1. ¿Mbaʼérepa pe konmemorasión haʼe pe día iñimportantevéva? (Lucas 22:​19, 20).

 JEHOVÁ puévlope g̃uarã pe konmemorasión haʼe pe día iñimportantevéva. Upéva añoite la Jesús omanda vaʼekue idisipulokuérape ogueromanduʼa hag̃ua (elee Lucas 22:​19, 20). Káda áño enterovéva ñahaʼarõiterei og̃uahẽ upe día. ¿Mbaʼérepa? Jahechamína.

2. Emombeʼu mbaʼe mbaʼérepa ñamombaʼete pe konmemorasión día.

² Pe konmemorasión ñanepytyvõ jajepyʼamongeta hag̃ua mbaʼeichaitépa iñimportánte pe rreskáte ha mbaʼe mbaʼépa jahupyty Jesús sakrifísio rupive. Ñanepytyvõ avei jaikuaa hag̃ua mbaʼéichapa ikatu jahechauka ñandeagradesidoha Jesús sakrifísiore (2 Cor. 5:​14, 15). Avei omeʼẽ ñandéve heta oportunida ñañomokyreʼỹ hag̃ua ñane ermáno ha ermanakuérandi (Rom. 1:12). Káda áño hetaiterei inaktívo oho pe konmemorasionhápe, ha heta ijapytepekuéra odesidi jey oñemoag̃ui Jehováre ohechávo mbaʼeichaitépa ojerresivi porã chupekuéra. Ha umi ohóvape por primera ves osorprendeterei umi mbaʼe ohecháva ha ohendúva, upévare odesidi ostudia la Biblia. Ndareíri ningo ñamombaʼete pe konmemorasión día. ¡Ñanemopirĩmba ningo jaikuaávo mbaʼeichaitépa oĩ unído ñane ermanokuéra pe konmemorasión díape!

3. ¿Mbaʼéichapa pe konmemorasión oipytyvõ ñane ermanokuérape oĩ hag̃ua unído ko múndo tuichakuére? (Ehecha pe taʼanga).

³ Amedída oike ohóvo pe kuarahy, entéro testígo de Jehová oĩva ko múndo tuichakuére oñembyaty. Jaháva guive pe konmemorasionhápe, ñahendu peteĩ diskúrso ohechaukáva mbaʼérepa iñimportánte pe rreskáte, japurahéi 2 vése Jehovápe, oñembohasa pe pan ha pe víno ha 4 vése ñañemboʼe ha jaʼe “amén”. Upe díape, entéro kongregasión oĩva ko múndope  ojapo peichaite. ¿Mbaʼéichapa oiméne oñeñandu Jehová ha Jesús ohechávo enterovéva omombaʼeha chupekuéra? Oime vaʼerã opokoite hesekuéra upéva.

4. ¿Mbaʼépa jahecháta ko artíkulope?

⁴ Ko artíkulope ñaanalisáta koʼã porandu: ¿Mbaʼéichapa ikatu japrepara ñane korasõ pe konmemorasión díape g̃uarã? ¿Mbaʼéichapa ikatu ñaipytyvõ ótrope oho hag̃ua? ¿Ha mbaʼéichapa ikatu ñaipytyvõ umi inaktívope? Jaikuaáramo koʼã mbaʼe, ñaĩta preparádo upe día iñimportantetévape g̃uarã.

JAPREPARA ÑANE KORASÕ PE KONMEMORASIÓN DÍAPE G̃UARÃ

5. a) ¿Mbaʼérepa jajepyʼamongeta vaʼerã pe rreskátere? (Salmo 49:​7, 8). b) ¿Mbaʼépa ñanemboʼe pe vidéo hérava “¿Mbaʼérepa omano Jesús?”?

