1. Wetin mek di Mɛmorial na di de we impɔtant pas ɔl insay di ia? (Lyuk 22:​19, 20)

 FƆ Jiova in pipul dɛn, di Mɛmorial fɔ Jizɔs in day na di de we impɔtant pas ɔl ɔda de dɛn insay di ia. Na di program dande nɔmɔ we Jizɔs insɛf sɛf bin tɛl in disaypul dɛn fɔ mɛmba. (Rid Lyuk 22:​19, 20.) Wi gɛt bɔku rizin dɛn we mek wi kin gladi fɔ di Mɛmorial. Lɛ wi tɔk bɔt sɔm pan dɛn.

2. Wetin na sɔm rizin dɛn we mek wi kin gladi fɔ di Mɛmorial?

² Di Mɛmorial de ɛp wi fɔ tink gud gud wan bɔt di valyu we Jizɔs in day gɛt. I de mɛmba wi bɔt we dɛn we wi go sho se wi gladi fɔ Jizɔs in sakrifays. (2 Kɔr. 5:​14, 15) I de gi wi bak di chans fɔ mek wi ɛn wi brɔda ɛn sista dɛn ebul fɔ “ɛnkɔrej wisɛf.” (Rom. 1:12) Bɔku brɔda ɛn sista dɛn we inaktiv, kin atɛnd di Mɛmorial ɛni ia. Sɔm dɔn ivin disayd fɔ kam bak to Jiova bikɔs ɔf di fayn we aw dɛn wɛlkɔm dɛn we dɛn kam di Mɛmorial. Ɛn bɔku pipul dɛn kin lɛk wetin dɛn si ɛn yɛri, ɛn dɛn kin want fɔ stat fɔ stɔdi di Baybul. Na ɔl dis mek di Mɛmorial rili spɛshal to wi.

3. Aw di Mɛmorial de mek wi gɛt wanwɔd wit wi brɔda ɛn sista dɛn ɔlsay na di wɔl? (Luk bak di pikchɔ.)

³ Tink bak bɔt aw di Mɛmorial de mek wi gɛt wanwɔd wit wi brɔda ɛn sista dɛn ɔlsay na di wɔl. Ɔlsay na di wɔl, Jiova Witnɛs dɛn kin gɛda fɔ di Mɛmorial we di san dɔn go dɔŋ. Wi ɔl kin lisin to tɔk we kin sho wetin mek di prayz we Jizɔs pe fɔ fri wi rili impɔtant. Wi kin siŋ tu siŋ dɛn fɔ prez Jiova, pas di bred ɛn di wayn, ɛn di 4 tɛm dɛn we dɛn kin pre, wi de se “emɛn” wit ɔl wi at. Insay lɛk 24 awa, ɔl di  kɔngrigeshɔn dɛn na di wɔl kin du di sem tin. Yu go ebul imajin di kayn gladi-at we Jiova ɛn Jizɔs kin gɛt we dɛn de si wi ɔl de kam togɛda fɔ ɔnɔ dɛn dis kayn we?

4. Wetin wi go tɔk bɔt insay dis atikul?

⁴ Insay dis atikul, wi go tɔk bɔt dɛn kwɛstyɔn dɛn ya: Aw wi go rɛdi wi at fɔ di Mɛmorial? Aw wi go ebul ɛp ɔda pipul dɛn fɔ bɛnifit frɔm am? Ɛn aw wi go ebul fɔ ɛp wi brɔda ɛn sista dɛn we dɔn stɔp fɔ atɛnd wi mitin dɛn? Di ansa dɛn to dɛn kwɛstyɔn dɛn ya go ɛp wi fɔ rɛdi fɔ dis program we rili impɔtant.

AW WI GO RƐDI WI AT FƆ DI MƐMORIAL?

5. (a) Wetin mek wi fɔ tek tɛm tink bɔt aw di day we Jizɔs day fɔ wi rili valyu? (Sam 49:​7, 8) (b) Wetin yu lan frɔm di vidio we gɛt di taytul Wetin Mek Jizɔs bin Day?

