1. Mu bungu dia nti tilumbu tia Mbambukulu tiena tilumbu tiyôkele mfunu mu muvu? (Like 22:​19, 20)

 KWE kanda dia Yehova, tilumbu tia Mbambukulu moyo ya lufwa lwa Yezu Kristo tilumbu tiena tiyôkele mfunu mu muvu. Wo ni musamu wa wumosi Yezu kahanina ntumunu kwe milongoki miandi yandi beni. (Tanga Like 22:​19, 20.) Misamu mia mwa miamingi misaka ti takêla tilumbu tia Mbambukulu na timina diadiansoni. Tataleno ndambu misamu miango.

2. Ntia misamu misaka ti tabâ na timina dia bâ ku Mbambukulu?

² Mbambukulu mbo yitubakisaka mu dimbitila mu mfunu ya nkûlulu. Mbo yitubambulaka mpila zi tulendi songela ti mbo tutondaka mu mukayulu wa Yezu. (2 Kor. 5:​14, 15) Mbambukulu mbo yituhanaka mpe bweso bwa hanasana lutindusu na mpangi zeto. (Rom. 1:12) Mivu miamiansoni, mpangi zazingi za kota tiozi zibâka ku Mbambukulu. Bakaka bayizi baka ngolo za kâla kwe Yehova mu bungu dia mpila ya luzolo yi bababwanina. Mpe bantu babingi batambulaka matieleka bakwizi batikaka mu diatila mu nzila ya luzingu mu mio mi bamonaka na mi bawâka. Ka wena wa nzitukulu ko ti Mbambukulu yabâ na tibuka tia mfunu mu mitima mieto!

3. Bwe Mbambukulu yivukasalaka mpangi za mu nza ya mukaka? (Tala mpe tifwani.)

³ Banza mpe mu mpila Mbambukulu yituvukasalaka na mpangi zeto za mu nza ya mukaka. Mbangi za Yehova mbo zivukanaka bu diamaka ntangu malembe-malembe mu bizunga bia swaswana mu nza. Beto bansoni mbo tuwâka tinzonzi titomo zonzelaka mfunu ya nkûlulu. Mbo tutangaka mikunga miole mia mukembo, mbo tuyôkesaka dimpa na vinu, mpe mu  mutima wa mukaka, mbo tutâka ‘amene’ mu tusambulu tuyà. Kampe heure 24 ziyôkaka ngatu bimvuka biabiansoni biasila bo. Ngano lendi banza nsayi yibâka na Yehova na Yezu bu batumonaka mu ntangu yi tubahanaka mukembo mu bumosi mu mpila yo?

4. Nti tuzonzela mu timoko ti?

⁴ Mu timoko ti, mbo tuzonzela biyuvu ebi: Bwe tulendi kubikila mitima mieto mu bungu dia Mbambukulu? Bwe tulendi bakisila bantu bakaka ngatu babakila yo ndandu? Mpe bwe tulendi bakisila bô ba kota tiozi? Mvutu za biyuvu bio mbo zitubakisa mu bâ ba kubama mu bungu dia tilumbu tio tia nguria mfunu.

BWE TULENDI KUBIKILA MITIMA MIETO MU BUNGU DIA MBAMBUKULU?

5. a) Mu bungu dia nti tufweti dimbitilaka mu ntalu ya nkûlulu? (Mikunga 49:​7, 8) b) Nti longokele mu video Mu bungu dia nti Yezu kafwila?

⁵ Mpila yimosi mu mpila ziyôkele mfunu zi tulendi kubikila mitima mieto ni mu dimbitila mu ntalu ya mukayulu wa Yezu Kristo, nkûlulu. Mu beto beni, kani kabwe ka taketi’â lenda ko mu tikûla mu masumu na mu lufwa. (Tanga Mikunga 49:​7, 8; tala mpe video Mu bungu dia nti Yezu kafwila?) a Buna Yehova wakubika Yezu ngatu kizi kahana luzingu lwandi mu tu vûkisa. Yehova na Yezu mukayulu wa wunene bayizi hana. (Rom. 6:23) Bu tuvulu kwe dimbitiri mu mukayulu wa hana Yehova na Yezu mu bungu dia beto, mbo tukwizi tomo tonda mu bungu dia nkûlulu. Mbo tuzonzela kwa ndambu bima bia hombesa Yehova na Yezu mu futa nkûlulu. Kâ ntete-ntete, ngano nkûlulu ni nti?