⁵ ¿Mbaʼépa la iporãvéva ikatúva jajapo japrepara hag̃ua ñane korasõ? Jajepyʼamongeta mbaʼeichaitépa iñimportánte pe rreskáte, ñandejehegui reínte, ndaikatumoʼãi kuri jajei pekádo ha ñemano poguýgui (elee Salmo 49:​7, 8. Ehecha pe vidéo ¿Mbaʼérepa omano Jesús?). a Upévare, Jehová omondo Jesucrístope omano hag̃ua ñanderehehápe, tuichaiterei sakrifísio ningo ojapo mokõivéva (Rom. 6: 23). Amáske jajepyʼamongeta la Jehová ha Jesús ojapo vaʼekuére ñanderehehápe, ñamombaʼevétantema pe rreskáte. Jahechamína mbaʼérepa ikatu jaʼe ijetuʼueténe hague Jehová ha Jesúspe g̃uarã pe rreskáte. ¿Péro mbaʼépa heʼise rreskáte? Jahechami raẽna upéva.

6. ¿Mbaʼe mbaʼépa ojejapo raʼe ojepaga hag̃ua pe rreskáte?

⁶ ¿Mbaʼépa heʼise rreskáte? Upéva heʼise ojepagaha peteĩ mbaʼe ojeperde vaʼekuére ojerrekupera jey hag̃ua. Adán perfékto vaʼekue ojekreárõ guare chupe, péro upéi ou opeka ha operde la posivilida oikovévo pára siémpre. Ha ndahaʼéi voi haʼénte, síno upéva káusare enterove ifamiliakuéra operde avei upéva. Ikatu hag̃uáicha opaga pe Adán operde vaʼekuére, Jesús oofrese hekove perfékto sakrifísioramo. Oikove aja pukukue ko yvy ape ári Jesús “ndopekái vaʼekue ha núnka ndaijapúi” (1 Ped. 2:22). Omanórõ guare Jesús perfékto vaʼekue, Adán iperfékto haguéicha opeka mboyve, péicha Jesús isakrifísio rupive opaga ojerrekupera hag̃ua la Adán operde vaʼekuére (1 Cor. 15:45; 1 Tim. 2:6).

7. ¿Mbaʼe mbaʼe ijetuʼúvapa Jesús ombohovái vaʼekue oĩrõ guare ko yvy ape ári?

⁷ Jesús oĩrõ guare ko yvy ape ári iñeʼẽrendu vaʼekue entéro mbaʼépe itúa Jehovápe, sapyʼánte ijetuʼúramo jepe upéva. Imitãme, tekotevẽ vaʼekue iñeʼẽrendu ituakuérape, iñimperféktoramo jepe hikuái (Luc. 2:51). Imitãrusúpe oiméne oĩ rakaʼe avei umi omboligáva chupe ani hag̃ua iñeʼẽrendu ituakuérape ha Jehovápe. Okakuaapa rire Jesús oñemoĩ mbarete vaʼekue Satanás kóntrape, pórke haʼe ojopy chupe opeka hag̃ua ha heʼi voi chupe diréktamente anivéma hag̃ua iñeʼẽrendu Ñandejárape (Mat. 4:​1-11). Jahechaháicha, Satanás oñehaʼãmbaite voi ombopeka hag̃ua Jesúspe, ha péicha ani hag̃ua opaga pe rreskáte.

8. ¿Mbaʼe ótra kósa ijetuʼúvapa ombohovái vaʼekue avei Jesús?

⁸ Jesús oservírõ guare Jehovápe ko yvy ape ári, ombohovái vaʼekue hetave mbaʼe ijetuʼúva. Por ehémplo iñenemigokuéra opersegi chupe, ha oñehaʼã voi ojuka chupe hikuái (Luc. 4:​28, 29; 13:31). Isegidorkuéra iñimperfékto ha ojavy vaʼekue, ha upéva oiméne ijetuʼu vaʼekue avei chupe (Mar. 9:​33, 34). Ojehusgárõ guare, heta ojetortura chupe ha  oñembohory hese la hénte. Upéi ojejuka chupe peteĩ mbaʼe vai apoháicha ha hasyveháicha voi (Heb. 12:​1-3). Omano potaitérõ guare pe yvyráre, haʼe añoite oaguanta vaʼerã kuri pe sufrimiénto oproteheʼỹre chupe Jehová (Mat. 27:46). b

9. ¿Mbaʼéichapa ñañeñandu ñapensávo pe sakrifísio Jesús ojapo vaʼekuére? (1 Pedro 1:8).

