2-زەرتتەۋ ماقالاسى
19-ٵن ەسكە الۋ كەشى
جىلدىڭ ەڭ ماڭىزدى كۇنىنە دايىنسىز با؟
«مەنى ەسكە الۋ ٷشىن وسىلاي ىستەپ تۇرىڭدار» (لۇقا 22:19).
نەگىزگى وي
ەسكە الۋ كەشىن نەلىكتەن ەرەكشە باعالايتىنىمىزدى، وعان قالاي دايىندالا الاتىنىمىزدى جانە باسقالاردى وعان قالاي شاقىرا الاتىنىمىزدى تالقىلايىق.
1. نە سەبەپتى ەسكە الۋ كەشى — جىلدىڭ ەڭ ماڭىزدى كۇنى؟ (لۇقا 22:19، 20)
ەحوبانىڭ حالقى ٷشىن ٴماسىحتىڭ ٶلىمىن ەسكە الۋ كەشى — ەڭ ماڭىزدى كۇن. يسا وسى كۇندى «اتاپ وتىڭدەر» دەپ ناقتى بۇيىرىپ كەتكەن (لۇقا 22:19، 20 وقىڭىز). ٴبىز وسى كەشتى ەرەكشە قۋانىشپەن كۇتەمىز. نەلىكتەن؟ كەيبىر سەبەپتەرىن اتاپ وتەيىك.
2. ەسكە الۋ كەشىن اسىعا كۇتۋىمىزگە قانداي سەبەپتەر بار؟
2 ەسكە الۋ كەشىندە ٴبىز تولەمنىڭ قانشالىقتى باعالى ەكەنى تۋرالى ويلانىپ-تولعانامىز. يسانىڭ بەرگەن قۇرباندىعى ٷشىن قالاي العىس بىلدىرە الاتىنىمىزدى ەسكە الامىز (قور. 2-ح. 5:14، 15). سونداي-اق باۋىرلاستارمەن كورىسىپ، «ٶزارا جىگەرلەنەمىز» (ريم. 1:12). جىل سايىن بۇل كەشكە قاۋىمعا كەلمەي كەتكەن باۋىرلاستار دا كەلەدى. جىلى شىرايمەن قارسى العانىمىزدى كورىپ، كەيبىرى ٴتىپتى ەحوباعا قايتا ورالىپ جاتادى. قىزىعۋشىلىق بىلدىرگەندەر بولسا، بۇل كەشتەن زور اسەر الىپ، ٶمىر جولىنا اياق باسادى. راسىندا دا، ەسكە الۋ كەشى بولاتىن كۇن ٴبىز ٷشىن وتە ەرەكشە!
3. ەسكە الۋ كەشى قالاي بۇكىل الەمدىك باۋىرلاستىعىمىزدى بىرىكتىرەدى؟ (سۋرەتتى دە قاراڭىز.)
3 ويلاپ قاراساق، ەسكە الۋ كەشى دۇنيەجۇزىلىك باۋىرلاستىعىمىزدى دا بىرىكتىرەدى. قالايشا؟ كۇن ۇياسىنا باتا كەلە بۇكىل جەر شارى بويىنشا ەحوبا كۋاگەرلەرى باس قوسادى. ٴبارىمىز تۇگەل تولەمنىڭ اسىل قۇنى جايىندا ٴبىر بايانداما تىڭدايمىز. ەكى ماداق ٵنىن ايتامىز، راسىمدەردى قولدان-قولعا وتكىزەمىز، ٴتورت رەت ايتىلاتىن دۇعاعا ٴبارىمىز شىن جۇرەكتەن «اۋمين» دەيمىز. ٴبىر تاۋلىك ىشىندە بۇكىل جەر بەتىندەگى قاۋىمدار وسى ٴبىر ٴتارتىپتى ۇستانادى. ٴبارىمىز جۇدىرىقتاي جۇمىلىپ، ەحوبا مەن يسانىڭ قۇرمەتىنە جينالعانىمىزدى كورگەندە، ولار ەرەكشە شاتتاناتىنى ٴسوزسىز!
