1. Ugddas Dis vorsacho sogleam-von mhotvacho dis kiteak zaun asa? (Lukas 22:19, 20)

 JEHOVACHEA lokank, Jezuchea Mornnacho Ugddas Dis, vorsacho sogleam-von mhotvacho dis zaun asa. Karonn Jezun aplea xisank ho ekuch dis ugddas korunk adnea dilʼli. (Lukas 22:19, 20 vachat.) Tor hea disa pasot ami axeun ravtat. Kiteak? Tachim thoddim karonnam ami fuddem polloum-ia.

2. Koslea karonnank lagon Ugddas Dis amkam khas asa?

² Soddvonn kitli mhotvachi, ani hea vorvim amkam koslim besanvam mellttolim, tea vixim niallunk Ugddas Dis amkam modot korta. Toxench, Jezuchea bolidana pasot ami khoinchea vattamnim upkariponn dakhounk zata tea vixim chintunk amkam modot zata. (2 Kor. 5:14, 15) Tea bhair, Ugddas Disak “eka-mekak urba diunk” amkam sondhi melltta. (Rom. 1:12) Toxench, dor vorsak hea disak zaitim seva bond kelolim porgottnnaram hajir zatat. Ani tea vellar bhav-bhoinnam tankam mogan ieukar ditat tem polloun, thoddim zannam porot Jehovachi seva korunk suru korunk nirnnoi ghetat. Toxench, Ugddas Disak hajir zatat tim zaitim zannam, tim kitem polloitat ani aikotat taka lagon Bible xikonk fuddem sortat. Khorench, hea soglea karonnank lagon Ugddas Dis amkam khub khas asa!

3. Ugddas Disa vorvim sonvsarbhor aslolea amchea bhav-bhoinnam modem ekvott koso vaddtta? (Chitr pasun polloiat.)

³ Itlench nhoi, Ugddas Disak hajir zaunk anik ek karonn mhunnttlear, tea disa sonvsarbhor aslolea amchea bhav-bhoinnam modem ekvott vaddtta. Zoxem, dor eka zagear suria buddot voita toso, Jehovacho lok Ugddas Disak hajir zatat ani soddvonn kitli mhotvachi tea vixim ek bhaxonn aikotat. Tim Jehovak  vakhannʼnnechim don gitam gaitat, unddo ani drakxancho soro bhonvddaitat, ani tea kariavollik zatolea char magnneank, kallzantlean “amen” mhunnttat. Ani 24 voram bhitor, sonvsarbhor aslolea soglea sobhamnim oxench zata. Tor ami soglim ektthaim mellon ieun, Jehova ani Jezu pasot amchem upkariponn dakhoitat tem polloun, tankam kitli khuxalkai bhogta astoli nhoi!

4. Hea lekhant ami khoinchea prosnanche zobab polloitolim?

⁴ Hea lekhant, ami tin prosnanche zobab polloitolim: Ugddas Disa pasot ami amchem mon ani kalliz koxem toiar korunk zata? Tantuntlean faido melloun gheunk ami dusreank koxi modot korunk zata? Ani seva bond kelolea porgottnnarank ami koxi modot korunk zata? Hea prosnanche zobab zannam zalʼlean, tea khas disa pasot toiar zaunk amkam modot zatoli.

UGDDAS DISA PASOT AMCHEM MON ANI KALLIZ TOIAR KORUM-IA

5. (a) Soddvonn kitli moladik tacher ami kiteak niall korunk zai? (Stotr 49:7, 8) (b) Jezu Kiteak Melo? hea video-ntlean tumi kitem xiklim?

⁵ Ugddas Disa pasot amchem mon ani kalliz toiar korunk ek mhotvachi vatt mhunnttlear, Jezu Kristan dilʼli soddvonn kitli moladik asa, tea vixim niall korop. Ami amkanch patkantlim ani mornnantlim kednanch soddounk xokchim naslim. (Stotr 49:7, 8 vachat; Jezu Kiteak Melo? ho video pasun polloiat.) a Tor amkam salvar korunk, Jehova Devan manddavoll keli ani aplo put Jezuk dhaddlo zo amchea pasot melo. (Rom. 6:23) Jehovan ani Jezun amchea pasot khub vhoddlo teag kelo. Jitlim chodd ami hea vixim niall kortat, titlench soddvonne pasot amchem upkariponn vaddtta. Tor Jehovan ani Jezun kosle teag kele tantuntle thodde atam ami polloum-ia. Punn poilim, soddvonnent kitem mellon asa tacher dhean dium-ia.

