1. ¿Jamüsü kojutuka maʼin wamüin tü Outkajawaakat eere Sotuin Waaʼin Outuin Jesús? (Lucas 22:19, 20).

 KOJUTUSÜ maʼin namüin na aʼyataashiikana nümüin Jehová tü kaʼi noutkajaakalü oʼu süpüla sotuin naaʼin outuin Jesús. Shia tü waaʼinrajatkat naashin Jesús süpüla sotuinjachin nia waaʼin waneepia (paashajeʼera Lucas 22:19, 20). Waʼatapajüin maʼin süntüin tia kaʼikat. Waashajaa süchiki jamüin waʼatapajaka maʼin tia.

2. ¿Jamüsü waʼatapajaka maʼin tü Outkajawaakat eere Sotuin Waaʼin Outuin Jesús?

² Jülüjasü waaʼin sutuma tia outkajawaakat tü naaʼinrakat Jehová otta Jesús wapüleerua. Aküjünüsü wamüin tü waaʼinrajatkat süpüla kojutuinjatüin wamüin naapajiraain nikii Jesús waaʼu (2 Cor. 5:14, 15). Soʼunnaa tia outkajawaakat kottiraashii waya namaa na wawalayuukana jee watütüleʼerajiraain waaʼin (Roma 1:12). Wainma na wawalayuu eemiajaakana anoula outkajaakana wamaa juyawai soʼu tia. Noʼutku nayakana aleʼejüshii naya nachikuaʼa nünainmüin Jehová sutuma neʼrüin alin naya napüla na wawalayuukana. Eetaashii joo na wayuu kamalainkana amüin tü pütchi naapajakat jee tü neʼrakat sünain tia outkajawaakat. Suluʼujee tia, ekirajaashii naya sünain tü Bibliakat. Müsüjeseʼe kojutuin maʼin wamüin tia outkajawaakat.

3. ¿Jamüsü watüjaaka saaʼu paaʼinwajiraain na aʼyataashiikana nümüin Jehová soʼunnaa tü Outkajawaakat eere Sotuin Waaʼin Outuin Jesús? (Piirakaa sümüin tü ayaakuaakat).

³ Waʼatapajüin maʼin tia outkajawaakat süka weʼrüin paaʼinwajiraain na aʼyataashiikana nümüin Jehová. Outkajaashii na aküjaliikana pütchi nüchiki Jehová sainküin mmakat süpüshuaʼa süpüla naainjain tia outkajawaakat nikerotapa chi Kaʼikai. Soʼunnaa tia outkajawaakat waapajüin wanee pütchi wayaawataka atuma jamüin naapajiraaka nikii Jesús waaʼu, weeʼirajüin piamasü jayeechi, alatinnüsü tü pankat jee tü wiinokot otta pienchitua suʼuraajünüin wapüleerua. Outkajaweena napüshuaʼa na wawalayuu kepiakana sainküinpünaa tü mmakat soʼuleʼeya tia kaʼikat.  Talatakajasaʼa naaʼin Jehová otta Jesús neʼrapa woutkajaain.

4. ¿Kasa wekirajaainjatka anain sünain ekirajaayakat tüü?

⁴ Sünain ekirajaayakat tüü, wasouteerü eʼipajee pütchikat tüü: ¿Kasa waaʼinrajatka süpüla jaʼyain waaʼu kojutuin wamüin tü Outkajawaakat eere Sotuin Waaʼin Outuin Jesús? ¿Kasa waaʼinrajatka süpüla kojutuin namüin na waneinnua tia outkajawaakat? ¿Kasa waaʼinrajatka süpüla wakaalinjain na eemiajaakana anoula? Watüjaale saaʼu tia, yapeena waya süpüla tia outkajawaakat.

WAAʼINRAJATKA SÜPÜLA KOJUTUIN WAMÜIN TIA OUTKAJAWAAKAT

5. (1) ¿Jamüsü jülüjainjatka waaʼin tü naaʼinrakat Jehová otta Jesús wapüleerua? (Salmo 49:7, 8). (2) Püküja süchiki tü pütüjakat sünainjee tü videokot ¿Jamüshi outaka Jesús?

