1. Kūö yòh öng ngam Mëmorīöl nö töt ṙanāngen nö sakāmö? (Lūkös 22:19, 20)

 KAHEUK samyeūheu yin më Tarik Yāvē, nö afēkö kinpaha Yēsū. Tötṙanāngen angū-ö nö sakāmö nö in cha. Angū-ö ön ngih chööngö kahëtö Yēsū nö in yik haköptö re. (Vë-evkūö Lūkös 22:19, 20.) Ṙòkhöre in öi meūkkö yanihī e angū-ö sakāmö. Kūöyòh? Töi chumkūöṙen öi ngëichkö nup lanyngen e.

2. Kūö yòh öi meukkö yanīhi ngam Mëmorīöl?

² Lökten in ngam Mëmorīöl in öi teūngen tö yanöölenre hēk akahakūö inrē tö ngam ṙāi ṙinānyi hī nö tö pōiṙāi. Lökten in e inrē ayī-ö öi akahakūö töm inlahenre öi hòṅ hameuktö minlēḵṙenre öi im tökitaknyu mahām Yēsū. (2 Kòr. 5:14, 15) Teūngen inrē ayī-ö tö ṙētak re öi hareuskö alaha höö. (Rōm. 1:12) Kaheuk samyeūheu yin nö ngaich më prötör sistör yamihtökūö nö el ngam Mëmorīöl, më tö marò-angen nö öt yihtökūö nö el minë mīting. Ōt yip in cha tö ngaich nö havan nö i linöökö lōn Yāvē, kuö më prötör sistör nö holtö hanangenlōnre nö ha-öinytö yanīhi cha yěn yihtökūö nö el ngam Mëmorīöl. Yěn yihtökūö yip tö ööire tarik nö im Mëmorīöl, ngaich lökten inup ahangre cha-a hēk maheukre nö hòṅ rultenre nö istötī ngam Paipöl. Sā lamök im talöökö nômö ngaich cha-a. Angū-ö lainyngen ngam Mëmorīöl nö tökiröng nö sakāmö nö in hī!

3. Sitih inlahen nö ngönlöre ngam hinëngö nö elhôi më tarik Yāvē nö keuheūtngöre chūök tö kūö ngam Mëmorīöl? (Ngeichköm nyat inrē.)

³ Lökten ayī-ö öi meūka tö yanīhi ngam Mëmorīöl, pön lökten in e nö ngön ngam hinëngö nö ihôi hī. Asā sanipti ngam tavūöi, keuheūtngöre chūök i kūö ngih panam më tarik Yāvē nö mūl nö kēken ngih Mëmorīöl. Ṙòkhöre nöng hěngren ṙô minë minkahten ahang hī, in e ayī-ö öi mikahtu elnang nö kūöyòh ngam ṙāi ṙinānyi nö töt ṙanāngen nö in hī. Nët nup tinköökö hī öi ha-öiny Yāvē, hēk silôṙö inrē ngam ròtī tö ngam vāin nö i kūö më  tarik yamihtökūö. Ngaich in nup tö fën vinë-ekūötēv ayī-ö holtö ellōnre öi ngö ṙô “āmen.” Im tö 24 kanta (hours) nö keuheūtngöre chūök nö hěngren inlahen kinëken ngam Mëmorīöl nö el minë māṅ. Iṙôken ṙanamlōn lohten na Yāvē na Yēsū nö meuk inlahen hī, öi hameuktö minlēḵṙen re tö cha.

4. Asuh nup min kahakkö hī in ngih ātiköl?

⁴ In ngih ātiköl in min öi akahakūö tö sanapṙô minë tö lūöi intöönö: Sitih inlahen öi halēnkö ellōnre kēken ngam Mëmorīöl? Sitih inlahen öi hayööken yip tahëng nö kē yanöölenre? Hēk sitih inlahen öi hayööken yip prötör sistör tö ufòv ngöre? Yē hī min öi mikahtö kūöre tö sanapṙô në intöönö, ngaich lēntöheichṙen min ayī-ö öi kēken e angū-ö sakāmö.

HALĒNKÖ ELLŌNRE KĒKEN NGAM MËMORĪÖL

5. (a) Kūö yòh öi hòṅ afēkö inlahen ngam tökētu ṙāi ṙinānyö hī nö tö pōiṙāi? (Salmai 49:7, 8) (b) Asuh öp haköplö meh im vītio Kūö Yòh Ök Yēsū Nö Kapah?

