1. Ntak emi usen Editi edide akakan usen ke isua? (Luke 22:19, 20)

 USEN Editi n̄kpa Christ edi akakan usen ke isua ọnọ ikọt Jehovah. Editi edi n̄kukụre edinam emi Jesus ke idemesie ọkọdọhọde mme mbet esie ẹsinam. (Kot Luke 22:19, 20.) Enyene mme ntak emi ẹsinamde Editi ọdọdọn̄ nnyịn. Ẹyak ineme ndusụk.

2. Nso idi ndusụk ntak emi ẹsinamde Editi ọdọdọn̄ nnyịn?

² Editi esin̄wam nnyịn ikere nte ufak edide akpan n̄kpọ inyụn̄ ikere kpukpru edidiọn̄ emi ẹsan̄ade ye ufak. Enye esiti nnyịn mme usụn̄ emi ikemede ndiwụt ke imama nte Jesus ekedikpade afak nnyịn. (2 Cor. 5:14, 15) Editi n̄ko esinam inyene ifet isọn̄ọ nditọete nnyịn idem, mmọ ẹnyụn̄ ẹsọn̄ọ nnyịn idem; esidi ubọk otụk edem, edem otụk ubọk. (Rome 1:12) Kpukpru isua, ediwak mbon emi mîdụkke mbono esop aba ẹsidụk Editi. Nte ẹsidarade mmọ esinam ndusụk mmọ ẹbiere ndifiak nnyọn̄ mbịne Jehovah. Ediwak mbon emi ẹmade ukwọrọikọ nnyịn ẹsima se mmọ ẹkụtde ẹnyụn̄ ẹkopde ke usen Editi, ndien oro esinam mmọ ẹbiere ndikpep Bible man ẹtọn̄ọ ndisan̄a ke usụn̄ emi adade esịm uwem. Kpukpru emi ẹnam ida Editi ke ata akpan n̄kpọ!

3. Didie ke Editi esinam nditọete nnyịn ke ofụri ererimbot ẹdiana kiet? (Se ndise n̄ko.)

³ Kere n̄ko nte Editi esinamde nditọete nnyịn ke ofụri ererimbot ẹdiana kiet. Nte utịn osụhọrede aka ke nsio nsio itie ke ererimbot, Mme Ntiense Jehovah ẹsisop idem ẹnịm Editi. Imesikpan̄ utọn̄ ikop utịn̄ikọ emi ẹtịn̄de ufọn emi ufak anamde ọnọ mme owo. Imesikwọ ikwọ iba itoro Abasi, ekem ẹyemen uyo ye wine ẹsan̄a mme owo ke iso. Imesisịn “amen” ke ofụri esịt ke akam inan̄ emi ẹbọn̄de. Ke ufan̄ hour 24, kpukpru esop ẹyenam  ukem n̄kpọ oro. Kere adan̄a nte esịt edidatde Jehovah ye Jesus ndikụt nte kpukpru nnyịn idianade kiet inam utọ n̄kpọ oro ikpono mmọ.

4. Idineme nso ke ibuotikọ emi?

⁴ Imọn̄ ineme mme mbụme emi ke ibuotikọ emi: Nso ke ikpanam man ikeme ndida Editi nte akpanade ida? Didie ke ikeme ndin̄wam mbon emi ẹsimade ukwọrọikọ nnyịn ẹdia ufọn ẹto Editi? Didie ke ikeme ndin̄wam mbon emi mîdụkke mbono esop aba? Ibọrọ mme mbụme emi ẹyen̄wam nnyịn itịm idem iben̄e ata akpan edinam emi.

IKPANAM NSO MAN IKEME NDIDA EDITI NTE AKPANADE IDA?

5. (a) Ntak emi akpanade ikere nte ufak edide akpan n̄kpọ inyụn̄ ikere kpukpru edidiọn̄ emi ẹsan̄ade ye ufak? (Psalm 49:7, 8) (b) Nso ke ekekpep oto vidio, Ntak Emi Jesus Akakpade?

