1. ¿Jaléʼ ti lej exbadh abal wawáʼ an Conmemoración? (Lucas 22:​19, 20).

 PATAL axi i tʼójonchal a Jehová i exlál abal an Conmemoración játs an kʼicháj axi más exbadh al an támub. Axéʼ játs an ajib axi a Jesús in uchaʼ in aykolil kin tʼilaʼ támub ti támub (ka ajiy Lucas 22:​19, 20). Wawáʼ i lej aychalits kin bajuw nixéʼ a kʼicháj. Ki tsuʼuw jaleʼ.

2. ¿Jaleʼ ti lej aychalits kin bajuw an kʼicháj in kʼál an Conmemoración?

² An Conmemoración tu tólmiyal ki tʼilaʼ jawaʼ a Jehová in tʼajámal abal tu ku kʼaniy. Tu tʼilchal jantʼiniʼ i éjtowal ki tejwamédhaʼ abal i kʼakʼnál kom a Jesús in bínaʼ in ejatal (2 Cor. 5:​14, 15). Nixéʼ a kʼicháj jayej u eynal abal ku tamkun kʼal an epchalchik ani ku kanatbedháxin (Rom. 1:12). Támub ti támub u kʼalel kʼal an Conmemoración yan i epchal axi in jilamal ka tamkun ani ti ólnom. Talchik kʼal jajáʼ u wichél ti támkunal kom tejwamédhanchat i kʼanidhomtaláb kʼal an epchalchik. Jayej waʼats yan i atikláb axi in tujchal ti exóbal kʼal an Biblia kom in lej kulbétnaʼ jawaʼ in atsʼaʼ. Patal axéʼ in tʼajál abal ki lej kulbétnaʼ ku kʼalej ban Conmemoración.

3. ¿Jantʼiniʼ tu tólmiyal an Conmemoración ki tʼajaʼ ti kwéntaj abal in bichówil a Jehová kʼwajat junkudh? (Ka tsuʼuw jayej an imágenes).

³ Jayej i lej léʼits ka ulits nixéʼ a kʼicháj kom tu tólmiyal ki tʼajaʼ ti kwéntaj abal in bichówil a Jehová kʼwajat lej junkudh tin puwél an tsabál. Nixéʼ a kʼicháj an ólchixchik kʼal a Jehová u  tujel ti támkunal tam kʼwajat ti otskanal a kʼicháj. U bináb jun i tʼilomtaláb juʼtáj u olnáb an alwaʼtaláb axi i bátsʼuwal kom a Jesús in bínaʼ in ejatal, jayej u ajatnáb tsab i ajatláb, u watʼbab an pan ani an vino ani u tʼajnal tseʼ i oláb. Nixéʼ a kʼicháj patal an tamkuntaláb axi tin puwél an tsabál jayetsej neʼets kin tʼajaʼ. A Jehová ani a Jesús neʼets kin atsʼaʼ lej kulbél kin tsuʼuw ka puwénchat kʼal patal an epchalchik axi tin puwél an tsabál.

4. ¿Jantʼoj neʼets ki exóbnaʼ?

⁴ Al axéʼ xi exobintaláb neʼets ki tókʼtsiy axéʼchik xi konowixtaláb: ¿jantʼoj i éjtowal ki tʼajaʼ abal ku tʼojojon abal an Conmemoración?, ¿jantʼiniʼ i éjtowal ki tólmiy axi kʼeʼat abal jayej ka kʼalej ban Conmemoración?, ¿jantʼiniʼ i éjtowal ki tólmiy abal ka kʼalechik ti Conmemoración jitaʼchik in jilamal ka kʼalej ti tamkuntaláb ani ti ólnom? Axéʼchik xi konowixtaláb neʼets tu ku tólmiy abal ku kʼwajiy tʼojojodh abal an Conmemoración.

¿JANTʼINIʼ I ÉJTOWAL KU TʼOJOJON ABAL AN CONMEMORACIÓN?

5. a) ¿Jaleʼ ti lej exbadh ki tsalpay kʼal jawaʼ in tʼajaʼ a Jehová ani a Jesús abal tu ku kʼaniy? (Salmo 49:​7, 8). b) Ka olnaʼ jantʼoj a exóbnaʼ ban video ¿Jaleʼ ti tsemets a Jesús?

