1. ˈMën ˗kë ˈö ˗zo ˗bo ˈwlaan˗ yi ˈdhö ˗dhɛkpaɔyi do ˗wɔngbɩɩsü ˈka ˗kwɛ ˈˈpɛpɛ ˈgü? (Dhukö 22:​19,20)

 ZOOVA ˗dhɔkëmɛn ˗nu ˗bha ˈgü, Klito ˗bha ga ˗zo ˗bo ˈwlaan˗ ˈö bhë ˗dhɛkpaɔyi ˗wɔngbɩɩsü ˗mü ˗kwɛ ˈˈpɛpɛ ˈka. ˈWlaan˗ dosɛnŋ ˈö˗ pö ö ˗bha gwëëˈˈ ˗nu ˗dhɛ ˗wa kë ˈyö bhë. (Dhukö 22:​19, 20 ˗wo pö.) Pë ꞊va ˈnën˗ ˗wɔn ˈgü, ˈkwa kwa ˈˈɲan to ˗zo ˗bo ˈwlaan˗ ˗gɔ. ˗Kwaa ˈbha ˗nu ˗ga.

2. ˈMën ˗kë ˈkwa kwa ˈˈɲan ˗to ˗zo ˗bo ˈwlaan˗ ˗gɔ?

² ˗Zo ˗bo ˈwlaan˗ ˗yö kwa ˗takun ˈkwa kwa ˗zota ˗gɔtadhɔpë ꞊bhlëë ˗bha ˈkpii˗ ˗sü ˗wɔn ˈgü. ˗Yö kwa ˗zo ˗bo pë ˗nu ˈkwa dho ˗an kë kö ˈkwa˗ ˗zɔn ꞊dhɛ kwa Yesu ˈˈnuɛ ˗bho ˗a ˗bha ˈˈsaa˗ ˗wɔn ˈgü, ˗an ˈka. (2 Ko. 5:​14, 15) ˗Ya ˗kë ˈzü ˈö kwaa kwa ꞊dhegblü ˗nu «ˈkwa kwa ˈko ˗nu faan dɔ.» (Wlɔ. 1:12) ˗Kwɛ ˈˈpɛpɛ ˈka, kwa ꞊dhegblü ꞊vadhɛ ˈö ˗an ˗kɔ ˗ya ꞊zɔɔ ˗wo ˗nu ˗a ˗ta. ˈDhɛ ˗kë ꞊dhɛ kwa kwa ˗kɔ ˗ya ˗an ˗gɔ ˈˈwowosü ˈka bhë, ˗a mɛn ˈbha ˗nu ˗wo wo ꞊yɛɛ˗ ˗kë Zoova ˈˈpiʋ̈. Mɛn ˈbha ˗nu ˗de ˈpö pë ˈwo˗ man waa pë ˈwo ˗kpan ˗a ˗bha, ˗ya ˗kë ˈwo ˗wɩ Biblö draanˈˈ ˗sü ˗bha. Pë ˗nu ˈwo ˈˈdhʋ̈ ˗wa ˗kë ˈö ˗zo ˗bo ˈwlaan˗ ꞊bhlëë ˗yö ˗kë ˈkpii˗ ꞊dedewo kwa ˗gɔ!

3. ˗Zo ˗bo ˈwlaan˗ ˗yö ˗kwaa kwa ꞊dhegblü ˗nu ˈwo ˈˈkpɔnŋtaadhɛ ˈˈpɛpɛ ˈgü kwa ˗kɔ ˗kë ˈwɔn do ˗bha ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

³ Kwa ˈˈɲan ˗yö ˗zo ˗bo ˈwlaan˗ ˗gɔ, ˈyö sü ꞊dhɛ ˗ya ˗kë ˈö kwaa kwa ꞊dhegblü ˗nu ˈwo ˈˈkpɔnŋtaadhɛ ˗todhʋ̈sü ˈgü bhë kwa ˗kɔ ˗yö ˗kë ˈwɔn do ˗bha. Zoova ˗bha ꞊Gbɛkiö ˗nu ˗wo ˗dho wo ˈkwëë˗ ˈˈsɛ ˈˈpɛpɛ ˈgü kö ˈˈɲaan˗ ˗yö ˗puö ˗ni ˈgü. Mɛn ˈˈpɛpɛ kwa kwa ˈˈtʋ ˗to ˈˈdhɛɛtadhiaŋ˗ ˈö ˗gɔtadhɔpë ˗wɔn ˗bha ˗kë ˈˈgbɩɩ˗ ˗sü ˗zɔn kwa ˗dhɛ, ˗a ˗bha. Kwa ˈˈtan ꞊plɛ ˈwo ˗Zlan ˈtɔ bhɔ ˗an ˗bho, ˈkwa ˈbluu˗ waa we ˗an ˗ʒiö, ˈkwa˗ pö «˗yö kë ˈˈdhʋ̈» ˗gɛnɲan ˈka ˗yiishiö bhɛɛwo ˗nu ˈˈdhiʋ̈tadhɛ ˈgü. ˈˈLɛlɛ 24 ˈˈpiʋ̈,  kö ˗zlanwokɔdhi ˈˈpɛpɛ ˗wa wo bho ˗a ˗kë ˈˈdhʋ̈ ˗sü ˈka. Zoova waa Yesu ˗wa kwa yö kö ˈkwa ˈdho kwa ˈkwëë˗ kwa ˗an ꞊bhlëë ˗ya ˗ni ˈgü ꞊dhɛ ˗kɔ ˈö bhë ˗a ˈdhö ˗an zuʋ̈ˈˈ ˈˈgblü ˈö dho dhi, ˗kwa kwa ˗zota ˗a ˈgü.

4. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

⁴ ˈWɔn ˗gɔ ˈö yö ˗a ˈgü, dhɛɛˈˈ ˗nu ˈwo yö kwa ˗dho ˗an ˗yɔ bɔ. Kwa ˗dho kwa zuʋ̈ˈˈ baaˈˈ ˗kɔ ˗kë ꞊dhɛ ˗zo ˗bo ˈwlaan˗ ˗bha? Kwa ˗dho mɛn ˈˈwɛɛ ˗nu ˗takun ˗kɔ ˗kë ꞊dhɛ kö ˗wo ˈwɔn ˗së ꞊slɔɔ ˗a ˈgü? ˗Ya ˈgo mü, ˗kɔ ˗mɛɛn ˈkwa dho mɛn ˗nu ˈö ˗an ˗kɔ ˗ya ꞊zɔɔ ˗an ˗takun ˗a ˈka? Dhɛɛˈˈ ˗nu ˈwo bhë ˗an ˗yɔ ˗nu ˗dho kwa ˗takun kö ˈkwa kë baasü ˈka ꞊bhlëëwɔn ˈkpii˗ ˈö ˈˈdhʋ̈ ˗a ˗bha.

KWA ˗DHO KWA ZUƲ̈ˈˈ BAAˈˈ ˗KƆ ˗KË ꞊DHƐ ˗ZO ˗BO ˈWLAAN˗ ˗BHA?

5. (1) ˈMën ˗kë ˈö kwa dua ˈdhö ˗mü kö ˈkwa kwa ˗zota ˗gɔtadhɔpë ꞊bhlëë ˈgü? (Psaume 49:​7, 8) (2) ˗Gleŋ ˗mɛɛn ˈka˗ sü video ˈö˗ ˗gɔ ˗kë ˗Mën ˈö ˗kë ˈö Yesu ˗yö ga ˈka bhë, ˗a ˈgü?

⁵ Kwa zuʋ̈ˈˈ baaˈˈ ˗kɔ ˗së ꞊dede ˈö ˈdhö ˈyö ˗tɔ ˗zota Yesu ˗bha ˗gɔtadhɔ ˈˈsaa˗ ꞊bhlëë ˈgü ˗sü. Pë ˈbha ˈkwa ˗mɔn ˗a kë ˗sü ˗bha kö ˈwɔn yaa waa ga ˗wo ˈgo kwa ˗bha ˈyaa ˈdhö. (Psaume 49:​7,8 ˗wo pö; kpɔɔˈˈ video ˈMën -kë ˈö Yesu -yö ga? ˗bha.) a ˗A ˗wɔn ˈgü, Zoova ˗yö Yesu ˗bɔ kö ˗yö ö ˗bha ˗tosɛta nu kö ˈkwa dha. ˗Kɔ ˈwo˗ ˗bha ꞊plɛ ˈˈsaa˗ ˈkpii˗ ꞊dede ˈnën ˈwo˗ bho. (Wlɔ. 6:23) ˈKwa kwa ˗zota pë ˈö Zoova waa Yesu ˈwo˗ nu kwa ˗wɔn ˈgü, ˗gɔtadhɔpë ꞊bhlëë ˗yö ˗kë ˈkpii˗ kwa ˈˈɲan ˈˈdhiʋ̈. Pë ˈˈgbɩɩ˗ ˗nu ˈö Zoova waa Yesu ˈwo ˗an ˗kë kö ˈwo kwa ˗gɔtadhɔ bhë, ˗kwaa ˈbha ˗nu ˗ga. ˗A züdɔdhɛ ˈgü, ˈmën ˗tɔ ˗gɔtadhɔpë?

6. ˈMën ˗tɔ ˗gɔtadhɔpë?

