1. Aniwú azǎn e gbe è nɔ flín kú Klísu tɔn é ka nyí azǎn e ɖo tají hú gǎn ɖo xwe ɔ mɛ é? (Luki 22:19, 20)

 AZǍN e gbe è nɔ flín kú Klísu tɔn é wɛ nyí azǎn e ɖo tají hú gǎn nú togun Jexóva tɔn ɖo xwe ɔ mɛ é. Nǔwiwa ɖokpó géé e Jezu ɖe gbe nú ahwanvú tɔn lɛ́ ɖɔ yě ɖó ná bló é nɛ́. (Xa Luki 22:19, 20.) Hwɛjijɔ gěgé wú wɛ mǐ ɖo nukún ɖó kú Klísu tɔn flínflín ɔ wɛ. Mǐ ní ɖɔ xó dó hwɛjijɔ énɛ́ lɛ́ ɖé lɛ́ wú.

2. Ðɔ hwɛjijɔ e wú mǐ nɔ ɖo nukún ɖó kú Klísu tɔn flínflín sín nǔwiwa ɔ wɛ é ɖé lɛ́.

² Kú Klísu tɔn flínflín ɔ nɔ d’alɔ mǐ bɔ mǐ nɔ lin tamɛ dó lě do gbɛ e Jezu xɔ nú mǐ é xɔ akwɛ́ sɔ é jí. É nɔ flín mǐ ali e nu mǐ sixú ɖe nǔsumɛnukúnmɛ xlɛ́ vɔ̌ e Jezu sá dó ta mǐtɔn mɛ ɖe é ɖé lɛ́. (2 Kɔ. 5:14, 15) É nɔ lɛ́ hun ali nú mǐ bɔ mǐ nɔ ɖu vǐví “akɔ́nkpinkpan” e mǐ nɔ ná mǐɖée lɛ́ é tɔn. (Hlɔ̌. 1:12) Xwewú xwewú ɔ, nɔví e awakanmɛ ko kú lɛ́ é gěgé sixú wá nǔwiwa ɔ domɛ. Yě mɛ ɖé lɛ́ tlɛ nɔ ɖe afɔ e jɛxá lɛ́ é, bo ná lɛ́ kɔ wá Jexóva gɔ́n, ɖó yǐ e è yí yě kpó akpakpa sɔ́ mɛ kpó é wútu. Gɔ́ ná ɔ, nǔ e jlǒɖótɔ́ gěgé mɔ, bo lɛ́ se lɛ́ é nɔ zɔ́n bɔ akpakpa nɔ sɔ́ yě, bɔ yě nɔ ba ná jɛ zɔnlin zun gbɔn gbɛ li ɔ jí jí. É ɖo wɛn ɖɔ kú Klísu tɔn flínflín ɔ, nǔwiwa ɖé wɛ bo ɖó tɛn bǔnɔ ɖé ɖo ayi mǐtɔn lɛ́ mɛ.

