1. Le yɛɛ paale Loonuŋyaa le cho yɛ paale sɔvɛ o wɔsioo niŋ? (Luku 22:​19, 20)

 LE WANAA Chɛhowaa, paale Loonuŋyaa a piɔm Kiliti wo okɔɔ cho bɔɔ paale sɔvɛ o wɔsioo niŋ. Dunyɛi hei kinɛi Chiisu dimul buɛiyaa nduaa ni le ma wa tosaa. (Nuawɔ Luku 22:​19, 20.) Ŋ cho lehɔl o nɛi le Loonuŋyaa biyɔɔ le sabula bɔɔbɔɔ. Ŋ tofaŋndɔ sabulaŋ ndaŋ latiŋ.

2. Ɔɔ sabulaŋ latiŋ la naŋ wa lehɔl le Loonuŋyaa biyɔɔ wo?

² Mi Loonuŋyaa mala naa le yiyaŋndo mɛɛ kpɛ sala baŋaa cho o sɔvɛ yɛ. Mbo loonuŋ naa a nɛila yɛ yɛla naŋ chɔm balika melaa le sala soliaŋ Chiisu wo. (2 Kɔliŋ. 5:​14, 15) Mbo ke naa vɛlɛ fondaa le miŋ tuei ‘kɔltaŋ dɛɛniaŋndo vellaa velle’ a puaapiliaa vɛlɛ a ndepiliaa naa yeela. (Luomaŋ. 1:12) Iwɔsi o iwɔsi, mi wanaa bɔɔbɔɔ kelu hunɔɔ o bɔŋaŋndaŋ nda bii dunyɛi hei. Mi apum miiŋgu pɛŋ Chɛhowa o ibuŋ le mɛɛ nda chaa nda biyɔɔ yɛ. Nduyɛ mi a bɔɔbɔɔ nɔ yeemɛiya sɔla yoomuaŋ le kandɔɔ kɔlaŋ o nɛi yoomoo choo, le nyɛ nda che nduyɛ ma tuɛiyo. Lelaŋ, Loonuŋyaa cho bɔɔ o sɔvɛ le naa kpou.

3. Vɛɛ Loonuŋyaa tosa yɛ miŋ wa o diompilɔɔ niŋ a puaapiliaa vɛlɛ a ndepiliaa naa chieeŋndo balɔɔ silɔ? (Tofa vɛlɛ fotueiyo.)

³ Yiyaŋndɔ vɛlɛ a hei okɔɔ. Mi Loonuŋyaa tosa miŋ wa o diompilɔɔ niŋ naa puaapiliaa a ndepiliaa naa chieeŋndo balɔɔ silɔ. Mi Seiyaa Chɛhowaa chieeŋndo balɔɔ silɔ a chuuŋgiaŋ a paale delaaleŋ le dunyɛi hei biyɔɔ. Mi naa kpou yaŋ nilaŋ o suɛi nda yɔŋgu ve. Mi suɛi keŋ kindila mɛɛ kpɛ sala baŋaa cho o sɔvɛ yɛ. Miŋ soli chondoŋ ŋmuuŋ, ma keeliaa beediiyo a muɛiyaŋ, nduyɛ ma piɛi bɛmbɔɔ le hiɔɔlu. Mi naa kpou dimi “amiina” a kɔllo kpou o piɛile kɛ kɛ mɛɛlulaŋ. O hawɛila 24  bɛŋgu, mi kundalaŋ kpou la tosa nyɛ pilɔɔ hoo kpe. Yiyaŋndɔ mɛɛ kpɛ Chɛhowa nda Chiisu wa a kɔl kɛndɛ yɛ, te a che naa pɛ nda bɛɛleŋ kioo o diompilɔɔ niŋ o nɛi waa nuaa choo.

4. Yɛɛ naŋ cho yɛ pɛɛku o buŋgɛi hei niŋ?

⁴ O buŋgɛi hei niŋ, ŋ cho pɛɛku a nyunalaŋ ndaŋ okɔɔ: Vɛɛ naŋ bɛɛndiaa yɛ kɔlta naalaŋ le Loonuŋyaa? Vɛɛ naŋ mala yɛ acheleŋnda le ma sɔla tɔnɔɔ leniŋ? Nduyɛ vɛɛ naŋ mala yɛ wanaa kelu kɔlaŋ o bɔŋaŋnda nda? Mulilaŋ le nyunalaŋ ndaŋ la cho naa mala le miŋ bɛɛndiaŋ le dunyɛi sɔvɛi hei.

