1. ¿Conmemoración ye abokän ñobätä köbö bäri ütiäte kä kwatire kwatire? (Lucas 22:​19, 20, TNM).

 NI JEHOVÁ mikaka täte kräke Conmemoración ye abokän köbö bäri ütiäte. Köbö ne aibe käi ngwandre juto jabätä niebare Jesukwe (ñäkädre Lucas 22:​19, 20 yebätä). a ¡Ni tö köbö ütiäte ye tuai nüke jötrö! ¿Ñobätä? Ani mike gare jai ruäre.

2. ¿Kukwe meden ruäre tä nemen bare abokänbätä ni tö Conmemoración tuai nüke jötrö?

² Conmemoración ye tä ni dimike töbiketari ni kökanintari ütiäte krubäte yebätä. Ni kökanintari yebätä nita debe bien ni raba bämike ño ye ngwanta törö nie (2 Cor. 5:​14, 15). Ye köböire nita nemen keteitibe ja mräkätrebe aune ni raba ja dimike kwärikwäri (Rom. 1:12). Kä kwatire kwatire Conmemoración yebätä nitre kwati tä tibo ja üairebiti tä kwen aune ja mräkätre tä ja tare bämike ie ye köböire tätre ja töi mike näinta Jehová kokwäre. Ne madakäre, nitre kwati tä nemen Conmemoracionbätä ye tätre dre tuin aune kukwe nuin ye tä niaratre töi mike niä, ye medenbätä tätre ja töi mike ja tötika kömike Bibliabätä. Ye abokän kukwe keteiti abokän köböire, köbö ye ütiäte krubäte ni kräke.

3. ¿Juta Jehovakwe tä keteitibe ye tä nemen gare ño nie Conmemoración ye köböire? (Üai mikadre ñärärä).

³ Kukwe madabätä ni töta nemen köbö ye tuai nüke, ye abokän kä jökräbiti tibien ja mräkätre tä nemen keteitibe köbö ye ngwane. Aune nitre testiko tä ja ükekrö ñänä tärä bäsi kite nekä ye ngwane, ye ni töta nemen tuai. Kä jökräbiti tibien kukwe kädrieta Jesús ni kökanintari ye ñobätä ütiäte ni kräke yebätä, kantiko kantata bobu, vino aune pan mikata tuare, orasion  nuainta bäbokä jire ye ngwane nita “amén” niere ja brukwä tätebiti. Ora tä niken 24 ta ngwane, nitre testiko kä jökräbiti tibien tä kukwe ne arabe nuainne. Kä jökräbiti tibien Jehová aune Jesús käikitakata yebätä käta nemen jutobätä ye ¿mäta bämike ja töite?

4. ¿Dre rabai gare nie kukwe ja tötikara nebätä?

⁴ Kukwe ja tötikara nekänti kukwe ngwantarita ne rabai gare nie: ¿ni raba ja brukwä mike ño juto Conmemoración ye kräke?, ¿ni raba nitre mada dimike ño?, ¿ni raba nitre tä tibo ja üairebiti ye dimike ño? Töbikadre kukwe ngwantarita nebätä ye käkwe ni mikai juto köbö bäri ütiäte ye kräke.

¿JA BRUKWÄ MIKA RABA ÑO JUTO CONMEMORACIÓN KRÄKE?

5. a) ¿Ñobätä töbikadretari ni kökanintari yebätä? (Salmo 49:​7, 8). b) Video ¿Ñobätä Jesús murie ketani? yebätä dre nibi gare mäi.

⁵ Kukwe keteiti bäri ütiätebiti nita ja mike juto Conmemoración ye kräke, ye abokän nita töbiketari Jesús ni kökanintari yebätä. Ni itire itire ja di jeñebiti ni ñaka rabadre kwäre jire ngite aune gata yebätä (ñäkädre Salmo 49:​7, 8 yebätä b; video ¿Ñobätä Jesús murie ketani? ye mikadre ñärärä). c Jehovakwe ngobo tare kwe ye juani ja nire bien ni ütiäre, yebiti niaratre nibu käkwe ni ütiä biani kri krubäte (Rom. 6:23). Jesús ni kökanintari yebätä nikwe töbikaitari ngwane rabai bäri ütiäte ni kräke. Jehová bätä Jesús nämäne juto biarebe dre nuainkäre ni kräke ye rabai gare nie. Akwa käne, ani blite ni kökanintari ye abokän dre gärätä aune Jesukwe dre nuainbare yebätä.