⁹ Jahechaháicha, Jesús tuichaiterei osufri vaʼekue opaga hag̃ua pe rreskáte. Ñapensávo umi mbaʼe Jesús ohasa vaʼekuére ñanderehehápe, ¿mbaʼéichapa ñañeñandu? ¡Ajépa jahayhu chupe ñande pyʼaite guive voi! (elee 1 Pedro 1:8).

10. ¿Mbaʼépa Jehová osakrifika vaʼekue ojepaga hag̃ua pe rreskáte?

¹⁰ ¿Mbaʼépa Jehová osakrifika vaʼekue ikatu hag̃uáicha Jesús opaga pe rreskáte? Jehová ha Jesús ningo ojoayhueterei, ndaipóri voi túa ha taʼýra ojoayhúva peichaite peve (Prov. 8:30). Ñapensamíntena upéicharõ mbaʼeichaitépa Jehová oiméne oñeñandu rakaʼe ohechárõ guare Itaʼýrape ohasa hetaite mbaʼe vai ko yvy ape ári. Katuete hasyetereíne raʼe chupe ohecha Itaʼýrape oñemaltrata, ojerrechasa ha oñembosufri chupe.

11. ¿Mbaʼéichapa oiméne Jehová oñeñandu rakaʼe Jesúspe ojejukárõ guare? Emoĩ peteĩ ehémplo.

¹¹ Umi tuakuéra omanóma vaʼekue chugui peteĩ ifamília, oikuaa mbaʼeichaitépa hasy asy upéva. Jajeroviáramo jepe ñande pyʼaite guive pe rresurreksiónre, lomímonte jasufrieterei omano jave ñandehegui peteĩ jahayhúva. Ko ehémplo ñanepytyvõ ñantende hag̃ua mbaʼéichapa oiméne Jehová oñeñandu rakaʼe ohechárõ guare Itaʼýrape hetaite osufri ha omano áño 33-pe (Mat. 3:17). c

12. ¿Mbaʼépa ikatu jajapo pe konmemorasión mboyve?

¹² ¿Mbaʼetekópa ñañepyrũramo jajeprepara koʼág̃a guive pe konmemorasionrã? Upearã ikatu jastudia porã pe rreskáte. Upéva ikatu jajapo ñaneañoháme térã jajapo jave ñande estúdio de família. Tuichaiterei ñanepytyvõta pe Gía oipurúva testígo de Jehová otopa hag̃ua Informasión, (oiméramo oĩ ñane idiómape). Térã ikatu jaipuru ótra puvlikasión ñanepytyvõtava ñantende porãve hag̃ua pe rreskáte. d Avei iporãta jaleéramo umi téxto oĩva pe lektúra bíblica konmemorasiónpe g̃uarãme, upéva osẽ jepi Prográma rreuniónpe g̃uarãme. Mbaʼéichapa jaiko ha japredika vaʼerã,  ha aníkena ñanderesarái jahecha hag̃ua pe adorasión matutína ojepreparáva pe konmemorasión díape g̃uarã. Japreparáramo ñane korasõ pe konmemorasiónpe g̃uarã, ñaipytyvõ porãvéta ótrope ohose hag̃ua avei (Esd. 7:10).

ÑAIPYTYVÕ ÓTROPE OHO HAG̃UA

13. ¿Mbaʼépa primeroite voi jajapo vaʼerã ñaipytyvõ hag̃ua ótrope?

