1. Omolwashike Edimbuluko li li efiku la fimanenena momudo? (Lukas 22:​19, 20)

 KOSHIWANA shaJehova, Edimbuluko lefyo laKristus oli li efiku la fimanenena momudo. Olo ashike oshiningwanima osho Jesus a lombwela ovashikuli vaye va dane kondadalunde. (Lesha Lukas 22:​19, 20.) Otwa teelela nodjuulufi Edimbuluko omolwomatomheno mahapu. Natu ka taleni kwaamwe omuo.

2. Otwa teelela nodjuulufi Edimbuluko omolwomatomheno amwe elipi?

² Edimbuluko ohali tu kwafele tu dule okudilonga kunghee ekulilo la fimana nokomanangeko noupuna aeshe oo la etifa. Ohali tu dimbulukifa nghee hatu dulu okuulika olupandu li na sha neyambo laJesus. (2 Kor. 5:​14, 15) Ohali tu pe yo omhito, opo tu ‘twaafane omukumo’ novamwatate novamwameme. (Rom. 1:12) Omudo keshe, ovamwatate novamwameme vahapu, ovo va efa po okwoongala, ohava kala pEdimbuluko. Molwaashi ova ungaungiwa navo pahole, ohashi ve linyengifa va alukile kuJehova. Shikwao vali, ovanhu vahapu ohava kala va kumwa kwaasho va mona nova uda, nohashi va ningifa va kale va hala okuhovela ekonakonombiibeli. Oinima aishe ei ohai ningifa Edimbuluko li kale le likalekelwa neenghono kufye.

3. Ongahelipi Edimbuluko hali tu hanganifa novamwatate novamwameme mounyuni aushe? (Tala yo efano.)

³ Otwa teelela yo nodjuulufi Edimbuluko, molwaashi otu shii kutya mefiku olo ohatu hangana novamwatate novamwameme mounyuni aushe. Eendombwedi daJehova ohadi ongala, eshi etango tali ningine mounyuni aushe. Atushe ohatu pwilikine koshipopiwa osho tashi divilike nghee ekulilo la fimana. Ohatu imbi omaimbilo avali nokulitambekida omungome nomaviinyu  nosho yo okutya “amen” nomutima aushe komailikano ane. Meni leevili 24 lwaapo, omaongalo aeshe ohaa ningi sha faafana. Diladila kehafo olo Jehova nosho yo Jesus hava kala ve udite, eshi tave tu tale mounyuni aushe hatu va fimanekifa monghedi ya tya ngaho!

4. Oshike hatu ka kundafana moshitukulwa eshi?

⁴ Moshitukulwa eshi, ohatu ka kundafana omapulo aa: Ongahelipi hatu dulu okulongekidila omitima detu Edimbuluko? Ongahelipi hatu dulu okukwafela vakwetu va mone mo ouwa? Ongahelipi hatu dulu okukwafela ovamwatate novamwameme ovo inave lipyakidila vali? Omanyamukulo komapulo oo otae ke tu kwafela, opo tu lilongekidile oshiningwanima osho sha fimanenena.

ONGAHELIPI HATU DULU OKULONGEKIDILA OMITIMA DETU EDIMBULUKO?

5. (a) Omolwashike twa pumbwa okudiladila kongushu yekulilo? (Epsalme 49:​7, 8) (b) Oshike we lihonga mokavidio Omolwashike Jesus a fya?

⁵ Onghedi imwe ya fimanenena omo hatu dulu okulongekidila omitima detu Edimbuluko omokudilonga kongushu yekuliloyambo laJesus Kristus. Itatu dulu okulimangulula koulunde nefyo kufye vene. (Lesha Epsalme 49:​7, 8; tala yo okavidio Omolwashike Jesus a fya?) a Jehova okwa ninga elongekido Jesus a yandje omwenyo waye, opo e tu xupife. Jehova naJesus ova ninga eliyambo linene. (Rom. 6:23) Ngeenge otwa kala hatu dilonga luhapu keyambo olo Jehova naJesus ve tu ningila, ohatu ka kala tu na olupandu linene li na sha nekulilo. Ohatu ka tala koinima imwe idjuu oyo Jehova naJesus ve tu ningila nehalo liwa. Shotete, ekulilo ola kwatela mo shike?

