1. Morwasinke ezuva lyoMurarero gwaHompa lyakarera nomulyo unene momvhura? (Rukasa 22:​19, 20)

 EDIWOROKO lyonomfa daJesus kuna kara ezuva lyomulyo po unene momvhura kovantu vaJehova. Yiso selike silika esi Jesus ga pangerere varongwa vendi nava limburukwa. (Resa Rukasa 22:​19, 20.) Twa kara nonokonda dononzi deyi natu ndindilira noruhafo pokuyakara poMurarero gwaHompa. Tu zeni tu ka zogere ko dimwe.

2. Nokonda musinke dimwe deyi natu ndindilira noruhafo pokukara poMurarero gwaHompa?

² Murarero gwaHompa kutuvatera tu tede ko komulyo gosizoweseso ntani nomauwa aga atu gwana. Ayo kutudiworokesa nonkedi omu natu likida rupandu rwetu konzambo zaJesus. (2 Kol. 5:​14, 15) Ayo kutupa hena mpito yipo tu hafere ‘kulikorangeda’ novanavazinyetu. (Rom. 1:12) Nkenye mvhura, sinzi sovanavazinyetu ava vatengura monyima kukara poMurarero gwaHompa. Vamwe kwa tengura kwaJehova morwa kwava tambwire nawa. Vamwe kuvahafesa kweyi ava mono neyi ava zuvhu, ano eyi kuvaninkisa va tameke kulironga Bibeli. Nayinye eyi kuninkisa Murarero gwaHompa gu kare nomulyo unene kwetu.

3. Ngapi omu Murarero gwaHompa agu reta kumwe vanavazinyetu uzuni mudima? (Tara hena efano.)

³ Ose hena kundindira noruhafo ezuva lyoMurarero gwaHompa morwa twa yi diva asi pezuva olyo ose kuponga kumwe novanavazinyetu uzuni mudima. Nombangi daJehova kuponga uzuni mudima ngomu lina katoka ezuva. Natuvenye kupurakena kosiuyungwa esi asi nkondopeke mulyo gonzambo zaJesus. Ose kudimba nonsumo mbali doUhompa, kupitisa vhinyu nomboroto ntani komakanderero gane ose kuuyunga kutundilira  komutjima asi “Amen.” Monovili 24, nombungakriste uzuni mudima kukwama ngendeseso zokulifana. Gazadara ko koruhafo oru a lizuvhu Jehova naJesus pokutumona tuna pongo kumwe yipo tu va yererepeke monkedi ezi.

4. Yisinke natu ka zogera mosirongwa esi?

⁴ Mosirongwa esi, natu ka zogera mapuro aga gana kukwama ko. Ngapi natu liwapaikira Murarero gwaHompa? Ngapi natu vatera wopeke va gwanene mo uwa? Ntani ngapi natu vatera ava vatengura monyima? Malimbururo komapuro aga, naga katuvatera yipo tu kare tuna liwapaikire silika esi somulyo.

NGAPI NATU LIWAPAIKIRA MURARERO GWAHOMPA?

5. (a) Morwasinke natu gazadarera ko mulyo gosizoweseso? (Episarome 49:​7, 8) (b) Yisinke ono lirongere mo movidiyo Morwasinke ga fililire Jesus?

⁵ Nkedi zimwe zomulyo po unene omu natu liwapaikira Murarero gwaHompa kuna kara pokuteda ko komulyo gonzambo zaJesus Kristusa. Kwato eyi natu vhura kurugana ko pwanyamwetu yipo tu kandane po nonzo nonomfa. (Resa Episarome 49:​7, 8 ntani tarera vidiyo Morwasinke ga fililire Jesus?) a Yipo nye, Jehova kwa tulisire po mawapaiko yipo Jesus a gave eparu lyendi mokutuparura. Jehova naJesus kwa tulire po malizambero gomanene. (Rom 6:23) Moomu tuna kuteda ko kelizambero lyaJehova naJesus, yimo hena ngatu kara norupandu kosizoweseso. Natu ka zogera yininke yimwe youdigu eyi Jehova naJesus va tu ruganena. Nye pomuhowo na tuka zogera asi yisinke yahamena mo mosizoweseso?

