1. Sooq eqqaaniaaneq ukiup ingerlanerani ullut pingaar­nersaraat? (Lukkarsi 22:19, 20)

 JIISUSIP toquneranik eqqaaniaaneq tassaavoq Jehovap innuttaanut ullut pingaar­nersaat. Tassami Jiisusip ilinniar­titaminut nalliut­torsiutigeq­qullugu peqqussutituaraa. (Lukkarsi 22:19, 20 atuakkit). Eqqaaniaanissap qilanaarinissaanut arlalinnik pissutis­saqarpugut. Taakkua ilaat sammeriartigit.

2. Eqqaaniaanissap qilanaarinissaanut sunik pissutis­saqarpugut?

² Eqqaaniaanitsinni utertitsissutip naleqangaarnera eqqaaqqit­tarparput. Eqqaasin­neqaqqit­tarpugut qanoq Jiisusip pilliutaanik qujamasuutigin­ninnerput ersersis­sinnaagipput. (Kor 2. 5:14, 15) Aamma qatanngutigullu qiimmas­saqatigiin­nissamik periarfis­saqartarpugut. (Rom 1:12) Ukiut tamaasa qatannguterpassuit unittooqqasut eqqaaniaaqataasarput. Eqqaaniaanermi asannittumik tikilluaq­quneqarnertik ilaasa Jehovamut uternis­saminnut killinneqaatigisarpaat. Aamma soqutigin­nittorpassuit tusakkatik takusatillu nuannaralugit Biibilimik misissuerusulertarput. Tupinnanngilaq eqqaaniaaneq uagutsinnut immikkuul­larissuummat!

3. Nunarsuaq tamakkerlugu qanoq eqqaaniaanerup ataasius­suseqalersit­tarpaatigut? (Aamma assiliaq takuuk).

³ Eqqaaniaaneq aamma qilanaarisarparput nalunngin­natsigu ulloq taanna nunarsuaq tamakkerlugu qatanngutigut ataasioqatigisarlutigit. Jehovap Nalunaajaasui nunani assigiin­ngitsuni seqerngup tarrikkiar­tulernerani katersuuttarput. Tamatta utertitsissutip pingaaruteqassusia pillugu oqalugiaat tusarnaar­tarparput. Unnersiutigin­nissutinik erinarsor­tarpugut, iffiaq-qaqortoq viinnilu ingerlaar­tinneqartarput, qinnutinullu  sisamanut qamannga pisumik ameneqataasarpugut. Akunnerit 24-t iluanni ilagiit tamarmik assigiimmik periuseqarlutik eqqaaniaasarput. Takorlooruk Jehovamut Jiisusimullu taamatut ataasius­suseqarluta ataqqinarsisitsigaangatta qanoq nuannaar­tigisarsimassasut.

4. Allaaserisami matumani suut sammissavagut?

⁴ Allaaserisami matumani apeqqutit uku sammissavagut: Eqqaaniaanissamut uummatitsigut qanoq piareersarsin­naavugut? Allat eqqaaniaaneq pissarsif­figilluas­sappassuk qanoq ikiorsin­naavagut? Aamma uppeqatigut unittooqqasut qanoq ikiorsin­naavagut? Apeqqutit taakku akissutis­sarsigutsigit nalliut­torsior­nissamut pingaaruteqangaartumut tamatumunnga piareersimassaagut.

EQQAANIAANISSAMUT UUMMATITSIGUT QANOQ PIAREERSARSIN­NAAVUGUT?

5. (a) Sooq utertitsissutip naleqangaarnera eqqarsaatigeq­qissaar­tariaqarparput? (Tussiaat 49:8, 9) (b) Video Sooq Jiisusi toqua? sumik ilinniarfigaajuk?

⁵ Eqqaaniaanissamut uummatitsigut piareersar­nitsinni pingaar­nerpaat ilagaat Jiisusip Kristusip utertitsis­sutitut pilliutaata naleqangaas­susianik eqqarsaatigin­neqqissaarneq. Nammineerluta ajortimit toqumillu aniguisin­naanngilagut. (Tussiaat 49:8, 9 atuakkit; aamma video Sooq Jiisusi toqua? isiginnaaruk). a Taamaattumik Jehovap annaakkumalluta Jiisusi nunarsualiartippaa. Jehova Jiisusilu pilliuteqangaarput. (Rom 6:23) Uagut pilluta iliuuseqangaarsimanerat eqqarsaatiginerujar­tortillugu utertitsissut qujamasuutiginerujar­tussavarput. Jehovap Jiisusillu uagut pilluta iliuuserisaasa imaannaan­ngitsut ilaannaat sammissavagut. Siullertulli utertitsissutip qanoq isumaqarnera sammeriartigu.