⁵ Jawaʼ más exbadh kwaʼal ki tʼajaʼ abal ku tʼojojon, játs ki tsalpay kʼal an alwaʼtaláb axi i bátsʼuwal kom a Jesús in bínaʼ in ejatal. Wawáʼ yab neʼets ki ejtow ki tʼajaʼ jantʼoj ti kwetemtal abal ki tixkʼaʼ an walabtaláb ani an tsemláj (ka ajiy Salmo 49:​7, 8; jayej ka tsuʼuw an video ¿Jaleʼ ti tsemets a Jesús?). a Jaxtám a Jehová in bínaʼ in tsakámil ani tin tsablóm in lej yajchiknaʼ (Rom. 6:23). Max ki lej tsalpay kʼal patal jawaʼ in tʼajaʼ a Jehová ani a Jesús abal tu ku kʼaniy, neʼets tu ku tólmiy abal ki pidhaʼ más in jalbíl jawaʼ in tʼajaʼchik. Ki tsuʼuw jantʼoj in yejenchij kin tʼajaʼ a Jehová ani a Jesús abal tu ku kʼaniy kʼal an walabtaláb.

6. ¿Jantʼoj tʼajan abal ku kʼániyat kʼal an walabtaláb ani an tsemláj?

⁶ Ki tsalpay kʼal axéʼ, max i léʼ abal ku wichbanchat jantʼoj axi i kʼibaʼ, kwaʼal ki bínaʼ jantʼoj o ki jálbiy abal ku wichbanchat. Játs jawaʼ watʼey kʼal a Adán, tam ti tsʼejkáj kʼal a Jehová jajáʼ pelak tʼokat. Neʼetsak kin ejtow ka kʼwajiy abal etsʼey pero tam tin jékʼomnaʼ a Jehová, in kʼibaʼ nixéʼ xi alwaʼtaláb ani jayetsej neʼetsak ka watʼey kʼal patal an atikláb axi ka waʼtsin talbél. Tam, abal ku wichbanchat jawaʼ a Adán in kʼibaʼ, a Jesús in yejenchij kin bínaʼ in ejatal, kom jajáʼ pelak jun i inik tʼokat. Tam ti a Jesús kʼwajiy tejéʼ tsabál «yab jaykʼiʼ walbin ani yab in uluw nibal jun i janamtaláb» (1 Ped. 2:22). Kom pelak jun i inik tʼokat in ejtow kin jálbiy o kin wichbaʼ jawaʼ a Adán in kʼibaʼ (1 Cor. 15:45; 1 Tim. 2:6).

7. Ka olnaʼ talchik i kʼibataláb axi in tamétnaʼ a Jesús.

⁷ Tam ti a Jesús kʼwajiy tejéʼ tsabál, in bélkaʼ a Jehová belits abal in tamétnaʼ yan i kʼibataláb. Ani tam ti jajáʼ kʼwajatak ti yedháb kʼal a José ani a María, koʼoy kin bélkaʼchik belits abal jajáʼ pelak jun i tsakam axi tʼokat (Luc. 2:51). Ani tam ti más púlik walám u nixoknábak abal yab kin bélkaʼ in tátajchik o abal kin kʼibchij a Jehová. Ani tam ti pélakits jun i inik in koʼoy kin tomolnaʼ a Satanás, kom taknáj ani ma nixoknáj abal kin kʼibchij a Jehová (Mat. 4:​1-11). A Satanás in léʼak abal a Jesús kin kʼibchij a Jehová abal yab kin ejtow kin bínaʼ in ejatal ani yab kin ejtow tu ku kʼaniy kʼal an walabtaláb ani an tsemláj.

8. ¿Jantʼoj tam kʼeʼat i kʼibataláb in tamétnaʼ a Jesús?