6. Yisinke ya hamena mo mosizoweseso?

⁶ Sizoweseso kuna kara mfuto ezi no vhura kufuta, yipo o zowore yuma yongandi. Muntu gokuhova ogu ga kere pevhu kuna kara Adamu, age kwa sikilire mo apa vamu sitire. Apa ga zonene, age kapi ga kere nompito zokugwana mwenyo gwanarunye, kukwatera mo vana vendi navenye. Mokurugwidira po eyi ga zumbanesere Adamu, Jesus kwa zembe eparu lyendi lyokusikilira mo. Apa Jesus ga kere pevhu, “age kapi ga tulire nzo, ntani mokana kendi kapi nga mu tundu yimpempa.” (1 Pet. 2:22) Apa ga fire, age kwa sikilire mo ngwendi moomu ga sikilire mo Adamu komeho a zone. Yipo nye, apa Jesus ga fire, age kwa futire eyi ga zumbanesere Adamu.—1 Kol. 15:45; 1 Tim. 2:6.

7. Maheteko musinke gamwe ga ligwanekerere nago Jesus apa ga kere pevhu?

⁷ Apa Jesus ga kere pevhu, age kwa limburukwire oGuhwe vemeguru nampili ngomu ya kere udigu kuyirugana. Jesus kwa kere munona gokusikilira mo, nye vakondi vendi kapi vasikilire mo. Nye nampili ngoso, age kwa va fumadekere. (Ruk. 2:51) Ngomudinkantu, age ga hepere kunyokera po maheteko aga ngano ga mu ninkisire a dire kulimburukwa vakondi vendi nokurugana yininke eyi nayi dira kuhafesa Jehova. Apa Jesus ga kere mukondi, ga hepere kunyokera po maheteko gokutunda kwaSatana aga ga mu ninkisire ngano a zone nokumutantera kuyukilira a hageke kulimburukwa Karunga. (Mat. 4:​1-11) Satana kwa tokomenene kuninkisa Jesus a ture nzo yipo a dire kufuta sizoweseso.

8. Maheteko musinke hena gamwe ga lididimikilire Jesus?

⁸ Apa Jesus nga zuvhisa, age kwa lididimikilire hena maheteko gamwe. Nonkore dendi kwa mu hepekere ntani kwa here kumudipaga. (Ruk. 4:​28, 29; 13:31) Age kwa lididimikilire ediro kusikilira mo lyovarongwa vendi. (Mar. 9:​33, 34) Siruwo nasinye esi ga kere mompanguro, age kwa mu hepekere noku mu swaura. Ntani kwa mu dipagere monkedi zokukoresa unene ntani zoku swaukisa. (Heb. 12:​1-3) Age kwa lididimikilire  pwamwene apa vamu dipagere pwa hana evatero lyaJehova. b—Mat. 27:46.

9. Ngapi atu lizuvhu kuhamena nzambo ezi ga geve Jesus? (1 Peturusa 1:8)

⁹ Jesus kwa mu hepekere unene yipo a vhure kufuta sizoweseso. Apa atu gazadara ko komalizambero aga ga tulire po Jesus mokutufira, ayo kutuninkisa tu mu hare unene.—Resa 1 Peturusa 1:8.

10. Yingapi ga hepere Jehova yipo a fute sizoweseso?

¹⁰ Yisinke ga rugene Jehova yipo Jesus a vhure kufuta sizoweseso? Jehova naJesus kwa kara nelikwatakano lyenene eli lyakara pokatji ka guhya nomuna. (Yis. 8:30) Gazadara ko tupu omu Jehova ya mu kundamene pokumona Jesus kuna kulididimikira mahepeko gomanzi apa ga kere pevhu. Jehova kwa lizuvhire kukora kokunene apa ga mwene Munendi omu vana kumutekura momudona ntani nomu ana kuhepa.

11. Ruganesa sifanekeso esi sina kulikida omu Jehova ga lizuvhire apa Jesus va mu hepekere.

¹¹ Nkenye mukurona ogu ga fisa munendi, ga diva nawa-nawa kukora kokunene oku ga lizuvhire. Ose twa kara nepuro lyenene mevhumbuko, nye nampili ngoso, apa muntu ogu twa hara a fu, ayo kutukoresa unene komutjima. Sihonena esi sa tu vatere tu kwate egano omu Jehova ga lizuvhire pokumona Munendi kuna kuhepa noku ya fa koyiha yomvhura 33. c—Mat. 3:17.

