1. Nĩkĩ ũmbano wa kũlilikana kĩkwʼũ kya Yesũ nĩwʼo mũthenya ũla wa vata vyũ wa mwaka? (Luka 22:​19, 20)

 ANDŨ ma Yeova monaa ũmbano wa kũlilikana kĩkwʼũ kya Klĩsto newʼo wa vata vyũ mwakanĩ. Ũsu nowʼo mũthenya wʼoka Yesũ wanengie aatĩĩi make mwĩao wa ĩmwe kwa ĩmwe maũlilikanae. (Soma Luka 22:​19, 20.) Twĩthĩawa na itumi iana ũna sya kweteela ũmbano ũsu na mea maingĩ. Ekai twone imwe.

2. Nĩkĩ twĩthĩawa na mea ma kũthi ũmbanonĩ wa kũlilikana kĩkwʼũ kya Yesũ?

² Ũmbano wa kũlilikana kĩkwʼũ kya Yesũ ũtũtetheeasya kũvindĩĩsya vata wa nthembo ya wovosyo. Ũtũlilikanasya maũndũ amwe tũtonya kwĩka twonanyʼe kana nĩtũũtũnga mũvea nũndũ wa nthembo ĩsu. (2 Ako. 5:​14, 15) O na ĩngĩ, nũtũnengae mwanya wa ‘kwĩkĩana vinya’ na ana-a-asa na eĩtu-a-asa maitũ. (Alo. 1:12) Kĩla mwaka, aingĩ mavoie nĩmokaa ũmbanonĩ ũsu. Amwe nĩmatusaa kũmũsyokea Yeova moona ũndũ meũthokwʼa nesa wĩana. O na aingĩ mekwendeewʼa nĩmatanĩthawʼa nĩ kĩla mekwona na kwĩwʼa, na kĩu kĩimathangaasya mambĩĩe kũkinyĩla nzĩanĩ ĩla ĩelete thayũnĩ. Ti ũsengyʼo kwona ithyonthe twonaa ũmbano ũsu wĩ wa mwanya mũno!

3. Ũmbano wa kũlilikana kĩkwʼũ kya Yesũ ũtumaa ata twĩthĩwa twĩ ngwatanĩo nthĩ yonthe? (O na ĩngĩ, sisya visa.)

³ O na ĩngĩ, kwasũanĩa ũndũ ũmbano wa kũlilikana kĩkwʼũ kya Yesũ ũtumaa twĩthĩwa twĩ ngwatanĩo nthĩ yonthe. Ngũsĩ sya Yeova nĩsyũmbanaa o ũndũ syũa yĩthũĩte isionĩ syĩ kĩvathũkanyʼo nthĩ yonthe. Ithyonthe nĩtwĩthukĩĩasya ũvoo ũkindĩlĩĩlaa vata wa nthembo ya wovosyo. Nĩtwinaa mbathi ilĩ sya kũmũtaĩa Ngai, tũkavĩtĩlya mũkate na mbinyu mbee  witũ, na tũkasya “ameni” na ngoo yonthe ĩtina wa ila mboya inya syumawʼa. Kwa ĩvinda ya masaa ta 24, ikundi syonthe syĩthĩawa syĩkie maũndũ asu. Kwasũanĩa ũtanu ũla Yeova na Yesũ mewʼaa moona tũimataĩa kwa nzĩa ĩsu twĩ ngwatanĩo.

4. Twĩneenea kyaũ ĩsomonĩ yĩĩ?

⁴ Ĩsomonĩ yĩĩ twĩneenea makũlyo aa: Tũtonya kũmbanyʼa ngoo sitũ ata kwondũ wa ũmbano wa kũlilikana kĩkwʼũ kya Yesũ? Tũtonya kũtetheesya ata ala mekwendeewʼa matetheke nĩ ũmbano ũsu? Na tũtonya kũtetheesya ata ala mavoete? Mosũngĩo ma makũlyo asu nĩmeũtũtetheesya twĩyũmbanĩsye mũthenya ũsu wa mwanya vyũ.

TŨTONYA KŨMBANYʼA NGOO SITŨ ATA?

5. (a) Nĩkĩ twaĩle kũvindĩĩsya vata wa nthembo ya wovosyo? (Savuli 49:​7, 8) (b) Wĩmanyĩisye kyaũ vitionĩ Yesũ Akwie Nĩkĩ?