⁸ Tam ti a Jesús in tujchij ti ólnom in tamétnaʼ pílchik i kʼibataláb. Jun i tʼiplab, jajáʼ ayoknáj kʼal axi tu kʼwíynalak ani ma u leʼnabak ka  tsemdháj (Luc. 4:​28, 29; 13:31). Jayej, koʼoy kin kúxunchij in aykolil, kom jajáʼchik u lej ukʼpinalak (Mar. 9:​33, 34). Ani tam ti neʼdháj tin tamét an eyalchik abal ka jólbiyat, odhnáj ani telan. Jayej tsemdháj jantʼiniʼ jun i atikláb axi pojkax ani in lej yajchiknaʼ (Heb. 12:​1-3). Ani tam ti kʼwajatits abal neʼets ka tsemets, yabáts tólmiyat kʼal a Jehová ani koʼoy kin kuxuy jajáʼ kwetém an yajal (Mat. 27:46). b

9. ¿Jantʼoj i atsʼál tam ki tsalpay kʼal patal jawaʼ in tʼajaʼ a Jesús abal tu ku kʼaniy? (1 Pedro 1:8).

⁹ A Jesús in lej yajchiknaʼ abal kin ejtow tu ku kʼaniy kʼal an walabtaláb ani an tsemláj. Tam ku kʼwajiy ki tsalpay kʼal patal jawaʼ a Jesús in tʼajaʼ abal tu ku kʼaniy, nixéʼ in tʼajál abal ki kʼanidhaʼ más (ka ajiy 1 Pedro 1:8).

10. ¿Jantʼoj in léʼnaʼ kin tʼajaʼ a Jehová abal tu ku kʼaniy?

¹⁰ ¿Jantʼoj in tʼajaʼ a Jehová kom in léʼak abal a Jesús tu ku kʼaniy kʼal an walabtaláb ani an tsemláj? A Jehová ani a Jesús u lej kʼanidháx (Prov. 8:30). Axéʼ tu tólmiyal ki exbay abal a Jehová in lej yajnaʼ tam tin tsuʼuw abal a Jesús in tametnálak yan i kʼibataláb tejéʼ ti tsabál. Ani más in yajnaʼ tam tin tsuʼuw abal a Jesús u odhnáb, u kawiliyáb ani u kwadhnalak.

11. ¿Jantʼoj tam tʼiplab tu tólmiyal ki exbay jantʼiniʼ tin atsʼaʼ a Jehová tam tin tsuʼuw ka tsémdhanchat in tsakámil?

¹¹ An tatalábchik axi in kʼibamal jun in tsakámil ban tsemláj in exlál abal pel jantʼoj axi lej yajchik. I lej bélal abal a Jehová neʼets tu ku wíchbanchij i yanél axi koyomadh, belits antsanáʼ pel jantʼoj axi i lej yajnál. Axéʼ xi tʼiplab tu tólmiyal ki exbay abal a Jehová in lej yajnaʼ tam tin tsuʼuw abal a Jesús odhnáj ani tsemdháj ti 14 a Nisán ban támub 33 (Mat. 3:17). c

12. ¿Jantʼoj i éjtowal ki tʼajaʼ biyat in bájuwal an Conmemoración?

¹² Biyat in bájuwal an Conmemoración a éjtowal ka exóbnaʼ ta kwetemtal o kʼal a yanél, jantʼoj in koʼoy kin tʼajaʼ a Jehová ani a Jesús abal tu ku kʼaniy. A éjtowal ka eyendhaʼ an Guía de estudio para los testigos de Jehová o kʼeʼat i publicaciones abal ka exbay más tin kwéntaj axéʼ. d Jayej a éjtowal ka ajiy an ajumtaláb kʼal an Biblia axi kʼwajat ban Tolmixtaláb abal ti exóbal abal an tamkuntaláb. Ban kʼicháj in kʼál an Conmemoración yab ka ukʼchiy  ka metʼaʼ an kʼakʼnaxtaláb axi ti dhajuw abal an Conmemoración. Max wawáʼ ku tʼojojon okʼxidh abal an Conmemoración, jayej neʼets ki ejtow ki tólmiy axi kʼeʼat abal kin ejtow ka kʼalej (Esd. 7:10).

KI TÓLMIY KʼEʼAT I ATIKLÁB ABAL KIN EJTOW KA KʼALEJ BAN CONMEMORACIÓN

13. ¿Jantʼoj i éjtowal ki tʼajaʼ abal ki kaniy más i atikláb ban Conmemoración?