⁶ ˗Gɔtadhɔpë ˈnën ˗tɔ pë ˈbha ˈwo˗ ꞊shiö ˗a sɔnŋ ˗bho ˗a ˈka ˗pë. Mɛn ˗blɛɛsü ˈö ˗Zlan ˗ya ˗da ˈwo˗ ˗dhɛ Adan bhë, ˗yö ˗kun ˈˈslʋ̈ʋ̈slʋ̈. ˈDhɛ ˈwɔn yaa ˗kë ˗tosɛta ˈö ˈyaa ɲën ˗yö ˗dha ˗a ˗gɔ, ˈö dha ˈpö ˗a suugünën ꞊gban ˈˈpɛpɛ ˗gɔ. Yesu ˗yö ö ˗bha ˗tosɛta ˗nu ˈˈsaapë ˈka kë ˈˈdhʋ̈ kö pë ˈö dha Adan ˗gɔ bhë, ˈkwa˗ ꞊slɔɔ. Yesu ˗bha ˗tosɛta ˈˈpɛpɛ ˈgü ˈˈsɛ ˗ta yö, ‹ˈyii ˈwɔn yaa gbɛ˗ kë, ˈˈɛɛn ꞊sua ˗dhiang do ˗zian ˈyii ˗wo ˗a ˈˈdhi ˗ta.› (1 Piɛ. 2:22) ˈˈTʋ̈ŋ ˈö Yesu ˗yö ga bhë ˗a ˈgü, kö ˗a ˗bha ˗tosɛta ˗yö kë ˗sü ˈka ꞊dedewo ꞊dhɛ ˗a ˗dhɛ ˈö dha Adan ˗gɔ ˗a dhö.—1 Ko. 15:45; 1 Tim. 2:6.

7. ˈGüdandhe ˗mɛɛn ˗nu ˈö Yesu ˗yö bɔ ˗an ˈgü ˈˈsɛ ˗ta yö?

⁷ ˈKö ˗kë ꞊dhɛ ˈwɔn ˈˈgbɩɩ˗ ꞊va ˗wo ˗nu Yesu ˗ta, ˗yö ˈwɔnman ˈö Dë ˈö dhaŋ˗ ˈgü bhë ˗a ˗ta ˗kplawo. Yesu ˗yö ˗kun ˈnen ˈˈslʋ̈ʋ̈slʋ̈ ˈka, ˈˈkɛɛ ˗a mɛn ˗nu ˗zë ˈwɔn yaa kë ˗dhii ˗kun ˗an ˗bha. ˈKö ˗kë ˈˈdhʋ̈, ˗yö ö ˗gɔ ˗dho ˗an ˗dhɛ ˈˈshia ˗kplawo. (Dhu. 2:51) ˗A ˈbha ˗ya kë kö ˈdhɛ kun wlüünën ˈka, mɛn ˈbha ˗nu ˗wo ˈˈgbɩɩdhɛ ˗wɔ ˗a ˗ta kö ˈya ˗dho ˈwɔnman ö ˗mɛn ˗nu ɛɛnˈˈ Zoova ˗ta. ˈDhɛ Yesu ˗yö ˗kë mɛn ˗zogbansü ˈka Sɔtraan Dügɔmɛn ˗yö ˗nu ˗a ˗gɔ vɛɛdhö kö ˈö˗ ˈˈkan ˗Zlan ˗bha, ˈˈkɛɛ Yesu ˗yö ˗gban ˗a ˗gɔ. (Mat. 4:​1-11) Sɔtraan ˗kun pë ˈˈpɛpɛ kë ˗ni ˈgü kö ˈö Yesu ˗blü ˈwɔnyaakësü ˗bha, kö ˗a ˗kɔ ˗yö ˈkun kwa ˗gɔ ˗ta ˈdhɔ ˗sü ˈka.

8. ˈWɔn ˈˈgbɩɩ˗ ˈbha ˗nu ˗mɛɛn ˈwo ˗nu Yesu ˗ta kö ˗yö ˈˈsɛ ˗ta yö?

⁸ Kö Yesu ˗yö ˗zlanwopö ˗ni ˈgü ˈˈsɛ ˗ta yö, ˈgüdandhe ꞊va ˗nu ˗a ˗ta. ˗A ˈyɔɔ˗ ˗nu ˗wa ˈˈklʋʋbhɔ ˈwo kun ˗a ˈˈpiʋ̈ kö ˈwo˗ zë ˗ʒiaanwo. (Dhu. 4:​28, 29; 13:31) ˈKö ˗kë ꞊dhɛ ˈwɔn yaa kë ˗dhii ˗yö ˗kun ˗a ˗bha gwëëˈˈ ˗nu ˗bha, ˗yö pë ˈˈpɛpɛ kë kö waa˗ ˗nu ˈwo kë ˈwo ˈkwëë˗. (Mak. 9:​33, 34) ˈˈTʋ̈ŋ ˈwo dho ˗a zë ˈka bhë ˗a ˈgü, ˗wa ˗wëë ˗kë ˗wo ˈwo ˗wɛɛ dɔ ˗a ˗bha. ˈDhɛ ˈgo mü ˗wo pë ˈˈdhiʋ̈˗ ꞊dede ˗kë ˗a ˈka, ˈwo˗ zë ꞊dhɛ ˈwɔnyaakëmɛn ˈdhö. (Ebl. 12:​1-3) ˗A ˗bha ˗tosɛta ˈˈdhiʋ̈todhɛ ˈgü kö ˈwɔn ˈˈgbɩɩ˗ ˗nu ˗wo  nu ˗ni ˈgü ˗a ˗ta, Zoova ˗yö ö ˗kɔ ˗bho ˈgü. b—Mat. 27:46.

