1. ¿Kʼãrẽa jipade yibia Jesu beida jẽda kĩrãbeira? (Lucas 22:​19, 20).

 JEOWA pʉwʉrʉitara Jesu beida jẽda kĩrãbei ewaritrʉ audre yibia. Jesubara jarasi naʉ̃ ewaritrʉ abapai jẽda kĩrãbeibarata (akʉra Lucas 22:​19, 20). Dayirãbara maʉ̃ ewarira zemarẽã kãgapanʉ nekʼãrẽ bio kʼarea. Akʉdaya maʉ̃ranebemata ʉ̃kʉrʉta.

2. ¿Kʼãrẽa jõmaʉ̃ba jʉ̃ãpanʉ Jesu beida jẽda kĩrãbei ewari zemarẽã?

² Naʉ̃ ewarira jipade yibia kʼarebabʉ baera krĩchaita Jesu dayirãbari beidata. Adewara kʼarebabʉ krĩchaita iya maʉ̃ odadeba dayirãba kʼãrẽ nebia ũdubʉta (2 Cor. 5:​14, 15). Adewara kʼarebabʉ mebẽrãʉ̃me yi ũdubʉrʉde dayirãi so zarea diaita (Rom. 1:12). Poagaza jʉ̃ẽpanʉ Jeowa ode kʉrãzapanʉrata Jesu beida jẽda kĩrãbeita akʉza ãyidebema mejãchaʉba krĩchapanʉ jẽda Jeowama zeita. Maʉ̃ra mawũã opanʉ maʉ̃ ewaride ũdupanʉ baera mebẽrãba ãyaʼa kãga ũdubibʉta. Akʉza ẽbẽra mejãchaʉta jʉ̃ẽpanʉ Jesu beida jẽda kĩrãbeima, ãyira kĩrãmigabʉ maʉ̃ ewaride dayirãba kʼãrẽ opanʉ kʼarea. Maʉ̃ kʼarea audre kʼawuakĩrãpanʉ Jeowa ʉ̃rʉ. Naʉ̃ nekʼãrẽ jõmaʉ̃ kʼarea, jipade yibia Jesu beida jẽda kĩrãbeira.

3. ¿Jesu beida jẽda kĩrãbeiba sãwũã ãba babibʉ dayirãta? (Akʉra potota).

³ Akʉzade mejãcha sobiapanʉ naʉ̃ ewaridera mebẽrãbawara yi ũdui baera. Adewara Jeowa ʉ̃rʉ Kʼawuabipanʉrãbara naʉ̃ drʉa jõmaʉ̃mae odayi maʉ̃ra. Jõmaʉ̃ba ũrĩpanʉ diskurso aba jara ũrĩbibʉta Jesu dayirã kʼarea beidara kʼãrẽa yibiata. Adewara trãbita ũme trãpanʉ akʉza binota panʼʉ̃me dedekapanʉ. Mõbe maʉ̃ kʼarea yiwidʼi kimare opanʉ. Maʉ̃ tẽã soiduba amen apanʉ. Kongregasionʼra naʉ̃  drʉa jõmaʉ̃mae iyabaʉta odayi. Maʉ̃ ewaridera, Jeowara Jesuʉ̃mera mejãcha sobiapanañi, dayirã jõmaʉ̃ta ãbapanai baera ãyi ʉ̃rʉ ibia bedʼeaita.

4. ¿Kʼãrẽta kʼawuadai naʉ̃ artikulodera?

⁴ Naʉ̃ artikulode bedʼea ũbea kʼawuadayi. Nããra, kʼãrẽta odaibara dayirãbara Jesu beida jẽda kĩrãbei ewari zei nããra. Yi ũmeta, kʼãrẽta oseapanʉ wuabemara kʼarebaita. Yi ũbeata, sãwũã kʼarebaseapanʉ Jeowa ode kʉrãzabʉrasida maʉ̃ ewaride jʉ̃ẽnamarẽã. Naʉ̃ bedʼeara ʉ̃rʉ kʼawuaiba kʼarebayi dayirãba kʼawuaita kʼãrẽta oibarata naʉ̃ ewari zei nãã.

JESU BEIDA JẼDA KĨRÃBEI EWARI ZEI NÃÃRA KʼÃRẼTA OIBARA MAɄ̃ Ʉ̃RɄ KRĨCHAITA

5. (1) ¿Kãrẽa yibia krĩchaita Jesu dayirã kʼarea beida ʉ̃rʉ? (Salmos 49:​7, 8). (2) ¿Kʼãrẽa beisi Jesura? ¿Naʉ̃ bideodebara kʼãrẽta kʼawuapanʉ?