6. Utertitsissut qanoq isumaqarpa?

⁶ Utertitsissut akiliutigalugu suna utertillugu pisiarineqarami? Inuk siulleq Adami pinngor­titaagami naammal­luinnartuuvoq. Ajortuliorami nammineq kinguaavisalu naassaan­ngitsumik inuunis­saraluartik annaavaat. Adamip annaasaanik utertitsiumalluni Jiisusip inuunini naammal­luinnartoq pilliutigivaa. Jiisusip nunarsuarmiitilluni inuunini tamaat “ajortuliornanilu salluliorneq ajorpoq”. (Pet 1. 2:22) Jiisusi toqugami naammal­luinnartuuvoq, soorlu Adami ajortuliun­nginnermini naammal­luinnar­tuusimasoq. Taamaattumik inuunini pilliutigigamiuk Adamip annaasimasaata nalinga akilerpaa. – Kor 1. 15:45; Tim 1. 2:6.

7. Nunarsuarmiitilluni Jiisusip misilin­neqaataasa ilaat suuppat?

⁷ Jiisusi nunarsuarmiitilluni misilin­neqaqat­taaraluarluni Ataataminut qilammiusumut naalattuarpoq. Jiisusip naammal­luinnartup meeraalluni angajoqqaani naammal­luinnan­ngitsut naalattuarpai. (Luk 2:51) Inuusut­tuaraalluni angajoq­qaaminut naalanngin­nissamut Jehovamullu ilumoorfigin­ninngin­nissamut allanit tatineqar­tarsimas­sagunarpoq. Aamma inersimasuulluni Saatanimit Diaavulumit usserniar­neqarami Guutimut ilumoorfigin­ninnera sakkortuumik saassun­neqarpoq. (Mat 4:1-11) Utertitsis­sutitut akiliutissaq akileqqunagu Saatanip Jiisusi ajortulior­tinniarsaraa.

8. Jiisusi aamma sunik allanik unamminiagaqarpa?

⁸ Nunami kiffartor­nermini aamma allanik unamminiagaqarpoq. Malersugaallunilu toqunniar­neqaraluarpoq. (Luk 4:28, 29; 13:31) Ilinniartitami kukkusarneri Jiisusip naammagalugit atortariaqarpai. (Mak 9:33, 34) Toqumut eqqartuun­neqarami naalliutsitaallunilu illaruaatigineqarpoq. Taava anniangaarluni  pinerlut­tuliortutut toqutaavoq. (Hebr 12:1-3) Misilin­neqarnermi annikil­liornerpaaf­fimmini Jehovamit sernissor­neqarnani pinertusaar­tariaqarpoq. b – Mat 27:46.

9. Jiisusip pilliutaa eqqarsaatigigaangatsigu qanoq misigisarpugut? (Petrusimit 1. 1:8)

⁹ Annaanniarluta Jiisusi naalliungaarpoq. Uagut pilluta pilliuteqangaarsimanera eqqarsaatigigaangatsigu asanninnermik ulikkaar­tarpugut. – Petrusimit 1. 1:8 atuaruk.

10. Utertitsissut Jehovamut qanoq akisutigaa?

¹⁰ Utertitsissut akilerneqarsin­naaqqullugu Jehova qanoq pilliuteqartigaa? Jehovap Jiisusillu attaveqatigiinnerat erneriit attaveqatigiin­nerannit allanit tamanit nallernis­saqanngilaq. (Uss 8:30) Takorlooriaruk Jiisusi nunarsuarmiitilluni misilin­neqaqat­taarnera takullugu Jehova qanoq misigisimas­sanersoq. Ajortumik pineqarnera, soorlu ajattor­neqarnera naalliutsitaaneralu, qularnan­ngitsumik qamuuna Jehovap anniaatigisimassavaa.

11. Jiisusi toqutaammat Jehova qanoq misigisimas­sanersoq oqaluttuariuk.

¹¹ Angajoqqaat meeqqaminnik toqusoorsimasut nalunngilaat tamanna qanoq alianar­tigisoq. Toqusut makititaanissaat upperil­luinnarparput, taamaak­kaluartorli asasamik toqukkut annaasaqarnerup annernartua peersis­sinnaanngilaa. Ukiumi 33-mi upernaakkut ernini naalliulluni toqummat Jehova qanoq misigisimas­sanersoq paasisin­naanerulerparput. c – Mat 3:17.