9. Yesu ˗bha kwa ˗gɔ ˗ta ˈdhɔ ˗sü ˗wɔn ˈgü, kwa ˗kë kwa ˗de ˈgü ꞊dhɛ? (1 Piɛdhö 1:8)

⁹ Gagade ˈka, Yesu ˗yö saanˈˈ ꞊dede ˗sü kö ˈö kwa ˗gɔ ˗ta ˈdhɔ. ˈKwa kwa ˗zota ˈwɔn ˈˈgbɩɩ˗ ˈˈpɛpɛ ˈö Yesu ˗yö bɔ ˗a ˈgü kwa ˈwɔn ˈgü bhë ˗a ˈgü, ˗a ˗dhɔ ˈö kwa ˈgü ˈyaa ˗dadhiʋ̈ ˗ee?—1 Piɛdhö 1:8 ˗wo pö.

10. Yesu ˗bha kwa ˗gɔ ˗ta ˈdhɔ ˗sü ˗yö ˗pa Zoova ˈka ˗kɔ ˗kë ꞊dhɛ?

¹⁰ ˈYö Zoova ˗zë ꞊wɛ? ˗Mën ˈö˗ nu kö ˈö kwa ˗gɔ ˗ta ˈdhɔ? Zoova waa Yesu ˗an ˗bha ˗mlɛɛn ˗kun ˈyɔ ˗sü ˈka ꞊dedewo ꞊dhɛ ˈnën waa ˈö dë ˗an ˈdhö. (Prov. 8:30) Zoova ˗ya Yesu yö kö ˗yö bɔ ˗ni ˈgü ˈwɔn ˈˈgbɩɩ˗ ˗nu ˈgü ˈˈsɛ ˗ta yö, ˗kɔ ˈö ˗kë ö ˗de ˈgü ˈya ˗a ˈka, ˗kwa kwa ˗zota ˗a ˈgü. ˈDhɛ Zoova ˗yö ˗kpan ö Gbö ˗bha kö ˗wa ˗wëë ˗kë ˗wo ˗ni ˈgü, kö ˗wa wo ˗kɔ bho ˗a ˗wɔn ˈgü ˗wo ˈwɔn ˈˈgbɩɩ˗ wɔ ˗ni ˈgü ˗a ˗ta, ˈyaa za ˈgü ꞊dhɛ ˗yö ˗mën ˗a ˈka ꞊dedewo.

11. ˈDhɛ ˈwo Yesu zë ˗kɔ ˈö Zoova ˗kë ˗a ˈka ˈö ˗de ˈgü bhë, ˈwɔnzuan ˗mɛɛn ˈö kwa ˗takun ˗a ˈgüman ˗sü ˗bha?

¹¹ ˈNënmɛn ˈˈpɛpɛ ˈö˗ ˗bha ˈnen ˗wɔn ˗ya kë, zuʋ̈ˈˈ ˈˈklʋʋbhɔdhe ˈö˗ ˈgü ˗ya ˗dɔ. ˈKö ˗kë ꞊dhɛ kwa kwa ˗zoyö ˗go ga ˈgü ˗sü ˗dhɛ, kwa dhɔɔbhaamɛn ˗wɔn ˗ya kë ˗yö kwa zuʋ̈ˈˈ ˈˈklʋʋbhɔ ˗kplawo. ˈWɔnzuan ˈö bhë ˗yö kwa ˗takun kö ˗kɔ ˈö Zoova ˗yö ˗kë ˗a ˈka ˈö ˗de ˈgü ˗kwɛ 33 K.Y. ˗a ˈgü, ˈkwa˗ dɔ. Yi ˈö ˈˈdhʋ̈ ˗a ˈka, ˗wa Gbö dhɔɔbhaasü ˗wëë ˗kë ˗wo, ˈwo˗ zë. c—Mat. 3:17.

12. ˗Zo ˗bo ˈwlaan˗ ˈˈtʋ̈ŋ ˈgü, ˗mën ˈö ˈkwa ꞊mɔɔn˗ ˗bha kö ˈkwa˗ kë?