ەسكە الۋ كەشى دۇنيەجۇزىلىك باۋىرلاستىعىمىزدى بىرىكتىرەدى (3-ابزاستى قاراڭىز) f
4. بۇل ماقالادان نە بىلەمىز؟
4 وسى ماقالادا ٴبىز مىنا سۇراقتارعا جاۋاپ الامىز: ەسكە الۋ كەشىنە وي-سانامىز بەن جۇرەگىمىزدى قالاي دايىنداساق بولادى؟ وزگەلەر دە وسى كەشتىڭ يگىلىگىن كورۋ ٷشىن نە ىستەي الامىز؟ قاۋىمعا كەلمەي كەتكەن باۋىرلاستارعا قالاي كومەكتەسە الامىز؟ وسى سۇراقتاردىڭ جاۋابىن بىلە وتىرىپ، ٶزىمىزدى اتالمىش قاسيەتتى جيىنعا دايىندايمىز.
ەسكە الۋ كەشىنە جۇرەگىمىزدى دايىنداۋ
5. ا) تولەمنىڭ قۇندىلىعى جايىندا نەلىكتەن ويلانۋىمىز قاجەت؟ (ٴزابۇر 49:7، 8) ٵ) «يسا پايعامبار نە ٷشىن ٶلدى؟» دەگەن بەينەروليكتەن نە ٴبىلدىڭىز؟
5 جۇرەگىمىزدى ەسكە الۋ كەشىنە دايىنداۋ ٷشىن تولەمنىڭ قانشالىقتى قۇندى سي ەكەنىن ويلاعانىمىز وتە ماڭىزدى. ٴبىز ەشقاشان دا ٶز كۇشىمىزبەن كۇنا مەن ولىمنەن ازات بولا الماس ەدىك (ٴزابۇر 49:7، 8 وقىڭىز؛ «يسا پايعامبار نە ٷشىن ٶلدى؟» دەگەن بەينەروليكتى دە كورىڭىز a). سوندىقتان ەحوبا ٴبىز ٷشىن يسا جانىن قيادى دەپ شەشتى. بۇل قۇرباندىق ٷشىن ەحوبا دا، يسا دا وتە قىمبات قۇن تولەدى (ريم. 6:23). ولاردىڭ ٴبىز ٷشىن قانداي قۇرباندىققا بارعانى جايلى ويلانعان سايىن، تولەمگە ريزاشىلىعىمىز وسە بەرەدى. قازىر ٴبىز تولەم ٷشىن ەحوبا مەن يسانىڭ نە نارسەگە توزگەنىنە كىشكەنە توقتالىپ وتەمىز. ٴبىراق الدىمەن، تولەمنىڭ نە ەكەنىن ٴبىلىپ الايىق.
6. تولەم دەگەن نە جانە نەلىكتەن يساعا تولەم بەرۋ قاجەت بولدى؟
6 تولەم دەپ ادەتتە شىعىندى وتەۋ ٷشىن تولەنەتىن قۇندى ايتامىز. اۋەل باستا ادام اتا كەمەلدى بولىپ جاراتىلعان ەدى. ال كۇنا جاساعان سوڭ، ول ٶزىن دە، ۇرپاقتارىن دا ماڭگىلىك ومىردەن قۇر قالدىردى. ادام جوعالتقان كەمەلدى ٶمىردى قايتا ساتىپ الۋ ٷشىن يسا ٶزىنىڭ كەمەلدى ٶمىرىن قۇربان ەتتى. جەردە ٶمىر سۇرگەندە يسا «ەشبىر كۇنا جاساعان ەمەس، اۋزىنان جالعان ٴسوز دە شىققان ەمەس» (پەت. 1-ح. 2:22). كەمەلدى بولىپ ولگەندىكتەن، يسانىڭ تولەگەن قۇنى ادام اتا جوعالتقان ٶمىردىڭ قۇنىن ٴجۇز پايىز وتەدى (قور. 1-ح. 15:45؛ ٴتىم. 1-ح. 2:6).
7. جەردە بولعاندا يسا قالاي سىنالدى؟
7 جەردە جۇرگەندە قانشاما رەت سىنالسا دا، يسا كوكتەگى اكەسىنە مويىنسۇنىپ، ٴبىر ساتكە دە ادالدىعىنان تايماعان. مىسالى، ول كەمەلدى بالا بولسا دا، كەمەلسىز اتا-اناسىنا باعىنىپ، ايتقاندارىنان شىقپاي ٴجۇردى (لۇقا 2:51). ال جاسوسپىرىم شاعىندا بىرەۋلەر ونى اتا-اناسىنىڭ ٴتىلىن الماۋعا يا ەحوباعا ادال بولماۋعا يتەرمەلەگەن شىعار. ٴبىراق ول وعان دا توتەپ بەردى. ەسەيگەن شاعىندا وعان ٸبىلىس شايتاننىڭ ازعىرۋلارىنا توتەپ بەرۋگە تۋرا كەلدى، ٴتىپتى شايتان ونى اشىقتان-اشىق قۇدايدى ساتىپ كەتۋگە شاقىردى. سوندا دا يسا ادالدىعىنان ەش تايمادى (مات. 4:1—11). شايتان يسا تولەمنىڭ قۇنىن وتەي الماۋ ٷشىن بارىن سالىپ، وعان كۇنا جاساتقىسى كەلدى.
