1. Omena raye Omazemburukiro wonḓiro ya Jesus tje ri eyuva enanḓengu tjinene mombura? (Lukas 22:​19, 20)

 KOVAKARERE va Jehova, eyuva rOmazemburukiro wonḓiro ya Kristus eeyuva enanḓengu tjinene mombura. Iho otjitjitwa atjiyerike Jesus aa tja rakiza kovemukongorere okutjita. (Lesa Lukas 22:​19, 20.) Eṱe tu kara nondjoroka okukara pomazemburukiro ngo, mena romapu omengi. Ngatu tare komapu tjiva nga.

2. Omapu yeṋe tjiva ngu tu i ra kOmazemburukiro wonḓiro ya Jesus?

² Omazemburukiro wonḓiro ya Jesus ye tu vatera okuripurira ko oukoto kounanḓengu wotjisuta tjonguturiro nozondaya nḓu matu kamuna. Oyo ye tu zemburukisa omiano mu matu yenene okuraisa ondangi kombunguhiro ya Jesus. (2 Kor. 5:​14, 15) Omazemburukiro ngo wina ye tu pa oruveze kutja “tu vaterasane mongamburiro.” (Rom. 1:12) Ombura aihe, ovakambure ovakwetu ovengi mba isa okuya kozombongarero zetu ve ya kOmazemburukiro wonḓiro ya Jesus. Tjiva va tya okukotoka ku Jehova, mena rokutja ve tjindwa momuano worusuvero pOmazemburukiro wonḓiro ya Jesus. Nu ovandu ovengi mba raisa onḓero ve tjaterwa i yoviṋa mbi mave munu nokuzuva, nu iho tji tjita kutja ve ute okurihonga Ombeibela. Imbi avihe vi tjita kutja Omazemburukiro wonḓiro ya Jesus ye rire otjitjitwa tjapeke kweṱe.

3. Omomuano uṋe Omazemburukiro wonḓiro ya Jesus mu ye waneka eṱunḓu rovakambure avehe mouye? (Wina tara kotjiperendero.)

³ Wina, ngatu ripurire komuano Omazemburukiro wonḓiro ya Jesus mu ye tu wanisa ku novakambure ovakwetu mouye auhe. Ongondoroka nouye, Ovahongonone va Jehova ve worongana pamwe kOmazemburukiro wonḓiro ya Jesus otja eyuva tji mari kahita. Atuhe tu puratena kehungi ndi hungirira kounahepero wotjisuta tjonguturiro. Nu tu imbura omaimburiro yevari yondangero, atu yandja omboroto nomavinu, nu atu tja “amen” nomutima auhe kozongumbiro ine. Ozombongo azehe ze tjita nao meyuva ndo. Jehova na Jesus ve kara nondjoroka indu tji mave munu omuano mu tu ve raisira ondengero.

4. Matu kahungirira ku ye morupa ndwi?

 ⁴ Morupa ndwi, matu katara komapuriro nga: Matu yenene okurongerisa vi omitima vyetu kOmazemburukiro wonḓiro ya Jesus? Matu yenene okuvatera vi varwe kutja ve mune mo ouwa? Nu matu yenene okuvatera vi ovakambure ovakwetu mba yaruka ombunda mongamburiro? Omaziriro komapuriro nga maye yenene okutuvatera kutja tu rirongerisire otjitjitwa tjapeke ho.

MATU YENENE OKURONGERISA VI OMITIMA VYETU KOMAZEMBURUKIRO WONḒIRO YA JESUS?

5. (a) Omena raye tji tu ripurira konḓengu yotjisuta tjonguturiro? (Epsalme 49:​7, 8) (b) Otjikeṋa tji twe rihongo okuza kokavidio nga, Omena ratjike Jesus tja ṱa?

⁵ Omuano umwe omunanḓengu mu matu yenene okurirongerisira Omazemburukiro wonḓiro ya Jesus omokuripurira kounanḓengu wotjisuta tjonguturiro tja Jesus Kristus. Kape notjiṋa tji matu yenene okutjita okuriyama oveni kouvi nonḓiro. (Lesa Epsalme 49:​7, 8; wina tara kokavidio nga, Omena ratjike Jesus tja ṱa?) a Ku nao, Jehova wa tjita kutja Jesus ma yandje omuinyo we kokutja tu yamwe. Jehova na Jesus ve tu pa ombunguhiro onanḓengu tjinene. (Rom. 6:23) Otja tji matu ripurire oukoto ku imbi Jehova na Jesus mbi ve tu pa, eṱe tu raisa ondangi onene kotjisuta tjonguturiro. Matu katara koviṋa tjiva ovizeu Jehova na Jesus mbi va yenena okututjitira. Posi yokutja, rutenga otjisuta tjonguturiro tji kamburira mo ye?