VƐƐ NAŊ BƐƐNDIAA YƐ KƆLTA NAALAŊ LE LOONUŊYAA?

5. (a) Le yɛɛ naŋ nɔ yɛ miŋ yiyaŋ a mɛɛ sala baŋaa cho o sɔvɛ yɛ okɔɔ? (Sam 49:​7, 8) (b) Yɛɛ naŋ pɛɛku yɛ o vidueiyo hoo niŋ, Le yɛɛ Chiisu vi yɛ?

⁵ Nɛi sɔviɔɔ opilɛ o naŋ bɛɛndiaa kɔlta naalaŋ le Loonuŋyaa wo, cho yiyaŋndo a mɛɛ kpɛ sala soliaŋ Chiisu Kiliti wo cho o sɔvɛ le naa yɛ ni. Pesiŋ bɛɛ ŋ nɔla miŋ soli naapila o chɛle hakioo a piɔmndo niŋ te. (Nuawɔ Sam 49:​7, 8; tofa vɛlɛ vidueiyo hoo, Le yɛɛ Chiisu vi yɛ?) a Lelaŋ, mi Chɛhowa kɛɛsiaa le mi Chiisu yɔŋgu yoomu ndɔɔ le naa baŋaa. Salaa pila nda soliŋ ni le hei tosaa. (Luomaŋ. 6:23) Mɛɛ naŋ yiyaŋ fau a sala Chɛhowa nda Chiisu soliŋ le naa wo okɔɔ, lende koni naŋ chɔm balika melaa le sala baŋaa ni. Ŋ cho hunɔɔ chɔ sɔɔŋ ŋtiŋ, ŋ Chɛhowa nda Chiisu soliŋ sala le naa woŋ. Kɛ, ŋ tofaŋndɔ le sabu sala baŋaa ndoo yeemaŋ ndo.

6. Le yɛɛ sala baŋaa ndoo yeemaŋ yɛ?

⁶ Baŋaa cho nyɛ waŋndo yɔŋgu le nyɔɔ miŋgioo piondɔɔ wo ni. Mɛɛ Chɛhowa toosiaa Adam, o waŋnuŋ walaŋ. Kɛ mɛɛ o tosa hakioo, mi dikeŋnaŋ ndoo nɔ le yoomu fafɛɛŋndo tueiyɔɔ yeela wo hialuŋ ndu, vɛlɛ a chuauwaa nduaa. Le mi Chiisu ndoo paawa le nyɛ hɛluŋ Adam ndo, mɛɛ mi ndoo soliŋ yoomu ndɔ walaŋndo sala. Baabuiyo dimi maa, teleŋ o wa o chieeŋndo choo wo, “o tosa haki o haki le, kɛlɛŋgaa niŋ te mbo dimi choolaŋ.” (1 Pitɛ 2:22) Chiisu wa walaŋ mbo sɔla piɔmndo. Lende koni Adam wa ni tuupa mbo tosa hakioo. Lelaŋ, mɛɛ o soliŋ yoomu ndɔɔ sala, mbo paawa le nyɛ hɛluŋ Adam ndo.—1 Kɔliŋ. 15:45; 1 Timo. 2:6.

7. Tɔɔndaŋnda kuɛɛ komallɛ Chiisu teleŋ o wa o lɛŋndeŋ choo wo?

⁷ Mi Chiisu hiau lachi a Finya ndɔ o choo choo niŋ diikɔŋndo o nɛi walaŋndo choo, mi che bɛɛ mi tɔɔndaŋnda bɔɔbɔɔ komal ndu teleŋ o wa o lɛŋndeŋ choo wo. Teleŋ o wa o pɔmbɔ wo, mbo diikuŋ wanaa velu ndu wa. Mi che bɛɛ o wa walaŋ, kɛ nda ve walaŋ te. (Luku 2:51) Mɛɛ o simnuŋ feleŋgɔnɔɔ, ndoo nɔ mbo chɔulaba tɔɔndaŋnda wa ndu komal le kiɔɔ diikɔŋndo ɔɔ le loo o laalaŋ ndɔɔ choo laŋ. Nduyɛ mɛɛ o simnuŋ kaasoŋnɔɔ, mi Setana luei lo lechoo ndɔɔ o Mɛlɛka lo o tofaa bɛŋgu. Lelaŋ, ndoo nɔ mbo sim yi le tɔɔndaŋnda wa ndu komaltaŋ. (Maa. 4:​1-11) Yeemɛi Setana ve wa ni, le mi Chiisu ndoo tosa hakioo, le halikpeŋ o soliŋ yoomu ndɔɔ sala le naa le.