6. Ekulilo ola kwatela mo shike?

⁶ Ekulilo ofuto oyo hai futwa, opo u shunifilwe oshinima shonhumba. Omunhu wotete, Adam, okwa li a wanenena. Eshi a nyona, okwe likanifila etimaumbwile lokukala nomwenyo fiyo alushe nosho yo oludalo laye alishe. Opo ku futilwe po osho Adam a kanifa, Jesus okwa yandja omwenyo waye wa wanenena u li eyambo. Momukokomoko wokukalamwenyo kwaye akushe kombada yedu, Jesus “ka li a nyona sha, noina popya oipupulu nandenande.” (1 Pet. 2:22) Eshi Jesus a fya, okwa li a wanenena ngaashi ashike Adam a li ofimbo ina nyona. Onghee eshi Jesus a yamba po omwenyo waye, okwa futila po omwenyo oo Adam a kanifa. — 1 Kor. 15:45; 1 Tim. 2:6.

7. Omayeleko amwe elipi oo Jesus a li a taalela, eshi a li kombada yedu?

⁷ Eshi Jesus a li kombada yedu okwa li a dulika kuJehova moinima aishe, nonande osha li shidjuu okuninga ngaho. Jesus okwa li okaana ka wanenena, ndele nonande ovadali vaye kava li va wanenena, okwa li ha dulika kuvo. (Luk. 2:51) Eshi a li omunyasha, okwa li a pumbwa okukondjifa omafininiko oo a li taa di kuvamwe ovo tashi dulika va li va hala aha dulike kovadali vaye, ile aha kale omudiinini kuJehova. Eshi Jesus a li omukulunhu, okwa li e na okukondjifa Satana Ondiaboli, oo a li te mu yeleke, opo a nyone nokwa li e mu lombwela sha yukilila a efe po okukala omudiinini kuKalunga. (Mat. 4:​1-11) Satana okwa li a tokola okuningifa Jesus a nyone, opo aha dule okufuta ekulilo.

8. Omayeleko amwe vali elipi Jesus e lididimikila?

⁸ Pefimbo loukalele waye kombada yedu, Jesus okwa li e lididimikila vali omayeleko amwe. Ovatondi vaye ova li ve mu hepeka, nova kendabala oku mu dipaa. (Luk. 4:​28, 29; 13:31) Okwa li e na okulididimikila omaunghundi ovashikuli vaye. (Mark. 9:​33, 34) Eshi a li a tokolelwa efyo, okwa li a hepekwa nokushekwa. Okwa li mouyahame muhapu nokwa dipawa a fa omukolokoshi. (Heb. 12:​1-3) Okwe lididimikila  oshitukulwa shaxuuninwa sheyeleko laye, nopehe na eameno laJehova. b — Mat. 27:46.

9. Otu uditile ngahelipi eyambo laJesus? (1 Petrus 1:8)

⁹ Jesus okwa mona oixuna neenghono, opo a yandje ekulilo. Ngeenge hatu diladila komaliyambo aeshe oo Jesus e tu ningila, ohashi tu linyengifa tu kale tu mu hole neenghono. — Lesha 1 Petrus 1:8.

10. Ekulilo ola pula Jehova shi fike peni?

¹⁰ Eliyambo lilipi Jehova a ninga nehalo liwa, opo Jesus a yandje ekulilo? Jehova naJesus ove na ekwatafano lopofingo, olo hali kala pokati kaxe nomonamati. (Omayel. 8:30) Diladila kunghee Jehova a li e udite, eshi a li ta tale Jesus te lididimikile omayeleko mahapu kombada yedu. Oshi na okukala sha yehameka Jehova neenghono okutala Omona waye ta ungaungiwa naye nai, a ekelwashi nota mono oixuna.

11. Longifa oshihopaenenwa u ulike nghee Jehova a li e udite, eshi Jesus a dipawa.

¹¹ Omudali, oo a filwa okaana kaye, oku shii ouyahame oo hau etifwa konghalo oyo. Otu na eitavelo la kola menyumuko, ashike osho ihashi kufa po ouyahame oo hatu kala tu udite, ngeenge twa filwa umwe oo tu hole. Oshihopaenenwa eshi otashi tu kwafele tu ude ko nghee Jehova a li e udite, eshi a li ta tale Omona omuholike ta mono oixuna nokwa fya pokwenye, mo 33 O.P. c — Mat. 3:17.