12. Yisinke nga tu rugana moyivike eyi ngayi twaredesa koMurarero gwaHompa?

¹² Kutunda apa dogoro poMurarero gwaHompa, hetekera ko kulironga unene kuhamena sizoweseso pelirongo lyoge lyoBibeli ndi poUkareli wEpata. Ruganesa buke zepaparo zoNombangi daJehova (nsene mozili meraka lyeni) ndi kuvhura hena o ruganese yimbapiratjangwa yimwe, yipo o gwane mauzera kuhamena sizoweseso. d Divilisa asi ove kuna kuresa elikwamo lyereso lyoBibeli lyoMurarero gwaHompa eli lya kara moMbapira zekepongo—Eparu lyetu noyirugana yokuzuvhisa. Ano pezuva lyoMurarero gwaHompa, kapisi ngo divare kutarera ukareli wongura-ngura woMurarero gwaHompa. Nsene tu liwapaikira Murarero, ayo ngayi tu tompoka kuvatera wopeke yipo nawo va gwanene mo mauwa.—Esir. 7:10.

VATERA WOPEKE VA GWANENE MO MAUWA

13. Sininke musinke sokuhova natu rugana yipo tu vatere wopeke ngava ya gwanene mo mauwa poMurarero gwaHompa?

¹³ Ngapi natu vatera wopeke yipo ngava ya  gwanene mo mauwa poMurarero gwaHompa? Nkedi zokuhova kuna kara pokuvazigida. Kugusa ko vantu ava atu gwana mokuzuvhisa, kuvhura tuzigide vantu wopeke ava twa diva. Eyi kuvhura kukwatera mo vekoro lyetu, varugani vakwetu, ava atu dimbi nawo sure ndi ava twa diva. Nampili kapi tuna kara noyimbapira yezigido yoyinzi, kuvhura tu tume link kupitira kocellphone. Ayo nampo kuvhura ngayi tu teture apa ngatu mona sivaro sava ngava kara po.—Muud. 11:6.

14. Gava sihonena omu ya kara nomulyo kugava simbapira sezigido komuntu.

¹⁴ Apa o zigida gumwe koMurarero gwaHompa, age kuvhura a hare kuyakara po. Munazinyetu gomukadi ogu ga kara namugara gwendi gahana asi Mbangi, ya mu tetukisire apa mugara gwendi ga mu tanterere asi naza nage koMurarero gwaHompa. Morwasinke ga tetukilire? Morwa nga mu korangeda yikando yoyinzi yipo a ze koMurarero gwaHompa, nye age kapi nga zi ko. Yisinke ya retesere po malitjindjo? Age kwa tanterere mukadendi asi: “Age kwa mu pere simbapira sezigido.” Age kwa tembe mukuronambunga ogu ga divire, ogu ga mu pere simbapira oso. Momvhura ozo ntani nonomvhura edi da kweme ko, mugara gwendi nga kara poMurarero gwaHompa.

15. Yisinke natu hepa kudiworoka nsene kuna kuzigida muntu koMurarero gwaHompa?

¹⁵ Diworoka asi vantu ava atu zigida kuvhura va kare nomapuro kuhamena Murarero gwaHompa, unene po nsene kapi va za rumwe komapongo getu. Kuvhura tu gazadare ko mapuro aga nampo ngava tu pura ntani nokuliwapaikira ku ga limburura. (Koros. 4:6) Vamwe kuvhura va lipure asi ‘Yisinke ngayi ka horoka posilika esi?’ ‘Siruwo sokuhura kupi nga si kara?’ ‘Yisinke ngani vhura kudwara?’ ‘Ngani hepa ku ka futa komeho ni ka hwilire ndi?’ ‘Ngani hepa kukazumbira yimaliwa posiruwo soMurarero ndi?’ Nsene kuna kuzigida muntu koMurarero gwaHompa, kuvhura tu mu pure asi: “Ono kara ko nomapuro aga ono hara kupura?” Ntani limburura nkenye mapuro aga ana kara nago. Mokumuvatera a kwate egano omu mapongo getu ava ga gendesa, kuvhura  hena o mu likide vidiyo Diworoka nomfa daJesus ntani Yisinke atu rugana ko koSinyanga soUhompa? Ntani mobuke Hafera eparu narunye! sirongwa 28 mwa kara magano gomawa aga natu vhura kumulikida.