3. Nɛ̌ kú Klísu tɔn flínflín ka nɔ dɔn kplékplé nɔví lɛ́ tɔn e gbɔn gbɛ ɔ bǐ mɛ é ɖó bǔ gbɔn? (Lɛ̌ kpɔ́n fɔtóo ɔ.)

³ Lɛ̌ lin tamɛ dó lěe kú Klísu tɔn flínflín ɔ nɔ dɔn kplékplé nɔví lɛ́ tɔn e gbɔn gbɛ ɔ bǐ mɛ é ɖó bǔ gbɔn é jí. Kúnnuɖetɔ́ Jexóva tɔn lɛ́ nɔ kplé hwenu e hwe yi xɔ gúdo é, ɖo awa vovo gbɛ ɔ tɔn lɛ́ xwé. Mǐ mɛ bǐ wɛ nɔ se xóɖiɖɔ ɖé bɔ é nɔ tɛ ɖɛ̌ lě  do gbɛxixɔ ɔ ɖo tají sɔ é jí. Mǐ nɔ ji han we, nɔ mɔ bɔ è nɔ hɛn wɔ̌xúxú ɔ kpó vɛ̌ɛn ɔ kpó gbɔn nukɔn mǐtɔn, lobo nɔ lɛ́ ɖɔ “amǐ” kpó ayi bǐ kpó nú ɖɛ vovo ɛnɛ. Ðo nǔ nǎ yi ganxixo 24 vlamɛ ɔ, agun lɛ́ bǐ wɛ ná ko xwedó kpɔ́ndéwú énɛ́. Dǒ nukún awǎjijɛ e Jexóva kpó Jezu kpó ná ɖó hwenu e yě ná mɔ bɔ mǐ mɛ bǐ ná ɖo bǔ, bo ná ɖo susu kpa nú yě wɛ ɖo ali énɛ́ nu é mɛ kpɔ́n.

4. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

⁴ Ðo xóta élɔ́ mɛ ɔ, mǐ ná ɖɔ xó dó nǔkanbyɔ́ élɔ́ lɛ́ jí: Nɛ̌ mǐ ka sixú sɔ́ nǔ nú ayi mǐtɔn nú kú Klísu tɔn flínflín ɔ gbɔn? Nɛ̌ mǐ ka sixú d’alɔ mɛ e ma nyí nǔɖitɔ́ ǎ lɛ́ é bɔ yě ná ɖu nǔwiwa énɛ́ sín le gbɔn? Nɛ̌ mǐ ka sixú d’alɔ mɛ ɖěɖěe awakanmɛ kú lɛ́ é gbɔn? Xósin nǔkanbyɔ́ énɛ́ lɛ́ tɔn ná d’alɔ mǐ bɔ mǐ ná ɖo gbesisɔmɛ nú hwenu bǔnɔ énɛ́.

NƐ̌ MǏ KA SIXÚ SƆ́ NǓ NÚ AYI MǏTƆN NÚ KÚ KLÍSU TƆN FLÍNFLÍN Ɔ GBƆN?

5. (a) Aniwú mǐ ka ɖó ná nɔ lin tamɛ dó lě do gbɛxixɔ ɔ xɔ akwɛ́ sɔ é jí? (Ðɛhan 49:8, 9) (b) Étɛ́ video Étɛ́wú Jezu ka kú? ɔ ka kplɔ́n we?

⁵ Ali tají hú gǎn e nu mǐ sixú sɔ́ nǔ nú ayi mǐtɔn nú kú Klísu tɔn flínflín ɔ ɖe é ɖokpó wɛ nyí tamɛ linlin dó lě do vɔ̌sísá gbɛxɔnúmɛ tɔn ɔ xɔ akwɛ́ sɔ é jí. Mǐɖésúnɔ sixú hwlɛ́n mǐɖée sín hwɛhuhu kpó kú kpó sí ǎ. (Xa Ðɛhan 49:8, 9; lɛ̌ kpɔ́n video Étɛ́wú Jezu ka kú?) a Énɛ́ wú ɔ, Jexóva bló tuto bɔ Jezu kú dó ta mǐtɔn mɛ; yě mɛ we lɛ́ bǐ wɛ ka sá vɔ̌ ɖaxó, bónú nǔ ná dó nyí mɔ̌. (Hlɔ̌. 6:23) Lě do mǐ lin tamɛ dó nǔ e Jexóva kpó Jezu kpó sɔ́ dó sá vɔ̌ dó ta mǐtɔn mɛ é jí sɔ é ɔ, mɔ̌ do wɛ gbɛxixɔ ɔ ná xɔ akwɛ́ nukún mǐtɔn mɛ sɔ. Mǐ ná gbéjé nǔ e gbɛxixɔ ɔ byɔ́ ɖo Jexóva kpó Jezu kpó sí é kléwún ɖé lɛ́ kpɔ́n. Amɔ̌, jɛ nukɔn hwɛ̌ ɔ, étɛ́ gbɛxixɔ ɔ ka byɔ́?