6. Soddvonn mhunnttlear kitem, ani Jezun ti kiteak diunk zai asli?

⁶ Soddvonn mhunnttlear, kitem tori porot haddunk farik kelʼlem mol. Jehovan Adanvak rochlolo tednam, to poripurnn aslo. Punn patok kelea uprant, tannem toxench tache akʼkhe sonstin sasnak jieunchi sondhi hogddaili. Tor ti sondhi porot melloun gheunk, Jezun aplem poripurnn jivit bolidan kelem. Jezu hea prithumer aslo tednam, tannem “koslench patok korunk na, ani tachea tonddantlean naddbudʼdhechim utram ieunk nant.” (1 Ped. 2:22) Tor patok korchea poilim Adanv poripurnn aslo tea toren, mornnachea vellar Jezu pasun poripurnn aslo. Ani hea karonnak lagon, Adanvan jem hogddailʼlem tem to farik korunk pavlo.—1 Kor. 15:45; 1 Tim. 2:6.

7. Prithumer astana Jezuk koslea oddchonneancho fuddo korunk poddlo?

⁷ Prithumer astana Jezun soglea vellar, tem mhunnttlear taka kotthin aslem tednam pasun, Jehovachea adneank pallo dilo. To poripurnn aslo. Torui lhan astana, to aplea opurnn avoi-bapaik khalti ravlo. (Luk. 2:51) Toxench tornnattponnar, tachea avoi-bapaichem aikona zaunk vo Jehovak ovisvaxi zaunk dusreamnim tacher ghatlolo dobhav, taka pois korunk poddlo astolo. Tea bhair to vaddlea uprant, Soitanan Jezuk tallnnent ghalunk proitn kelo ani Jehovak ovisvaxi zaunk tacher dobhav ghatlo. Punn Jezun taka nakarlo. (Mt. 4:1-11) Jezun patok kelʼlem zalear, to soddvonnechem mol farik korunk pavchonaslo. Ani heach pasot, taka patkant ghalunk Soitanan nichov kelʼlo.

8. Jezuk anik khoinchea oddchonneancho fuddo korcho poddlo?

⁸ Jezuk anikui oddchonneancho fuddo korunk poddlo. Zoxem, tachea dusmanamnim taka dhumallo dilo, ani jivexim marunk pasun proitn kelo. (Luk. 4:28, 29; 13:31) Toxench, tache xis zaite pavtti chukle. Tem-ui taka sosunk poddlem. (Mk. 9:33, 34) Tea bhair, tachi kes choltali tednam tachim fokannam kelim ani taka vollvollailo. Toxench, taka ekdom dukhichem ani lojechem  moronn sosunk poddlem. (Heb. 12:1-3) Ani morchea poilim tachea sangata jem kitem ghoddlem, tem soglem Jehovachi modot nastana taka sosunk poddlem. b—Mt. 27:46.

9. Jezun dilʼlea bolidana vixim tumkam koxem bhogta? (1 Pedru 1:8)

⁹ Hoi, amkam soddvonn diunk Jezun ap-khuxen zaite tras ani vollvolle sosle. Tor ami hea vixim chintʼtat tednam tache pasot amcho mog vaddona kai?—1 Pedru 1:8 vachat.

10. Soddvonnechem mol farik korunk Jehovan koslo teag kelo?

¹⁰ Soddvonnechem mol farik korunk Jehovan koslo teag kelo? Eka bapai ani puta modem asonk xokta toslem sogleam-von lagxilʼlem natem, Jehova ani Jezu modem asa. (Mho. 8:30) Tor aplea Putak hea prithumer kitle tras sosunk poddle tem polloun, Jehovak sosunk zaina titlem dukh zalem mhunn dubhav na. Ani lok Jezu sangata krur toren vagle, taka nakarlo, ani taka vollvollailo tem polloun Jehovachem kalliz samkem tutton gelem astolem nhoi!

11. Jezuk jivexim marlo tednam Jehovak koxem bhoglem tem somzaunk ek udharonn diat.

¹¹ Jea avoi-bapain aplea bhurgeak mornnant sanddla tim hem ekdom bore toren somzonk xoktat ki ek bhurgo morta tednam kitli dukh zata. Amkam jivontponnachea bhorvonxeacher khatri asa tem khorem. Punn amcho mogacho konnui morta tednam, sosunk zaina titli dukh amkam bhogta. Tor 33 K.X.-achea Nisan 14 tarker, aplea opurbaiechea Putak tollmollaun marlo tednam, Jehovak kitli dukh bhogli tea vixim ami chintunk zata. c—Mt. 3:17.