⁵ Ũndũ ũmwe wa vata vyũ tũtonya kwĩka tũkombanyʼa ngoo sitũ kwondũ wa ũmbano wa kũlilikana kĩkwʼũ kya Yesũ nĩ kũvindĩĩsya vata wa nthembo ya wovosyo. Vayaĩ kĩndũ twaĩ tũtonya kwĩka tũkeyumya ũkombonĩ wa naĩ na kĩkwʼũ. (Soma Savuli 49:​7, 8; o na ĩngĩ, sisya vitio Yesũ Akwie Nĩkĩ?) a Kwoou Yeova na Mwana wake mwendwa nĩmakwatie wasyo mũnene yĩla Yeova wavangĩthisye Yesũ akwʼe kwondũ witũ. (Alo. 6:23) O ũndũ twavindĩĩsya mũno wĩana kĩla Yeova na Yesũ meeyĩimie kwondũ witũ, nowʼo tũkatũngaa mũvea mũnango nũndũ wa nthembo ya wovosyo. Yu nĩtũũneenea maũndũ amwe meeyĩimie nĩ kana tũtetheke nĩ nthembo ĩsu. Ĩndĩ mbee, ekai twone kĩla yakonetye.

6. Nthembo ya wovosyo nĩ kyaũ, na nĩkĩ Yesũ waumisye thayũ wake?

⁶ Wovosyo nĩ thooa ũla ũĩvawa kwondũ wa kĩndũ nĩ kana ũkĩthooe ĩngĩ. Yĩla mũndũ wa mbee, Atamu, woombiwe, ndaĩ na naĩ. Ĩndĩ yĩla wavĩtisye, we na syana syake syonthe nĩmaaisye mwanya wa kwĩkala tene na tene. Kwoou nĩ kana kĩu Atamu waaisye kĩthoowe ĩngĩ, Yesũ nĩwaumisye thayũ wake ũte na naĩ ta nthembo. Ĩvinda yonthe yĩla Yesũ waĩ kũũ nthĩ “ndaaĩka naĩ, o na ũvũngũ ndwaaoneka kanywʼanĩ wake.” (1 Vet. 2:22) Kwoou Yesũ nĩwaĩvĩie nesa vyũ kĩla Atamu waaĩtye nũndũ akwie ate na naĩ, o tondũ Atamu ũtaĩ na naĩ atanavĩtya.—1 Ako. 15:45; 1 Tim. 2:6.

7. Nĩ matatwa amwe meva Yesũ wakomanie namo e vaa ĩũlũ wa nthĩ?

⁷ Yesũ nĩwaendeeie kũmwĩwʼa vyũ Ĩthe wake wa ĩtunĩ o na kũtwʼĩka nĩwakomanie na matatwa maingĩ yĩla waĩ kũũ nthĩ. E kana, aĩ no nginya enyivĩsye asyai make, o na kau kĩvathũkanyʼo namo we asyaĩtwe ate na naĩ. (Luka 2:51) E wa mũika, nĩwaaĩle kwĩsũvĩa vyũ ndakathingĩĩwʼe nĩ angĩ aeme kwĩwʼa asyai make kana aeke kwĩthĩwa e mũĩkĩĩku. Na yĩla watwʼĩkie mũndũ mũima, aĩ no nginya aleane vyũ na matatwa ma Satani, ũla nĩwe Ndevili, o na yĩla wamũthingʼĩĩisye ĩmwe kwa ĩmwe aeke kũlũmanyʼa na Ngai. (Mt. 4:​1-11) Satani nĩwatwʼĩte vyũ kũmũtata Yesũ avĩtye nĩ kana wĩthĩe ndesa kumya thayũ wake ta nthembo.

8. Nĩ matatwa angĩ meva Yesũ wakomanie namo?

⁸ Yĩla Yesũ waĩ ũthũkũminĩ wake kũũ nthĩ, nĩwakomanie na matatwa angĩ. Kwa ngelekanyʼo, amaitha make nĩmamũthĩnisye na nĩmatatie kũmũaa. (Luka 4:​28, 29; 13:31) O na nĩwalasimĩkie kũmĩanĩsya na mawonzu ma aatĩĩi make. (Mko. 9:​33, 34) Yĩla wasilĩlawa, nĩwanyamaiwʼe mũno na aumangwa. Na ĩndĩ nĩwooaiwe kĩkwʼũ kĩ woo mũno na kĩ nthoni. (Aevl. 12:​1-3) Na kũthũkya ũvoo, oomĩĩisye  ĩtatwa yĩu ya mũthya ateũsũvĩwa nĩ Yeova. b—Mt. 27:46.

