1. Poukisa Mémoryal-a, a jou-a ki pi enpòrtan annan lannen-an ? (Luc 22:19, 20).

 POU sa-ya ki ka adoré Jéova, Mémoryal lanmò Kris-a, a jou ki pi enpòrtan annan lannen-an. A sèl sérémoni Jézi doumandé so disip fété (li Luc 22:19, 20). A pa ti présé nou présé wè jou Mémoryal-a rivé. Nou ka antann sa lévènman-an pou plizyèr rézon. Annou wè déztrwa annan yé.

2. Poukisa nou présé rivé annan jou Mémoryal-a ?

² Mémoryal-a ka pèrmèt nou réfléchi asou valò ranson-an gen. I ka fè nou sonjé osi kouman nou pouvé montré nou rékonésans pou sakrifis Jézi fè (2 Cor. 5:14, 15). I ka bay nou lokazyon « ankourajé nou konpanyen » (Rom. 1:12). Chak lannen, roun patché frè ké sò ki arété vini annan réinyon-yan ka vini annan Mémoryal-a. Kou nou ka rousouvwè yé ké lanmou, sèrten annan yé ka désidé rouvini òbò Jéova. Épi, roun patché moun anvi koumansé étidyé Labib-a paské sa yé ka tandé ké sa yé ka wè sa jou-a ka touché yé tchò. A pou tout sa bagaj-ya ki Mémoryal-a vréman enpòrtan pou nou !

3. Kouman Mémoryal-a ka montré ki nou tout ka fè rounsèl pèp ké tout nou frè ké sò asou tout latè-a ? (gadé zimaj-a osi).

³ Sonjé osi kouman Mémoryal-a ka pèrmèt nou santi nou kò pi pròch di nou frè ké sò asou tout latè-a. Toupannan solèy-a ka kouché, Témwen Jéova-ya ka rasanblé annan tout péyi pou Mémoryal-a. Nou tout ka kouté menm diskour-a ki ka montré kouman ranson-an enpòrtan. Nou tout ka chanté dé kantik, nou ka fè diven-an ké dipen-an pasé, é nou ka di « anmèn »  ké tout nou tchò apré kat lapriyè yé ka fè pannan sa réinyon-an. Pannan menm jou-a, tout asanblé-ya ka swiv menm modèl-a. Sa jou-a èspésyalman, tout moun ka wè ki nou ansanm ansanm. Imajiné kouman Jéova ké Jézi divèt kontan !

4. Ki késyon nou ké réponn annan sa artik-a ?

⁴ Annan sa artik-a, nou ké réponn trwa késyon : Kouman nou pouvé préparé nou tchò pou Mémoryal-a ? Kouman nou pouvé idé ròt moun profité di Mémoryal-a ? É kouman nou pouvé ankourajé sa-ya ki arété vini annan réinyon-yan ? Répons-ya ké pèrmèt nou paré pou sa jou-a ki sakré.

PRÉPARÉ TO TCHÒ

5. a) Poukisa nou divèt réfléchi asou valò sakrifis Jézi fè ? (Psaume 49:7, 8). b) Kisa to anprann lò to gadé vidéyo-a Poukisa Jézi mouri ?

⁵ Roun fason nou pouvé préparé nou tchò pou Mémoryal-a, a lò nou ka réfléchi asou valò sakrifis Jézi Kris fè. Si a té nou sèlman, nou pa té ké janmen pouvé soti anba péché-a ké lanmò-a (li Psaume 49:7, 8 ; gadé osi vidéyo-a a Poukisa Jézi mouri ?). Donk, Jéova pran dispozisyon pou Jézi bay so lavi pou nou. A roun gro sakrifis Jéova ké Jézi fè (Rom. 6:23). Pi nou ké pran tan réfléchi asou sa Jéova ké Jézi sakrifyé pou nou, pi nou ké gen rékonésans pou ranson-an. Nou ké wè déztrwa ti détay asou ranson-an, épi apré sa, nou ké wè déztrwa sakrifis Jéova ké Jézi fè pou péyé ranson-an.

