1. Saan kɔnɔ, mun na Hakilijigi lajɛn loon lo kɔrɔtanin lo ka tɛmɛ? (Luka 22:19, 20).

 JEHOVA sagokɛlaw fɛ, Krista saya Hakilijigi lajɛn loon lo kɔrɔtanin lo kosɔbɛ saan kɔnɔ. Yezu y’a fɔ ka gwɛ a ka kalandenw ye ko u ka o koo dama lo kɛ (Luka 22:19, 20 kalan). An kɔrɔtɔnin lo Hakilijigi lajɛn loon ka se kuun caaman kosɔn. An k’u la dɔw lajɛ.

2. Kuun minw kama an kɔrɔtɔnin lo Hakilijigi lajɛn loon ka se, u la dɔw ye jumanw ye?

² Hakilijigi lajɛn b’an dɛmɛ ka miiri kunmabɔsara nafa koo la. An be se k’an ka waleɲumanlɔn yira cogo min na Yezu ka saraka kosɔn, o lajɛn b’an hakili jigi o la (2 Kor. 5:14, 15). A be sababu di an ni an balimaw ma fana ka “ɲɔgɔn jaa gwɛlɛya.” (Ɔrɔm. 1:12). Mɔgɔ minw sumana Alako ta fan fɛ, saan o saan, u caaman be na o lajɛn na. An be u bisimila ni dusudiya minkɛ, o be u dɔw lasun ka kɔsegi Jehova ma. Makodonmɔgɔw fana be min ye ani ka min mɛn, o be u caaman lasun u b’a daminɛ ka tagama ɲɛnamaya sira kan. O koow bɛɛ lo b’a to Hakilijigi lajɛn koo ka gwɛlɛ an ma kosɔbɛ!

3. Cogo juman na Hakilijigi lajɛn be an n’an balimaw jɛn ka kɛ kelen ye duniɲa kuru bɛɛ kɔnɔ? (jaa lajɛ fana).

³ Miiri k’a filɛ fana cogo min na Hakilijigi lajɛn be an n’an balimaw jɛn ka kɛ kelen ye duniɲa kuru bɛɛ kɔnɔ! Tile bentɔ duniɲa kuru bɛɛ kɔnɔ, Jehova Seerew be ɲɔgɔn lajɛn o hakilijigiko kama. An bɛɛ be forobakalan dɔ lamɛn min b’a yira kunmabɔsara nafa ye min ye. An be tandoli dɔnkili fila la, ka buru ni diwɛn tɛmɛ tɛmɛ jama ye ani delili naani minw be kɛ, u kelen kelen bɛɛ laban na an b’a fɔ ni kɔnɔgwɛ  ye ko “amiina.” Lɛri 24 ɲɔgɔn kɔnɔ, kafow bɛɛ be o koo kelen lo kɛ. Miiri k’a filɛ Jehova ni Yezu dusu ka di cogo min na k’a ye ko an bɛɛ be u tandora o cogo la duniɲa kuru bɛɛ kɔnɔ!

4. An bena mun lo lajɛ barokun nin na?

⁴ An bena ɲiningali nunu lajɛ barokun nin na: An be se k’an dusukun labɛn cogo di Hakilijigi lajɛn kama? An be se ka tɔɔw dɛmɛ cogo di u ka nafa sɔrɔ a la? Mɔgɔ minw sumana Alako ta fan fɛ, an be se k’olu dɛmɛ cogo di? O ɲiningaliw jaabiliw bena an dɛmɛ an k’an yɛrɛ labɛn o koo senuman kama.

AN K’AN DUSUKUN LABƐN HAKILIJIGI LAJƐN KAMA

5. a) Mun na an ka ɲi ka miiri kunmabɔsara nafa koo la? (Zaburuw 49:8, 9). b) I ye kalan juman lo sɔrɔ videwo nin na: Mun na Yezu sara?

