1. Ngaa ang Memoryal amo ang pinakaimportante nga adlaw sa bilog nga tuig? (Lucas 22:​19, 20)

 PARA sa katawhan ni Jehova, ang Memoryal sang kamatayon sang Cristo amo ang pinakaimportante nga adlaw sa bilog nga tuig. Amo lang ini ang okasyon nga direkta nga ginsugo ni Jesus sa iya mga disipulo nga dapat nila saulugon. (Basaha ang Lucas 22:​19, 20.) Madamo sang rason kon ngaa excited gid kita nga saulugon ang Memoryal. Binagbinagon naton ang pila sa sini.

2. Ano ang pila ka rason kon ngaa excited gid kita nga saulugon ang Memoryal?

² Ginabuligan kita sang Memoryal nga pamalandungan kon daw ano ka importante ang halad-gawad. Ginapahanumdom sini sa aton ang mga puede naton himuon para ipakita nga ginapasalamatan naton ang sakripisyo ni Jesus. (2 Cor. 5:​14, 15) Ginahatagan man kita sini sang kahigayunan nga “makapalig-unay” sa aton mga kauturan. (Roma 1:12) Kada tuig, madamo nga indi aktibo ang naga-attend sa Memoryal. Ang pila sa ila nagdesisyon nga magbalik kay Jehova bangod gin-abiabi sila sing maayo sang mga kauturan. Madamo man nga tawo ang nagdesisyon nga magpa-Bible study bangod nagdayaw gid sila sa ila nakita kag nabatian sa Memoryal. Gani espesyal gid sa aton ang Memoryal.

3. Paano kita ginahiusa sang Memoryal sa aton mga kauturan sa bilog nga kalibutan? (Tan-awa man ang piktyur.)

³ Hunahunaa man kon paano kita ginahiusa sang Memoryal sa aton mga kauturan sa bilog nga kalibutan. Samtang nagatunod ang adlaw, nagatipon kita para saulugon ang Memoryal. Nagaumpisa ini sa isa ka lugar asta nga makatunod ang adlaw sa bilog nga kalibutan. Nagapamati kita tanan sa isa ka pamulongpulong nga nagapaathag kon daw ano ka importante ang halad-gawad. Nagakanta kita sang duha ka ambahanon sang pagdayaw, ginapasa naton ang tinapay kag ang alak, kag tinagipusuon kita nga nagahambal sing  “amen” sa apat ka pangamuyo. Sa sulod sang mga 24 ka oras, mahimo ini sang tanan nga kongregasyon sa bilog nga kalibutan. Imadyina ang kalipay ni Jehova kag ni Jesus nga makita kita nga nahiusa nga nagapadungog sa ila.

4. Ano ang binagbinagon naton sa sini nga artikulo?

⁴ Sa sini nga artikulo, binagbinagon naton ini nga mga pamangkot: Paano naton mahanda ang aton tagipusuon para sa Memoryal? Paano naton mabuligan ang iban nga makabenepisyo sa sini? Kag paano naton mabuligan ang mga indi aktibo? Ang mga sabat sa sini nga mga pamangkot makabulig sa aton nga mangin handa sa sining importante gid nga okasyon.

PAANO NATON MAHANDA ANG ATON TAGIPUSUON PARA SA MEMORYAL?

5. (a) Ngaa dapat naton pamalandungan ang balor sang halad-gawad? (Salmo 49:​7, 8) (b) Ano ang natun-an mo sa video nga Ngaa Napatay si Jesus?

⁵ Ang isa sa pinakaimportante nga paagi para mahanda naton ang aton tagipusuon para sa Memoryal amo ang pagpamalandong sa balor sang halad-gawad ni Jesucristo. Kon kita lang, indi gid naton magawad ang aton kaugalingon sa sala kag kamatayon. (Basaha ang Salmo 49:​7, 8; tan-awa man ang video nga Ngaa Napatay si Jesus?) a Gani para maluwas kita, ginhatag ni Jehova ang iya pinalangga nga Anak para ihatag ang iya kabuhi. Daku gid ang sakripisyo nga ginhimo ni Jehova kag ni Jesus para sa aton. (Roma 6:23) Kon pirme naton ini pamalandungan, mas pabaloran pa gid naton ang halad-gawad. Mabudlay gid ang ginhimo ni Jehova kag ni Jesus. Binagbinagon naton ang pila ka rason kon ngaa. Pero binagbinagon anay naton kon ano ang gawad.