8. يسا تاعى قالاي سىنالدى؟
8 قىزمەتى بارىسىندا يسا ودان بەتەر سىنالدى. ادامدار وعان قارسى شىعىپ، ٴتىپتى ولتىرمەك بولدى (لۇقا 4:28، 29؛ 13:31). بۇعان قوسا، ول ٸزباسارلارىنىڭ كەمشىلىكتەرىنە ٴتوزدى (مار. 9:33، 34). سونداي-اق سوتتالعاندا جاۋلارى ونى ازاپتاپ، كەلەكە-مازاق ەتتى. ارتىنان ماسقارالايتىن ٶلىم جازاسىنا كەسىلىپ، ادام توزگىسىز ازاپپەن قينالىپ ٶلدى (ەۆر. 12:1—3). وعان وسى سىناقتىڭ اقىرعى ساتتەرىنە جالعىز توتەپ بەرۋگە تۋرا كەلدى. ەحوبا ونى قورعاپ قالمادى b (مات. 27:46).
9. يسانىڭ قۇرباندىعى ٴبىزدى قانداي سەزىمگە بولەيدى؟ (پەتىردىڭ 1-حاتى 1:8)
9 كورىپ وتىرعانىمىزداي، تولەم بەرۋ ٷشىن يسا تالاي ازاپتان ٶتتى. وسىنىڭ بارىنە ٴبىز ٷشىن توزگەنىن ويلاعاندا، يسانى جانىمىزعا جاقىن تارتىپ، جاقسى كورىپ كەتەمىز ەمەس پە؟! (پەتىردىڭ 1-حاتى 1:8 وقىڭىز).
10. تولەم قۇرباندىعى ەحوباعا وڭاي ٴتيدى مە؟
10 ال ەحوبا شە؟ تولەم قۇرباندىعى وعان قانشالىقتى قىمباتقا ٴتۇستى؟ ەحوبا مەن يسانىڭ ٴبىر-بىرىنە باۋىر باسقانى سونشا، الەمدەگى ەشقانداي اكە مەن ۇلدىڭ اراسى ونداي جاقىن ەمەس (ناق. س. 8:30). ەندەشە، ۇلىنىڭ سونشاما سىناقتان ٶتىپ جاتقانىنا قاراپ تۇرۋ ەحوباعا قانداي قيىن بولدى دەسەڭىزشى! يسانىڭ كورگەن ازابى مەن قورلىعى، ادامداردىڭ ودان باس تارتقانى ەحوبانىڭ جانىنا قاتتى باتقانى ٴسوزسىز.
11. يسا ولىمگە كەسىلگەندە ەحوبانىڭ قانداي كۇي كەشكەنىن كورسەتەتىن مىسال كەلتىرىڭىز.
11 بالاسىنان ايىرىلىپ، قايعىدان قۇسا بولعان كەز كەلگەن اتا-انا بۇنىڭ قانداي اۋىر قاسىرەت ەكەنىن جاقسى بىلەدى. قايتا تىرىلۋگە دەگەن سەنىمىمىز مىقتى بولسا دا، جاقىنىمىزدان ايىرىلعاندا، كەۋدەمىزدى زىلدەي مۇڭ باسادى. بۇل مىسالدان ب. ز. 33 جىلىنىڭ كوكتەمىندە ۇلى كوز الدىندا قورلىق كورىپ ولگەندە، ەحوبانىڭ قانداي كۇي كەشكەنىن تۇسىنە الامىز c (مات. 3:17).