¹³ ¿Mbaʼéichapa ikatu ñaipytyvõ umi héntepe oho hag̃ua pe konmemorasionhápe? Primeroite voi ikatu ñainvita chupekuéra. Upéva jajapo ñasẽ jave ñaporoinvita umi ogahárupi, péro ikatu avei jajapo peteĩ lísta ha ñamoĩ upépe mávapepa ñainvitase. Por ehémplo, ñamoĩkuaa upépe ñane hentekuéra, kompañéro de traváho, kompañéro de eskuéla térã de koléhio, ha hetave persóna. Ndajarekóiramo jepe invitasión enterovetévape g̃uarã ñamondokuaa chupe peteĩ enláse ohecha hag̃ua pe invitasión ñane páhinape. ¡Ikatu voi hína ñanesorprende jahechávo heta hénte ohoha! (Ecl. 11:6).

14. Emoĩ peteĩ ehémplo ohechaukáva iñimportanteha ñaporoinvita personálmente.

¹⁴ Ñainvitáramo álgienpe personálmente, ikatu ikyreʼỹve oho hag̃ua pe konmemorasionhápe. Por ehémplo, jahechamína peteĩ ermána káso. Iména ningo ndahaʼéi Testígo, ha peteĩ díape osorprende chupe heʼívo ohotaha hendive la konmemorasionhápe. ¿Mbaʼérepa oñesorprendete pe ermána? Pórke haʼe heta vésema oinvita iménape anteve péro núnka ndohóiva. ¿Péro mbaʼépa la okambia vaʼekue ko vuéltape? Pe ermána ména omombeʼu oñemeʼẽ hague chupe peteĩ invitasión. Heʼi peteĩ ansiáno haʼe oikuaáva oinvita hague chupe. Pe ermána ména oho upe áño la konmemorasionhápe ha heta áño upe rire avei.

15. ¿Mbaʼépa ñanemanduʼa vaʼerã ñainvita jave la héntepe konmemorasionrã?

¹⁵ Ñanemanduʼa vaʼerã ko mbaʼére: Umi persóna ñainvitáva ikatu oikuaase hína heta mbaʼe. Upévare ikatu ñapensáma voi umi mbaʼe oikuaasévare hikuái ha jajepreparáma ñakontesta hag̃ua chupekuéra (Col. 4:6). Por ehémplo, ikatu oĩ oikuaaséva mbaʼéichapa  ojejapo pe konmemorasión, ipukúpa, mbaʼéichapa oñemonde la hénte, ojepagapa entráda ha ojejapopa kolékta. Ñainvita jave álgienpe konmemorasionrã, ñaporandukuaa chupe oikuaasépa hína álgo ha upéi ñakontesta chupe umi pregúnta orekóva. Jahechauka hag̃ua la héntepe mbaʼéichapa ojejapo ñane rreunionkuéra, ikatu jaipuru koʼã vidéo Jagueromanduʼa Jesús omano hague ára ha ¿Mbaʼéichapa rojapo ore rreunionkuéra? Avei pe lívro ¡Jaikóta vyʼápe para siémpre!, leksión 28-pe oĩ unos kuánto mbaʼe ikatúva ñamombeʼu la héntepe.

16. ¿Mbaʼépa ikatu oikuaaseve umi ohóva konmemorasionhápe?