¹² ˈÖ go ꞊dɛɛ ˗bha ˈö ˗dho ˈö yö ˗a ˈka ˗zo ˗bo ˈwlaan˗ yi ˗bha, ˗kwaa ˈˈslö mɛɛnˈˈ kö ˈwɔn ˈö ˗gban ˗gɔtadhɔpë ˗bha ˈkwa˗ draanˈˈ kwa ˗de ˈˈpiʋ̈ ɛɛnˈˈ kwa ˗bha ˈkɔdhigümɛn ˗nu ˈˈpiʋ̈. Kwa ꞊mɔɔn˗ ˗bha ˈkwa ˗wo Guide de recherche pour les Témoins de Jéhovah ɛɛnˈˈ kwa ˗bha ˈsëëdhɛ ˈbha ˗nu ˈwo ˗gɔtadhɔpë ˗wɔn ˗blɛɛ ˗an ˈgü, ˗an ˗bha. d ˗Kwa ˈto kwa ˗bha ˗zo ˗bo ˈwlaan˗ ˗bha Biblö ˈˈɲan ˗nu ˗wopösü ploglamö ˈˈpiʋ̈ Kwa ˗bha ˗kë Kletiɛn ˈka ˗sü waa kwa ˗bha ˗zlanwopö ˗yö ˈsëëdhɛ ˈgü. ˗Ya ˈgo mü, kwa ˗zo ˈya ˗dho bhɔ ˗zo ˗bo ˈwlaan˗ yi dhiapiʋ̈ ˗bhɔkwëë ˗ga ˗sü ˈka. ˈKwa kwa zuʋ̈ˈˈ baaˈˈ ˗zo ˗bo ˈwlaan˗ ˗bha, kwa ˗dho ˗mɔn mɛn ˈˈwɛɛ ˗nu ˗takun ˗sü ˗bha ˈpö kö ˗wa ꞊trɔɔn yö.—Esd. 7:10.

 ˗KWA MƐN ˈˈWƐƐ ˗NU ˗TAKUN KÖ ˗WO ˗ZO ˗BO ˈWLAAN˗ ꞊TRƆƆN ꞊SLƆƆ?

13. Pë ˗blɛɛsü ˈkwa dho ˗a kë kö ˈkwa mɛn ˈˈwɛɛ ˗nu ˗takun ˗zo ˗bo ˈwlaan˗ ꞊trɔɔn ꞊slɔɔ ˗sü ˗bha ˈnën ˗tɔ ˗mën?

¹³ Kwa ˗dho mɛn ˈˈwɛɛ ˗nu ˗takun ˗kɔ ˗kë ꞊dhɛ kö ˗wo ˗zo ˗bo ˈwlaan˗ ꞊trɔɔn ꞊slɔɔ? Pë ˗blɛɛsü ˈkwa dho ˗a kë ˈyö ˗tɔ ˗an ˗dhɛ ˗a ˗ta ˗sü. Mɛn ˗nu ˈkwa dho ˗an ˗dhɛ kwa ꞊mɔɔn˗ ˗bha ˈkwa ˗an ˈtɔ ˗ya. ˗Wo ꞊mɔɔn˗ ˗bha ˈwo ˗kë kwa ˗bha ˈkɔdhigümɛn ˗nu, kwa yökëyɔɔ ˗nu, kwa ˈˈtɛɛbɔ ˗nu ˈwo ꞊klaŋplöö ɛɛnˈˈ mɛn ˈˈwɛɛ ˈbha ˗nu ˈka. ˈKö ˗kë ꞊dhɛ mɛn ˗dhɛ ˗a ˈka ˈsëëdhɛ ˈyaa kwa ˗gɔ ꞊va, kwa ꞊mɔɔn˗ ˗bha ˈkwa ˗an ˗dhɛ parɛ ˗ta. Mɛn ˗nu ˈwo dho ˗nu ˗a ˈwɔn ꞊mɔɔn˗ ˗bha ˈö kwa ˈkun.—Eccl. 11:6.

14. ˈWɔnzuan ˗mɛɛn ˈö˗ ˗zɔn ꞊dhɛ kwa ꞊dede ˈkwa mɛn ˗dhɛ ˗a ˈka ˈsëëdhɛ nu mɛn ˈbha ˗dhɛ ˗ya ꞊faanmën?