12. ەسكە الۋ كەشى كەلگەنشە نە ىستەسەك بولادى؟
12 قازىردەن باستاپ ەسكە الۋ كەشىنە دەيىن جەكە زەرتتەۋىڭىزدە نە وتباسىلىق عيباداتتا تولەم جايلى جان-جاقتى قاراستىرىڭىز. «ەحوبا كۋاگەرلەرىنىڭ ىزدەنىس قۇرالى» نە باسقا دا ادەبيەتتەر سىزگە وسى تاقىرىپتى تەرەڭىرەك قازۋعا كومەكتەسەدى d. سونداي-اق «ماسىحشىلىك ٶمىرىمىز بەن قىزمەتىمىز» جۇمىس داپتەرىندەگى ەسكە الۋ كەشى قارساڭىندا وقىلاتىن تارماقتاردى قالدىرماي وقىپ وتىرىڭىز. ال ەسكە الۋ كەشى كۇنى ارنايى شىعارىلعان تاڭعى عيبادات باعدارلاماسىن مىندەتتى تۇردە كورىڭىز. وسى كەشكە ٶز جۇرەگىمىزدى بارىنشا دايىنداساق، باسقالارعا دا ەسكە الۋ كەشىنىڭ بار يگىلىگىن كورۋگە كومەكتەسە الامىز (ەزرا 7:10).
وزگەلەرگە كومەكتەسۋ
13. باسقالار دا ەسكە الۋ كەشىنىڭ يگىلىگىن كورۋ ٷشىن ٴبىرىنشى كەزەكتە نە ىستەيمىز؟
13 وزگەلەر دە ەسكە الۋ كەشىنىڭ يگىلىگىن كورۋ ٷشىن نە ىستەسەك بولادى؟ ٴبىرىنشى كەزەكتە، ٴبىز ولاردى وسى كەشكە شاقىرامىز. قىزمەتتە جولىققان ادامداردان بولەك، شاقىرۋعا بولاتىن باسقا دا ادامداردىڭ ٴتىزىمىن جاساساق بولادى. ماسەلەن، تۋىستار، ارىپتەستەر، سىنىپتاستار نە وزگەلەر. باسپا تۇرىندەگى شاقىرۋ قاعازى جەتكىلىكسىز بولسا، ولارعا ەلەكتروندى نۇسقاسىنىڭ سىلتەمەسىن جىبەرىڭىز. كىم ٴبىلسىن، بىرەۋى بولماسا بىرەۋى كەلىپ قالار (ۋاع. 11:6).
14. ادامعا شاقىرۋ قاعازىن جىبەرۋدىڭ ماڭىزدىلىعىن كورسەتەتىن مىسال كەلتىرىڭىز.
14 ادامدى ەسكە الۋ كەشىنە ارنايى شاقىرعاندا، ولار كەلۋگە اناعۇرلىم ىقىلاستى بولادى. مىسالى، ٴبىر ايەل باۋىرلاسىمىزدىڭ كۋاگەر ەمەس كۇيەۋىمەن بولعان جاعدايدى الايىق. بۇرىن ايەلى وعان قانشا رەت ايتسا دا، ول ەسكە الۋ كەشىنە بارۋعا كەلىسپەگەن. ٴبىراق ٴبىر كۇنى ول قۋانىپ كەلىپ، ايەلىنە: «مەن سەنىمەن ەسكە الۋ كەشىنە بارامىن»،— دەپ تاڭعالدىرادى. بۇل جولى ول نەگە كەلىستى ەكەن؟ «ماعان ارنايى شاقىرۋ قاعازىن بەردى»،— دەدى ول. سويتسە، ٴبىر تانىس اقساقال ونى ەسكە الۋ كەشىنە شاقىرعان ەكەن. سودان كەيىن بۇل كىسى كوپ جىل بويى ەسكە الۋ كەشىنە بارىپ ٴجۇردى.
15. ەسكە الۋ كەشىنە شاقىرعاندا نەنى ەسكەرگەن ٴجون؟
15 ادام ٴبىزدىڭ جيىندارىمىزعا ەشقاشان كەلىپ كورمەگەن بولسا، ٴبىراز سۇراقتارى تۋىنداۋى مۇمكىن. سوندىقتان ول نە دەپ سۇراۋى مۇمكىن ەكەنىن ويلانىپ، الدىن الا دايىندالىپ العانىمىز جاقسى (قول. 4:6). مىسالى، بىلاي دەپ سۇراۋى مۇمكىن: «ول كەشتە نە بولادى؟ قانشا ۋاقىتقا سوزىلادى؟ ول جاققا قالاي كيىنىپ بارۋ كەرەك؟ كىرۋ اقىلى ما؟ كەلگەندەردەن اقشا جينالا ما؟» سوندىقتان ادامدى شاقىرىپ جاتقاندا: «قانداي دا ٴبىر سۇراقتارىڭىز بار ما؟»— دەپ سۇراساق بولادى. سوسىن قويعان سۇراقتارىنا جاۋاپ بەرىڭىز. قاۋىم كەزدەسۋلەرى قالاي وتەتىنىن كورسەتۋ ٷشىن «يسا پايعامباردىڭ ولگەن كۇنىن ەسكە الۋ» جانە «پاتشالىق سارايىندا نە ٷشىن جينالامىز؟» دەگەن بەينەروليكتەرىمىزدى كورسەتسەڭىز بولادى. «ماڭگى باقي ٶمىردىڭ راقاتىن كورىڭىز!» كىتابىنىڭ 28-ساباعىنداعى ويلاردى دا ايتارسىز.
