1. Pine nemene matre Drai Ne Amekunën la drai ka nyipiewekë catr ngöne la macatre? (Luka 22:​19, 20)

 AME kowe la itre Temoë Iehova, ke ketre drai ka nyipiewekë catre ngöne la macatre, la Drai Ne Amekunëne la meci Keriso. Eje hi lai drai hnei Iesu hna upe la itretre drei nyidrë troa atrun. (E jë la Luka 22:​19, 20.) Nyimutre la itre kepine matre easa lapa treqene la Drai Ne Amekunën. Tro sa ce ithanatane lai.

2. Nemene la itre kepin matre easa lapa treqene la Drai Ne Amekunën?

² Drai Ne Amekunën la ka xatua së troa lapa mekun la enyipiewekëne la thupene mel. Kolo fe a amekunë së la itre aqane tro sa olene kowe la mel hnei Iesu hna huujën. (2 Kor. 5:​14, 15) Nge, ketre ijine lai tro sa “itö ithuecatrekeu” memine la itre trejin. (Rom. 1:​12) E nöjei macatre, alanyim la itre trejin ka nanazij ka hane sine la drai cili. Nge pine laka hna kepe angatre hnyawa, matre bëeke hmaca itre xan koi Iehova. Ketre, hna ketr la itre xan hnene la hnei angatr hna öhn me drenge ngöne la heji cili, matre alanyim la ka nyiqane ini Tusi Hmitrötr. Celë hi matre, ka nyipiewekë catre koi së la Drai Ne Amekunën!

3. Kola acasi së tune kaa hnene la Drai Ne Amekunën? (Wange ju fe la iatr.)

³ Pane mekune jë la aqane cas la nöje i Akötresie ngöne la ijine Drai Ne Amekunën. Ame la kola lö la jö, itre Temoë Iehova ngöne la fen asë a itronyi ngöne la isa hnë hmi angatr, matre atrune la Drai Ne Amekunën. Casi hi la cainöj hna cile fë, ka amamane la enyipiewekëne la thupene mel. Easë asë a thinge la lue nyima, me tro fë la waina me falawa,  nge thupene la foa lao thith, easa isa qeje “amen.” Ame ngöne la 24 lao hawa, itre ekalesia ne la fen asë a xötrethenge la tulu celë. Kola mama la casi së ngöne la ijine cili. Drei jë kö la madrine i Iehova me Iesu, la nyidroti a öhne lai!

4. Nemene la itre hnyinge hne së hna troa sa ngöne la tane mekune celë?

⁴ Ame ngöne la tane mekune celë, tro sa sa la köni hnying: Tune kaa la aqane tro sa hnëkëne la hni së kowe la Drai Ne Amekunën? Tune kaa la aqane tro sa xatuane la itre xan troa kepe thangan la drai cili? Tune kaa la aqane tro sa xatuane la itre trejin ka nanazij? Tro la itre mekun ka sa la itre hnyinge celë, a xatua së troa hnëkë hnyawa kowe la heji cili ka nyipiewekë catr.

HNËKËNE JË LA HNI EPUN KOWE LA DRAI NE AMEKUNËN

5. (a) Pine nemene matre loi e tro sa lapa mekune la enyipiewekëne la thupene mel? (Salamo 49:​7, 8) (b) Nemene la ini hnei epun hna xome qa ngöne la video Hnauëne La Iesu a Mec?

⁵ Ame la ketre aqane tro sa hnëkëne la hni së kowe la Drai Ne Amekunën, ke ene la troa lapa mekune la enyipiewekëne la mel hna huujëne hnei Iesu Keriso. Pëkö nyine tro sa kuca matre sipu amele së qa ngöne la ngazo me mec. (E jë la Salamo 49:​7, 8; wange ju fe la video Hnauëne La Iesu a Mec?) a Matre hnei Iehova hna upi Iesu troa meci pi së. Nge tha ewekë ka hmaloi kö lai koi nyidroti asë. (Rom. 6:​23) Maine tro sa lapa mekun la hnei Iehova me Iesu hna kuca koi së, tro hë së lai a hetre hni ne ole kowe la thupene mel. Tro sa ce wange la itre hnei Iehova me Iesu hna kuca, matre troa hetre thupene mel. Ngo tro sa pane ce wange la aliene la thupene mel.

