1. Chifukwa n’ni dambo la Chikumbuso tilofuneya vinjinji va chaka? (Luka 22:19, 20)

 WA ATHU a Yehova, dambo loumbuwela khwa wa Yesu tilofuneya vinjinji va chaka. Ngu mwambo oka unoyo Yesu alamulile liye ofunjedae ira kaupangenga. (Welengani Luka 22:19, 20.) Ninofunechecha zafwanyeya vamwambo unola va vifukwa vingasi vyene. Tiyemoni nikambilane vimo-i mwa vifukwa vyevi.

2. Chifukwa n’ni ninafunechecha zafwanyeya va Chikumbuso?

² Mwambo wa Chikumbuso unonitandiza ira niganizelenga funeya wa dipo. Unoniumbucha vyevyo ninapange iyo votonyi-eda ira ninoyamikela sembe ya Yesu. (2 Akor. 5:14, 15) Ninokaana teto mwai ‘olimbikisana’ na abali na arongoli-u. (Arom. 1:12) Chaka iliyetene, abali na arongola anjinji anayo ka-iile sonkana kanofwanyeya va mwambo unola. Athu amo-i kanowelela wa Yehova chifukwa yoona mwemo abali na arongola kaawacheleleathu. Ndipo athu anjinji achidwi kanowambeela enda va sewu odowa umoyo o-omala chifukwa ya vyevyo kaonileathu koma teto vwa vamwambo unola. Chichifukwa iwa ninaonecha ira mwambo wa Chikumbuso ngofuneya vinjinji wa iyo.

3. Kodi Chikumbuso inanitandiza avi ira nikale ogwilizana vailambo yetene? (Onani teto ithuzithuzi.)

³ Kaganizelani teto mwemo mwambo wa Chikumbuso unatandizelaathu abali na arongola kala ogwilizana vailambo yetene. Va dambo leli zuwa lavolowanga, a Mboni da Yehova vailambo yetene kanakalecha kaambeelanga panga mwambo unola. Ninovuruwanecha khani ineyo inafotokoza funeya wa dipo. Ninoimbecha nyimbo mbin’li dotamanda Yehova, endi-a vizindikilo koma teto ninosomeda mokumela vati vamurima ira “ame” va mapempelo 4 anayo kanapelekiwa. Vamalanga maola 24, mipingo  detene vailambo yetene dinakalecha dingapangile vyofwanafwana. Kaganizelani chisangalalo ineyo Yehova na Yesu kanakalechanaathu kaonanga nialemekezanga mogwilizana eni.

4. Kodi ninakambilana n’ni mukhanila?

⁴ Mukhanila ninokambilana mafuso ala: Kodi ninapange avi ira nikozeeli-ede murimi-u vathawi ya Chikumbuso? Kodi ninatandize avi athu amo-iwa ira kaze kapindule na mwambo unola? Koma teto kodi ninokoza atandiza athu anayo ka-iile sonkana? Mayankho a mafuso anala kanonitandiza ira nikozeele pama mwambo ofuneya vinjinji unola.

KODI NINAKOZEELI-EDE AVI MURIMI-U VATHAWI YA CHIKUMBUSO?

5. (a) Chifukwa n’ni ninafuneya onanga ira dipo ti lantengo wavadimu? (Salimo 49:7, 8) (b) Kodi mufunjedile n’ni muvidiyo yoi Chifukwa N’ni Yesu Akhwile?

⁵ Ndila yofuneya vinjinji ineyo ninakozeeli-ede iyo murimi-u kuganizela funeya wa sembe ya Yesu Kiristu. Vaeki-u kanawande vivulumucha wu uchimo nokhwa. (Welengani Salimo 49:7, 8; onani teto vidiyo yoi Chifukwa N’ni Yesu Akhwile?) a Eno vokoza vyoi Yesu aze apeleke moywae chifukwa ya iyo, Yehova na Mwanae ofuneya vinjinji unola koopeleka ntengo ogwela vinjinji. (Arom. 6:23) Naganizelanga vinjinji vyevyo Yehova na Yesu kanipangeleathuvi, ninokoza ambeela yamikela vinjinji dipo. Ninokambilana vyongo vingasi vyene vyorucha vyevyo Yehova na Yesu kapangileathu ira dipo lipelekiwe. Koma yowambeela, kodi dipo chin’ni?