⁵ Wan pan di we dɛn we impɔtant pas ɔl we wi go rɛdi wi at fɔ di Mɛmorial na we wi tek tɛm tink bɔt aw di day we Jizɔs Krays day fɔ wi rili valyu. Natin nɔ de we wi go ebul du fɔ fri wisɛf frɔm sin ɛn day. (Rid Sam 49:​7, 8; luk bak di vidio we gɛt di taytul Wetin Mek Jizɔs bin Day?) a So Jiova bin arenj fɔ mek Jizɔs gi in layf fɔ fri wi. Jiova ɛn Jizɔs bin mek big big sakrifays fɔ fri wi. (Rom. 6:23) Di mɔ we wi tek tɛm tink gud gud wan bɔt wetin dɛn sakrifays fɔ wi, na di mɔ wi go gladi fɔ di day we Jizɔs bin day fɔ pe fɔ wi sin. Wi go tɔk bɔt sɔm pan di tin dɛn we Jiova ɛn Jizɔs bin rɛdi fɔ du we nɔ bin izi fɔ dɛn. Bɔt fɔs, wetin di day we Jizɔs day fɔ wi min?

6. Wetin mek Jizɔs bin day?

⁶ Di day we Jizɔs bin day fɔ fri wi tan lɛk prayz we pɔsin kin pe fɔ bay sɔntin bak. Di fɔs man we na Adam bin pafɛkt di tɛm we Jiova bin mek am. We i sin, i lɔs di chans fɔ gɛt layf we go de sote go. Bɔt nɔto in nɔmɔ bin lɔs da chans de, ivin ɔl in pikin dɛn bin lɔs am. Fɔ bay bak wetin Adam bin lɔs, Jizɔs bin sakrifays in pafɛkt layf. Di tɛm we Jizɔs bin de na di wɔl, i “nɔ wande sin, ɛn i nɔ lay.” (1 Pit. 2:22) Di tɛm we Jizɔs day, i bin pafɛkt jɔs lɛk aw Adam bin pafɛkt bifo i sin. So we Jizɔs bin sakrifays in layf, i bin ebul fɔ pe di prayz fɔ di layf we Adam bin lɔs.​—1 Kɔr. 15:45; 1 Tim. 2:6.

7. We Jizɔs bin de na di wɔl, wetin na sɔm tɛst dɛn we bin mit am?

⁷ We Jizɔs bin de na di wɔl, i bin kɔntinyu fɔ obe in Papa we de na ɛvin pafɛkt wan, pan ɔl we i bin de gɛt bɔku tɛst dɛn. As pikin, Jizɔs bin nid fɔ obe in mama ɛn papa we nɔ pafɛkt, pan ɔl we in bin pafɛkt. (Lyuk 2:51) As tineja, i bin nid fɔ tinap tranga wan agens ɛnitin we go mek i nɔ obe in mama ɛn papa ɔ we go mek i nɔ fetful to Jiova. Ɛn as big pɔsin, Jizɔs bin nid fɔ tinap tranga wan fɔ mek Setan nɔ tɛmt am fɔ du wetin bad ɛn ivin we Setan bin tɛl am fes-to-fes fɔ mek i nɔ kɔntinyu fɔ de biɛn Jiova. (Mat. 4:​1-11) Setan bin dɔn mekɔp in maynd fɔ mek Jizɔs sin so dat i nɔ go ebul fɔ pe di prayz fɔ fri mɔtalman.

8. Us ɔda tɛst dɛn Jizɔs bin bia?

⁸ We Jizɔs bin de du di prichin wok na di wɔl, i bin gɛt fɔ bia ɔda tɛst dɛn bak. In ɛnimi dɛn bin mek i sɔfa ɛn dɛn tray fɔ kil am. (Lyuk 4:​28, 29; 13:31) I bin gɛt fɔ bia wit di mistek dɛn we in disaypul dɛn bin de mek. (Mak 9:​33, 34) We dɛn bin de aks am kwɛstyɔn dɛn bifo dɛn kil am, dɛn bin de du bad bad tin dɛn to am ɛn provok am. Dɔn dɛn bin kil am lɛk  kriminal, ɛn i bin rili sɔfa bifo i day. (Ibru. 12:​1-3) I bin gɛt fɔ bia di las tɛst bifo i day, ɛn Jiova nɔ bin protɛkt am. b​—Mat. 27:46.