⁵ Jipade yibia naʉ̃ ewari ʉ̃rʉ krĩchaira, ũdupanʉ baera kʼãrẽaba yibiabasita Jesuta dayirã kʼarea beira. Iya naʉ̃ta oẽ basibʉrʉ dayirãkʉzara ẽdrʉbe ẽ bakasi kayiruadeba akʉza beideba (akʉra Salmo 49:​7, 8; akʉra bideo ¿Kʼãrẽa beisi Jesura?). a Maʉ̃ kʼarea Jeowabara iyi warrata zokʼa bʉesi dayirãbari beimarẽã. Jeowaba naʉ̃ kʼãwũã odara jipade nebia zroma bari diadabasi dayirã (Rom. 6:23). Dayirãba krĩchapanʉbʉrʉ Jeowaba Jesuʉ̃meba dayirã kʼarea kʼãrẽ oda ʉ̃rʉ, ũdudayi kʼãrẽaba yibiabasita ãya naʉ̃ odara. Akʉdayi kʼãrẽa yibiabasita Jeowaba Jesuʉ̃meba maʉ̃ta odamarẽã dayirãbari. Mamina nããra kʼawuadayi kʼãrẽa Jesura beibarabasita dayirãbari.

6. ¿Kʼãrẽa beisi Jesura?

⁶ Reskatebara jarakĩrãbʉ bʉa nei edakĩrãbʉ kʼarea plata pagabʉta. Adánʼra Jeowaba parãsidera kayirua okabasi. Mamina iya kayirua oda tẽãra aduasi ewari jõmaʉ̃nẽ bʼaita, naʉ̃ra iyi abapaiba adua ẽ basi, awuarabʉrʉ iyideba zebʉrabida aduasida. Adánba maʉ̃ nebia aduada jẽda erbaira Jesuba iyi bebʉta diasi. Akʉza iyi nama egorode basidera «iyira kayirua oẽ basi, akʉza sewa nebʉrʉ okabasi» (1 Ped. 2:22). Jesura kayirua okabasi Adán nãã bada kĩrãkʼa, maʉ̃ba Jesubara iyi bebʉdeba pagaseabasi Adánba aduada jẽda erbaita (1 Cor. 15:45; 1 Tim. 2:6).

7. ¿Jesu nama egorode basidera, kʼãrẽ bedʼea zromata ũdusi?

⁷ Jesu nama egorodebasidera ũdubisi ewari jõmaʉ̃nẽ okĩrãbʉta yi Zezeba jarabʉta. Iyi wiña yirasidera ũrĩbarabasi iyi yibarira nemita omiara bedʼeata, iyira nemitia okabasimina (Luc. 2:51). Iyi kʉ̃rabasidera zarea oibarabasi wuabemara ẽbẽrarãba obʉ kĩrãkʼa oẽ baita. Iyi yi zromabasidera zarea oibarabasi Diaruʼa yi sewabi ẽ baita, mawũã kʼẽrẽpa bʼaita Daizezeare (Mat. 4:​1-11). Diarubara badua jʉrʉbasi sãwũã oita Jesuba kayiruata omarẽã, mawũã Jesuba dayirãta ẽdrʉbi ẽ marẽã.

8. ¿Kʼãrẽ awuru bedʼea zromata awuantasi Jesubara?

⁸ Jesu nama egorodebasidera bedʼea zroma mejãcha ũdusi. Iyi nejʉraraba pẽwãpanasi beaita (Luc. 4:​28, 29; 13:31). Jesu kʼaidubemarãra kayirua omiarabasi, maʉ̃ba iyara zarea oibarabasi ãyiʉ̃me kĩrʉ ẽ baita (Mar. 9:​33, 34). Tẽã iyira mejãcha zʉbʉria oda kʼãrãpe beasida (Heb. 12:​1-3). Iyi mawũã zʉbʉria berabarisidera Jesubara dobaʉba awuantaibarabasi maʉ̃ra. Jeowaba iduaribisi iyita maʉ̃ne berabarimarẽã b (Mat. 27:46).

9. ¿Sãwũã sentipanʉ Jesuta dayirã kʼarea beisi baera? (1 Pedro 1:8).

 ⁹ Dayirã kayiruadeba ẽdrʉbita Jesura mejãcha zʉbʉria ũdusi. Dayirãba krĩchabʉrʉde Jesu dayirã kʼarea kãrẽaba zʉbʉriasita, naʉ̃ba kʼarebabʉ iyita audre kãga zeita (akʉra 1 Pedro 1:8).