6. Pine nemene matre thupene mel, la mele hnei Iesu hna huujën?

⁶ Ame la mel hna huujën hnei Iesu, ke celë hi thupene hnei Iehova hna hamën matre itöne hmaca la mel hnei Adramu hna aluzin. Ka pexeje Adramu, lo kola xupi angeic. Pine laka, hnei angeic hna ena la Wathebo, matre tha ijiji angeice hmaca kö troa mele epine palua, ketre tune fe la itre matra i angeic. Hnei Iesu hna huujëne la mele i nyidrëti ka pexej, matre itöne la mel hnei Adramu hna aluzin. Ame lo Iesu e celë fen, “pëkö ngazo i nyidrë, nge goi pë fe trenge iaö hnine la që i nyidrë.” (1 Pet. 2:​22) Matre, ame la Iesu a mec, ka ihmeku la mele i nyidrë memine lo mele hnei Adramu hna aluzin.​—1 Kor. 15:45; 1 Tim. 2:6.

7. Nemene la itre jole hnei Iesu hna ixelë memin e celë fen?

⁷ Hnei Iesu palahi hna drengethenge Iehova, ngacama tru catre la itre jol hnei nyidrëti hna ixelë memine e celë fen. Ngacama atr ka pexeje nyidrë, ngo ame lo nyidrëti a nekönatr, hnei nyidrëti palahi hna drengethenge la kem me thine i nyidrë ka tha pexeje kö. (Luka 2:​51) Maine jë ame lo nyidrëti a jeune, hnei nyidrëti fe hna ixelë memine la itre atr ka uku nyidrë troa tha idrei koi kem me thin me koi Iehova. Nge ame hë lo nyidrëti a thupëtresij, hnei Satana hna tupathi nyidrë me thel troa thë la aqane imelekeu i nyidrë me Akötresie. (Mat. 4:​1-​11) Hnei Satana hna isine troa akeinyi Iesu matre tha tro kö a hetre thupene mel.

8. Nemene la itre xaa jol hnei Iesu hna cile kow?

⁸ Ame lo Iesu a cainöj, ke hnei nyidrëti mina fe hna ixelë memine la itre xaa jol. Hnene la itre ithupëjia hna axösisi nyidrë me thel troa humuthi nyidrë. (Luka 4:​ 28, 29; 13:31) Hnei nyidrëti fe hna xomihnine la itre tria ne la itretre dreng. (Mar. 9:​33, 34) Qëmekene tro nyidrëti a mec, hnene la itre atr hna hnyimasai nyidrë me axösisi nyidrë. Nge hna humuthi nyidrë tune la ketre atr ka ngazo, nge tru catr la akötre i nyidrë. (Heb. 12:​1-3) Ketre, hnei Iehova hna nue nyidrë troa thue casine la jole tixenuë i nyidrë. b​—Mat. 27:46.

9. Tune kaa epun la epun lapa mekun la hnei Iesu hna kuca koi së? (1 Peteru 1:8)

⁹ Tru catr la akötre i Iesu lo nyidrëti a hamëne la thupene mel. Ame la easa lapa mekune la itre hnei Iesu hna kuca koi së, hapeu, tha kolo kö lai a akökötrene la ihnimi së koi nyidrë?​—E jë la 1 Peteru 1:8.

10. Tune kaa fe Iehova la Iesu a hamëne la thupene mel?

¹⁰ Nge tune kaa fe Iehova la Iesu a huujëne la mele i nyidrë? Ka ketrepengöne kö la aqane imelekeu i Iehova me Iesu, hune la itre xaa kem me nekön. (Ite edomë 8:​30) Pane mekune jë la aliene hni Nyidrë, la Iesu a cile kowe la wenge itupath. Akötre catre koi Nyidrë la kola axösisin me xele ma wang la nekö i Nyidrë.

11. Qaja jë la ketre ceitune ka aijijë së troa trotrohnine la aliene hni Iehova la kola mec hnei Iesu.

¹¹ Atre catre la itre keme me thin ka hetre nekönatr ka mec, la etrune la akötre cili. Ngacama easa mejiune kowe la melehmaca, ngo tha patre kö la akötre the së, la kola mec la ketre sinee së. Matre trotrohnine hi së la aliene hni Iehova la Nyidrëti a öhne la nekö hnimina i Nyidrë a akötr, me mec lo macatre 33 M.K. c​—Mat. 3:​17.

