1. Sambu na nki Nkinsi ya Kuyibuka Lufwa ya Yezu kele kilumbu ya kuluta mfunu mingi na mvula? (Luka 22:19, 20)

 SAMBU na bansadi ya Yehowa, Nkinsi ya Kuyibuka Lufwa ya Yezu kele kilumbu ya kuluta mfunu mingi na mvula. Yo kele kaka nkinsi mosi yina Yezu songaka balongoki na yandi na kulanda kusala. (Tanga Luka 22:19, 20.) Beto kele ti bikuma mingi ya ke salaka nde beto vingila nkinsi yango na kiese yonso. Beto tadila mwa bikuma.

2. Inki kele mwa bikuma ya ke salaka nde beto vingila Nkinsi ya Kuyibuka Lufwa ya Yezu ti kiese yonso?

² Nkinsi ya Kuyibuka Lufwa ya Yezu ke sadisaka beto na kuyindula valere ya kimenga na yandi. Yo ke yibusaka beto mitindu ya kumonisa ntonda sambu na kimenga ya Yezu. (2 Bak. 5:14, 15) Yo ke pesaka beto mpi dibaku ya ‘kupesana kikesa’ ti bampangi na beto. (Bar. 1:12) Konso mvula, bampangi mingi ya me bwaka madidi na kimpeve ke kwisaka na nkinsi yango. Nkutu, bankaka ke vutukilaka Yehowa sambu bo yambaka bo na kiese yonso. Mambu yina bantu mingi ke waka mpi ke monaka na nkinsi yango ke pusaka bo na kuyantika kulonguka Biblia. Ya kieleka, Nkinsi ya Kuyibuka Lufwa ya Yezu ke vandaka mfunu mingi sambu na beto.

3. Inki mutindu Nkinsi ya Kuyibuka Lufwa ya Yezu ke vukisaka beto yonso na ntoto ya mvimba? (Tala mpi kifwanisu ya ke wakana ti paragrafe yai.)

³ Yindula mpi mutindu Nkinsi ya Kuyibuka Lufwa ya Yezu ke vukisaka bampangi na ntoto ya mvimba. Na ntoto ya mvimba, Bambangi ya Yehowa ke vukanaka na Nkinsi ya Kuyibuka Lufwa ya Yezu na nima ya kudinda ya ntangu. Beto yonso ke landaka diskure ya ke tubilaka mingi mfunu ya kimenga ya Yezu. Na nkinsi yina, beto ke yimbaka bankunga zole sambu na kukumisa Yehowa, beto ke lutisaka dimpa mpi vinu mpi beto ke ndimaka na ntima ya mvimba “Amen” na bisambu iya yina bo ke salaka na nkinsi yango. Na nima ya bangunga kiteso ya 24, mabundu yonso na ntoto ya mvimba ke salaka nkinsi yina mutindu mosi. Keti nge ke yindula kiese yina Yehowa mpi Yezu ke waka ntangu bo ke monaka beto yonso ke vukana  na ntoto ya mvimba mpi ke kumisa bo na mutindu yina?

4. Inki beto ta tubila na disolo yai?

⁴ Na disolo yai, beto ta tubila bangiufula yai: Inki mutindu beto lenda yidika bantima na beto sambu na Nkinsi ya Kuyibuka Lufwa ya Yezu? Inki mutindu beto lenda sadisa bantu ya nkaka na kubakila yo mambote? Mpi nki mutindu beto lenda sadisa bampangi yina me bwaka madidi na kimpeve? Bamvutu na bangiufula yina ta sadisa beto na kuyilama sambu na nkinsi yai ya mfunu mingi.

INKI MUTINDU BETO LENDA YIDIKA BANTIMA NA BETO SAMBU NA NKINSI YA KUYIBUKA LUFWA YA YEZU?

5. (a) Sambu na nki beto fwete yindula valere ya kimenga ya Yezu? (Nkunga 49:7, 8) (b) Inki malongi nge me baka na video Sambu na Nki Yezu Fwaka?