8. Tɔɔndaŋnda cheleŋ kuɛɛ Chiisu biunuŋ yɛ?

⁸ Teleŋ Chiisu wa yooŋgu kɛndɔɔ dimioo o lɛŋndeŋ choo wo, mi tɔɔndaŋnda cheleŋ la komal ndu, nduyɛ mbo biunuŋ ndaŋ. Mi waŋnda tusi ndu nyɛpalaa choo, vɛlɛ ma kɔŋgɔliaŋ ndu le ndu diyɔɔ. (Luku 4:​28, 29; 13:31) Ndoo nɔ vɛlɛ mi ndoo biunuŋ biondɔŋnda buɛiyaa nduaa. (Maki 9:​33, 34) Teleŋ nda wa ndu yamɛi kilullo wo, ma luaa ndu vɛlɛ ma tusi ndu siɔmbulaŋ. Okoŋ kɔɔli, mbo sinaŋ nyɛ nɛiyaa tau, nduyɛ ma dii ndu diyɔɔ imɔnɔɔ,  naŋ chaa viinɔɔ o wa ni. (Hibu. 12:​1-3) Mbo biunuŋ nyɛ nɛiyaa mɛɛlaa o yɔmndo choo a ba ndɔ, Chɛhowa mala ndu le. b—Maa. 27:46.

9. Vɛɛ ŋ yiyaŋ yɛ a sala soliaŋ Chiisu wo okɔɔ? (1 Pitɛ 1:8)

⁹ I cho kpendekele maa, mi Chiisu sɔla saŋgaa tau le halikpeŋ mbo soliŋ sala le naa. Te ŋ yiyaŋ pɛ a sala Chiisu soliŋ le naa a kɔllo kpou wo, mi keŋ tosa miŋ nɔ kaala yiŋgoloŋndo le ndu.—Nuawɔ 1 Pitɛ 1:8.

10. Vɛɛ sala baŋaa piiliaŋ yɛ Chɛhowa?

¹⁰ Kɛ Chɛhowa yɛ? Yɛɛ o soliŋ yɛ sala a kɔllo kpou le halikpeŋ mi Chiisu baŋa naa? Chaŋyɛi kpɛɛluŋ cho Chɛhowa nda Chiisu tɛɛŋnde, cho ko mɛɛ chaŋyɛi wa nuaa finyaa a po leŋ tɛɛŋ yɛ. (Pulɔ. 8:30) Lelaŋ, yiyaŋndɔ mɛɛ kɔllo wa Chɛhowa yɛ, mɛɛ o che Chiisu tɔɔndaŋnda yɛ yɛlaŋ biuwɔŋndo teleŋ o wa o lɛŋndeŋ choo wo. I cho kpendekele maa, mi Chɛhowa sinaŋ nyɛ nɛiyaa tau mɛɛ o che ma wa Po ndɔɔ biyɔɔ wɔɔŋndo, ma kɛɛ ndu, nduyɛ ma tusi ndu kotaa choo.

11. Soliŋ tamaseliiyo kpeku le chɔmndo mɛɛ kpɛ Chɛhowa wa sinaŋndo yɛ, mɛɛ nda dii Chiisu.

¹¹ Kalaŋ chuauwaa hɔɔ ndaa vi niŋnda sina nyɛ nɛiyaa wana sinaŋndo, te hɔɔ numndo vi pɛ. Mi che bɛɛ ŋ nɔ tiindaŋ kala kalaa maa waŋvilɛiya cho miiŋgu yoomu, kɛ keŋ feŋa nyɛ nɛiyaa naŋ sinaŋndo te wana naa kaalaa vi pɛ le. Tamaseliiyo hoo chɔm naa kpendekele mɛɛ kpɛ Chɛhowa sinaŋ nyɛ nɛiyaa yɛ, mɛɛ o che ma wa Chiisu saaŋgiaa, vɛlɛ ma dii ndu a Nisaŋ 14, wɔsi 33. c—Maa. 3:17.

