1. Éé ní ea náa vaá deè Sẹ̀lẹ̀nù Ge Kẽ̀èa Boo Ú Kráìst a bọọ èl dénè deé ea di mm̀ gbáá ẹ́? (Lúùk 22:​19, 20)

 KILMA ló gbò níí Jìhóvà, deè Sẹ̀lẹ̀nù Ge Kẽ̀èa Boo Ú Kráìst ní ea dú dee ea bọọ lọ̀l vaá à lee ea di mm̀ buù gbáá ẹ́. Níà áá sẹ̀lẹ̀nù e Jíízọ̀s beè kọ́ nè pá a gbò nyòòne nvée kọ bàá sẹlẹ ẹ́. (Bugi Lúùk 22:​19, 20.) À íe gã́bug nú ea náa vaá è ólò sí kẽè sẹ̀lẹ̀nùí. Naanii èé ló bel boo sìgà.

2. Éé ní ea ólò naa kọ é sí kẽè Sẹ̀lẹ̀nù Ge Kẽ̀èa Boo Ú Kráìst e?

² Sẹ̀lẹ̀nù Ge Kẽ̀èa Boo Ú Kráìst ólò nvèè bá nèi kọ é bugi togó boo bé e nu ààaá dú bíi naa, nè gbò tã́áná dee bá eé íe lọl ló. À ólò kẽeí nyíe bé eé láá zogè kọọ̀ nyíéi ẹ́ẹ́ ló ú vààa gyọ́ọ̀ Jíízọ̀s naa. (2 Kọ́r. 5:​14, 15) À ólò naa nagé kọọ̀ pá vígà nè bẹ̀ì é ié nèà deè ge “siè kpóó ló ene.” (Róm̀ 1:12) Buù gbááí, gã́bug gbò e bà náa ólò si ná nònù àbèè ge kọ́ kpẹ̀a ólò sí kẽè sẹ̀lẹ̀nùí. Lé bá e bà túúmá va tṍó e bà sí kẽè sẹ̀lẹ̀nùí, a náa kọọ̀ sìgà ọ̀và á beeláfùl ge kpáá fã̀ Jìhóvà. Vaá gã́bug gbò e bà íe lèèma boo béè nú e bà mon vaá dã̀, a daamà togó gè nó Kpá Káí. Dénè gbò nuí ní ea ólò naa kọọ̀ Sẹ̀lẹ̀nù Ge Kẽ̀èa Boo Ú Kráìst á palàge bọọí ló é!

3. Mósĩ́ deè ní e Sẹ̀lẹ̀nù Ge Kẽ̀èa Boo Ú Kráìst ólò gbá pá vígà beeá ló bàlà booí é? (Ẹ̀b nàgé fòtó.)

³ Bugi nagé togó boo bé e Sẹ̀lẹ̀nù Ge Kẽ̀èa Boo Ú Kráìst ólò gbá dénè pá vígà beeá ló bàlà booí naa. Gbò Neǹ Ditõ̀ò Jìhóvà ólò bõoná vaá sẹlẹ sẹ̀lẹ̀nùí tṍó e nàànì ni dọ̀. È ólò dé kpéè ló lòbèl ea baatẽ́ bé e nu ààaá palàge dú bíi naa. È ólò ọlí bàà kà sọ́l, tenmà fétúlú nè míí, vaá naa “amen” ló ténì tóm tãagã ló Bàrì e ólò tã̀àgã̀. Tẽ̀ènè íb bá ní e dénè bõ̀ònatõ̀ò ólò sẹ̀ẹ̀mà sẹ̀lẹ̀nùí mm̀ nú ea é 24 ávà ẹ. Dòòmà dẽe ló bé e nyíè Jìhóvà nè Jíízọ̀s ólò ẹẹ naa tṍó  e bà mon kọọ̀ è gbáàa ló vaá nvèè va ka ló mm̀ na sĩ́deèí!

4. Éé ní eé ló bel boo mm̀ nakà togó belí é?