6. ¿Ni kökanintari ye dre gärätä? b) ¿Dre nuainbare Jesukwe ni kökatarikäre?

⁶ Ni kökatarita ye abokän jondron ütiä nuäi ye erere bianta täte, rabadreta nikwe yekäre. Jehovakwe Adán sribebare kena ye ngwane, sribebare kwe töi metre aune ñaka ngite jire chi. Akwa Adankwe ja mikani ngite ye ngwane ja nire kärekäre ye nianinte kän aune ja nire käre rabadre monsotre kwe yekwe ye erere ñan namani bare. Ja nire käre nianinte Adán kän ye kökatarikäre Jesukwe ja nire metre ye biani murie ketakäre. Niarakwe nünanbare kä tibienbätä ngwane, ñaka ja mikani ngite “Ngöbö rüere amne, ni mda mda ngökani ñakare kwe” (1 Ped. 2:22). Niara nämäne ja ngwen metre murie ketani, ye medenbätä Adán ja mikani ngite ye ütiä bianinta täte kwe (1 Cor. 15:45; 1 Tim. 2:6).

7. ¿Kukwe ruäre meden ben Jesús ja tuani? Mä raba mike gare.

⁷ Jesús nükani kä tibienbätä ye ngwane, käre ja di ngwani kwe Rün kwe Jehová mike täte ñan namani nuäre kräke yebiti ta. Niara nämäne chi ye ngwane, rün bätä meye kwe töi ngite ye mikani täte kwe, niara töi metre yebiti ta (Luc. 2:51). Niara namanina monso bati ye ngwane, nitre mada nämäne niara töi mike ja dibiti rün kukwei mike ngwarbe jai aune ñaka ja ngwandre metre kwe Jehovai yekäre. Niara namanina ünä ye ngwane, Satana ñan tö namani niara tuai ja ngwen metre Jehovai aune niara nuaninte metre ta ngwärere kwe (Mat. 4:​1-11). Satana töi nämäne kwatibe Jesús tuabätä ja mike ngite ne kwe ñaka ni kökadretari kwe.

8. ¿Kukwe meden mada ben Jesukwe ja tuani?

⁸ Jesús nämäne kukwe driere kä tibienbätä ye ngwane, ja tuani kukwe mada ben kwe. Ñodre, nitre ja mikaka niara rüere nämäne näin niara jiebiti aune niara murie keta tö namani (Luc. 4:​28, 29; 13:31). Arato nitre ja tötikaka Jesukwe töi ngite yebätä ñan namani kukwe  jökrä nuainne kwin, yebe Jesús nämäne ja tuin (Mar. 9:​33, 34). Jesús nämäne gobran ngwärekri ye ngwane, niara nuainbare tare aune kötai namani. Niara kani ngite murie ketakäre ye ngwane, mikani tuin ni ja ngwanka käme ye kwrere jai, yebätä ngwani ja tare nike (Heb. 12:​1-3, TNM). Niara namanina niken ngwarbe ye ngwane, Jehová ñan namanina niara kriemike, aisete ja namani gare kaibe ie (Mat. 27:46). d

9. ¿Jata nemen ruin ño nie nita töbiketari Jesús ni kökanintari yebätä ngwane? (1 Pedro 1:8).

⁹ Jesukwe ni ütiä biani kri krubäte ye gare metre nie. Niara töi nämäne kwatibe kukwe ñan nuäre keta kabre nuainbätä ni kräke, yebätä nita töbiketari ngwane, nita nemen niara tarere bäri (ñäkädre 1 Pedro 1:8 yebätä).

10. ¿Jehová töi nämäne kwatibe dre nuainbätä ni kökatarikäre?

¹⁰ ¿Jehová ja töi mikani kwatibe kukwe meden ñaka nuäre nuainne ne kwe Jesús rabadre ni kökötari? Gare nie erere, Jehová ye abokän ja ketamuko bäri kwin Jesukwe (Prov. 8:30). Jesús jatani kä tibienbätä aune nämäne ja tuin kukwe tare ben yebätä ja namani ruin ño Jehovai yebätä ni raba töbike. Niara nuain nämäne tare, mika nämäne tuin ngwarbe jai aune ngwan nämäne ja tare nike, namani tare krubäte Jehovai.

11. ¿Jesús nuainbare tare aune murie ketani ye ngwane ja namani ruin ño Jehovai ye raba nemen gare ño nie?