12. Yɛɛ naŋ nɔ yɛ miŋ tosa tuupa mi teleŋ Loonuŋyaa fuuluu?

¹² Tuupa mi Loonuŋyaa fuuluu, kindiŋ le ma pɛɛku a sala baŋaa okɔɔ o pɛɛkɔŋ num ipilayaa niŋ ɔɔ pɛɛku leyuŋgoo. Soliŋ Yau Yaasiaa ŋSɔɔ le Seiyaa Chɛhowaa kpeku, ɔɔ nyɛ cheleŋ mala num ma pɛɛku Baabuiyo wo le ma sina tau a sala baŋaa okɔɔ. d O faŋaŋ okoŋ kɔɔli, tol vɛlɛ kɛɛsiaa cho le diomndaŋ veeloo o Baabuiyo niŋ a Loonuŋyaa okɔɔ wo kɔɔli. Kɛɛsiaa hoo cho o Yoomu Naa leKilisiɔŋndo a Wali Pollo—Yau Wali Bɔŋaŋndo niŋ. Nduyɛ o paale Loonuŋyaa choo, puɛɛnuŋ le Piɛile Idiile teŋgeŋnde cho wa a Loonuŋyaa okɔɔ leŋ tofaa le. Te ŋ bɛɛndiaa pɛ kɔlta naalaŋ le Loonuŋyaa, ŋ cho wa a bɛɛndiaŋ le acheleŋnda malaa mi nda bɛɛ sɔla tɔnɔɔ leniŋ.—Ɛsi. 7:10.

 MALA ACHELEŊNDA LE MA SƆLA TƆNƆƆ

13. Ɔɔ nɛi tase naŋ soliŋ kpeku le acheleŋnda malaa ma sɔla tɔnɔɔ o Loonuŋyaa wo?

¹³ Vɛɛ naŋ mala yɛ acheleŋnda le ma sɔla tɔnɔɔ o Loonuŋyaa? Nɛi tase naŋ tosa keŋ ndo cho nda veeloo ni. O faŋaŋndɔ o wanaa naŋ cho veelu te ŋ kuɛ pɛ o wali pollo niŋnda kɔɔli, ŋ tosa kɛɛsiaa le poonyiaa diola wanaa naŋ yeema miŋ veelu wa. Mɛɛ wanayaŋ naŋ, wanaa naŋ tosa wallo wa, a naŋ kua o sukuu wa, a acheleŋnda cho nuaa yɛ. O yɔŋ bɛɛ miŋ nɔ yaula veelaa laŋ tau o ba le, ŋ nɔla miŋ piɔu nyɛ yaa wana o tɛɛŋgii nɛi choo le yau veelaa sɔlaa wo. Kɔndɔfillo cho naa biyɔɔ te ŋ che pɛ mi wanaa bɔɔbɔɔ bii Loonuŋyaa.—Ikili. 11:6.

14. Tɛɛsiaawɔ mɛɛ yau veelaa waŋndo sɔla wo piiliaŋ ndu yɛ.

¹⁴ Fɛɛŋ bɛɛ wu ŋdial le waŋndo yau veelaa kioo le. Kanifuule, a sina mɛɛ kpɛ o cho ndu piiliaŋ yɛ le. Paale pilɛ, mi kɔndɔfillo bii ndepilɛnɔ pɔnɔ ndɔ cho Chɛhowa piɛi le wo, mɛɛ pɔnɔ ndɔ dimul ndu maa o cho lakɔ o Loonuŋyaa. Le yɛɛ? Kanifuule teleŋnda bɔɔbɔɔ o paandoo niŋ, mi ndoo dɛɛniaa ndu le kɔlaŋ o Loonuŋyaa, kɛ pesiŋ bɛɛ ndoo kue le. Le yɛɛ sɔɔŋ siŋgaŋ yɛ a teleŋndo hoo? Mi pɔnɔ ndɔ dimi aa, “A teleŋndo hoo, mi sɔla yau veelaa le Loonuŋyaa.” Mbo chɔɔlu tɛɛsiaa maa, bɛndu kunda ndaa siiniaŋ o tanda koŋ niŋndo, ke ndu yau veelaa koŋ ni. Mi pɔnɔ ndɔ bii Loonuŋyaa wɔsi koŋ, nduyɛ mbo hiau lachi a ndu biyɔɔ le wɔsiŋ bɔɔbɔɔ.