6. Ngano nkûlulu ni nti?

⁶ Nkûlulu ntalu yena yi bafutaka mu kûla tima. Bakala dia ntete, Adame, wa lunga weri bu bamusala. Bu kayizi sumuka, wayizi hombesa bweso bwandi bwa bâ wa moyo mankululu, kâ mpe na bwa bala bandi babansoni. Ngatu kavutu sumba bio bia hombesa Adame, Yezu wahana luzingu lwandi lwa lunga mu mukayulu. Mu luzingu lwandi lwalwansoni ha mutoto, Yezu ka yirika na kani disumu ko, mpe ka tâ bungungu ko mu munwa’andi. (1 Pi. 2:22) Mu ntangu ya lufwa lwandi, luzingu lwa lunga lwa Yezu mbo lweri tomo delakanaka na luzingu lwa hombesa Adame.—1 Kor. 15:45; 1 Tim. 2:6.

7. Ntia ntontolo Yezu kabwabana na zo ha mutoto?

⁷ Bu keri ha mutoto, Yezu watatamana mu bâ wa lunga, mpe watatamana mu tumamana Tata’andi dia ku mazulu ntono ntontolo zi kabwabana na zo. Bu keri mwana wa fioti, Yezu mbo keri tumamanaka lutumu lwa bibuti biandi bia masumu ni bu sa ti wa lunga weri tûka mbutukulu’andi. (Like 2:51) Bu keri ntwenia, wafweti telamana tiya tu beri mu saka mu kolama, peleko mu lembo vutu bâ wa kwikama. Mpe bu kayizi kula, wafweti telamana ntontolo za Satana, mu kati na ntangu yi kamutêla yandi beni mu lembo vutu bâ wa kwikama kwe Nzambi. (Mat. 4:​1-11) Satana wa nguria wa kubama weri mu sumukisa Yezu ngatu kalembo bâ na lenda dia futa nkûlulu.

8. Ntia misamu miakaka mia mpasi Yezu kakorela?

⁸ Mu tisalu tiandi tia samuna ha mutoto, Yezu wabwabana na ntontolo. Mbo beri mu kwamisaka, mpe badinga mu mu honda. (Like 4:28, 29; 13:31) Wafweti korela masumu ma milongoki miandi. (Mak. 9:​33, 34) Bu bayizi mu fundisa mu bungu dia luzingu lwandi, bamumwisa mpasi mpe bamumonekesa buzoba. Mpe bayizi mu honda mu mpila yimosi ya nguria mpasi mpe ya nsoni. (Ebr. 12:​1-3) Wafweti korela lweka lwa mansukina lwa mpasi zandi  yandi kaka mu bungu ti Yehova keri’â vutu mu kengerelaka ko. b—Mat. 27:46.

9. Bwe tumonaka mu bungu dia mukayulu wa Yezu? (1 Piere 1:8)

⁹ Wa wuta tomo moneka ti Yezu nguria mpasi kamona mu futa nkûlulu. Ngano ka tumonaka ko ti Yezu beto katomono zolo bu tudimbitilaka mu mpila yi katihanina yandi beni mu mukayulu mu bungu dia beto?—Tanga 1 Piere 1:8.

10. Ntia bima Yehova kahombesa mu futa nkûlulu?

¹⁰ Bwe tutâ mu Yehova? Ngano nti katambula mu hombesa ngatu Yezu kafuta nkûlulu? Yehova na Yezu tindiku tia nguria tia ngolo tie nawu tiyôkele tindiku tia tata ni tata na mwana’andi. (Bin. 8:30) Banza’eti ka bwe Yehova kamona ku mutima bu keri talaka Yezu ta korela mpasi za mpila na mpila ha mutoto. Ntembe kâni, watomo mu sa mpasi mu mona Mwana’andi wu beri niekonaka, wu bakala, mpe weri timukaka.

11. Sarila tifwani tisongelaka tiari tieri na Yehova mu ntangu yi bahonda Yezu.

¹¹ Bibuti biabiansoni biafwilulu mwana bitomono zaba tiari tia ngolo tibâka na muntu wufwilulu mwana’andi. Timinu tia ngolo tie neto mu mvumbukulu, kâ ka tilendi’â tiakatula tiari tibâka neto ko bu tufwiluluku muntu. Tifwani tio mbo tita tu bakisa mu bakula ka ntia tiari tieri na Yehova bu kamona Mwana’andi wu katomono zolo weri monaka mpasi, mpe bu kayizi fwa mu printemps ya muvu wa 33 M.B. c—Mat. 3:17.