9. Twĩwʼaa ata twasũanĩa nthembo ya Yesũ? (1 Vetelo 1:8)

⁹ Vate nzika, Yesũ nĩwathĩnie mũno ayĩsa kũtwʼĩka nĩwaumya thayũ wake ta nthembo. Yĩla twavindĩĩsya ũndũ Yesũ weeyumisye mũno na ngenda kwondũ witũ, twĩwʼaa twamwenda vyũ, kana tiwʼo?—Soma 1 Vetelo 1:8.

10. Yeova akwatie wasyo wĩva nĩ kana aumye nthembo ya wovosyo?

¹⁰ Nata ĩũlũ wa Yeova? Nĩ kyaũ weeyĩimie na ngenda nĩ kana Yesũ aumye thayũ wake ta nthembo? Yeova na Mwana wake, Yesũ, methĩawa na ngwatanĩo ndũmu vyũ ĩtesa kũelekanwʼa na ĩngĩ. (Nth. 8:30) Kwoou kwasũanĩa woo ũla weewie yĩla woonie Yesũ aikomana na matatwa maingĩvĩte ũu e vaa ĩũlũ wa nthĩ. Vate nzika, nĩwaũmĩie mũno kwona Mwana wake aikuwa naĩ, ailewa, na aithĩnwʼa.

11. Nengane ngelekanyʼo ĩkũtũtetheesya kũelewa ũndũ Yeova weewie yĩla Yesũ wooaiwe.

¹¹ Mũsyai o na wĩva wakwʼĩĩwe nĩ mwana wake nĩwĩsĩ ũndũ kĩu kĩetae kyeva kingĩvĩte. Nĩtũĩkĩĩe vyũ watho wa ũthayũũkyo, ĩndĩ kĩu kĩitumaa tũtaũmĩa yĩla mwendwa witũ wakwʼa. Ngelekanyʼo ĩsu yĩtũtetheesya kũelewa ũndũ Yeova waũmĩie mũno wĩana Nisani 14, mwaka wa 33 ĩtina wa Klĩsto, yĩla woonie Mwana wake mwendwa aithĩna na kũkwʼa. c—Mt. 3:17.

12. Nĩ kyaũ tũtonya kwĩka vatialĩte kavinda kanini ũmbano wa kũlilikana kĩkwʼũ kya Yesũ ũvike?

¹² Vatialĩte kavinda kanini mũthenya wa kũlilikana kĩkwʼũ kya Yesũ ũvike, wĩona ata ũkemanyĩsya maũndũ maingangĩ ĩũlũ wa nthembo ya wovosyo ũyĩmanyĩsya we mwene kana Ũthaithinĩ wa Mũsyĩ? Tũmĩa Ĩvuku ya Kwĩka Ũkunĩkĩli ya Ngũsĩ sya Yeova kana mavuku angĩ ma kwĩmanyĩsya wĩke ũkunĩkĩli mũnango ĩũlũ wa ũndũ ũsu. d O na ĩngĩ, ĩkĩa kĩthito ũatĩĩe mũvango wa kũsoma Mbivilia ĩvinda ya kũlilikana kĩkwʼũ kya Yesũ ũla wĩthĩawa nthĩnĩ wa Mwĩkalĩle wa Aklĩsto na Wĩa wa Kũtavanyʼa—Kavuku ka Kwĩmanyĩsya ka Ũmbano. Na mũthenya ũsu wavika, ndũkolwe nĩ kwĩloela vulongulamu ya mwanya ya Ũthaithi wa Kwakya. Yĩla twoombanyʼa ngoo sitũ kwondũ wa ũmbano ũsu, tũkeethĩawa tũtonya kũtetheesya angĩ matetheke nĩwʼo.—Esa. 7:10.

 TETHEESYA ALA MEKWENDEEWʼA

13. Nĩ ĩtambya yĩva ya mbee tũtonya kwosa tũtetheesye ala mekwendeewʼa matetheke nĩ ũmbano wa kũlilikana kĩkwʼũ kwa Yesũ?