6. Étɛ́ gbɛxixɔ ɔ ka nyí? Étɛ́wú Jezu ka ɖó ná sɔ́ gbɛ tɔn dó sá vɔ̌?

⁶ Gbɛxixɔ ɔ, axɔ́ e è sú dó vɔ́ nǔɖé xɔ é wɛ. Adámu e nyí súnnu nukɔntɔn ɔ é ɔ, mɛ maɖóblɔ̌ wɛ n’i hwenu e è dá ɛ é. Hwenu e é hu hwɛ é ɔ, é ba nukúnɖíɖó gbɛ mavɔmavɔ tɔn kpo; é ka nyí éɖokpónɔ wɛ ba kpo ǎ, vǐ tɔn lɛ́ lɔ bǐ wɛ ba kpo. Bo ná dó vɔ́ nǔ e Adámu hɛn bú é xɔ ɔ, Jezu sɔ́ gbɛ maɖóblɔ̌ tɔn dó sá vɔ̌. Ðo gbɛzínzán ayǐkúngban jí tɔn Jezu tɔn bǐ hwenu ɔ, “é hu hwɛ ɖě ǎ, mɔ̌ jɛ́n è ma ka lɛ́ se mɛblɛ́blɛ́xó ɖě ɖo nu tɔn ǎ é nɛ́.” (1 Pi. 2:22) Hwenu e Jezu kú é ɔ, gbɛ maɖóblɔ̌ e é ɖó é sɔgbe pɛ́pɛ́pɛ́ xá gbɛ e Adámu hɛn bú é.—1 Kɔ. 15:45; 1 Tim. 2:6.

7. Mɛtɛ́nkpɔ́n tɛ́ lɛ́ Jezu ka mɔ hwenu e é ɖo ayǐkúngban jí é?

⁷ Jezu mɔ mɛtɛ́nkpɔ́n gěgé hwenu e é ɖo ayǐkúngban jí é có, é se tónú nú Tɔ́ tɔn jǐxwé tɔn ɔ bǐ mlɛ́mlɛ́. Vǐ maɖóblɔ̌ wɛ Jezu nyí, bɔ mɛjitɔ́ tɔn lɛ́ nyí hwɛhutɔ́ có, é ka se tónú nú yě. (Luk. 2:51) Hwenu e é ɖo wǐnnyáwínnyá mɛ é ɔ, é byɔ́ ɖɔ é ní dɛ ɖo kɔgbídínúmɛ e é nɔ mɔ, bo ná dó nyí tótlítɔ́ alǒ gbejímanɔtɔ́ lɛ́ é nu. Gɔ́ ná ɔ, hwenu e Jezu nyí mɛxó é ɔ, é ɖó ná ɖu ɖo mɛtɛ́nkpɔ́n Satáan e nyí Awǒvi é tɔn lɛ́ jí, káká jɛ tɛ́n e é tɛ́n ɛ kpɔ́n bónú é ná gɔn gbejí nɔ nú Mawu é jí. (Mat. 4:1-11) Satáan wa nǔ e wú é kpé é bǐ bo ná bló bɔ Jezu ná hu hwɛ, mɔ̌ mɛ ɔ, é sɔ́ ná kpé wú, bo ná xɔ gbɛ nú gbɛtɔ́ lɛ́ ǎ.