6. Kodi vafuneya n’ni ira dipo lipelekiwe?

⁶ Dipo mbamalipilo anayo kanapelekiwa vofuna ombola yongo imo-iwene. Adamu, unoyo ali muthu owambeela lengiwa, ali wangwilo. Angachimwile, liye ootatila mwai okala na moyo o-o-mala. Liye kaakede tatila moywae oka, koma ootatila teto moyo wa a-imae etene. Ira aweli-ede vyevyo Adamu atatilile liye, Yesu oopeleka moywae wangwilo. Vathawi yetene ineyo ali liye vailambwela, liye “kapangilevo chimo ndipo kaongilevo mawu achinyengo.” (1 Pe. 2:22) Vathawi ineyo akhwa liye, Yesu ali wangwilo ngati mwemo Adamu ali liye a-anachimwe, eno vyali vyowandeya weli-eda moyo unoyo Adamu atatilile liye. — 1 Akor. 15:45; 1 Tim. 2:6.

7. Kodi Yesu angali vailambwela agumanile na maesero aavi?

⁷ Yesu angali vailambwela oopitilizave vwela Babae waudimu ngakale vevo agumana liye na maesero anjinji. Angali mwana, liye afuneya vwela makolwae anayo katali angwilo ngakale ira iye ali wangwilo. (Luka 2:51) Angali nyamata, liye afuneya pewa vyongo vyevyo vyapangi-e ira kavwelenga makolwae kapena teto ira kakale ororomeleya wa Yehova. Ndipo angaulukulile, Yesu afuneya koonda maesero a Satana Mdyerekezi tangani-avo teto vyevyo amuwandela liye vyoi kakale ororomeleya wa Mulungu. (Mat. 4:1-11) Satana ooesaesa ira Yesu achimwe nayolinga yoi alepele peleka dipo.

8. Kodi mbamaesero amo-iwa aavi anayo Yesu aavilele liye?

⁸ Va utumikae wavailambwela, Yesu oovilela teto maesero amo-iwa anjinji. Oozuzumi-iwa ndipo adanae anjinji koomuopopi-a ira kanomupha. (Luka 4:28, 29; 13:31) Afuneya teto vilela vyevyo ofunjedae kalakwi-aathu. (Maliko 9:33, 34) Vevo aimbiwa liye mulandu, oopangeliwa nkhanza koma teto nyoziwa. Vanduli viwa oophiwa mwankhanza koma teto oopangi-iwa manyazi. (Aheb. 12:1-3) Afuneya vilela mbali yomari-a ya maesero vaeka, mo-okami-iwa na Yehova. b — Mat. 27:46.

9. Kodi ninavwecha avi m’murimani naganizela vya sembe ineyo Yesu apelekile liye? (1 Petulo 1:8)

 ⁹ Onga vyoona, Yesu oogumana na mavuto alukulu ira apeleke dipo. Kodi ganizela mavuto anayo Yesu agumanilena liye chifukwa yofunechecha peleka moywae, kunaupangi-ani ira mumukondenga vinjinji? — Welengani 1 Petulo 1:8.

10. Kodi Yehova alolile panga n’ni ira dipo lipelekiwe?

¹⁰ Nanga bwanji voonga vya Yehova? Kodi liye atonyi-edile avi viimana vokoza vyoi Yesu apeleke dipo? Yehova na Yesu kanokondana vinjinji ngati mwemo vinakalelaathu vaari va baba na mwanae. (Miya. 8:30) Ndiye kakedani ganizela mwemo vyamukuzeleathu Yehova muona Yesu avuteyanga. Mookaikela, vyoomuvoreya vinjinji ona Mwanae apangeliwanga nkhanza, koondiwa koma teto shishiwa.

11. Pelekani isazo yotonyi-eda mwemo Yehova avwele liye vevo Yesu aphiwa liye.

¹¹ Likolo lililetene lelo mwanae utatiile, linoiziwa pama chisoni ineyo inakalechavo chifukwa yokhweliwa. Ninororomela vinjinji ira okhwa kanoza kavenyi-iwe, koma vyevi kavinamali-a ululu unoyo ninakaana iyo muthu unoyo namukonda iyo atatiya. Isazo inela inonitandiza vwechecha mwemo Yehova avwele liye vomuona Mwanae avuteyanga koma teto khwa vadambo lelo mu 33 C.E. c — Mat. 3:17.