⁵ Ṙōlkangen nun minë inlahen hī öi halēnkö ellōnre kēken ngam Mëmorīöl. Tö sā ngih töt ṙanāngen inlahen hī hòṅ fēkö ngam ṙāi ṙinānyi nö tö pōiṙāi hēk iṙôken ngaich nup tö teungten tö kūö e. Tö sā hī ötkô kahngenre ṙa-ainyre ṙa-ang im tökööl hēk kinpaha inrē. (Vë-evkūö Salmai 49:7, 8; ngëichkö ngam vitīo inrē Kūö Yòh Ök Yēsū nö Kapah?) a Lökten ang Yāvē nö kēten Yēsū ngam töng hěngmaneuk kūön ò nö ṙāi ṙinānyö hī. (Rōm. 6:23) Yěi fēkö inlahen na Yāvē na Yēsū nö hayëḵngenre tö pòkūö hī, ngaich sīöplöre ngam minlēḵṙen hī töm tökētu ṙāi ṙinānyi. Ta-a töi chumkūöṙen tö minë inlahen tī na Yāvē na Yēsū nö ṙānyen hī, urěh pöri sin ayī-ö öi ngëchköm tö halēnlöng ṙāi ṙinānyöre.

6. Tö sitih manah öng ngam ṙāi ṙinānyi hēk kūö yòh ang Yēsū nö kēngö nômöre nö ṙāi ṙinānyö hī?

⁶ Ṙāi ṙinānyi ngö in tö ṙāi nup chëhen tö havānö. Töhetö vinī-i ök misī Atöm, hēk tö örheuheu örěh anga-aṅ nö aṅ nö i kūö ngih panam. Köölö fālen pöri anga-aṅ, lökten nö löhlö tī tö ngam nômö tö örheuheu aṅ. Ngaich sölhu inrē më kūön ò. Ngam tö löhlö tö tī Atöm, havānö e ang Yēsū nö kēḵngö ngam nômö re. Ik sā Yēsū misī nö in panam “ngam tötköölö fālen: öt rēhĕn nö löknyuvö elvāng tö minyôinyaṅ.” (1 Pīt. 2:22) Töhet ök sön pöri anga-aṅ nö kapah, sā Atöm nö töhet urěhkūö re nö köölö fālen. Lökten ang Yēsū nö kēngö ngam töhet nômö re nö ṙāi ṙinānyö hī.—1 Kòr. 15:45; 1 Tim. 2:6.

7. Asuh nuk misī kanihngen Yēsū ik sā ò nö ing panam?

⁷ Pōyen kanihngen ök misī Yēsū ik sā ò nö ing panam, sönen pöri anga-aṅ nö hang chööngö ngam yöngre Yāvē. Hangṙô nak yöngre inrē anga-aṅ ik sā ò nö kūönö, pòrô nak yöng ò nö töthët. (Lūk. 2:51) Ik sā ò inrē nö ṙālö, lohten anga-aṅ nö timlöng alaha nö un hang chööngö nak yöngre hēk un chiplö inrē nö in Yāvē. Ik sā ò inrē ngaich nö kiröng, mā-ainyre ngam sī-ö nö halō-ong kūö ò hēk timlö alaha ò inrē nö halôngö chööngö Yāvē. (Mët. 4:1-11) Sā kumlēḵngô re ngam sī-ö tö ò nö hòṅ vīten Yēsū takô nö köölö fālen, hòṅ ò nö öt teungten nö kētö ngam ṙāi ṙinānyi.

8. Asuh nuk tö ōtngöre kanihngen Yēsū?

⁸ Ōtre nuk kanihngen Yēsū ik sā ò nö rultenre nö löklōn Yāvē nö ing panam. Hakihtuṙen anga-aṅ tö yik tökunyaha elmat töre, uroh inrē cha-a nö hòṅ fëlngen ò. (Lūk. 4:28, 29; 13:31) Lā-al nuk ötkumlēḵ-en yik haköptöre inrē anga-aṅ. (Māk. 9:33, 34) Ik sā ò inrē nö kahòkkaṙen, ngaich kiröngen ötlinëken anga-aṅ tö yik tarik hēk miyëḵ inrē cha-a tö ò. Sā inlahen öp tö faluṙen nö hakihtuṙen. (Hep. 12:1-3) Höng kahngenre anga-aṅ nö la-al ngam tökiröng kanihngenre hēk chanökköre im manah ṙētak ò, pön öt hayööken ò ang Yāvē hē-e. b—Mët. 27:46.

