1. Saide a Membeefesa na a moo pelensipali dei fu a yali? (Lukasi 22:19, 20)

 A MEMBEEFESA na a moo pelensipali dei fu yali gi a foluku fu Yehofa. Neen na a wan enkii sani di Yesesi taigi den bakaman fi en taki den mu du ala yuu. (Leisi Lukasi 22:19, 20.) A omen sani de fu saide we go na a Membeefesa. Meke u luku wantu fu den sani ya.

2. Saide u lobi a Membeefesa?

² A Membeefesa e meke u pakisei saide a dede di Yesesi kon dede giw pelensipali. Ai meke u pakisei den belesi di wo fende tu. Boiti dati, ai yeepi u fu teke a dede di Yesesi kon dede giw fu bigi (2 Kor. 5:14, 15). Te u go na a Membeefesa, we fende a okasi fu giw baala anga sisa ‘taanga-sikin’ (Rom. 1:12). Ala yali, a omen baala anga sisa di nai peleiki moo e kon na a Membeefesa. Son wan fu den e daai kon a Yehofa baka te den si fa den baala anga sisa bali wadaa gi den. A omen sama di kon na a Membeefesa e bigin sutudeli Beibel te den si fa sani be de na a komakandaa. A fu ala den sani ya meke u lobi a Membeefesa.

3. San ala baala anga sisa e du te a dei fu a Membeefesa doo? (Luku a fowtow tu.)

³ We piisii te a dei fu a Membeefesa doo, bika a ná a kemeente fu u wawan e holi a Membeefesa, ma na ala se fu goontapu a fesa ya e holi. We aliki wan lezing di e soi saide a dede fu Yesesi pelensipali. We singi tu singi fu gafa Yehofa. Den e tyai a beele anga a win pasa na ala sama fesi. Boiti dati, we begi fo leisi a dei de, da ala sama e taki  amen anga den hii ati. Aini wan sani fu 24 yuu langa ala den kemeente a hii goontapu e du aseefi sani. Pakisei fa Yehofa anga Yesesi e fii te we kon makandaa fu gi den gaandi na a fasi ya.

4. San wo luku aini a artikel ya?

⁴ Aini a artikel ya, wo poti pakisei a den akisi ya: Faw sa seeka wi ati gi a Membeefesa? Faw sa yeepi taawan fu fende wini fu a fesa ya? Faw sa yeepi den baala anga sisa fu u di nai peleiki moo? Den piki fu den akisi ya o yeepi u fu de seekaseeka gi a Membeefesa.

FAW SA SEEKA WI ATI GI A MEMBEEFESA?

5. (a) Saide u mu teke ten pakisei san a dede fu Yesesi wani taki? (Psalm 49:7, 8) (b) Sai leli fu a felon di den e kai Saide Yesesi be mu dede?

⁵ Wan fu den moo pelensipali fasi faw sa seeka wi ati gi a Membeefesa, a te we pakisei san a dede fu Yesesi wani taki. Wa be o poi du nawan sani fu fii useefi fu sondu anga dede. (Leisi Psalm 49:7, 8; luku a felon tu di den e kai Saide Yesesi be mu dede?) a Yehofa meke Yesesi gi en libi fu fii u. A wan gaan sani den du giw (Rom. 6:23). Moo we teke ten pakisei san Yehofa anga Yesesi du giw, moo wo teke a sani di den du giw fu bigi. Meke u luku wantu fu den sani di Yehofa anga Yesesi be de kabakaba fu du giw winsi fa aa be makiliki. Ma fosi u luku den sani ya, wo luku fosi san a dede fu Yesesi wani taki.

6. Saide Yesesi be mu dede giw?

⁶ Di Gadu be meke Adan aa be abi sondu, neen meke a be o libi fu teego, aa be o dede. Di a sondu, á neen wawan a tyai dede gi, ma a tyai dede gi den bakapikin fi en tu. A leti enke u be abi wan gaan paiman fu pai. Yesesi pai a paiman ya di a dede giw. Di Yesesi be de a goontapu, ‘aa du nawan sondu. Aa koli sama wan dei tu’ (1 Peit. 2:22). A pisiten di Yesesi dede, a libi fi en be de aseefi enke a libi di Adan lasi.​—1 Kor. 15:45; 1 Tim. 2:6.

7. San a wantu tesi di be miti Yesesi di a be de a goontapu?

⁷ Di Yesesi be de a goontapu, a be e aliki Yehofa ala yuu winsi fa aa be makiliki gi en. Di a be yonkuu a be e aliki en mma anga en dda winsi fa den be abi sondu (Luk. 2:51). Di a kon moo bigi a be abi fu dwengi enseefi fu aliki en mma anga en dda ete. A be abi fu dwengi enseefi tu fu aa du sani di á bun. Di a toon gaansama Saatan Didibii seefi be kon tesi en (Mat. 4:1-11). Saatan du ala san be poi fu meke Yesesi sondu, bika a be sabi taki efu Yesesi be sondu, aa be o poi pai fu sondu giw moo.