9. Aw wi de fil bɔt Jizɔs in sakrifays? (1 Pita 1:8)

⁹ Wi dɔn si klia wan se Jizɔs bin sɔfa bɔku tin dɛn fɔ mek i go ebul pe di prayz fɔ bay wi bak. We wi tink bɔt ɔl di sakrifays dɛn we Jizɔs bin rɛdi fɔ mek fɔ wi, dat nɔ de mek wi rili lɛk am?—Rid 1 Pita 1:8.

10. Aw Jiova bin fil we Jizɔs sakrifays in layf fɔ bay wi bak?

¹⁰ Wetin Jiova bin rɛdi fɔ sakrifays so dat Jizɔs go ebul fɔ pe di prayz fɔ bay wi bak? Di kayn tayt padi biznɛs we de bitwin Jiova ɛn Jizɔs pas ɛni padi biznɛs we de bitwin papa ɛn in bɔypikin. (Prɔv. 8:30) Jɔs tink bɔt aw Jiova bin fil we i si we Jizɔs de bia bɔku prɔblɛm dɛn we i bin de na di wɔl. Wan dawt nɔ de se Jiova bin rili fil pen fɔ si we pipul dɛn de du bad tin dɛn to in Pikin, we pipul dɛn nɔ bin biliv am, ɛn we dɛn bin de mek i sɔfa.

11. Yuz wan ɛgzampul fɔ sho aw Jiova go dɔn fil we dɛn bin kil Jizɔs.

¹¹ Ɛni mama ɔ papa we in pikin dɔn day rili ɔndastand di pen we pɔsin kin fil we i lɔs in pikin. Wi biliv tranga wan se di wan dɛn we dɔn day go gɛt layf bak. Bɔt we pɔsin we wi lɛk day, wi kin stil fil pen na wi at. Dis ɛgzampul ɛp wi fɔ ɔndastand aw Jiova go mɔs dɔn fil we i bin de wach in Pikin we i rili lɛk de sɔfa ɛn day insay di ia 33 afta Krays. c​—Mat. 3:17.

12. Wetin wi go ebul du bifo di Mɛmorial?

¹² Frɔm naw te di tɛm fɔ di Mɛmorial, yu nɔ tink se i go fayn fɔ du pasɔnal stɔdi projɛkt ɔ Famili Wɔship projɛkt we de tɔk mɔ bɔt Jizɔs in day? Yuz di Buk we De Ɛp Jiova Witnɛs dɛn fɔ No bɔt Sɔntin ɔ ɔda pɔblikeshɔn dɛn fɔ lan mɔ bɔt Jizɔs in day. d Dɔn bak, fala di Mɛmorial Baybul ridin shɛdul we de na Wi Kristian Layf ɛn Prichin Wok—Mitin Buk. Ɛn di de fɔ di Mɛmorial, nɔ fɔgɛt fɔ wach di spɛshal Mɔnin Wɔship program. We wi rɛdi wi at fɔ di Mɛmorial, wi go ebul fɔ ɛp ɔda pipul dɛn bak fɔ bɛnifit frɔm am.​—Ɛzra 7:10.

 ƐP ƆDA PIPUL DƐN FƆ BƐNIFIT

13. Wetin na di fɔs tin we wi go ebul du fɔ ɛp ɔda pipul dɛn fɔ bɛnifit frɔm di Mɛmorial?

¹³ Aw wi go ebul ɛp ɔda pipul dɛn fɔ bɛnifit frɔm di Mɛmorial? As wi ɔl no, di fɔs tin we wi go du na fɔ invayt dɛn. Apat frɔm di wan dɛn we wi de mit na fil savis ɔltɛm, wi kin mek list fɔ di pipul dɛn we wi want fɔ invayt. Dɛn pipul dɛn ya kin bi wi fambul dɛn, wokmet dɛn, skulmet dɛn, ɛn ɔda pipul dɛn we wi sabi. Ilɛksɛf wi nɔ gɛt bɔku inviteshɔn we dɛn print, wi kin stil ebul fɔ yuz di link fɔ sɛn di ilɛktronik kɔpi fɔ invayt pipul dɛn. Sɔntɛm wi go sɔprayz fɔ si ɔmɔs pipul dɛn go disayd fɔ atɛnd!—Ɛkli. 11:6.

