1. Ịyẹ tị́ du ka ahyẹẹnụ nya ọ-Họ Kpa Kpịtịya à ri ọlẹ kọ há gú wuu ẹ-ẹpwụ nya ẹka? (ILuku 22:19, 20)

 Ẹ-ẸGA nya angịnyị nya iJihova lẹ, ọ-Họ Kpa Kpịtịya nya igu nya iJisọsị à rị ahyẹẹnụ ọlẹ kọ baba gụ wuu ẹ-ẹpwụ nya ẹka lẹ. Ọwa rị ọhọhọ ọlẹ ká iJisọsị byi angịjụgbẹyị nyamwụ nyị họ kem lẹ. (Wa ILuku 22:19, 20.) Ang lụmẹ-lụmẹ du kahị kaa ya ẹhị rịrị gbe ọ-Họ Kpa Kpịtịya. Ahị kụ ẹhị yẹ ịhyẹ ẹ-ẹpwụ nyaa wẹẹ.

2. Ịyẹ à tị́ du kahị kaa ya ẹhị rịrị gbe ọ-Họ Kpa Kpịtịya?

² Ọ-Họ Kpa Kpịtịya kaa dudu kahị jẹ́-ẹ kụ irya jụ āhị nya ịya ọkịlaakịla. Ọ kaa kpụhị ịtịya nya iya ọkịlaakịla nya iJisọsị chajị kahị ka jẹ́-ẹ mẹjẹ jaabwọ kọ myịhị lẹhị kaka ba. (2 Kọr. 5:14, 15) Ọ tị myịmyị ya iwe ha aanahị alẹng bala anyang nyọka ya ẹla lawụlẹ chajị “ká ila ọchịchị nya ọmyịmyị ọlala nyahị ka chị kịla awụlẹ.” (Rom. 1:12) Ẹka ọnyị myị́ ọnyị wuu, angịhyẹ ịlẹ kị chị doodoo ẹ-ẹpwụ nya ọmyịmyị kaa wẹ. Angịhyẹ nyaa ka cheje nyọka tịrẹkpẹ wẹ ẹga nya iJihova chajị nya abwọlẹ kị daa ọwụraba. Ẹla ọlẹ kị wo bala ang ịlẹ kị yẹ kaa gụ iru nya angịlẹ ká ẹla nyahị há gbịla nyọka dọmwụ nya ẹdịyẹ ụ-ụgbẹyị ọlẹ kọ da ka ọhịhị. Ẹla ịwẹ wuu à dudu ka ọ-Họ Kpa Kpịtịya rị ang ọlẹ kọ baba gụ wuu hahị lẹ.

3. Ányị ọ-Họ Kpa Kpịtịya à tị́ kaa tụụhị chị awụlẹ wụụ lala aanịna chị odehe ọnụ? (Yẹ ifoto ịnyịnyị.)

³ Ahị kaa ya ẹhị rịrị gbe ọ-Họ kpa Kpịtịya ịnyịnyị chajị ahị jẹ́-ẹ yẹ jụla aanahị chị odehe ọnụ wụụ ẹnẹwẹ. Alibeenụ nya iJihova kaa tụ gụrụ hi ha awụlẹ jaabwọ ká ẹnụ á ja byi ụpa nya odehe ọhẹ hi ta ọkịla. Ahị kaa wo ẹla ọyaya bwụ ịBayịbụụ ụ-ụhye nya ang odudu ká iya ọkịlaakịla jụ apyobwụna hahị. Ahị kaa mwu eje imiiye, kpa ịkaa chịpwụrụ bala ọ-kaa ya ọnụ  dawụlẹ ya nyị “kọ la ịnyị mẹ” jụ abwọ ọrịrị ine. Lala ẹ-ẹpwụ nya awa 24, ala ọjịra-jịra wuu ka họ ọhọhọ ọwẹ chị ọnụ lẹ. Kụ irya jaabwọ ká iJihova bala iJisọsị ka chị ọkẹkẹnị kaka ba jaabwọ kahị wẹẹ yẹ jụla awụlẹ jwaa ihi ụ-ụgbẹyị ọlịịwẹ wẹẹ!

4. Ịyẹ ahị tị́ wẹẹ ka jẹ́ ẹ-ẹpwụ nya ang ọjẹ́jẹ ọlẹ?