⁴ Mm̀ nakà togó belí, èé ló bel boo nagbò bíbví: Mósĩ́ deè ní eé láá kpoogá dee ló nyòòmà Sẹ̀lẹ̀nù Ge Kẽ̀èa Boo Ú Kráìst e? Mósĩ́ deè ní eé láá nvèè bá nè dõona gbò kọ bàá ié bélè lọl ló é? Vaá mósĩ́ deè ní eé láá nvèè bá nè gbò e bà náa ólò si ná nònù àbèè ge kọ kpẹ̀a ẹ́? Ààla gbò bíbví é nveè bá nèi kọ é di kpènà ló nyòòmà nakà sẹ̀lẹ̀nù ea palàge dú bíií.

MÓSĨ́ DEÈ NÍ EÉ LÁÁ KPOOGÁ DEE LÓ NYÒÒMÀ SẸ̀LẸ̀NÙ GE KẼ̀ÈA BOO Ú KRÁÌST E?

5. (a) Éé ní ea náa vaá à bọ́ló kọ é bugi togó boo bélè e ólò ié lọl ló nu ààaá ẹ́? (Psalm 49:​7, 8) (b) Éé ní eo nóò lọl ló vídiò ea kọlà Éé Ní Eaẹ̀ Naa Vaá À Jíízọ̀s À Ù E?

⁵ Enè sĩ́deè eé láá kpoogá dee ló nyòòmà Sẹ̀lẹ̀nù Ge Kẽ̀èa Boo Ú Kráìst, dú gè bugi togó boo bélè eé íe lọl ló a ú. Áá beele née gáẹ̀ láá aalá bẹẹ bá lọl bá náàkyọ̀ nè ú. (Bugi Psalm 49:​7, 8; ẹ̀b nàgé vídiò ea kọlà Éé Ní Eaẹ̀ Naa Vaá À Jíízọ̀s À Ù E?) a A beè tú gã́bug nu bá Jìhóvà nè Jíízọ̀s kọbé Jíízọ̀s láá tú a dùm aamái. (Róm̀ 6:23) Bé e kilsĩ́ gè bugi togó boo nú e Jìhóvà nè Jíízọ̀s ne mm̀ ge aamái naa, níà bé eé kpáá palàge nvèè ka ló nu ààaí naa ẽ́. Naanii èé ló bel boo nú ea beè tú bá Jìhóvà nè Jíízọ̀s kọbé bà láá aalái. Sõò kọbé è kálá naa vó, éé ní e nu ààa tõó dọ̀ ẹ?

6. Éé ní e nu ààaá bãàa m ẽ́?

⁶ Nu ààa dú gã́ ki e bàé láá zalmá nu òòmà nvee a dọ̀. Ádàm beè gbõoma tṍó e Bàrì beè dèmie. Tṍó ea sí pọ́lọ́, a beè pee nèà dee gè tõó dùm dọ̀ọ̀mà dẹ̀-dẹ̀ e ẹlẹ nè pá a nvín beè ié. Kọbé è láá kpáá ié nú e Ádàm beè peeá, Jíízọ̀s beè tú a dùm ea gbõoma vaamái gyọ́ọ boo. Tṍó e Jíízọ̀s beè di boo kunukẽ̀í, “Náa beè sí tọ́ọ̀ kà pọ́lọ́, vaá tọ́ọ̀ nen gáà gbĩ kẹ̀lẹ̀ mòníé m.” (1 Pít. 2:22) Tṍó ea ú, a beè tú a dùm ea gbõomaá zalmá kà lèlà nú e Ádàm beè peeá.​—1 Kọ́r. 15:45; 1 Tím. 2:6.