6. Otjisuta tjonguturiro tji kamburira mo ye?

⁶ Otjisuta tjonguturiro otjisuta tji tji sutwa okurandurura otjiṋa. Omundu omutenga Adam, wa memwa otjomundu ohomonena. Eye wa tjita ourunde, mbwa tjita kutja eye novanatje ve ve pandjare omuinyo waaruhe. Jesus wa yandja omuinyo we ohomonena otjombunguhiro okurandurura imbi Adam mbya pandjarisa. Mehupo re kombanda yehi Jesus “ka tjitire ouvi, nu kape nomundu ngwe Mu zuvire ama hungire ovineya.” (1 Petr. 2:22) Indu Jesus tja ṱa, eye wa yandja omuinyo we ohomonena mbu ṱeki pomuinyo Adam mbwa pandjarisa.—1 Kor. 15:45; 1 Tim. 2:6.

7. Omauzeu yeṋe tjiva Jesus nga muna indu tja ri kombanda yehi?

⁷ Indu tja ri kombanda yehi, Jesus wa kara nonḓuviro moviṋa avihe ku Jehova, nandarire kutja ya ri ouzeu okutjita nao. Jesus wa ri omuatje ohomonena nu ovanene ve kava ri ohomonena, nungwari eye wa ri nonḓuviro ku wo. (Luk. 2:51) Otjomutanda, eye aa hepa okupirukira oṋiṋikizire okuza ku varwe mbu mape ya aave vanga kutja a ha kara nonḓuviro kovanene ve, poo kutja a ha rire omuṱakame ku Jehova. Otjomundu omunene, Jesus aa sokupirukira Satan Omudiaboli ngwee mu roro kouvi, nu nandarire ngwee mu popo kutja a ha rire omuṱakame ku Jehova. (Mat. 4:​1-11) Satan we rimanenene okutjita kutja Jesus ma tjite ouvi kokutja a ha yenene okusuta otjisuta tjonguturiro.

8. Omauzeu yeṋe yarwe Jesus nga tuurunga?

⁸ Motjiungura tje tjokuzuvarisa, Jesus wa tjinda omarorero yarwe. Eye wa tatumisiwa, nu ovanavita na ye aave vanga okumuzepa. (Luk. 4:​28, 29; 13:31) Eye aa sokutjinda ozondataiziro zovahongewa ve, mbe ha ri ohomonena. (Mar. 9:​33, 34) Indu tja pangurwa kokuṱa, eye wa turikwa komuti nokunyekererwa. Okuzambo eye wa pangurwa okuṱa otjomurunde nu wa kara momihihamo omizeu tjinene. (Hebr. 12:​1-3) Eye aa sokutjinda omarorero we omasenina ku ye omuini nomuretima, nokuhinombatero ya Jehova. b—Mat. 27:46.

9. Ombunguhiro ya Jesus i tu hinga kutja tu tjite vi? (1 Petrus 1:8)

⁹ Tjiri, Jesus wa munine ondatumisire onḓeu kokutja ma sute otjisuta tjonguturiro. Orusuvero  rwetu ku Jesus ru kurira ko indu tji matu ripurire koviṋa avihe mbya vanga okututjitira.—Lesa 1 Petrus 1:8.

10. Otjisuta tjonguturiro tja ṱuna ku Jehova pu pe ṱa pi?

¹⁰ Otjikeṋa Jehova tja ri nonḓero okutjita kokutja Jesus ma sute otjisuta tjonguturiro? Jehova na Jesus ve noupanga wopopezu tjimuna oupanga mbu kara pokati kaihe nomuzandona we. (Omiano 8:30) Ripura uriri komuano Jehova ma ṱunwa i yomauzeu omengi Jesus ngaa munu indu tja ri kombanda yehi. Tjiri Jehova wa hihamwa tjinene tjaa munu Omuna we ama tjindwa navi, ama pirukirwa, nokumuna omauzeu.

11. Yandja otjihorera tji matji raisa omuano onḓiro ya Jesus mu ya ṱuna ku Jehova.

¹¹ Omunene auhe u tjiwa nawa omuhihamwatima omundu mbwe kara na wo indu tja zepaisa omuatje we. Eṱe tu nongamburiro ndji ha ivaiva mombendukiro, posi yokutja iho katji isa po omuhihamwatima indu tji twa zepaisa omusuverwa wetu. Otjihorera ho matji tu vatere okuzuva nawa omuano Jehova ma ri nomuhihamwatima indu tjaa tarere Omuna we omusuverwa ama munu omauzeu, nokuṱa tji ya ri 14 ku Nisan ombura ndji 33 O.Z. c—Mat. 3:17.