6. Poukisa sakrifis Jézi a té roun ranson ?

⁶ Roun ranson, a pri nou ka péyé pou viré achté roun bagaj. Prémyé wonm-an, Adan, té parfè. Lò i péché, i pédi èspwar viv pou tout-tan, mé i anpéché tout so pitit gen sa èspwar-a osi. Pou viré achté sa Adan té pédi, Jézi bay so pròp lavi ki té parfè an sakrifis. Pannan tout tan i té asou latè-a, Jézi « pa fè pyès péché é i pa janmen di anyen pou bloublou moun » (1 Pierre 2:22). Donk, lò i mouri, so lavi parfè té ka korèsponn èkzaktéman ké lavi Adan té pédi (1 Cor. 15:45 ; 1 Tim. 2:6).

7. Ki problèm Jézi jwenn lò i té asou latè-a ?

⁷ Lò Jézi té asou latè-a, i obéyi so Papa ki annan syèl-a roun fason ki parfè menm lò sa té rèd. I té sa roun timoun parfè, mé so papa ké so manman pa té parfè. Magré sa, i té ka obéyi yé kanmenm (Luc 2:51). Lò i té jennjan, pitèt sèrten moun mété présyon asou li pou i dézobéyi so papa ké so manman ouben pou i pa rété fidèl douvan Jéova. É lò i vin gran, Satan tanté l’, i jis di li arété obéyi Bondjé (Mat. 4:1-11). Satan té byen désidé fè l’ péché pou i pa té pouvé péyé ranson-an ankò.

8. Ki ròt problèm Jézi sipòrté ?

⁸ Lò i té ka préché, Jézi jwenn ròt problèm ankò. Yé pèrsékité l’ é yé jis chaché tchwé l’ (Luc 4:28, 29 ; 13:31). I sipòrté défo so disip-ya té gen (Marc 9:33, 34). Lò i té tou pròch mouri, yé ari di so tèt é yé fè l’ roun patché méchansté. Apré sa, yé tchwé l’ kousidiré i té sa roun kriminèl é i soufri bokou anvan i mouri (Héb. 12:1-3). É a ké so pròp fòrs i tchenbé jistan i mouri, Jéova pa protéjé l’ b (Mat. 27:46).

9. Kisa to ka rousanti lò to ka réfléchi asou tousa Jézi sakrifyé pou nou ? (1 Pierre 1:8).

 ⁹ Jézi soufri pou sèrvi di ranson, asiré pa pitèt. Lò nou ka réfléchi asou tousa i té paré pédi pou nou, ès nou pa gen plis lanmou ankò annan nou tchò pou Jézi ? (li 1 Pierre 1:8).

10. Kisa Jéova sakrifyé pou bay ranson-an ?

¹⁰ É Jéova ? Kisa i té paré pédi pou Jézi péyé ranson-an ? Jéova pi pròch di Jézi pasé nenpòrt ki papa ké so pitit (Prov. 8:30). Atò, imajiné sa i dèt rousanti lò Jézi té ka gen éprèv asou éprèv. Imajiné kouman i soufri lò i wè kouman yé malmennen so pitit, kouman yé pa asèpté kouté l’ é kouman yé fè l’ soufri !

11. Ki èkzanp ka pèrmèt nou konprann sa Jéova rousanti lò yé tchwé Jézi ?

¹¹ Roun papa ouben roun manman ki pédi roun timoun savé kouman roun moun ka soufri lò sa ka rivé l’. A pa paské nou gen lafwa annan rézirèksyon-an ki nou pa ka soufri lò nou ka pédi roun moun nou kontan. Sa èkzanp-a ka pèrmèt nou konprann kisa Jéova rousanti lò i wè so pitit i té kontan soufri épi mouri annan lannen 33  c (Mat. 3:17).