⁴ Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ịtọ ẹla ịlẹ: Ányị ahị tị́ ka jẹ́-ẹ nwụla ọkịlẹtụ nyahị nọ gbe ọ-Họ Kpa Kpịtịya? Ányị ahị tị́ ka jẹ́-ẹ da angịkịla ụbwọ yé apyobwuna bwụ ụwa? Bala ányị ahị tị ka jẹ́-ẹ da angị chị doodoo ụbwọ? Ọwẹwẹ nya ịtọ ịwẹ ka dahị ụbwọ nwụlanọ gbe ahyẹẹnụ ọlẹ kọ baba gụ wuu wẹ.

ÁNYỊ AHỊ TỊ́ KA JẸ́-Ẹ NWỤLA ỌKỊLẸTỤ NYAHỊ NỌ GBE Ọ-HỌ KPA KPỊTỊYA?

5. (a) Ịyẹ tị́ du kahị baba nyọka kụ irya u-uhye nya apyobwuna nya iya ọkịlaakịla? (Eje Ọnyịịla 49:7, 8) (b) Ẹlịyẹ a tị jẹ́ bwụ ẹpwụ nya ifim ọlẹ kọ ri Ịyẹ tị́ Du ka iJisọsị Gbu?

⁵ Ang ọkpọnchị ọhẹ ọlẹ kọ ka jẹ́-ẹ dahị ụbwọ nwụlanọ ọ-ọkịlẹtụ nyahị rị ọ-ka kụ irya u-uhye nya apyobwuna nya iya ọkịlaakịla nya iJisọsị. Ịngịngịhyẹ-ẹ́ ji ahị ka họ nyọka jẹ́-ẹ ra ịlọhị kpehe bwụ ẹpwụ nya ịhọbịrị bala igu myị́ ka. (Wa Eje Ọnyịịla 49:7, 8; yẹ ifim ọlẹ ko rị Ịyẹ tị́ du ká iJisọsị Gbu?) a Lẹ iJihova nwụla iJisọsị nọ kọ ka hu ọhịhị nyamwụ ha nyọka chịhịda. Ụkụrwọ ọtụka-ọtụka à wẹ ká iJihova bala iJisọsị họ hahị lẹ. (Rom. 6:23) Jaabwọ kahị ja kụ irya gụ ọọwa u-uhye nya ang ọlẹ ká iJihova bala iJsọsị ya kiliya chajị nyahị, ọ kaa myịhị lẹhị gụ́ ọọwa ịnyịnyị. Ahị ya ẹla ụ-ụhye nya ang ịmanyị-manyị ịlẹ kị kịla ọngịrị nyahị kịla, ma ká iJihova bala iJisọsị họ hahị wẹẹ. Ma ene nya ọọwa, ịyẹ à tị́ ri etu nya ọ-ra kpehe ene?

6. Ụkụrwọ oyina à tị́ ji ẹpwụ nya ọ-ra kpehe?

⁶ Ọ-ra kpehe ri uri ọlẹ ká ọngịnyị kaa nwụ nyọka ra ang tịrẹkpẹ. Adam ọngọlẹ ká Ohe họ nya ụgbanyẹ la kpẹẹkpẹẹ ụka kị họọ. Ụka kọ họ ọhọbịrị, iwe nyọka hịhị gboyi myị́ oyi nyọọ, tụ anyị nyamwụ wuu. Lẹ nyọka ra ang ọlẹ kọ gụ Adam byi tịrẹkpẹ, iJisọsị à ya ọhịhị nyamwụ ọkpẹẹkpẹẹ kịliya lẹlẹ. Ụka ká iJisọsị jam odehe, ọ́ “họ ang onyobyi ọhẹ-lọhẹ kpong-kpong ka. Lee, ọ kpa ọnụ nyamwụ pịrị ọngọngọhẹ ju ẹnẹnẹhẹ lẹka ịnyịnyị.” (1 Pit. 2:22) Ụka ká iJisọsị ka gbu, ọ la kpẹẹkpẹẹ jaabwọ ká adam la ene kọọ họ ọhọbịrị. Lẹ iya ọkịlaakịla nyamwụ jẹ́ nwụ uri nya ọhịhị ọlẹ ká Adam ya byi.—1 Kọr. 15:45; 1 Tim. 2:6.

7. Ịmayẹ iyina iJisọsị à tị́ yẹ ụka kọ jam odehe?