¹³ ¿Jantʼiniʼ i éjtowal ki tólmiy axi kʼeʼatchik abal jayej ka kʼalej ban Conmemoración? Kwaʼal ki bukʼuw an kanixtaláb. Pero jayej i éjtowal ki tsʼejkaʼ jun i lista ani ki dhuchaʼ jitaʼ játs axi i léʼ ki kaniy, ejtíl i yanél, i juntal tʼojnal, i juntal exóbal ani kʼeʼat i exlowál. Ani max ka taley an kanixtaláb axi ti uw, i éjtowal ki abchij an enlace in kʼal an kanixtaláb. Walám ma ka kʼalej i atikláb axi yab a tsalpanchal (Ecl. 11:6).

14. Ka olnaʼ kʼal jun i tʼiplab jantʼoj awil ka watʼey max wawáʼ ki kaniy jun i atikláb kʼal an Conmemoración.

¹⁴ Tam tatáʼ a kániyal an atikláb ban Conmemoración, yab ka tsalpay abal alkʼidhits ta tʼajál. Jun i kʼicháj jun i epchal mimláb in lej jikʼpaʼ tam ti uchan kʼal in tomkíl abal neʼets ka junáj ban Conmemoración. In lej jikʼpaʼ kom yanílits in kaniyamal pero yab jaykʼiʼ kʼalej. Tam, ¿jaleʼ ti kʼalej nixéʼ a kʼicháj ban Conmemoración? An inik in uluw abal játs kom pidhan jun i kanixtaláb kʼal jun i ókʼnom axi jajáʼ in exlál. Talbél jajáʼ kʼalej yaníl kʼal an Conmemoración.

15. ¿Jantʼoj in lej tomnál ki tʼajaʼ ti kwéntaj tam ki kaniy jun i atikláb ban Conmemoración?

¹⁵ Yab ki ukʼchiy abal tam ki kaniy jun i atikláb ban Conmemoración waʼats yan jantʼoj axi in léʼ kin exlaʼ ani más kom walám yab jaykʼiʼ kʼalnek kʼal jun i tamkuntaláb. Jaxtám lej exbadh ki tsalpay jantʼoj walám kin léʼnaʼ kin exlaʼ ani ki tsalpay jantʼiniʼ ti neʼets ki tókʼtsiy (Col. 4:6). Walám kin léʼnaʼ kin exlaʼ jantʼoj u tʼajnal ban tamkuntaláb, jay u owel, jantʼiniʼ tin tomnál ka kʼalej toltomidh ani max kwaʼal kin jálbiy abal ka otsits. Jaxtám in yéjenchal ki tʼilmay an atikláb axi kʼwajat i kániyal ani ki konoy max in yéjenchal kin exlaʼ jantʼoj más.  Jayej i éjtowal ki ólchij an videos axi in bij, Ki tʼilaʼ in tsémtal a Jesús ani jayej ki ólchij an video ¿Jantʼoj u tʼajnal al jún i Atáj Tamkuntaláb? Jayej ban ajumtaláb 28 in kʼál an libro Kit kʼwajiy kulbél abal etsʼey, waʼats talchik i tsalap axi a éjtowal ka ólchij an atikláb.

16. ¿Jantʼoj más neʼets kin léʼnaʼ kin exlaʼ an atikláb axi ka kʼalej ban Conmemoración?

¹⁶ Talbél kʼal an Conmemoración, walám an atikláb kin léʼnaʼ kin exlaʼ kʼeʼat jantʼoj. Ejtíl, walám yab in lej exbay jaleʼ ti yab patal in kʼapal an pan ani an vino. Jayej walám kin léʼnaʼ kin exlaʼ jayil al an támub u tʼajnal an Conmemoración, o walám kin léʼnaʼ kin exlaʼ max jayetsej u tʼajnal etsʼey tam ku tamkun. Ban Conmemoración tokʼtsiyat talchik kʼal axéʼ xi konowixtaláb, pero walám an atikláb in leyej kin exlaʼ jantʼoj más. Abal ki ejtow ki ólchij jawaʼ in léʼ kin exlaʼ i éjtowal ki eyendhaʼ an artículo axi kʼwajat ti jw.org axi in bij «Ka exóbnaʼ jaleʼ ti an ólchixchik kʼal a Jehová lej pilits tin tʼipoyal in tsémtal a Jesús». Biyat in bájuwal an Conmemoración i léʼ ki tólmiy an atiklábchik abal ka kʼalej, ani talbél kʼal an Conmemoración i léʼ ki áynanchij ki tólmiy jitaʼchik tejwaʼ abal in léʼ kin exlaʼ tin kwéntaj a Jehová (Hech. 13:48).

