UHỌNMHỌN-ỌTA NỌNZI 2
ILLO 19 Ayere ọsi Uyumhin Nọnsi Jesu
Uwẹ Be Muegbe Ọbhi Otọ Khẹ Ọne Ukpẹdẹ Kpataki Bhi Ọne Ukpe Nan?
“Bha ha lu ọnan, nin bha rẹ ha ye mẹn re.”—LUK 22:19.
EBI A HA LUẸ BHỌ
Mhan dẹ zilo nyan ebezẹle nin Ayere Ọsi Jesu da manman lu uhọnmhọn emhin, ebi mhan ha rẹ muegbe ọbhi otọ yẹ, bi ebi mhan ha rẹ tie ẹbho vae bhọ yẹ.
1. Bezẹle nin ukpẹdẹ nan rẹ lu Ayere Ọsi Uyumhin Nọnsi Jesu da yi ukpẹdẹ nọn lu uhọnmhọn emhin nẹ bhi ukpe? (Luk 22:19, 20)
RẸJI ẹbho nesi Jehova, ukpẹdẹ kpataki, ọle ukpẹdẹ nan rẹ lu Ayere Ọsi Uyumhin Nọnsi Jesu khin. Ọle ọkpa iluemhin nin Jesu taman edibo nesọle ha lu. (Tie Luk 22:19, 20.) Emhin ne bunbun wo ribhọ ne re mhan muegbe ọbhi otọ khẹ ọne iluemhin. Bha ji mhan fẹ eso bhọ ghe.
2. Emhin eso nela re mhan muegbe ọbhi otọ khẹ Ayere Ọsi Uyumhin Nọnsi Jesu?
2 Ọne Ayere rẹkpa mhan rẹ ria eria nyan ebi izọese nọnsi Jesu ghan sẹ yẹ. Ọ yẹ rẹkpa mhan rẹ daghe uwedẹ eso nin mhan ha rẹ rẹman ghe, ọne izọese ti mhan bhọ. (2 Kọr. 5:14, 15) Ọ yẹ re isẹhoa nin mhan bi ibhio mhan rẹ re izebhudu nin egbe. (Rom. 1:12) Ibhio mhan ne i yẹ sasa bhi oga vae bhi ọne iluemhin ukpe-ukpe. Uwedẹ nan rẹ miẹn ele ọbhi egbe bhi ọne iluemhin re eso bhi ẹwẹ ele fikie bu Jehova re. Sẹyẹ, eria eso ne vae bhi ọne iluemhin zẹ nin ele rẹ ha luẹ Baibo ranmhude emhin nin ele daghe, bi emhin nin ele họn bhi enin. Ene emhin nan rebhe re Ayere Ọsi Uyumhin Nọnsi Jesu manman lu uhọnmhọn emhin rẹji mhan.
3. Be Ayere ọsi Jesu rẹ ku mhan bi ibhio mhan bhi otọ agbọn nan rebhe kugbe yẹ? (Yẹ fẹ ifoto ghe.)
3 Ria ẹmhọn ebi Ayere Ọsi Uyumhin Nọnsi Jesu rẹ ku mhan bi ibhio mhan bhi ọne otọ agbọn nan rebhe kugbe yẹ. Esali Jehova bhi otọ agbọn nan rebhe ki si egbe koko bhi agbaẹbho nin ele ye kẹkẹ beji ovuẹn ha rẹ ha de fia bhi eji ele ye. Mhan rebhe ki re ehọ ọbhi ọta ogbakha nọn rẹman ebi izọese nọnsi Jesu lu uhọnmhọn emhin sẹ yẹ. Mhan ki so illo eva rẹ gẹn Osẹnobulua, yẹ gha ọne ibrẹdi bi ọne anyọn nẹga. Sẹyẹ, mhan ki re ọkhọle rebhe rẹ gbe “isẹ” ọbhi erọnmhọn enẹn nan ha nan. Nin ebe sẹbhi uriagogo enẹn nyan uje ha ki rẹ gbera, agbotu ọsi Esali Jehova rebhe ne ribhi ọne otọ nan ki dẹ lu ọne iluemhin nan fo bhi ọne uwedẹ nan. Ria ẹmhọn ebi ọ ha rẹ re Jehova bi Jesu ha ghọnghọn yẹ, sade ele daghe ọle ghe mhan rebhe bhi ọne otọ nan re inian ha re ogẹn ji ele.