7. Mókà ẹ̀bmà ní e Jíízọ̀s beè tení bá tṍó ea beè di boo kunukẽ̀í ẽ́?

⁷ Jíízọ̀s beè kilsĩ́ gè bọ́ló dẹ̀lẹ̀ nyíé boo nè a Tẹ̀ ea di káála, náa kal ló béè kọọ̀ a beè tení bá gã́bug ẹ̀bmà tṍó ea beè di boo kunukẽ̀í. Jíízọ̀s beè gbõoma, sõò a beè gbàntṍ ló a tẹ̀ nè a kà e bà náa beè gbõoma. (Lúùk 2:51) Tṍó ea ni tóólá òb nè sìgà gbáá, a beè dú bíi kọ á kìn tã́gĩ̀ bá ea é náa kọ á gá bọ́ló dẹ̀lẹ̀ nyíé boo àbèè ge lọ̀l togó kèbá. Tṍó e Jíízòs ni dú kànen, a beè dú bíi kọọ̀ á kìn ẹ̀bmà ẹ̀b ea aa bá Sétàn ea dú Pọ́lọ́ Nyómá, bã̀àna tṍó ea beè kọ́ nèe kọ á gá bọ́ló dẹ̀lẹ̀ nyíé boo nè Bàrì. (Máát. 4:​1-11) Sétàn beè gbĩ́ kọọ̀ Jíízọ̀s á sí pọ́lọ́ kọbé náa láà kpẽ́ nu ààaá.

8. Mókà dõona kà gbò ẹ̀bmà ní e Jíízọ̀s beè kpáá tení bá ẹ́?

⁸ Tṍó e Jíízọ̀s géè kọ́ kpẹ̀a gbẹá boo kunukẽ̀í, a beè kpáá tení bá gã́bug ẹ̀bmà. A beè kpeesĩ́ ló nàà uú boo vaá ba beè gbĩ́ gè fẹ́ẹ. (Lúùk 4:​28, 29; 13:31) A beè ĩ̀ìmà nàgé gã́bug lọ̀ ea aa bá pá a gbò nyòòne nvée boo béè kọọ̀ bà náa beè gbõoma. (Máàk 9:​33, 34) Tṍó e bà géè beeláẹ bel ló, ba beè bòmie vaá nvèèmàẹ lẹ́. Tṍó e bà náa vó lọ̀l, ba beè gbóó fẹ́ẹ belí neǹ pọ́lọ́, vaá a beè ú mm nyaaló. (Híb. 12:​1-3) Jìhóvà náa beè kpènàe lọl bá dee  deè nvée tã̀àgã̀ ea beè kpeesĩ́ ló tṍó ea beè di boo kunukẽ̀í. b​—Máát. 27:46.

9. Ú vààa gyọ́ọ̀ Jíízọ̀s tọ́aí ló naa vàẹ? (1 Pítà 1:8)

⁹ Mm̀ kà-kà, Jíízọ̀s beè mòn gã́bug tã̀àgã̀ kọbé à láá aalái. Tṍó e bugì togó boo bé e Jíízọ̀s beè tú a dùm aamái naa, é kọ náa bọ́ló kọ é palàge vùlèe?​—Bugi 1 Pítà 1:8.

10. Éé ní e Jìhóvà beè naa kọbé à láá aalái é?

¹⁰ Èé kọ́ vàẹ kilma ló Jìhóvà ẹ? Éé ní e Jìhóvà beè naa kọbé Jíízọ̀s láá tú a dùm aamái ẽ́? Gbaa ló ea di zẹ̀ẹ̀ Jìhóvà nè Jíízọ̀s palàge agabá èl gbaa ló ea ólò láá di zẹ̀ẹ̀ nvín nè tẹ̀. (Pró. 8:30) Bugi togó boo gã́bug zọ̀ e Jìhóvà beè tení bá tṍó ea mon tã̀àgã̀ e Jíízọ̀s gé téní bá gbẹá boo kunukẽ̀í. Mm̀ kà-kà, a beè palàge zọ̀ Jìhóvà tṍó ea mon a Sã́áná e bà gé gbẹ́ẹ, biigèe ló, vaá boomàe bàg.

11. Nè nu dòòmà bá ea zógè bé e nu beè tọá ló Jìhóvà naa tṍó e bà géè fẹ́ Jíízọ̀s.

¹¹ Kọ̀láá kà tè nè kà e ba nvín ni ú nyímá íb zọ̀ nè nyaaló e bà ólò tení bá. È íè zìgà kọọ̀ Bàrì é kẽee gbò e ba beè ù, sõò, níí náa ólò lọ̀l nyaaló e ólò ié tṍó e nen e vulè ú. Nakà nu dòòmà báí nveè bá nèi kọ é dã́ ból ló bé ea beè tọá ló Jìhóvà naa tṍó ea mon a Sã́áná ea vulè ea gé mon tã̀àgã̀ nè tṍó e bà fẹ́ẹ mm̀ gbáá 33 C.E. c​—Máát. 3:17.