⁵ Kima mosi ya kuluta mfunu yina beto fwete sala sambu na kuyidika bantima na beto sambu na Nkinsi ya Kuyibuka Lufwa ya Yezu kele, kuyindula valere ya kimenga ya Yezu Kristu. Kele ve ti kima yina beto lenda sala beto mosi sambu na kukatuka na kimpika ya lufwa mpi ya disumu. (Tanga Nkunga 49:7, 8; tala mpi video Sambu na Nki Yezu Fwaka?) a Yo yina Yehowa yidikaka mambu sambu Yezu, Mwana na yandi ya yandi ke zolaka mingi, kupesa luzingu na yandi sambu na beto. Bo yonso zole salaka kibansa ya nene kibeni. (Bar. 6:23) Kana beto ke yindula mambu yina Yehowa mpi Yezu salaka sambu na beto, beto ta monisa ntonda ya mingi sambu na kimenga ya Yezu. Beto ta tadila mwa mambu ya mpasi yina yo lombaka nde Yehowa mpi Yezu kusala sambu na kupesa kimenga yina. Kansi beto tala ntete nki kimenga ya Yezu ke tendula.

6. Kimenga ya Yezu ke tendula nki?

⁶ Kimenga ya Yezu kele ntalu yina Yehowa futaka sambu na kusumba diaka luzingu yina Adami vidisaka. Adami, muntu ya ntete, vandaka ya kukuka ntangu bo salaka yandi. Kansi ntangu yandi salaka disumu, yandi vidisaka kivuvu ya kuzinga mvula na mvula sambu na yandi mpi sambu na bana na yandi yonso. Sambu na kusumba diaka luzingu yina Adami vidisaka, Yezu pesaka luzingu na yandi ya kukuka bonso kimenga. Na luzingu na yandi ya mvimba awa na ntoto, Yezu “salaka disumu ve, bo monaka mpi ve luvunu na munoko na yandi.” (1 Pie. 2:22) Ntangu Yezu fwaka, yandi vandaka muntu ya kukuka mpi luzingu na yandi vandaka kiteso mosi ti yina Adami vandaka ti yo na ntwala nde yandi sala disumu.​—1 Bak. 15:45; 1 Tim. 2:6.

7. Inki kele mwa mambu ya mpasi yina Yezu kutanaka ti yo awa na ntoto?

⁷ Ntangu Yezu vandaka awa na ntoto, yandi lemfukilaka Tata na yandi na mambu yonso yina yandi vandaka kusala ata ntangu yo vandaka mpasi na kusala yo. Ntangu Yezu vandaka mwana-fioti, yandi vandaka ya kukuka kansi yo lombaka nde yandi lemfukila bibuti na yandi yina vandaka bantu ya kukonda kukuka. (Luka 2:51) Ntangu yandi vandaka toko, mbala ya nkaka yo lombaka nde yandi telemina bantu ya nkaka yina lendaka kupusa yandi na kulemfukila ve bibuti na yandi to na kulemfukila ve Yehowa. Ntangu Yezu kumaka mbuta, yandi teleminaka Satana Diabulu yina sosaka kupusa yandi na kusala disumu mpi yina songaka yandi na pwelele yonso nde yandi yambula kukangama kaka na Yehowa. (Mat. 4:1-11) Satana vandaka kaka kuzola kupusa Yezu na kusala disumu sambu yandi kuka diaka ve kupesa luzingu na yandi bonso kimenga.

8. Inki bampasi ya nkaka Yezu kutanaka ti yo?

⁸ Ntangu Yezu vandaka kusala kisalu ya kulonga nsangu ya mbote awa na ntoto, yandi kutanaka diaka ti bampasi ya nkaka. Bambeni na yandi vandaka kuniokula yandi mpi bo sosaka kufwa yandi. (Luka 4:28, 29; 13:31) Yo lombaka nde yandi kanga ntima na bifu ya balongoki na yandi. (Mar. 9:33, 34) Ntangu bo vandaka kusambisa yandi, bo bulaka yandi mpi bo sekaka yandi. Na nima, bo fwaka yandi bonso muntu ya mbi mpi yandi monaka mpasi mingi kibeni. (Baeb. 12:1-3) Yo lombaka  nde yandi mosi kukanga ntima na bampasi ya nsuka yina yandi kutanaka ti yo na zulu ya nti ya mpasi, kukonda lutaninu ya Yehowa. b​—Mat. 27:46.