Ayere Ọsi Uyumhin Nọnsi Jesu ku ibhio mhan rebhe ne ribhi ọne otọ agbọn nan kugbe (Fẹ uduọle nọnzi 3 ghe) f
4. Be imhan da zilo nyan bhi ọne uhọnmhọn-ọta nan?
4 Bhi ọne uhọnmhọn-ọta nan, mhan dẹ zilo nyan ene inọnta nan: Be imhan ha rẹ mun ọkhọle nọnsẹmhan egbe ọbhi otọ khẹ ọne Ayere yẹ? Be imhan ha rẹ rẹkpa ẹbho ebhebhe yẹ rẹ sabọ miẹn elele bhọ? Be imhan ha rẹ rẹkpa ene i yẹ sasa bhi oga yẹ? Ewanniẹn rẹji ene inọnta nan dẹ rẹkpa mhan rẹ muegbe ọbhi otọ khẹ ọne iluemhin kpataki nan.
BE IMHAN HA RẸ MUN ỌKHỌLE NỌNSẸMHAN EGBE ỌBHI OTỌ KHẸ ỌNE AYERE YẸ?
5. (a) Bezẹle nọn da khẹke nin mhan ha ria eria nyan ebi izọese nọnsi Jesu lu uhọnmhọn emhin sẹ yẹ? (Psalm 49:7, 8) (b) Be uwẹ miẹn luẹ bhi ọne ividio nọn yọle, Bezẹle Nin Jesu Da Yu?
5 Uwedẹ kpataki nin mhan ha rẹ sabọ mun ọkhọle nọnsẹmhan egbe ọbhi otọ khẹ ọne iluemhin hi, nin mhan rẹ ha ria eria nyan ebi ọne izọese lu uhọnmhọn emhin sẹ yẹ. Emhin i ribhọ nin mhan ha lu nin mhan rẹ sabọ hinmhin egbe mhan bhi obọ olukhọ bi uu. (Tie Psalm 49:7, 8; yẹ fẹ ọne ividio ghe nọn yọle, Bezẹle Nin Jesu Da Yu?) a Jehova da mhanmhanlẹn nin Jesu rẹ re iẹnlẹn nọnsọle rẹ zọese nin mhan. Ọ wo re Jehova bi Jesu emhin rẹ lu ọnan. (Rom. 6:23) Beji mhan ha rẹ manman ha ria ẹmhọn ebi Jehova bi Jesu lu nin mhan, iriọ ẹmhọn ọne izọese ha rẹ manman ha ti mhan bhọ. Mhan dẹ zilo nyan emhin eso nin ọne izọese re Jehova bi Jesu le. Ọkpakinọn, bha ji mhan ka fẹ ebi Jehova rẹ lu ọle yẹ.
6. Be bhọ a re izọese ta? Bezẹle nọn da khẹke nin Jesu re iẹnlẹn nọnsọle rẹ dẹ mhan kiere?
6 Izọese hi, osa nan ha nan rẹ dẹ emhin kiere. Egbe wo gba nin Adamu nin okpea nin ọhẹnhẹn bhi ẹghe nan rẹ man ọlẹn. Ọkpakinọn, ẹghe nin ọle ki rẹ lu olukhọ, iẹnlẹn ọsi ighegheghe da yulu ọle bi imọn nesọle. Nan rẹ sabọ dẹ emhin nọn yulu Adamu kiere, Jesu da re iẹnlẹn nọn gbale nọnsọle re zọese nin mhan. Bhi ene ẹghe rebhe nin Jesu gbe bhi ọne otọ nan, “ọle bha lu emhin ebe soso. A bha miẹn ohoghe bhi unun nọnsọle.” (1 Pita. 2:22) Ọ wo gba nin Jesu rẹ dọ sẹbhi ẹghe nin ọle rẹ yu. Bhiriọ, ọle da sabọ re iẹnlẹn nọnsọle nọn gbale rẹ zọese ọbhi iẹnlẹn nin Adamu mun fia.—1 Kọr. 15:45; 1 Tim. 2:6.
