1. Bilondeshel Luuk 22:19, 20, bwaabiny Civulukil i diifuk ditam dya buseeb dya ku muvw?

 BWA baat ba Yehow, Civulukil cya lufw lwa Krist i diifuk dya buseeb buvul dya ku muvw. I cisangil cya habwaah cyaakady Yeez mwambil biiyij bindiy bwa kwiikal kulong. (Bal Luuk 22:19, 20.) Tudy bindil Civulukil bwa tubingil tuvul. Tukontononaay tumw twa kutubingil aatw.

2. I tubingil kaay twiitusaasak bwa kwiimanyin Civulukil ni micim kwiiwul-kwiiwul?

² Civulukil citwambambulwiish bwa kulangil ha buseeb budy naabw cya kukuul naacy baat. Cituvuuvulwiij mishind yitudy mwa kuleej dyanyish bwa mulambw a Yeez. (2 Kor. 5:​14, 15) Citwaakakish cikwaabw mushind utudy mwa “kukashishangan mu kwiitabij” ni biin-kweet baan-balum ni baan-bakaj. (Rom 1:12) Muvw woos oow, baat bakaady balek kutweel mu bisangil badyaakal batweel mu Civulukil. Bakwaabw bumvumvw cikwaabw micim yiibasak bwa kuhingomw kudy Yehow bwa mushind udyobw biibaak ni musangal. Ni bavul bady bakat myand ya biin-biin bumvumvw micim yiibasak bwa kutwaadijobw kwendel mu njil a buumy kuhicil ku bidyobw batal ni ku bidyobw bumvw. Byoos eeby bileeleej neey Civulukil i bwaal bwa buseeb buvul kutudy.

3. I mushind kaay udy Civulukil cituswiik mu kaacimw ni biin-kweet ha bulab butuutul?(Tal cikwaabw cifwaatul)

³ Lang cikwaabw mudy Civulukil ciituteek mu kaacyumw ni biin-kweet ba ha bulab butuutul. Baatemw ba Yehow biikookongakeen bwa kulong Civulukil hakaady diib ki dyend ni kutweel ha byaab bidyobw bashikacil. Tut boos tumvumvw mwiisamb umvumvwiij buseeb budy naabw cya kukuul naacy baat. Tumbumb misambw ibidy ya kwaakish naay Mawej lutumb, tuhitij mikat ni mviny, cikwaabw ni mucim iitut woos, tuleeleeb neey “amen” ku masambil manaay  mituloolongelobw. Mu meeb 24, bisumbw byoos biiyiiy kulong mushind aakaabumw oow. Udy mwa kwiikal mumanyik musangal udy Yehow ni Yeez bumvw hadyobw biitutal tut boos ha bulab butuutul twiibakish lutumb mushind oow eeny?

4. I myand kaay yitwiiyiiy kwiisambil mu ciin bwaal eecy?

⁴ Mu ciin bwaal eecy, twiiyiiy kukontonon majooj aam: I mushind kaay utudy mwa kulongolol mucim iitut bwa civulukil? I mushind kaay utudy mwa kwambulwiish baat bakwaabw bwa kuhetobw myand yilengel? Ni i mushind kaay utudy mwa kwambulwiish bakaady bakooyel mu myand ya mu spirit? Maalabul ma majooj aam miiyiiy kwiitwambulwiish bwiitut kwiikal habwiih bwa bwaal bujilang oobw.

I MUSHIND KAAY UTUDY MWA KULONGOLOL MUCIM IITUT BWA CIVULUKIL?

5. (a) Bilondeshel Misambw 49:7, 8 bwaabiny bikaam tulangil ha buseeb budy naabw Cya kukuul naacy baat? (b) I dilongweesh kaay diwudy muhetel mu film wa neey: Bua tshinyi Yezu wakafua?