⁷ Ụka ká iJisọsị jam odehe, ọ ju ihi nya iJihova ẹ-ẹpwụ nya ang myị́ ang wuu, tụ ụka kọ dọmwụ la ujwo họọ. IJisọsị ri ọnyị ọlẹ kọ la kpẹẹkpẹẹ, ọ tị kaa ju adamwụ bala ịnamwụ ihi nanana nyori ịwa-á la kpẹẹkpẹẹ ka. (Luk. 2:51) Ụka kọ ri okolobya, ọ ka baba nyọka pwa ju angịlẹ kị ka tọọ tutu myị́ nyọka la egbeju ọngịrị ta adamwụ anyị bala ọ-ka bịrị ehile nya iJihova. Ụka ká iJisọsị tị ri ọngọgbahị, ọ baba nyọka godayị giri-giri nyọka kụrụ ọmayẹ nya Olegu Onyobyi, tụ ọlẹ kọ byoo nyị nyẹẹkpẹ da iJihova mẹ. (Mat. 4:1-11) Olegu Onyobyi tịtọ ká iJisọsị ka họ ọhọbịrị chajị kọ ka jẹ́-ẹ nwụ uri nya ọ-ra kpehe ka.

8. Akama ịkịla iyina iJisọsị à tị́ bọhụ ẹ-ẹpwụ nyaa myị́myị́?

⁸ Ụka ká iJisọsị lee kpa ẹrụ ọnyịịla pyẹ odehe, ọ chịpwụrụ bwu ẹpwụ nya akama ịkịla myịmyị. Aluji nyamwụ tọọ pyịpyị bala ọ-tịtọ nyọka nwọọ. (Luk. 4:28, 29; 13:31) Ọ baba nyọka bọhụ ẹ-ẹpwụ nya ọdẹwụ-dẹwọ nya angịjụgbẹyị nyamwụ. (Mak. 9:33, 34) Ụka ọlẹ kị wẹẹ lọọ eje nyọka ye ẹla ọlẹ kị ka kpa  nwọọ, ị nyoo enyiri bala ọ-kpọọ họ. Ị yọọ akama yẹẹyẹẹ lala oloyi ene kịị gwoo ilo ba okoji. (Hib. 12:1-3) IJisọsị bọhụ la ịlọmwụ ẹ-ẹpwụ nya kama ịlẹ kọ yẹ hyẹẹkpẹ ẹpwụ nya ọhịhị nyamwụ, chajị iJihova á chewu koo bwu ẹpwụ nyaa ka. b—Mat. 27:46.

9. Ányị ịya ọkịla-kịla nya iJisọsị à tị́ lang? (1 iPita 1:8)

⁹ IJisọsị yẹ akama yẹẹyẹẹ ene kọ jẹ́ wẹẹ rahị kpehe. Ụka kahị kụ irya u-uhye nya akama ịlẹ ká iJisọsị myị yẹ chajị nyahị, ọháha ọlẹ kahị la ẹ-ẹga nyamwụ kaa la ọngịrị gụ olene.—Wa 1 iPita 1:8.

10. Ịyẹ iJihova à tị́ pehi ene kọ jẹ́-ẹ rahị kpehe?

¹⁰ IJihova ọwa tị́ bẹẹ? Ịyẹ ọ tị pehi chajị ká iJisọsị ka jẹ́-ẹ rahị kpehe? Igu ọlẹ ká iJihova bala iJisọsị ri à ri ọlẹ kọ gụ wuu ká adịda bala ọnyị ka jẹ́-ẹ ri ẹẹ. (Etu 8:30) Kụ irya nya abwọlẹ kọ ka la iJihova nyọlẹ ká iJisọsị wẹẹ bọhụ ẹpwụ nya iru nya akama ịlẹ kọ yẹ ụka kọ jam odehe wẹẹ. Ịwẹẹ ọdada á juwa ka, ọ ka jụ iJihova yẹẹyẹẹ nyọka yẹ kị ja yẹ Ọnyị nyamwụ ụhị, nyẹẹkpẹ dọọ, bala ọ-mọọ yẹ.

11. Ya ọ-chụ pwokwita ọhẹ ọlẹ kọ chabwọ nya abwọlẹ kọ la iJihova nyọlẹ kị nwu iJisọsị wẹẹ.

¹¹ Adịda lee ịnịna ọlẹ ká ọnyị gwọọ gbu ẹnẹhẹ lẹ à ka jẹ́-ẹ jẹ́ jaabwọ ká ojuju ọwẹ kaa la lẹlẹ. Ahị la ọmyịmyị ọnyọọngịrị u-uhye nya owuleji bwula igu, ma ọọwa á hịlẹ ọjụjụ ọlẹ kahị kaa la ụka ka ọngọ háahị há á gbu ka. Ọ-chụ pwokwita ọwẹ ka dahị ụbwọ jẹ́ jaabwọ kọ la iJihova ụka ká ọnyị nyamwụ ọ-la ookpokpo yẹ akama gbee kọọ gbu la ẹka nya 33 C.E. c—Mat. 3:17.