12. Nti tulendi sa lumingu ntete Mbambukulu?

¹² Tûka lumbu ti tii mu tilumbu tia Mbambukulu, lendi bâ na kani dia taluzula misamu mitariri nkûlulu mu ndongokolo ya nge beni, peleko mu nsambululu ya kanda. Buna, sarila Guide de recherche pour les Témoins de Jéhovah (tala ti mu zu diaku mô yena) peleko mabuku makaka ma ndongokolo ya Bibila mu tomo taluzula mutu-diambu wo mu ndilu. d Lendi sarila ngolo mu landa programe ya ntangulu ya Bibila yitariri Mbambukulu ye mu Mukanda wa lukutakanu lwa luzingu na tisalu tia Bakristo. Mpe mu tilumbu tia Mbambukulu, kuzimbakanandi mu landa nsambululu ya pari ya nzitukulu. Bu tukubikaka mitima mieto mu bungu dia Mbambukulu, mbo tubâka ba kubama mu bakisa bampwana’eto mu bakila yo ndandu bawu mpe.—Ezd. 7:10.

 BAKISA BANTU BAKAKA MU BAKA NDANDU

13. Nti tulendi sa bia ntete mu bakisa bampwana’eto mu baka ndandu mu Mbambukulu?

¹³ Bwe tulendi bakisila bantu bakaka mu baka ndandu mu Mbambukulu? Diangana tima tia ntete, ni mu ba tikisa. Tulendi tikisa bantu ba tuvulu kwe talaka mu tisalu tieto tia samuna, mpe tulendi sa liste ya bantu ba tuzebi ba tutikisa. Mu kati mu lendi bâ bantu ba kanda, ba ku lukolo, ba ku tisalu na bakaka ba tuzebi. Ni bu sa ti ka twena na invitasio za papier zazingi ko, tulendi tambika lien mu nzila ya internet. Tulendi yituku mu bantu babonga nzengolo ya kwiza!—Ekl. 11:6.

14. Bangula ka mu bungu dia nti we mfunu mu hana invitasio.

¹⁴ Bu tikisa muntu ku Mbambukulu nge beni, lendi bâ na ngolo mu kwiza. Tilumbu timosi, mpangi yimosi ya yikento yeri mu kanda dieri na bantu beri na mabundu ma swaswana, yayituku mu ntangu bakala diandi kamutêla na nsayi yayansoni ti weri nandi babâ ku Mbambukulu tintwari. Mu bungu dia nti kayitukulu? Mu bungu ti mu ntama, mbala zazingi kamutindisa ngatu kabâ ku Mbambukulu, kâ keri’â kwa bâka ko. Mu bungu dia nti misamu miayizi sobela? Bakala dio ditêle: “Invitasio bayizi kungana ha koko.” Banguri ti mukuluntu wumosi weri mu tizunga tiawu kazaba wamutikisa. Bakala dio wayizi batika mu kwiza ku tukutakanu muvu wo, na mu mivu mialanda.

15. Nti tufweti bambukilaka bu tutikisaka bantu ku Mbambukulu?

¹⁵ Bambuka ti bantu ba tutikisaka balendi bâ na biyuvu—nsungula tala ti ka beka’eti bâ ku tukutakanu tweto ko. Mbo wubâ musamu wa mbote tala ti tibanziri biyuvu bi balendi ku yula, mpe kubikiri mvutu zi ba hana. (Kol. 4:6) Mu tifwani, bantu bakaka balendi ku yula: ‘Nti biyôkaka ku Mbambukulu?’ ‘Ntangu zikwa yibonga?’ ‘Nti mfweti lwata?’ ‘Ngano mbongo mfweti hana mu kota?’ ‘Ngano mfweti nata mbongo zi nitûla mu titunga?’ Tala ti muntu tutikisi ku Mbambukulu, tulendi mu yula kwa ebu: “Ngano biyuvu bie naku?” Mpe hanina mvutu mu biyuvu bi lendi bâ nandi. Tulendi sarila mpe video ye na mutu-diambu Bambukila lufwa lwa Yezu,  na ya Ngano nti biyôkaka ku Nzo ya Nsambululu? mu bakisa muntu mu bakula ka bwe tukutakanu tweto tuyôkelaka. Mpe timoko tia 28 tia buku dia Bâ mu nsayi ntangu zazansoni! mbo tituhanaka mabanza ma mbote ma tulendi zonzela.