9. Kimenga ya Yezu ke pusaka beto na kusala nki? (1 Piere 1:8)

⁹ Ya kieleka, Yezu niokwamaka mingi kibeni sambu na kupesa luzingu na yandi bonso kimenga. Kana beto ke yindula mambu yonso yina Yezu salaka sambu na beto, yo ke pusaka beto na kuzola yandi diaka mingi.​—Tanga 1 Piere 1:8.

10. Inki Yehowa salaka sambu Yezu kupesa luzingu na yandi bonso kimenga?

¹⁰ Ebuna Yehowa, yo lombaka nde yandi sala nki sambu Yezu kupesa luzingu na yandi bonso kimenga? Yehowa ti Yezu kele ti kinduku ya kuluta ngolo kibeni yina tata lenda vanda ti yo ti mwana na yandi. (Bing. 8:30) Yindula fioti: Inki mutindu Yehowa kudiwaka ntangu yandi vandaka kumona Yezu ke niokwama mingi awa na ntoto? Ya kieleka, Yehowa waka mpasi mingi ntangu yandi monaka mutindu bo vandaka kumonisa Mwana na yandi mpasi mingi, mutindu bo buyaka yandi mpi mutindu yandi vandaka kuniokwama.

11. Pesa mbandu ya ke monisa mutindu Yehowa waka ntangu bo fwaka Yezu.

¹¹ Bibuti yina me fwilaka dezia mwana, me zaba mbote mpasi yina kufwila mwana ke pesaka. Beto ke vandaka ti kivuvu ya lufutumuku, kansi kana muntu mosi yina beto ke zolaka me fwa, yo ke pesaka beto mpasi mingi kibeni. Mbandu yina ke sadisa beto na kubakisa mutindu Yehowa waka ntangu yandi monaka Mwana na yandi ya yandi ke zolaka mingi, ke niokwama mpi ke fwa na Nisani 14, ya mvula 33 ya ntangu na beto. c​—Mat. 3:17.

12. Inki beto lenda sala mwa bamposo na ntwala ya kuyibuka lufwa ya Yezu?

¹² Banda bubu yai tii na kilumbu ya kuyibuka lufwa ya Yezu, nge lenda longuka mambu mingi ya me tala kimenga ya Yezu na kulonguka na nge mosi to na Lusambu ya Dibuta. Sadila Mukanda ya Bansosa Sambu na Bambangi ya Yehowa to mikanda na beto ya nkaka ya ke tendulaka Biblia, sambu na kubakisa mambu mingi ya me tala kimenga ya Yezu. d Diaka, landa manaka ya lutangu ya Biblia sambu na Nkinsi ya Kuyibuka Lufwa ya Yezu ya kele na Mukanda ya Lukutakanu—Luzingu mpi Kisalu na Beto ya Bukristu. Na kilumbu ya kuyibuka lufwa ya Yezu, kuvila ve kutala Lusambu ya Suka sambu na kilumbu yango. Kana beto yidika bantima na beto sambu na Nkinsi ya Kuyibuka Lufwa ya Yezu, beto ta kuka kusadisa bantu ya nkaka sambu bo bakila yo mpi mambote.​—Esd. 7:10.

 SADISA BANTU YA NKAKA NA KUBAKILA YO MAMBOTE

13. Inki kima ya ntete beto fwete sala sambu na kusadisa bantu ya nkaka na kubaka mambote na Nkinsi ya Kuyibuka Lufwa ya Yezu?

¹³ Inki mutindu beto lenda sadisa bantu ya nkaka na kubaka mambote na Nkinsi ya Kuyibuka Lufwa ya Yezu? Kima ya ntete yina beto fwete sala kele, kubingisa bo. Katula bantu yina beto ke bingisa ntangu beto ke longa nsangu ya mbote, beto fwete sala liste ya bantu ya nkaka yina beto me zaba, yina beto lenda bingisa mpi. Yo lenda vanda bampangi na beto ya dibuta, bantu yina beto ke salaka ti bo, banduku na beto ya nzo-nkanda mpi bantu ya nkaka. Ata beto kele ve ti baemvitasio mingi ya papie, beto lenda tindila bo lien ya baemvitasio yango na telefone. Beto lenda yituka na kumona bantu mingi yina beto bingisaka me kwisa.​—Lon. 11:6.