⁵ Kiet ke otu ata akpan n̄kpọ emi ikpanamde man ikeme ndida Editi nte ikpadade edi ndikere nte ufak emi Jesus Christ ekekpede ke ibuot nnyịn edide ata akpan n̄kpọ ye mme edidiọn̄ emi ẹsan̄ade ye ufak oro. Inyeneke se ikpekekemede ndinam mfak idem nsio ke idiọkn̄kpọ ye n̄kpa. (Kot Psalm 49:7, 8; se n̄ko vidio emi, Ntak Emi Jesus Akakpade?) a Jehovah ama anam Jesus edikpa anyan̄a nnyịn. Se Jehovah ye edima Eyen esie ẹkeyakde atak mmọ man ẹkeme ndinam oro nnọ nnyịn ikedịghe ekpri. (Rome 6:23) Adan̄a nte inen̄erede itie ikere se mmọ ẹkeyakde atak ke ntak nnyịn, ntre ke idinen̄ede ima ufak. Imọn̄ ineme se mmọ ẹkeyakde atak ke ntak ufak, edi idineme ifan̄ kpọt. Ẹyak ibem iso ineme se ufak edide ye ntak emi akanade Jesus ekpe ufak.

6. Nso idi ufak? Ntak emi akanade Jesus ekpe ufak?

⁶ Ufak edi ekọmurua emi ẹkpede man ẹfiak ẹnyene n̄kpọ emi ọkọwọrọde owo ke ubọk. Adam emi Abasi ekebemde iso obot ama ọfọn ama ini ẹkebotde enye. Ke enye ama akanam idiọkn̄kpọ, ifet ndidu uwem ke nsinsi ama atak enye. Ikatakke enye ikpọn̄, ama atak kpukpru nditọ esie. Akana Jesus emi ekedide mfọnmma owo akpa ke ibuot nnyịn man ikeme ndifiak nnyene se Adam akayakde atak. Ofụri ini emi Jesus okodude ke isọn̄, enye “ikanamke idiọkn̄kpọ, owo ikonyụn̄ ikwe enye abian̄a ke inua.” (1 Pet. 2:22) Ini Jesus akpade, enye ama ọfọn ama ukem nte Adam ọkọfọnde ama mbemiso enye anamde idiọkn̄kpọ. Mfọnmma uwem emi Jesus ọkọnọde ke ibuot nnyịn anam ifiak inyene se Adam akayakde atak.​—1 Cor. 15:45; 1 Tim. 2:6.

7. Tịn̄ ndusụk mfịna emi ẹkesịmde Jesus ke isọn̄.

⁷ Kpa ye ediwak mfịna emi ẹkesịmde Jesus ini enye odude mi ke isọn̄, enye ama anam kpukpru se Ete esie emi odude ke heaven okoyomde enye anam. Ini Jesus edide eyenọwọn̄, akana enye okop uyo ete ye eka esie emi mîkọfọnke ima kpa ye edide enye ama ọfọn ama. (Luke 2:51) Ini enye edide ekpri akparawa, akana enye ekpeme man idiyak mbon en̄wen ẹnam enye ọsọn̄ ibuot ye ete ye eka esie m̀mê ọkpọn̄ Jehovah. Ke enye ama okokpon, akana enye akan mme idomo emi Satan kpa Devil ekemende ebịne enye, idem ye enye emi Satan ọkọdọhọde enye emen se enye akpanamde ọnọ Abasi anam ọnọ imọ. (Matt. 4:1-11) Satan ama enen̄ede ebiere ndinam Jesus anam idiọkn̄kpọ man Jesus okûkeme ndikpe ufak.

8. Tịn̄ mme mfịna en̄wen emi ẹkesịmde Jesus.

⁸ Enyene mme mfịna en̄wen emi ẹkesịmde Jesus ini enye odude ke isọn̄. Ẹma ẹkọbọ enye, ediwak ini ẹma ẹdomo ndiwot enye. (Luke 4:28, 29; 13:31) Mme mbet esie ikọfọnke ima, ntre ndusụk ini mmọ ẹma ẹsisio ndisi mfi ẹfịp ndien akana enye ọyọ. (Mark 9:33, 34) Ini ẹyomde ndibiere m̀mê edi se ẹwotde enye,  ẹma ẹtụhọde enye ẹnyụn̄ ẹsak enye, ekem ẹwot enye. Mbemiso enye akpade, ẹkesuene enye nte ata akpatre idiọk abiatibet ẹnyụn̄ ẹtụhọde enye ke usụn̄ emi inua mîkemeke nditịn̄. (Heb. 12:1-3) Ini Jesus ọkọn̄ọde ke eto ndutụhọ, ekedi sụk enye sụk idem sia Jehovah ikekpemeke enye aba ini oro. b​—Matt. 27:46.