12. Eqqaaniaanissamut sapaatit-akunnialui sioqqullugit qanoq iliorsin­naavugut?

¹² Maannamiit eqqaaniaanissap tungaanut utertitsissut pillugu atuaqqis­saarnerulerlutil­luunniit ilaqutariittut atuaqqis­saaqatigiinnermi misissuinerusin­naavisi? Utertitsissut pillugu sukumiinerusumik paasisaqar­niarninni Jehovap Nalunaajaasuisa ujarliutaat imaluunniit Biibilimik misissueq­qissaarutit allat atukkit. d Aamma eqqaaniaanermut atatillugu Biibilimi atuagassanut pilersaarusiaq Kristumiutut inuunerput kiffartor­nerpullu – Najoqqutassaq-miittoq maleruaq­qissaaruk. Aamma ullormi eqqaaniaaf­fissami immikkut ittumik Biibilimik eqqartuinermik isiginnaagassiap isiginnaarnissaa eqqaamajuk. Eqqaaniaanissamut uummatitsigut  piareersarluarutta allat ikiorsin­naassavagut eqqaaniaaneq aamma taakkununnga pissarsif­fiulluarsin­naaqqullugu. – Ezra 7:10.

ALLAT IKIUKKIT

13. Eqqaaniaaneq allanut iluaqutaasin­naaqqullugu qanoq ilioqqaassaagut?

¹³ Eqqaaniaaneq allanut iluaqutaasin­naaqqullugu qanoq ikiorsin­naavagut? Soorunami qaaqquseq­qaassaagut. Oqaluus­sinermi naapitatta saniatigut allat qaaqqusin­naasagut eqqarsaatigisin­naavagut. Tassaasin­naapput ilaquttagut, suleqatigut, atuaqatigut allallu. Qaaqqusissutit nungukkaluarpataluunniit linkimik nassius­sisinnaavugut. Aggertut qassiunerat immaqa tupaallaatigis­savarput. – Oqal 11:6.

14. Ilisarisimasamik qaaqqusinerup qanoq kinguneqarsin­naaneranik assersuuteqarit.

¹⁴ Ilisarisimasamik qaaqqusineq kinguneqarluarsinnaavoq. Ullut ilaanni qatanngutip arnap uimi Nalunaajaasuun­ngitsup oqarfigimmani eqqaaniaanermut ilaaniarluni tupaallaqaaq. Siornatigummi arlaleriarluni qaaqqusar­nikuugaluaramiuk, ilaanngisaan­nartorli. Sooq massakkut ilaarusuppa? Oqarpoq utoqqaanertamit ilisarisimasaminit qaaqqusissummik tunineqarsimalluni. Uiusoq ukioq taanna kingornatigullu ukiorpassuarni eqqaaniaanermut najuuttalerpoq.

15. Eqqaaniaanermut qaaqqusinitsinni suna eqqaamas­savarput?

¹⁵ Eqqaamajuk qaaqqusagut, pingaartumik ataatsimiin­nitsinnut najuunnikuun­ngisaannartut, apeqqutis­saqarsin­naammata. Apeqqutigisin­naasaat eqqarsaatigisin­naavagut akissutissallu piareersarlugit. Assersuutigalugu ilaasa uku paasiumasin­naavaat: “Susoqassava? Qanoq sivisutigissava? Suut atissavakka? Iserneq akeqarpa? Aningaasanik katersuiniaasoqartarpa?” Qaaqqusinermi qaaqqusarput aperisin­naavarput apeqqutis­saqarnersoq, apeqqutigisaalu akillugit. Aamma ataatsimiinnigut qanoq ingerlasarnersut paasitin­niarlugu videut Jiisusip toquneranik eqqaaniaaqataagit aamma Naalagaaf­filersaarfimmi susoqartarpa?  takutis­sinnaavagut. Aamma atuakkami Naassaan­ngitsumik pilluarsin­naavutit!-mi ilinniagassaq 28 isumassarsiorfigisin­naavarput.