12. Nemene la nyine tro epuni a kuca qane enehila uti hë la Drai Ne Amekunën?

¹² Qane enehila uti hë la Drai Ne Amekunën, thele jë troa atre hnyawa la aliene la thupene mele ngöne la epuni a ini Tusi cas maine hmi ne la fami. Huliwane jë la Nyine Thele Mekune Ne La Itretre Anyipici Iehova (e hetreny ngöne la qene hlapa i epun) maine itre xaa itusi së nyine ithel matre atrepengöne hnyawa la aliene la thupene mel. d Ketre, isine jë troa goeëne la porogaram ne e Tusi Hmitrötr göne la Drai Ne Amekunën ka mama ngöne la Mel Me Huliwa Ne Cainöj Ne La Keresiano​—Pepa Nyine Huliwan. Nge ame ngöne la Drai Ne Amekunën, goeëne jë la Hmi Ne  Hmakany hna hnëkën kowe la drai cili. Maine ase hë epun hnëkëne hnyawan la hni epun kowe la drai cili, ijiji epuni hë troa xatuane la itre xan troa hane sine la drai cili.​—Ezera 7:​10.

XATUANE JË LA ITRE XAN

13. Nemene la nyine tro sa pane kuca matre tro la itre xan a sine la Drai Ne Amekunën?

¹³ Tune kaa la aqane tro sa xatuane la itre xan troa sine la Drai Ne Amekunën? Loi e troa pane hë angatr kowe la drai cili. Easa hëne la itre atr ngöne la easa cainöj trootro, ngo nyipiewekë fe tro sa kuca la ketre liste ne la itre atr hne së hna pi hën. Tune la itre fami së, me sine huliwa, me sine ini me itre xaa atr ju kö hne së hna atre. Maine pëhë pepa ne ihë i epun, ke iupi fë jë la lien jëne telefon. Tro së lai a sesëkötr la etrune la itre atr ka traqa!​—Ate cai. 11:6.

14. Qaja jë la ketre hna melën ka amamane la enyipiewekën troa hëne la itre atr hne së hna atre.

¹⁴ The cile kö troa hëne la ketre atr hnei epuni hna atre. Hane hi la hna melëne hnene la ketre trejin föe laka, tha ka hmi kö la föi eahlo. Ame lo ketre drai, önine la föi eahlo ka hape, tro nyidrëti a ce tro me eahlo kowe la Drai Ne Amekunën. Sesëkötre pi kö eahlo, ke ekö hë eahlo hë nyidrë, ngo tha pi traqa kö nyidrë. Hnauëne laka saze mekune pi nyidrë? Öni nyidrë, hnene la ketre qatre thup hnei nyidrëti hna atre, hna hamë nyidrë la pepa ne ihë. Hnei nyidrëti hna hane sine la Drai Ne Amekunëne ngöne la macatre cili, me ngöne la itre xaa macatre e thupen.

15. Tune kaa la itre atr hne së hna hën kowe la Drai Ne Amekunën?

¹⁵ Maine jë, hetre hnyinge ne la itre atr hne së hna hën, ke angatr petre hi a xötrei sine la itre icasikeu i easë. Matre nyipiewekë tro sa hnëkë troa sa koi angatr. (Kol. 4:6) Maine jë tro la itre xan a hnyinge ka hape: ‘Ka tune kaa la icasikeu cili?’ ‘Ije hawa ne icasikeu?’ ‘Troa heetre tune kaa?’ ‘Tro kö a nyithupene la easa lö?’ ‘Kolo kö a tro fë itrapetr?’ Ame la epuni a hëne la ketre atr kowe la Drai Ne Amekunën, ke hnyingë angeice jë ka hape, “Hetre hnyinge i eö kö?” Nge, sa hnyawane jë la itre  hnyinge i angeic. Huliwane jë la lue video hna hape, Amekunëne Jë La Meci Iesu me Ka Tune Kaa La Itre Icasikeu Hun? matre amamane koi angeic la aqane trongene la itre icasikeu së. Nge loi e tro mina fe a ce wange me angeic la mekene 28 ne la itus Gojenyi Kowe La Nyipi Mel!

