1. Samu na yinki kilumbu ya Mbambukulu kele kilumbu mosi yina meluta mfunu na mvula? (Luka 22:19, 20)

 SAMU na bisadi ya Yehova, kilumbu ya Mbambukulu ya lufua ya Yesu kele kilumbu mosi yina meluta mfunu na mvula. Yakele nkinzi kaka mosi yina Yesu mepesaka mpenza ntumu na banlonguki na yandi basalaka. (Tanga Luka 22:19, 20.) Beto kevingilaka na nsatu ya ngolo Mbambukulu samu na bamfunu mingi. Beto tadila ndambu ya bamfunu yango.

2. Yinki kele ndambu ya bamfunu yina kesalaka ti beto vingila Mbambukulu na nsatu ya ngolo?

² Mbambukuklu kesadisaka beto samu beto yindula na mpinda na zulu ya mfunu ya nkudulu mpe ya balusakumunu nionso yina beto kebaka na nzila na yau. Yakebambulaka beto mutindu beto lenda monisa butondi samu na nkayilu ya Yesu. (2 Bk. 5:14, 15) Yakepesaka beto diaka diluaku ya ‘kukindasana’ na bampangi na beto. (Bar. 1:12) Bampangi mingi yina melembaka kukutakana na balukutakanu na beto kekuiza na Mbambukulu. Bayankaka kebakaka nzengolo ya kuvutukila Yehova samu na nzola yina bakemonisinaka bau na Mbambukulu. Mpe bantu mingi kesepelaka na mambu yina bakemonaka mpe bakekuwaka, mpe bakevuandaka na nsatu ya kubanda kulonguka Biblia. Mambu nionso yayi kesalaka ti Mbambukulu vuanda mpenza spesiale samu na beto!

3. Yinki mutindu Mbambukulu kesangisaka bampangi na beto na yinza ya mvimba? (Tala diaka foto.)

³ Beto kevingilaka diaka Mbambukulu na nsatu ya ngolo samu beto mezaba ti na kilumbu yango beto kevuandaka na bumosi na bampangi na beto na yinza ya mvimba. Bambangi ya Yehova kesanganaka na yinza ya mvimba ntangu muini kelekaka malembemalembe.  Beto kekuwaka beto nionso diskur yina kebulaka nsoso na mfunu ya nkudulu. Beto keyimbilaka miyimbu zole samu na kukumisa Yehova, beto kelutisaka dimpa mpe vinu, mpe beto ketubaka na ntima ya mvimba “amen” na bisambu 4. Na bawola 24 kaka ya kilumbu yango, bimvuka nionso kesalaka kaka mutindu yina. Kanisa na kiese yina Yehova mpe Yesu fueti vuanda na yau ntangu bakemonaka beto nionso na ntoto ya mvimba beto kena kukumisa bau na mutindu yina.

4. Yinki beto ketubila na disolo yayi?

⁴ Na disolo yayi, beto ketubila biuvu yayi: Yinki mutindu beto lenda bongisa ntima na beto samu na Mbambukulu? Yinki mutindu beto lenda sadisa bantu yankaka samu babakila yau mambote? Mpe yinki mutindu beto lenda sadisa bantu yina melembaka kusamuna mpe kukuiza na balukutakanu? Bamvutu ya biuvu yango kesadisa beto beto vuanda ya kubongama samu na diluaku yango ya nlongo.

YINKI MUTINDU BETO LENDA BONGISA NTIMA NA BETO SAMU NA MBAMBUKULU?

5. (a) Samu na yinki beto fueti kanisa na zulu ya mfunu ya nkudulu? (Nkunga 49:7, 8) (b) Yinki dilongi nge mebaka na video Samu na yinki Yesu kufuaka?

⁵ Mosi ya mitindu yina meluta mfunu yina beto lenda bongisa ntima na beto samu na Mbambukulu kele ya kukanisa na valere ya nkudulu ya nkayilu ya Yesu Klisto. Na beto mosi, beto lendaka ata fioti ve kukikatula na disumu mpe na lufua. (Tanga Nkunga 49:7, 8; tala diaka video Samu na yinki Yesu kufuaka?) a Na yau Yehova bakaka nkubukulu samu Yesu pesa luzingu na yandi, samu na kuvukisa beto. Yehova mpe Yesu kukiyiminaka mpenza. (Bar. 6:23) Ntangu beto kena kuyindula na mpinda na mutindu Yehova mpe Yesu kukiyiminaka samu na beto, beto kevuanda na butondi mingi samu na nkudulu. Beto ketadila kaka mambu ndambu ya mpasi yina Yehova mpe Yesu vuandaka pene ya kusala samu na beto. Kasi ya ntete, nkudulu vuandaka lomba yinki mambu?

