NSUNZO 2
JIBO 19 Siyarhi ya Nabuya
Ohivisasanyedhela Siku Namakamaka na Vayakani?
“Ejiyá eraganiví muddubuwelaga miyo.”—LUKA 22:19.
DHINASUNZE IYO
Katanalela mukalelo ekalelani yamakamaka Muttupo wa Wubuwela Okwa wa Yezu, ninawodhe dhavi ovisasanyedhela muttupo obu, vina ninàkamihedhe dhavi attu enna wona muttupoya.
1. Siku na Wubuwela Okwa wa Yezu, nikalele nni siku namakamaka na vayakani? (Luka 22:19, 20)
MWA nlogo na Mulugu siku na Wubuwela Okwa wa Yezu ttamakamaka vaddiddi. Bu muttupwene obu bahi warumile Yezu anamafwara aye wubuwela. (Kengesa Luka 22:19, 20.) Ninojedhela ofiya wa siku ntto sabwa ya mwaha dhinjidhene. Ndowe none mwaha dhing’onovi.
2. Mwaha gani dhinnittukulela wona Muttupo wa Wubuwela Okwa wa Yezu?
2 Muttupo wa Wubuwela Okwa wa Yezu ononikamihedha wona ttima enna yobolo. Ononubutxedha mukalelo onawodhihu olagiha otamalela wehu yobolo. (2 Kor. 5:14, 15) Ottiya ejo, vamuttuponi ninokana gari ya olibihana muttu na mukwaye. (Rom. 1:12) Vyaka dhotedhene, attu attiyile otugumana anodha wona Muttupo wa Wubuwela Okwa wa Yezu, ena sabwa ya wakeliwa na okwela anogana wiyelela otugumana, oku ena anogana wiyelela omusunza Bibilia sabwa ya wiwa vina wona Muttupo wa Wubuwela Okwa wa Yezu. Esi dhotedhene dhinokosiha wi siku na Wubuwela Okwa wa Yezu nikale namakamaka mwa iyo!
3. Wubuwela Okwa wa Yezu onawiwananiha dhavi abali orugunuwa elabo yotene? (Koona vina foto.)
3 Kobuwela vina mukalelo onniwananiha Muttupo wa Wubuwela Okwa wa Yezu. Siku ntti nigafiya Anamoona a Yehova ali elabo yotene anotugumana nzuwa nigaddowelaga. Venevo ninowiwa diskursu entapulelamo ttima enna mukutto wa yobolo. Ninowiba jibo bili, ninovirihedhana pawu vina vinyu, omamalelowa ninologa “amen” mmalobeloni manayi ankosiwavo. Mwari mwa mawora 24, milogo dhotedhene dhinokosa dhakakene. Onowubuwela wagalala onkana Yehova vina Yezu agonaga nlogo naye nowiwananeya-wene amuttittimihaga na mukalelo obu?
Muttupo wa Wubuwela Okwa wa Yezu onowawiwananiha abali mwilaboni mwetemwene (Kang’ana ddima 3) f
4. Txini enasekeserhihu mwari mwa nsunzo ntti?
4 Mwari mwa nsunzo ntti ninele osekeserha dhowakula dha mavuzo aba: Ninawodhe dhavi ovisasanyedhela Muttupo wa Wubuwela Okwa wa Yezu? Ddinàkamihedhe dhavi ena opurelamo muttupo obu? Vina ninawodhe dhavi wakamihedha abale attiyile otugumana? Dhowakula dha mavuzo aba dhinele onikamihedha ovisasanyedhela muttupo obu.
NINAWODHE DHAVI OVISASANYEDHELA MUTTUPO WA WUBUWELA OKWA WA YEZU?
5. (a) Sabwaya jani enfwanyelihu otanalela ttima ya yobolo? (Masalmo 49:7, 8) (b) Txini esunziliwe na vidiyu Yezu Okwele Eni?
5 Mukalelo mmodha wa makamaka wa ovisasanyedhela Muttupo wa Wubuwela Okwa wa Yezu bwa otanalela ttima enna mukutto wa yobolo eniperhekeli Yezu Kristu. Iyo noka kanigawodhile oviwobola mwa ottega vina okwa. (Kengesa Masalmo 49:7, 8; vina koona vidiyu Yezu Okweli Eni?) a Nona Yehova okosa masasanyedho wi Yezu aperheke egumi yaye wi anivune. (Rom. 6:23) Oheli, Yehova vina Yezu ahikosa guru enddimuwa wi aniperhekele mukutto obu, venevo vandowihu nitanalelaga mukutto oniperhekeli Yehova vina Yezu otamalela wehu yobolo onowunuwa. Ninele wona dhilobo dhing’onovi dhikosile Yehova vina Yezu wi aperheke yobolo. Mbwenyi vamaromo ninfuna none, yobolo txini?