KI TÓLMIY JITAʼCHIK IN JILAMAL KA TAMKUN ANI TI ÓLNOM

17. ¿Jantʼiniʼ in éjtowal an ókʼnomchik kin tólmiy jitaʼchik in jilamal ka tamkun ani ka kalej ti ólnom? (Ezequiel 34:​12, 16).

¹⁷ ¿Jantʼoj in éjtowal kin tʼajaʼ an ókʼnomchik abal kin tólmiy axéʼchik xi epchal abal ka kʼalej ti Conmemoración? Max kin tejwamédhanchij i kʼanidhomtaláb ani kin tʼajaʼchik ti kwéntaj (ka ajiy Ezequiel 34:​12, 16). Max tatáʼ pel it ókʼnom, ka tʼilmay patal an epchalchik axi in jilamal ka tamkun ani ka kalej ti ólnom. Ka tʼilchij abal a lej kʼanidhál ani abal a léʼchik ka tólmiy. Ka kániychik ban Conmemoración ani max ka kʼalechik, ka lej tʼajaʼchik ti kwéntaj. Talbél kʼal an Conmemoración ka áynanchij ka tʼilmay axéʼchik xi epchal ani ka tólmiy abal kin léʼnaʼ kin kʼakʼnaʼ junílekʼij a Jehová (1 Ped. 2:25).

18. ¿Jantʼiniʼ i éjtowal ki tólmiy jitaʼchik in jilamal ti támkunal ani ti ólnom? (Romanos 12:10).

 ¹⁸ Patal i éjtowal ki tólmiy an epchalchik axi in jilamal ti támkunal o ka kalej ti ólnom, tam ka kʼalej ban Conmemoración. ¿Jantʼoj i éjtowal ki tʼajaʼ? Ki tsápnanchij ki tejwamédhanchij abal i kʼanidhál ani abal i kʼakʼnál (ka ajiy Romanos 12:10). Ki tʼilaʼ abal walám axéʼchik xi epchal in atsʼaʼ kʼibat ka kʼalej junílekʼij ban tamkuntaláb. Walám u wéʼ tʼeʼpinalak kom yab in exlál jantʼoj neʼetsak ka uchan kʼal an epchalchik tam ka ulits. e Jaxtám ki lej tʼajaʼ ti kwéntaj jantʼoj neʼets ki konoy ani yab ki uluw jantʼoj kʼal axi ki yajbedhaʼ (1 Tes. 5:11). Ki tʼilaʼ abal jajáʼchik jayej pel i epchal ani i atsʼál lej kulbél ki ejtow ki kʼakʼnaʼ a Jehová junax (Sal. 119:176; Hech. 20:35).

19. ¿Jantʼoj tam alwaʼtaláb i bátsʼuwal tam ki tʼilchij in tsémtal a Jesús?

¹⁹ Kʼal patal jawaʼ i exobnámal ma tejéʼ, i éjtowal ki exbay jaleʼ ti a Jesús tu exóbchij ki tʼilchij in tsémtal. I bátsʼuwal yan i alwaʼtaláb wawáʼ ani axi más, tam ki bélkaʼ jawaʼ a Jesús tu uchaʼ ki tʼajaʼ (Is. 48:​17, 18). Jayej tu tólmiyal ki kʼanidhaʼ más a Jehová ani a Jesús ani abal ki kʼákʼnanchij patal jawaʼ in tʼajámal abal tu ku tólmiy. I éjtowal ku kʼwajiy más junkudh kʼal an epchalchik ani ki tólmiy an atiklábchik, abal kin exlaʼ jantʼoj kwaʼal kin tʼajaʼ abal kin batsʼuw i lablixtaláb. Jaxtám ki tsápnanchij ku kʼwajiy tʼojojodh abal an Conmemoración, kom nixéʼ játs an kʼicháj axi más exbadh.