7. Emhin kẹkẹ nela Jesu kuẹlo da beji ọle ribhi ọne otọ nan?
7 Jesu wo sun rẹkhan Aba ọle arẹmiẹn ọle kuẹlo da ọnọghọ kẹkẹ beji ọle ribhi ọne otọ nan. Beji ọle ribhi obhokhan, ọ da khẹke nin ọle ha hẹnmhọn nin ene biẹ ọle nọn bha gba nan, arẹmiẹn ọ gba nanlẹn tobọle. (Luk 2:51) Beji ọle ribhi usẹn, ọ da khẹke nin ọle re egbe nẹ bhi emhin ne ha sabọ re ọle miẹn ghe ọle bha yẹ sun rẹkhan Osẹnobulua. Beji ọle ki wanre, ọ da khẹke nin ọle re egbe nẹ bhi edọnmhẹn nesi Esu, rẹ dọ sẹbhi ọne Esu rẹ ha guanọ nọn rẹ re ọle fikeke gbe Osẹnobulua. (Mat. 4:1-11) Esu rẹ wo muegbe nin ọle rẹ re Jesu lu emhin ebe, beji a ha da miẹn ọle bha sabọ re iẹnlẹn nọnsọle rẹ zọese nin mhan.
8. Ọkakale ebhebhe nela Jesu kuẹlo da?
8 Jesu yẹ wo kuẹlo da ọkakale ebhebhe beji ọle mun iwẹnna oga ke bhi ọne otọ nan. Eghian ọlẹn wo manman kpokpo ọle, yẹ ha ho nin ele gbe ọle a. (Luk 4:28, 29; 13:31) Ọ da yẹ khẹke nin ọle re iziẹngbe ne edibo nesọle lu emhin bhi ẹghe nin ele bha rẹ lu nọnsẹn. (Mak 9:33, 34) Bhi ẹghe nan rẹ ha gui ẹzọ nọnsọle, ẹbho da wo ha re ọle lu ọle a. Bhi ọkike ọle, a da wo manman re oya nanlẹn yẹ gbe ọle a bii oyi. (Hib. 12:1-3) Jehova bha re uwedẹ ọhan-ilo rẹ hinmhin Jesu bhi ene ọkakale nan nin ọle kuẹlo da kike. b—Mat. 27:46.
9. Be izọese nọnsi Jesu dia mhan yẹ bhi egbe? (1 Pita 1:8)
9 Bhi ọsi ẹmhọanta, Jesu wo manman loya nin ọle rẹ sabọ miẹn mhan fan. Mhan ha ria eria nyan emhin kẹkẹ nin Jesu lu nin ọle rẹ sabọ re iẹnlẹn nọnsọle rẹ zọese nin mhan, ọ ki wo re oyẹẹ nin mhan mhọn da ọle ha tuẹn okhun.—Tie 1 Pita 1:8.
10. Be izọese nọnsi Jesu re Jehova le?
10 Be izọese nọnsi Jesu re Jehova le? Jehova bi Jesu wo manman sikẹ egbe beji ọmọn bi aba rẹ sikẹ egbe. (Prov. 8:30) Bhiriọ, ria ẹmhọn ebi ọ dia Jehova yẹ bhi egbe beji ọle daghe Jesu loya beji ọle ribhi ọne otọ nan. Edandan i ribhọ ghe, ọ manman ba Jehova bhi egbe beji ọle daghe a lu Ọmọn nọnsọle khọ, zuọzuọ ọle, yẹ dọnmhẹn ọlẹn.
11. Noo ijiẹmhin rẹ rẹman ebi ọ dia Jehova bhi egbe yẹ beji a gbe Ọmọn nọnsọle a?
11 Ene biẹ ọmọn nin ọmọn nọnsele sẹ ka yu khẹ lẹn ebi ọ rẹ manman ba bhi egbe yẹ sade ọmọn yulu ọria. Mhan wo manman rẹọbhọ ghe Jehova dẹ riọ ene yu kpanọ, ọrẹyiriọ, ọ sẹyẹ wo ba bhi egbe sade ọria nọnsẹmhan yu. Ọne ijiẹmhin nan rẹkpa mhan rẹ lẹn ebi ọ dia Jehova bhi egbe yẹ beji ọle daghe Ọmọn nin ọle hoẹmhọn ọlẹn loya, yẹ yu bhi Nisan 14, 33 C.E. c—Mat. 3:17.