¹³ Tũtonya kũtetheesya ata ala mekwendeewʼa matetheke nĩ ũmbano wa kũlilikana kĩwʼũ kya Yesũ? Ĩtambya ya mbee yĩla tũtonya kwosa nĩ kũmathokya. Eka o kũthokya ala tũũkomana namo tũitavanyʼa, no tũandĩke masyĩtwa ma ala tũkwenda kũthokya. Amwe tũtonya kũthokya nĩ andũ maitũ ma mũsyĩ, ala tũthũkũmaa namo, ala tũsomaa namo, na andũ angĩ twĩsĩ. O na ethĩwa tũi na tũvalũa tũtumbĩthye tũtoetye twa kũthokanyʼa, no tũmatũmĩe link makakwata kavalũa kau kĩsesenĩ. No tũsengʼe mũno twoona ala matwʼa kũka ũmbanonĩ ũsu!—Mũta. 11:6.

14. Nengane ngelekanyʼo ĩkwonanyʼa ũseo wa kũnenga mũndũ valũa wa kũmũthokya.

¹⁴ Ndũkaaĩse kũvũthĩĩsya ũseo wa kũnenga mũndũ kavalũa ka kũmũthokya. Mũthenya ũmwe, mwĩĩtu-a-asa ũtwaĩtwe nĩ mũndũ ũte Ngũsĩ nĩwasengʼie mũno kwona mũũme aimwĩa kana nĩwavangĩte kũendanyʼa nake ũmbanonĩ wa kũlilikana kĩkwʼũ kya Yesũ. Nĩkĩ wasengʼie? Nũndũ tene atindĩaa kũmũkũlya mathi, ĩndĩ ndaaĩsa kwĩtĩkĩla. Nĩ kyaũ kyatumie ĩvinda yĩu atwʼa kũthi? Mũndũũme ũsu aisye, “Nĩnanengiwe kavalũa ka kũnthokya.” Mũtumĩa ũmwe wa kĩkundi meesene nĩwe wamũthoketye. Mũndũũme ũsu nĩwaendie ũmbanonĩ wa mwaka ũsu na nĩwaendeeie kũthi myaka mingĩ ĩla yaatĩĩe.

15. Nĩ kyaũ twaĩle kũlilikana yĩla tũũthokya andũ ũmbanonĩ wa kũlilikana kĩkwʼũ kya Yesũ?

¹⁵ Lilikana kana ala twathokya no methĩwe na makũlyo, na mũno mũno ethĩwa mayaakinya ũmbanonĩ witũ o na ũmwe. Nũseo tũkasũanĩa makũlyo ala matonya kũkũlya na tũyĩyũmbanyʼa kũmasũngĩa. (Ako. 4:6) Kwa ngelekanyʼo, amwe no mekũlye-ĩ: ‘Nĩ kyaũ kĩkaendeea ũmbanonĩ ũsu?’ ‘Ũkakua ĩvinda yĩana ata?’ ‘Ve ngũa ila syaĩle kwĩkĩwa?’ ‘Nĩngaĩvĩthwʼa kũlika?’ ‘Ve nthembo ikosanwʼa?’ Yĩla tũũthokya mũndũ ũmbanonĩ ũsu, no tũmũkũlye, “Ve makũlyo wĩ namo?” na ĩndĩ tũisũngĩa  makũlyo ala ũtonya kwĩthĩwa namo. O na no tũtũmĩe vitio Kũlilikana Kĩkwʼũ kya Yesũ na Nĩ Kyaũ Kĩendeeaa Nyũmbanĩ ya Ũsumbĩ? kũmũtetheesya aelewe ũndũ maũmbano maitũ matwaĩĩawʼa. Na ĩsomo ya 28 ĩvukunĩ Tanĩa Thayũ Tene na Tene! yĩ na maũndũ maingĩ maseo tũtonya kũneenea.