12. Matu yenene okutjita tjike movivike vyokomurungu wOmazemburukiro wonḓiro ya Jesus?

¹² Okuza ku nai nga mOmazemburukiro wonḓiro ya Jesus, kondja okukonḓonona otjisuta tjonguturiro momakonḓononeno woye omuini poo mOmerikotameneno wEṱunḓu. Okukonḓonona ovingi ohunga notjisuta tjonguturiro, ungurisa Okambo komakonḓononeno kOvahongonone vaJehova poo omambo warwe nga zikamena kOmbeibela. d Wina lesa Omalesero wOmbeibela ohunga nOmariro Omayapuke nge ri mokambo nga, Ehupo retu rOukriste notjiungura tjetu tjokuzuvarisa. Nu meyuva rOmazemburukiro wonḓiro ya Jesus o zembi okutarera oprograma yOmerikotameneno womuhuka. Indu tji twa rongerisa omitima vyetu kOmazemburukiro wonḓiro ya Jesus, eṱe matu yenene okuvatera varwe kokutja ve mune ouwa momazemburukiro ngo wina.—Esra 7:10.

VATERA VARWE OKUMUNA OUWA

13. Otjikwaye otjitenga tji matu yenene okutjita kutja tu vatere varwe okumuna ouwa mOmazemburukiro wonḓiro ya Jesus?

¹³ Omomuano uṋe mu matu yenene okuvatera varwe okumuna ouwa mOmazemburukiro wonḓiro ya Jesus? Otjiṋa otjitenga okuveṋanga. Pendje nokuṋanga imba mbu matu hakaene motjiungura tjokuzuvarisa uriri, eṱe wina matu sokutjanga omana wovandu mbu matu tjiwa  kokutja tu yenene okuveṋanga. Iho matji kamburire mo ovazamumwe vetu, ovandu mbu tu ungura pamwe, mbu tu hita pamwe oskole novandu varwe mbu matu tjiwa. Nandarire kutja katu noumbapira mbwa pirindwa mbwa yenene womaṋangero, eṱe matu yenene okuvehindira olinka korungovi. Eṱe matu yenene okuṋanga ovengi tjinga atu hi nokutjiwa kutja ovandu vengapi mbu mave ya.—Omuzuv. 11:6.

14. Ongondjero yoye yokuṋanga varwe i yeta ouwa waye? Yandja otjihorera.

¹⁴ Indu tji wa ṋanga omundu kOmazemburukiro wonḓiro ya Jesus, owo mape ya ave ya komazemburukiro ngo. Omukazendu omukambure ngwa kupwa i yomurumendu ngu ha ri Omuhongonone wa Jehova kaa undjire ko indu omurumendu we tje mu raera kutja ma i pu na ye kOmazemburukiro wonḓiro ya Jesus. Ongwaye tje hi na aa undjire ko? Mena rokutja eye ee mu ṋanga povikando ovingi morukapitaveze, posi ya kaa kara pomazemburukiro ngo. Otjikeṋa tji tja tjita kutja ma kare pOmazemburukiro wonḓiro ya Jesus? Omurumendu ngwo wa pewa okambapira komaṋangero ku ka pirindwa. Eye wa ṋangwa i yomunene wombongo ngwaave tjiwasana. Omurumendu ngwo wa kara pOmazemburukiro wonḓiro ya Jesus ombura ndjo nozombura zarwe nḓa kongorera ko.

15. Matu vanga okuzemburuka ye indu tji matu ṋanga ovandu kOmazemburukiro wonḓiro ya Jesus?

¹⁵ Tjiwa kutja ovandu mbu twa ṋanga mape ya ave pura omapuriro ohunga nOmazemburukiro wonḓiro ya Jesus, nu tjinene indu tji ve hi ya rora okukara pozombongarero zetu. Eṱe mape ya atu ripura ohunga nomapuriro ngu mape ya ave pura nokurirongerisa omaziriro ngo. (Kol. 4:6) Otjotjihorera, tjiva mape ya ave pura omapuriro nga: ‘Potjitjitwa ho mape ka tjitwa tjike?’ ‘Matji kambura orure ndu ṱa pi?’ ‘Me sokurihwikika vi?’ ‘Me sutu vingapi pomuvero?’ ‘Pe wongwa ovimariva?’ Indu tji wa ṋanga omundu kOmazemburukiro wonḓiro ya Jesus, ove mape ya o pura kutja, “U nomapuriro?” nu okuzambo o ziri omapuriro we. Eṱe matu yenene okuraisa okavidio nga, Zemburuka onḓiro ya Jesus na inga PEtuwo rOmerikotameneno pe tjitwa tjike? okuvatera omundu okuzava nawa omuano ozombongarero zetu mu ze kayendisiwa. Nu ehongwa 28 membo ndi, Yorokera  ehupo nga aruhe mu nomapu omawa ngu matu yenene okuungurisa.