12. Be imhan ha sabọ lu bhi ẹkẹ ene uzana ọkuẹsẹ a lu ọne Ayere?
12 Rẹ na bhi ọne ẹghe nan rẹ dọ sẹbhi ẹghe nan ha rẹ lu Ayere Ọsi Uyumhin Nọnsi Jesu, dọnmhegbe rẹ manman luẹ ẹmhọn ọne izọese bhi iluẹmhin Baibo nọnsẹ, la bhi oga azagba-uwa nọnsẹbha. Noo Research Guide for Jehovah’s Witnesses la emhin ebhebhe ne rẹkpa mhan rẹ luẹ Baibo dinmhin rẹ manman gua otọ ẹmhọn izọese nọnsi Jesu. d Sẹyẹ, dọnmhegbe re obọ rẹkhan ọne emhanmhan nan lu ọbhi Unyẹnmhin bi Iwẹnna Oga Nọnsẹmhan rẹji Baibo nan ha tie bhi ẹghe ọne Ayere. Rẹ deba ọnin, bhi ukpẹdẹ ọsi ọne Ayere, dọnmhegbe rẹ ghe vidio kpataki ọsi ebe ukpẹdẹ nan lu. Mhan ha mun ọkhọle nọnsẹmhan egbe ọbhi otọ khẹ ọne ukpẹdẹ nin, ọ ki lẹkhẹ nin mhan rẹ rẹkpa ẹbho ebhebhe rẹ miẹn elele bhọ.—Ezra 7:10.
RẸKPA ẸBHO EBHEBHE RẸ MIẸN ELELE BHỌ
13. Emhin ọhẹnhẹn nela mhan ha lu rẹ rẹkpa ẹbho ebhebhe rẹ miẹn elele bhi ọne Ayere?
13 Be imhan ha rẹ rẹkpa ẹbho ebhebhe rẹ miẹn elele bhi ọne Ayere yẹ? Emhin ọhẹnhẹn nin mhan ha lu hi, nin mhan rẹ tie ele vae. Rẹ deba ẹbho nin mhan tie sade mhan ribhi inẹbho, mhan sabọ yẹ rẹ gbẹn elin ọsi ẹbho ebhebhe ọbhi otọ nin mhan ho nin mhan tie vae bhi ọne iluemhin. Ele sabọ rẹ ha yi, ẹbho nin mhan ko wẹnna, ene mhan ko yo isiku, la ẹbho ebhebhe. Aharẹmiẹn ebe nan re tie ẹbho nin mhan mhọn bha bun, mhan sabọ rẹ re ifoni je ọnọn ribhi intanẹt ji ọria. Ọ sabọ rẹ han mhan ilo rẹ daghe uwedẹ nin ẹbho ne bunbun ha rẹ vae.—Eccl. 11:6.
14. Tẹmhọn ebe ha sabọ nabhọre sade a re ebe nan rẹ tie ẹbho nin ọria.
14 Ahamiẹn mhan re ebe nan rẹ tie ẹbho nin ọria, ọnan sabọ rẹ re ọle vae bhi ọne iluemhin. Ẹdọkpa, ọ da wo han obhio mhan nin okhuo ilo nin ọle ọkpa ga Jehova bhi azagba-uwa nọnsọle beji ọdọ ọle taman ọlẹn ghe ọle dẹ vae bhi ọne iluemhin. Bezẹle nọn da han ọle ilo? Ranmhude ọle sẹ ka wo tie ọle bhi ọne Ayere igba ne bunbun khẹ, sokpan ọle bha vae. Ọkpakinọn, be re ọle fi ọkhọle denọ bhi ọne ẹghe nan? Ọle da yọle: “A re ebe nan rẹ tie ẹbho nin mẹn, ọ iyi unun a yẹ rẹ gheghe taman mẹn.” Ọwanlẹn ọkpa nin ọle manman lẹn re ọne ebe nanlẹn. Ọdọ ọle da vae bhi ọne Ayere bhi ọne ukpe nin. Rẹ na ẹghenin rẹ ha khian, ọle bha yẹ kie gbẹdẹ.
