1. Нава саледа Биранина мьрьна Иса чьрʹа рʹожа лапә фәрз ә? (Луԛа 22:19, 20)

 БОНА хьзмәткʹаред Йаһоԝа, Биранина Мьрьна Иса рʹожа лапә фәрз ә, йа тʹәмамийа сале. Иса тʹәми да шагьртед хԝә, кӧ тʹәне ве рʹожа мәхсус кʹьфш кьн (Бьхунә Луԛа 22:19, 20). Әм гәләк һивийа Евара Биранине нә. Гәло чьрʹа? Ԝәрә әм дина хԝә бьдьнә чәнд мәʹнийа.

2. Әм чьрʹа һивийа Евара Биранине нә?

² Евара Биранине али мә дькә, ԝәки әм дәрһәԛа ԛимәта ԛӧрбана Иса кʹур бьфькьрьн у рʹазибуна хԝә бона ве йәке бьдьнә кʹьфше (2 Корьнтʹи 5:14, 15). Ӧса жи, Биранин мәщаләкә баш ә, кӧ «әм дьл бьдьн бәр һәв» (Рʹомайи 1:12). Һәр сал гәләк хушк-бьред нәактиф, демәк йед кӧ ида найенә щьвина у тʹәви щьвате хьзмәт накьн, тенә сәр Евара Биранине. Бь сайа дьлгәрмийа щьвате, һьнәка жь ԝан сафи кьрьнә вәгәрʹьн бал Йаһоԝа. Сәр гәләк мәрьвед кӧ тенә сәр Евара Биранине, һʹӧкӧм дькә әв йәк, чь кӧ әԝана ԝедәре дьвиньн у дьбьһен, у ләма жи сафи дькьн Кʹьтеба Пироз һин бьн. Бе шьк, Евара Биранине бона мә гәләк мәхсус ә у шабунәкә мәзьн мәрʹа тинә!

3. Евара Биранине йәктийа мә ча дьһа ԛәԝи дькә? (Бьньһерʹә ӧса жи шькьл.)

³ Ӧса жи бьфькьрьн, кӧ Евара Биранине ча йәктийа мә дьһа ԛәԝи дькә. Чахе рʹо дьчә ава, Шәʹдед Йаһоԝа сәр тʹәмамийа дьнйайе тʹәвайи тʹоп дьбьн. Әм гӧһ дьдьнә готара дәрһәԛа фәрзбуна ԛӧрбана Иса. Әм тʹәвайи дӧ кʹьлама дьстьрен, нан у шәраве дәрбази һәв дькьн у хьлазийа һәр чар дӧа, бь дьл у щан дьбежьн «амин». Нава 24 сьһʹәтада, һʹәму щьватед сәр тʹәмамийа дьнйайе хут ве  бәрнаме дәрбаз дькьн. Бьдьнә бәр чʹәʹве хԝә, кӧ Йаһоԝа у Иса чьԛас ша дьбьн, гава әм сәр Евара Биранине тʹәвайи пәсьне ԝан дьдьн!

4. Ве готареда әме чь шеԝьр кьн?

⁴ Ве готареда, әме щабед ван пьрса пебьһʹәсьн: Әм ча дькарьн дьле хԝә бона Евара Биранине һазьр кьн? Әм ча дькарьн али кәсед дьн бькьн, ԝәки әԝана жи кʹаре бьстиньн? У әм ча дькарьн али хушк-бьред нәактиф бькьн? Щабед ван пьрса ԝе али мә бькьн, ԝәки әм бона ве рʹожа пироз һазьр бьн.

ӘМ ЧА ДЬКАРЬН ДЬЛЕ ХԜӘ БОНА ЕВАРА БИРАНИНЕ ҺАЗЬР КЬН?

5. (а) Чьрʹа әм гәрәке дәрһәԛа ԛимәта кʹьрʹине кʹур бьфькьрьн? (Зәбур 49:7, 8) (б) Тӧ чь һин буйи жь видеойа Чьма Иса Мьр?