8. Wǔvɛ́ ɖěvo tɛ́ lɛ́ nu Jezu ka dɛ ɖe?

⁸ Ðo sinsɛnzɔ́ Jezu tɔn hwenu ɖo ayǐkúngban jí ɔ, é lɛ́ dɛ ɖo mɛtɛ́nkpɔ́n ɖěvo lɛ́ nu. Kɛntɔ́ tɔn lɛ́ dó ya n’i, bo lɛ́ tɛ́n kpɔ́n bo ná hú i. (Luk. 4:28, 29; 13:31) É lɛ́ dɛ ɖo gǎnmaɖó ahwanvú tɔn lɛ́ tɔn nu. (Mak. 9:33, 34) Hwenu e é ɖo mɛtɛ́nkpɔ́n e sɔ́ gbɛ tɔn ɖó axɔ́ nu lɛ́ é mɛ gbɔn wɛ é ɔ, è xo è, bo lɛ́ cá ɛ ko. Énɛ́ gúdo ɔ, è xwe è nyi atín wú dǎkaxotɔ́ ɖé  ɖɔhun, bɔ é se wǔvɛ́ syɛ́nsyɛ́n. (Ebl. 12:1-3) Éɖokpónɔ wɛ ɖó ná dɛ ɖo akpáxwé gǔdo tɔn mɛtɛ́nkpɔ́n ɔ tɔn nu alɔcyɔ́nmɛjí Jexóva tɔn mɛvo. b—Mat. 27:46.

9. Nɛ̌ nǔ ka nɔ cí nǔ mǐ dó vɔ̌sísá Jezu tɔn wú? (1 Piyɛ́ɛ 1:8)

⁹ É ɖo wɛn ɖɔ Jezu se wǔvɛ́ tawun cóbó xɔ gbɛ nú mǐ. Ényí mǐ ɖo tamɛ lin dó lěe é sɔ́ jlǒ dó sɔ́ nǔ gěgé dó sá vɔ̌ dó ta mǐtɔn mɛ gbɔn é jí wɛ ɔ, mǐ nɔ lɛ́ yí wǎn n’i kpó ayi mǐtɔn bǐ kpó.—Xa 1 Piyɛ́ɛ 1:8.

10. Étɛ́ gbɛxixɔ ɔ ka byɔ́ ɖo Jexóva sí?

¹⁰ Jexóva ka lo? Étɛ́ lɛ́ é ka ɖo gbesisɔmɛ bo sɔ́ dó sá vɔ̌, bónú Jezu ná dó sixú xɔ gbɛ nú mǐ? Lěe tɔ́ ɖé kpó vǐ tɔn kpó nɔ vɛ́ sɔ é ɔ, mɔ̌ wɛ Jexóva kpó Jezu kpó vɛ́ sɔ. (Nǔx. 8:30) Énɛ́ wú ɔ, dǒ nukún lěe nǔ ná ko cí nú Jexóva hwenu e é mɔ bɔ Jezu ɖo didɛ wɛ ɖo wǔvɛ́ tobutóbú énɛ́ lɛ́ nú hwenu e é ɖo ayǐkúngban jí é mɛ kpɔ́n. É ɖo wɛn ɖɔ Jexóva se wǔvɛ́ tawun hwenu e é mɔ bɔ è xo dǎka Vǐ tɔn wú, gbɛ́ ɛ, lobo lɛ́ dó wǔvɛ́ n’i é.

11. Nǎ kpɔ́ndéwú ɖé dó xlɛ́ lěe nǔ ná ko cí nú Jexóva hwenu e è hu Jezu é.

¹¹ Mɛjitɔ́ e vǐ kú dó kpɔ́n lɛ́ é tuun aluwɛ syɛ́nsyɛ́n e mɛ ninɔmɛ mɔ̌hun nɔ dɔn mɛ dó é. Mǐ ɖi nǔ nú fínfɔ́n sín kú tawun, amɔ̌, ényí mɛ vívɛ́ná mǐtɔn ɖé kú ɔ, nǔɖiɖi énɛ́ e mǐ ɖó é nɔ zɔ́n bɔ mǐ nɔ gɔn wǔvɛ́ se ǎ. Kpɔ́ndéwú énɛ́ d’alɔ mǐ, bɔ mǐ mɔ nǔ jɛ lěe nǔ ná ko cí nú Jexóva, hwenu e é mɔ bɔ Vǐ vívɛ́ná tɔn se wǔvɛ́ bo kú ɖo azǎn énɛ́ gbe ɖo xwe 33 H.M. tɔn é.  c—Mat. 3:17.