15. Be ọkhẹke nin mhan ha mhọn bhi ọkhọle sade mhan tie ẹbho vae bhi iluemhin ọsi Ayere?
15 Ha mhọnlẹn bhi ọkhọle ghe, asabọmiẹn ẹbho nin mhan tie vae dẹ ha mhọn inọnta eso, manman nọn sade ọnan hi ikolo oga ọhẹnhẹn nin ele ha vae. Ọ dẹ ha mhẹn sade mhan ria eria nyan inọnta eso nin ele ha sabọ nọọn, yẹ muegbe ọbhi otọ rẹ wanniẹn ele. (Kol. 4:6) Bhi ọsi ijiẹmhin, eso sabọ rẹ ha riale: ‘Be da sunu bhi ọne iluemhin?’ ‘Be bhọ a ha bue sẹ yẹ bhọ?’ ‘Unan ukpọn nela mẹn da yọ yo?’ ‘Mẹn dẹ haosa fo ọkuẹsẹ mẹn sabọ nabhọ?’ ‘A dẹ miẹn mẹn igho bhi enin?’ Ahamiẹn mhan tie ọria bhi ọne iluemhin, mhan sabọ rẹ nọọn ọlẹn yọle, “Uwẹ be mhọn inọnta?” Ahamiẹn ọle mhọn inọnta, dọnmhegbe wanniẹn ọlẹn. Mhan sabọ yẹ rẹ noo ọne ividio natiọle, Ye Uyumhin Nọnsi Jesu Re bi Be Sunu bhi Kindọn Họọ? rẹ rẹkpa ọne ọria rẹ lẹn ebi ikolo oga nesẹmhan diayẹ. Sẹyẹ, emhin kẹkẹ nin mhan ha sabọ taman ọne ọria ribhi iluẹmhin 28 bhi ebe natiọle Sọnyẹnmhẹn bhi Ighegheghe!
16. Inọnta ebhebhe nela eria ne vae bhi ọne Ayere ha sabọ ha mhọnlẹn?
16 A ha rẹ lu ọne Ayere fo, eria eso ne mhọn ọkhọle nọn mhẹn sabọ yẹ rẹ ha mhọn inọnta eso. Ele sabọ rẹ ha riale ebezẹle nan da miẹn ghe ikpeta ẹbho le bhi ọne ibrẹdi yẹ da bhi ọne anyọn, la ebezẹle nin ọria soso bha da le bhọ hiehie. Ele sabọ rẹ ha ria ẹmhọn eka igba nin mhan lu ọne Ayere bhi ukpe. Rẹ deba ọnin, ele sabọ rẹ ha ho nin ele lẹn si inian Esali Jehova rẹ do ikolo oga nọnsele rebhe. Arẹmiẹn a ka zilo nyan ene ẹmhọn nan bhi ọne ọta nan rẹman bhi ọne Ayere, eria ọgbọn ne vae sabọ yẹ rẹ ha ho nin ele manman lẹn otọ ene ẹmhọn nan nọnsẹn. Ọne uhọnmhọn-ọta nọn ribhi jw.org nọn yọle, “Bezẹle Nin Uwedẹ Nin Esali Jehova Rẹ Lu Ayere ọsi Uyumhin Nọnsi Jesu Da Dikẹ bhi Uwedẹ Nin Otuẹ Nekẹle Rẹ Lu Ọle?” dẹ sabọ rẹkpa mhan rẹ wanniẹn eso bhi ene inọnta nan. Mhan ho nin mhan lu eka nin mhan ha sabọ lu ọkuẹsẹ a lu ọne Ayere, ẹghe nan ha rẹ ha lu ọle, bi sade a lu ọle fo rẹ rẹkpa ẹbho ne mhọn ọkhọle esili rẹ miẹn elele bhi ọne iluemhin.—Iwẹnna 13:48.
RẸKPA ENE I YẸ SASA BHI OGA
17. Be ene ewanlẹn ha rẹ sabọ rẹkpa ẹbho ne i yẹ sasa bhi oga yẹ? (Ezekiel 34:12, 16)
17 Be ene ewanlẹn ha rẹ rẹkpa ene i yẹ sasa bhi oga yẹ bhi ẹghe iluemhin ọsi Ayere? Bha ji ele lẹn ghe ẹmhọn ele rẹtẹ bha. (Tie Ezekiel 34:12, 16.) Ọkuẹsẹ a lu ọne Ayere, dọnmhegbe rẹ tie ẹbho ne iyẹ sasa bhi oga. Ji ele lẹn ghe uwẹ hoẹmhọn ele, sẹyẹ uwẹ wo muegbe nin uwẹ rẹ rẹkpa ele. Tie ele vae bhi ọne Ayere. Ele ha vae bhi ọne iluemhin, manman gbe obokhian nin ele. A ha lu ọne Ayere fo, dọnmhegbe rẹ ha tie ele bhi ifoni, la ha rẹnẹ ji ele. Uwẹ ha yẹ re urẹkpa nọn khẹke nin ele beji ele ha da sabọ fikie bu Jehova.—1 Pita 2:25.