10. ¿Kʼãrẽta oibarabasi Jeowaba dayirã ẽdrʉbita?

¹⁰ ¿Kʼãrẽta oibarabasi Jeowabara dayirãta kayiruadeba ẽdrʉbita? Jeowara Jesuʉ̃mera mejãcha yiya kãgapanasi (Prov. 8:30). Krĩchara Jeowa kãrẽaba sopʉa sentisita ũduside iyi warra nama egorode mejãcha zʉbʉria osidata. Maʉ̃nera iyira mejãcha sopʉasibaibara ũdusi baera yi warra sãwũã mejãcha zʉbʉria opanʉta akʉza jʉrapanʉta.

11. Yizata jara ũrĩbira kʼawuaita Jeowa sãwũã sentisita yi warra beasidade.

¹¹ Yibarira jõmaʉ̃ba kʼawuapanʉ kʼãrẽaba pʉta ãyi wũãwũãranebema aba aduaira. Dayirã jõmaʉ̃ba kʼawuapanʉ Jeowaba jẽda piradrʉbita beidarãra, mawũãsidu dayirã mebẽrãnebema beibʉrʉdera sopʉapanʉ. Naʉ̃ yizaba kʼarebabʉ dayirãba biʼia kʼawuaita Jeowa kãrẽaba sopʉa sentisita ũduside yi warra poaga 33de sãwũã beadapeadata c (Mat. 3:17).

12. ¿Jesu beida jẽda kĩrãbei nãã, kʼãrẽta oibara?

¹² Kʼãwũã wedaʉba dayirãbara zarea odaibara dobaʉba Daizeze Bedʼea akʉbʉde, mawũã ẽ bʉrʉ mebẽrãbawaraʉba Daizeze Bedʼea akʉbʉde estudiaita Jesu beida jẽda kĩrãbei ʉ̃rʉ bedʼeabʉta. Zokʼara Guía de estudio para los testigos de Jehová, mawũã ẽ bʉrʉ akʉra awuru kartara maʉ̃ ʉ̃rʉ bedʼeabʉta. d Akʉza Bʼaita Kristianora kĩrãkʼa akʉza Trajaita Daizezeita kartade akʉra kʼãrẽ testorata leita Jesu beida jẽda kĩrãbei ewaride. Akʉza Jesu beida jẽda kĩrãbei ewari zebʉrʉdera kĩrãduarãra akʉita programa Beteldebemaba jara ũrĩbibʉta. Dayirãba naʉ̃ jõma obʉbʉrʉ Jesu beida jẽda kĩrãbei ewari zei nãã, naʉ̃ba kʼarebayi dayirãba wuabemarata kʼarebamarẽã ãyabida abarika omarẽã (Esd. 7:10).

KʼAREBARA WUABEMARABIDA ŨDUMARẼÃ NEBIA BɄA ŨDUBɄTA

13. Wuabemara Jesu beida jẽda kĩrãbeideba kʼarebaira, ¿dayirãba kʼãrẽta oibara?

¹³ ¿Sãwũã kʼarebaseapanʉ awuru ẽbẽrarãbida nebiata ũdumarẽã Jesu beida jẽda  kĩrãbei ewaride? Nããra, dayirãba ãyira trʉ̃seabʉ jʉ̃ẽmarẽã maʉ̃ akʉde. Dayirãra deza deza wãpanʉ ẽbẽrarã trʉ̃ita Jesu beida jẽda kĩrãbeima jʉ̃ẽmarẽã. Mamina maʉ̃ daucha trʉ̃seapanʉ ẽbẽrarã dayirãba ũdukʼawuabʉta, dayirã neũdukʼawuarata, kolegiode ãba estudiabʉta akʉza trajode ãbabʉta. Mõbe ãyi trʉ̃ta bʉseabʉ kuadernone. Dayirãba karta Jesu beida jẽda kĩrãbeidebema mejãcha erbʉ ẽ mina, mensajede zokʼa bʉeseabʉ sama ũduseabʉta maʉ̃ karta internetʼne. Dayirãba maʉ̃ta obʉbʉrʉ ũdudayi naʉ̃ ewaridera ẽbẽra mejãchaʉta jʉ̃ẽita (Ecl. 11:6).