9. Sitih lōn öi yěi fēkö ngam tökitaknyu mahām Yēsū nö chö-öinyten hī? (1 Pītör 1:8)

 ⁹ Kô-en ang Yēsū nö kētö ngam tö pōiṙāi nômö re nö ṙāi ṙinānyö hī! Yē hī afēkö minë inlahen Yēsū nö chö-öinyten hī, ngaich sīöplöre ngam hanangenlōn hī tö ò hēk minlēḵṙen inrē. —Vë-evkūö 1 Pītör 1:8.

10. Sitih inlahen mufē ang Yāvē ik sa ò nö harööḵngenre nö halēnlö ngam ṙāi ṙinānyi?

¹⁰ Chumkūöṙen hēk töm inlahen Yāvē nö harööḵngenre nö kēḵngen Yēsū nö ṙāi ṙinānyö hī. Tö ngön ön ngam innôlö ngam inyöngö nö in ngam kūön re. Mihôiṅ öi afēkö ngam innôlö na Yāvē na Yēsū nö iṙôkö kanönö lohten angū-ö! (Inch. 8:30) Sitih mufē ang uvöh Yāvē ik sā ò nö meuk minë kanihngen Yēsū nö ing panam, kirööngen miṙivlōn lohten anga-aṅ ik sā ò nö meuk inkihten ngam kūönre tö më tarik.

11. Sitih mufē ang Yāvē ik sā Yēsū nö fëliyö? Mikahtö elmat hī.

¹¹ Yip inyöngö tö kapahlöng tö kūönre, acha-a yip tö akahakūö tö miṙivlōn hī yěi kapahlöng. Pòrô in öi ṙinātu-ellōn tö Yāvē min nö ha-aṅlen yip tö kapah, sön pöri ayī-ö öi keuheūtnyöre tö mirivlōnre yěi kapahlöng tö yip holmaneukre. Ngatī miṙivlōn Yāvē ik samyeūheu 33 C.E. nīsan 14 ik sā ò nö meuk öt linëken ngam kūönre, chökö nômö anga-aṅ nö meuk inlahen finëlngö ngam kūönre. c—Mët. 3:17

12. Sitih inlahen öi halēnkö ellōnre öi kēken ngam Mëmorīöl?

¹² Kô-òren öm halēnlö inlahen re öm kakken ngam ṙāi-ṙinānyi hē el ṙētak ngam fëmili vörsip hēk yěm kahngenre haköp, hanöng sā ngam Mëmorīöl nö öl nö yih. Mihôiṅ öm kē inyöökenre öm löktö in ngam kōichpin ka-ët (Yěn ōt ngih līpöre nö im ëlô meh) hēk nup tahëng inrē līpöre hī hòṅ meh hēk min öm ṙūöhölre mikah elmat tö e. d Mihôiṅ inrē öm asīnkö ngam sëtiūl (schedule) inkööpö mat Paipöl ngam tö kētu nö im Pustika Mumting. Mihôiṅ inrē öi meuk öp ‘ispesöl prōkrām’ tö kētu nö im lāpeuheū ngam Mëmorīöl. Yē hī min öi halēn ellōnre öi kēken ngam Mëmorīöl, ngaich teungten min ayī-ö öi hayööken yip tahëng holre nö kē yanöölenre. —Esrā 7:10.

HAYÖÖKEN YIP TAHËNG NÖ KĒ YANÖÖLENRE

13. Asuh öp tö hòṅ inlahen hī yěi hòṅ lōnu tö yip tahëng nö teungen tö yanöölenre nö löktö im Mëmorīöl?

¹³ Sitih inlahen öi hayööken yip tahëng nö kē  yanöölenre nö im Mëmorīöl? Hòṅ havëten cha ayī-ö nö yihtökūö nö im Mëmorīöl. Höng löktö im inhangkö tölöök inhanga in öi havëten cha, kūich minë-eny yip lōnre inrē ayī-ö havëtö re. Tö sā yip makalaha hī, hol hī kamān, hol hī iskul hēk tö yip tahëng inrē. Yěi kūönen aṅ-in tö minë invitēsön kārt, ngaich mihôiṅ ayī-ö öi sööm invitēsön cha öi höng löktö el fūn. Ta-a töi pōyen havëti pöi öt akahakūö min tö cha yěn hòṅ yihtökūö. —Mum. 11:6.

