1. Warom is tas Aantenke te wichtichste taach im yoer? (Lukas 22:19, 20)

 FER Yeehoowa sayn folek, is tas Aantenke fon Yeesus sayn toot te wichtichste taach im yoer. Es is te eensich ewënt woo Yeesus kexikt hot sayn nookeener se fayre. (Lees Lukas 22:19, 20.) a Meyer tuun tas Aantenke hërtslich waarte weeche fiile uersache. Wole mer etliche fon tëne noo kuke.

2. Warom tuun mer tas Aantenke hërtslich waarte?

² Tas Aantenke helft uns triwer noo tenke aan wii wichtich tas fray khaaf opfer is un wii mer khene petanklichkheet tsu Yeesus sayn opfer tsayche. (2 Kor. 5:14, 15) Es kept uns aach ti oportuniteet fer uns naner uf muute. (Rom. 1:12) Yeetes yoer, khome fiile inatiiwe tsum Aantenke. Weeche ti liiplich aat wii se im Aantenke pehantelt sin, tuun etliche ëntxlise tsurik tsu Yeehoowa khome. Un fiil anere tuun sich ferwunere mit was se siin un heere; tes weeche wole se aan fange ti Piipel xtutiire. Tas Aantenke is wërklich was ekstras fer uns!

3. Wii tuut tas Aantenke unser weltwayt pruuterxaft eenich lose? (Kuk aach tas pilt.)

³ Tenk aach iwer wii tas Aantenke unser weltwayt pruuterxaft eenich lost. Yeehoowa sayn Tsayer tuun sich fersamele soo lang wii ti sun uner keet uf te kans welt. Meyer al heere een reet woo tsaycht wii wichtich tas fray khaaf opfer is. Meyer  singe 2 liiter fom loop, kepe te wayn un tas proot torich un hërtslich saan “amen” noo 4 kepeete. In unkefeer 24 xtune, tuun al ti kemaynte tas selwiche mache. Xtel tich mool foer ti frooheet woo Yeehoowa un Yeesus xpiire wën se uns siin tëne in eenichkheet eere.

4. Was tuun mer in tiise artikel siin?

⁴ In tiise artikel, tuun mer too ti frooche antworte: Wii khene mer unser hërts fer tas Aantenke foer perayte? Wii khene mer helfe tii woo interes hon nutse too tefun kriin? Wii khene mer ti inatiiwe helfe? Ti antworte fer ti frooche tuun uns helfe fërtich fer tiise wichtich ewënt sin.

WII KHENE MER UNSER HËRTS FER TAS AANTENKE FOER PERAYTE?

5. (a) Warom sole mer triwer noo tenke aan tëm weyert fom fray khaaf opfer? (Psalm 49:7, 8) (b) Was host tuu mim wiiteo Fer was is Yeesus kextorep? kelërnt?

⁵ Eene fon te wichtichste aate fer unser hërts foer perayte fer tas Aantenke, is triwer noo tenke aan tëm weyert fon Yeesus sayn fray khaaf opfer. Meyer khonte uns net selepst pefraye fon te sint un fom toot. (Lees Psalm 49:7, 8; b kuk aach te wiiteo Fer was is Yeesus kextorep?) c Soo, hot Yeehoowa pleen kemacht tas Yeesus sayn leepe fer uns kepe teet. Tas waar sicher net laycht fer Yeehoowa un Yeesus mache. (Rom. 6:23) Woo tiifer mer too triwer noo tenke, woo kreeser wërt unser petanklichkheet tsum fray khaaf opfer. Wole mer xpreche iwer etliche xlime tinge woo Yeehoowa un Yeesus weeche uns kelit hon. Awer eyerst, wole mer tiise frooch antworte: Was petayt tas fray khaaf opfer?

6. Was petayt tas fray khaaf opfer?

⁶ Yeesus sayn opfer is te prays woo Yeehoowa petsaalt hot fer tsurik khaafe was Aatam ferloer hat. Aatam, te eyerste man, waar perfekt wii Kot tëm kemacht hot. Wii eyer kesint hot, hot eyer tas recht ferloer fer eewiche leepe kriin. Tas hot net ploos Aatam petrof, awer aach sayn khiner. Fer tsurik khaafe was Aatam ferloer hot, hot Yeesus sayn perfekte leepe keopfert. Torich sayn kanse leepe too uf te eyert, hot Yeesus “khee sint kemacht, un khee falxheet waar in sayn munt kefun kep”. (1 Phe. 2:22) Wii Yeesus kextorep is, waar eyer perfekt — soo wii Aatam waar foer sayn sint. Soo khont Yeesus te prays petsaale fer tas leepe woo Aatam ferloer hat. (1 Kor. 15:45; 1 Tim. 2:6)

7. Was fer sin etliche proope woo Yeesus uf te eyert mit kemacht hot?

⁷ Wii Yeesus uf te eyert waar, hot eyer Yeehoowa in ales aan keheert, soo kaar wën es net laycht waar. Wii een khint, must Yeesus sayn imperfekte eltere aan heere, opwool eyer perfekt waar. (Luk. 2:51) Wii eyer yung waar, fiilaycht wolte anere tëm tswinge sayn eltere unfoliche orer untroy tsu Yeehoowa sin. Yeesus must sich fest too tekeeche xtele. Un wii Yeesus een folyëriche mënx waar, must eyer sich keeche te Taywel xtele, woo tëm fersuucht hot se sinte un tëm richt raus kesaat hot noo lose troy tsu Kot sin. (Mat. 4:1-11) Satanaas waar pextimt Yeesus sinte mache, wayl soo khont Yeesus net tas fray khaaf opfer petsaale.