6. Nkudulu vuandaka lomba yinki mambu?

⁶ Nkudulu kele ntalu yina bakefutaka samu na kusumba diaka kima mosi. Adamu, muntu ya ntete vuandaka ya kukoka ntangu basalaka yandi. Ntangu yandi salaka disumu, yandi zimbisaka kivuvu ya kuzinga mvula na mvula kaka samu na yandi mosi ve kasi mpe samu na bana na yandi nionso. Samu na kusumba diaka kima yina Adamu zimbisaka, Yesu pesaka luzingu na yandi mosi ya kukoka lokola nkayilu. Na luzingu na yandi ya mvimba na ntoto, Yesu ‘salaka disumu ve, bamonaka mpe ve luvunu na yinua na yandi.’ (1 Pi. 2:22) Na ntangu ya lufua na yandi, luzingu ya kukoka ya Yesu kokanaka mpenza na luzingu yina Adamu zimbisaka.​—1 Bk. 15:45; 1 Tm. 2:6.

7. Yinki ndambu ya mambu ya mpasi Yesu kutanaka na yau ntangu yandi vuandaka na ntoto?

⁷ Ntangu Yesu vuandaka na ntoto, yandi zitisaka Yehova na konso diambu ata ntangu yavuandaka mpasi samu na yandi na kusala yau. Ntangu Yesu vuandaka muana fioti, yalombaka yandi zitisa kimfumu ya bibuti na yandi yina vuandaka bantu ya kuzanga kukoka atako yandi butukaka muntu ya kukoka. (Luka 2:51) Ntangu yandi kumaka ntuenia, yalombaka yandi telemina mbamba ya bantu yankaka yina mbala yankaka vuandaka zola yandi bika kuzitisa bibuti na yandi, to yandi bika vuanda ya kukuikama na Yehova. Mpe ntangu yandi kumaka mbuta, yalombaka Yesu telemina bantotolo ya Satana Diabulu, ata ntotolo ya kutubila yandi mbala mosi yandi bika bikana ya kukuikama na Nzambi. (Mat. 4:1-11) Satana vuandaka na nzengolo ya kusadisa Yesu disumu samu yandi bika diaka kuvuanda na dikoki ya kufuta nkudulu.

8. Yinki mambu ya mpasi yankaka Yesu kangilaka ntima?

⁸ Ntangu yandi vuandaka sala kisalu na yandi awa na ntoto, Yesu kutanaka diaka na mambu yankaka ya mpasi. Bambeni na yandi vuandaka telemina yandi mpe basosaka kufua yandi. (Luka 4:28, 29; 13:31) Yalombaka yandi kanga ntima na banzimbala ya banlonguki na yandi. (Mar. 9:33, 34) Ntangu  bavuandaka sambisa yandi samu na luzingu na yandi, baniokolaka yandi mpe bavuezaka yandi. Na manima bakufuaka yandi na mutindu mosi ya mpasi mpenza mpe ya nsoni. (Ebr. 12:1-3) Yalombaka yandi kanga ntima na mpasi ya nsuka ya luzingu na yandi yandi mosi, kondua lutanunu ya Yehova. b​—Mat. 27:46.

9. Yinki mutindu beto kekukimonaka samu na nkayilu ya Yesu? (1 Piere 1:8)

⁹ Yamemonana puelele ti Yesu niokuamaka mingi samu na kupesa nkudulu. Ntangu beto kekanisaka na mambu nionso yina Yesu vuandaka pene ya kukiyimina samu na beto, yakesalaka beto vuanda na nzola ya mpinda samu na yandi.​—Tanga 1 Piere 1:8.

10. Yinki Yehova kukiyiminaka samu na kupesa nkudulu?

¹⁰ Yinki beto ketuba samu na Yehova? Yinki mambu yandi vuandaka pene ya kukiyimina samu Yesu futa nkudulu? Yehova mpe Yesu kevuandaka na kinkundi mosi ya ngolo yina lenda vuanda kati na tata mpe muana. (Bin. 8:30) Kanisa ntete mutindu Yehova vuandaka kukimona ntangu yandi vuandaka mona Yesu kena kukanga ntima na banzomono mingi ntangu yandi vuandaka na ntoto. Kondua ntembe Yehova vuandaka mona mpasi ya ngolo ntangu yandi vuandaka mona mutindu bavuandaka niokola, kuyina, mpe kumonisa Muana na yandi mpasi.