12. Ịyẹ ahị ti ka họ nya nwulanọ gbe ọ-Họ Kpa Kpịtịya?

¹² Bwụ ọlẹẹlẹ gbee ka da ụka nya ọ-Họ kpa Kpịtịya, à ka maga nyọka jẹ́ ang gụ ọọwa u-uhye nya āhị nya ọ-ra kpehe la ịlọng lee lala ugbiyegu myị́? À ka kpa ụpwụ nya Research Guide for Jehovah’s Witnesses (kori kọ ji la òja nyang) lee apwụ ị-da ịBayịbụụ wụlẹ ịkịla jẹ́ ang u-uhye nya ẹlẹwẹ kpori-kpori myị́. d Ịnyịnyị, maga ká ba ịBayịbụụ ọwawa nya ọ-Họ kpa Kpịtịya jẹ, jaabwo kị gbọọ kpehe ụ-ụpwụ nya Ọhịhị Bala Ụkụrwọ Nyahị Ahị Angịnyị nya ỊKịrayịsị- Ụpwụ ọ-Kpa Jẹ́ Ang. Maga ká kpịtịya nyọka yẹ ifim nya Ang Ọjẹ́jẹ nya Ụtụrụ Ọlẹnụ nya ọ-Họ Kpa Kpịtịya. Ụka kahị nwụla ọkịlẹtụ nyahị nọ gbe ọ-Họ Kpa Kpịtịya, ọọwa ka dụ kahị ka jẹ́-ẹ da angịkịla ụbwọ ye apyobwuna bwu ụwa ịnyịnyị.—Ẹsịr. 7:10.

 DA ANGỊKỊLA ỤBWỌ YE APYOBWUNA

13. Ịyẹ á tị́ ri ang ọhọhẹ ọlẹ kahị ka họ nyọka da angịkịla ụbwọ ye apyobwuna bwu ọ-Họ Kpa Kpịtịya?

¹³ Ányị ahị tị́ ka jẹ́-ẹ da angịkịla ụbwọ ye apyobwuna bwu ọ-Họ Kpa Kpịtịya? Ang ọhọhẹ ọlẹ kahị ka họ ri ọ-ka wụraa. Datị hi angịlẹ kahị kaa tọ ẹ-ẹrụ ọnyịịla ọ-kpa pyẹ, ahị ka jẹ́-ẹ da ẹnyị nya angịlẹ kahị tịtọ nyọka wụrụ jụ ang myị́. Ọ ka ri alugbiyegu nyahị, lee ala ụbe-ụpwụ nyahị, lee alụkụrwọ nyahị, lee angịkịla myị́. Kori kahị dọmwụ la apwụ ọ-kpa wụrụ ọngịnyị nwa ka wẹwẹ, ahị ka jẹ́-ẹ ya ọla ifon du ta angịnyị myị́. Ọ ka lahị ẹbyẹbyị nyọka yẹ jaabwọ ká angịnyị ka wẹ kaka ba myị́!—Ọngọ. 11:6.

14. Oja oyina à tị́ mẹjẹ nyori apyobwuna ji ẹpwụ nyọka wụrụ ọngọlẹ ká jẹ́ bwula ọ-ya ụpwụ jwọọ ụ-ụbwọ.

¹⁴ Ụka kahị wụrụ ọngọlẹ kahị jẹ́ la ịlọhị, ọ ka gwọọ gbịla nyọka wẹ ọ-Họ Kpa Kpịtịya myị́. Ọ la ọọnahị ọnyang ọhẹ ẹbyẹbyị nyọlẹ ka ọrụmwụ ọlẹ ko ri alibeenụ ka byọọ nyori ọwa nyị ja bọọ ka ọ-Họ Kpa Kpịtịya. Ịyẹ ti du kọ lọọ ẹbyẹbyị? Ọ kaa wụrọọ lụka ọtata lẹ, ma ọ tịị wẹ ka. Ịyẹ á tị ri ọdatị nya ọwụrụ-wụrụ olugbenyi? Ọrụmwụ yẹkẹẹ; “M ye ụpwụ nya ọwụrụ-wụrụ nya ịlọm.” Ọ wụlẹ nyori ọngọgbahị nya ọjịra-jịra ọhẹ ọlẹ kọ jẹ́ à wụrọọ lẹ. Ọrụmwụ ka ọ-Họ Kpa Kpịtịya nya ẹka ọwẹ bala ẹka lụmẹ-lụmẹ ịlahị nya ọọwa.