12. Étɛ́ lɛ́ mǐ ka sixú wa ɖo aklúnɔzángbla e jɛ nukɔn nú kú Klísu tɔn flínflín ɔ lɛ́ é mɛ?

¹² Bɛ́sín din káká jɛ kú Klísu tɔn flínflín hwenu ɔ, a sixú bló tuto bo ná kplɔ́n nǔ hwiɖésúnɔ alǒ ɖo xwédo mɛ dó gbɛxixɔ ɔ wú. Zǎn Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ alǒ wěma ɖěvo lɛ́ dó ba do nú nǔ ganjí dó gbɛxixɔ ɔ wú. d Gɔ́ ná ɔ, tɛ́n kpɔ́n bo xwedó tuto Biblu xixa tɔn kú Klísu tɔn flínflín tɔn éé è sɔ́ nǔ ná, b’ɛ ɖo Kplé gbɛzán kpó sinsɛnzɔ́ kpó tɔn sín azɔ̌wéma mɛ é. Ðo kú Klísu tɔn flínflín sín azǎn gbe hǔn, ma wɔn bo gɔn tɛ́si bǔnɔ e è sɔ́ nǔ ná é kpɔ́n ó. Ényí mǐ sɔ́ nǔ nú ayi mǐtɔn nú kú Klísu tɔn flínflín ɔ ɔ, mǐ ná kpé wú bo d’alɔ mɛ e ma nyí nǔɖitɔ́ ǎ lɛ́ é, bɔ yě lɔ ná ɖu le tɔn.—Esd 7:10, nwt.

 D’ALƆ MƐ ÐĚVO LƐ́ BÓNÚ YĚ NÍ ÐU LE TƆN

13. Nǔ nukɔntɔn tɛ́ è ka sixú wa dó d’alɔ mɛ ɖěvo lɛ́, bɔ yě ná ɖu le kú Klísu tɔn flínflín tɔn?

¹³ Nɛ̌ mǐ ka sixú d’alɔ mɛ ɖěvo lɛ́ bɔ yě ná ɖu kú Klísu tɔn flínflín ɔ sín le gbɔn? É ɖo wɛn ɖɔ nǔ nukɔntɔn e mǐ ná wa é wɛ nyí ɖɔ mǐ ní ylɔ́ yě. Gbɔn vo nú mɛ ɖěɖěe mǐ nɔ xo go ɖo sinsɛnzɔ́ ɔ mɛ lɛ́ é yíylɔ́ ɔ, mǐ sixú lɛ́ lin tamɛ dó mɛ ɖěvo e mǐ sixú ba ná ylɔ́ lɛ́ é jí. Hɛ̌nnumɔ mǐtɔn lɛ́, azɔ̌gbɛ́ mǐtɔn lɛ́, wěmaxɔmɛvígbɛ́ mǐtɔn lɛ́ kpó mɛ ɖěvo lɛ́ kpó sixú ɖo mɛ énɛ́ lɛ́ mɛ. Ényí mǐ ma tlɛ ɖó mɛylɔ́wéma e è zín é nabí ɖé ǎ ɔ, mǐ sixú sɛ́ fí e è ná gbɔn bo ná mɔ kan jí tɔn ɔ é dó yě. Mɛ ɖě tuun mɛ nabí e ná wá é ǎ.—Nǔt. 11:6.