9. Ida didie n̄kpa emi Jesus akakpade afak nnyịn? (1 Peter 1:8)

⁹ Imenen̄ede ikụt ke Jesus ama ọbọ ufen etieti man enye ekeme ndikpa mfak nnyịn. Ima ikere kpukpru se Jesus ọkọyọde onyụn̄ ayakde atak ke ntak nnyịn, oro anam itetịm ima enye.​—Kot 1 Peter 1:8.

10. Nso ikatak Jehovah ke enye ndikayak Eyen esie edikpa afak nnyịn?

¹⁰ Ẹyak itịn̄ eke Jehovah. Nso ke enye akayak atak man Jesus ekeme ndikpa mfak nnyịn? Jehovah ye Jesus ẹkpere etieti. Idụhe kan̄a ete ye eyen emi ẹkperede ntre, idinyụn̄ idụhe tutu amama. (N̄ke 8:30) Kere ndien nte eketiede Jehovah ke idem ini enye etiede ke heaven okụt ediwak ukụt emi Jesus ọkọyọde mi ke isọn̄. Imenịm ke ama abiak Jehovah tutu ndikụt nte ẹfiomode Eyen esie, ẹsịnde enye, idomo ẹnyụn̄ ẹtode nnasia ye ufien ẹsịm enye.

11. Nọ uwụtn̄kpọ ndiwụt nte eketiede Jehovah ke idem ini ẹwotde Jesus.

¹¹ Ete m̀mê eka ekededi emi eyen ọbọhọde akpa ọdiọn̄ọ nte utọ n̄kpọ oro esibiakde owo eketre. Imenen̄ede inịm ke mme akpan̄kpa ẹyeset, edi oro ikpanke n̄kpa owo nnyịn ndibiak nnyịn. Uwụtn̄kpọ oro anam an̄wan̄a nnyịn nte eketiede Jehovah ke idem ndikụt nte edima Eyen esie ọbọde ufen onyụn̄ akpade ke Nisan 14, isua 33 C.E. c​—Matt. 3:17.

12. Nso ke ikeme ndinam urua ifan̄ mbemiso Editi?

¹² Ọtọn̄ọde idahaemi tutu esịm usen Editi, domo ndinen̄ede n̄kpep n̄kpọ mban̄a ufak ke ini Utuakibuot Ubon m̀mê ke ini etiede ke idemfo ekpep n̄kpọ. Da N̄wed Ndụn̄ọde Mme Ntiense Jehovah m̀mê n̄wed efen emi anamde se Bible etịn̄de enen̄ede an̄wan̄a kpep man okụt ediwak n̄kpọ emi ẹtịn̄de ẹban̄a ufak. d Kụt ete ke omokot mme itie Bible emi ẹsidọhọde ẹkot ke ini Editi, emi ẹdude ke N̄wed Mbono Esop Uwem ye Utom Nnyịn Mme Christian. Ke usen Editi, kûfre ndise san̄asan̄a Akam Usenubọk emi ẹdinịmde usen oro. Ima inam mme  n̄kpọ emi ẹdin̄wamde nnyịn ikeme ndida Editi nte akpanade ida, iyekeme ndin̄wam mbon emi ẹmade ukwọrọikọ nnyịn ẹdia ufọn ẹto Editi.​—Ezra 7:10.