15. Yɛɛ naŋ nɔ yɛ miŋ kɛsiŋ o kɔl te ŋ wa pɛ waŋnda veeloo o Loonuŋyaa?

¹⁵ Kɛsiŋ o kɔl maa, lepum mi wanaa naŋ veelu o Loonuŋyaa wa nyuna naa a ndu okɔɔ, taama taama te a hiŋndɔ o bɔŋaŋnda naalaŋ paandu le. O wa ikɛndɛ miŋ wa nyunala ndalaŋ kɔl nduyɛ miŋ bɛɛndiaŋ le laŋ mulioo. (Kolo. 4:6) Le tamaseliiyo, mi apum nyunaŋ aa: ‘Yɛɛ cho yɛ yɔŋnɔŋ o dunyɛi hei?’ ‘Vɛɛ kpɛ i cho yɛ viouwɔɔ?’ ‘Baa nyɛla teŋgeŋ cho pa la ya nɔ mi wounuŋ ndaŋ?’ ‘Baa I nɔ pa mi paawa ikani le dunyɛi hei?’ ‘Baa a wa ya niŋ pa kɔl le mi yɔŋgu tooloo te I kuɛ pɛ?’ Te ŋ veelu pɛ waŋndo o Loonuŋyaa, naapum ŋ nyuna ndu aa, “A nɔ  pa nyuna kɛ kɛ?” Nduyɛ miŋ tɛɛsial ndu kiisaŋ kɛ kɛ o nɔ pɛ. Ŋ soliŋ vɛlɛ vidueilaŋ ndaŋ kpeku, Loonuŋ a Piɔm Chiisu wo Okɔɔ a Yɛɛ Naŋ Tosa yɛ o Toŋgo naa leMasaa Niŋ? le waŋndo malaa mbo bii bila mɛɛ naŋ bii bɔŋaŋnda naalaŋ yɛ. Nduyɛ suɛi lebolii 28 o yauwo hoo niŋ, Tuei Yoomoo Yeela Lefafɛɛŋ! ke naa vɛlɛ nɛila yɛ yɛla naŋ soliŋ kpeku le wana koŋ malaa laŋ.

16. Ɔɔ nyunala cheleŋnda wanaa sɛnɛiyaa bii Loonuŋyaa wa nyuna laŋ?

¹⁶ Te wanaa sɛnɛiyaa nɔ yeemɛiya bii pɛ Loonuŋyaa, naapum ma nɔ nyunala cheleŋ. Ma nyuna dɔɔ aa, le yɛɛ waŋnda nyɛɛmbɔ koni de beediiyo ni, nduyɛ ma kol muɛiyaŋ ɔɔ le yɛɛ wana o wana di beediiyo vɛlɛ ma kol muɛiyaŋ te? Ma yiyaŋ vɛlɛ mɛɛ kpɛ naŋ bii bɔŋaŋ Loonuŋyaa yɛ. Naapum ma yeema vɛlɛ sinaa te o nɛi pilɛ koŋ choo kpe Seiyaa Chɛhowaa bii bɔŋaŋnda ndalaŋ ni. Mi che bɛɛ ma yaasiaa sɔɔŋ muŋ a teleŋ nda wa suɛi Loonuŋyaa yɔŋgoo ve, kɛ wanaa sɛnɛiyaa huŋ nda yeema ma chɔɔlu sina tau a muŋ okɔɔ. Buŋgɛi cho o jw.org choo a suɛi lebolle aa, “Le Yɛɛ Seiyaa Chɛhowaa Bii Bɔŋaŋ Nyɛdiaa Ichɔl Masanɔɔ Mɛɛ Kaaŋii Cheleŋnde Bii Ndu yɛ Le?” Buŋgɛi hei mala vɛlɛ le nyunalaŋ ndaŋ latiŋ mulioo. Ŋ yeema miŋ tosa o naŋ tiuba wo tuupa mi Loonuŋyaa fuuluu, te o fuuluu pɛ, nduyɛ te o chuu pɛ, le ‘wanaa nɔ yeemɛiya’ malaa ma sɔla tɔnɔɔ o bɔŋaŋndo hoo.—Walta. 13:48.