12. Kisa to pouvé fè anvan jou Mémoryal-a rivé ?

¹² Anvan Mémoryal-a rivé, ès to pa pouvé pasé roun ti moman ka étidyé ranson-an lò to ka étidyé to rounso ouben ké to fanmi ? To pouvé sèrvi Guide de recherche pour les Témoins de Jéhovah ouben ròt zouti pou fè réchèrch pou chaché konnèt plis bagaj asou ranson-an d. Anplis di sa, fè tousa to pouvé pou to swiv program pou li Labib-a pou Mémoryal-a to ké trapé annan Cahier pour la réunion Vie chrétienne et ministère. É jou Mémoryal-a, gadé ladorasyon pou koumansé lajournen-an yé préparé pou sa jou-a. Si to tchò paré pou Mémoryal-a, to ké pouvé idé ròt moun profité di sa lévènman-an osi (Esd. 7:10).

IDÉ RÒT MOUN

13. Kisa nou divèt fè an prémyé pou idé ròt moun profité di Mémoryal-a ?

¹³ Kouman to pouvé idé ròt moun profité di Mémoryal-a ? Pou koumansé, a  pou to envité yé. A vré, nou ka fè l’ lò nou ka préché di kaz an kaz. Mé sonjé kimoun to té ké lé envité osi kou, parèkzanp, moun di to fanmi, to kolèg travay, to kanmarad lékòl ouben ròt moun to konnèt. É si to pa gen asé envitasyon, to pouvé voyé roun lyen pou yé gen yé envitasyon. Pitèt roun patché moun ké désidé vini, to pa savé (Eccl. 11:6).

14. Bay roun èkzanp ki ka montré poukisa sa enpòrtan pou roun moun rousouvwè so pròp envitasyon.

¹⁴ Lò to ka bay roun moun roun envitasyon, sa pouvé bay li anvi vini. Men sa ki rivé roun sò so mari pa té Témwen. Roun jou, so mari té tou fyèr lò i di li ki i té ké vini annan Mémoryal-a ké li. Nou sò pa konprann anyen paské, anvan sa, i té ja envité so mari plizyèr fwa mé i pa té jen asèpté vini. Poukisa i chanjé lidé ? Mouché-a èspliké ki roun ansyen i té konnèt té vini bay li roun envitasyon. I vini annan Mémoryal-a sa lannen-an épi plizyèr lannen apré osi.

15. Kisa nou pa divèt bliyé lò nou ka envité roun moun pou Mémoryal-a ?

¹⁵ Pa bliyé ki pitèt sa-ya to ka envité ka pozé yé kò késyon, èspésyalman si yé pòkò jen vini annan nou réinyon. A ké roun bon bagaj si to ka pran tan réfléchi asou ki késyon yé pouvé pozé to épi préparé to kò pou réponn yé (Col. 4:6). Parèkzanp, roun ran pouvé doumandé yé kò : « Kisa ki ka pasé pannan sa sérémoni-a ? Konmyen tan sa ké pran ? Ès a pou mo mété roun lenj èspésyal ? Ès mo ké gen pou péyé pou mo antré ? Ès yé ka fè lakèt ? » Lò to ka envité roun moun pou Mémoryal-a, doumandé li : « Ès ou gen késyon ? » épi réponn késyon moun-an gen. To pouvé sèrvi vidéyo Sonjé sakrifis Jézi ké Kisa ki ka pasé annan roun sal di Rwayonm ? pou montré li sa ki ka pasé pannan nou réinyon. Épi osi, to pouvé itilizé bèl ti enfòrmasyon i gen osi annan  léson 28 di liv Viv ké tchò kontan pou tout-tan !