⁵ Wanee kasa waaʼinrajatka süpüla kojutuin wamüin tü Outkajawaakat eere Sotuin Waaʼin Outuin Jesús shia jülüjale waaʼin tü naaʼinrakat Jesús wapüleerua. Isasüjeʼe wachiki taashin waya suulia tü kaainjalaakat jee tü outaakat nnojoliireje nükaalinjain waya Jesús (paashajeʼera Salmo 49:7, 8; pünaja tü videokot ¿Jamüshi outaka Jesús?). a Nuuʼulaain Jehová outuin chi Nüchonkai waaʼu. Watüjaa aaʼu kapüleein maʼin nümüin Jehová nuuʼulaain tia otta kapüleesia nümüin Jesús naaʼinrüin tia (Roma 6:23). Jülüjale maʼin waaʼin tü naaʼinrakat Jehová otta Jesús wapüleerua, kojuteerü maʼin wamüin naapajiraain nikii Jesús waaʼu. Wekirajaa palajana süchiki tü naaʼinrakat Jesús süpüla naapajiraain nikii waaʼu.

6. ¿Jamüsü süpüla suwalaajünüin saainjala wayuu?

⁶ Sükajee naapajiraain nikii Jesús waaʼu nuwalaajüin Jehová tü naainjalakat Adán. Nukumajünaiwaʼaya Adán lotopuʼusü nukuwaʼipa, shiasaʼa kaainjalapa nia, nnojolitchipa süpüla katüin noʼu süpüla kaʼikat süpüshuaʼa. Akaʼaya na nüchonniikana, nnojoliinnapa süpüla katüin noʼu waneepia. Müshijeseʼe naapajiraain nikii Jesús waaʼu süpüla nuwalaajüin tü naainjalakat Adán. Soʼu yaajachin Jesús mmapaʼa, «nnojoishi nia kaainjalain otta nnojotsü nimeejüin wayuu» (1 Ped. 2:22). Saaʼujee outuin Jesús sümaa maainjalain nia nuwalaajüin tü naainjalakat Adán (1 Cor. 15:45; 1 Tim. 2:6).

7. Püküja waneirua kasa alataka nümüin Jesús.

⁷ Soʼu yaajachin Jesús mmapaʼa, oonooshi nia waneepia nümaa chi Nüshikai mayaainjeʼe niʼrüin müliaa. Jintüliiwaʼaya Jesús, oonooshi nia sümaa nünüiki nüshi jee sümaa sünüiki nii mayaainjeʼe nnojoluin lotuin nakuwaʼipa (Luc. 2:51). Jimaʼaliiwaʼaya Jesús, eesüjaʼa süpüleeruaanüle naaʼin shiiʼiree niʼrülinjachin wayumüin namüin na kachooinkana nia jee nuuʼulaainjachin suulia niʼyataain nümüin Jehová. Shiasaʼa miyoʼupa nia, nimeejeein nia Satanás jee nuuʼulaküin naaʼin shiiʼiree nnojoluin waneepiain nia nümaa Jehová (Mat. 4:1-11). Nüchajaain maʼin sukuwaʼipa Satanás shiiʼiree kaainjalain Jesús jee süpüla isain nüchiki nuwalaajüin saainjala wayuu.

8. ¿Kasa amaa nülataka achikumüin Jesús?

⁸ Soʼunnaa niʼyataain Jesús nümüin chi Nüshikai yaa mmapaʼa, eesü waneirua kasa nülataka achikumüin. Jamüshiijaʼa na wayuu kanainkana aaʼin nia, jashichishii naya nümüin jee noʼutee aaʼinchi nia (Luc. 4:28, 29; 13:31). Nülatirüin sooʼopünaa naaʼin tü mojukat natuma na nikirajüinkana (Mar. 9:33, 34). Wanaa sümaa noutkajaain na sülaülakana Sanedrín süpüla naashajaajiraain süchiki tü naaʼinrajatkat nüka Jesús, aʼyaajünüshi otta meeʼerapalashi nia. Süchikijee tia, oʼutuna aaʼinchi nia maʼaka naaʼin wanee kaʼruwarai otta müliashaanashi nia atumawaa (Heb. 12:1-3). Sülüʼütpa nükalia süpüla outuin nia, nüchecherüinjatü maʼin naaʼin süka nuuʼulaain nia Jehová nümüiwaʼa (Mat. 27:46). b

9. ¿Jamüsü waaʼin jülüjapa waaʼin tü naaʼinrakat Jesús wapüleerua? (1 Pedro 1:8).