6. Ano ang gawad, kag ngaa masarangan kita nga gawaron ni Jesus?

⁶ Ang gawad amo ang bili nga ginabayad para mabawi ang isa ka butang. Perpekto ang una nga tawo nga si Adan sang gintuga sia. Sang nagpakasala sia, indi lang sia ang nadulaan sang paglaum nga mabuhi sing wala sing katapusan kundi pati man ang tanan niya nga kaanakan. Para mabawi ang nadula ni Adan, ginhatag ni Jesus ang iya perpekto nga kabuhi bilang halad. Sa bilog nga kabuhi ni Jesus diri sa duta, “wala sia sing nahimo nga sala, kag wala man sia nagpanglimbong.” (1 Ped. 2:22) Sa tion sang kamatayon ni Jesus, isa sia ka perpekto nga tawo. Gani mabayaran niya ang nadula ni Adan nga perpekto nga kabuhi.​—1 Cor. 15:45; 1 Tim. 2:6.

7. Ano ang pila ka pagtilaw nga naeksperiensiahan ni Jesus sang ari sia sa duta?

⁷ Sang ari si Jesus sa duta, gintuman ni Jesus ang tanan nga ginsugo sa iya ni Jehova bisan pa nga nakaeksperiensia sia sang madamo nga pagtilaw. Isa ka perpekto nga bata si Jesus, pero kinahanglan niya magpasakop sa iya indi perpekto nga mga ginikanan. (Luc. 2:51) Sang tin-edyer sia, posible ginsilingan sia sang iban nga indi niya dapat pagtumanon ang iya mga ginikanan kag si Jehova, gani kinahanglan niya pakigbatuan ini nga mga pagtilaw. Kag sang daku na si Jesus, kinahanglan niya pakigbatuan ang mga pagsulay ni Satanas nga Yawa, lakip na ang pagsulay sa iya nga mangin indi matutom sa Dios. (Mat. 4:​1-11) Gusto gid ni Satanas nga makahimo sang sala si Jesus para indi niya mabayaran ang gawad.

8. Ano pa nga mga pagtilaw ang ginbatas ni Jesus?

⁸ Sa tion sang pagministeryo ni Jesus diri sa duta, madamo pa gid sia sing ginbatas nga mga pagtilaw. Ginhingabot sia sang iya mga kaaway kag gintinguhaan nila nga patyon sia. (Luc. 4:​28, 29; 13:31) Kinahanglan niya batason ang mga kaluyahon sang iya mga sumulunod. (Mar. 9:​33, 34) Sang ginbista sia, ginsakit sia kag ginpakalain. Dayon ginpatay sia sa makahuluya kag grabe kasakit nga paagi. (Heb. 12:​1-3) Kag kinahanglan niya batason ang katapusan nga bahin sang iya pagtilaw nga wala ang pag-amlig ni Jehova. b—Mat. 27:46.

9. Ano ang ginabatyag naton parte sa sakripisyo nga ginhimo ni Jesus? (1 Pedro 1:8)

 ⁹ Maathag nga grabe ang inagyan ni Jesus para mabayaran niya ang gawad. Kon pamalandungan naton ang tanan nga sakripisyo ni Jesus nga kinabubut-on niya nga ginhimo para sa aton, mas palanggaon pa gid naton sia.​—Basaha ang 1 Pedro 1:8.

10. Ano ang ginsakripisyo ni Jehova para maaman ang gawad?

¹⁰ Kamusta naman si Jehova? Ano naman ang kinabubut-on nga ginsakripisyo niya para mabayaran ni Jesus ang gawad? Kon parte sa kaangtanan sang isa ka amay kag isa ka anak, si Jehova kag si Jesus ang may pinakasuod nga kaangtanan. (Hulu. 8:30) Gani, hunahunaa kon ano ang nabatyagan ni Jehova sang nakita niya si Jesus nga nagabatas sang madamo nga pagtilaw. Sigurado nga nasakitan gid si Jehova sang nakita niya nga ginmaltrato ang iya Anak, ginsikway, kag gintilawan.

11. Maghatag sing halimbawa nga nagapakita sang kasakit nga nabatyagan ni Jehova sang ginpatay si Jesus.

¹¹ Kon napatyan sang bata ang isa ka ginikanan, grabe ini kasakit. Mabakod ang aton pagtuo sa pagkabanhaw, pero indi sini madula ang kasakit nga aton mabatyagan kon mapatyan kita sang pinalangga. Ginabuligan kita sini nga halimbawa nga mahangpan kon ano ang nabatyagan ni Jehova sang nakita niya nga nagaantos kag napatay ang iya pinalangga nga Anak sang Nisan 14, 33 C.E. c—Mat. 3:17.