12. Oshike hatu dulu okuninga moivike oyo tai tetekele Edimbuluko?

¹² Okudja paife fiyo opEdimbuluko, kendabala okukonakona shihapu kombinga yekulilo pekonakono loye lopaumwene, ile loukwaneumbo. Longifa Elongifwambo lokukonga Omauyelele mOishangomwa yEendombwedi daJehova, ile u longife oishangomwa imwe, oyo tai dulu oku ku kwafela u mone ouyelele muhapu u na sha nekulilo. d Shikula yo Elandulafano lelesho lOmbiibeli li na sha nEdimbuluko olo li li mokafo Onghalamwenyo yopaKriste noilonga yokuudifa — Okafo kokulongifwa pokwoongala. Mefiku olo lEdimbuluko, ino dimbwa okutala Eenghundafana de likalekelwa domushangwa wefiku. Ngeenge otwa longekidile omitima detu Edimbuluko, ohatu ka dula okukwafela vamwe va mone yo ouwa mulo. — Esra 7:10.

 KWAFELA VAMWE VA MONE OUWA

13. Onghatu yotete yokukwafela vamwe va mone ouwa pEdimbuluko oilipi?

¹³ Ongahelipi hatu dulu okukwafela vamwe va mone ouwa pEdimbuluko? Onghatu yotete, oku va shiva. Kakele kovanhu ovo hatu shakeneke alushe moukalele, otwa pumbwa okuninga omusholondodo wovanhu ovo twa hala okushiva. Mwa kwatelwa ovapambele vetu, ovanailonga pamwe nafye, ovanafikola vakwetu nosho yo vamwe. Nonande katu na oufo va wana vokushiva, ohatu dulu oku va tumina o-link paelektronika. Otashi dulika shi ke tu kumwife okumona ovo tava ka kala po. — Omuud. 11:6.

14. Yandja oshihopaenenwa shanghee okupa umwe okafo keshivo hake mu ningifa a kale po.

¹⁴ Ngeenge wa shivi umwe paumwene kEdimbuluko, ohashi mu ladipike a kale po. Efiku limwe, omumwameme, oo omushamane waye ehe fi Ondombwedi, okwa li a kumwa eshi omushamane waye e mu lombwela kutya naye ota i kEdimbuluko. Omolwashike sha li she mu kumwifa? Molwaashi luhapu monakudiwa okwa li he mu pula vaye naye, ndele ka li he shi ningi. Omolwashike a ya oshikando eshi? Omushamane okwa ti: “Onda li nda shivwa paumwene.” Okwa ti kutya omukulunhuongalo umwe womoshitukulwa, oo e shii, okwa li e mu pa okafo. Omushamane waye okwa li a ya pamwe naye kEdimbuluko omudo oo nomomido dihapu da ka shikula ko.

15. Oshike tu na okukaleka momadiladilo, ngeenge hatu shivi ovanhu kEdimbuluko?

¹⁵ Kaleka momadiladilo kutya ovanhu ovo to shivi otava ka kala ve na omapulo, unene tuu ngeenge osho oshikando shavo shotete okukala pokwoongala kwetu. Ohatu dulu okudiladila kombinga yomapulo oo tava dulu okupula, ndele hatu lilongekidile oku va nyamukula. (Kol. 4:6) Pashihopaenenwa, vamwe otashi dulika ve lipule kutya: ‘Oshike hashi ningwa poshiningwanima osho?’ ‘Ohashi kwata efimbo li fike peni?’ ‘Ondi na okudjala ngahelipi?’ ‘Onda pumbwa okufuta, opo ndi dule okukala po?’ ‘Mbela ohandi ka pumbwa okuumba ongalo?’ Ngeenge hatu shivi umwe kEdimbuluko, ohatu dulu oku mu pula kutya, “Ou na omapulo?,”  ndele hatu nyamukula omapulo aye. Ohatu dulu yo okulongifa ouvidio Kala ho dimbuluka efyo laJesus nosho yo Oshike hashi ningwa kOlupale lOuhamba?, opo tu kwafele omunhu oo a ude ko kutya okwoongala kwetu ohaku ningwa ngahelipi. Oshileshwa 28 membo Nghee to dulu okuhafela onghalamwenyo fiyo alushe! oshi na oitwa ihapu iwa oyo hatu dulu okulongifa, opo tu kwafele vamwe.