 ⁹ Wayaawata aaʼulu wainmain maʼin tü müliaa niʼrakat Jesús süpüla naakajirüin waya. Aijeechi Jesús wapüla süka süpüshuaʼa waaʼin jülüjale waaʼin süpüshuaʼaleeya tü kasa naaʼinrakat wapüleerua waneʼewai wakua (paashajeʼera 1 Pedro 1:8).

10. ¿Kasa naaʼinraka Jehová wapüleerua süpüla naakajirüin waya mayaainjeʼe mojuin maʼin naaʼin sutuma nuuʼulaain tia?

¹⁰ Aishaatashi Jesús nüpüla Jehová. Mayaainjeʼe müin tia, naapüin nikii süpüla outuin nia waaʼu (Prov. 8:30). ¿Jamüsüche naaʼin Jehová niʼrapa müliashaatain maʼin Jesús wanaa sümaa yaajachin nia saaʼu mmakat? Mojukajasaʼa maʼin naaʼin Jehová niʼrapa müliain jee mojutuin atumawaa chi Nüchonkai.

11. ¿Jamüsü süpüla wayaawatüin saaʼu jamüin naaʼin Jehová wanaa sümaa nuʼutunuin aaʼin chi Nüchonkai?

¹¹ Aisü maʼin nümüin wanee wayuu outule nüchon. Outule wanee wayuu aikai maʼin wapüla, mojusü maʼin waaʼin mayaainjeʼe watüjaain saaʼu nasoʼiraajeenain aaʼin na outushiikana. Wayaawatakalaka saaʼu jamüin naaʼin Jehová soʼu 14 nisán soʼu tü juyakat 33 wanaa sümaa niʼrüin müliain jee outuin chi Nüchonkai (Mat. 3:17). c

12. ¿Kasa waaʼinrajatka süpüla wajayatüin kaʼi süpülapünaa süntüin sükalia tü Outkajawaakat eere Sotuin Waaʼin Outuin Jesús?

¹² Sümaʼainruʼu süntüin tü kaʼi süpülajatkalü oʼu tü Outkajawaakat eere Sotuin Waaʼin Outuin Jesús, anasü pikirajaale sooʼomüin süchiki naapajiraain nikii Jesús waaʼu pikirajaapa pümüiwaʼa jee shiale soʼu tü kaʼi puʼwaajakalü oʼu Maleiwa sümaa püpüshi. Pikirajaa süchiki tia sükajee Nachajaayainjatü pütchi na aküjaliikana pütchi nüchiki Jehová jee shiale sükajee waneirua karaloʼuta aashajaaka süchiki tia. d Paashajeʼera tü pütchi aashajeʼennawaikai suluʼujee tü Bibliakat sükalioʼu tia outkajawaakat ojuʼitaka suluʼu Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa otta pünaja tü videokot Aʼwaajaa Maleiwa wattaʼa maalü soʼu tü kaʼi eeinjatkat tü Outkajawaakat eere Sotuin Waaʼin Outuin Jesús. Waaʼinrüle süpüshuaʼa tia, wakaalinjeena na waneinnua süpüla kojutuin namüin tia outkajawaakat (Esd. 7:10).

WAKAALINJA NA WANEINNUA SÜPÜLA KOJUTUIN NAMÜIN TIA OUTKAJAWAAKAT

13. ¿Kasa waaʼinrajatka süpüla kojutuin namüin na waneinnua tü Outkajawaakat eere Sotuin Waaʼin Outuin Jesús?