16. Omapuriro yeṋe yarwe imba mba kara pOmazemburukiro wonḓiro ya Jesus ngu mape ya ave kara na wo?

¹⁶ Imba mbe ya otjikando otjitenga kOmazemburukiro wonḓiro ya Jesus, kombunda mape ya ave kara nomapuriro yarwe. Owo mape ya ave himwa kutja ongwaye tje ri otjivaro tjovandu ovaṱiṱi mba nu komavinu nokurya komboroto poo ongwaye tji pe hi na pa ri omundu ngwa nu komavinu nokurya komboroto. Owo wina mape ya ave vanga okutjiwa kutja tu zemburuka Omazemburukiro wonḓiro ya Jesus povikando vingapi. Nowo mape ya ave vanga okutjiwa kutja ozombongarero zOvahongonone va Jehova azehe ze kayendisiwa tjimwe. Nandarire kutja omapu omengi ya hungirirwa ko mehungi rOmazemburukiro wonḓiro ya Jesus, imba mbe ya otjikando otjitenga mape ya ave hepa okukahururirwa nawa. Orupa ndu ri korungovi rwetu ndwi jw.org ndu nepu ndi, “Why Do Jehovah’s Witnesses Observe the Lord’s Supper Differently From the Way Other Religions Do?” maru yenene okuvatera okuzira omapuriro wawo tjiva. Eṱe matu vanga okuungura pu matu yenene moruveze rwOmazemburukiro wonḓiro ya Jesus na wina komurungu na kombunda yanao, okuvatera imba mbe “nomitima omiwa” kokutja ve yenene okumuna ouwa momazemburukiro nga.—Oviung. 13:​48, NWT.

VATERA IMBA MBA YARUKA OMBUNDA MONGAMBURIRO

17. Ovanene vombongo mave yenene vi okuvatera imba mba yaruka ombunda mongamburiro? (Esekiel 34:​12, 16)

¹⁷ Ovanene vombongo mave yenene vi okuvatera imba mba yaruka ombunda mongamburiro moruveze rwOmazemburukiro wonḓiro ya Jesus? Ve raisira kutja u rikendera ku wo. (Lesa Esekiel 34:​12, 16.) Kondja okutonena ovengi vawo ongoze komurungu wOmazemburukiro wonḓiro ya Jesus. Ve raera kutja u rikendera wo nu u vanga okuvevatera momuano auhe mbu mo yenene. Ve ṋanga kOmazemburukiro wonḓiro ya Jesus. Ve yakura norusuvero indu tji ve ya. Kombunda yOmazemburukiro wonḓiro ya Jesus, kara pokuvarura ovakambure ovasuverwa mbo nokuvevatera kutja ve kurise oupanga wawo ku na Jehova nu ve mune ounahepero wokukotoka ku Jehova.—1 Petr. 2:25.

18. Omomuano uṋe atuhe mu matu yenene okuvatera imba mba yaruka ombunda mongamburiro? (Ovaroma 12:10)

 ¹⁸ Avehe mombongo mave yenene okuvatera imba mba yaruka ombunda mongamburiro mbe ya pOmazemburukiro wonḓiro ya Jesus. Omomuano uṋe? Mokuveraisira orusuvero, otjari, nondengero. (Lesa Ovaroma 12:10.) Tjiwa kutja mape ya ya ri ouzeu kovakambure ovasuverwa mbo okuya kozombongarero zombongo rukwao. Owo mape ya aave tira kutja ovandu mombongo mave tja vi ohunga na wo. e Ku nao o ve pura omapuriro ngu mape ya aye tjiti kutja ve ṱohoṋi poo o hungire otjiṋa tji matji ve hihamisa. (1 Tes. 5:11) Owo ovakambure ovakwetu ovasuverwa. Eṱe tjiri tu nonyuṋe okurikotamena pu na wo rukwao.—Eps. 119:176; Oviung. 20:35.

19. Ouwa uṋe mbu matu munu mokuzemburuka onḓiro ya Jesus?

¹⁹ Eṱe tu nondangi kutja Jesus we tu raera okuzemburuka onḓiro ye rumwe mombura, nu tu tjiwa kutja otjiṋa otjinanḓengu pu pe ṱa pi. Indu tji twa kara pOmazemburukiro wonḓiro ya Jesus, eṱe atuhe tu muna ouwa momiano omingi pekepeke. (Jes. 48:​17, 18) Eṱe tu kurisa orusuvero rwetu ku Jehova na Jesus. Eṱe tu raisa kutja tu nondangi tjinene ku imbi mbi ve tu tjitira. Eṱe tu tumbuka popezu novakambure ovakwetu. Neṱe mape ya atu vatere varwe okurihonga omuano owo wina mu mave yenene okuyorokera ozondaya nḓa etwa i yotjisuta tjonguturiro. Ngatu kondje okukara pOmazemburukiro wonḓiro ya Jesus ombura ndji, ndi ri eyuva enanḓengu tjinene mombura.