14. Nǎ kpɔ́ndéwú ɖé dó ɖe lě do mɛylɔ́wéma ɖé ɖó hlɔ̌nhlɔ́n sɔ é xlɛ́.

¹⁴ Mi ma sɔ́ nukún kpɛví dó kpɔ́n hlɔ̌nhlɔ́n e mɛylɔ́wéma ɔ ɖó é gbeɖé ó. Gbe ɖokpó ɔ, nɔví nyɔ̌nu e nɔ nɔ xwédo e klán ɖo sinsɛn lixo é ɖé mɛ é ɖó ayi tɔn ǎ, bɔ asú tɔn ɖɔ n’i ɖɔ émí ɖo tuto bló wɛ bo ná xwedó è yi kú Klísu tɔn flínflín ɔ domɛ. Étɛ́wú é ka kpácá nɔví nyɔ̌nu ɔ? Ðó azɔn mɔ̌kpán wɛ nɔví nyɔ̌nu ɔ dó wǔsyɛ́n lanmɛ n’i ɖɔ é ní wá, é ka yi gbeɖé ǎ. Bɔ étɛ́ ka zɔ́n bɔ é yí gbe din? É ɖɔ: “Un yí mɛylɔ́wéma ɔ ɖokpó,” bo lɛ́ tínmɛ ɖɔ mɛxó agun tɔn xá ɔ mɛ tɔn e émí má dó tawun é ɖé wɛ ylɔ́ émí. Asú ɔ yi xwe énɛ́ xwe, bo lɛ́ yi nú xwe gěgé ɖěvo e bɔ d’é wú lɛ́ é lɔ.

15. Étɛ́ mǐ ka ba ná hɛn dó ayi mɛ hwenu e mǐ ɖo mɛɖé ylɔ́ wá kú Klísu tɔn flínflín domɛ wɛ é?

¹⁵ Hɛn dó ayi mɛ ɖɔ mɛ ɖěɖěe mǐ nɔ ylɔ́ lɛ́ é sixú ɖó nǔkanbyɔ́ ɖé lɛ́; tají ɔ, ényí yě ma ko wá kplé mǐtɔn lɛ́ ɖě gbeɖé ǎ ɔ nɛ́. É ná nyɔ́ ɖɔ mǐ ní dó nukún nǔkanbyɔ́ yětɔn lɛ́ mɛ kpɔ́n jɛ nukɔn, lobo sɔ́ nǔ ɖ’ayǐ, bá ná xósin yě. (Koló. 4:6) Ði kpɔ́ndéwú ɔ, mɛɖé lɛ́ sixú kan nǔ lěhun lɛ́ byɔ́: ‘Nɛ̌ nǔwiwa ɔ ka ná yi gbɔn?’ ‘Hwenu nabí é ka ná ɖu?’ ‘É ka ɖó nǔ tawun ɖé lě bɔ è ná dó yi wɛ a?’ ‘É byɔ́ axɔ́ ɖé bɔ è ná sú cóbó ná nɔ do tɔn mɛ wɛ a?’ ‘È ná yí agbǎnmɛkwɛ́ wɛ a?’ Ényí mǐ ɖo mɛɖé ylɔ́ wá kú Klísu tɔn flínflín domɛ wɛ ɔ, mǐ sixú kanbyɔ́ ɛ kpowun ɖɔ: “A ɖó nǔkanbyɔ́ ɖé lɛ́ wɛ a?” énɛ́  gúdo ɔ, ényí mɛ ɔ ɖó nǔkanbyɔ́ ɖé ɔ, mǐ ná ná xósin ná. Mǐ sixú lɛ́ zán video Flín kú Jezu tɔn kpó Nɛ̌ nǔ lɛ́ ka nɔ yi gbɔn ɖo kpléxɔ Axɔ́súɖuto ɔ tɔn ɖé mɛ kpó dó d’alɔ mɛɖé b’ɛ ná mɔ nukúnnú jɛ lěe kplé mǐtɔn lɛ́ nɔ yi gbɔn é wú. Gɔ́ ná ɔ, nǔkplɔ́nkplɔ́n 28gɔ́ wěma Ðu gbɛ víví káká sɔ́yi! tɔn ɖɔ nǔ tawun tawun e mǐ sixú má xá mɛ ɔ é ɖé lɛ́ xó.