¹⁶ Umi ohóva primera ves konmemorasionhápe ikatu upéi oikuaase hetave mbaʼe. Ikatu oĩ oikuaaséva mbaʼérepa mbovymínte oĩ hoʼúva pe pan ha pe víno térã mbaʼérepa avavete voi ndoʼúi. Avei ikatu oikuaase hikuái pyʼỹipa ojejapo pe konmemorasión ha péichapa ojejapo entéro ñane rreunionkuéra. Pe diskúrso de konmemorasiónpe ojeexplikáramo jepe koʼã mbaʼe, umi ohóva primera ves ikatu oikotevẽ ojeexplika porãve umi mbaʼe ojeʼe vaʼekue pe diskúrsope. Ñakontesta hag̃ua chupekuéra umi mbaʼe oikuaaséva, ikatu ñanepytyvõ pe artíkulo oĩva jw.org-pe: “¿Mbaʼérepa umi testígo de Jehová ojapo pe Séna del Señór diferénte umi ótro rrelihióngui?”. Tahaʼe pe konmemorasión mboyve upe aja ha opa rire avei jajapose opa ikatúva ñaipytyvõ hag̃ua umi ipyʼaporãvape (Hech. 13:48). Péicha ohechakuaáta mbaʼépepa ideprovécho chupekuéra pe konmemorasión.

ÑAIPYTYVÕ UMI INAKTÍVOPE

17. ¿Mbaʼéichapa umi ansiáno ikatu oipytyvõ umi ermáno inaktívope? (Ezequiel 34:​12, 16).

¹⁷ Ansianokuéra, ¿mbaʼéichapa ikatu peipytyvõ umi inaktívope konmemorasión tiémpope? Pehechaukákena pehayhuha chupekuéra (elee Ezequiel 34:​12, 16). Pe konmemorasión mboyve peñahaʼãmbaitékena peñekomunika ikatumíva guivéndi, peasegurákena chupekuéra peñeinteresaha hesekuéra ha peipytyvõseha chupekuéra opa ikatúvape. Peinvita umi ermáno inaktívope konmemorasionrã, ha ohóramo, torýpe perresivi  chupekuéra. Upéi pe konmemorasión rire, pesegi peñekomunika koʼã ermáno ha ermána jahayhuetévandi, ha peajuda chupekuéra entéro mbaʼe ifáltavape oñemoag̃ui jey hag̃ua Jehováre (1 Ped. 2:25).

18. ¿Mbaʼéichapa enterove ikatu ñaipytyvõ umi inaktívope? (Romanos 12:10).

¹⁸ ¿Mbaʼéichapa enterove ñaiméva kongregasiónpe ikatu ñaipytyvõ umi inaktívope? Jatratávo chupekuéra mborayhúpe, ñaneamávlevo hendivekuéra ha jarrespetávo chupekuéra (elee Romanos 12:10). Ñapensákena mbaʼeichaitépa oiméne ijetuʼu raʼe koʼã ermánope oho jey hag̃ua rreunionhápe. Ikatu oime okyhyje hikuái ndojerresiviporãirõ g̃uarã chupekuéra. e Upévare, aníkena ñaporandu umi mbaʼe omotĩtava chupekuéra ni jaʼe álgo omoñeñandu vaítava chupekuéra (1 Tes. 5:11). Haʼekuéra ningo ñane ermáno ha ñane ermána, upévare javyʼa ikatu haguére jaadora jey Jehovápe hendivekuéra (Sal. 119:176; Hech. 20:35).

19. ¿Mbaʼe iporãvapa jahupyty jagueromanduʼávo Jesús omano hague día?

¹⁹ Ajépa javyʼaite Jesús omanda haguére ojegueromanduʼa pe konmemorasión káda áño. ¿Mbaʼérepa? Pórke jahávo ñañevenefisia ñande voi ha avei umi ótro (Is. 48:​17, 18). ¿Mbaʼéichapa? Jahayhuve Jehová ha Jesúspe, jahechauka ñamombaʼeha la haʼekuéra ojapo vaʼekue ñanderehehápe, ñañemoag̃uive ñane ermanokuérare, ha ñaipytyvõ ótrope odisfruta hag̃ua umi vendisión jahupytýva pe rreskáte rupive. Upéicharõ, jajapókena opa ikatúva ñaime hag̃ua pe konmemorasionhápe, pórke upéva haʼéta hína pe día iñimportantevéva ko áñope.