14. Gi ɛgzampul bɔt aw i kin afɛkt pɔsin we yusɛf sɛf invayt am.

¹⁴ Nɔ ɛva tɛkɛ di invayt we yusɛf sɛf de invayt pipul dɛn. Wan de, wan sista we in man nɔto Jiova Witnɛs bin sɔprayz we in man bin gladi fɔ tɛl am se i go atɛnd di Mɛmorial wit am. Wetin mek i bin sɔprayz? Na bikɔs bɔku tɛm i bin dɔn de ɛnkɔrej in man fɔ atɛnd, bɔt i nɔ ɛva atɛnd. So wetin bin apin we mek di man disayd fɔ atɛnd di Mɛmorial dis tɛm? Di man tɔk se, “Pɔsin gi mi inviteshɔn,” ɛn i ɛksplen se na wan ɛlda we i sabi invayt am. Di man bin atɛnd di Mɛmorial da ia de, ɛn i atɛnd ɔda Mɛmorial dɛn fɔ lɔng tɛm afta da ia de.

15. Wetin wi fɔ mɛmba we wi de invayt pipul dɛn fɔ atɛnd di Mɛmorial?

¹⁵ Mɛmba se di pipul dɛn we wi de invayt go aks wi kwɛstyɔn dɛn bɔt di Mɛmorial, mɔ if dɛn nɔ wande atɛnd wi mitin dɛn. So i go fayn fɔ mek wi tink bɔt di kwɛstyɔn dɛn we sɔntɛm dɛn go aks ɛn rɛdi fɔ ansa dɛn. (Kol. 4:6) Fɔ ɛgzampul, sɔntɛm sɔm go de wɔnda: ‘Wetin go apin na di program?’ ‘Aw lɔng i go tek?’ ‘Ɛni patikyula we de we pɔsin fɔ drɛs?’ ‘A go nid fɔ pe fɔ atɛnd?’ ‘Dɛn go aks fɔ kɔlɛkshɔn?’ We wi de invayt pɔsin fɔ atɛnd di Mɛmorial, i go fayn fɔ mek wi aks di pɔsin, “Yu gɛt ɛni kwɛstyɔn?” ɛn ansa ɛni kwɛstyɔn we di pɔsin go aks. Wi kin yuz  bak di vidio dɛn we gɛt di taytul Mɛmba Jizɔs in Day ɛn Wetin Kin Apin na Kiŋdɔm Ɔl? fɔ ɛp di pɔsin fɔ ɔndastand aw wi kin ol wi mitin dɛn. Ɛn lɛsin 28 na di Ɛnjɔy Layf Sote Go! buk tɔk bɔt fayn pɔynt dɛn we wi kin yuz.

16. Us ɔda kwɛstyɔn dɛn di wan dɛn we kin atɛnd di Mɛmorial go aks?

¹⁶ Afta di Mɛmorial, di wan dɛn we atɛnd di program fɔ di fɔs tɛm we want fɔ no mɔ go gɛt ɔda kwɛstyɔn dɛn. Sɔntɛm dɛn go aks, ‘Wetin mek nɔbɔdi nɔ it di bred ɛn drink di wayn? Ɔ wetin mek di wan dɛn we it di bred ɛn drink di wayn nɔ bɔku?’ Sɔntɛm dɛn go de tink bak bɔt ɔmɔs tɛm insay di ia wi kin gɛt di Mɛmorial. Ɛn sɔntɛm dɛn go want fɔ no if na di sem we ɔl Jiova Witnɛs dɛn kin ol dɛn mitin dɛn. Pan ɔl we dɛn kin tɔk bɔt bɔku pan dɛn pɔynt dɛn ya insay di Mɛmorial tɔk, di wan dɛn we kam fɔ di fɔs tɛm go stil want mek wi ɛksplen to dɛn mɔ. Di atikul we de na jw.org we gɛt di taytul “Wetin Mek di We Aw Jiova Witnɛs dɛn De Du di Masta in Ivintɛm It Difrɛn Frɔm di We Aw Ɔda Rilijɔn dɛn De Du Am?” go ɛp wi fɔ ansa sɔm pan dɛn kwɛstyɔn dɛn. Wi want fɔ du ɔl wetin wi ebul bifo di Mɛmorial, di tɛm fɔ di Mɛmorial, ɛn afta di Mɛmorial fɔ ɛp di wan dɛn we “rili sho se dɛn want fɔ” no mɔ fɔ bɛnifit frɔm dis program.​—Akt 13:48.