8. Was fer anere proope hot Yeesus aus kehal?

⁸ Torich sayn preetich aarwayt, hot Yeesus anere proope mit kemacht. Sayn faynte hon tëm keyacht un fersuucht tëm um pringe. (Luk. 4:28, 29; 13:31) Tee must ti xwacheete fon sayn tisipele aus hale. (Mar. 9:33, 34) Tee waar aach kekweelt un ferxpot im kericht woo  ëntxlist hot ep eyer leepe orer xtërpe teet. Tan waar eyer um keprung wii een kriminoos un hot fiil phayn mit kemacht. (Hep. 12:1-3) Wii eyer im kweel phoste aan kenaachelt waar, must eyer ti kroos phayn aleen aus hale, oone Yeehoowa sayn xitsung. d (Mat. 27:46)

9. Wii xpiire mer uns iwer Yeesus sayn opfer? (1 Pheeter 1:8)

⁹ Sicher hot Yeesus fiil kelit fer tas fray khaaf opfer fersoriche. Wën mer tenke aan ales was eyer fer uns kemacht hot, xpiire mer een tiif liip tsu tëm. (Lees 1 Pheeter 1:8.) e

10. Fer tas fray khaaf opfer fersoriche, was hot Yeehoowa mit kemacht?

¹⁰ Was hot Yeehoowa mit kemacht tas Yeesus khont tas fray khaaf opfer petsaale? Yeehoowa un Yeesus sayn fraayntxaft wii Fater un Soon is ti xtërkst fraayntxaft woo eksistiirt. (Xpr. 8:30) Soo xtel tich mool foer wii meecht Yeehoowa sich kexpiirt hon wii eyer kesiin hot Yeesus fiile proope too uf te eyert mit mache. Yeehoowa wërt wol fiil phayn kexpiirt hon, wii eyer kesiin hot sayn soon layte, xlecht pehantelt un ap kextos wëre.

11. Wii hot Yeehoowa sich kexpiirt wii Yeesus kextorep is? Kep een payxpiil woo uns helft tas ferxteen.

¹¹ Yemant woo een khint im toot ferloer hot, wees kenau wii xtark ti traurichkheet is wën soo was pasiirt. Wën een keliipte xtërpt, xpiire mer fiil phayn im hërts, opwool mer een xtarke klaape aan tëm ufxtaye fon te toote hon. Tas helft uns se ferxteen wii Yeehoowa sich kexpiirt hot wën eyer kesiin hot sayn liipe Soon layte un xtërpe am 14^te Nisan fon 33 N.K. f (Mat. 3:17)

12. Was khene mer mache in te woche foer tas Aantenke?

¹² Fon hayt aan pis tas Aantenke, fersuuch mee iwer tas fray khaaf opfer xtutiire in tayn perseenlich xtuutyum orer familye aanpeetung. Penuts te Guia de Pesquisa para Testemunhas de Jeová orer anere puplikatsyoone fer tich helfe mee iwer tas fray khaaf opfer lërne. g Mach aach ti Piipel leesung fer tas Aantenke, woo im Unser kristlich leepe un preetich — Xtuutyum heftche xteet. Un im taach fom Aantenke, ferkes tich net ti ekstra moynts aanpeetung kuke. Wën mer unser hërts fer tas  Aantenke foer perayte, kriin mer es hin anere helfe aach nutse too tefun kriin. (Ëst. 7:10)

HELF TII WOO INTERES HON, NUTSE KRIIN

13. Was is te eyerste xrit fer ti anere helfe nutse fom Aantenke kriin?

¹³ Wii khene mer ti anere helfe nutse fom Aantenke kriin? Te eyerst xrit is se in laate. Weem khene mer in laate? Ti layt woo mer in te preetich aarwayt trefe; awer meyer khene aach een list mache fon anere layt — too tepay unser parente, xuul un aarwayts koleke un anere layt woo mer khëne. Soo kaar wën mer net kenuuch ausketrukne kopye fon te inlaatung hon, khene mer een link fon te eletroonix inlaatung fer ti layt xike. Es khan uns ferwunere ti numer layt woo ëntxlise tsum Aantenke keen! (Ekl. 11:6)

14. Kep een payxpiil woo tsaycht tas een inlaatung kriin, khan ti persoon uf muute tsum Aantenke keen.

¹⁴ Een inlaatung kriin, khan ti persoon uf muute tsum Aantenke keen. Een xwester hot sich ferwunert wii sayne man, woo net Yeehoowa sayn Tsayer is, se kesaat hot tas eyer mit tëne tsum Aantenke keengt. Warom hot ti xwester sich ferwunert? Wayl in te ferkangne yoore, hat se tëm fiil mool uf kemuut tsum Aantenke keen, awer tee hot tas nii kemacht. Was waar yets anerste? Een elteste fon te kemaynt, woo te man kekhënt hot, hot tëm een ausketrukne inlaatung kep. Te man is tsum Aantenke kang net ploos tiise yoer, awer aach in te yoore tëm noo.