¹³ Süpüla kojutuin namüin na waneinnua tü Outkajawaakat eere Sotuin Waaʼin Outuin Jesús,  anashii wounejaale naya. Eeshii süpüla weitajüin tü karaloʼuta ounejaayakat waküjapa pütchi otta anasü washajüle nanülia na wayuu wounejaweenakana amüin maʼaka naaʼin na wapüshikana, na waʼyataajiraakana amaa, na koleejiajiraakana wamaa otta waneinnua wayuu weʼraajakana. Eesü süpüla waluwataain wanee enlace sajaʼttüle woulia tü ounejaayakat. Nnojotsü watüjaain saaʼu jeʼreenain na wayuu wounejaakana anteenakana sünain tia outkajawaakat (Ecl. 11:6).

14. ¿Kasa eeka sutuma nuunejaanüin wanee wayuu nutuma wanee laülaashi sünain tü Outkajawaakat eere Sotuin Waaʼin Outuin Jesús?

¹⁴ Eeshi süpüla nuʼuneein wanee wayuu sünain tia outkajawaakat wounejaale nia. Ponusü saaʼin wanee wawala wanaa sümaa nümüin chi suʼwayuusekai sümüin: «Oʼuneechi taya pümaa sünain tü Outkajawaakat eere Sotuin Waaʼin Outuin Jesús». Nnojoishi aküjalin pütchi nüchiki Jehová chi suʼwayuusekai. Mayaainjeʼe wainmatuain suunejaain nia sünain tia outkajawaakat, nnojoipuʼushi nia oʼunuin. ¿Jamüshi nuʼuneeka sünain? Müshi nia sümüin: «Ounejaanüshi taya nutuma wanee laülaashi suluʼu tü outkajaaleekat». Soʼujeʼereeya kaʼikat tia, oʼunawaishi nia sünain tü Outkajawaakat eere Sotuin Waaʼin Outuin Jesús.

15. ¿Kasa jülüjainjatka waaʼin wounejaapa wanee wayuu sünain tü Outkajawaakat eere Sotuin Waaʼin outuin Jesús?

¹⁵ Eeshijaʼa nütüjaweere saaʼu wanee kasa chi wayuu wounejaakai sünain tü Outkajawaakat eere Sotuin Waaʼin Outuin Jesús, shialeekajaʼa palajatüle nukua sünain wanee outkajawaa. Müsüjeseʼe anain jülüjale waaʼin kasain nütüjaweein aaʼu jee jamüinjatüin wasoutia nümüin (Col. 4:6). Eeshijaʼa nütüjaweere saaʼu pütchikat tüü: «¿Kasa aainjünaka yala? ¿Jeʼtsü sümaʼa tü outkajawaakat? ¿Jamüinjatü sukuwaʼipa taʼanaaya? ¿Aapüinjachiche taya nneerü süpüla tekerotinnüinjachin? ¿Achuntunusüche nneerü yala?». Eeshijaʼa süpüla wasakirüin chi wounejaakai nütüjaweere saaʼu wanee kasa jee waküjeetkalaka shia nümüin. Eesü süpüla weeʼiyatüin nümüin tü videokot Puutkajaa wamaa süpüla sotuin waaʼin outuin Jesús otta ¿Kasache aainjünaka suluʼu tü Piichi Outkajaaleekat? Eesü süpüla waashajaain nümaa süchiki waneirua kasa aküjünaka suluʼu tü karaloʼutakat Anainjatka atuma pukuwaʼipa waneepia ekirajaaya 28.

16. ¿Kasa amaa eeka süpüla nüsakirüin anain wanee wayuu oʼunakai sünain tü Outkajawaakat eere Sotuin Waaʼin Outuin Jesús?

 ¹⁶ Süchikijee tü Outkajawaakat eere Sotuin Waaʼin Outuin Jesús, eesüjaʼa nütüjaweere sooʼomüin kasa chia wayuukai süpüla pansaain nümüin tü ekirajünakalü anain soʼunnaa tia outkajawaakat. Eesüjaʼa jülüjale naaʼin jamüin nnojotka jaralüin eküin tü pankat jee asüin tü wiinokot. Eesüjaʼa jülüjale naaʼin jeʼratuain waainjain tia outkajawaakat. Eesüjaʼa nütüjaweere saaʼu wanaawale tü outkajawaa waainjakat semaanawai sümaa tü aainjünakat sünain tü Outkajawaakat eere Sotuin Waaʼin Outuin Jesús. Süpüla wasoutuin shiʼipajee tü pütchi nütüjaweekalü aaʼu, anasü wachajaale suluʼu jw.org tü pütchikat «¿Jamüsü naataka tü naaʼinrakat na aküjaliikana pütchi nüchiki Jehová sünain tü ekawaa aipaʼajatkat nutuma chi Senyotkai suulia tü saaʼinrakat tü wane iküleesiakalüirua?». Wachajaa maʼin sukuwaʼipa süpüla kojutuin tia outkajawaakat namüin «na wayuu achekakana süchiki katüinjatüin noʼu waneepia» (Aluw. 13:48). Waainja tia süpülapünaa, soʼunnaa otta süchikijee tia outkajawaakat.