⁵ Umw wa ku mishind yitam yitudy mwa kulongolol mucim iitut bwa Civulukil, i kwanj kulangil ha buseeb budy naabw mulambw a cya kukuul naacy baat wa Yeez Krist. Tut kaayeet, katwaakadyoh bend mwa kwiikuul ku peekaat ni lufw. (Bal Musambw 49:7, 8; tal cikwaabw film wa neey Bua tshinyi Yezu wakafua?) a Nook Mawej ulongolweel bwa Yeez atwaal buumy bwindiy bwa kwiitukuloh, bab boos babidy, Yehow ni Yeez balongel bukash buvul bwa kukumbaj bwaal oobw. (Rom 6:23) Civul hatulaalangil ha cidy Yehow ni Yeez bitulongel, twiiyiiy kwanyish bikasakan cya kukuul naacy baat. Twiiyiiy kukontonon yimw myand yileeleej mudy cya kukuul naacy baat ciikal ni buseeb ku mees kwa Yehow ni Yeez. Ki cya kuuhal, Cya kukuul naacy baat cyaakady cyumvwiij biny?

6. Cya kukuul naacy baat cyumvumvwiij biny?

⁶ Cya kukuul naacy baat i buseeb budyobw bafut bwa kukuul naabw ciit kaahand. Adam, Muut a kuuhal, waakady muwaakan haakadyobw bamufuk. Halongeley mpekaat, ujimbajil dyaakatook dya kwiikaley ni buumy bwa mwendelel kabiy teng bwindiy kaayend ki ni bwa baan bindiy boos. Bwa kwiitukuuloh ku cyaakady Adam mujimbaj, Yeez utwaadil buumy bwindiy buwaakan bu mulambw. Mu shikacil indiy woos ha bulab, Yeez “kaakadyoh bend mulong myand yibiih, kacy kabaakadyoh bend bamumvw uleeb myand ya makos.” (1 Py. 2:22) Ciisang cifwiil Yeez, buumy bwindiy buwaakan bwaakady buhetangan menmen ni buumy bwaakady Adam mujimbaj.—1 Kor. 15:45; 1 Tim. 2:6.

7. I mateet kaay maakady Yeez muhet haakadyey ha bulab?

⁷ Yeez ushaadil teng mulamat Taat indiy a mu diiwul ning hamween makab mavul ha bulab. Hacyaakadyey mutofw, Yeez waakady teng ukooyel balel bindiy baakady kabay bawaakan ning mwaakadyebw bamulel yiy muwaakan. (Luuk 2: 51) Hacyaakady Yeez sand, waakady ni bwa kukasakeen myand yoos yaakady mwa kulong bwa iikal ukufaabeel balel bindiy eecy bwa kulek kwiikaley ni lulamat kudy Yehow. Ni hakuluuhiley waakady ni bwa kukasakeen mateet ma Sataan Dyaabol, ni bulwiish bwa buludy-ludy habitaatal lulamat lwindiy kudy Mawej. (Mat. 4:1-11) Sataan waakady mwiiswiik bwa kufikish Yeez kukulong mpekaat bwa neey kiikal mukumban bwa kufut cya kukuul naacy baat.

8. I mateet kaay makwaabw maakady Yeez mutaatameen?

⁸ Mu mudimw ulongeley ha bulab, Yeez utaataameen mateet mavul. Balwiish bindiy bamumweeshel makab ni mal, ni bakaamin kumuzuh. (Luuk 4:28, 29; 13:31) Waakady ni bwa kutaatameen bilem bya biiyij bindiy. (Mark 9:33, 34) Hakadyobw bamulumbulwiish bwa kumuzuh, bamumweeshel makab ni mal, ni bamuhweekesh milong. Bulekel bwa byoos, bamuzuhil mu mushind waakady utwaal kaakunying kavul ni umuhweekesh milong. (Ebr. 12:1-3) Waakady ni bwa kutaatameen  diiteet dya bulekel kaayend-kend kay ni Yehow. b—Mat. 27:46.

