudirágun. Anhein agumucha agunbirahagülei to tautu gárada wawéi, gayaraabei wayusurunu to tídanboun Internet. Hageime taweiridun wanigi lau átiribaña lan ánharutiña hachülürün lidoun Aritaguagülei! (Apur. 11:6).

14. Ka sügǘ arufudubalin ka lan gayaraabei wibihini lau wederegerun aban agunbirahagülei lun aban gürigia?

¹⁴ Ibidiñeti woun ka lan gayaraabei libihíniwa láurügü tederegerún aban agunbiragülei. Aban weyu, aba lariñagun tani aban íbiri weiriei tun ani mama Gefenti luagu lídiba lan tuma lidan Aritaguagülei. Ka san uéigiñe taweiridunbei tanigi íbiri to luagu lariñaguni tani weiriei lira tun? Lugundun súnwandan meha tagunbirahani ani mídinti. Kati uagu lasaminara lidin? Aba lariñagun tun ladüga lan líchugun aban wéiyaali lidan afiñeni aban agunbirahagülei lun. Ñǘdünti tani íbiri tuguya weiriei lidan Aritaguagülei irumu ligía ani ñǘdünyati lidan burí le adügǘbei amu burí irumu.

15. Ka lunbei waritaguni danme le wagunbirahaniña gürigia lidoun Aritaguagülei?

¹⁵ Haritagua waméi dan le lan lagunbirahóun aban gürigia lidoun Aritaguagülei, másiñati anihein lan álügüdahani le lunti ladügüni, dántima le móudinñahagili lan lidoun wadamuridagun. Ligíati buídubei lubéi lun wasaminarun luagu álügüdahani burí le gayaraabei ladügüni somu gürigia woun luma ida luba lan wóunabuni (Kol. 4:6). Kei hamuga guentó, háfuga lálügüdagun lungua: “Ka adügǘbei lidan Aritaguagülei? Átiribei san dan lidura? Ida luba ligaburi nasansiragun? Mosu san nafayeihan lun nebelurun? Amuriahóuati san seinsu ñein?”. Gayaraati giñe wálügüdüniña gürigia ha wagunbirahabaña anhein anihein lubéi somu álügüdahani le lunti hadügüni luma lun wóunabuni álügüdahani le habusenrubei hasubudiruni. Gayaraati giñe wayusuruni  bidéu le gíribei Haritagua waméi lounwen Hesusu luma Ka adügǘbei lidan wadamuridagun? Lanwoun lira, anihein fiu ariñahani lidan arufudahani 28 le tídanbei líburu Winwan humá lau ugundani le gayaraabei wariñaguni houn gürigia.

16. Ka álügüdahani gayaraabei liabin lichügüwagun somu gürigia le wagunbirahabei lidoun Aritaguagülei?

¹⁶ Lárigiñe Aritaguagülei, gayaraati liábingua saragu álügüdahani hachügüwagun agunbirahóutiña. Háfuga hálügüdahan ka lan uagu ua habéi (o lougua hamá) éigitiña tídangiñe fein gurá hagía tídangiñe diwéin. O hálügüdagun houngua kada lan átiri dan wadügei Aritaguagülei. Anhein adügǘwa lubéi ligiaméme lidan sun wadamuridagun. Íbini afuranguagüdawa lan saragu lídangiñe katei le lidan yanu le ichugúbei lidan Aritaguagülei, másiñati busén hamá lafuranguagüdüniwa lanwoun ariñahani ligía houn buidu. Lun gayara lan wóunabun lídangiñe álügüdahani ligía, gayaraabei wayusuruni ariñahani lídangiñeti jw.org, le gíribei “Ka uagu mítaran lubéi hadügüni gefentiña luagu Heowá Ladinerun Aburemei kei ladügǘn tidan amu burí relihión?”. Busentiwa wadügüni sun wayaraati, lubaragiñe, lidan, luma lárigiñe Aritaguagülei lun wíderaguniña sun “ha lúntiñabaña ibagari le magumuchaditi” asagara buiti lídangiñe adamuridaguni espechaliti le (Adü. 13:48).

ÍDERAGUA WAMAÑA ÍBIRIGU HA DILIHAÑABAÑA

17. Ida luba híderaguniña wéiyaaña lidan afiñeni íbirigu ha dilihañabaña? (Esekiéli 34:​12, 16).

¹⁷ Ida luba híderaguniña wéiyaaña lidan afiñeni íbirigu ha dilihañabaña lidan lidaani Aritaguagülei? Lau hebereserun hau luma lau harufudun ínsiñeni houn (aliiha huméi Esekiéli 34:​12, 16). Wéiyaaña lidan afiñeni, áluaha humaña sun ha hiyaraatiña hádangiñe íbirigu ha lubaragiñe Aritaguagülei. Ariñaga humá houn luagu berese humá hau ani busén humá hadügüni sun hiyaraati lun híderaguniña. Agunbiraha humaña lidoun Aritaguagülei, ánhaña achülüra, resibi humaña lau ínsiñeni. Lárigiñe Aritaguagülei, sigí humá abisidahaña íbirigu hínsiñewatiña ha ani ru huméi ídemuei lúmagiñeti Heowá le hemegeirubei houn lun gayara lan hagiribudun lun (1 Fe. 2:25).

18. Ida luba wíderaguniña íbirigu ha dilihañabaña? (Rómana 12:10).

 ¹⁸ Sun íbirigu ha lídanbaña damuriguaü, gayaraati híchugun ídemuei houn íbirigu dilihaña ha achülürübaña lidoun Aritaguagülei. Ida? Lau hóuseruniña lau ínsiñeni, areini luma inebesei (aliiha huméi Rómana 12:10). Haritagua huméi másiña lan hénrengu lan houn lubúeingu Heowá ha lun hachülürün lidoun aban adamuridaguni. Háfuga nidiheri hamá luagu ida luba lan heresibiruniña íbirigu. e Ligíati, madüga wamá álügüdahani ani mariñagun wagíame dimurei le gayaraabei ladügün lun hasandiragun houngua wuriba (1 Tesa. 5:11). Wábirigumemegiña ani gúndaatiwa lauya wáhuduragun lun Heowá úara hama (Sal. 119:176; Adü. 20:35).

19. Ka buiti asagarúbei lau laritawagún lounwen Hesusu?

¹⁹ Lau sun le akutiha wamaalibei, maweiriduntu wanigi lau líchugun Hesusu gumadi woun lun waritaguni lounwen sagü irumu. Lau wadügüni, sagatiwa saragu buiti dandu wagía kei amu gürigia (Isa. 48:​17, 18). Íderagua lumutiwa giñe lúntima hínsiñe lan Heowá luma Hesusu woun. Rútiña chansi woun lun warufuduni seremei wamaniña luagu le hadügübei wawagu. Adügati lúntima wóundarun hamoun wábirigu luma lun wíderagun amu gürigia lun hasubudiruni le lunbei hadügüni lun hasagarun buiti lídangiñe lebegi esefuruni. Ligíati, áfaagua wamá lun aranseñu wamá lubá luéyuri Aritaguagülei, weyu le espechalitimabei lidan irumu.