12. Mósĩ́ deè ní eé láá kpoogá dee ló nyòòmà Sẹ̀lẹ̀nù Ge Kẽ̀èa Boo Ú Jíízọ̀s e?

¹² Lọl kátogóí tẹlẹ tṍó Sẹ̀lẹ̀nù Ge Kẽ̀èa Boo Ú Kráìst, àé dú lé be ò noo gè nó nu ea kil ló nu ààaá tṍó eo gé nó Kpá Káí boo o lóó àbèè mm̀ bọọ fã̀ pá tọ? Be ò íè Research Guide for Jehovah’s Witnesses (mm̀ bọọ dém bel) àbèè dõona kà gbò kpá ea é nveè bá nè ni kọ ó láá dã́ ból ló togó belí, tú gbĩimatẽ́ ló gã́bug nú ea kil ló nu ààaí. d Nagé, nyoone nòònù bugì Kpá Káí Ea Kil Ló Sẹ̀lẹ̀nù Ge Kẽ̀èa Boo Ú Kráìst ea di mm̀ Bẹẹ Dùm Dìbelí Gbò E Bà Gé Nyoone Nvéè Kráìst nè Bẹẹ Sìtóm Kọ̀ Kpẹ̀a​—Kpá Bõ̀ònaló Sìtóm. Vaá lelà deè sẹ̀lẹ̀nùí, ágá tá ní nyíe gè ẹ̀b Nú Ea Dì Nè Dee Ea Nyoone Sẹ̀lẹ̀nù Ge Kẽ̀èa Boo Ú Kráìst. Tṍó e kpóògà dee ló nyòòmà sẹ̀lẹ̀nùí, àé náa kọ é di kpènà ló gè nvèè  bá nè dõona gbò kọ bàá láá ié bélè lọl ló.​—Ẹ́zrà 7:10.

NVÈÈ BÁ NÈ DÕONA GBÒ KỌ BÀÁ IÉ BÉLÈ LỌL LÓ SẸ̀LẸ̀NÙÍ

13. Éé ní ea dú túá kà nú eé náa kọbé è láá nvèè bá nè dõona gbò kọ bàá ié bélè lọl ló sẹ̀lẹ̀nùí ẽ́?

¹³ Mósĩ́ deè ní eé láá nvèè bá nè dõona gbò kọ bàá ié bélè lọl ló sẹ̀lẹ̀nù Ge Kẽ̀èa Boo Ú Kráìst e? Túá kà nú eé náa dú gè kolí va. Gbáló gè kolí gbò nen tṍó e gé kọ́ kpẹ̀a, èé láá emí béè gbò eé kólí. Gbò eé émí béeí é láá dú bẹẹ dúàló, gbò e gé gbá siá tóm, gbò e gbáà dia tọọ̀ kpá, nè dõona gbò. Kọbèè née íè gã́bug kpá kól e ba beè naa príǹt, èé láá lẹ̀ẹ̀là líǹk tenmá boo fóòn má va. Gã́bug gbò e bàé sí é láá bọọí ló!​—Ẹ̀klì. 11:6.

14. Nè nu dòòle ea zógè bé e gè sí tọ gé kolí nen nyòòmà sẹ̀lẹ̀nùí ié kpóó naa.

¹⁴ Àé palàge tàn nen gè sí kẽè sẹ̀lẹ̀nùí tṍó eo síì tọ lóóe gé kolíe. Enè dee, a beè bọọ́ ló ene kà vígà pábia tṍó ea dóm e bè náa ólò sí nònù kọ́ nèe kọọ̀ à gbĩ́ gè zọẹ̀ẹ siè kè kẽè sẹ̀lẹ̀nùí. Éé ní ea beè naa kọ á bọọẹ́ ló é? A beè bọọẹ́ ló boo béè kọọ̀ tṍó ea kil nvéeá, a beè olòó kọlíe kọ á sí kẽè sẹ̀lẹ̀nùí, sõo náa ólò zìgà. Kátogóí, éé ní ea náa vaá à tànie gè sìe? À kọ́ọ̀, “Nen beè dù gé kolím.” A beè baatẽ́ kọọ̀ ene kà neǹ kànen ea nyímàè ló beè kolìèe. Boo béè vó, a dóm beè sí kẽè sẹ̀lẹ̀nùí gbááá nè gã́bug gbáá ea bẽene.