14. Pesa mbandu ya ke monisa nde kupesa muntu emvitasio lenda pusa yandi na kukwisa na Nkinsi ya Kuyibuka Lufwa ya Yezu.

¹⁴ Kana nge me pesa muntu emvitasio, yo lenda pusa yandi kibeni na kukwisa. Kilumbu mosi, mpangi-nkento mosi yitukaka kibeni ntangu bakala na yandi yina kele ve Mbangi ya Yehowa songaka yandi na kiese yonso nde, yandi ke yilama sambu na kukwenda ti yandi na Nkinsi ya Kuyibuka Lufwa ya Yezu. Sambu na nki yandi yitukaka? Sambu yandi me bingisaka yandi dezia mbala mingi kansi yandi ke kwendaka ve. Inki salaka nde yandi ndima kukwenda ntangu yai? Bakala yango tubaka nde: “Bo pesaka mono emvitasio.” Nkuluntu mosi ya dibundu ya mpangi-nkento yina zabanaka ti bakala yina mpi yandi pesaka yandi emvitasio sambu na Nkinsi ya Kuyibuka Lufwa ya Yezu. Bakala yina kwisaka na Nkinsi ya Kuyibuka Lufwa ya Yezu yina salamaka na mvula yina mpi na bamvula mingi na nima.

15. Inki beto fwete vila ve ntangu beto ke bingisa bantu na Nkinsi ya Kuyibuka Lufwa ya Yezu?

¹⁵ Kuvila ve nde bantu yina nge ke bingisa lenda yula nge bangiufula, mingi-mingi kana bo me kwisaka ntete ve ata na lukutakanu na beto mosi. Beto lenda yindula na ntwala bangiufula yina bo lenda yula mpi kuyilama sambu na kupesa bo bamvutu. (Bakol. 4:6) Mu mbandu bankaka lenda yula nde: ‘Inki ta salama na nkinsi yango?’ ‘Yo ta sala bantangu ikwa?’ ‘Inki mutindu mono fwete lwata?’ ‘Keti mono fwete futa mbongo na ntwala ya kukota?’ ‘Keti yo ta lomba nde mono pesa  mbongo na nkinsi yango?’ Ntangu beto ke bingisa muntu na Nkinsi ya Kuyibuka Lufwa ya Yezu, beto lenda yula yandi nde: “Keti nge kele ti bangiufula?” mpi na nima, beto pesa yandi bamvutu. Beto lenda sadila bavideo Beto Yibuka Lufwa ya Yezu mpi Inki Ke Salamaka na Nzo ya Kimfumu? sambu na kusadisa muntu yina beto ke bingisa na kubakisa mutindu balukutakanu na beto ke salamaka. Diaka, kele ti mambu mingi ya mbote yina beto lenda tubila na dilongi 28 ya mukanda Zinga Mvula na Mvula!

16. Inki bangiufula ya nkaka bantu yina ke kwisa na Nkinsi ya Kuyibuka Lufwa ya Yezu lenda yula?

¹⁶ Na nima ya kukwisa na Nkinsi ya Kuyibuka Lufwa ya Yezu, bantu yina me sepela lenda vanda ti bangiufula ya nkaka. Bo lenda yula nde, sambu na nki ata muntu mosi ve diaka dimpa mpi nwaka vinu to sambu na nki bantu fioti mpamba diaka dimpa mpi nwaka vinu? Bo lenda yula mpi mbala ikwa beto ke salaka nkinsi yango. Bo lenda yula mpi kana balukutakanu yonso ya Bambangi ya Yehowa ke salamaka mutindu yina. Ata bo ke tubilaka mambu mingi yina bantu lenda yula na diskure ya Nkinsi ya Kuyibuka Lufwa ya Yezu, bantu yina me kwisa sambu na mbala ya ntete lenda sosa kuzaba mambu mingi ya nkaka. Disolo, “Sambu na Nki Bambangi ya Yehowa Ke Salaka Ve Nkinsi ya Madia ya Mfumu Bonso Mabundu ya Nkaka?” na jw.org lenda sadisa beto na kupesa bamvutu na bangiufula na bo ya nkaka. Beto fwete sala yonso na ntwala ya Nkinsi ya Kuyibuka Lufwa ya Yezu, ntangu yo ke salama mpi na nima ya nkinsi yango sambu na kusadisa bantu yina kele ti “nkadilu ya mbote” na kubakila yo mambote.​—Bis. 13:48.