¹⁴ Kwa ꞊dede ˈkwa mɛn ˗dhɛ ˗a ˈka ˈsëëdhɛ ˗nu mɛn ˗nu ˗dhɛ ˗yö ˗dho ˗an ꞊faanmën ꞊dedewo ˈwo nu. Kwa ꞊dhegblüdhe do ˈö ꞊gɔɔn ˈyaa Zoova ˗bha ꞊Gbɛkiö ˈka, ˗dhɛ ˈö˗ ꞊gɔɔn ˗ya pö ˗a ˗dhɛ ö ˗dho ʒiö ˗a ˈˈpiʋ̈ kö ˈwo ˈdho ˗zo ˗bo ˈwlaan˗ ˗ta, ˗a ˈwɔn ˗ya ˗kun ꞊dedewo. ˈMën ˗kë? ˈYö sü ꞊dhɛ ˈˈdhiʋ̈ ˗be ˗ya ö ꞊gɔɔn ˗dhɛ ˗zo ˗bo ˈwlaan˗ ˗ta ˗gɛnɲan ˈka ꞊va, ˈyaa ˈˈwɩ ˈdho ˗sü ˗bha. ˈYö ˈmën ˗kë ˈˈsa ˈö dho ˈö ˗wɩ ˗a ˗bha? ˗A ꞊gɔɔn ˗ya ˗pö: «Mɛn zii do ˈö n ˗dɔmɛn ˈka ˈnën mɛn ˗dhɛ ˗a ˈka ˈsëëdhɛ nu n ˗dhɛ.» ˗Zo ˗bo ˈwlaan˗ ˈö kun ˗kwɛ ˈö bhë ˗a ˈka ˗a ꞊gɔɔn ˗yö ˗dho ˗a ˗ta ˈö ꞊taabha ˈö dho ˗a ˈˈwɛɛ ˈbha ˗nu ˗ta ˗kwɛ ꞊va ˈˈpiʋ̈.

15. Kwa mɛn ˗nu ˗dhɛ ˗ni ˈgü ˗zo ˗bo ˈwlaan˗ ˗ta, ˈmën kwa ˗zo ˈti ˗dho bhɔ ˗a ˈka?

¹⁵ Kwa ˗zo ˈya ˗dho bhɔ ꞊dhɛ mɛn ˗nu ˈö ˈkwa ˗an ˗dhɛ ˗zo ˗bo ˈwlaan˗ ˗ta bhë, ˗ya ˗kë ꞊dhɛ ˗an ˗bha nu ˗sü ˗blɛɛsü mü kö dhɛɛˈˈ ꞊va ˗yö ˗an ˗gɔ kö ˗wa kpɔ. ˈDhɛ ˈˈdhʋ̈, ˗yö ˗dho kë ˗së kö dhɛɛˈˈ ˗nu ˈwo dho ˗an ˈkpɔ kwa ˗gɔ waa ˗a ˗yɔ ˗nu ˈkwa kwa ˗zota ˗an ˈgü. (Kodh. 4:6) ˗A ˈwɔnzuan ˈnen ˗tɔ mɛn ˈbha ꞊mɔɔn˗ ˗bha ˈö˗ pö: ‹ˈMɛn ˈkwa dho ˗kë ˈwlaan˗ ˈö bhë ˗a ˗ta?› ‹ˈˈTʋ̈ŋ ˗dhɛ ˈkwa dho a kë ˗mü?› ‹Sɔ ˗mɛɛn ˈkwa dho ˗a ˗da?› ‹ˈWëëbhodhe ˗yö mü ˗ee?› ˈKwa mɛn ˈbha ˗dhɛ ˗zo ˗bo ˈwlaan˗ ˗ta, kwa ꞊mɔɔn˗ ˗bha ˈkwa˗ pö ˗a ˗dhɛ: «Ü ˗bha dhɛɛˈˈ ˈbha ˗nu ˗wo ˗dhö ee?» Dhɛɛˈˈ ˗nu ˗wa kë ˗a gɔ, ˗kwa ˗an ˗daakë. Kwa ꞊mɔɔn˗ ˗bha ˈkwa bɔ video ˗nu  Yesu ˗bha ga ˗zo ˗bo ˈwlaan˗ waa ˗Mën ˈwo˗ ˗kë ˗Bhɔkwëëkëgükɔ ˗nu ˈgü? ˗an ˗ta. ˗Kwaa ˗takun kö ˗kɔ ˈö ˈkwa ˗bhɔkwëë ˗nu ˗kë ˗a ˈka, ˗ya dɔ. ˈSëëdhɛ ˗be Zuʋ̈gblüdhi ꞊slɔɔ ˗toëpö ˈka! ˈwɔn ˗gɔ 28 ˗yö ˈwɔn ˗së ˗nu ˈö kwa dho ˗an ˗takun ˗a ˈka ˗an ˗zɔn kwa ˗dhɛ.