9. Bilondeshel 1 Pyeel 1:8 tumvumvw bicy bwa mulambw a Yeez?

⁹ Biin-biin Yeez ukabil bikasakan bwa kutwaaley cya kukuul naacy baat. Lukat lwiitut lukaakasakan hatulaalangil ha mushind waakady Yeez mukab bikasakan bwa kufut cya kukuul naacy baat ni mutwaal buumy bwindiy bwiitut.—Bal 1 Pyeel 1:8.

10. Yehow umvwiil bicy bwa kufut Cya kukuul naacy baat?

¹⁰ Kady tudy mwa kuleeb bicy bwa Yehow? I biny bitwaadiley ni lukat bwa Yeez ahet mushind a kufut cya kukuul naacy baat? Yehow ni Yeez bady ni bulund bukasakan menmen teng bu budyaakal hakacy ha taat ni mwaan (Tus. 8:30) Lang ket bwa mushind utengeleby Yehow ku micim haakadyey utal Yeez utaatamen mateet mavul menmen haakadyey ha bulab. Biin-biin Yehow umvwiil kaakunying kavul hatadiley mwaakadyobw bakabish Mwaan indiy ni bamulek.

11. Twaal cileejel cileeleej mwaakady Yehow mumvw haakadyobw bazuh Yeez.

¹¹ Balel boos bakaady bafwiishoh i bamanyik bilengel menmen kaakunying kavul kady naak muut hadyey ufwiish. Tudy ni diitabij dikasakan habitaatal kusanguk, ki kumanyik nook kakwiin mwa kuful kaakunying katudy naak hafwaafw muut utudy bakat. Cileejel eecy ciitwambambulwiish bwiitut kumvw mushind waakady Yehow mumvw haakadyey utal Mwaan indiy waakadyey mukat ukab ni ufw mu 33 mu muvw a mashik B.B. c—Mat. 3:17.

12. I biny bitudy mwa kulong mu yeng ya kuuhal kwa Civulukil?

¹² Kutambwiil teng kaabaak ni ku Civulukil, kwiin mwa kulongololok program a kwiilongel eecy program a kuhambidil kwa mu cisak mushimacil ha cya kukuul naacy baat eeny? Kaamunun myand mu Mukanda wa makebulula wa Bantemu ba Yehowa (yiy mwiikalok mu cileebel ciibuh) eecy kaam mu biit bikwaabw bya kulong naaby Bibl bidy mwa kukwambulwiish bwa kumvw ciin bwaal eecy mu bondok. d Cikwaabw iikal mwiiswiik bwa kulond program a kubal kwa Bibl bwa Civulukil kudyobw batwaal mu Kayeh ka cisangil — cya shikacil a bwiin Krist ni mudimw a bukajaady. Mu diifuk dya Civulukil, kuvulaminoh bend bwa kutal program a buseeb a kuhambidil kwa kuhacy. Hatuloolongolol mucim iitut bwa Civulukil, twiiyiiy kwiikal biihang bilengel bwa kwambulwiish baat bakwaabw bwa kuhetobw byaabw myand yilengel.—Esd. 7:10.

 AMBULWIISH BAKWAABW BWA KUHETOBW MYAND YILENGEL

13. I mushind kaay wa kuuhal utudy mwa kwambulwiish baat bwa kuhetobw myand yilengel mu Civulukil?

¹³ I mushind kaay utudy mwa kwambulwiish bakwaabw bwa kuhetobw byaabw myand yilengel ya mu Civulukil? Cya kuuhal, i kwiibabiikan bwa kwiiyobw mu Civulukil. Hakufulok baat batwambambil batusaasambakeen naabw mu mudimw a bukajaady, tudy mwa kufund majin ma baat batudy bamanyik ha diibij bwa kwiibabiikan byaabw. Mu baat aab mudy baan beet ba mu cisak, baat batukaakal naabw mudimw, balony neet ba mu kalaas, ni baat bakwaabw. Ning tut katuy ni mabij ma kubiikanangan naam makumban, tudy mwa kwiibatumin ning ma mu byamw. I ngany udy mumanyik buuny bwa baat biikal mwa kwiiiy!—Mul. 11:6.