¹¹ Monso tä krüte ni iti kän ye ie jata nemen ruin ño ye nüke gare kwin nitre kän monso krütanina ye ie. Erametre nita tö ngwen ni gaikröta yei akwa ye ñan aibätä ni mräkä tare nikwe tä krüte nikän ye ñan tä nemen tare nie. Yebiti nüke gare metre nie kä 33 Kristo känenkri ye ngwane, Jesús ngwani ja tare nike biti murie ketani ye ngwane, ja namani ruin ño Jehovai ye nüke gare nie (Mat. 3:17). e

12. ¿Conmemoración tä mente ja käne ye känenkri nikwe dre nuaindre?

¹² Conmemoración köböi tä ja käne, aisete rükadre ye känenkri mä raba ja töi mike ja tötike bäri ni kökanintari yebätä, mäta ja tötike kaibe ye ngwane o mäta ja tötike mä mräkäbe bämä kratire kratire yete. Ne madakäre Tärä ni testiko Jehovakwe jie ngwankäre ja tötike yebätä mä raba ja kite o täräkwata madabätä mä raba kukwe känene bäri kukwe yebätä. f Arato, Kukwe ja jie ngwankäre gätäte Nita Dirire aune Ja Ngwen Ño yete programa mikata ñäkäkäre  Bibliabätä bämä Conmemoración näire ye kräke yebätä ñäkädre. Aune adoración matutina köbö ütiäte ye kräke ye mä raba tuin. Mäkwe ja brukwä mikai juto köbö ye kräke ye köböire mä täi juto biare nitre mada dimikakäre (Esd. 7:10).

NITRE MADA DIMIKADRE CONMEMORACIÓN YE KRÄKE

13. ¿Ni raba dre nuainne ne kwe nitre kwandre siba Conmemoración yebätä ni ben?

¹³ ¿Ni raba nitre dimike ño kwen siba Conmemoración yebätä? Kena, nübaidre. Ketebu, nita niken kukwe driere ngwane nita nitre nübaire, akwa ni tö nire nire tuai nüke Conmemoracionbätä ye ni raba tike jai, ñodre ni mräkätre, nitre sribi muko nikwe, nitre nänkä kwelate nibe o nitre mada. Täräkwata nitre nübaikäre ye krütadre nikän ngwane, ni raba enlace ye juen ietre. Nitre nibe rükai ñan gare nie (Ecl. 11:6).

14. ¿Ni gare nie ye ni ara jire tä nübaire ngwane dre kwin raba nemen bare? Mä raba bämike keteiti.

¹⁴ Täräkwata nitre nübaikäre Jesús ja nire biani ngwanta törö jai bätä ye ñan mikadre tuin ngwarbe jai. Bati, meri testiko iti muko kwe ñan testiko, ye näin Conmemoracionbätä niebare kwe ie ye ngwane, niara töi namani niä. ¿Ñobätä niara töi namani ñan krütare? Ñobätä ñan aune bä kabre meri testiko ye nämäne muko kwe nübaire akwa ñaka nämäne niken jire chi. ¿Ñobätä ja töi kwitani drekebe ngwarbe kwe? Niarakwe mikani gare, ni umbre iti ji ngwanka konkrekasionte käkwe täräkwata nitre nübaikäre ye biani jeñe ie kisete yekwe niara töi mikani niken. Aisete kä yete nikani aune bä kabre mada nikani Conmemoracionbätä.

15. ¿Nita nitre nübaire Conmemoracionbätä ngwane dre ngwandre törö jai?

¹⁵ Nita nitre nübaire Conmemoración bätä ngwane, niaratre raba nemen kukwe ngwentari nie, bärira jire ñaka nemen gätäbätä jire nibe ngwane kukwe ruäre raba niaratre mike töbike. Ye ngwane nikwe dre niei ie ye mikadre gare kwin jai (Col. 4:6). Ñodre, nitre raba ngwentari: “¿Dre nuainta yete? ¿Gätä tä nuin ora kräbe? ¿Ja ngwä kitadre ño rikakäre yete? ¿Rikakäre yete ja ütiä biandre? ¿Ngwian ükakröta?”. Ye medenbätä nita nitre nübaire ngwane, dre  ñan nüke gare ie o kukwe tä mike töbike ye ni raba ngwentari ietre biti mikadre gare. Arato video Jesús murie ketani ngwandre törö jai o ¿Gätä nuainta ño nunkwe? ye mika raba tuare ietre. Arato tärä Mä raba nüne kä jutobiti kärekäre, kukwe ja tötikara 28 yete kukwe ruäre mikata gare ye kädrie raba nitre ben.