15. Ịyẹ ahị tị́ ka kpa i-irya ụka kahị ja wụrụ angịnyị wẹ ọ-Họ Kpa Kpịtịya?

¹⁵ Jẹ́ nyori angịlẹ kahị wẹẹ wụrụ ka la ịtọ ẹla ka tọ—ọgụgụụgụ kori ká angịịwa á wẹ ọjịra-jịra nyahị ẹnẹhẹ lẹka. Ahị ka jẹ́-ẹ nwụla ọwẹwẹ nya ịtọ ịlẹ kị ka tọ myị́ neeji chajị kahị ka jẹ́-ẹ waa. (Kol. 4:6) Ọ-chụ pwokwịta, ọhẹka angịhyẹ ka ja kụ irya myị: ‘Ịyẹ ị tị ka họ ọ-ọhụhụ ọwẹ kpa wẹ mẹ?’ ‘Ányị ọ tị ka tata ka ba?’ ‘Ịyẹ m tị ka kụrụ kpá wẹ?’ ‘Ị ka nwụ uri ene kị ka ya ẹga da há ọngịnyị?’ ‘Ị kaa da angịnyị okpoko ụ-ụwa?’ Ụka kahị ja wụrụ ọngịnyị wẹ ọ-Họ Kpa Kpịtịya, ahị ka jẹ́-ẹ tọ wo myị́ nyori, “À la ịtọ ọhẹ?” ọọwa lẹ a wẹ ịtọ ẹla nya ọngọọwa lẹlẹ. Ahị ka jẹ́-ẹ kpa ifim ọlẹ ko ri Kpịtịya nya Igu nya iJisọsị bala Ịyẹ Ị Tị-ị Họ  U-ube Nya Ịpyị-Adịrahụ? da ọngọngọng ụbwọ jẹ́ jaabwọ ká ọjịra-jịra nyahị kaa la. Ang ọjẹ́jẹ 28 nya ụpwụ nya Chị Ọkẹkẹnị Gboyi Myị́ Oyi! Tị ya ẹhị nya ẹla ịmanyị-manyị ịlẹ kahị ka jẹ́-ẹ kpa da ọngịnyị ụbwọ ịnyịnyị.

16. Ịtọ ịkịla iyina angịlẹ kị wẹ ọ-Họ Kpa Kpịtịya à tị́ ka la myị́?

¹⁶ Ụka ká ọ-Họ Kpa kpịtịya á myị́ kpá, angịlẹ kị wẹ onyeewe ka tọ ịtọ ẹla ịkịla myị́ wẹẹ. Ọ ka ja laa ẹbyẹbyị nyori ịyẹ tị du ká angị ịmanyị-manyị à ri ịkaa bala ọ-nwa ere, lee ịyẹ tị du ka ọngọngọhẹ á rị ịkaa lee ọ-nwa ere ka lichi-lichi. Ị ka ja myịmyị kụ irya u-uhye nya abwọlẹ kahị kaa họ ọ-Họ Kpa Kpịtịya hyaa-hyaa kaka ba. Ọhẹka ị ka tịtọ kị ka jẹ́ kori kọ ri ịwẹ ka ọjịra-jịra ọnyị myị́ ọnyị nya Alibeenu nya iJihova kaa la. Nanana nyori ọngọ họ ụpa nya ẹla oyaya nya ọ-Họ Kpa kpịtịya ka gba ahị nya ala ịịwa kpehe myị́, ma angị wẹ onyeewe ka baba nya ọdawụlẹ nyaa wẹẹ. Egbeju nya ẹla ọla jw.org ọlẹ kọ ri “Why Do Jehovah’s Witnesses Observe the Lord’s Supper Differently From the Way Other Religions Do?” ka jẹ́-ẹ dahị ụbwọ wẹ ịtọ ẹla nyaa ịhyẹ. Ahị tịtọ kahị ka họ ịngịngịhyẹ ọlẹ kahị ka jụ họ myị—lụka nya ọ-Họ Kpa Kpịtịya, ene nya ụka ọọwa, bala ụka kọ myị kpá—nyọka da “angịlẹ kị chịla-chịla” nyọka ye apyobwuna bwu ọhọhọ ọwẹ ụbwọ.—Ụkụr. 13:48, NW.