16. Mapuro musinke gamwe nava vhura kulipura ava ava wiza koMurarero?

¹⁶ Konyima zokukara poMurarero gwaHompa, vantu wovape ava vana hara kudiva ko yoyinzi, kuvhura va kare nomapuro. Nampo kuvhura va lipure asi morwasinke yina karere asi kwato ogu ana nu vinyu nokulya mboroto. Ndi morwasinke yina karere asi wovasesu tupu vana nu vhinyu nokulya mboroto. Kuvhura hena nampo va lipure asi rungapi atu rugana Murarero gwaHompa. Ntani nampo kuvhura va hare kudiva nsene asi mapongo nagenye goNombangi daJehova ku ga rugana monkedi zokulifana. Nampili ngomu sinzi somagano aga ava ga zogere mosiuyungwa soMurarero, vantu wovape kuvhura simpe va hepe ko mauzera gomanzi. Sirongwa soko jw.org sosiparatjangwa “Why Do Jehovah’s Witnesses Observe the Lord’s Supper Differently From the Way Other Religions Do?” kuvhura si tu vatere tu limburure mapuro gawo gamwe. Tuna hara kurugana nkenye eyi natu vhura kurugana ko komeho zoMurarero, posiruwo soMurarero ntani konyima zoMurarero yipo ngatu vatere ‘wonomutjima donongwa’ ngava gwanene mo uwa mosilika esi.—Yirug. 13:48.

VATERA AVA VATENGURA MONYIMA

17. Ngapi omu vakuronambunga nava vatera ava vatengura monyima? (Hesekiyeli 34:​12, 16)

¹⁷ Ngapi omu vakuronambunga nava vatera ava vatengura monyima posiruwo soMurarero gwaHompa? Awo kuvhura va yi rugane pokuvalikida eharo. (Resa Hesekiyeli 34:​12, 16.) Komeho nga gu kare Murarero, zigida ko vantu wovanzi nsene kuvhura. Va tantera asi wa va hara ntani ono hara kuvavatera mwankenye eyi no vhura. Vazigida koMurarero gwaHompa. Nsene ngava wiza, va tambura. Konyima zoMurarero gwaHompa, ngo twikire kudingura vanavazinyetu ava ntani nokuvapa nkenye evatero eli vana hepa yipo va tengure kwaJehova.—1 Pet. 2:25.

18. Ngapi omu natuvenye natu vatera ava vatengura monyima? (Varoma 12:10)

 ¹⁸ Navenye womombungakriste kuvhura va vatere ava vatengura monyima, ava ava kara poMurarero gwaHompa. Ngapi nava yi rugana? Poku va tekura neharo, nonkenda ntani nefumadeko. (Resa Varoma 12:10.) Diworoka asi ayo nampo kwa digoperere vanavazinyetu ava mokuwiza kepongo. Nampo awo kwa kere nowoma asi kapi ngava va tambura nawa. e Nyokera po kuvafisa nomuga poku va pura mapuro gokuvaswaukisa ndi poku va uyungira yininke eyi nayi va koresa. (1 Tes. 5:11) Vanavazinyetu ava kuna kara vapuli vakwetu. Tuna hafa kukarera Jehova kumwe nawo hena!—Epis. 119:176; Yirug. 20:35.

19. Mauwa musinke atu gwanene mo apa atu diworoka nomfa daJesus?

¹⁹ Twa kara norupandu kweyi Jesus ga tu tantera tudiworoke nomfa dendi nkenye mvhura. Ntani twa kwata egano eyi ya karera nomulyo tu yirugane. Apa atu kara poMurarero gwaHompa, ose kugwanena mo mauwa ntani kuvatera wopeke nawo vagwanene mo mauwa mononkedi dokulisiga-siga. (Jes. 48:​17, 18) Murarero gwaHompa kutuvatera tu hare Jehova naJesus. Ose kulikida rupandu kweyi va tu ruganena. Ose kunkondopeka elikwatakano lyetu novapuli vakwetu. Ntani ose kuvatera wopeke va gwanene mo uwa monzambo zosizoweseso. Tu ruganeni paapa twa hulira yipo tu liwapaikire Murarero gwaHompa gomvhura ezi, ezuva lyomulyo po momvhura!