16. Ki ròt késyon roun moun ki vini annan Mémoryal-a pouvé pozé so kò ?

¹⁶ Apré Mémoryal-a, pitèt roun moun ké gen késyon. Pitèt i ké doumandé so kò poukisa i pa gen bokou moun, pitèt menm pyès moun, ki manjé dipen-an ké bwè diven-an. Pitèt i ké lé savé osi konmyen fwa nou ka fè Mémoryal-a ouben si nou ka fè menm bagaj-a pou tout nou réinyon. A vré, diskour Mémoryal-a ja ka palé di sa, mé roun moun ki ka vini pou prémyé fwa-a ké bézwen plis èsplikasyon. Donk, artik « Pourquoi les Témoins de Jéhovah célèbrent-ils le Repas du Seigneur différemment des autres religions ? », asou jw.org, ké idé to. Nou lé fè tousa nou pouvé anvan, pannan épi apré Mémoryal-a pou idé ‘tout sa yé tchò paré pou asèpté lavérité-a’ profité di sa lévènman-an (Actes 13:48).

ANKOURAJÉ SA-YA KI ARÉTÉ VINI ANNAN RÉINYON-YAN

17. Kouman ansyen-yan pouvé ankourajé sa-ya ki arété vini annan réinyon-yan ? (Ézéchiel 34:12, 16).

¹⁷ Si to ansyen, kisa to pouvé fè pannan lépòk Mémoryal-a pou ankourajé sa-ya ki arété vini annan réinyon-yan ? A pou to montré yé ki to ka gadé pou yé ké tout to tchò (li Ézéchiel 34:12, 16). Anvan Mémoryal-a, fè tousa to pouvé pou to jwenn sa-ya ki arété vini annan réinyon-yan. Di yé ki to kontan yé é ki to lé fè tousa to pouvé pou idé yé. Envité yé vini annan Mémoryal-a, é si yé ka vini, byen rousouvwè yé. Apré Mémoryal-a, kontinyé alé wè ouben aplé sa frè ké sò-ya, é idé yé rouvini òbò Jéova (1 Pierre 2:25).

18. Kouman nou chak nou pouvé ankourajé roun frè ouben roun sò ki arété vini annan réinyon-yan ? (Romains 12:10).

¹⁸ Chak moun annan asanblé-a pouvé ankourajé roun frè ouben roun sò ki  arété vini annan réinyon-yan é ki ka vini annan Mémoryal-a. Kouman ? A pou nou janti ké li épi annan fason nou ka fè ké li, nou ka montré l’ ki nou kontan l’ é ki nou ka rèspèkté l’ (li Romains 12:10). A pou to di to kò ki sa ti brébi-a pitèt ézité anvan i rouvini annan roun réinyon. Pitèt i té pè nou pa byen rousouvwè l’ e. Alòr, pa mété l’ malalèz, pa pozé l’ késyon ki ké jennen l’ é pa di l’ pyès bagaj ki pouvé fè l’ lapenn (1 Thess. 5:11). Frè ké sò-ya ki arété vini annan réinyon-yan ka fè parti di nou fanmi èspirityèl toujou. Nou kontan lò yé ka roukoumansé adoré Jéova ké nou ! (Ps. 119:176 ; Actes 20:35).

19. Ki bénédiksyon nou ka jwenn lò nou ka fété lanmò Jézi ?

¹⁹ Nou byen kontan Jézi di nou sonjé so lanmò chak lannen é nou ka konprann poukisa sa enpòrtan. Lò nou k’alé annan Mémoryal-a, nou ka trapé roun patché bénédiksyon é nou pouvé idé ròt-ya trapé bénédiksyon osi (Is. 48:17, 18). Nou ka fè nou lanmou pou Jéova ké pou Jézi vin pi fò, nou ka montré ki nou gen rékonésans pou tousa yé fè pou nou, nou ka vin pi pròch di nou frè ké sò-ya é pitèt nou ké gen lokazyon èspliké ròt moun kouman yé menm osi yé pouvé profité di tousa ranson-an ka pèrmèt nou gen. Donk annou fè tousa nou pouvé pou nou préparé nou kò pou jou ki pi enpòrtan annan lannen-an !