1. Jesús jakamu enentaimtamusha urukamtai tuke uwitin najanniuitiaj? (Lucas 22:19 TNM, 20).

 Testigos de Jehovatikia Jesús jakamu enentaimtamu tuke uwitin warasmajai najanniuitji. Jesús winia jakamur enentaimtursatarum timiayi (Lucas 22:19 TNM, 20 aujsata). Jesús jakamu enentaimtamunam nui pachinkiatin urukamtai imia penkerait nu nekaawartai.

2. Jesús jakamu enentaimtamusha urukamtai nu tsawan jeat tusar wakeraj?

² Jesús jakamu enentaimtamunam pachinkiur Jesús ii tumashrin akikmaku asamtai yuminsatai tusar wari itiurkamniaitiaj nu nekaamniaitji (2 Kur. 5:​14, 15). Tura nui pachinkiur ii yachi ii umaijiaisha ikiakanairminiaitji (Rum. 1:12). Yuusa chichamen etserkatniun iniaisaruana nu Jesús jakamu enentaimtamunam taarmatai shiir amajeamka ataksha Yuusnan najanin ainiawai. Nuyasha chikich aentssha nui pachiniainiak Yuus papiin unuimiartasar wakerin ainiawai. Nuinkia ti penker iruntrar nankaamau asar nu tsawan jeat tusar wakeraji.

3. Testigos de Jehovatisha Jesús jakamu enentaimtamunmansha wari najanniuitiaj? (Nakumkamusha iista).

³ Nu tsawantinin etsa akaikimtai ashi nunkanam  testigos de Jehovatikia irunniuitji. Nuinkia Jesús ii tumashrin akikmakmiania nui wari urukattaj nuna Yuusa chichamejai jintinkratma antutainti, Yuussha nampertainti nuya vino tura pansha iniankatainti tura aintsan Yuusan seainiakui warasmajai ainis ati tutainti. Testigos de Jehovatikia nu tsawantinin ashi nunkanam mash ainis turiniaitji. Ashi nunkanam ainis turakrin Jehová Jesusjainkia ti warau ainiawai.

4. Yamaisha wari unuimiatrattaj?

⁴ Jesús jakamu enentaimtamunam pachinkiatai tusar wari itiurkamniaitiaj? Chikich aentscha nui pachinkiarat tusar itiurkamniaitiaj? Nuyasha Yuusa chichamen etserkatniun iniaisaruana nusha pachinkiarat tusar itiurkamniaitiaj? Nu anintramu jui nekaattaji.

JESÚS JAKAMU ENENTAIMTAMUNAM PACHINKIATAI TUSAR WARI ITIURKAMNIAITIAJ?

5. a) Jesús ii tumashrin akikmakmiania nuisha urukamtai enentaimsatniuitiaj? (Yus Kanta 49:​7, 8). b) Jesús urukamtai jakamia? tana nu video iisam wari nekaam nu aujmattsata.

⁵ Jesús jakamu enentaimtustin nuntumsamunam ni ii tumashrin akikmaku asamtai urukamniaitiaj nui enentaimsatniuitji. Iikkia tunaanumia tura jakatniunmaya ewemprachaji (Yus Kanta 49:​7, 8 aujsata; Jesús urukamtai jakamia? tana nu videosha iista). a Ii tumashrin akikmakat tusa Jehová Jesusan akupturmakmiaji (Rum. 6:23). Jehová Jesusjai turawarmiania nui enentaimkiur yuminsartatji. Ni turawarmiania nuna nekaattaji. Jesús iini jarutramkamiajnia nuna emka nekaatai.

6. Urukamtai aya Jesusak ii tumashrin akikmakminiuya?

⁶ Adanka tunaartinchauyayi tumaitiat tunaa najana tunaarintin ajasmiayi. Tura nu tunaan ainis tura asamtai ni uchirisha tuke iwiaku pujuchartiniuyayi. Adán tunaamkamiania nuna akikmaktaj tusa Jesús surumakmiayi. Jesús ju nunkanam pujumiania nui “tunaan peṉké túrachmiayi. Tura chikichkinkesha peṉké anaṉkachmiayi” (1 Pit. 2:22). Adán tunaa najantsuk urukuya ainis asa ii tumashrin Jesuska akikmakminiuyayi (1 Cor. 15:45 TNM; 1 Tim. 2:6 TNM).