6. Txini entapulela yobolo?
6 Yobolo muttengo ompitxiwa wi eguliwena elobo wili. Mulobwana woroma, Adamu wattanddiwe wowakwanene. Muttegiliye iyene ohiyelela gari ya okalawo namukalakala, iyene vamodha na anaye otene agadhegewo. Wi agule wili ejile eyelele Adamu, Yezu operheka egumi yaye yowakwana ninga mukutto. Okalawo waye wetene velaboni ya vati, Yezu “kathegile-wene, mwano mwaye kamubudduwile dhawota.” (1 Ped. 2:22) Nona mudhidhi okwile Yezu egumi yaye yowakwana yannakwanela-wene egumi eyelele Adamu.—1 Kor. 15:45; 1 Tim. 2:6.
7. Dhoweha gani dhagumanilena Yezu bali velaboni ya vati?
7 Bali velaboni ya vati Yezu wannimwiwelela mowakwana-mwene Babe wa wirimu, masiki vagumaniyena dhorutxa dhottiyana-ttiyana. Bali mwana yanfuneya Yezu wawiwelela amambali aye ohakwana masiki iyene babaliwe wowakwana. (Lk. 2:51) Yezu ovilela odideliwa okosa dhilobo dhigamuttukuleli ohiwelela vina ottiya okala woweddeyana. Vina munuwile Yezu opemberha dhoweha dha Satana Ddiabo, vina dhoweha dhigamuttukuleli ottiya okalavi oweddeyana na Mulugu. (Mt. 4:1-11) Satana wahigana omuttegiha Yezu wila ahiwodhe opitxa yobolo.
8. Dhoweha gani dhina dhigumanilena Yezu?
8 Mudhidhi wakosa Yezu mabasa aye velaboni ya vati, dhipadduwa dhoweha dhina dhiswa. Ogumanana ofwarafwariwa vina egumi yaye yakala vangovini. (Lk. 4:28, 29; 13:31) Yahifuneya iyene owanana ohiligana wa anamafwara aye. (Mk. 9:33, 34) Mudhidhi wattongiwiye, iyene obubuddiwa vina oruwaniwa. Vasogorhova opiwa ninga timbwini n’ekalelo yowiwopa vaddiddi. (Aheb. 12:1-3) Iyene ovilela epaddi yomariha ya dhoweha dhaye se nibarelo na Yehova. b—Mt. 27:46.
9. Oniviwamo dhavi sabwa ya mukutto wa Yezu? (1 Pedro 1:8)
9 Txibarene, Yezu otabuwa venjene wi aperheke yobolo. Nigatanalela dhotedhene dhikosile Yezu wi aniperhekele yobolo, omukwela wehu onowunuwa.—Kengesa 1 Pedro 1:8.
10. Txini ekosile Yehova wi aniperhekele yobolo?
10 Kito Yehova? Ovileveli okosa eni wi Yezu awodhe opitxa muttengo wa yobolo? Yehova na Yezu bahi banna mandano ofiyedheya anna babi na mwanaye. (Gano 8:30) Ovano katanalela mukalelo oviwilemo Yehova amonaga mwanaye, agumanagana dhoweha dhinjidhene bali velaboni ya vati. Mohaganyedha, Yehova wahisuveya murima vaddiddi amonaga mwanaye atabutxiwaga, akoddiwaga vina agumanagana dhoweha.
11. Kavaha yotagiha enoniha mukalelo oviwilemo Yehova mudhidhi opiwe Yezu.
11 Mambali ddi mambali omuyelelile mwanaye mukwani onoziwa opa ondha sabwa ya omuyelela muttu mukwani. Nikana njeedhelo noliba na ovenyihiwa mukwani wa abale akwile, mbwenyi ejo kingomiha wiwa opa onewihu nigamuyelela muttu mukwani. Yotagiha eji enonikamihedha ononelamo wiwa opa okanile Yehova mmoneliye Mwanaye wokweleya atabuwaga vina okwa yaka ya 33 E.C. c—Mt. 3:17.