⁵ An be se k’an dusukun labɛn cogo kɔrɔtaninba minw na, u la dɔ ye juman ye? U la dɔ ye ka miiri Yezu Krista ka kunmabɔ saraka nafa koo la. An tun tɛ se k’an yɛrɛ hɔɔrɔnya ka bɔ jurumu ni saya la cogo si la (Zaburuw 49:8, 9 kalan; videwo nin fana filɛ: Mun na Yezu sara?). a O la, Jehova ye labɛn kɛ walisa Yezu k’a niin di an kosɔn. Ale ni Yezu ye koo caaman lo muɲu o kama (Ɔrɔm. 6:23). U ye koo minw muɲu an kosɔn, n’an tora ka miiri o la, kunmabɔsara koo bena to ka diya an ye kosɔbɛ. U sɔnna ka koo gwɛlɛ minw kɛ walisa k’an kunmabɔ, an k’u damanin lajɛ. Nka, kunmabɔsara yɛrɛ kɔrɔ ye mun ye?

6. Kunmabɔsara kɔrɔ di?

⁶ Kunmabɔsara ye sɔngɔ ye min be sara walisa ka fɛɛn dɔ kɔsegi a tigi ma. Cɛɛ fɔlɔ Adama tun dafanin lo a dantuma na. Tuma min na a ye jurumu kɛ, a tun be ni jigiya min ye ka ɲɛnamaya kɛ fɔɔ abada, ale n’a deenw bɛɛ bɔnɛna o la. Adama bɔnɛna min na, Yezu y’a yɛrɛ niin dafanin saraka walisa k’o sɔngɔ sara. Yezu ka ɲɛnamaya kuru bɛɛ la dugukolo kan, “a ma hakɛ kɛ ka ye, namarakuma si ma bɔ a daa la ka ye.” (1 Piyɛri 2:22). Yezu satuma na, a tun dafanin lo i ko Adama tun dafanin lo cogo min na a dantuma na. O la, Adama bɔnɛna a niin min na, Yezu sera k’o sɔngɔ sara.—1 Kor. 15:45; 1 Tim. 2:6.

7. Yezu ye kɔrɔbɔli minw sɔrɔ k’a to dugukolo kan, u la dɔw ye jumanw ye?

⁷ Yezu ye kɔrɔbɔli caaman sɔrɔ tuma min na a tun be dugukolo kan. Nka o bɛɛ n’a ta, a tora ka kantigiya kɛ a sankolola Faa ye cogo dafanin na. Hali k’a sɔrɔ Yezu tun ye deen dafanin ye, a tun be kolo a bangebaga dafabaliw ye (Luka 2:51). A kanbele tuma, a y’a jija walisa tɔɔw kana a lasun ka ban a bangebagaw ta ma wala ka ban ka kantigiya kɛ Jehova ye. Yezu kɔrɔbayanin, Sutana y’a ɲini k’a lasun a ka jurumu kɛ. A yɛrɛ y’a fɔ a ye paparapa ko a ka Ala sago kɛli dabila (Mat. 4:1-11). Sutana tun cɛsirinin lo ka Yezu lasun a ka jurumu kɛ walisa a kana se k’a niin saraka k’a kɛ kunmabɔsara ye.

8. Yezu ye kɔrɔbɔli wɛrɛ jumanw lo muɲu?

⁸ Yezu ka cidenya baara tuma na dugukolo kan, a ye kɔrɔbɔli wɛrɛw muɲu. A juguw y’a kɛlɛ ani u yɛrɛ y’a ɲini k’a faga (Luka 4:28, 29; 13:31). A y’a ka kalandenw ka dafabaliyakow muɲu (Mariki 9:33, 34). Tuma min na, u tun be kiti tigɛra a kan a fagako kama, u y’a tɔɔrɔ ani k’a lɔgɔbɔ. O kɔ, u y’a gwengwe lɔgɔ kan i n’a fɔ kojugukɛla dɔ ani a tɔɔrɔla  kosɔbɛ ka sɔrɔ ka sa (Eburuw 12:1-3). A ka kitilon laban na, a ye tɔɔrɔw muɲu a yɛrɛ ma sabu Jehova tun t’a dɛmɛna. b—Mat. 27:46.