ƐP INAKTIV WAN DƐN

17. Aw ɛlda dɛn go ebul ɛp inaktiv wan dɛn? (Izikɛl 34:​12, 16)

¹⁷ Insay di tɛm fɔ di Mɛmorial, aw ɛlda dɛn go ɛp inaktiv wan dɛn? Sho dɛn se yu bisin bɔt dɛn. (Rid Izikɛl 34:​12, 16.) Bifo di Mɛmorial, mek shɔ se yu tray fɔ kɔl bɔku pan dɛn. Mek dɛn no se yu bisin bɔt dɛn ɛn yu want fɔ du ɛnitin we yu ebul fɔ ɛp dɛn. Invayt dɛn fɔ atɛnd di Mɛmorial. Ɛn if dɛn atɛnd, wɛlkɔm dɛn fayn wan. Afta di Mɛmorial, kɔntinyu fɔ de tɔk wit dɛn wi brɔda ɛn sista dɛn ya we wi lɛk, ɛn tray fɔ gi dɛn ɛni ɛp we dɛn nid fɔ kam bak to Jiova.​—1 Pit. 2:25.

18. Aw ɔlman na di kɔngrigeshɔn go ebul ɛp inaktiv wan dɛn? (Romans 12:10)

 ¹⁸ Ɔlman na di kɔngrigeshɔn go ebul fɔ ɛp inaktiv wan dɛn we go atɛnd di Mɛmorial. Aw? Na bay we wi sho se wi lɛk dɛn, du gud to dɛn, ɛn rɛspɛkt dɛn. (Rid Romans 12:10.) Mɛmba se sɔntɛm dɛn wi brɔda ɛn sista dɛn ya we wi lɛk bin fred fɔ kam bak na mitin. Sɔntɛm dɛn bin de fred wetin ɔda pipul dɛn go se to dɛn ɔ tɔk bɔt dɛn. e So avɔyd fɔ aks dɛn kwɛstyɔn dɛn we go mek dɛn shem ɔ tɔk sɔntin we go mek dɛn fil bad. (1 Tɛs. 5:11) Dɛn brɔda ɛn sista dɛn ya na wi kɔmpin Kristian dɛn. Wi gladi fɔ wɔship Jiova wit dɛn bak!​—Sam 119:176; Akt 20:35.

19. Us bɛnifit dɛn wi go gɛt we wi mɛmba Jizɔs in day?

¹⁹ Wi rili gladi we Jizɔs tɛl wi fɔ mɛmba in day ɛni ia, ɛn wi ɔndastand wetin mek dis rili impɔtant. We wi atɛnd di Mɛmorial, wi ɛn ɔda pipul dɛn de bɛnifit bɔku we dɛn. (Ayz. 48:​17, 18) I de ɛp wi fɔ lɛk Jiova ɛn Jizɔs mɔ ɛn mɔ. I de ɛp wi fɔ sho se wi rili gladi fɔ wetin dɛn dɔn du fɔ wi. I de ɛp wi fɔ gɛt tayt padi biznɛs wit wi brɔda ɛn sista dɛn. Ɛn wi go ebul ɛp ɔda pipul dɛn fɔ lan bɔt aw dɛnsɛf go ebul fɔ ɛnjɔy di blɛsin dɛn we wi go gɛt bikɔs ɔf Jizɔs in day. So lɛ wi du ɔl wetin wi ebul fɔ rɛdi fɔ di Mɛmorial fɔ dis ia, we na di de we impɔtant pas ɔl ɔda de dɛn insay di ia!