MALA WANAA VI ŊDIALLA

17. Vɛɛ bɛnduaa kundaa mala yɛ wanaa vi ŋdialla? (Isikiaa 34:​12, 16)

¹⁷ Vɛɛ bɛnduaa kundaa mala yɛ wanaa vi ŋdialla a boondii Loonuŋyaa? La chɔm maa la buulaŋ le nda. (Nuawɔ Isikiaa 34:​11, 12, 16.) Tuupa mi Loonuŋyaa fuuluu, la dɔu sɛmbɔɔ tau le nda nuuviaa. La dimul nda maa la buulaŋ a nda okɔɔ, nduyɛ maa la yeema nda malaa o nɛi o nɛi niŋ. Veelu nda o Loonuŋyaa. Te a hiŋ pɛ, demul nda a dialuŋ fulaa. Te Loonuŋyaa chuu pɛ, hiou lachi a puaapiliaa a ndepiliaa haa yilɔɔ, nduyɛ ma ke nda mala kɛ kɛ nda yeema pɛ le ma miiŋgu Chɛhowa o ibuŋ.—1 Pitɛ 2:25.

18. Vɛɛ naa kpou o kundaa niŋ mala yɛ wanaa vi ŋdialla? (Luomaŋnda 12:10)

 ¹⁸ Naa kpou o kundaa niŋ tiuba miŋ mala wanaa vi ŋdialla le ma bii Loonuŋyaa. Vɛɛ naŋ tosa yɛ keŋ? Ŋ tosa keŋ te ŋ chɔm nda pɛ kaalaa, miŋ tosal nda kɛndɛi, vɛlɛ miŋ ke nda bɛɛleŋ. (Nuawɔ Luomaŋnda 12:10.) Loonuŋ maa, i ve bɛɛŋ bɛɛŋ lepum nda o ba le ma miiŋgu bɔŋaŋndaŋ biyɔɔ le. Naapum mi siooŋnde wa nda maa waŋnda chiee niŋ nda biyɔɔ le. e Lelaŋ, nyuna nda nyunala tɛɛmbuu nda kɔllo laŋ ɔɔ ma dimul nda sɔɔŋ tɛɛmbuu nda kɔllo woŋ te. (1 Tɛsa. 5:11) Chaaŋaa naa laalaŋnda puaapiliaa a ndepiliaa haa cho ni. Le hei, ŋ nɔ vɛlɛ miŋ wa a kɔl kɛndɛ le Mɛlɛka naa piɛiyo a nda latulu.—Sam 119:176; Walta. 20:35.

19. Tɔnɔla kuɛɛ naŋ sɔla yɛ te ŋ loonuŋ pɛ a piɔm Chiisu wo okɔɔ?

¹⁹ Ŋ nɔ bɔɔ balika melaa le mɛɛ Chiisu dimul naa le miŋ wa loonɔŋndo a piɔm ndɔɔ okɔɔ iwɔsi o wɔsi yɛ. Nduyɛ ŋ bii bila le sabu hei cho suɛi sɔvɛ wo. Te ŋ bii pɛ Loonuŋyaa, mi naapila sɔla tɔnɔɔ, vɛlɛ miŋ mala acheleŋnda o nɛila bɔɔbɔɔ niŋ. (Aisaya 48:​17, 18) Mi kaala naŋ nɔ le Chɛhowa a Chiisu wo hiou lachi a kaloo poŋ, nduyɛ miŋ chɔm mɛɛ kpɛ naŋ nɔ balika melaa le nyɛ nda tosal naa wo yɛ. Miŋ kindi vɛlɛ chaŋyɛi cho naa tɛɛŋ naa chaaŋaa naa laalaŋnda ve, vɛlɛ miŋ mala acheleŋnda le ma tuei salala sala baŋaa chuu naalaŋ yeela. Maa ŋ tosaŋ nyɛ o nyɛ naŋ tiuba, le miŋ bɛɛndiaŋ le paale Loonuŋyaa naŋndee. Paaleŋ ndeŋ le hiau niŋ wa le sɔvɛ o wɔsioo hoo niŋ.