18. Be imhan rebhe ha rẹ sabọ rẹkpa ene i yẹ sasa bhi oga yẹ? (Rom 12:10)
18 Ọrebhe bhi agbotu dẹ yẹ sabọ rẹkpa ene i yẹ sasa bhi oga ne vae bhi iluemhin ọsi Ayere. Be ele ha rẹ sabọ lu ọle yẹ? Ọle hi, nin ele rẹ re oyẹẹ, ifuẹkẹ bi ekpẹn rẹ nin ele lu emhin. (Tie Rom 12:10.) Yere ghe, ọ sabọ rẹ ha nọghọ ene ihuan nan nesi Osẹnobulua rẹ vae bhi ikolo oga. Asabọmiẹn ofẹn ki ha mun ele ghe, a i da miẹn ele ọbhi egbe nọnsẹn. e Bhiriọ, hẹi dọ ha nọọn ele inọnta nọn ha sabọ re ẹkhọle ha lo ele, la ta ọta nọn ha ba ele bhi egbe. (1 Tẹsẹ. 5:11) Ibhio mhan ele sẹyẹ khin. Ọ manman re mhan ghọnghọn rẹ kie gbe obokhian nin ele!—Ps. 119:176; Iwẹnna 20:35.
19. Elele nela nabhọre nin mhan rẹ ye uyumhin nọnsi Jesu re?
19 Mhan wo dọ daghe ebezẹle nin Jesu da mhanmhanlẹn nin mhan ha lu Ayere ọsi uyumhin nọnsọle ukpe-ukpe. Mhan miẹn elele bhọ sade mhan yo ọne iluemhin, sẹyẹ, mhan rẹkpa ẹbho rẹ miẹn elele bhi uwedẹ kẹkẹ. (Isa. 48:17, 18) Ọne iluemhin rẹkpa mhan rẹ ha tuẹn oyẹẹ nin mhan mhọn da Jehova bi Jesu okhun. Mhan re ọle rẹman ghe, emhin nin Jehova bi Jesu lu nin mhan ti mhan bhọ. Ọ ziẹn okugbe nọn ribhi ẹwẹ mhan. Sẹyẹ, ọ re ọne isẹhoa nin mhan rẹ rẹkpa ẹbho rẹ luẹ ebi ele ha lu beji ele ha da sabọ miẹn erọnmhọn kẹkẹ nin mhan khuaẹloghe ranmhude izọese nọnsi Jesu. Bhiriọ, bha ji mhan dọnmhegbe lu eka nin mhan ha sabọ lu rẹ muegbe khẹ Ayere Ọsi Uyumhin Nọnsi Jesu bhi ọne ukpe nan, nọn yi ukpẹdẹ kpataki bhi ọne ukpe nan.
BE IMHAN HA RẸ SABỌ . . .
-
mun ọkhọle nọnsẹmhan egbe ọbhi otọ khẹ iluemhin ọsi Ayere?
-
rẹkpa ẹbho ebhebhe rẹ miẹn elele bhi ọne iluemhin?
-
rẹkpa ẹbho ne i yẹ sasa bhi oga?
ILLO 18 Izọese Nọnsi Jesu Ti Mhan Bhọ
a Noo ẹho nan rẹ guanọ emhin bhi jw.org rẹ guanọ ene ebe bi ene ividio nan sounun ele bhi ọne uhọnmhọn-ọta nan.
b Fẹ ọne uhọnmhọn-ọta ghe nọn yọle, “Ọta Nin Eria Ne Tie Ebe Nesẹmhan Nọọn” bhi Ọkhẹughe ọsi Epre 2021.
c Fẹ ọne ebe ghe natiọle Draw Close to Jehovah, iluẹmhin 23, uduọle nọnzi 8 bi 9.
d Fẹ ọne ẹkpẹti ghe nọn yọle “ Emhin Nin Mhan Ha Sabọ Gua Otọle.”
e Fẹ ene ifoto bi ọne ẹkpẹti ghe nọn yọle “ Ebi Ibhio Mhan Bhi Agbotu Rẹ Lu Emhin Yẹ?” Obhio mhan nin okpea nọn i yẹ sasa bhi oga si egbe re ikeke nin ọle rẹ nabhi ẹkẹ Kindọn Họọ, ọkpakinọn, ọle da dọnmhegbe rẹ sẹyẹ nabhọ. Ibhio mhan da wo gbe obokhian nanlẹn, sẹyẹ ọ da wo ti ọle bhọ rẹ nin ele ha zilo.
f EMHIN NAN RẸMAN BHI IFOTO : Beji ẹbho nesi Jehova bhi ijeso bhi ọne otọ agbọn nan rẹ lu Ayere Ọsi Uyumhin Nọnsi Jesu, ibhio ele ne ribhi ije nekẹle muegbe ọne Ayere ọbhi otọ.