9. An be mun lo miiri Yezu ka saraka koo la? (1 Piyɛri 1:8).

⁹ A gwɛnin lo ko Yezu tɔɔrɔla kosɔbɛ walisa ka kunmabɔsara di. Yezu sɔnna ka koo minw bɛɛ muɲu an kosɔn, n’an miirila u la, yala o t’an lasun k’a kanu kosɔbɛ wa?—1 Piyɛri 1:8 kalan.

10. Walisa k’an kunmabɔ, Jehova ye koo jumanw lo muɲu?

¹⁰ Nka Jehova do? A sɔnna ka koo jumanw lo muɲu walisa Yezu ka se ka kunmabɔsara di? Jɛnɲɔgɔnya min be faa n’a deen cɛ, o barika ka bon. Nka Jehova ni Yezu ta ɲɔgɔn tɛ yen (Talenw 8:30). O la, tuma min na Jehova y’a ye Yezu tun be tɔɔrɔla cogo min na dugukolo kan, miiri k’a filɛ o ye min kɛ a la! Siga t’a la, Jehova dusu kasira kosɔbɛ k’a ye u b’a Dencɛ tɔɔrɔla ani k’a mafiɲɛya.

11. Ɲɛyirali dɔ fɔ min b’a yira Yezu fagako ye min kɛ Jehova la.

¹¹ Bangebaga minw deen dɔ sara ka ye, siga t’a la, olu b’a faamu o koo be min kɛ mɔgɔ la. An lanin lo kosɔbɛ sukununi koo la, nka o tɛ an ka mɔgɔ kanulen dɔ saya dusukasi bɔ an ka pewu. O ɲɛyirali b’an dɛmɛ k’a faamu Jehova dusu kasira cogo min na tuma min a y’a ye a Dencɛ kanulen be tɔɔrɔla ani ka sa saan 33 Nisankalo la. c—Mat. 3:17.

12. An be se ka mun lo kɛ ka kɔn Hakilijigi lajɛn ɲɛ?

¹² Yanni Hakilijigi lajɛn cɛ, an be se ka kelenna kalan wala gwa kɔnɔ batoli kɛ barokun dɔw kan minw be kuma kunmabɔsara koo la. Baara kɛ ni Guide de recherche wala Bibulu sɛgɛsɛgɛri minan wɛrɛw ye walisa ka koo wɛrɛw faamu kunmabɔsara koo la. d Bibulu kalangwɛ porogramu min be sɔrɔ Lajɛnsɛbɛ kɔnɔ Hakilijigi lajɛn kama, i jija ka tugu o kɔ fana. Ani Hakilijigi lajɛn loon na, kana ɲinɛ ka sɔgɔma batoli kɛrɛnkɛrɛnnin ka videwo filɛ. N’an b’an dusukun labɛn Hakilijigi lajɛn kama, o bena a to an bena se ka mɔgɔ wɛrɛw dɛmɛ olu fana ka nafa sɔrɔ a la.—Ɛsid. 7:10.

 TƆƆW DƐMƐ U KA NAFA SƆRƆ A LA

13. An be se ka koo fɔlɔ juman lo kɛ walisa ka tɔɔw dɛmɛ u ka nafa sɔrɔ Hakilijigi lajɛn na?

¹³ An be se ka tɔɔw dɛmɛ cogo di u ka nafa sɔrɔ Hakilijigi lajɛn na? An be se ka koo fɔlɔ min kɛ, o ye k’u weele ka na o lajɛn na. An b’o kɛ waajuli baara sen fɛ. Ka fara o kan, an be mɔgɔ minw lɔn, an be se k’u tɔgɔ sɛbɛ lisi dɔ kan walisa k’u weele ka na. O mɔgɔw be se ka kɛ an somɔgɔw, an baarakɛɲɔgɔnw, an ka lakɔli filankuruw ani mɔgɔ wɛrɛw ye. Ni welelisɛbɛ man ca i fɛ, i be se k’a lien ci u ma i ka telefɔni, tablɛti wala a ɲɔgɔnnaw sababu fɛ. Jɔn b’a lɔn, n’a sɔrɔ u caaman bena sɔn ka na!—Waaj. 11:6.