14. Asup yanöölen hī yěi kahngenre öi kētö invitēsön öp tö hěngtak tarik. Vënyö öp tö hěng inchōḵ elmat hī.

¹⁴ Yēḵ hī öi havëtö yip mikahkūöre ngaich ngö ṙô ayī-ö lāmöö in meh ön ngih invitēsön, pī-a min anga-aṅ nö lökngöre ellōn ngacih öthō min nö öt yihtökūö nö im Mëmorīöl. Töi chumkūöṙen tö inlahen ngô tö hěngtak sistör. Öt mö im kanô-en ngam pīhö ò. Hěngheuh ngam pīhö ò nö holtö ṙanamölōnre nö ngö ṙô nö in ò in meh chin min chuh ip Mëmorīöl. Pingangkūö ngam sistör nö hang ṙô ò. Pön ṙolheuheu anga-aṅ nö havëten ò in nuk urěh ṙētak nö im Mëmorīöl. Hö ö pöri anga-aṅ nö yihtökūö. Asuh pöri ngaich öp lāinyngen ò? Ngö ṙô ngam pīhö ngam sistör, “teūngen chin töng töhěng invitēsön re.’’ Vë-enyre anga-aṅ nö kē-evkūö töp töhěngtak minṙöinylen mikahkūö ò, nö lumnöörö ò angū-ö. Yihtökūö ngaich ngam pīhö ngam sistör nö im Mëmorīöl im samyeūheu angū-ö, örheūheu inrē ngaich anga-aṅ nö yihtökūö inup tahëng Mëmorīöl.

15. Asuh öp tö hòṅ chumkūöṙen hī, yěi havëtö yip tarik nö im Mëmorīöl?

¹⁵ Chumkūöṙen ayī-ö yěi havëtö yip tarik nö im Mëmorīöl, pön lohten min nö ōt nup intöönö elkuilōn cha, möthë yěn töt hěngheuh anga-aṅ nö chuh el minë mīting hī. Lökten öm urěh afēkö öp intöönö min hatön cha ngaich heuveū min me-eṅ kētö sanapṙô cha. (Kòl. 4:6) Tö sā ngih mihôiṅ intöönö yamih nö elkuilōn cha, ‘Asuh öp min tö hameuktu nö el ngih prōkrām?’ ‘Irô-òten öng min nö kēkaṙen?’ ‘Hòṅ sitih inlahen chinhënen öi yěi chuh in e?’ ‘Hòṅ kētö pësa hòng ayī-ö yěi yihtökūö in e?’ ‘Havëka kūö hòng ayī-ö tö pësa inrē?’ Lökten yěm havëtö öp tarik nö yihtökūö nö im Mëmorīöl, ngaich mihôiṅ me-eṅ öm hatöönö ò, ‘Hòṅ ṙūöhtö mikahkūöre öm hēk tö inlahen ngam Mëmorīöl?’ Ngaich yěn  ōt nup intöönö elkuilōn cha ngaich mihôiṅ min öm kētö sanapṙô u. Mihôiṅ öm hameukhömat ò tö minë vītio Afēkö ngam Kinpaha Yēsū Hēk Asuh Nup La-en Hī El Patī Pūlngö? Ngaich löktö in e mikahkūö min cha-a tö inlahen kinëken minë mīting hī. Mihôiṅ inrē öm vënyö nang ò öm löktö in ngam līpöre Mihôiṅ Man Örheuheu Ṙamölōn! im lësön 28.