16. Nemene jë la itre xaa hnying ne la atr ka xötrei sine la Drai Ne Amekunën?

¹⁶ Maine jë thupene la Drai Ne Amekunën, hetre hnying ne la atr hne së hna hën. Tro angeic a hnyingëne la kepine matre co hi maine pëkö ka xome la falawa me waina. Maine aija atrune së la Drai Ne Amekunën ngöne la macatre, nge ka ceitu kö memine la itre xaa icasikeu. Eje hi, ase hë qaja la itre mekune cili ngöne la cainöj hna cile fë. Ngo loi e tro sa qaja la itre xaa ithuemacany kowe la atr ka xötrei traqa. Tro epuni a öhnyi ixatua ngöne la tane mekun hna hape, “Pourquoi les Témoins de Jéhovah célèbrent-ils le Repas du Seigneur différemment des autres religions ?” ngöne jw.org. Easa isine troa xatuane la “itre ka hmalahnine” qëmeken, me ngöne la ijine Drai Ne Amekunën me e thupen, matre tro angatr a kepe thangane qa ngön.​—Itre hu. 13:48.

XATUANE JË LA ITRE TREJIN KA NANAZIJ

17. Tro la itre qatre thup a xatuane tune kaa la itre trejin ka nanazij? (Ezekiela 34:​12, 16)

¹⁷ Maine epun la ketre qatre thup, tro epuni a xatuane tune kaa la itre trejin ka nanazij ngöne la ijine Drai Ne Amekunën? Amamane jë ka hape, tru la ihnimi epun koi angatr. (E jë la Ezekiela 34:​12, 16.) Qëmeken la Drai Ne Amekunën, isine jë troa hëne la itre trejin ka nanazij. Qaja jë koi angatr ka hape, ka tru angatr koi epun, nge aja i epun troa xatua angatr. Hë angatre jë troa hane sine la Drai Ne Amekunën. E traqa pi hë angatr, ke kepe angatre hnyawa jë. Thupene la Drai Ne Amekunën, catre jë wai angatr me hë angatr, nge xatua angatre jë troa bëeke hmaca koi Iehova.​—1 Pet. 2:​25.

18. Tune kaa la aqane tro së isa ala cas a xatuane la itre trejin ka nanazij? (Roma 12:10)

¹⁸ Ijiji easë asë hi troa xatuane la ketre  trejin ka nanazij ka traqa troa sine la Drai Ne Amekunën. Tune kaa? Loi e tro sa hnim me metrötrë angeic me kepe angeice hnyawa. (E jë la Roma 12:10.) Maine jë, hnei angeic hna pane luelu qëmekene troa sine hmaca la icasikeu. Ma angeice jë a xou wanga tha kepe angeic hnyawa ju. e Haawe, the hnyinge menu kö, maine qaja menune koilo wanga akötrë angeice jë. (1 Thes. 5:​11) Ame la itre trejin ka nanazij, ke ka sine palahi angatr la fami së. Tha nyine qaja kö la madrine së la angatr hmaca a ce nyihlue i Iehova me easë!​—Sal. 119:176; Itre hu. 20:35.

19. Nemene la itre thangane ka loi hne së hna troa kapa, e tro sa atrune la drai ne meci Iesu?

¹⁹ Nemene la thangan hne së hna kapa la easa sine la Drai Ne Amekunën e nöjei macatre? Ame la easa sine la Drai Ne Amekunën, ke nyine loi koi së, nge ijine lai tro sa xatua itre xan. (Is. 48:​17, 18) Ame ngöne la ijine cili, easë fe a acatrene la ihnimi së koi Iehova me Iesu. Ketre, easa amamane la hni ne ole së kowe la itre hnei nyidroti hna kuca koi së. Nge easa acatrene la aqane imelekeu së memine la itre trejin ne la ekalesia. Ma tro fe sa madrine troa xatua ketre troa hane atre la aqane troa kepe thangan qa ngöne la thupene mel. Haawe, isine jë troa hnëkë hnyawa kowe la Drai Ne Amekunën, drai ka sisitria ne la macatre!