⁵ Сәва кӧ әм дьле хԝә бона Евара Биранине һазьр кьн, йа лапә фәрз әв ә, кӧ дәрһәԛа ԛимәта ԛӧрбана Иса кʹур бьфькьрьн. Тʹәне бь сайа кʹьрʹине мәрьв дькарьн жь гӧнә у мьрьне хьлаз бьн (Бьхунә Зәбур 49:7, 8 ӧса жи бьньһерʹә видео Чьма Иса Мьр?). a Ләма жи, Йаһоԝа кӧрʹе хԝә Иса шандә сәр әʹрде, ԝәки әԝ әʹмьре хԝә бона мә бәрва бьдә (Рʹомайи 6:23). Әм чьԛас дәрһәԛа ве ԛӧрбана ԛимәт бьфькьрьн, һаԛас һе зедә әме ве йәке ԛимәт кьн. Ләма жи әме дина хԝә бьдьне, кӧ чьрʹа бона Йаһоԝа у Иса һеса нибу ве ԛӧрбане бьдьн. Паше, әме бьвиньн кӧ чьрʹа лазьм бу, ԝәки Иса әʹмьре хԝә ча ԛӧрбан бәрва бьдә.

6. Кʹьрʹин чь те һʹәсабе?

⁶ Кʹьрʹин әв һәйә ԛимәт, кʹижан кӧ те дайине, ԝәки тьштәки пашда вәгәрʹиньн. Чахе мәрьве пешьн Адәм һатә әʹфьрандьне, әԝ беԛьсур бу. Гава әԝи гӧнә кьр, әԝи мәщала жийина һʹәта-һʹәтайе ӧнда кьр, нә тʹәне бона хԝә, ле бона һʹәму зарʹед хԝә жи. Иса Мәсиһ һатә сәр әʹрде у әʹмьре хԝә ча ԛӧрбан бәрва да, ԝәки тьште ӧндабуйи диса бькʹьрʹә. Чахе Иса сәр әʹрде бу, «әԝи гӧнә нәкьр у заре ԝида һʹьләкʹари тʹӧнәбу» (1 Пәтрус 2:22). Иса беԛьсур бу, ләма жи ԛимәта әʹмьре ԝи у ԛимәта әʹмьре кӧ Адәм ӧнда кьрьбу, ԝәк һәв бун (1 Корьнтʹи 15:45; 1 Тимотʹейо 2:6).

7. Иса рʹасти чь щерʹьбандьна һат?

⁷ Гава Иса сәр әʹрде бу, әԝ гәләк щара һатә щерʹьбандьне. Диса жи, әԝи һәртʹьм гӧһ дьда Баве хԝәйи әʹзмана. Рʹаст ә Иса беԛьсур бу, ле диса жи чахе әԝ бьчʹук бу, әԝи һәртʹьм гӧһ дьда де-баве хԝәйи ԛьсурдар (Луԛа 2:51). Гава Иса щаһьл бу, дьбәкә һьнә мәрьва зоре ԝи дькьрьн, ԝәки әԝ Йаһоԝарʹа амьн нәминә, йан жи гӧрʹа де-баве хԝә нәкә. Ле әԝ тʹӧ щар нәдькʹәт бәр байе ԝан. У чахе әԝ бу мәрьвәки гьһишти у рʹасти щерʹьбандьнед Мире-щьна һат, әԝ Йаһоԝарʹа амьн ма (Мәтта 4:1-11). Мире-щьна гәләк дьхԝәст ԝәки Иса гӧнә бькә, кӧ нькарьбә әʹмьре хԝә ча ԛӧрбан бәрва бьдә.

8. Лазьм бу кӧ Иса һьмбәри чь сәбьр кә?

⁸ Гава Иса сәр әʹрде бу, әԝ рʹасти гәләк чәтьнайед дьн жи һат. Мәсәлә, дьжмьнед ԝи пәй ԝи дькʹәтьн у дьхԝәстьн ԝи бькӧжьн (Луԛа 4:28, 29; 13:31). Әԝи гәрәке һьмбәри кемасийед шагьртед хԝә сәбьр кьра (Маркос 9:33, 34). Чахе әԝ бәр диԝане дьсәкьни, мәрьва бӧхдан давитьне у ԛәрфед хԝә ԝи дькьрьн. Паше әԝ ча мәрьвәки нәһәԛ, бь зӧлми һатә кӧштьне (Ибрани 12:1-3). Ахьрийеда лазьм бу ԝәки әԝ хԝәха, демәк бейи аликʹарийа Йаһоԝа, сәбьр кә b (Мәтта 27:46).