11. Sadila kifuani mosi samu na kumonisa mutindu Yehova kukimonaka ntangu bakufuaka Yesu.

¹¹ Konso kibuti yina mefuilaka muana, mezaba mpasi ya ngolo yina diambu yango kebimisaka. Beto kele na kiminu ya ngolo na mfutumukunu, kasi yakekatulaka ve mpasi yina beto kemonaka kana muntu mosi yina beto kezolaka mekufua. Kifuani yayi kena kusadisa beto beto bakusa mpasi yina Yehova vuandaka mona ntangu yandi vuandaka tala Muana na yandi ya nzola kena kuniokuama mpe kena kufua na kilumbu ya prenta ya mvula 33 N.B. c​—Mat. 3:17.

12. Yinki beto lenda sala na basabala yina kevuandaka tekila Mbambukulu?

¹² Kubanda bubu yayi tii na Mbambukulu, meka kulonguka mingi mambu metadila nkudulu na ndongokolo na nge mosi to na nsambudulu ya dibuta. Sadila Buku ya bolukiluki mpo na Batatoli ya Yehova (kana yakele na ndinga na beno) to mikanda yankaka yina kesasilaka Biblia samu na kubakusa mambu yankaka na diambu metadila nkudulu. d Diaka, kukibongisa samu nge landa programe ya ntangulu ya Biblia samu na Mbambukulu yina kebimaka na Mukanda ya lukutakanu luzingu mpe kisalu ya Baklisto. Mpe na kilumbu ya Mbambukulu  kuzimbakana ve kutala programe ya spesiale ya Nsambudulu ya sunka. Ntangu beto kena kubongisa ntima na beto samu na Mbambukulu, beto kevuanda mpe na dikoki ya kusadisa bantu yankaka samu babakila yau mambote.​—Esd. 7:10.

SADISA BANTU YANKAKA SAMU BABAKA MAMBOTE

13. Yinki kele diambu ya ntete yina beto lenda sala samu na kusadisa bantu yankaka babakila Mbambukulu mambote?

¹³ Yinki mutindu beto lenda sadisa bantu yankaka samu babaka mambote na Mbambukulu? Mutindu ya ntete ya kusala yau kele, kubokidisa bau. Katula bantu yina beto kekutanaka na bau mbala na mbala na kisalu ya kusamuna, beto lenda sala liste ya bantu samu na kubokidisa bau. Yalenda vuanda bampangi na beto ya dibuta, bankundi na beto ya kisalu, ya kalasi mpe bantu yankaka. Ata kana beto kele ve na ba invitation mingi ya papie, beto lenda tindila bau lien ya invitation ya kutanga na nzila ya apareyi. Beto lenda kamua mutindu bantu mingi kebaka nzengolo ya kukuiza kutakana!​—Lon. 11:6.

14. Pesa kifuani yina kena kumonisa kilendo ya kupesa muntu invitation ya papie.

¹⁴ Kana nge mosi mepesa muntu invitation ya papie samu na Mbambukulu, yalenda tinda yandi yandi kuiza kutakana. Mpangi mosi ya nketo yina bakala na yandi kele ve Mbangi ya Yehova, kamuaka ntangu bakala na yandi tubilaka yandi ti yandi kekuenda kintuadi na yandi na Mbambukulu. Samu na yinki yandi kamuaka? Samu mbala mingi na ntama, yandi vuandaka kindisa yandi na kukuiza kutakana kintuadi na yandi, kasi yandi salaka kuiza ve. Mbala yayi yinki salaka lusuasanu? Bakala na yandi tubaka, “Munu bakaka invitation ya papie,” na kusasilaka ti nkulutu mosi ya buala yango yina yandi zabaka bokidisaka yandi. Bakala yango kutakanaka na mvula yango, mpe yandi kutakanaka diaka na bamvula mingi yina landaka.

15. Yinki beto fueti lunda na makanisi ntangu beto kena kubokidisa bantu na Mbambukulu?

¹⁵ Zaba ti bantu yina beto kebokidisaka lenda vuanda na biuvu​—mingimingi kana bakutakana ntete ve na mosi ya balukutakanu na beto. Na yau beto lenda kanisa na ntuala biuvu yina balenda yuvusa mpe kubongama samu na kupesa bau bamvutu. (Kol. 4:6) Na kifuani, bayankaka lenda yuvusa: ‘Yinki mutindu nkinzi yango kelutila?’ ‘Yakezingila bawola yikua?’ ‘Yakele na mutindu mosi ya bilele yina muntu fueti vuata?’ ‘Yakelomba kupesa  mbongo samu na kukutakana kuna?’ ‘Bakekongola minkayilu?’ Kana beto mebokidisa muntu mosi na Mbambukulu, beto lenda yuvusa yandi kaka, “Nge kele na biuvu?” mpe na manima pesa mvutu na biuvu yina muntu yango lenda yuvusa. Beto lenda sadila diaka bavideo Kanisa lufua ya Yesu mpe Yinki mambu kesalamaka na Yinzo ya Kimfumu? samu na kusadisa muntu yango yandi bakusa mutindu balukutakanu na beto kesalamaka. Mpe dilongi 28 ya mukanda Zinga mvula na mvula na kiese! mepesa beto makanisi mingi ya mbote yina beto lenda tubila bantu.