SADISA BAMPANGI YINA ME BWAKA MADIDI NA KIMPEVE

17. Inki mutindu bankuluntu lenda sadisa bampangi yina me bwaka madidi na kimpeve? (Ezekiele 34:12, 16)

¹⁷ Na nsungi ya Nkinsi ya Kuyibuka Lufwa ya Yezu, nki mutindu bankuluntu lenda sadisa bampangi yina me bwaka madidi na kimpeve? Beno monisa nde beno ke zolaka bo. (Tanga Ezekiele 34:12, 16.) Na ntwala ya Nkinsi ya Kuyibuka Lufwa ya Yezu, beno sala yonso sambu na kusolula ti bampangi yina mingi kana mpila kele. Beno songa bo nde beno ke zolaka bo mpi nde beno ke zola kusadisa bo. Beno bingisa bo na Nkinsi ya Kuyibuka Lufwa ya Yezu. Kana bo me kwisa, beno yamba bo  na kiese yonso. Na nima ya Nkinsi ya Kuyibuka Lufwa ya Yezu, beno landa kusolula ti bo mpi beno sadisa bo na kimpeve sambu bo vutukila Yehowa.​—1 Pie. 2:25.

18. Inki mutindu beto yonso lenda sadisa bampangi yina me bwaka madidi na kimpeve? (Baroma 12:10)

¹⁸ Bampangi yonso na dibundu lenda sadisa bampangi yina me bwaka madidi na kimpeve, ya me kwisa na Nkinsi ya Kuyibuka Lufwa ya Yezu. Inki mutindu? Kana beno sadila bo mambu na zola, na mawete mpi na luzitu. (Tanga Baroma 12:10.) Beno vila ve nde mbala ya nkaka, yo ke vandilaka bo mpasi na kuvutukila balukutakanu. Mbala ya nkaka bo ke waka boma nde bampangi ta yamba bo ve mbote. e Yo yina, kuyula bo ve bangiufula yina lenda pesa bo nsoni to yina lenda yangisa bo, to kutuba ve mambu yina lenda sala bo mpasi. (1 Bate. 5:11) Bo kele kibeni bampangi na beto. Beto ke vandaka na kiese ya kuvukana diaka ti bo sambu na kusambila Yehowa.​—Nk. 119:176; Bis. 20:35.

19. Kuyibuka lufwa ya Yezu ke natilaka beto nki mambote?

¹⁹ Beto kele na kiese mingi sambu Yezu me songaka beto na kulanda kuyibuka lufwa na yandi konso mvula mpi beto me bakisa sambu na nki yo kele mfunu mingi na kusala yo. Kana beto ke sala nkinsi yango, beto ke bakilaka yo mambote mpi beto ke sadisaka bantu ya nkaka na kubakila yo mpi mambote na mitindu mingi. (Yez. 48:17, 18) Beto ke kumisaka ngolo zola na beto sambu na Yehowa mpi Yezu. Beto ke monisaka nde beto ke sepelaka mingi ti mambu yina bo me salaka sambu na beto. Beto ke kumisaka kinduku na beto ngolo ti bampangi na beto. Beto lenda sadisa mpi bantu ya nkaka na kubakisa mutindu bo mpi bo lenda bakila kimenga ya Yezu mambote. Yo yina, beto sala yonso sambu na kuyilama sambu na Nkinsi ya Kuyibuka Lufwa ya Yezu ya mvula yai. Yo kele kilumbu ya kuluta mfunu ya mvula.