12. Txini enfwanyelihu okosa sumana dhing’onovi Muttupo ohinatti ofiya?
12 Ononamo dhavi oromana ovanene okosa matadelo a osunza mwaha wa yobolo va nsunzoni nawo nomwinya obe va webedhani wa ntakulu? Kalabihedha Guia de Pesquisa para Testemunhas de Jeová (akala na elogelo yawo ehikalawo) obe marhe meena a osunza wi ononelemo makaniya. d Ottiya ejo kafwara porogarama ya Wenegesa Malebo a Wubuwela Okwa wa Yezu enfwanyeya va Mabasa na Yeddelo Yehu ya Okristu—Nivuru na Mabasa a Matugumano. Vina siku na Muttupoya kudduwale wona porogarama ya Webedha wa Membesi. Iyo nigavisasanyedhela Muttupo obu ninele wakamihedha attu ena opurelamo vina muttupoyá.—Ezd. 7:10.
KÀKAMIHEDHE ENA OPURELAMO MUTTUPOYA
13. Elobo gani yoroma enfwanyelihu okosa wi nakamihedhe ena opurelamo Muttupo wa Wubuwela Okwa wa Yezu?
13 Ninawodhe dhavi wakamihedha attu ena opurelamo Muttupo wa Wubuwela Okwa wa Yezu? Ttarho yoroma, yamakamakayá ja wakonvidari. Ottiya bahi wakonvidari abale anafwanyihu mmabasani a olaleya enowodheya vina okosa lista na attu anfunehu wakonvidari. Enowodheya wakonvidari anamudhi ehu, akwehu a omabasani, a oskola na ena. Masiki akala kanina konvinti dhopidiwa dhinjidhene enowodheya wavahedhela link ya konvintiyá. Txino ninodhaga otikina na attu anadhe woona muttupoya!—Koh. 11:6.
14. Kavaha yotagiha enoniha ttima ya wakonvidari attu nanyene.
14 Niganvaha muttu konvinti nanyene wi adhe one muttupo, enodhaga omuttukulela iyene ofuna odha. Siku dhahi murogora oteliwe na mulobwana ohili Munamoona wa Yehova wahitikina mmoneliye mamunaye avisasanyedhaga wi adhowe one Muttupo. Watikinele nni? Sabwani dila dhinjidhene mundduni, iyene wahimukonvidari mbwenyi txipo waligi ahinatti odhowawo. Kito dila eji txini yapadduwile? “Iyene wahakela konvinti” yanvahile munddimuwa wa mmulogoni wamuziweyi pama. Mamunayeya wahona Muttupo yaka ejile vina mwa vyaka dhinjidhene musogorhomwa.
15. Txini enfwanyelihu okana muyubuweloni nigàkonvidari attu ena wi adhe one Muttupo?
15 Kudduwale wi abale anakonvidarihu, anodhaga okana mavuzo—makamaka akala muttuya kanattigi woona matugumano ehu. Egahikala yamalago otanalela mavuzoya abo vina ovisasanyedha wi nakule. (Kol. 4:6) Motagiha, ena txino anovivuza: ‘Okowa onkosiwa nni?’ ‘Matugumanoyá anagonele mudhidhi mungasi?’ ‘Okalawo mwabalelo onrumeeliwavo?’ ‘Onopitxiwa kobiri?’ ‘Onokosiwa sokela?’ Nigamukonvidarigi muttu wi adhe one Muttupo wa Wubuwela Okwa wa Yezu, enokala yapama onvuza dhahi, “Weyo ohikana nivuzo?” Omamalelowa nimutapulelemo mavuzo akosiliye obe elobo ehinonelemo iyene. Enowodheya vina olabihedha vidiyu Wubuwela Okwa wa Yezu vina Txini Enkosiwa va Numbani ya Omwene? wi nimukamihedhe muttuya ononelamo mukalelo onkosiwa matugumano ehu. Nsunzo 28 na nivuru Kajavo Egumi Yamukalakala! Muhikala ttarho dhamakamaka dhigafuneyile omutapulelamo muttuya.
16. Mavuzo gani txino andhaga okana attu anadhe wona Muttupo wa Wubuwela Okwa wa Yezu?
16 Attu alagihile efunelo, agamala wona Muttupo wa Wubuwela Okwa wa Yezu anodhaga okana mavuzo meena. Sabwaya jani attu ang’onovi (agakalawo) bajile pawu vina bamwile vinyu? Awene vina anodhaga ovivuza: Muttupoya onkosiwa dila ngasi vayakani? Anodhaga vina ovivuza, akala matugumano otene a Anamoona a Yehova ankosiwa na mukalelo wakakene. Masiki akala mavuzo meena ahakuliwa mu diskursuni ekosiwe va Muttuponi wa Wubuwela Okwa wa Yezu, attuya anodhaga ofuna ononelamo deretu dhilobo dhina. Artigu oli mu jw.org onna mutoma “A Ceia do Senhor Porque as Testemunhas de Jeová Celebram de Modo Diferente?” ononikamihedha wakula mavuzo awa. Ninfuna nikose dhetedhene dhinwodhihu Muttupoya ohinatti, ogakosiwaga vina ogavira—wi nakamihedhe abale attomeliwe egumi yamukalakala opurelamo Muttupoya.—Mer. 13:48.