16. Nǔkanbyɔ́ ɖěvo tɛ́ lɛ́ mɛ ɖěɖěe wá kú Klísu tɔn flínflín ɔ domɛ lɛ́ é ka sixú ɖó?

¹⁶ Ényí kú Klísu tɔn flínflín ɔ fó gúdo ɔ, jlǒɖótɔ́ yɔ̌yɔ́ e wá lɛ́ é sixú lɛ́ ɖó nǔkanbyɔ́ ɖěvo lɛ́. Yě sixú kanbyɔ́ ɖɔ aniwú mɛ ɖě ma ɖu wɔ̌xúxú ɔ, bo nu vɛ̌ɛn ɔ ǎ é jí, alǒ aniwú mɛ kwínwe ɖé jɛ́n ɖu wɔ̌xúxú ɔ bo nu vɛ̌ɛn ɔ a jí. Yě sixú lɛ́ kan azɔn nabí e mǐ nɔ flín kú Klísu tɔn é byɔ́. Yě sixú lɛ́ kan byɔ́ ɖɔ kplé Kúnnuɖetɔ́ Jexóva tɔn lɛ́ tɔn bǐ jɛ́n è nɔ bló gbɔn mɔ̌ a jí. Nǔgbó wɛ ɖɔ nǔ énɛ́ lɛ́ gěgé jí wɛ è nɔ ɖɔ xó dó ɖo xóɖiɖɔ e è nɔ xwlé mɛ ɖo nǔwiwa ɔ hwenu é mɛ có, mɛ yɔ̌yɔ́ e wá lɛ́ é sixú ba ná lɛ́ ɖó mɔjɛmɛ ɖěvo lɛ́ d’é jí. Xóta élɔ́ e ɖo jw.org jí é sixú d’alɔ mǐ bɔ mǐ ná ná xósin nú nǔkanbyɔ́ yětɔn ɖé lɛ́: “Étɛ́wú lěe Kúnnuɖetɔ́ Jexóva tɔn lɛ́ nɔ bló nǔwiwa Aklúnɔ sín nǔɖuɖu ɔ tɔn gbɔn é ka nɔ gbɔn vo nú lěe sinsɛn ɖěvo lɛ́ nɔ bló gbɔn é?” Mǐ ba ná wa nǔ ɖěbǔ e wú mǐ kpé é jɛ nukɔn nú kú Klísu tɔn flínflín ɔ, ɖo kú Klísu tɔn flínflín ɔ hwenu kpó kú Klísu tɔn flínflín ɔ gúdo kpó dó d’alɔ mɛ e ɖó “ninɔmɛ ayi mɛ tɔn e sɔgbe” lɛ́ é, bɔ yě ná ɖu le nǔwiwa énɛ́ tɔn.—Mɛ. 13:48.

NƆ D’ALƆ MƐ ÐĚÐĚE AWAKANMƐ KÚ LƐ́ É

17. Nɛ̌ mɛxó agun tɔn lɛ́ ka sixú d’alɔ mɛ ɖěɖěe awakanmɛ kú lɛ́ é gbɔn? (Ezekiyɛ́li 34:12, 16)

¹⁷ Ðo aklúnɔzángbla ɖěɖěe jɛ nukɔn nú kú Klísu tɔn flínflín ɔ lɛ́ é mɛ ɔ, nɛ̌ mɛxó agun tɔn lɛ́ ka sixú d’alɔ mɛ ɖěɖěe awakanmɛ kú lɛ́ é gbɔn? Xlɛ́ yě ɖɔ nǔ yětɔn nɔ ɖu ayi mɛ nú we. (Xa Ezekiyɛ́li 34:12, 16.) Jɛ nukɔn nú nǔwiwa ɔ ɔ, ylɔ̌ yě lěe é nyɔ́ bló gbɔn é. Nǎ gǎnjɛwú yě ɖɔ émí yí wǎn nú yě, lobo lɛ́ jló ná d’alɔ yě lěe a kpé wú gbɔn é. Ylɔ̌ yě dó kú Klísu tɔn flínflín ɔ domɛ. Ényí yě wá do tɔn mɛ hǔn, yǐ yě kpó akpakpa sɔ́ mɛ kpó. Ðo nǔwiwa ɔ gúdo hǔn, kpo ɖo nɔví énɛ́ lɛ́ yi ba kpɔ́n wɛ,  bo dó alɔ ɖěbǔ e sín hudó yě ɖó é yě ɖo gbigbɔ lixo, bónú yě ná lɛ́ kɔ wá Jexóva gɔ́n.—1 Pi. 2:25.