16. ەسكە الۋ كەشىنە بارعان سوڭ، ادامدا تاعى قانداي سۇراقتار تۋىنداۋى مۇمكىن؟
16 ەسكە الۋ كەشىنە بارعان سوڭ، قىزىعۋشىلىق بىلدىرگەن ادامداردا قوسىمشا سۇراقتار پايدا بولۋى مۇمكىن. ولار رامىزدەردەن نەگە از عانا ادام ٴدام تاتقانىن (نە ەشكىم ٴدام تاتپاعانىن) بىلگىسى كەلەر. «ەسكە الۋ كەشى قانشالىقتى ٴجيى اتاپ وتىلەدى؟ ەحوبا كۋاگەرلەرىنىڭ جيىندارىنىڭ بارلىعى وسىلاي وتە مە؟» دەپ تە سۇراۋى مۇمكىن. بۇل سۇراقتاردىڭ كوبىسى ەسكە الۋ كەشىندەگى باياندامادا تالقىلانىپ كەتكەنىمەن، جاڭادان كەلگەندەرگە كوبىرەك ٴتۇسىندىرۋ كەرەك بولار. jw.org تور بەكەتىندەگى «نەگە ەحوبا كۋاگەرلەرى يەمىزدىڭ كەشكى اسىن باسقا دىندەردەن وزگەشە اتاپ وتەدى؟» دەگەن ماقالا وسى تەكتەس سۇراقتارعا جاۋاپ بەرۋگە كومەكتەسەدى. «ىڭعاي تانىتقان» ادامدار وسى كەشتىڭ بار يگىلىگىن كورۋ ٷشىن ەسكە الۋ كەشىنە دەيىن، ونىڭ بارىسىندا جانە كەيىن قولىمىزدان كەلگەننىڭ ٴبارىن جاسايىق (ەل. ٸس. 13:48).
قاۋىمنان قول ٷزىپ قالعان باۋىرلاستارعا كومەكتەسۋ
17. قاۋىمعا كەلمەي كەتكەن باۋىرلاستارعا اقساقالدار قالاي كومەكتەسە الادى؟ (ەزەكيەل 34:12، 16)
17 قىمباتتى اقساقالدار، ەسكە الۋ كەشىنىڭ قارساڭىندا قاۋىمعا كەلمەي كەتكەن باۋىرلاستارعا قالاي كومەكتەسسەڭىزدەر بولادى؟ ولارعا سۇيىسپەنشىلىكپەن كوڭىل ٴبولىڭىز (ەزەكيەل 34:12، 16 وقىڭىز). ەسكە الۋ كەشىنە دەيىن بارىنشا كوپ باۋىرلاسپەن حابارلاسۋعا تىرىسىڭىز. ولاردىڭ قامىن ويلايتىنىڭىزدى جانە كەز كەلگەن كومەكتى ۇسىنۋعا دايىن ەكەنىڭىزدى ايتىڭىز. ەسكە الۋ كەشىنە شاقىرىڭىز. كەلسە، جىلى قارسى الىڭىز. ەسكە الۋ كەشىنەن كەيىن وسى اياۋلى باۋىرلاستارىمىزبەن حابارلاسىپ تۇرىڭىز ٵرى ەحوباعا قايتا ورالۋى ٷشىن رۋحاني جاعىنان بارىنشا كومەكتەسىڭىز (پەت. 1-ح. 2:25).