12. Mga pila ka semana antes sang Memoryal, ano ang mga puede naton himuon?

¹² Sugod subong asta sa Memoryal, panikasugi nga tun-i sa imo personal nga pagtuon ukon sa inyo Family Worship ang mga topiko parte sa halad-gawad. Gamita ang Giya sa Pagtuon Para sa mga Saksi ni Jehova ukon ang iban pa nga mga publikasyon para usisaon pa gid sing maayo ini nga topiko. d Siguraduha man nga mabasa mo ang gin-iskedyul nga pagbasa sing Biblia sa Memoryal nga makita sa Ang Aton Cristianong Pagkabuhi kag Pagministeryo—Workbook Para sa Miting. Kag sa adlaw sang Memoryal, indi pagkalimti nga tan-awon ang pinasahi nga Morning Worship. Kon ihanda naton ang aton tagipusuon sa Memoryal, mabuligan naton ang iban nga makabenepisyo man sa sini.​—Esd. 7:10.

BULIGI ANG IBAN NGA MAKABENEPISYO SA MEMORYAL

13. Ano ang una gid nga dapat naton himuon para mabuligan naton ang iban nga makabenepisyo sa Memoryal?

¹³ Paano naton mabuligan ang iban nga makabenepisyo sa Memoryal? Siempre, ang una gid nga dapat naton himuon amo ang agdahon sila.  Magluwas sa mga ginabantalaan naton, puede kita makahimo sang listahan sang mga kilala naton nga mahimo naton agdahon. Nalakip sa sini ang aton mga paryente, mga kaupod sa obra, mga schoolmate, kag iban pa. Kon kulang ang aton naimprinta nga mga imbitasyon, puede naton ma-share ang link sini. Malipay gid kita kon madamo ang maga-attend sa aton mga gin-agda.​—Man. 11:6.

14. Maghatag sing halimbawa nga nagapakita sang maayo nga resulta kon personal naton nga agdahon ang iban.

¹⁴ Kon personal mo nga agdahon ang iban para mag-attend sa Memoryal, posible nga mas mapalig-on sila nga mag-attend. Binagbinaga ang eksperiensia sang isa ka sister nga indi Saksi ang bana. Isa ka adlaw, ginsilingan sia sang iya bana nga maupod sia sa iya sa Memoryal. Nakibot gid ang sister. Ngaa? Bangod kada Memoryal, pirme niya ginahagad ang iya bana nga mag-attend, pero wala gid nagaupod ang iya bana. Ti, ngaa gusto niya mag-attend subong? Nagsiling ang bana, “May naghatag sa akon sang imbitasyon kag gin-agda niya ako nga mag-attend.” Ginpaathag sang bana nga gin-agda sia sang isa ka gulang nga kilala niya. Nag-attend ang bana sa Memoryal sadto nga tuig, kag naga-attend sia pirme sa Memoryal sa sulod sang madamo nga tinuig.

15. Ano ang dapat naton dumdumon kon ginaagda naton ang mga tawo nga mag-attend sa Memoryal?

¹⁵ Dapat naton dumdumon nga posible may mga pamangkot ang mga ginaagda naton, ilabi na kon wala pa sila naka-attend sa aton mga miting. Gani mas maayo kon hunahunaon naton ang posible mga pamangkot nila, kag handaan naton ang aton isabat sa ila. (Col. 4:6) Halimbawa, posible ginapamensar sang iban: ‘Ano ang mga ginahimo ninyo sa Memoryal?’ ‘Daw ano ini kadugay?’ ‘Ano ang suksukon nga bayo?’ ‘May balayran?’ ‘May nagapangolekta sang donasyon?’ Kon ginaagda naton ang isa ka tawo nga mag-attend sa Memoryal, puede naton sia pamangkuton, “May gusto ka ipamangkot?” Kon may ara, maayo gid kon sabton naton ini. Puede man naton gamiton ang mga video nga Dumduma ang Kamatayon ni Jesus kag Ano ang Ginahimo sa Kingdom Hall? para buligan sia nga makita ang mga ginahimo naton sa aton mga miting. May manami man nga mga punto sa leksion 28 sang libro nga Magkabuhi sing Wala Katapusan! nga puede naton isugid sa iya.