16. Ala mooka ũmbanonĩ wa kũlilikana kĩkwʼũ kya Yesũ matonya kũkũlya makũlyo angĩ meva?

¹⁶ Ũmbano wa kũlilikana kĩkwʼũ kya Yesũ wathela, ala mekwendeewʼa no methĩwe na makũlyo angĩ. No mekũlye nĩkĩ vate mũndũ ũnaya mũkate kana kũnywʼa mbinyu, kana nĩkĩ no andũ avũthũ mekie ũu. O na no mekũlye twĩkaa ũmbano ũsu mavinda meana. No mende kũmanya ethĩwa maũmbano onthe ma Ngũsĩ sya Yeova matwaĩĩawʼa ũndũ ũmwe. O na kau maũndũ maingĩ katĩ wa asu nĩmaneeneawa ũmbanonĩ ũsu, ala eũ no methĩwe mayenda kũelewʼa mũnango. Kĩlungu kĩ nthĩnĩ wa jw.org/kam kĩ na kyongo, “Nĩkĩ Ngũsĩ sya Yeova Ililikanaa Kyaũya kya Wĩoo kya Mwĩaĩi kwa Nzĩa yĩ Kĩvathũkanyʼo na Ndĩni Ila Ingĩ?” no kĩtũtetheesye kũsũngĩa makũlyo amwe katĩ wa asu. Twĩenda kwĩka kyonthe kĩla tũtonya ũmbano ũsu ũtanambĩĩa, ũendeee, na wathela tũtetheesye ala me na “ngoo nzeo” matetheke vyũ nĩwʼo.—Meko 13:48.

TETHEESYA ALA MAVOETE

17. Atumĩa matonya kũtetheesya ata ala mavoete? (Esekieli 34:​12, 16)

¹⁷ Atumĩa matonya ata kũtetheesya ala mavoete ĩvindanĩ ya kũlilikana kĩkwʼũ kya Yesũ? Monyʼe kana nũũmathĩnĩkĩa. (Soma Esekieli 34:​12, 16.) Ũmbano ũsu ũtanamba kũvika, ĩkĩĩthya nĩwamantha aingĩ ũndũ vatonyeka. Maĩkĩĩthye nũmendete na nĩwĩyumĩtye vyũ kũmatetheesya. Mathokye moke ũmbanonĩ ũsu. Na mooka mathokye nesa. Ũmbano ũsu wathela, endeea kũthokea ana-a-asa na eĩtu-a-asa asu endwa na ũimatetheesya kĩ-veva mamũsyokee Yeova.—1 Vet. 2:25.

18. Ithyonthe tũtonya kũtetheesya ata ala mavoete? (Alomi 12:10)

¹⁸ Onthe kĩkundinĩ no matetheesye ala  mavoete mooka ũmbanonĩ wa kũlilikana kĩkwʼũ kya Yesũ. Ata? Kwa kũmonyʼa kana nĩtũmendete, kũmeka nesa, na kũmanenga ndaĩa. (Soma Alomi 12:10.) Lilikana kana nĩmatonya kwĩthĩwa meũkĩaa kũka ũmbanonĩ ũsu. No kwĩthĩwa mekwĩkũlasya ũndũ ala angĩ meũmona mooka. e Kwoou ĩsũvĩe ndũkamakũlye makũlyo meũmekĩĩthya nthoni kana ũwete kĩndũ kĩtonya kũmaũmĩsya. (1 Ath. 5:11) Asu nĩ ana-a-asa na eĩtu-a-asa maitũ. Nĩtũũtana kũthaitha vamwe namo ĩngĩ!—Sav. 119:176; Meko 20:35.

19. Tũtethekaa ata twalilikana kĩkwʼũ kya Yesũ?

¹⁹ Nĩtũtũngaa mũvea mũno kwona Yesũ atũtavisye tũlilikanae kĩkwʼũ kyake kĩla mwaka, na nĩtũeleawa nĩkĩ kwĩka ũu nĩ kwa vata. Tweeka ũu, nĩtũtethekaa na tũkatethya angĩ mũno. (Isa. 48:​17, 18) Nĩtũmwendaa Yeova na Yesũ mũnango. Nĩtwonanasya ũndũ tũtũngaa mũvea mũno wĩana nũndũ wa kĩla matwĩkĩte. Nĩtũlũlũmĩĩlasya ngwatanĩo yitũ na athaithi ala angĩ. Na no tũtetheesye angĩ makona ũndũ o namo matonya kũtetheka nĩ moathimo ala nthembo ĩsu ya wovosyo ĩtumaa tũkwata. Ekai ĩndĩ twĩke kyonthe kĩla tũtonya twĩyũmbanĩsye ũmbano wa mwaka ũũ wa kũlilikana kĩkwʼũ kya Yesũ, nĩkwĩthĩwa vai mũthenya ũngĩ wa vata mwakanĩ kwĩ ũsu!