WAKAALINJA NA EEMIAJAAKANA ANOULA

17. ¿Kasa naaʼinrajatka na laülaashiikana süpüla nakaalinjain na wawalayuu eemiajaakana anoula? (Ezequiel 34:12, 16).

¹⁷ ¿Kasa naaʼinrajatka na laülaashiikana sükalioʼu tü Outkajawaakat eere Sotuin Waaʼin Outuin Jesús süpüla nakaalinjain na wawalayuu eemiajaakana anoula? Jaʼyainjatü naaʼu kapülain naya naaʼin jee alin naya napüla (paashajeʼera Ezequiel 34:12, 16). Jia laülaashiikana, süpülapünaa tia outkajawaakat jüchajaa maʼin sukuwaʼipa süpüla jaashajaain namaa. Jüküja namüin alin naya jüpüla jee jükaalinjeein naya. Noʼunule sünain tia outkajawaakat, kamanee jia namüin. Süchikijee tü outkajawaakat, ayataʼaya jaashajaain namaa otta jükaalinja naya süpüla naleʼejüinjanain nachikuaʼa nünainmüin Jehová (1 Ped. 2:25).

18. ¿Kasa waaʼinrajatka süpüla wakaalinjain na wawalayuu eemiajaakana anoula? (Roma 12:10).

¹⁸ Wapüshuaʼa wayakana, eeshii süpüla wakaalinjain na wawalayuu eemiajaakana anoula oʼunakana sünain tü Outkajawaakat eere Sotuin Waaʼin Outuin Jesús. ¿Jamüinjatü sukuwaʼipa watuma? Alinjana naya wapüla, kamaneeinjana  waya namüin otta kojutuinjana naya wamüin (paashajeʼera Roma 12:10). Anasü jülüjale waaʼin kapüleein maʼin namüin naya wawalayuukana noutkajaain nachikuaʼa. Eesüjaʼa jülüjale naaʼin jameerüin naaʼin na wawalayuukana namaa. e Nnojo wasakirüin naya süchiirua wanee kasa japüijeenaka atuma naya jee nnojo waküjain wanee pütchi eekai mojeerüin namüin (1 Tes. 5:11). Ayatayüliʼiya wawalayuuin naya jee talatüshii waya namaa süka naʼwaajüin Jehová wanaa wamaa nachikuaʼa (Sal. 119:176; Aluw. 20:35).

19. ¿Jamüsü aneetka wakuwaʼipa sutuma woutkajaain süpüla sotuin waaʼin outuin Jesús waaʼu?

¹⁹ Watüjaaitpa aaʼu jamüin nuluwataaka waya Jesús sünain sotuinjachin nia waaʼin juyawai soʼu tü kaʼi outakalü oʼu nia. Waainjale tia, aneerü wakuwaʼipa otta aneerü nakuwaʼipa na waneinnua (Is. 48:17, 18). Kooʼomüinjeerü naalin Jehová otta Jesús wapüla. Eesü süpüla waaʼinrüin waneirua kasa jaʼyeetka atuma kojutuin maʼin wamüin tü naaʼinrakat wapüleerua. Paaʼinwajiraashii waya namaa na wawalayuukana otta eeshii süpüla wakaalinjain na wayuukana süpüla natüjaain saaʼu tü naaʼinrajatkat süpüla anainjatüin nakuwaʼipa sünainjee outuin Jesús naaʼu. Wachajaa maʼin sukuwaʼipa süpüla yapainjanain waya süpüla tü Outkajawaakat eere Sotuin Waaʼin Outuin Jesús.