16. Asuh nup mihôiṅ intöönö elkuilōn yip yamihtökūö nö im Mëmorīöl?

¹⁶ Mihôiṅ min nö pōyen nup intöönö elkuilōn yip tūfömngöre tarik yamihtökūö nö im Mëmorīöl. Mihôiṅ cha-a inrē nö hòṅ mikahtökūöre tö më rikrenö kūö yòh nö öt ṙòkhöre nö kē ngam ròtī töm vāin. Ngaich pī-a cha-a inrē nö hòṅ mikahtökūöre tö inlahen hī ihē kēken ngam Mëmorīöl hēk ngatī inlahen kinëken hòng inrē minë tahëng mīting hī. Vënyu nun ṙung në nö im minkahten ngam Mëmorīöl, Ōtre pöri yip tötūfömngöre yamihtökūö tö hòṅ ṙuöhtu mikah elnang. Kētu sanapṙô nun minë tö ngatī intöönö el ngam jw.org nö in ngam ātiköl “Kūö Yòh Öich Më Vamënyen Yāvē Nö Harikngöre Tī Nö Fēkö Ngam Kinpaha Yēsū?” Mihôiṅ inrē öm löktö in e öm mikahtökūö cha. Lōnu in tö yip tö yāichö ellōn nö pōyen yanöölen nö löktö im Mëmorīöl. Lökten ayī-ö öi mā-anyre öi hayööken cha urěhkūö ngam Mëmorīöl hēk unôichrit e inrē.—Inl. 13:48.

HAYÖÖKEN YIP PRÖTÖR SISTÖR TÖ-UFÒVNGÖRE

17. Sitih inlahen yip minṙöinylen nö mihôiṅ nö hayööken yip prötör sistör tö-ufòvngöre? (Isikīěl 34:12, 16)

¹⁷ Sitih inlahen öich nö mihôiṅ më minṙöinylen nö hayööken më prötör sistör tö-ufòvngöre, nö elhôi minë chingët ngam Mëmorīöl? Mihôiṅ öm kētö ṙinātö-ellōn cha tömeh öm chumkūöṙen tö cha. (Vë-evkūö Isikīěl 34:12, 16.) Kalah inrē ayī-ö vë-ekūö yip tö ngatī prötör sistör re urěhkūö ngam Mëmorīöl. Vë-enyre öm hangenlōn tö cha hēk hīnöre inrē öm hayööken cha. Havëten cha inrē nö yihtökūö nö im Mëmorīöl. Yěn yihtökūö cha-a, ngaich holtö ṙanamlōnre öi höngkūö cha. Unôichrit ngam Mëmorīöl inrē ayī-ö mihôiṅ yihtöre vë-ekūö cha. Hayööken cha inrē nö havan nö in Yāvē.—1 Pīt. 2:25.

18. Sitih inlahen öi mihôiṅ hayööken yip prötör sistör tö-ufòvngöre? (Rōma 12:10)

 ¹⁸ Yěn yihtökūö më prötör sistör nö im Mëmorīöl më tö-ufòvngöre, ngaich sitih inlahen mihôiṅ më aṅ el ngam māṅ nö hayööken cha? Mihôiṅ cha-a nö holtö hanangenlōnre nö ha-öinytö yanīhi cha, milēḵṙen inrē tö cha. (Vë-evkūö Rōma 12:10.) Fēken cha me-eṅ nö piyū-u röön lohten nö chuh el mīting. Ngö ṙô lōn lohten cha-a, sitih mufē yip uvöh prötör sistör tö inlahen chu. e Lökten ayī-ö ötkô ṙôtö nup tö mihôiṅ nö aṙē-ev tī tö cha hēk haṙivlōn tī tö cha. (1 Tös. 5:11) Köpölōn ayī-ö tö cha nö prötör sistör hī, töpōiṙāi inrē nö sīṅp Yāvē. Ṙamölōn ayī-ö yěi hēk holṙen re tö cha öi ha-öinyö Yāvē!—Sal. 119:176; Inl. 20:35.

19. Asuh öp yanöölen hī yěi afēkö ngam kinpaha Yēsū?

¹⁹ Kirööngen ṙô in ha-öinyö Yēsū pô ò nö tölṙô hī kaheuk samyeūheu fēkö ngam kinpaha ò. Yē hī ngatī inlahen, ngaich teungen ayī-ö tö yanöölenre hēk teungten inrē öi hayööken yip tahëng holre. (Isa. 48:17, 18) Sīöplöre min ngam hanangenlōn hī tö na Yāvē na Yēsū hēk ṙētak hī inrē angū-ö öi hameuktöre milēḵṙen tö cha. Ngön inrē min ngam innôlö hī öi in më prötör sistör. Ṙētakvö inrē ayī-ö öi haköpten yip tahëng tö cha min nö pōyen inkòlò nö löktö im tökitaknyu mahām Yēsū. Ta-a töi keuheūttö ellōnre öi halēnken ngam Mëmorīöl, pô e nö tö kiröng nö sakāmö hī!