16. Mɛn ˗nu ˈwo ˗nu ˗zo ˗bo ˈwlaan˗ ˗ta bhë, dhɛɛˈˈ ˗mɛɛn ˗nu ˈwo ꞊mɔɔn˗ ˗bha kö ˗wa ˈkpɔ?

¹⁶ ˗Zo ˗bo ˈwlaan˗ ˗ya ɲën, mɛn ˗nu ˈö ˗an ˗bha ˗nu ˗sü ˗blɛɛsü ˈdho ˗mü bhë, dhɛɛˈˈ ꞊va ꞊mɔɔn˗ ˗bha ˈö ˗kë ˗an ˗gɔ. ˗Wo ꞊mɔɔn˗ ˗bha ˈwo˗ pö ꞊dhɛ ˈmën ˗kë ˈö mɛn ˗nu ˈwo ˗zo ˗bo ˈwlaan˗ ˗pë ˗bhö ˈwaa˗ ꞊va. Ɛɛnˈˈ ˈmën ˗kë mɛn ˈbha ˈti˗ ˗bhö? ˗Wo ꞊mɔɔn˗ ˗bha ˈzü ˈwo kwa dhɛɛˈˈ kpɔ ꞊dhɛ kwa ˗zo ˗bo ˈwlaan˗ ˗kë ˗gɛnɲan ˈka ꞊dhɛ? ˗Wo ꞊mɔɔn˗ ˗bha ˈwo kwa dhɛɛˈˈ ˈkpɔ ꞊dhɛ Zoova ˗bha ꞊Gbɛkiö ˗nu ˗bha ˗bhɔkwëë ˈˈpɛpɛ kë ˗kɔ ˗yö do ˗ee? ˈKö ˗kë ꞊dhɛ ˈwɔn ˗nu ˈwo ˈˈdhʋ̈ kwa˗ ꞊vadhɛ ˗man ˗zo ˗bo ˈwlaan˗ ˈˈdhɛɛtadhiaŋ˗ ˈgü, mɛn ꞊dɛɛ ˗nu ˗bhawɔn ˗yö ˗a ˈbha ˈgüman ˗sü ˗bha. ˈWɔn ˗gɔ ˈö ˗kë « Pourquoi les Témoins de Jéhovah célèbrent-ils le Repas du Seigneur différemment des autres religions ? » ˈka ˈö Jw.org ˗ta bhë, ˗yö ꞊mɔɔn˗ ˗bha ˈö kwa ˗takun ˈkwa˗ ˗bha dhɛɛˈˈ ˗nu ˗yɔ bɔ. Kwa˗ ˈˈpiʋ̈ kö ˈkwa pë ˈˈpɛpɛ kë kö kwa ˗zo ˗bo ˈwlaan˗ yi ˈto ˈˈdhiʋ̈, ɛɛnˈˈ ˗a yi ꞊dede ˈka ɛɛnˈˈ ˈzü ˈkwa kwa bo ˗a kë ˗sü ˈka ˈkwa mɛn ˗nu ˗takun kö ˗wa ꞊trɔɔn yö.—Këw. 13:48.

MƐN ˗NU ˈÖ ˗AN ˗KƆ ˗YA ꞊ZƆƆ ˗KWA ˗AN ˗TAKUN

17. Mɛn zii ˗nu ˗dho mɛn ˗nu ˈö ˗an ˗kɔ ˗ya ꞊zɔɔ ˗an ˗takun ˗kɔ ˗kë ꞊dhɛ? (Ézéchiel 34:​12, 16.)

¹⁷ ˗Zo ˗bo ˈwlaan˗ ˈˈtʋ̈ŋ ˈgü, mɛn zii ˗nu ˗dho mɛn ˈö ˗an ˗kɔ ˗ya ꞊zɔɔ bhë ˗an ˗takun ˗kɔ ˗kë ꞊dhɛ? Mɛn zii ˗nu dua ˗mü kö ˗wo wo ˗zokë ˗an ˈˈpiʋ̈ ˗dhɔ ˈgü. (Ézéchiel 34:​12, 16 ˗wo pö) ˈˈSanni ˗zo ˗bo ˈwlaan˗ yi ˗yö ˗lo, ka pë ˈˈpɛpɛ kë kö ˈka ˗wo ˗a mɛn ꞊vadhɛ ˗dhɛ ɛɛnˈˈ ˈka ˗an ˗dhɛ. ˗Kaa pö ˗an ˗dhɛ ꞊dhɛ ˗an ˗wɔn ˗yö ka ˗gɔ ˈˈgbɩɩ˗, ka˗ ˈˈpiʋ̈ ˈka ˗an ˗takun ˗kɔ ˈö dho dhi ˗an ˗dhɛ ˗a ˈka. ˗Ka ˗an ˗dhɛ ˗zo ˗bo ˈwlaan˗ ˗ta. ˗Wa nu ˗ka ka ˗kɔ ˗ya ˗an ˗gɔ ˈˈwowosü ˈka. ˗Zo ˗bo ˈwlaan˗ ˗ya ɲën, kwa ꞊dhegblü dhɔɔbhaasü ˗nu ˈwo ˈˈdhʋ̈ ˗ka ˗wo ˗an ˗dhɛ  ɛɛnˈˈ ˗ka ˗an ˗dhɛ ˗kplawo. ˗Ya ˈgo mü, ˗ka ˗an ˗takun kö ˗wo wo ꞊yɛɛ˗ kë Zoova ˈˈpiʋ̈.—1 Piɛ. 2:25.