7. Jesús wari itiurchatna wainkiamia?

⁷ Jesús ju nunkanam pujumiania nui ashi warinmansha Jehovan umirkamiayi. Uchiyania nui ni apari tunaarintin asarmataisha umirkamiayi (Ruk. 2:51). Natsamaruyania nuisha ni amikri armia nu yajauchiniam utsuamsha yajauchinkia najanachmiayi. Uuntauyania nuisha iwianch Jesusan tunaanum ujuatsa tikishmatrurta tutaisha warik nakitramiayi (Mat. 4:​1-11). Jesús ii tumashrin akikmakain tusa iwianchkia tunaanum ajuatsa wakerimiayi.

8. Jesús chikich itiurchatnasha warinia wainkiamia?

⁸ Yuusa chichamen etseruk wekaimia nuisha maataj tuinia asar apapekarmiayi (Ruk. 4:​28, 29; 13:31). Ni unuiniamurisha awajiniakui katsuntramiayi (Mar. 9:​33, 34). Maataj tusar pujuriarmiania nuisha ti waitkiasarmiayi. Turawar kasa ainis paunam ajintiawar maawarmiayi (Isr. 12:​1-3). Iknaki pujumiania nui Jehová Jesusan ninki ikiukmiayi tuma asamtai nui itiurchat nankaamasmiania  nuna Jesús ninki katsuntramiayi (Mat. 27:46). b

9. Jesús najanamiania nuisha urukamtai enentaimsatniuitiaj? (1 Pítiur 1:8).

⁹ Jesús ii tumashrin akikmaktasa ti waitsamiayi. Jesús najanamiania nui enentaimkiurkia ti aneastatji (1 Pítiur 1:8 aujsata).

10. Jehová anenkratin asa wari itiurkamia?

¹⁰ Jehovaka ni uchirin maainiakui waitsatniuitkiusha iin akupturmakmiaji. Jehová ni uchiri Jesusan ti anenaiti (Neka. 8:30). Tuma asa ni uchirin maataj tusar pujuriarmiania nui ti waitsamiayi.

11. Jehová waitsamiania nu itiur nekaaj?

¹¹ Uchirtin ainiana nu ni uchiri jakamtai ti waitin ainiawai. Ukunam jakaru nantakiartatna nuna nekakrisha ii shuar jakamtainkia ti waitniuitji. Jehovasha aintsan ni uchirin waitkiasar maawarmiania nui ti waitsamiayi (Mat. 3:17). c

12. Jesús jakamu enentaimtustin nuntumsamunam wari itiurkamniaitiaj?

¹² Jesús jakamu enentaimtustin nuntumsamunam amek pujusam tura ame jeemin pujuiniajaisha Jesús iini jarutramkamiajnia nuna unuimiatrata. Testigos de Jehová unuimiatai papii tana nui iisam turutskesha chikich papii ii achiakeajnia nuisha iisam nuna unuimiatramniaitme. d Aintsan Iruntramunam unuimiattai papiinium nui Jesús jakamu enentaimtustin nuntumsamunam Yuus papiiniumia aujsatin najanamu ana nusha aujsata. Nuyasha Jesús jakamu enentaimtustin jeamtainkia nu tsawantinin kashik video iistin najan wearmania nusha iista. Nu turakur chikich aentsnasha Jesús jakamu enentaimtusarat tusar warasmajai yainkiartatji (Ists. 7:10).

CHIKICH AENTSCHA JESUS JAKAMU ENENTAIMTAMUNAM PACHINKIARAT TUSAR WARI ITIURKAMNIAITIAJ?

13. Chikich aentscha Jesús jakamu enentaimtamunam pachinkiarat tusar wari itiurkatniuitiaj?

¹³ Jesús jakamu enentaimtamunam pachinkiarat tusar Yuusa chichame etsereakur ipiawarminiaitji. Nuyasha  ii shuar ii ai unuimiatainmaya takatnumia nu ipiawarminiaitji. Ipiamamu papii amukamtainkia internetnum ipiamamu papiin iisat tusar akuptukminiaitji. Jesús jakamu enentaimtamunmanka untsuri aents pachinkiarminiaiti (Ecl. 11:6 TNM).

14. Yaksha nakak ipiamka urukamniait? Aujmattsata.

¹⁴ Aentska taachartin ipiamaji tu enentaimsashtiniaitji. Nusha urukamtai ainis taji? Ii umai aishri testigo de Jehovachuiti tura ninkia ni aishrin tuke uwitin Jesús jakamu enentaimtamunam pachinkiat tusa ipia wemiayi. Tumaitkiusha ni aishrinkia tuke nakit wemiayi antsu aya neachma ni aishrinkia Jesús jakamu enentaimtamunam nui nemarsatjame timiayi. Kame ni aishrinkia uuntri anaikiamu papiin susamu asa nui pachinkiattsa wakerimiayi.