9. Тӧ дәрһәԛа ԛӧрбанбуна Иса чь дьфькьри? (1 Пәтрус 1:8)

 ⁹ Әшкәрә йә, ԝәки бона Иса һеса нибу әʹмьре хԝә ча ԛӧрбан бәрва бьдә. Гәло жь бо ве йәке кӧ Иса ԛӧрбанәкә ӧса мәзьн бона мә да, һежа нинә кӧ әм һʹәзкьрьна мәзьн һьндава ԝида бьдьнә кʹьфше? (Бьхунә 1 Пәтрус 1:8)

10. Чьрʹа бона Йаһоԝа һеса нибу кӧрʹе хԝә бькә ԛӧрбан?

¹⁰ Сәва кӧ Иса әʹмьре хԝә бәрва бьда, гәло Йаһоԝа һазьр бу чь бькә? Тʹӧ бав у кӧрʹ мина Йаһоԝа у Иса һәвдӧ һʹәз накьн (Мәтʹәлок 8:30). Һәла бьфькьрә: Чахе Иса сәр әʹрде рʹасти чәтьнайа дьһат, гәло Йаһоԝа чь тʹәхмин дькьр? Гава Хԝәде дьдит кӧрʹе ԝи чьԛас еше дькʹьшинә, дьле ԝи гәләк дьшәԝьти.

11. Чахе Иса һатә кӧштьне, Йаһоԝа чь тʹәхмин кьр? Мәсәләке бинә.

¹¹ Мьрьна зарʹе бона де-бава ешәкә гәләк гьран ә. Һәмьки әм баԝәрийа хԝә рʹабуна мьрийа тиньн, ле әв йәк найе һʹәсабе, кӧ гава мәрьве мәйи һʹәзкьри дьмьрә, әм еше накʹьшиньн. Мина ве йәке, Йаһоԝа гәләк еш кʹьшанд, гава Кӧрʹе ԝийи әʹзиз бьһара сала 33 Д.М.-да, щәфа кʹьшанд у мьр c (Мәтта 3:17).

12. Пешийа Евара Биранине әм дькарьн чь бькьн?

¹² Пешийа Евара Биранине мәщала мә һәйә ԝәʹде һинбуна шәхси йан жи Ԛӧльхкьрьна Тʹәви Малбәте, дьһа зедә дәрһәԛа ԛӧрбане лекʹолин бькьн. Мәсәлә, бь сайа Рʹебәрийа Лекʹолинкьрьне бона Шәʹдед Йаһоԝа (һәрге сәр зьмане ԝә һәйә) йан әʹдәбйәтед дьнә сәр һʹиме Кʹьтеба Пироз, кʹур дәрһәԛа ԛӧрбане лекʹолин бькьн. d Ӧса жи Кʹьтеба Пироз бьхуньн, ль гора бәрнама Хԝәндьна Кʹьтеба Пироз пешийа у паши Биранине, йа кӧ һатийә дайине ль Бәрнама Щьвине Мина Иса Мәсиһ Бьжин у Хьзмәт кьн. Рʹожа Биранине, Шеԝьркьрьна Кʹьтеба Пирозә Шәбәԛе тʹәмашә бькьн. Һәрге әм дьле хԝә бона Биранине һазьр кьн, әме бькарьбьн али кәсед дьн бькьн, кӧ әԝана жи кʹаре жь ве йәке бьстиньн (Әзра 7:10).

АЛИ КӘСЕД ДЬН БЬКӘ КӦ ӘԜАНА ЖИ КʹАРЕ БЬСТИНЬН

13. Сәва кӧ кәсед дьн кʹаре жь Биранине бьстиньн, бәри пешьн әм гәрәке чь бькьн?