18. قاۋىمعا كەلمەي كەتكەن باۋىرلاستارعا ٵربىرىمىز قالاي كومەكتەسە الامىز؟ (ريمدىكتەرگە 12:10)
18 قاۋىمعا كەلمەي كەتكەن باۋىرلاستار ەسكە الۋ كەشىنە كەلگەندە، ولارعا بۇكىل قاۋىم بولىپ كومەكتەسە الامىز. قالاي؟ سۇيىسپەنشىلىك، مەيىرىمدىلىك پەن قۇرمەت تانىتۋىمىزبەن (ريمدىكتەرگە 12:10 وقىڭىز). بۇل باۋىرلاستارىمىز ونسىز دا قاۋىمعا تارتىنشاقتاپ، جاتىرقاپ كەلگەن شىعار. «باۋىرلاستار ماعان نە دەيدى ەكەن؟» دەپ قورقۋى دا مۇمكىن e. سوندىقتان ولاردى ىڭعايسىز جاعدايعا قالدىراتىن سۇراقتار قويۋدان نە كوڭىلىنە تيەتىن سوزدەر ايتۋدان اۋلاق بولايىق (سال. 1-ح. 5:11). ولار ٴبىزدىڭ ٴبىر سەنىمدەگى باۋىرلاستارىمىز. ولارمەن قايتادان يىق تىرەسە عيبادات ەتۋگە قۋانىشتىمىز! (ٴزاب. 119:176؛ ەل. ٸس. 20:35).
19. يسانىڭ ٶلىمىن ەسكە الۋدىڭ پايداسى قانداي؟
19 يسا ٶزىنىڭ ٶلىمىن ەسكە الۋ كەشىن جىل سايىن اتاپ وتىڭدەر دەپ بۇيىرعانى قانداي دۇرىس بولعان! ٴبىز بۇل جيىننىڭ قانشالىقتى ماڭىزدى ەكەنىن تۇسىنەمىز. بۇل كەشتىڭ وزىمىزگە دە، وزگەلەرگە دە تيگىزەر پايداسى وراسان (يشايا 48:17، 18). ەحوبا مەن يساعا دەگەن سۇيىسپەنشىلىگىمىزدى تەرەڭدەتە تۇسەمىز. ولاردىڭ بىزگە جاساعاندارى ٷشىن العىس بىلدىرە الامىز. باۋىرلاستارمەن ارامىز جاقىنداي تۇسەدى. ال وزگەلەرگە تولەمنىڭ ارقاسىندا ولار قانداي باتالارعا يە بولا الاتىنىن ايتامىز. ولاي بولسا، بارىمىزدى سالىپ، وسى جىلدىڭ ەڭ باستى كۇنى — ەسكە الۋ كەشىنە دايىن بولايىق!
ٴبىز قالاي...
-
ەسكە الۋ كەشىنە جۇرەگىمىزدى دايىنداي الامىز؟
-
وزگەلەرگە وسى كەشتىڭ يگىلىگىن كورۋگە كومەكتەسە الامىز؟
-
قاۋىمنان قول ٷزىپ قالعان باۋىرلاستارعا كومەكتەسە الامىز؟
18-ٵن تولەمگە ريزاشىلىق
a وسى ماقالادا كەلتىرىلگەن ماقالالار مەن بەينەروليكتەردى jw.org تور بەكەتىندەگى ىزدەۋ جولاعىنا اتاۋىن جازىپ تابا الاسىز.
b 2021 جىل، ٴساۋىر ايىنىڭ «كۇزەت مۇناراسىنداعى» «وقىرمان ساۋالدارىن» قاراڭىز.
c «ەحوباعا جاقىندا» كىتابىنىڭ 23-تاراۋ، 8، 9-ابزاستارىن قاراڭىز.
d « زەرتتەۋگە ۇسىنىستار» قورشاۋىن قاراڭىز.
e سۋرەتتەردى جانە « قاۋىمداعىلار قالاي قارسى الدى؟» دەگەن قورشاۋدى قاراڭىز. ۋاعىزداماي كەتكەن باۋىرلاس پاتشالىق سارايىنا كىرۋگە تارتىنشاقتاپ تۇرسا دا، بار باتىلدىعىن جيناپ كىرەدى. ول ٶزىن جىلى قارسى العان باۋىرلاستارمەن اڭگىمەلەسىپ وتىر.
f سۋرەتتەر سيپاتتاماسى: الەمنىڭ ٴبىر بۇرىشىندا ەحوبانىڭ حالقى ەسكە الۋ كەشىن اتاپ ٶتىپ جاتسا، وزگە بۇرىشىنداعى باۋىرلاستار وعان دايىندالىپ جاتىر.