WAKAMIHEDHA ATTIYILE OTUGUMANA
17. Anddimuwa a mmulogoni anawodhe dhavi wakamihedha abale attiyile otugumana? (Ezekiyel 34:12, 16)
17 Mwari mwa Muttupo wa Wubuwela Okwa wa Yezu, anddimuwa a mmulogoni anawodhe dhavi wakamihedha abale attiyile otugumana? Kàlagihe wi onowakwela. (Kengesa Ezekiyel 34:12, 16.) Muttupoya ohinatti kavilibihedhe waligarela enji anawodhe weyo. Kànonihedhemo wi onowakwela vina onofuna wavaha nikamihedho-nikamihedhovi ninafunani. Wakonvidari wi adhe one Muttupo wa Wubuwela Okwa wa Yezu. Akala anodha wamoyele na mada meeli. Muttupoya ogavira odhowegevi waligarelaga abali na arogora aba okweleya vina odhowegevi wavahaga nikamihedho nomuyani ninfunani wi amwiyelele Yehova.—1 Ped. 2:25.
18. Iyo notene ninawodhe dhavi wakamihedha abale attiyile otugumana? (Roma 12:10)
18 Otene mmulogoni anowodha wakamihedha abale attiyile otugumana, adhile woona Muttupo wa Wubuwela Okwa wa Yezu. Dhavi? Modhela waweddiha na okwela, opama vina na nriho. (Kengesa Roma 12:10.) Kobuwela wi mabila aba okweleya a Yehova txino anorutxiwa wiyelela otugumana. Txino awene anowova wi kanakeliwe deretu. e Nona orabele wakosa mavuzo anattukulele okumuwa vina okana manyazo. (1 Tes. 5:11) Abali aba na arogora amudhehu okweleya. Nona ninowagalala otugumana wili nawene!—Masal. 119:176; Mer. 20:35.
19. Dhopurelamo gani dhindha sabwa ya wubuwela okwa wa Yezu?
19 Ninotamalela vaddiddi sabwa ya Yezu onikokomeza wubuwela siku ntti namakamaka vaddiddi, vina iyo ninononelamo ttima enna Muttupo obu. Wona Mutupo obu ononipuriha vina enowapuriha ena na mikalelo dhinjidhene. (Iza. 48:17, 18) Omukwela wehu Yehova na Yezu onowunuwa. Ninolagiha otamalela wehu mwa esile dhinikoselani, ninowunuwiha wiwanana wehu na abalihu vamodha na arogora. Vina ninowakamihedha ena osunza na opurelamo mareliho anwodheya sabwa ya yobolo. Nona nikose dhotedhene dhinwodhihu wi nikale omala-nawale siku ntti namakamaka na vayakani—na Wubuwela Okwa wa Yezu!
NINAWODHE DHAVI . . .
-
ovisasanyedhela Muttupo wa Wubuwela Okwa wa Yezu?
-
wakamihedha ena opurelamo?
-
wakamihedha attiyile otugumana?
JIBO 18 Ninotamalela Yobolo
a Wi ofwanye mitoma vina mavidiyu alogiwe munsunzoni ntti katamela mu jw.org epaddi enloga opepesa.
b Koona artigu “Mavuzo Ankosa Anamengesa” Mwang’aneli wa Abrili 2021.
c Koona nivuru Achegue-se a Jeová, kapitulu 23, ddima 8-9.
d Koona Kasha “Monelo wa Mukalelo wa Opepesa.”
e Koona mafoto vina kasha “ Ddakeliwe Dhavi Mmulogoni?” Mbali ottiyile otugumana onokana manyazo afunaga ovolowa mu Nyumbani ya Omwene, mbwenyi masiki dhawene onovolowamo. Iyene onowakeliwa na okwela vina oli wohagalalene.
f FOTO: Oku epaddi yina ya elabo nlogo na Yehova nonaga Muttupo wa Wubuwela Okwa wa Yezu, dhipaddi dhina abali na arogora anosasanyedha Muttupo obu wa makamaka vaddiddi.