DÁ ANGỊLẸ KỊ CHỊ DOODOO ỤBWỌ

17. Ányị angịgbahị nya ọjịra-jịra à tị́ ka jẹ́-ẹ da angị chị doodoo ụbwọ? (Isikẹlụ 34:12, 16)

¹⁷ Ányị angịgbahị nya ọjịra-jịra a tị́ ka jẹ́-ẹ da angị chị doodoo ụbwọ lụka nya ọ-Họ Kpa Kpịtịya? Họ kị jẹ́ nyori a kpahị jwaa. (Wa Isikẹlụ 34:12, 16.) Ene nya ọ-Họ Kpa Kpịtịya, maga ká wụrụ angịlẹ ká jẹ́ bwụ ịfon jaabwọ ká ka jụ họ ba myị́. Mẹjaa nyori ẹla nyaa gung o-olegu bala o-ri à tịtọ nyọka daa ụbwọ ụ-ụgbẹyị ọlẹ ká ka jụ họ myị́. Wụraa wẹ ọ-Họ Kpa Kpịtịya. Kori kị wẹ, daa ọwụraba yẹẹyẹẹ. Ụka ká ọ-Họ Kpa Kpịtịya á myị kpá, kịnyaa la ọ-wụraa bwu ifon lee ọ-jwaa ụga ka ẹpwa nyaa, ká daa ụbwọ la ang nya olegu ọnyị myị́ ọnyị ọlẹ kị baba nyọka jẹ́-ẹ tịrẹkpẹ wa ẹga nya iJihova.—1 Pit. 2:25.

18. Ányị ahị wuu à tị́ ka jẹ́-ẹ da angị chị doodoo ụbwọ? (Ala iRom 12:10)

 ¹⁸ Ala ọjịra-jịra wuu ka jẹ́-ẹ da ọngọ chị doodoo ọlẹ kọ wẹ ọ-Họ Kpa Kpịtịya ụbwọ. Ányị ahị tị́ ka jẹ́-ẹ họ ịnyị? Bwula ọ-kpahị jwaa la ọháha, ahyẹẹrwẹrwa bala ọ-chị ihi jwaa. (Wa Ala iRom 12:10.) Kpịtịya nyori aanahị ịlịkẹjẹ ịwẹ ka họ atịmẹ la ọ-ka tịrẹkpẹ wẹ ọjịra-jịra myị́. Ọhẹka ị ka ja juhi nyori ala ọjịra-jịra á ka daa ọwụraba yẹẹyẹẹ ka myị́. e Lẹ ahị ya ẹla ọlẹ ko ka chaa ẹbẹ ụ-ụrụ lee ọ-taa ịtọ ọlẹ kọ ka chị oyoyi jwaa ka. (1 Tẹs. 5:11) Alẹng bala anyang ịwẹ ri aanahị wẹẹ. Ọ kpụhị ịpyọ nyọka jẹ́-ẹ gbịgba lawụlẹ myịmyị!—Eje. 119:176; Ụkụr. 20:35.

19. Apyobwuna oyina à tị́ juwa kori kahị kpịtịya nya igu nya iJisọsị?

¹⁹ Ọ myịhị lẹhị nyọlẹ ká iJisọsị byihi nyị kpịtịya nya igu nyọwa ẹka ọnyị myị́ ọnyị, ahị tị jẹ́ ang odudu ká ọọwa baba ịnyịnyị. Ụka kahị ka ọ-Họ Kpa Kpịtịya ahị kaa ye apyobwuna bala angịkịla a-agbẹyị lụmẹ-lụmẹ. (Ayị. 48:17, 18) Ọháha nyahị ẹ-ẹga nya iJihova bala iJisọsị kaa nwa. Ahị wẹẹ mẹjẹ jaabwọ ká ang ọlẹ kị họ hahị myịhị lẹhị kaka ba. Ahị tị kaa tụ ju aanahị alẹng bala anyang chwẹẹ ịnyịnyị. Ahị tị ka jẹ́-ẹ da angịkịla ụbwọ nyọka ye ahị ọwawa ịlẹ ká iya ọkịlaakịla họ chịkpẹ myị́. Lẹ, ahị họ jaabwọ kahị ka ju họ ba myị nyọka nwụlanọ gbe ọ-Họ Kpa Kpịtịya ọla ẹka ọlẹ, kọ ri ahyẹẹnụ ọlẹ kọ baba gụ wuu ẹ-ẹpwụ nya ẹka mẹ!