15. Yaksha ipiakur wari itiurkamniaitiaj?

¹⁵ Jesús jakamu enentaimtamunam penkesha pachinkiachush irunminiaiti tuma asar nuisha wari najantain nuna nekattsar wakeruiniash irunminiaiti. Tuma asamtai warintiataj nu enentaimsatniuitji (Kurs. 4:6). Juna anintrusarminiaiti: Nuisha wari najantain? Urutma pujursattarum? Itiura iwiarmamprar wetiniaitiaj? Akikmakar wayatniukai? Kuitcha apujsaniukaitiaj? Warinkish nekattsar wakerakuinkia junisaiti tusar jintintiatniuitji. Jesús jakamu enentaimtamu tura Ii iruntairinsha wari najantain? tana nu video iniaktusminiaitji. Nuyasha Tuke iwiaku nu papiijiai akankamu 28 nui tana nu urakar aujmattsamniaitji.

16. Yaksha Jesús jakamu enentaimtamun pachintiuk chikichnasha warinia nekaattsa wakerimniait?

¹⁶ Yama tainiaka Jesús jakamu enentaimtamu najanma amukamtai warinkisha nekaattsar wakerinia asar anintriarminiaiti. Vinonsha urukamtai umarchara tura pannasha urukamtai yuachara tu anintrimniaiti. Jesús  jakamu enentaimtamusha urutmaya najanniuitrum tura yamai najanarmena aitkiasrumek iruntramusha najanniuitrum tu anintrimniaiti. Yuusa chichamen paant jintinkratawarmataisha aentska nu nukap nekaattsa wakerimniaiti. Ainis anintrakui jw.org nui ¿Por qué los testigos de Jehová celebran la Cena del Señor de forma diferente a otras religiones? tana nujai jintintiamniaitji. Jesús jakamu enentaimtamu jeatsain tura nu tsawan jeamtai nuyasha najana amukar aents Yuusnan nekaattsa wakeruinia yaintiniaitji (Tur. 13:48).

YUUSA CHICHAMEN ETSERKATNIUN INIAISARUANA NU YAINKIARTAI

17. Yuusa chichamen etserkatniun iniaisaruana nunasha uuntri anairamusha itiura yainkiarminiait? (Isekiár 34:​12, 16).

¹⁷ Jesús jakamu enentaimtustin nuntumsamunam uuntri anairamu ainiana nusha Yuusa chichamen etserkatniun iniaisaru ainiana nuna aneasmajai yainkiarminiaiti (Isekiár 34:​12, 16 aujsata). Nuyasha waketrukiar iyuwar ikiakararminiaiti. Amekka pujatsme iisha amini enentaimsar pujaji ainis tiarminiaiti. Jesús jakamu enentaimtamunam amesha jeata tiarminiaiti. Tura Jesús jakamu enentaimtamunam pachinkiataj tusa jeamtainkia warasmajai amikmawartiniaiti. Jesús jakamu enentaimtamunam pachinkiarmataisha Jehovai waketkiarat tusar ataksha waketrukiar iyuwartiniaiti (1 Ped. 2:25 TNM).

18. Yuusa chichamen etserkatniun iniaisaruana nu yainkiartai tusar itiurkartiniaitiaj? (Rúmanam 12:10).

¹⁸ Yuusa chichamen etserkatniun iniaisaruana nu Jesús jakamu enentaimtamunam taarmatainkia arantamujai mashi shiir amajsartiniaitji (Rúmanam 12:10 aujsata). Ii yachi ii umai Yuusa chichamen etserkatniun iniaisaruana nu iruntainiam jeamtainkia nijiainkia warinkisha turutiarainti tusar  itiurchat enentaimiarminiaiti. e Tuma asamtai taarmatainkia warinkish nankamsar aniaschatniuitji (1 Tis. 5:11). Ii yachi ii umai asarmatai nijiai metek Jehová enentaimta asar waraji (YKan. 119:176; Tur. 20:35).

19. Jesús jakamu enentaimtamunmasha urukamtai pachinkiattsar wakeriniaitiaj?

¹⁹ Jesús winia jakamur enentaimtursatarum timiania nu umiakur shiir enentaimniuitji (Is. 48:​17, 18 TNM). Tura nui pachiniakrikia Jehová Jesusjai turawarmiania nui enentaimsar ni yuminsajme tiartatji. Nuyasha nu nukap aneasartatji. Aintsan nu tsawantin ii yachi ii umaijiaisha iruntrar nankaamakur nu nukap anenaisartatji. Tura aintsan Jesús ii tumashrin akikmakmiania nui tuke iwiaku pujumniaitiajnia nuna chikich aentscha nekaawarat tusar yainkiartatji. Tuma asamtai Jesús jakamu enentaimtamunam pachinkiatai tusar yamaik iwiarnarartai.