14. N’i ye welelisɛbɛ di mɔgɔ dɔ ma, o be se ka nɔɔ juman lo to a kan? Misali dɔ fɔ.

¹⁴ N’i ye welelisɛbɛ di mɔgɔ dɔ ma, o be se k’a lasun ka na. Balimamuso dɔ cɛɛ tɛ Jehova Seere ye. Loon dɔ, a kabakoyara k’a mɛn a cɛɛ daa la ko ale be labɛn kɛra walisa u ka taga ɲɔgɔn fɛ Hakilijigi lajɛn na. Mun na o balimamuso kabakoyara do? Sabu saan tɛmɛninw na, a tun y’a cɛɛ jija siɲɛ caaman a ka na o lajɛn na, nka a ma sɔn ka na. Mun na a tun b’a fɛ ka na sisan do? A ko: “N’ ye welelisɛbɛ sɔrɔ.” A y’a ɲɛfɔ ko ale ni diinan mɔgɔkɔrɔ min delila ɲɔgɔn na, o lo ye welelisɛbɛ di ale ma. O cɛɛ nana o saan na, ani o kɔ, a nana Hakilijigi lajɛn na saan caaman kɔnɔ.

15. An ka ɲi ka mun lo to an hakili la n’an be mɔgɔw weelela ka na Hakilijigi lajɛn na?

¹⁵ An k’a to an hakili la ko an be mɔgɔ minw weelela ka na Hakilijigi lajɛn na, n’a sɔrɔ u be ni ɲiningali dɔw ye sanko n’u ma deli ka na an ka lajɛn dɔ la. A ka ɲi an ka miiri o ɲiningaliw la ani an k’an yɛrɛ labɛn k’u jaabi (Kɔlɔs. 4:6). Misali la, n’a sɔrɔ dɔw b’u yɛrɛ ɲininga ko: “Mun lo bena kɛ o lajɛn na? A bena wagati joli lo ta? Yala fanidoncogo dɔ be yen o lajɛn kama wa? Yala donsara b’a la wa? Wari be deli mɔgɔw fɛ wa?” N’an be mɔgɔ dɔ weelela ka na Hakilijigi lajɛn na, an be se k’a tigi ɲininga ko: “Yala ɲiningali dɔw b’i fɛ wa?” O kɔ, an k’a tigi ka ɲiningaliw jaabi. An  be se fana ka videwo nunu yira a la: I hakili to Yezu saya koo la ani Mun lo be kɛ an ka Masaya boonw kɔnɔ? O videwow bena a dɛmɛ k’a faamu an ka lajɛnw be kɛ cogo min na. Gafe Ɲɛnamaya kɛ hɛɛrɛ la fɔɔ abada! ka kalansen 28nan kɔnɔ fana, hakilinata ɲuman caaman be yen aw be se ka baro kɛ minw kan.

16. Minw be na Hakilijigi lajɛn na, n’a sɔrɔ olu be ni ɲiningali wɛrɛ jumanw lo ye?

¹⁶ Mɔgɔ kura minw nana Hakilijigi lajɛn na, u be se ka kɛ ni ɲiningali wɛrɛw ye o lajɛn kɔ. N’a sɔrɔ u b’u yɛrɛ ɲininga fɛɛn min kama mɔgɔ damanin dɔrɔn wala mɔgɔ si ma buru dumu ani ka diwɛn min. U be se k’u yɛrɛ ɲininga fana an be Hakilijigi lajɛn kɛ siɲɛ daa min na. Ani n’a sɔrɔ u b’a fɛ k’a lɔn ni Jehova Seerew ka lajɛnw bɛɛ be kɛ o cogo kelen lo la. Tiɲɛn lo ko o ɲiningaliw fanba jaabira Hakilijigi lajɛn ka forobakalan na. Nka, n’a sɔrɔ mɔgɔ kuraw mako be ɲɛfɔli wɛrɛw la. Barokun nin lajɛ jw.org kan: “Pourquoi les Témoins de Jéhovah célèbrent-ils le Repas du Seigneur différemment des autres religions ?” O barokun be se k’an dɛmɛ ka mɔgɔ kuraw ka ɲiningali dɔw jaabi. Ka kɔn Hakilijigi lajɛn ɲɛ, o lajɛn tuma na ani a kɔ, mɔgɔ ‘minw labɛnnin lo,’ an b’a fɛ k’an seko bɛɛ kɛ u ka nafa sɔrɔ o lajɛn na.—Kɛw. 13:48.