14. Yizadeba jara ũrĩbira kʼãrẽa yibiata ẽbẽrarã jaraita jʉ̃ẽmarẽã Jesu beida jẽda kĩrãbeita.

¹⁴ Bʉa ẽbẽrarã karta zake Jesu beida jẽda kĩrãbeidebemata juwade diara, maʉ̃ba kʼarebayi ẽbẽrarã audre jʉ̃ẽkĩrãmarẽã maʉ̃ ewaride. Ewari aba, mebẽã wẽrã kima Daizeze odebʉ ẽãta jʉ̃ẽsi Jesu beida jẽda kĩrãbei ewaride. Iya maʉ̃ ũdusidera kĩrãmigasi, iya dããrabadeba trʉ̃basi baera yi kima jʉ̃ẽmarẽã, mamina iyira jʉ̃ẽkabasi. Mawũẽra, ¿iyira kʼãrẽa jʉ̃ẽsi maʉ̃ ewaridera? Iya jarabʉ: «Mʉ̃aʼa diasida karta zake Jesu beida jẽda kĩrãbeidebemata juwade». Iya jara ũrĩbibʉ zõrãrã iya ũdukʼawuabʉba diasita maʉ̃ karta zaketa. Maʉ̃ba iyira jʉ̃ẽsi maʉ̃ poagade akʉza maʉ̃neba yẽta poagaza wãbʉ Jesu beida jẽda kĩrãbeita.

15. ¿Kʼãrẽ ʉ̃rʉ krĩchaibara ẽbẽrarã Jesu beida jẽda kĩrãbeima trʉ̃bʉrʉdera?

¹⁵ Kĩrãbedaibara dayirãba ẽbẽrarã jarabʉrʉde Jesu beida jẽda kĩrãbeima wãmarẽã maʉ̃nera ãyara bedʼea mejãcha widita, audre ãyita ãba yi jʉrebarima jʉ̃ẽkabʉrʉ. Maʉ̃ba jipade yibia dayirãba ãyi jarai nãã krĩchaita sãwũã panʉita dayirãʼa bedʼeata widira (Col. 4:6). Bari jaraita ẽbẽrarãbara naʉ̃ta widiseapanʉ: «¿Kʼãrẽta odai maʉ̃ ewaridera? ¿Kʼãrẽ ũmadaʉbayeda mama panai? ¿Sãwũã wua jʉ̃ibara? ¿Plata diaibaraka mainʉ jʉ̃ẽbʉrʉdera?». Dayirãba trʉ̃bʉdade ẽbẽrarãta Jesu beida jẽda kĩrãbeima jʉ̃ẽmarẽã, ãyaʼa jaraseapanʉ: «¿Bʉara erbʉka bedʼea daiʼa widikĩrãbʉta?». Maʉ̃ tẽã panʉseabʉ bedʼea iya dayirãʼa widibʉta.  Adewara dayirãba zokʼaseapanʉ naʉ̃ra bideota Kĩrãbedaya Jesu beidata akʉza ¿Kʼãrẽta opanʉ Jeowa ʉ̃rʉ Kʼawuabipanʉrãbara ãyi ãba yi jʉrebʉmaera? Naʉ̃ba kʼarebayi ãya bia ũrĩmarẽã sãwũãbʉta dayirã ãba yi jʉrebʉmaera. Akʉza Bʉra ewari jõmaʉ̃nẽ sobia basebʉ libroba yi 28debʉba kʼarebayi naʉ̃ ʉ̃rʉ audre kʼawuamarẽã.

16. ¿Kʼãrẽ ʉ̃rʉ widiseapanʉ ẽbẽrarã Jesu beida jẽda kĩrãbeima wãpanʉrabara?

¹⁶ Jesu beida jẽda kĩrãbebʉ jõna tẽãra ẽbẽrarãbara bedʼea mejãcha widiseabʉ. Ẽbẽrarãba widiseabʉ kʼãrẽa jõmaʉ̃ba ko ẽ basita panʼra akʉza binora, mawũã ẽ bʉrʉ widiseapanʉ kʼãrẽa ʉ̃kʉrʉ ẽbẽraba kosita akʉza dosita. Adewara widiseapanʉ dayirãba Jesu beidara badua jẽda kĩrãbebʉ kʼawuaita, mawũã ẽ bʉrʉ dayirã ãba yi jʉrebʉrʉdera ewari jõmaʉ̃nẽ iyaba kʼãwũã obʉ kʼawuaita. Mamina naʉ̃ra bedʼea ʉ̃rʉra Jesu beida jẽda kĩrãbebʉrʉ ewaride yi diskursode jara ũrĩbipanʉ, mawũãsidu ʉ̃kʉrʉ ẽbẽraba nesidadayi audre jara ũrĩbimarẽã. Dayirãba kʼarebaseapanʉ ẽbẽrarãba bedʼea widibʉ panʉira ũdubipanʉne jw.org de naʉ̃ artikulota: «¿Kʼãrẽa Jeowa ʉ̃rʉ Kʼawuabipanʉrãbara Jesu beidara awuara opanʉ wuabema religioraneira?». Naʉ̃ba kʼarebayi yi ẽbẽrarã wãrĩnu kʼawuakĩrãpanʉraba nebiata ũdumarẽã Jesu beida jẽda kĩrãbebʉdeba (Hech. 13:48).