8. San a wantu taa tesi di be miti Yesesi?

⁸ A omen taa tesi miti Yesesi di a be bigin anga a peleikiwooko a goontapu ya. Den feyanti fi en be e du omen ogii anga en. Den be wani kii en tu (Luk. 4:28, 29; 13:31). Boiti dati, a omen fowtu den bakaman fi en be e meke (Malik. 9:33, 34). Di den tyai en go a kuutu, den lei gi en. A omen taa ogii den du anga en. Bakadati, den kii en a wan ogii-ati fasi. A wan gaan sen sani den du anga en di den sipikii en a wan ponsu (Heb. 12:1-3). Di a be de fu dede, Yehofa á be kibii en moo. A be e fii en enke neen wawan be de. b​—Mat. 27:46.

9. Fa ye fii tei pakisei a dede di Yesesi dede giw? (1 Peitilisi 1:8)

 ⁹ Den sani ya e soi taki ná pikin sani be miti Yesesi di a be mu dede giw. Tei luku den sani di miti en, da ye si kiin taki anga en hii ati a du a sani ya giw. Tei pakisei a sani di Yesesi du giw, da fa a sani ya e meke i fii?​—Leisi 1 Peitilisi 1:8.

10. Fa Yehofa be e fii te a be si den sani di be e miti Yesesi?

¹⁰ Fa sani be de gi Yehofa di Yesesi be mu dede? Yehofa be lobi Yesesi moo enke fa wan dda lobi en boi. A Yesesi na a sama di a moo lobi (Odo 8:30). Pakisei fa a be e fii di a be e si fa sama be e du ogii anga Yesesi di a be de a goontapu. A be musu e du en ogii te a be e si fa sama be e pina en.

11. Gi wan toli di e soi fa Yehofa be musu e fii di sama be kii Yesesi.

¹¹ Ala mma anga dda di wan pikin fu den dede sabi taki ná pikin hati a sani ya hati. We biibi taki den sama fu u di dede o weki baka, ma toku te wan sama fu u dede we tan fii a pen de aw boofu-ati. A sani ya e yeepi u fu fusutan fa Yehofa be musu e fii di a be e luku fa a Manpikin fi en di a be lobi pina te enke a dede. A sani ya be pasa aini yali 33. c​—Mat. 3:17.

12. Saw sa du den wiki fosi a Membeefesa?

¹² Den wiki fosi a Membeefesa, kande i sa sutudeli moo sani fu a dede fu Yesesi anga iseefi efuso na a Osufamii Anbegi. I sa koboloiki a Saanantongo buku di den e kai Ondrosuku Bijbel moro fini​—Gi Yehofa Kotoigi (efu a de aini a tongo fii) efuso wan taa buku fu a olikanisâsi fu sabi moo sani fu a dede fu Yesesi. d I mu leisi den pisi aini Beibel di e taki fu a Membeefesa di de aini A libi fu wi enke Kelesten anga a peleikiwooko​—Komakandaa buku. Boiti dati, ya mu feegete fu luku a deiwowtu di e holi na a dei fu a Membeefesa. Te we seeka wi ati gi a Membeefesa, wo poi yeepi taawan fu fende wini fi en tu.​—Esra 7:10.

YEEPI TAAWAN FU FENDE WINI FU A MEMBEEFESA

13. San na a fosi sani di u sa du fu yeepi taawan fu fende wini fu a Membeefesa?

¹³ Faw sa yeepi taawan fu fende wini fu a Membeefesa? A fosi sani di u sa du, a  fu kai den kon na a Membeefesa. Boiti den sama di we miti aini a peleikiwooko, u sa sikiifi sama a den taa sama di u wani kai. U sa kai den famii fu u, den sama di wi anga den e wooko, den sama di we miti a sikoo efuso taa sama di u sabi. Efu a pampila di we kai sama kaba, u sa sende a link gi den a den telefon tu. Kande u foondoo te wo si fa omen fu den sama di u kai kon na a Membeefesa.​—Peleik. 11:6.

14. Saide a pelensipali fu gi a sama wan fu den pampila fu a Membeefesa?

¹⁴ Tei gi a sama wan fu den pampila fu a Membeefesa, aw fii bun taki i kai en. A sani ya o meke a kon na a Membeefesa. Wan dei, wan sisa di a man fi en á de a waaleiti foondoo di en man taigi en taki aw go anga en na a Membeefesa. Saide a sisa be foondoo? Bika a omen leisi a be e kai en, ma noiti a be e wani go anga en. Ma saide a man be wani kon a leisi ya? A man fi en taki: ‘Wan sama kai mi.’ Wan owluman di be sabi a man fu a sisa be gi en wan fu den pampila fu a Membeefesa. Fanafu a yali de, a man fi en be bigin go na a Membeefesa ala yali.