14. Umvwiij bukol budy naabw diibij dya kubikanangan naady.

¹⁴ Katwiin mwa kulengululoh bend bukash budy naabw diibij dya kubiikan naady muut. Diifuk dikwaabw, mwiin-kweet mwaan-mukaj waakady mu cisak cya baat baakady bahambidil mu bitendelel bishil-shilangan ukemen haakady mbaayend mumwambil neey waakady wiilongolol bwa kuyobw nend mu Civulukil. Bwabiny ukemen? Bwaal misang yivul ha kal, waakady umukashish bwa kutweelomw, ki kaakadyoh bend wiitab. Bwabiny myand i yishintuluk bwa musang oow? Uleebel neey: “Nady muhet diibij didyobw baabiikan naady,” ni umvumvwiij neey mukul wa ha cyaab cidyobw bashikacil waakadyobw bamanyikangan nend i yiy umubikeen. Mbaayend oow utweelel mu Civulukil muvw aaw ni mivw yikwaabw yivul yilondel.

15. I biny bitudy mwa kwiikal bamanyik hatubiibiikan baat mu Civulukil?

¹⁵ Iikal mumanyik neey baat batubiibiikan bady mwa kwiikal ni majooj ma kwiitwiihanguj—amanaaman biby biikal neey kabiin banj kutweeloh bend neet mu bisangil. Tuloolong bilengel tut biikal banj bamanyik majooj miikalobw mwa kwiitwiihanguj ni balongolol cya kwiibaalabul. (Kol. 4:6) Cileejel, bakwaabw bady mwa kwiiyihanguj neey: ‘I biny biikal mwa kulongek mu Civulukil oomw?’ ‘Ciiyiiy kulong meeb mang?’ ‘Kudyok mushind kaahand wa kuvwaal bwa kutweelomw eeny?’ ‘Baloolomb makut bwa kutweelomw eeny?’ ‘Biiyiiy kusangishomw makut eeny?’ Hatubiibiikan muut bwa Civulukilk, tudy mwa kumwiihanguj  bituh neey: “Udyok ni majooj eeny?” ni kuunyim aalabul majooj mady muut mwa kwiikal naam. Tudy mwa kumuleej cikwaabw film eey: Vuluka lufu lua Yezu ni i biny bidyaakal bilongek ku Nzubw a Bukaleng? bwa kwambulwiish muut bwa kumvwey mushind udy bisangil bilongek. Ni dilongweesh dya 28 dya mu Iikal ni buumy buyiil! mukand udy ni myand yivul yilengel yitudy mwa kwiisamb ni baat.

16. I majooj kaay makwaabw mady baat bady batweel mu Civulukil mwa kwiihanguj?

¹⁶ Kuunyim kwa baman kutweel mu Civulukil, baat bahyaabahy bady bakat myand ya biin-biin bady mwa kwiikal ni majooj ma kwiitwiihanguj. Bady mwa kwiiyiihanguj bwaabiny muut ning waakaabumw kiish mudy, eecy teng baat bakeeh iibab babaady mukat ni babaan mviny. Bady mwa kwiitwiihanguj habitaatal buuny bwa misang yituloolong Civulukil. Bady mwa kukaam kumanyik ning bisangil byoos bya Baatemw ba Yehow bidyaakal bilongek teng mushind aakaabumw oow. Ning mwiikalobw mwa kwiisamb myand yivul mu mwiisamb a Civulukil, baat beeny bady mwa kukaam bwa wiibumvwiij myand yikwaabw. Ciin bwaal cya mu jw.org cya neey “Bua tshinyi Bantemu ba Yehowa batu benza Didia dia Mukaleng dishilangane ne dia bitendelelu bikuabu? cidy mwa kwiitwambulwiish bwa kwaalabul mamw ma ku majooj maababw. Tudy bakat kulong mwiitut moos—bwa kwambulwiish “baat boos bakaady balongolol micim yaabab “bwa kuhetobw myand yilengel—kuuhal kwa Civulukil, hatudyomw ni hadyecy cih.—Yil. 13:48.