N̄WAM MBON EMI ẸMADE UKWỌRỌIKỌ NNYỊN ẸDIA UFỌN ẸTO EDITI

13. Nso idi akpa n̄kpọ emi ikemede ndinam n̄n̄wam mbon emi ẹmade ukwọrọikọ nnyịn ẹdia ufọn ẹto Editi?

¹³ Didie ke ikeme ndin̄wam mbon emi ẹmade ukwọrọikọ nnyịn ẹdia ufọn ẹto Editi? Akpa edi ndikot mmọ Editi. Iyokot mbon emi ikwọrọde ikọ inọ. Imekeme n̄ko ndiwet enyịn̄ mbon emi iyomde ndikot utọ nte iman nnyịn, mbon itieutom nnyịn, nditọ ufọkn̄wed nnyịn, m̀mê mbon en̄wen emi idiọn̄ọde. N̄wedikot emi ẹmịn̄de-mịn̄ mîwakke ikem se inọde mme owo ke ubọk, imekeme ndinọ eke Intanet ẹsọk mmọ. Ibat mbon emi ẹdidụkde Editi ekeme ndikpa nnyịn idem!​—Eccl. 11:6.

14. Nọ uwụtn̄kpọ se ikemede nditịbe edieke inọde owo n̄wedikot ọkpọkpọ, nnyịn ikotke enye ke inua kpọt.

¹⁴ Edieke ọnọde owo emi ọdiọn̄ọde n̄wedikot ke ubọk mîdịghe ọnọ ẹsọk enye ke Intanet, se iditịbede ekeme ndikpa fi idem. Usen kiet, ebe sista nnyịn emi mîdịghe Ntiense Jehovah ama ọdọhọ sista oro ke imọn̄ itiene enye idụk Editi. Enye eketịn̄ ye inemesịt. Ama akpa sista nnyịn oro idem. Ntak ekedi ke enye ama ọdọhọ ebe esie odụk Editi ediwak ini edi akananam enye idụkke. Ekedi didie isan̄ enye emi? Ebe esie ọdọhọ ete, “Owo emi ndiọn̄ọde ama ọnọ mi n̄wedikot.” Ebiowo esop mme sista oro emi ebe esie ekemehede ọkọnọ enye n̄wedikot oro. Ebe esie ama odụk Editi isua oro onyụn̄ aka iso odụk ke ediwak isua.

15. Nso ke nnyịn mîkpefreke ini ikotde mme owo Editi?   

¹⁵ Ti ke mbon emi ikotde Editi ẹkeme ndinyene ediwak mbụme akpan akpan ekpedi mmọ idụkke mboho ikọ Abasi nnyịn ndomokiet akanam. Ọfọn ikere se mmọ ẹkemede ndibụp ye se idibọrọde. (Col. 4:6) Ke uwụtn̄kpọ, ndusụk owo ẹkeme ndibụp: ‘Nso iditịbe ke itie edinam oro?’ ‘Edibịghi didie?’ ‘Ndi enyene nte ẹyomde nsịne ọfọn̄?’ ‘Ndi ẹdikpekpe okụk idụk?’ ‘Ndi ẹyebọ collection?’ Ima ikot owo Editi, imekeme ndibụp enye  m̀mê enye enyene se enye akpamade ndibụp mban̄a edinam oro. Ndien se enye okpobobụp, nnyịn ibọrọ. Imekeme ndibre vidio Ti N̄kpa Jesus ye Nso ke Ẹsinam ke Ufọkmbono Obio Ubọn̄? nnọ enye yak enye okụt nte ẹsinịmde mme mboho ikọ Abasi nnyịn. Mme n̄kpọ emi ikemede ndineme ye enye mban̄a Editi ẹdu ke ọyọhọ ukpepn̄kpọ 28 ke n̄wed Du Ata Uwem ke Nsinsi!

16. Nso efen ke mbon emi ẹdụkde Editi ẹkeme ndibụp?

¹⁶ Editi ama okụre, mbon emi ẹmade ukwọrọikọ nnyịn, emi ẹkedụkde Editi oro ke akpa ini ẹkeme ndinyene mme mbụme efen. Mmọ ẹkeme ndikere m̀mê ntak emi edide ọkpọ owo ifan̄ kpọt ẹketa uyo ẹnyụn̄ ẹn̄wọn̄ wine, mîdịghe m̀mê nso inam owo ndomokiet mîkataha inyụn̄ in̄wọn̄. Mmọ ẹkeme ndikere n̄ko m̀mê isinịm Editi ikafan̄, m̀mê kpukpru mbono esop Mme Ntiense Jehovah ẹsitie ntre. Kpa ye edide ẹneme ediwak n̄kpọ oro ke ini utịn̄ikọ Editi, ekeme ndidi se inamde mmọ ẹtetịm ẹn̄wan̄a mbon emi ẹdụkde ke akpa ini do. Se ẹwetde ke ibuotikọ emi ke jw.org, “Ntak Emi Mme Ntiense Jehovah Mîsinịmke Udia Ọbọn̄ Mmọ Nte Nsio Nsio Ufọkabasi Ẹsinịmde?” ekeme ndin̄wam nnyịn ibọrọ ndusụk mbụme mmọ. Mbemiso Editi, ke usen Editi, ye ke Editi ama okokụre, iyom ndidomo adan̄a nte ikekeme ndin̄wam mbon emi “ẹnyenede eti esịt” ndidia ufọn nto Editi.​—Utom 13:48.