16. Yinki biuvu yankaka bantu yina kekutakanaka na Mbambukulu lenda vuanda na yau?

¹⁶ Na manima ya kukutakana na Mbambukulu, bantu yina sepelaka, lenda vuanda na biuvu yankaka. Balenda yuvusa, samu na yinki ata muntu mosi ve to bantu fioti kaka kudiaka dimpa mpe kunuaka vinu. Balenda yuvusa diaka kana mbala yikua beto kesalaka Mbambukulu. Balenda vuanda diaka na nsatu ya kuzaba kana balukutakanu nionso ya Bambangi ya Yehova kelutaka kaka mutindu yina. Atako baketubilaka mingi ya mambu yango na diskur ya Mbambukulu, bantu ya yimpa lenda vuanda diaka na nsatu ya bansasulu mingi. Disolo mosi na jw.org yina kele na yintu ya diambu “Mpo na nini Batatoli ya Yehova basalaka elambo ya Nkolo ndenge moko te na mangomba mosusu?” lenda sadisa beto samu na kupesa mvutu na biuvu na bau. Beto kele na nsatu ya kusala nionso yina beto lenda sala​—tekila Mbambukulu, na ntangu ya Mbambukulu, mpe na manima ya Mbambukulu—​samu na kusadisa bantu yina ‘kele na bantima mebonga’ babakila nkinzi yango mambote.​—Bis. 13:48.

SADISA BANTU YINA MELEMBAKA

17. Yinki mutindu bankulutu lenda sadisa bantu yina kele ya kulemba? (Ezekiele 34:12, 16)

¹⁷ Na ntangu ya Mbambukulu, yinki mutindu bankulutu lenda sadisa bantu yina melembaka? Monisa bau ti nge ketudilaka bau dikebi. (Tanga Ezekiele 34:12, 16.) Tekila Mbambukulu sala ngolo nge bokila bantu mingi yina nge lenda bokila. Tubila bau ti nge ketudilaka bau dikebi mpe nge kele na nsatu ya kusadisa bau na mutindu nionso yina nge lenda. Bokidisa bau bakuiza kukutakana na Mbambukulu. Kana bamekuiza kutakana, yamba bau na nzola nionso. Na manima ya Mbambukulu, tatamana kukuenda tala to kubokila bampangi yango mpe pesa bau lusadusu ya kimpeve yina bakele  na yau nsatu samu na kuvutukila Yehova.​—1 Pi. 2:25.

18. Yinki mutindu beto nionso beto lenda sadisa bantu yina kele ya kulemba? (Baroma 12:10)

¹⁸ Bampangi nionso ya kimvuka lenda sadisa bantu yina melembaka yina mekutakana na Mbambukulu. Yinki mutindu balenda sala yau? Na kusadilaka bau mambu na nzola, na kimpombo, mpe na luzitu. (Tanga Baroma 12:10.) Beno zimbakana ve ti mameme yango lenda kakatana samu na kuvutukila balukutakanu. Mbala yankaka balenda banga ti bakeyamba bau mbote ve. e Na yau beto yuvusa bau ve biuvu yina lenda tungisa bau to kutuba diambu mosi yina lenda luadisa bau. (1 Te. 5:11) Bampangi yango ya babakala mpe ya banketo kele bampangi na beto Baklisto. Beto kele na kiese ya kusambila diaka kintuadi na bau!​—Nk. 119:176; Bis. 20:35.

19. Yinki mambote beto kebakaka na kukanisa lufua ya Yesu?

¹⁹ Beto kele na butondi mutindu Yesu tubilaka beto beto kanisaka lufua na yandi konso mvula, mpe beto kebakusaka samu na yinki yakele na mfunu mingi. Kana beto mesala plina, beto mpe bantu yankaka kebaka mambote na mitindu mingi. (Yez. 48:17, 18) Beto kekudisaka nzola na beto samu na Yehova mpe Yesu. Beto kemonisaka butondi na beto samu na mambu yina basalaka samu na beto. Beto kekumisaka nguizani na beto na bampangi na beto Baklisto ngolo. Mpe beto lenda sadisa bantu yankaka balonguka mutindu bau diaka balenda baka balusakumunu yina nkudulu kepesaka. Bika beto sala nionso yina beto lenda, samu beto vuanda ya kubongama samu na Mbambukulu ya mvula yayi​—kilumbu yina meluta mfunu na mvula!