AMBULWIISH BAKAADY BAKOOYEL MU MYAND YA MU SPIRIT

17. Bilondeshel Ezekiyeel 34:12, 16 i mushind kaay udy bakul mwa kwambulwiish baat bakaady balek bisangil?

¹⁷ I mushind kaay udy bakul mwa kwambulwiish baat bakaady balek kutweel mu bisangil mu ciisang cya Civulukil? Leej neey, wiitaatacish bwa babw. (Bal Ezekiyeel 34:12, 16.) Kuuhal kwa Civulukil, ilongolol bwa kubiikan baat bavul kuk kwiikal mushind. Ibaleej muwudy mwiibakat ni muwukaakaam kwiibambulwiish mu mushind kaahand. Iibabiikan bwa kutweelobw mu Civulukil. Bab biiy, iibaak ni musangal. Kuunyim kwa Civulukil, tungunuk ni kuy katal eecy kubiikan ku telefon biin-kweet baan-balum ni baan-bakaj batudy bakat aab, ni ibambulwiish bwa kuhingebomw kudy Yehow.—1 Py. 2:25.

18. Bilondeshel Biin Rom 12:10 I mushind kaay udy mwiin-kweet woos mu cisumbw mwa kwambulwiish baat bakaady kabaciy batweel mu bisangil?

 ¹⁸ Muut woos wa mu cisumbw, udy mwa kwambulwiish biin-kweet baakady ki balek kutweel mu bisangil bady biiy mu Civulukil. Mu mushind kaay? Hakwiibalongel myand ni lukat ni kaneemw. (Bal biin Rom 12:10.) Vuluk neey, biin-kweet aab, bady mwa kweelakan bwa kuhingebomw mu bisangil. Misang yikwaabw, bady mwa kwiikal bumvw mooy bwa may madyobw mwa kwiiy kwiibaleeb eecy cidy biin mu cisumbw mwa kwiisamb bwaababw. e Nook, kulongoh bend wiibajooj majooj mady mwa kwiibatond eecy kuleeb bwaal kaahand budy mwa kwiibatah ku micim. (1 Tesa. 5:11) Biin-kweet baan-balum ni baan-bakaj aab, i biin Krist neet. Tudy ni musangal a kuhambidil naab cikwaabw haakaabumw!—Mis. 119:176; Yil. 20:35.

19. I mabeenesh kaay matuheehet atuvuuvuluk lufw lwa Yeez?

¹⁹ Tudy ni kwaan kuvul bwa mudy Yeez mwiitwambil bwa kwiikal kuvuluk lufw lwindiy ku muvw woos, ni tudy bumvw bwaabiny kulong nook kudy ni buseeb. Hatutweetweel mu Civulukil, bitwambambulwiish tut ni baat bakwaabw mu mishind yivul. (Ye. 48:​17, 18) Tuvuuvudij lukat lutudy naalw bwa Yehow ni Yeez. Tuleeleej mutwaanaan bikasakan cyaakadyobw bitulongel. Tukaakashish bulund bwiitut ni biin Krist neet. Tudy mwa kwambulwiish baat bakwaabw bwa kumanyikobw mushind udyobw mwa kuhet mabeenesh mady Cya kukuul naacy baat citwaal. Tulongaay cyoos citudy mwa kulong bwa kwiikal haabwiih bwa Civulukil cya muvw oow—diifuk ditam dya buseeb buvul dya ku muvw!