18. Nɛ̌ mǐ mɛ bǐ ka sixú d’alɔ mɛ ɖěɖěe awakanmɛ kú lɛ́ é gbɔn? (Hlɔ̌manu lɛ́ 12:10)

¹⁸ Mɛ ɖěɖěe ɖo agun ɔ mɛ lɛ́ é bǐ sixú d’alɔ mɛ e awakanmɛ kú bɔ yě wá nǔwiwa ɔ domɛ lɛ́ é. Gbɔn nɛ̌ é? Gbɔn nǔ wiwa xá yě kpó wǎnyíyí, xomɛnyínyɔ́ gɔ́ nú sísí kpó gblamɛ. (Xa Hlɔ̌manu lɛ́ 12:10.) Flín ɖɔ lɛ̌ngbɔ́ vívɛ́ énɛ́ lɛ́ sixú xo nǔ kpɔ́n dó kplé lɛ́ yiyi wú. Vlafo yě nɔ ɖi xɛsi ɖɔ è kún ná yí émí ganjí ó. e Énɛ́ wú ɔ, ma kan nǔ e ná zɔ́n bɔ yě ma ná vo ǎ lɛ́ é byɔ́ yě, alǒ, ɖɔ xó ɖěɖěe ná gblé wǔ yě lɛ́ é nú yě ó. (1 Tɛ. 5:11) Nǔɖitɔ́ hǎtɔ́ mǐtɔn lɛ́ wɛ yě nyí. Xomɛ nɔ hun mǐ ɖɔ mǐ ní lɛ́ sɛn Jexóva ɖó kpɔ́ xá yě.—Ðɛh. 119:176; Mɛ. 20:35.

19. Le tɛ́ lɛ́ ka ɖo kú Klísu tɔn flínflín mɛ?

¹⁹ É su nukún mǐtɔn mɛ ɖɔ Jezu ɖɔ nú mǐ ɖɔ mǐ ní nɔ flín kú émítɔn xwewú xwewú, bɔ mǐ mɔ nukúnnú jɛ nǔ e wú é ɖo tají sɔmɔ̌ é mɛ. Ényí mǐ ka wa mɔ̌ ɔ, mǐ kpó mɛ ɖěvo lɛ́ bǐ kpó wɛ nɔ ɖu le tɔn ɖo ali gěgé nu. (Eza. 48:17, 18) Wǎn e mǐ yí nú Jexóva kpó Jezu kpó é nɔ lɛ́ jɛjí. Mǐ nɔ ɖe lě do nǔ e yě wa nú mǐ é su nukún mǐtɔn mɛ sɔ é xlɛ́. Mǐ nɔ ná hlɔ̌nhlɔ́n vɛ̌ e mǐ vɛ́ xá nǔɖitɔ́ hǎtɔ́ mǐtɔn lɛ́ é. Gɔ́ ná ɔ, mǐ sixú d’alɔ mɛ ɖěvo lɛ́, bɔ yě ná kplɔ́n lěe yěɖésúnɔ mɛtún ɔ sixú ɖu nyɔ̌ná ɖěɖěe gbɛxixɔ ɔ hun ali tɔn lɛ́ é sín le gbɔn é. Hǔn, mi nú mǐ ní wa nǔ e wú mǐ kpé é bǐ, bá ɖo gbesisɔmɛ nú azǎn tají hú gǎn xwe ɔ tɔn, énɛ́ wɛ nyí kú Klísu tɔn flínflín sín azǎn ɔ.