15. Éé ní ea dú bíi kọ é sẹẹa bùlà tṍó e gé kọ́lí nen siimá kẽè Sẹ̀lẹ̀nù Ge Kẽ̀èa Boo Ú Kráìst e?

¹⁵ Nyimá kọọ̀ gbò e kólì é láá bĩiná bíb​—èlmà tõ̀ò, be bà gáà si bẹẹ nònù tọ́ọ̀ dee. Vóà naa, à dú bíi kọ é bugi togó boo gbò bíb e bàé láá bĩiná kọbé è áálá nèva. (Kọ́l. 4:6) Dì belí nu dòòmà bá, sìgà gbò é láá bĩiná kọọ̀: ‘Éé ní ea é nááá gbẹá kè sẹ̀lẹ̀nùí ẽ́?’ ‘Kuu kà ávà ní e bàé sẹẹmà sẹ̀lẹ̀nùí ẽ́?’ ‘É kọ̀ à íe enè íb kọ̀là ló e bàé nveà siimá?’ ‘É kọ bàé kpẽ́ kpègè bã̀àmà?’ ‘É kọ àé dú bíi kọ ḿ tẹlẹ̀ kpègè?’ Tṍó e gé kólí gbò nen siimá kẽè sẹ̀lẹ̀nùí, èé láá bĩiná va be bà íe bíb ea dìvá nyíe gè bĩiná, vaá è gbóó aalá nèva. Nagé, èé láá zogè va vídiò ea kọlà Kẽ̀èa Boo Ú Jíízọ̀s nè Éé Ní Ea Ólò Naaá  Kingdom Họ́ọ̀l lẹ? kọbé bà dã́ ból ló bé e bẹẹ nònù ólò sẹ̀ẹ̀a naa. nu gè nò ea di mm̀ kpá ea kọlà Dé kpéè Ló Dùm Dọ̀ọ̀mà Dè-dè! fáálá gã́bug nú eé láá kọ́ nèva kilma ló Sẹ̀lẹ̀nù Ge Kẽ̀èa Boo Ú Kráìst.

16. Mókà gbò bíb ní e gbò e bà sí kẽè sẹ̀lẹ̀nùí é láá bĩiná ẽ́?

¹⁶ Tṍó e baa ni sí kẽè sẹ̀lẹ̀nùí lọ̀l, gbò e beè kolí é láá kpáá bĩiná dõona kà bíb. Bàé láá bĩiná nú ea náa vaá pọ́ì ńkem̀ gbò ní e bà dé fétúlúá vaá ṍ mííá ẽ́, é be à íe gbò e bà dé àbèè ge õ̀. Bàé láá bĩiná nágé gã́bug tṍó e ólò sẹlẹ́ buù gbáá. Vaá bàé láá bĩiná be níà bé e ólò sẹlẹ dénè bẹẹ nònù naa ẽ́. Náa kal ló béè kọọ̀ bà ólò ló bel boo gbò gáí gbẹá kè sẹ̀lẹ̀nùí, gbò e bà ã́àa dùí é láá bĩiná bíb ea é náa kọ ó kpáá palàge baatẽ́ nèva. Togó bel ea di boo jw.org ea kọ́ọ̀, “Why Do Jehovah’s Witnesses Observe the Lord’s Supper Differently From the Way Other Religions Do?” é nveè bá nèi kọ é láá aalá sìgà ba bíb. Èé piigà bé e bẹẹ kpóó sim tùlà naa ge nvèè bá nè “gbò e bà ié lé bùlà” kọbé bà láá ié bélè lọl ló sẹ̀lẹ̀nùí​—besĩ́ à kálá sẹ̀ẹ̀à, tṍó ea gé sẹẹà, nè tṍó ea ni sẹẹà lọ̀l.​—Tóm 13:​48, NW.