16. Kon mag-attend sa Memoryal ang isa ka tawo, ano pa gid ang mga posible ipamangkot niya?

 ¹⁶ Kon mag-attend sila sa Memoryal sa pinakauna nga tion, posible nga may mga ipamangkot pa gid sila. Posible ginapamensar nila kon ngaa pila lang (kon may ara) ang nagakaon sang tinapay kag nagainom sang alak. Posible ginapamensar man nila kon daw ano kasunson naton ginasaulog ang Memoryal. Kag posible nga gusto nila mabal-an kon bala amo man sini ang ginahimo sa tanan nga miting sang mga Saksi ni Jehova. Ginabinagbinag sa pamulongpulong sa Memoryal ang pila sa sini, pero posible nga kinahanglan sang mga bag-uhan ang dugang nga paathag. May artikulo sa jw.org/hil nga makabulig sa aton nga masabat ang pila sa ila mga pamangkot. May tig-ulo ini nga “Ngaa Indi Pareho sa Iban nga Relihion ang Pagsaulog sang mga Saksi ni Jehova sang Panihapon sang Ginuo?” Gusto naton nga makabenepisyo sa Memoryal ang mga tawo nga “may husto nga panimuot,” gani buligan naton sila sa bug-os naton nga masarangan antes sang Memoryal, sa tion sang Memoryal, kag pagkatapos sang Memoryal.​—Binu. 13:48.

BULIGI ANG MGA INDI AKTIBO

17. Paano mabuligan sang mga gulang ang mga indi aktibo? (Ezequiel 34:​12, 16)

¹⁷ Mga pila ka semana antes kag pagkatapos sang Memoryal, paano mabuligan sang mga gulang ang mga indi aktibo? Ipakita ninyo sa ila nga palangga ninyo sila. (Basaha ang Ezequiel 34:​12, 16.) Antes sang Memoryal, siguraduha nga makontak ninyo sila. Isiling sa ila nga nagaulikid kamo sa ila kag gusto ninyo sila buligan. Agdaha ninyo sila nga mag-attend sa Memoryal. Kon mag-attend sila, abiabiha ninyo sila sing maayo. Pagkatapos sang Memoryal, padayon ninyo nga bisitahan ukon tawgan ining aton pinalangga nga mga kauturan, kag buligi ninyo sila sa bug-os ninyo nga masarangan nga makabalik kay Jehova.​—1 Ped. 2:25.

18. Ano ang puede naton himuon tanan para mabuligan naton ang mga indi aktibo? (Roma 12:10)

¹⁸ Kon may mga indi aktibo nga mag-attend sa Memoryal, puede sila mabuligan sang tanan nga kauturan sa kongregasyon. Paano? Paagi sa pagpakita sa ila sang gugma, kaayo, kag respeto. (Basaha ang Roma 12:10.) Dumdumon naton nga posible mabudlay para sa sining pinalangga naton  nga mga kauturan nga mag-attend liwat sa miting. Mahimo nakulbaan sila sa posible isiling sa ila sang mga kauturan. e Gani indi naton sila dapat pagpamangkuton sang mga pamangkot nga posible masaw-ahan sila. Maghalong man kita sa aton isiling sa ila kay basi makasakit ini sa ila. (1 Tes. 5:11) Mga kauturan naton sila, gani nalipay kita nga makaupod naton sila liwat sa pagsimba kay Jehova.​—Sal. 119:176; Binu. 20:35.

19. Ano ang mga benepisyo kon ginadumdom naton ang kamatayon ni Jesus?

¹⁹ Nagapasalamat gid kita kay ginsugo kita ni Jesus nga saulugon ang Memoryal sang iya kamatayon kada tuig, kag kabalo kita nga importante gid ini. Kon mag-attend kita sa Memoryal, indi lang kita ang makabaton sang madamo nga benepisyo kundi ang iban man. (Isa. 48:​17, 18) Mas magabakod ang aton gugma kay Jehova kag kay Jesus. Mapakita naton sa ila nga daku gid ang aton pagpasalamat sa ginhimo nila para sa aton. Mas magasuod pa gid kita sa aton mga kauturan. Kag matudluan naton ang iban kon ano ang dapat nila himuon para mabaton man nila ang mga pagpakamaayo nga ginpaposible sang halad-gawad. Gani, himuon naton ang aton bug-os nga masarangan para mangin handa kita sa Memoryal kay amo ini ang pinakaimportante nga adlaw sa bilog nga tuig.