¹³ Әм ча дькарьн али кәсед дьн бькьн, кӧ әԝана жи кʹаре жь Евара Биранине  бьстиньн? Бәри пешьн әм гәрәке ԝана тʹәглиф кьн. Һәмьки әм ԝан мәрьва гази сәр Биранине дькьн, рʹасти кʹижана кӧ хьзмәтийеда тен. Ле хенщи ԝан, ԝе баш бә кӧ әм насед хԝә жи гази сәр Биранине бькьн, мәсәлә щинар у мәрьвед хԝә, һәвалхәбатчи у һәвалдәрсханед хԝә у кәсед дьн. Ԝе баш бә, әм ве йәке хԝәрʹа бьньвисьн. Һәрге бәлгед тʹәглифкьрьне йед нәшьркьри тʹера мә накьн, әм дькарьн линка ве тʹәглифкьрьне мәрьварʹа бьшиньн. Дьбәкә әм гәләк әʹщебмайи бьминьн, кӧ чьԛас мәрьв ԝе бьхԝазьн бенә сәр Евара Биранине! (Ԝаиз 11:6)

14. Мәсәләке дәрһәԛа һʹӧкӧме тʹәглифкьрьна шәхси бинә.

¹⁴ Щарәке, мере хушкәкә мә, йе кӧ нә Шәʹде Йаһоԝа йә, жьна хԝәрʹа гот, кӧ әԝе тʹәви ԝе һәрʹә сәр Евара Биранине. Хушка мә һьм ша бу һьм жи әʹщебмайи ма, чьмки бәре жи, әԝе гәләк щара ԝи тʹәглиф кьрьбу, ле әԝ ԛә щарәк жи ԛайил нәбу. Ле ижар чь ԛәԝьми? Рʹуспики кӧ ԝи нас дькьр ле тʹәглифи сәр Биранине кьрьбу. Ләма жи, мере хушке һьм ԝе сале, һьм жи паше гәләк сал дьчу сәр Биранине. Бәле, һʹӧкӧме тʹәглифкьрьна шәхси гәләк ԛәԝи йә!

15. Чахе әм мәрьва тʹәглифи сәр Биранине дькьн, әм дькарьн чь бькьн?

¹⁵ Дьбәкә пьрсед кәсед кӧ әм тʹәглифи сәр Биранине дькьн, һәбьн, илаһи һәрге әԝана щара пешьн тенә сәр щьвинәкә мә. Ԝәрә әм пешда бьфькьрьн, кӧ әԝана дькарьн чь бьпьрсьн у хԝә ль гора ве йәке һазьр кьн (Колоси 4:6). Мәсәлә, һьнә мәрьв дьпьрсьн: «Ԝедәре ԝе чь бьԛәԝьмә? Щьвин ԝе чьԛас бькʹьшинә? Гәло лазьм ә кӧ әз кʹьнщед мәхсус ль хԝә кьм? Гәло пʹәрә те тʹопкьрьне?» Чахе әм кәсәки гази сәр Биранине дькьн, әм дькарьн жь ԝи бьпьрсьн: «Ԛә пьрсед тә һәнә?» Паше әм дькарьн щаба ԝи бьдьн у бь аликʹарийа ван видеойед бь наве Мьрьна Иса, Бира Хԝәда Хԝәй кьн у Чь Дьԛәԝьмә Ода Щьватеда?, нишани ԝи кьн, кӧ щьвинед мә ча дәрбаз дьбьн. Ӧса жи, кʹьтеба Ша бә Жийинерʹа Һʹәта-Һʹәтайе!  дәрса 28-да, чәнд фькьред хԝәш һәнә, йед кӧ әм дькарьн нишани ԝан мәрьва бькьн, һʹәԝаса кʹижана кӧ пешда бе.

16. Дьбәкә һьнә мәрьвед кӧ бенә сәр Биранине чь пьрса бьдьнә мә?

¹⁶ Паши Биранине, дьбәкә дьһа зедә пьрсед ԝан һәбьн. Мәсәлә, дьԛәԝьмә әԝана бәр хԝә кʹәвьн, ԝәки чьрʹа тʹәне һьнә мәрьв жь симбола хԝарьн, йан жи ԛә тʹӧ кәси нәхԝар. Ӧса жи, әԝана дьԛәԝьмә бьхԝазьн пебьһʹәсьн, һәла һʹәму щьвинед Шәʹдед Йаһоԝа бь ви щурʹәйи тенә дәрбазкьрьне, йан на. Һәмьки гәләк тьшт ԝәʹде готара Евара Биранине тенә зәлалкьрьне, ле диса жи дьбәкә лазьм бә, ԝәки әм дьһа зедә информасийайе бьдьнә ԝан мәрьва, һʹәԝаса кʹижана кӧ пешда бе. Готара сәр jw.org Чьрʹа Шәʹдед Йаһоԝа Евара Биранине Ӧса Дәрбаз Накьн, Чаԝа Религийед Дьн?, дькарә али мә бькә, кӧ әм щаба һьнә пьрсед ԝан бьдьн. Ԝәрә әм чь жь дәсте мә те, бькьн, кӧ али ԝан мәрьва бькьн, дьле кʹижана бона жийина һʹәта-һʹәтайе һазьр ә, ԝәки әԝана жи жь Евара Биранина Мьрьна Иса кʹаре бьстиньн (Кʹаред Шандийа 13:48).