12. Ugddas Disa poilim ami kitem korunk zata?

¹² Ugddas Disa poilim ami amchea svotachea obheasant vo Kuttumbik Bhoktent, soddvonn hea vixoi-acher bariksannen obheas korunk zata. Hea vixim kholaien obheas korunk ami Research Guide for Jehovah’s Witnesses vo her prokaxonam uzar korunk zatat. d Toxench, Amchem Kristi Jivit ani Porgottnni—Mittingechi Pustika, hantunt dilʼlem Ugddas Disachem Bible vachop korunk ami chukounchem nhoi. Ani Ugddas Disak asloli Sokallchi Bhokti pollounk ami visorchem nhoi. Hea toren Ugddas Disa pasot ami amchem mon ani kalliz toiar kortat tednam, ami dusreank pasun tantuntlean faido melloun gheunk modot korunk pavtolim.—Ezra 7:10.

DUSREANK FAIDO MELLOUN GHEUNK MODOT KORUM-IA

13. Dusreank Ugddas Disa thaun faido melloun gheunk sogleam-von poilem ami kitem korunk zata?

¹³ Ugddas Disa thaun faido melloun gheunk  ami dusreank koxi modot korunk zata? Poilem mhunnttlear, tankam Ugddas Disachem amontronn diun. Ami porgottnnent mellttat tea lokank apoitolim tem khorem. Punn hachea bhair, ami anik konnank apoitolim tachem ek list korunk zata. Zoxem amchim soirim, amchea sangata kam kortat tim, iskolant xiktat tim, ani amchea vollkhichim. Amchea lagim titlim chhaplolim amontronnam nant zalear pasun, ami tankam tachi electronic kopi dhaddunk zata. Karonn ami amontronnam dilʼlim, tantuntlim kitlim zannam Ugddas Disak hajir zatolim tem ami nokllo.—Up. 11:6.

14. Ami vollkhotat tankam Ugddas Disachem amontronn ditat vo link dhaddttat tednam kitem porinnam zata? Ek onnbhov sangat.

¹⁴ Ami vollkhotat tankam khas korun vochon Ugddas Disachem amontronn ditat vo link dhaddttat tednam tim chodd korun hajir zatat. Hea vixim amkam eke bhoinnicho onnbhov asa. Ticho ghov sotant na. Tinnem taka zaite pavtti Ugddas Disak hajir zaunk sanglolem. Punn to kednanch ieunk na. Ek dis okosmat to Ugddas Disak hajir zatolo mhunn tannem ieun bhoinnik sanglem. Hem aikon bhoinn ojap zali. Uprant tannem bhoinnik sanglem, “Mhaka amontronn mellʼllam.” Taka eka vhoddilan Ugddas Disak hajir zaunk amontronn dilʼlem. Tor bhoinnicho ghov tea vorsak ani toxench anikui zaitim vorsam Ugddas Disak hajir zalo.

15. Ugddas Disachem amontronn ditana ami kitem monant dovrunk zai?

¹⁵ Ami Ugddas Disa pasot zankam amontronnam ditat tim amkam prosn vicharunk xoktat mhunn ami monant dovrunk zai. Khas korun, tim hachea poilim amchea mittingek kednanch hajir zaunk nant zalear. Tor tim kosle prosn vicharunk xoktat, tea vixim ami chintunk zata ani tanche zobab diunk toiari korunk zata. (Kol. 4:6) Zoxem thoddim ghoddie vicharit: ‘Tea kariavollik kitem zatolem?’ ‘Kitlo vell poriant ti kariavoll astoli?’ ‘Umkench nhesop asonk zai kai?’ ‘Thoim hajir zaunk poixe diunk zai?’ ‘Konnui mhoje lagim poixe magtole?ʼ Tor amontronn ditana, “Tumkam hea vixim kosle-i prosn asat?” mhunn ami tankam vicharunk zata. Ani tim kitem-i vichartat zalear, tankam bore bhaxen zobab diunk zata. Toxench, amchea mittingek kitem zata tem somzaunk ami Jezuchea Mornnacho Ugddas  ani Raj-ghorant Kitem Ghoddta? he video pasun uzar korunk zatat. Toxench, Sasnak Khuxalkaien Jieiat! pustokachea odheai 28-ant aslole mudʼde pasun ami tankam sangonk zatat.