16. Eqqaaniaanermi najuuttut sunik allanik aamma apeqqutis­saqarsin­naappat?

¹⁶ Eqqaaniaaneq naappat soqutigin­nilerlaat allanik apeqqutis­saqarsin­naapput. Immaqa eqqarsaatigivaat sooq assersuutinik ilangiisoqan­ngitsoq imaluunniit sooq ikittuinnaat kisimik ilangiinersut. Immaqa aamma eqqarsaatigivaat ukiumut qasseriarluta eqqaaniaasar­nersugut. Immaqa aamma paaserusuppaat Jehovap Nalunaajaasuisa ataatsimiinneri tamarmik assingusumik ingerlariaaseqarnersut. Paaserusutaasa ilarpassui eqqaaniaanermi oqalugiaammi eqqaaneqaraluartut suli sukumiinerusumik paasisaqarusus­sinnaapput. Apeqqutaasa ilaat akissutis­sarsiumallugit allaaserisaq “Sooq Jehovap Nalunaajaasuisa Naalakkap unnukkorsior­titsinera upperisarsioqatigiinnit allanit allaanerusumik nallius­sisarpaat?” jw.org-miittoq iluaqutigisin­naavarput. Eqqaaniaaneq ‘eqqortumik pissutiginiagaqartunut’ pissarsif­fiulluarsin­naaqqullugu eqqaaniaanerup siorna, nalaani kingornalu sapinngisatsinnik taakku ikiorusuppagut. – ApS 13:48.

UNITTOOQQASUT IKIUKKIT

17. Utoqqaanertat unittooq­qasunik qanoq ikiuisin­naappat? (Ezekieli 34:12, 16)

¹⁷ Eqqaaniaaneq sioqqullugu eqqaaniaanerullu kingorna utoqqaanertat unittooq­qasunik qanoq ikiuisin­naappat? Asannittumik isumassuinermikkut. (Ezekieli 34:12, 16 atuakkit). Utoqqaaner­taasusi, eqqaaniaanissaq sioqqullugu sapinngisassinnik amerlasuut attaviginiarsigit. Asaneqartutut misigitissigit. Paasitis­sigillu arlaannik ikiugas­saappata ikiorumallugit. Eqqaaniaanissamut taakku qaaqqusigit, najuuppatalu qamannga pisumik tikilluaq­qusigit. Eqqaaniaanerup kingorna qatanngutit asanartut taakku attavigiuarsigit. Jehovamullu utersin­naaqqullugit anersaakkut pisariaqar­titaannik ikiorsigit. – Pet 1. 2:25.

18. Tamatta unittooq­qasunik qanoq ikiuisin­naavugut? (Romamiut 12:10)

 ¹⁸ Ilagiin­niittuusugut tamatta unittooq­qasunik eqqaaniaanermi najuuttunik ikiuisin­naavugut. Qanoq? Asannittumik, inussiar­nersumik ataqqin­nittumillu pinerisigut. (Romamiut 12:10 atuaruk). Eqqaamatigu asasatta taakkua ataatsimiinnermut najuunnissaq sapernar­tissimasin­naammassuk. Immaqa unittooqqasup ernumagaa ilagiin­niittut qanoq oqarnissaat. e Taamaattumik ittuual­laatigisin­naasaanik aperinaveersaaruk ajuallaatigisin­naasaanillu oqaaseqar­naveersaarit. (Tes 1. 5:11) Qatanngutit unittooqqasut uppeqatigaagut. Guutisioqatigeq­qileratsigit nuannaarutigaarput! – Tuss 119:176; ApS 20:35.

19. Jiisusip toquneranik eqqaaniaaneq qanoq iluaqutis­sartaqarpa?

¹⁹ Qujamasuutigaarput Jiisusip toqunini ukiut tamaasa eqqaaniar­taqqullugu peqqusimam­matigut, tamatumalu pingaaruteqassusia paasivarput. Eqqaaniaaqataasarnerput uagut nammineq assigiin­ngitsorpas­suartigut iluaqutigisarparput. Aamma allat iluaqutigisarpaat. (Es 48:17, 18) Jehova Jiisusilu asanerujar­tuinnar­tarpagut. Uagut pilluta iliuuserisimasaannut qujamasunnerput ersersit­tarparput. Uppeqatitsinnut qaninneruler­tarpugut. Aamma utertitsissutip pilluaq­qussutis­sartaanik nuannaarutigin­nissinnaaq­qullugit allat ikiorsin­naavagut. Qanortoq ukioq manna eqqaaniaanermut ukiup ingerlanerani ullut pingaar­nersaannut sapinngisatsinnik tamatta piareersarluarisa!