MINW SUMANA ALAKO TA FAN FƐ, OLU DƐMƐ

17. Minw sumana Alako ta fan fɛ, diinan mɔgɔkɔrɔw be se k’olu dɛmɛ cogo di? (Ezekiyɛli 34:12, 16).

¹⁷ Minw sumana Alako ta fan fɛ, diinan mɔgɔkɔrɔw be se k’olu dɛmɛ cogo di Hakilijigi lajɛn wagati la? A’ ye aw janto u la ni kanuya ye (Ezekiyɛli 34:12, 16 kalan). Ka kɔn Hakilijigi lajɛn ɲɛ, a’ ye banba ka kaan bɔ u caamanba ma. A’ ye u hakili sigi ko aw be u kanu ani ko aw b’a fɛ k’aw seko bɛɛ kɛ k’u dɛmɛ. A’ y’u weele ka na Hakilijigi lajɛn na. N’u nana, aw k’u bisimila ni dusudiya ye. Hakilijigi lajɛn kɔ, aw ye to ka taga bɔ o balima kanulenw ye wala k’u weele telefɔni na ani k’u dɛmɛ  Alako ta fan fɛ walisa u ka kɔsegi Jehova ma.—1 Piyɛri 2:25.

18. Mɔgɔ minw sumana Alako ta fan fɛ, an bɛɛ be se k’u dɛmɛ cogo di? (Ɔrɔmukaw 12:10).

¹⁸ Mɔgɔ minw sumana Alako ta fan fɛ, n’u nana Hakilijigi lajɛn na, kafodenw bɛɛ be se k’u dɛmɛ. Cogo di do? U kɛtɔ k’u minɛ ni kanuya, ɲumanya ani bonya ye (Ɔrɔmukaw 12:10 kalan). A to i hakili la ko n’a sɔrɔ a gwɛlɛyara o balima kanulenw ma ka na o lajɛn na. N’a sɔrɔ u tun be siranna ko mɔgɔw tɛna u bisimila ka ɲɛ. e O la, kana ɲiningali dɔw kɛ minw be se ka maloya bila u la wala ka koo dɔw fɔ minw be se ka digi u la (1 Tes. 5:11). O balimaw ye an kerecɛnɲɔgɔnw lo ye. An ninsɔn ka di ka Jehova bato n’u ye kokura!—Zab. 119:176; Kɛw. 20:35.

19. N’an b’an hakili jigi Yezu ka saya koo la, an bena nafa jumanw lo sɔrɔ o la?

¹⁹ An be Yezu waleɲuman lɔn sabu a ye cii di an ma ko an k’an hakili jigi ale saya koo la saan o saan. Ani an b’a faamu fɛɛn min kama a kɔrɔtanin lo kosɔbɛ an k’an hakili jigi o koo la. N’an b’o kɛ, o be an ni tɔɔw nafa cogo caaman na (Ezayi 48:17, 18). Dɔ be fara an ka kanuya kan Jehova ni Yezu koo la. U ye min kɛ an ye, an b’a yira ko an b’u waleɲuman lɔn kosɔbɛ o kosɔn. An b’an ka jɛnɲɔgɔnya sabati n’an balimaw ye. Ani an be se ka mɔgɔ wɛrɛw dɛmɛ u k’a lɔn olu fana be se ka kunmabɔsara nafaw sɔrɔ cogo min na. O la, an k’an seko bɛɛ kɛ walisa an labɛnnin ka to ɲinan ka Hakilijigi lajɛn kama, o min ye loon kɔrɔtaninba ye saan kɔnɔ!