16. Ugddas Disak hajir zatat tankam anik kosle prosn asonk xoktat?

¹⁶ Ugddas Disak poilech pavtti hajir zalea uprant, tankam ghoddie anik prosn ieunk xoktat. Zoxem, ‘Konnench unddo kiteak khaunk na ani drakxancho soro kiteak pieunk na’ vo ‘thoddeaninch kiteak bhag ghetlo?’ ‘Ugddas Dis kitle pavtti monoitat?’ ‘Jehovachea Sakxeancheo sogleo mittingo oxech toren zatat?’ He mudʼde Ugddas Disachea bhaxonna vellar sangtat tem khorem. Tori astana, ami tankam anik bariksannechi mahiti diunk poddot. Tanchea hea prosnanche zobab diunk jw.org-acher aslolo, “Why Do Jehovah’s Witnesses Observe the Lord’s Supper Differently From the Way Other Religions Do?” ho lekh amkam modot korunk xokta. Tor Ugddas Disachea poilim, tea Disak, ani tea Disa uprant, ‘sasnachem jivit favo asloleank’ tantuntlean thaun faido melloun gheunk amchean zata tem soglem ami korum-ia.—D.I. 13:48.

SEVA BOND KELOLEA PORGOTTNNARANK MODOT KORUM-IA

17. Seva bond kelolea porgottnnarank vhoddilamnim koxi modot korunk zata? (Ezekiel 34:12, 16)

¹⁷ Ugddas Disa poilim ani uprantchea sumanamnim, vhoddilamnim seva bond kelolea porgottnnarank koxi modot korunk zata? Vhoddilamno, tumkam tanchi kallji asa mhunn dakhoiat. (Ezekiel 34:12, 16 vachat.) Ugddas Disa poilim, zata titlea seva bond kelolea porgottnnarank call korat. Tumkam tancho mog asa, ani tumi tankam modot korunk sodhtat mhunn khatri diat. Tankam Ugddas Disak apoiat. Ani tim Ugddas Disak ailim zalear, tankam mogan ieukar diat. Toxench, Ugddas Disa uprant tankam call korop vo bhett divop bond korinakat. Ani Jehova lagim porot ieunk tankam modot korat.—1 Ped. 2:25.

18. Ami sogleamnim seva bond kelolea porgottnnarank koxi modot korunk zata? (Romkarank 12:10)

¹⁸ Ugddas Disak hajir zatat tea seva bond kelolea porgottnnarank ami sogleamnim modot korunk zata. Koxi? Tanchea sangata mogan, doiallaien ani respedan vagon. (Romkarank 12:10 vachat.) Him amchim mogachim  bhav-bhoinnam sobhent ieunk ghoddie fattim-fuddem zaleant mhunn ami ugddas dovrunk zata. Sobhentlim bhav-bhoinnam apnna vixim kitem chintʼtolim vo apnnak polloun kitem mhunnttolim, hem chintun tim ghoddie fattim sorleant zait. e Tor tim Ugddas Disak hajir zatat tednam, tankam lojek ghaltat tosle prosn vicharinakat vo tankam dukhoita toxem kainch mhunnonakat. (1 Tes. 5:11) Karonn tim amchinch bhav-bhoinnam. Ani porot tanchea sangata mellon Jehovachi bhokti korunk amkam khub khuxalkai bhogta!—St. 119:176; D.I. 20:35.

19. Jezuchea mornnacho ugddas kelʼlean kitem faide asat?

¹⁹ Jezun amkam aplea mornnacho dis, dor vorsak ugddas korunk laila mhunn ami tachim upkari asat. Ani oxem korop kiteak itlem mhotvachem tem ami zannant. Ugddas Disak ami hajir zatat tednam, amkam toxench herank zaitea vattamnim faido zata. (Iz. 48:17, 18) Zoxem, Jehova ani Jezu pasot amcho mog vaddtta, tannim amchea pasot kitem kelam tachem upkariponn dakhounk amkam sondhi melltta, bhav-bhoinnam sangata amchem natem ghott zata. Toxench, soddvonne udexim koxim besanvam mellonk xoktat tem zannam zaunk ami dusreank modot korunk zata. Khorench, Ugddas Dis vorsacho ekdom mhotvacho dis zaun asa. Tor tea Disa pasot toiar zaunk amchean zata tem soglem korum-ia!