16. ¿Nitre tä kwen Conmemoración bätä ye raba nemen kukwe meden mada ngwentari jai?

¹⁶ Nitre nübaita tä kwen Conmemoración bätä ye raba kukwe mada ngwentari jai gätä ye bitikäre. Ñodre, ñobätä nitre bäsi ñaka jire tätre pan ye kwete o ruäre ngwane nitre ñan jire iti tä pan o vino ye kwete. Conmemoración ye nuainta bäbe. O ye erere nuainta gätä nuainta bämä kratire kratire yete, ye raba nemen ngwentari jai. Kukwe kädrieta yete ngwane kukwe mikata gare krubäte kukwe yebätä, akwa ruäre ngwane nitre nübaita ye ie kukwe mikadre gare bäri kwin tätre ribere jai. Nitre tä kukwe ngwentari ye ruäre mikakäre gare ietre ni raba niken kukwe tä jw.org kädekata “¿Dänkien Jesús mrö biani deu ye ñobätä nitre testiko Jehovakwe tä nuainne bä jene?” yebiti kukwe mikai gare ietre. Conmemoración ye känenkri, näire o ye bitikäre nikwe ja di ngwandre ne kwe nitre tä kwen aune tä “Ngöbö kukwe mike bäri” ye dimikadre köbö ütiäte ye näire (Hech. 13:48).

NITRE TÄ TIBO JA ÜAIREBITI YE DIMIKADRE

17. ¿Nitre tä tibo ja üairebiti ye nitre umbre konkrekasionte raba dimike ño? (Ezequiel 34:​12, 16).

¹⁷ ¿Nitre umbre ji ngwanka raba nitre tä tibo ja üairebiti ye dimike ño? Rabadre ja töi mike bätätre aune tare kwetre rabadre bämike ie (ñäkädre Ezequiel 34:​12, 16 yebätä). g Nitre umbre ji ngwanka, munkwe ja di ngwan blitakäre nitre tä tibo ja üairebiti ye ben Conmemoración ye känenkri. Aune mun töita niaratrebätä munkwe nie ie, munkwe ja di ngwan mun raba dre nuainne ye erere nuainkäre niaratre  dimikakäre. Munkwe nübai, niaratre kwandre ngwane munkwe ja tare bämika ietre. Aune Conmemoración ye bitikäre munkwe ja di ngwan blitakäre jankunu niaratre ben dimikakäre kukwe ja üairebiti, ne kwe niaratre rabadre näinta Jehová kokwäre (1 Ped. 2:25).

18. ¿Ni jökrä raba nitre tä tibo ja üairebiti ye dimike ño? (Romanos 12:10).

¹⁸ Ni jökrä konkrekasionte raba ja mräkätre tä tibo ja üairebiti ye dimike. ¿Nuain raba ño? Ni rabadre ja tare bämike ietre, ja töi mike kwin kräke aune mike tuin ütiäte jai (ñäkädre Romanos 12:10 yebätä). Ja mräkätre kräke ñaka namani nuäre ja ükakrökäreta gätäbätä ye nikwe ngwandre törö jai. Ja mräkätre konkrekasionte käkwe kain ngäbitita ño yebätä namani töbike raba ruin nie. h Ye medenbätä nikwe ñaka kukwe ngwandretari ie mikakäre ja gaire aune ñaka kukwe niedre ietre ne kwe ja rabadre ruin blo ie (1 Tes. 5:11). Niaratre ye tä jankunu ni mräkätre erere aune tä Jehová miketa täte nibe gwaire ye tä kä mike juto krubäte nibätä (Sal. 119:176; Hech. 20:35).

19. ¿Conmemoración ye köböire kukwe kwin meden tä nemen nikwe?

¹⁹ Kukwebätä nikwe ja tötiri yebiti Jesukwe Conmemoración nuain mananbare kä kwatire kwatire ye ñan ni töi mike niä. Mikadre täte ye kwin krubäte ni kräke aune nitre mada kräke (Is. 48:​17, 18). Tä ni dimike Jehová aune Jesús tarere. Ne madakäre, köbö ye ngwane nita debe bien niaratre kukwe nuainbare ni kräke yebätä ye nita bämike. Tä ni dimike nemen bäri keteitibe ja mräkätre ben, arato ni kökanintari ye köböire kukwe kwin tä nemen nikwe ye raba nemen ño nitre madakwe ye nita mike gare ietre. Ye medenbätä, nikwe ja mikadre juto Conmemoración ye kräke, köbö bäri ütiäte kä kwatire kwatire te.