12. Kodi ninapange n’ni thawi ya Chikumbuso ya-anafiye?

¹² Dambo la Chikumbuso la-anafiye, bwanji mupange vyoi mufunjede vaekinyu kapena Volambela Wavabanja khani dokuza dipo? Munokoza indi-eda chito Buku la Mboni za Yehova Lofufuzira Nkhani (ngati lilivo mu iwongelo inyu) kapena mabuku amo-i ofotokoza Baibulo ira muiziwe vinjinji vakhanila. d Munafuneya teto arela ndandanda yowelengela Baibulo vanyengo ya Chikumbuso ineyo ili mu Isibuku ya Utumiki Koma Teto Moywi-u wa Ikiristu. Koma teto vadambo la Chikumbuso, kamuze mudiwale onela porogaramu yavadela Yolambela wa Mamawa. Ngati ninakozeeli-ede murimi-u vadambo la Chikumbuso, ninoza nitandize teto athu amo-iwa ira kapindule na mwambola.— Ezara 7:10.

NITANDIZENGA ATHU AMO-IWA IRA KAZE KAPINDULE

13. Romolani yongo yowambeela ineyo ninapange iyo ira nitandize athu amo-iwa pindula na Chikumbuso?

¹³ Kodi ninatandize avi athu amo-iwa ira kaze kapindule na mwambo wa Chikumbuso?  Yongo yowambeela kuwaitanela umwambo unola. Enjedela va athu anayo ninaalaleela iyo thawi detene, ninokoza lemba teto mazina a athu anayo ninafuna iyo aitana. Athu anala kanotangani-avo abali-u, afwi-u auchito, ausukulu na athu amo-iwa. Ngakale vingaoneile ira kanin’na mapepala okwakwanela oitanela athu wu Chikumbuso, ninokoza atumizela linki ya mapepala avavipangizo vyamakono. Munokoza dabwa noinjiva wa athu anayo kanaze. — Nam. 11:6.

14. Pelekani isazo yotonyi-eda ira muitanela muthu unoyo ninamuiziwa iyo wu Chikumbuso kotandiza.

¹⁴ Naava-a athu anayo ninaaiziwa iyo mapepala oitanela wu Chikumbuso, vinokoza alimbikisa ira kaze kafwanyeyevo. Dambo limo-i, murongola m’mo-iwa unoyo mamunae kai wa Mboni, oodabwa mamunaeyo angamuwandelile mosangalala ira unodowawo wu Chikumbuso. Chifukwa n’ni murongolola adabwile? Chifukwa wathawi indendai, liye oomulimbikisa mamunaeyo ira adowe afwanyeye va Chikumbuso koma kaadowawo. Ndiye chin’ni yamupangi-ile ira adowewo vathawila? Mamunaeyo amuwandelile ira, “Ndiwachela ipepala yondiitanela.” Liye afotokozile ira awachelile ipepaleyo wa ndimuwa m’mo-iwa unoyo aiziwananae liye. Chaka ineyo koma teto chaka dimo-i dinjinji, mamunaeyo ukala afwanyeyanga va Chikumbuso.

15. Kodi niumbuwelenga n’ni naitanelanga athu wu Chikumbuso?

¹⁵ Muumbuwelenga ira athu anayo munaaitanela nyo wu Chikumbuso kanokoza kala na mafuso simbwasimbwa ngati uli ulendo owambeela fwanyeya vamisonkano di-u. Ninokoza panga pama iziwelaatu mafuso anayo kananifukeathu koma teto kozeela mwemo ninaasomedele iyo. (Akol. 4:6) Mwaisazo, athu amo-iwa kanokoza funa iziwa ira: ‘Kodi wu Chikumbusowo unaya waireye n’ni?’ ‘Unaya walande thawi yoinjiva moi avi?’ ‘Kodi ndinafuneya wara n’ni?’ ‘Kodi vanofuneya ndalama yoi ndidowe ndalivele?’ ‘Kodi unodowa wakale vyoendi-a mbale ya vyopeleka?’ Namuitanelanga muthu wu Chikumbuso, nimufukenga ira, “Kodi mukaana fuso lililetene?” era eno nisomede mafuso anayo unakaena liye. Ninokoza indi-eda teto chito  mavidiyo oyi Umbuwela Ukhwa Wa Yesu koma teto yoi Inaireya chin’ni Unyumba ya Umwene? vofuna mutandiza muthu iziwa mwemo misonkano di-u dinaireelaathu. Koma teto m’muru 28 mu buku la Sangalalani na Moyo Mpakana Walewale, mukala makundo anjinji apama anayo ninakoze iyo kambilana nae.