15. Saw mu holi a pakisei te we kai sama fu kon na a Membeefesa?

¹⁵ U mu holi a pakisei taki den sama di wo kai o akisi u omen sani fu a Membeefesa, moomoo efu a fosi leisi den kon a wan fu den komakandaa fu u. Neen meke u mu pakisei sowtu akisi den sa poti giw, daw luku fa wo piki den (Kol. 4:6). Kande son sama o akisi u taki: ‘Saw pasa na a komakandaa ya? On langa aw holi? Sowtu koosi mi mu wei? Mi mu pai? Den o piki moni?’ Te we kai sama kon na a Membeefesa, u sa akisi den taki: ‘Yu abi wan sani dii wani akisi?’ Bakadati, daw piki den akisi fi en. Boiti dati, u sa soi den den felon di den e kai Membee a dede fu Yesesi anga San e pasa aini wan Kownukondee zaal? fu yeepi den fu fusutan fa we holi den komakandaa  fu u. Toli 28 fu a I sa piisii fu teego! buku abi wantu moin sani di u sa soi sama tu.

16. San a wantu taa sani di den sama di e kon na a Membeefesa sa akisi u?

¹⁶ Baka te a Membeefesa kaba holi, kande den sama di kon a fosi leisi o abi moo akisi. Kande den e akisi denseefi taki: ‘Saide nawan sama á nyan a beele efuso diingi a win? Saide a wantu sama namo nyan a beele efuso diingi a win? Na ala yuu we holi a Membeefesa?’ Kande den o wani sabi efu na aseefi fasi ya ala den komakandaa fu den Yehofa Kotoigi e holi. Winsi fa a baala di holi a lezing taki fu omen fu den sani ya, toku den e wani sabi moo. A Saanantongo artikel a jw.org di den e kai ‘Fu san ede Yehovah Kotoigi e hori na Avondmaal fu Masra tra fasi leki den tra kerki? o yeepi u fu piki son wan fu den akisi fu den. U wani du ala saw man fosi, a pisiten di a Membeefesa e holi, anga baka a Membeefesa, fu yeepi ‘den sama di ati bun’ fu fende wini fu a komakandaa ya.​—Toli 13:48.

YEEPI DEN BAALA ANGA SISA DI NAI PELEIKI MOO

17. Fa owluman sa yeepi den baala anga sisa di nai peleiki moo? (Eseikiyeli 34:12, 16)

¹⁷ Fa den owluman sa yeepi den baala anga sisa di nai peleiki moo na a pisiten fu a Membeefesa? Soi den taki ye booko yu ede anga den. (Leisi Eseikiyeli 34:12, 16.) Fosi a Membeefesa holi, du ala sai poi fu telefon den. Taigi den taki ye booko yu ede anga den. Meke den fii taki i wani yeepi den. Kai den fu kon na a Membeefesa. Efu den kon, bali wadaa gi den. Baka a Membeefesa u mu tan meke moiti fu go luku efuso telefon den baala anga sisa ya. U mu yeepi den tu fu den daai kon baka a Yehofa.​—1 Peit. 2:25.

18. Faw sa yeepi den baala anga sisa fu u di nai peleiki moo? (Romesama 12:10)

¹⁸ Te den sama di nai peleiki moo kon na a Membeefesa, den baala anga sisa sa  yeepi den. Fa den sa du a sani ya? We soi taki we booko wi ede anga den te we soi den taki u lobi den, te we soi switifasi gi den, anga te we lesipeki den. (Leisi Romesama 12:10.) U mu holi a pakisei taki kande aa be makiliki gi den baala anga sisa ya fu bigin kon a den komakandaa baka. Kande den e pakisei san sama o taki fu den. e Neen meke wa mu akisi den sani di o meke sen kisi den. Wa mu taigi den sani di sa hati den tu (1 Tes. 5:11). Den sama ya aw baala anga u sisa. Neen meke we piisii taki wi anga den sa dini Yehofa makandaa baka.​—Ps. 119:176; Toli 20:35.

19. Sowtu wini we fende te we kon makandaa fu membee a dede fu Yesesi?

¹⁹ Ai bigi giw taki Yesesi taigi u taki u mu membee a dede fi en ala yali. We fusutan saide a sani ya pelensipali, bika te we go na a Membeefesa a omen wini wi anga taa sama e fende (Yes. 48:17, 18). We kon moo lobi Yehofa anga Yesesi. We soi taki we teke a sani di den du giw fu bigi tu. Wi anga den baala anga sisa e toon moo bun mati. Boiti dati, we yeepi taawan fu si fa den sa fende wini fu a dede di Yesesi kon dede giw. Neen meke u mu du ala saw poi fu de seekaseeka gi a Membeefesa fu a yali ya, bika na a dei ya na a moo pelensipali dei fu a yali.