АЛИ КӘСЕД НӘАКТИФ БЬКӘ

17. Рʹуспи чаԝа дькарьн али ԝан хушк-бьра бькьн, йед кӧ найенә щьвина? (Һәзәԛел 34:12, 16)

¹⁷ Рʹуспино, ԝәʹде Евара Биранине һун ча дькарьн али хушк-бьред нәактиф бькьн? Нишани ԝан кьн, ԝәки һун ԝан һʹәз дькьн (Бьхунә Һәзәԛел 34:12, 16). Пешийа Биранине, һәр тьшти бькьн кӧ тʹәви ԝан текли бьн. Ԝанрʹа бежьн кӧ һун бона ԝан хәм дькьн у дьхԝазьн али ԝан бькьн. Ԝана тʹәглифи сәр Биранине бькьн. Һәрге әԝана бен, бь дьлгәрми ԝана сьлав кьн. Паши Биранине, бәрдәԝам кьн тʹәви ԝан текли бьн у рʹӧһʹанида али ԝан бькьн, ԝәки әԝана вәгәрʹьнә бал Йаһоԝа (1 Пәтрус 2:25).

18. Әм гьшк ча дькарьн али кәсед нәактиф бькьн? (Рʹомайи 12:10)

¹⁸ Әм гьшк дькарьн али хушк-бьред нәактиф бькьн, йед кӧ тенә сәр Биранине. Гәло чаԝа? Әм гәрәке һьндава  ԝанда дьлгәрм у рʹәʹм бьн у ԛәдьре ԝан бьгьрьн (Бьхунә Рʹомайи 12:10). Гәрәке әм бир нәкьн, ԝәки бона һьнә мәрьва һеса нинә бенә сәр щьвата. Дьԛәԝьмә әԝана дьтьрсьн йан жи дьфькьрьн, ԝәки һатьна ԝан ԝе хушк-бьра хԝәш нәйе. e Ләма жи, ԝәрә әм дьле ԝан бь пьрс йан готьнед хԝә нәешиньн у нәбьн сәбәб кӧ әԝана шәрм бькьн (1 Тʹесалоники 5:11). Бәле, әԝана хушк-бьред мә нә, у әм гәләк рʹази нә, ԝәки әм диса дькарьн сәр Биранине тʹәви ԝан тʹоп бьн (Зәбур 119:176; Кʹаред Шандийа 20:35).

19. Кʹара Биранина мьрьна Иса чь йә?

¹⁹ Әм шекьрдар ьн кӧ Иса тʹәми дайә мә, ԝәки әм һәр сал Биранина мьрьна ԝи дәрбаз кьн у әм заньн кӧ әв йәк чьрʹа ӧса фәрз ә. Әм фәʹм дькьн, кӧ Евара Биранине һьм бона мә һьм жи бона кәсед дьн чьԛас керһати йә (Ишайа 48:17, 18). Чахе әм дьчьн сәр Евара Биранине, әм Йаһоԝа у Исарʹа рʹазибуна хԝә бона ԛӧрбане дьдьнә кʹьфше, у һʹәзкьрьна мә һьндава ԝан дьһа мәзьн дьбә. Ӧса жи, йәктийа мә тʹәви хушк-бьра дьһа ԛәԝи дьбә. У әм дькарьн али кәсед дьн бькьн, ԝәки әԝана жи жь ԛӧрбане кʹаре бьстиньн. Ләма жи, ԝәрә әм чь жь дәсте мә те бькьн, кӧ бона Биранина исал, демәк бона рʹожа һәрә фәрз йа тʹәмамийа сале, һазьр бьн!