15. Was sole mer uns erinere wën mer ti layt fer tas Aantenke in laate?

¹⁵ Eriner tich tas tii woo mer in laate, khene uns frooche mache — hauptseechlich wën se nii tsu unser fersamlunge kang sin. Soo meyer sole tenke aan te frooche woo se uns mache khene un uns foer perayte fer se antworte. (Kol. 4:6) Tsum payxpiil, etliche khene uns frooe: ‘Was tuut im ewënt pasiire? Wii lang tauert tas? Was sol ich aan tsiie? Sol ich etwas petsaale fer rin keen? Wërts kelt ferlangt?’ Wën mer yemant fer tas Aantenke in laate, khene mer aynfach frooe: “Host tuu een frooch iwer tas Aantenke?” un tan, tas antworte. Meyer khene aach ti wiiteos Tuu aan Yeesus  sayn Toot aan tënke un Was pasiirt in een Raych Saal? penutse fer ti persoon helfe se ferxteen wii unser fersamlunge sin. Un ti lisyoon 28 fom puuch Los tich kuut keen im leepe fer imer! hot fiile kuute phunkte woo mer mit te persoon aus teele khene.

16. Was fer anere frooche khene tii, woo tsum Aantenke keen, mache?

¹⁶ Noo tsum Aantenke keen, khan sin tas tii woo interes hon noch anere frooche mache. Tsum payxpiil: ‘Warom hon weenich layt (orer fiilaycht nimant) fom proot kes un fom wayn ketrunk? Wii ofts tuun Yeehoowa sayn Tsayer tas Aantenke fayre? Sin al ti fersamlunge kraat soo kehal?’ Opwool fiile fon tiise phunkte in te reet fom Aantenke aus keleet sin, fiilaycht mus ti persoon mee kleenichkheete wise fer tas ferxteen. Te artikel im site jw.org “Warom fayre Yeehoowa sayn Tsayer tas Oomtsmal fom Hër anerste?” khan uns helfe etliche fon tiise frooche antworte. Meyer wole unser pestes mache foer, torich un noom Aantenke fer se helfe tii woo “ti richtich muut” hon, nutse fon tiise ewënt kriin. (Aph. 13:48)

HELF TI INATIIWE

17. Wii khene ti elteste ti inatiiwe helfe? (Esekyël 34:12, 16)

¹⁷ Wëns tuu een elteste pist, wii khanst tuu ti inatiiwe helfe in te woche foer tas Aantenke? Tsaych tas tuu tich mit tëne khimerst. (Lees Esekyël 34:12, h 16. i) Kontaktiir soo fiile layt wiis tuu khanst. Los tëne sicher tas tuu tich mit tëne khimerst un tas tuu se helfe wilst. Laat se tsum Aantenke in. Wën se keen, tuu se hërtslich wilkhome. Un noom Aantenke, tuu wayter tiise liipe priiter un xwestere pesuuche orer aan ruufe. Kep tëne aach ti neetich hilef fer tsurik tsu Yeehoowa khome. (1 Phe. 2:25)

18. Wii khene meyer al ti inatiiwe helfe? (Romaaner 12:10)

¹⁸ Al in te kemaynt khene ti inatiiwe helfe  woo tsum Aantenke khome. Meyer khene se mit liip, fraayntlichkheet un respekt pehantele. (Lees Romaaner 12:10.) j Ferkes tich net: fiilaycht is es xweyer fer tiise liipe xeef tsu een fersamlung noch mool khome. Im xtant tuun se sich frooe ep se kuut aan kenom wëre. k Soo mach net frooche woo khene se xeeme un saa niks woo khent se wee mache. (1 The. 5:11) Tii sin noch unser priiter un xwestere un meyer sin froo tas mer khene Yeehoowa noch mool mitsamer aan peete. (Psal. 119:176; Aph. 20:35)

19. Was fer nutse kriin mer weeche tas Aantenke?

¹⁹ Meyer sin froo tas Yeesus uns kexikt hot sayn toot yeetes yoer erinere un meyer ferxteen warom tas wichtich is. Tsum Aantenke keen, pringt nutse fer uns un fer ti anere. (Isa. 48:17, 18) Unser liip tsu Yeehoowa un Yeesus wërt kreeser. Meyer tsayche tas mer petanklich sin fer was se uns kemacht hon. Meyer khome tichter pay unser priiter un xwestere. Un meyer helfe anere se lërne wii se khene aach ti seechen kriin woo weeche tas fray khaaf opfer khome. Soo wole mer uns aan xtrenge fer fërtich fer tas Aantenke sin — te wichtichste taach im yoer.