N̄WAM MBON EMI MÎDỤKKE MBONO ESOP ABA

17. Didie ke mbiowo ẹkeme ndin̄wam mbon emi mîsidụkke mbono esop aba? (Ezekiel 34:12, 16)

¹⁷ Ke ini Editi, didie ke mbiowo ẹkeme ndin̄wam mbon emi mîdụkke mbono esop aba? Ẹnam mmọ ẹkụt ke ẹmema mmọ. (Kot Ezekiel 34:12, 16.) Mbemiso Editi, ẹkụt ẹte ke ẹmeka ẹkese mmọ ediwak ini edieke ẹkemede, mîdịghe ẹkokot mmọ. Ẹdọhọ mmọ ke ẹmema mmọ etieti, ke ẹmeben̄e idem ndinam se ededi man ẹkeme ndin̄wam mmọ. Ẹkot mmọ Editi. Mmọ ẹkpedi, ẹdara mmọ etieti. Editi ama okụre, ẹkûfre ndima nditọete emi. Ẹka iso ẹkese mmọ mîdịghe ẹkot mmọ. Se ededi emi ẹkemede ndinam man ẹn̄wam mmọ ẹfiak ẹnyọn̄ ẹbịne Jehovah, ẹnam.​—1 Pet. 2:25.

18. Didie ke kpukpru nnyịn ikeme ndin̄wam mbon emi mîdụkke mbono esop aba? (Rome 12:10)

 ¹⁸ Kpukpru owo ke esop ẹkeme ndin̄wam mbon emi mîsidụkke mbono esop aba ẹdụk Editi. Didie? Edi ndiwụt ke imama mmọ, ndifọn ido ye mmọ, nnyụn̄ n̄kpono mmọ. (Kot Rome 12:10.) Ti ke ekeme ndidi ama ọsọn̄ ndima erọn̄ Jehovah oro ndifiak ntọn̄ọ mbono esop. Ekeme ndidi mmọ ẹkekere ke nditọete ididarake mmimọ. e Ke ntak oro, kûbụp mmọ mbụme emi ekemede ndinam mmọ bụt m̀mê nditịn̄ se ikemede ndibiak mmọ. (1 Thess. 5:11) Mmọ ẹdi nditọete nnyịn, esịt onyụn̄ enem nnyịn nte mmọ ẹfiakde ẹditiene nnyịn ẹtuak ibuot ẹnọ Jehovah!​—Ps. 119:176; Utom 20:35.

19. Tịn̄ mme ufọn emi ẹsidude ima iti n̄kpa Jesus.

¹⁹ Omokụt do se ikanamde Jesus ọdọhọ ẹsinịm Editi n̄kpa esie kpukpru isua? Ima idụk Editi, imesinam idem nnyịn ye mbon efen ufọn ke ediwak usụn̄. (Isa. 48:17, 18) Imesitetịm ima Jehovah ye Jesus inyụn̄ iwụt adan̄a nte imade se mmọ ẹkenamde ẹnọ nnyịn. Imesitetịm ima nditọete nnyịn. Imonyụn̄ ikeme ndin̄wam mbon emi ẹmade ukwọrọikọ nnyịn ẹdiọn̄ọ se ẹkpenamde man mmọ ẹtiene ẹnyene mme edidiọn̄ emi ufak anamde ẹnyene. Ke ntak oro, ẹyak inam ofụri se ikekeme man iben̄e idem inọ Editi isua emi sia usen oro edi akakan usen ke isua emi!