16. Ovo va kala po pEdimbuluko otashi dulika va kale ve na vali omapulo amwe elipi?

¹⁶ Konima eshi ovo va ulika ohokwe va kala po pEdimbuluko, otashi dulika va kale ve na omapulo a wedwa po. Otashi dulika va pule kutya omolwashike pehe na umwe oo a lya omungome, ile a nwa omaviinyu, ile kutya omolwashike vanini ovo ashike va lya. Otashi dulika yo va pule kutya ohatu dana lungapi Edimbuluko. Otashi dulika va hala okushiiva ngeenge Eendombwedi daJehova adishe ohadi ongala monghedi ya faafana. Nonande oitwa ihapu oya kundafanwa moshipopiwa shEdimbuluko, ovo vape otashi dulika tava ka pumbwa okuyelifilwa moule. Oshitukulwa shi li ko jw.org shi na oshipalanyole “Omolwashike Eendombwedi daJehova hadi dana Ouvalelo wOmwene monghedi ya yooloka ko kwaayo yomalongelokalunga amwe?” otashi dulu oku tu kwafela tu nyamukule omapulo avo. Otwa hala okuninga keshe osho hatu dulu komesho, pefimbo nokonima yEdimbuluko tu kwafele ovo “va halelela shili” okumona ouwa pEdimbuluko. — Oil. 13:48.

KWAFELA OVO INAVE LIPYAKIDILA VALI

17. Ongahelipi ovakulunhuongalo tava dulu okukwafela ovo inave lipyakidila vali? (Hesekiel 34:​12, 16)

¹⁷ Pefimbo lEdimbuluko, ongahelipi ovakulunhuongalo tava dulu okukwafela ovo inave lipyakidila vali? Va ulikila kutya ou na ko nasha navo. (Lesha Hesekiel 34:​12, 16.) Ofimbo Edimbuluko inali fika, kwatafana navahapu, ngaashi to dulu. Va lombwela kutya ou na ko nasha navo, nonokutya owa hala oku va kwafela monghedi keshe oyo to dulu. Va shiva ve uye kEdimbuluko. Ngeenge ove uya, va tambula nohamu. Konima yEdimbuluko, twikila okukwatafana novamwatate novamwameme ovo, noku va pa ekwafo olo va pumbwa, opo va alukile kuJehova. — 1 Pet. 2:25.

18. Ongahelipi atusheni hatu dulu okukwafela ovo inave lipyakidila vali? (Ovaroma 12:10)

 ¹⁸ Atusheni meongalo ohatu dulu okukwafela ovo inave lipyakidila vali, ovo ve uya kEdimbuluko. Ngahelipi mbela? Omokuungaunga navo nohole, nolukeno nonefimaneko. (Lesha Ovaroma 12:10.) Dimbuluka kutya osha pula ombuda kuvo okuuya kokwoongala kwa tya ngaho. Otashi dulika va li va tila kutya itava ka tambulwa ko nawa. e Onghee henuka okupula omapulo oo tae va fifa ohoni, ile okupopya oinima oyo tai va ehameke. (1 Tes. 5:11) Ovamwatate novamwameme ovo ove li ovaitaveli vakwetu. Otwa hafa okulongela vali Jehova pamwe navo. — Eps. 119:176; Oil. 20:35.

19. Omauwa elipi haa di mokudimbuluka efyo laJesus?

¹⁹ Otwa pandula eshi Jesus e tu lombwela tu dimbuluke efyo laye omudo keshe, notu shi shii kutya omolwashike sha fimanenena okuninga ngaho. Ngeenge otwa kala po pEdimbuluko, ohatu ka mona omauwa meenghedi dihapu nosho yo vakwetu. (Jes. 48:​17, 18) Ohole yetu yokuhola Jehova naJesus otai ka xwama. Ohatu ulike nghee twa pandula osho ve tu ningila. Ohatu pameke ekwatafano letu novaitaveli vakwetu. Ohatu dulu okukwafela vakwetu ve lihonge nghee navo tava dulu okuhafela omanangeko noupuna, oo haa etifwa kekulilo. Natu ningeni keshe osho hatu dulu, opo tu kale twe lilongekidila Edimbuluko lomudo ou, efiku olo la fimanenena momudo!