KʼAREBARA YI JEOWA ODE KɄRÃZABɄRASIDA

17. ¿Zõrãrãbara sãwũã kʼarebaseapanʉ yi Jeowa ode kʉrãzapanʉrãra? (Ezequiel 34:​12, 16).

¹⁷ ¿Zõrãrãbara sãwũã kʼarebaseapanʉ mebẽrã Jeowa ode kʉrãzapanʉrasida Jesu beida jẽda kĩrãbei ewaride jʉ̃ẽmarẽã? Ãyi ʉ̃rʉ krĩchabʉta ũdubidaibara (akʉra Ezequiel 34:​12, 16). Jesu beida jẽda kĩrãbei nãã zõrãrãbara trʉ̃seapanʉ mebẽrã Jeowa ode kʉrãzapanʉrata. Ãyaʼa jara ũrĩbira bʉa ãyira kãgata akʉza ãyi ʉ̃rʉ krĩchabʉta. Mõbe trʉ̃ra Jesu beida jẽda kĩrãbeima jʉ̃ẽmarẽã. Maʉ̃ ewaride ãyita jʉ̃ẽra bia edara. Akʉza maʉ̃ berabarida tẽãbida ãyiʉ̃me bedʼeabara. Kʼarebara ãya kʼãrẽ nesidabʉde mawũã Jeowa kʼawa bʼaita (1 Ped. 2:25).

18. ¿Dayirã jõmaʉ̃ba, sãwũã kʼarebaseapanʉ mebẽrã Jeowa ode kʉrãzapanʉrãra? (Romanos 12:10).

 ¹⁸ Dayirã jõmaʉ̃ba kʼarebaseapanʉ mebẽrã Jeowa ode kʉrãzapanʉrasida jʉ̃ẽnamarẽã Jesu beida jẽda kĩrãbeima. ¿Sãwũã? Ãyaʼa kãgata ũdubiseapanʉ, bia edaseapanʉ akʉza wawiata ũdubiseapanʉ (akʉra Romanos 12:10). Kĩrãbedaibara naʉ̃ra mebẽrãitara zareabasita kʼãwũã jẽda ãba yi jʉreira. Ãyira perabasibaibara wuabemaraba ãyi ʉ̃rʉ kʼãrẽ jarai kʼarea. e Maʉ̃ba zarea odaibara ãyaʼa bedʼea widibʉrʉde mitia sentibi ẽ baita (1 Tes. 5:11). Ãyira dayirã mebẽrã, maʉ̃ba mejãcha sobiapanʉ akʉza jẽda ãbaʉba odai baera Jeowaba kãgabʉta (Sal. 119:176; Hech. 20:35).

19. ¿Kʼãrẽ nebiata ũdupanʉ Jesu beida jẽda kĩrãbeideba?

¹⁹ Jipade biga diapanʉ Jesuba jarasi baera iyi beida ewarita jẽda kĩrãbedamarẽã. Maʉ̃ba jipade yibia bia ũrĩta kʼãrẽa kĩrãbeita maʉ̃ ewarita. Mawũã opanʉbʉrʉ dayirã jõmaʉ̃ba nebiata ũdudayi (Is. 48:​17, 18). Adewara dayirã Jesu beida jẽda kĩrãbeima wãbʉrʉdera dayirãba Jeowata akʉza Jesu kãgabʉra audre waribʉ. Akʉza ãyaʼa biga diapanʉ dayirãbari kʼãrẽ oda kʼarea. Adewara dayirã mebẽrãʉ̃me audre ãbapanʉ. Akʉza dayirãbara kʼarebaseapanʉ awuru ẽbẽrarãbida ũdumarẽã nebia dayirãba ũdubʉta Jesu dayirã kʼarea beidadeba. Maʉ̃ba zarea odaibara kʼawuaita kʼãrẽta oita maʉ̃ ewari bia zebʉrʉde wãita.