16. Kodi athu anayo kafwanyeile va Chikumbuso kanakale na mafuso aavi?

¹⁶ Vanduli va Chikumbuso, athu achidwi anayo kazile kanokoza kaana mafuso. Aliwa kanokoza dabwa ira mbaathu oyeva oka (ngati kalivo) anayo kadjile vizindikilo. Kanokoza funa teto iziwa ira ninapangecha mwambo wa Chikumbuso maulendo mangasi va chaka. Koma teto kanokoza funa iziwa ngati misonkano da Mboni da Yehova dinaireyecha mundila yofwanafwana. Ngakale ira anjinji mwa makundo anala kanofotokoziwa mukhani ya va Chikumbuso, athu asha anala kanafuneya afotokozela mwasatanesatane. Khani ya va jw.org yoi “Chifukwa N’ni a Mboni da Yehova Munapangecha Mwambo wa Mgonelo wa Mbwiye Mo-iyana na Vipembezo Vimo-i?” inokoza nitandiza ira nisomede mafuso anayo kanakaenaathu. Ninafuneya panga vyevyo ninawande iyo ira nitandize athu a “maganizo apama” pindula na mwambo unola Chikumbuso ya-anaireye, yaireyanga koma teto vanduli viwa. — Vyo. 13:48.

MUTANDIZENGA ATHU ANAYO KA-IILE SONKANA

17. Kodi andimuwa mupingo kanatandize avi athu anayo ka-iile fwanyeya va Chikumbuso? (Ezekiyeli 34:12, 16)

¹⁷ Vanyengo ya Chikumbuso, kodi andimuwa mupingo kanatandize avi athu anayo ka-iile sonkana? Muwatonyi-edenga ira munowaganizela. (Welengani Ezekiyeli 34:12, 16.) Chikumbuso ya-anaireye, muze muesaese ongi-ana na abali na arongola anala. Asimikizeleni ira munowakonda koma teto ira munofunechecha atandiza mwemo munawandele nyo. Aitaneleni wu Chikumbuso. Kaza muze muawachele na manda men’li. Vanduli va Chikumbuso, pitilizanive ongi-ana na abali na arongola ofuneya vinjinji anala ndipo mupangenga iliyetene ineyo munawande nyo ira muwatandize welela wa Yehova. — 1 Pe. 2:25.

18. Kodi etene iyene ninatandize avi athu anayo ka-iile sonkana? (Aroma 12:10)

 ¹⁸ Kodi athu etene mupingo kanatandize avi athu anayo ka-iile sonkana, anayo kafwanyeile va Chikumbuso? Kanokoza panga eno vopanga vyongo na aliwa mwachikondi, mooma murima koma teto mwaulemu. (Welengani Aroma 12:10.) Iziwani ira abali na arongoli-u anayo ti khosa dantengo wavadimu, mwina kookaikela vyowambeela nawili za umisonkano. Mwina koowova ira katinaza kawacheliwa paama. e Eno mupewenga afuka mafuso anayo kanaanyaswi-e kapena onga vyongo vyevyo vinaavoreye m’murimani. (1 Ates. 5:11) Abali na arongola anala Mbaakiristu afwi-u ndipo ninosangalala ira niambeela nawili sonkana limo-i na aliwa. — Sal. 119:176; Vyo. 20:35.

19. Kodi umbuwela khwa wa Yesu unanitandiza avi?

¹⁹ Ninoyamikela ira Yesu ookoza vyoi chaka na chaka nipangenga mwambo oumbuwela khwa wae. Mwambola unonitandiza iyo koma teto athu amo-iwa mundila dinjinji. (Yes. 48:17, 18) Naambeela konda vinjinji Yehova na Yesu. Ninotonyi-eda ira ninoyamikela vinjinji vyevyo kanipangeleathu. Ninowambeela gwilizana vinjinji na Akiristu afwi-u. Koma teto ninokoza tandiza athu amo-iwa iziwa ira kanokoza zasangalala na madaliso anayo kanawandeya chifukwa ya dipo. Tiyemoni nipange vyetene vyevyo ninawande iyo ira nikozeele zafwanyeya va Chikumbuso, lelo lili dambo lofuneya vinjinji va chaka.