18. Mɛn ˈˈpɛpɛ kwa ˗dho mɛn ˗nu ˈö ˗an ˗kɔ ˗ya ꞊zɔɔ ˗an ˗takun ˗kɔ ˗kë ꞊dhɛ? (Wlɔmö 12:10)

¹⁸ ˗Zlanwokɔdhigümɛn ˗nu ˈˈpɛpɛ ꞊mɔɔn˗ ˗bha kö ˗wo mɛn ˗nu ˈö ˗an ˗kɔ ˗ya ꞊zɔɔ ˈˈkɛɛ ˈwo nu ˗zo ˗bo ˈwlaan˗ ˗ta bhë, ˗an ˗takun. ˗Kɔ ˗kë ꞊dhɛ? ˗An dua ˗mü kö ˗wo ˗dhɔ ˗zɔn ˗an ˗dhɛ, ˗wo ˈˈgblüsë kë ˗an ˈka, ˗ya ˈgo mü ˗wo ˗an ꞊bhlëë ˗ya. (Wlɔmö 12:10. ˗Wo pö.) Kwa zo ˈya ˗dho bhɔ ꞊dhɛ kwa ꞊dhegblü dhɔɔbhaasü ˗nu ˈwo bhë, ˗an ˗bha ˗yɛ ˈzü ˗sü kö ˗wo nu ˗bhɔkwëë ˗ta ˈyaa ˈˈplëëplë ˗an ˗kɔa. ˗A ˈbha ˗ya kë kö ˗kɔ ˈkwa dho kwa ˗kɔ ˗ya ˗a ˈka ˗an ˗gɔ, ˗a ˈˈsuʋ̈ ˗yö ˗an ˗bha. e ˈDhɛ ˈˈdhʋ̈, ˈkwa ˗dho dhɛɛˈˈ ˗nu ˈwo dho ˗an ˈˈtʋ̈ŋ ˈsü ˗an ˈkpɔ, ɛɛnˈˈ ˈkwa ˗dho ˈwɔn ˈbha blɛɛˈˈ ˈö mën ˗an ˈka. (1 Tes. 5:11) Kwa ꞊dhegblü ˗nu ˈwo bhë, kwaa˗ ˗nu kwa ˗bha ˗zoyödhe ˗yö do. Zoova ˗dhɔkë ˗an ˈˈpiʋ̈ ˗sü ˈzü ˗yö kwa zuʋ̈ˈˈ ꞊nii ˗da!—Ps. 119:176; Këw. 20:35.

19. ꞊Trɔɔn ˗mɛɛn ˈö go ˗zo ˗bo Yesu ˗bha ga ˈka ˗sü ˈgü?

¹⁹ ˗A pö ˈö Yesu ˗ya wo ꞊dhɛ ˈkwa ö ˗bha ga ˗zo ˗bo ˈwlaan˗ kë ˗kwɛ ˈˈpɛpɛ ˈka bhë, ˈkwa˗ ˈˈnuɛ ˗bho ˗a ˗bha ˈö ˈkwa˗ yö ˈzü ꞊dhɛ ˗a ˗wɔn ˗yö ˈˈgbɩɩ˗. ˈKwa ˈdho ˈwlaan˗ ˈö bhë ˗a ˗ta, kwaa mɛn ˈˈwɛɛ ˗nu kwa˗ ꞊trɔɔn ꞊va ꞊slɔɔ. (Is. 48:​17, 18) Zoova waa Yesu ˗an ˗dhɔ ˈö kwa ˈgü ˗yö ˗dadhiʋ̈ ˈö ˈkwa ˗an ˈˈnuɛ bho pë ˈwo˗ ˗kë kwa ˗dhɛ ˗a ˗bha. Kwa ˗ɲɔɔn kwa ꞊dhegblü ˗nu ˈˈsuee ˈö ˈkwa ˗mɔn mɛn ˈˈwɛɛ ˗nu ˗takun ˗sü ˗bha kö ˈwɔn ˗së ˗nu ˈwo go ˗gɔtadhɔpë ˈgü ˗wo ˗an dɔ. Kwa pë ˈˈpɛpɛ kë kö ˈkwa kë baasü ˈka ˗zo ˗bo ˈwlaan˗ ˈö ˗kwɛ ˈö yö˗ ˈka bhë, ˗a ˗bha. ˗Dhɛkpaɔyi ˗wɔngbɩɩsü ꞊dede ˗mü.