NVÈÈ BÁ NÈ GBÒ E BÀ NÁA ÓLÒ SINÁ NÒNÙ ÀBÈÈ GE KỌ́ KPẸ̀A

17. Mósĩ́ dèe ní e gbò kànen é láá nvèè bá nè gbò e bà náa ólò si ná nònù àbèè ge kọ́ kpẹ̀a ẹ́? (Èzíkiẹ̀l 34:​12, 16)

¹⁷ Mósĩ́ deè ní e gbò kànen é láá nvèè bá nè gbò e bà náa ólò si ná nònù àbèè ge kọ́ kpẹ̀a tṍó Sẹ̀lẹ̀nù Ge Kẽ̀èa Boo Ú Kráìst e? Zogè kọ ò bulàì nú ea kil vá ló. (Bugi Èzíkiẹ̀l 34:​12, 16.) Besĩ́ sẹ̀lẹ̀nùí kálá sẹ̀ẹ̀à, olòó sii vá ló. Naanii kọ bàá nyimá kọọ̀ ò gé bulai nú ea kil vá ló vaá ò gbĩ́ gè nveenii bá neí va. Kolíí va kọ bàá dú kẽè sẹ̀lẹ̀nùí. Tui bàà bá tuumaí va be bà dú. Tṍó e sẹ̀lẹ̀nùí ni sẹẹà lọ̀l, olòó sii vá ló àbèè ò kólií va boo fóòn, vaá ò nveenii bá nei va kọbé bà láá òòa kẽ dú ló Jìhóvà.​—1 Pítà. 2:25.

18. Mósĩ́ dèe ní e dénè bẹ̀ì é láá nvèè bá nè gbò e bà náa ólò si ná nònù àbèè ge kọ́ kpẹ̀a ẹ́? (Róm̀ 12:10)

¹⁸ Kọ̀láá nen ea di mm̀ bõ̀ònatõ̀ò é láá  nvèè bá nè gbò e bà náa ólò si ná nònù àbèè ge kọ́ kpẹ̀a e bà sí kẽè Sẹ̀lẹ̀nù Ge Kẽ̀èa Boo Ú Kráìst. Mósĩ́ deè e? Èé láá naa vó tení dú ló gè vùlè va, naá va lé, vaá fã̀ va dẽe. (Bugi Róm̀ 12:10.) Kẽea boo kọ àé láá dú kọọ̀ náa beè valí ló pá vígàí gè òòa kẽ dú nònù. Be à sẹlẹ, pọ̀ beè sií va kọ bà náa é tú lé bá tuumàè va. e Vóà naa, ó gá bĩiná va bíb ea é síìmà va kẹ́ẹ àbèè ge ló gbò bel ea é kyẽ́ va. (1 Tẹ̀s. 5:11) Pá vígàí ólò zọ̀i fã̀ Bàrì. Nyíéi ẹ́ẹ kọ bà kpáá zọ̀i fã̀ Bàrì!​—Ps. 119:176; Tóm 20:35.

19. Mókà bélè ní e ólò ié lọl ló gè kẽea boo ú Jíízọ̀s e?

¹⁹ Nyíéi ẹ́ẹ kọọ̀ Jíízọ̀s kọ́ nèi kọ é olòó kẽ̀èa boo a ú buù gbáá, vaá è dã́à ból ló nú ea náa vaá à palàge dú bíi. Tṍó e náà vó, dõona gbò nè bẹ̀ì ólò ié bélè lọl ló mm̀ gã́bug sĩ́deè. (Àìz. 48:​17, 18) Bẹẹ vulè kilma ló Jìhóvà nè Jíízọ̀s ólò kpáá bọọ dọ ló. È ólò zogè kọọ̀ nyíéi palàge ẹẹ ló nú e bà náa nèi. À ólò naa kọọ̀ vulè è íè kilma ló pá vígà á kpáá agaló. Vaá èé láá nvèè bá nè dõona gbò kọ bàá nyimá gbò nú e bàé náa kọbé bà láá dé kpéè ló gbò tã́áná dee bá e nu ààaá é náa kọ é ié. Naanii èé piiga boo gè kpoogá dee ló nyòòmà Sẹ̀lẹ̀nù Ge Kẽ̀èa Boo Ú Kráìst níí gbááí​—ea dú dee ea bọọ lọ̀l vaá à lee!