16. Ntia biyuvu biakaka bô bakwizaka ku Mbambukulu balendi tiyula?

¹⁶ Ha manima ma Mbambukulu, bantu biziri mu mbala’awu ya ntete balendi kwizi bâ na biyuvu biakaka. Balendi tiyula, mu bungu dia nti bantu ndambu kwa (tala ti kô bena) badiri dimpa mpe banwini vinu. Balendi tiyula mpe mbala kwa tukembelaka Mbambukulu. Mpe balendi dinga mu zaba tala ti tukutakanu twatwansoni twa Mbangi za Yehova ni bo kwa basilaka to. Ni bu sa ti misamu miamingi batâka mu tinzonzi tia Mbambukulu mitariri biyuvu bio, bantu biziri mu mbala ya ntete balendi dinga mu bakula misamu miakaka. Mutu-diambu we mu jw.org wutêle “Mu bungu dia nti Mbangi za Yehova zikembelaka ndia ya Mfumu mu mpila ya swaswanana na mabundu makaka?” wulendi tu bakisa mu hanina biyuvu biakaka bia mpila yo mvutu. Tuzololo tasa miamiansoni mi tulenda—ntete Mbambukulu, bu yikwe yôke na ha manima—mu bakisa bô bê na mabanza ma delakana mu bakila Mbambukulu ndandu.—Bis. 13:48.

BAKISA BANTU BA KOTA TIOZI

17. Bwe bakuluntu balendi bakisila bô ba kota tiozi? (Ezekiele 34:​12, 16)

¹⁷ Mu ntangu ya Mbambukulu, bwe bakuluntu balendi bakisila bô ba kota tiozi? Ba songeleno ti bawu lu kipaka. (Tanga Ezekiele 34:​12, 16.) Ntete Mbambukulu, dinga mu tikisa mpangi zazansoni za kota tiozi zi zebi. Ba songela ti bawu zoloko, mpe ba songela ti nsatu ye naku ya ba bakisa mu mpila zazansoni zi lenda. Ba tikisa mu bâ ku Mbambukulu. Tala ti biziri ku Mbambukulu, ba bwana na nsayi yayansoni. Ha manima ma Mbambukulu, tatamana mu tala peleko mu tâ mbila mpangi zo za ntalu, mpe ba hana lubakusu lwa timpeve lwe nawu nsatu mu kâla kwe Yehova.—1 Pi. 2:25.

18. Bwe tulendi bakisila mpangi zeto za kota tiozi? (Bisi-Rome 12:10)

 ¹⁸ Mpangi zazansoni za mu timvuka zilendi bakisa mpangi za kota tiozi mu bâ ku Mbambukulu. Mu bwe? Bu bababongela mu luzolo, na nsayi mpe na buzitu. (Tanga Bisi-Rome 12:10.) Bambuka ti wulendi bâ musamu wa mpasi kwe bimeme bio mu vutu kwiza ku lukutakanu. Balendi bâ na bunkuta ti ka bababwana bubote ko. e Buna kubayulandi biyuvu bilendi ba fwisa nsoni peleko kubatêlandi misamu milendi ba fwemesa. (1 Tes. 5:11) Mpangi zeto zena zi twe na nkwikulu zimosi. Nsayi yibâka neto mu vutu sarila Nzambi na bawu!—Mik. 119:176; Bis. 20:35.

19. Ntia ndandu tulendi baka bu tubambukila lufwa lwa Yezu?

¹⁹ Mbo tutomo tondaka Yezu bu katulomba mu bambukilaka lufwa lwandi mivu miamiansoni, na mu bakula ka mu bungu dia nti we nguria mfunu. Bu tusilaka bo, mbo tubakaka ndandu, bantu bakaka mpe mbo bakaka ndandu mu mpila zazingi. (Iza. 48:​17, 18) Luzolo lweto mu Yehova na mu Yezu mbo lukwizi kulaka. Mbo tusongelaka ti mbo tutomo tondaka mu mio mi bayirika mu bungu dia beto. Mbo tuyikaka tindiku tieto ngolo na mpangi zeto. Mpe tulendi bakisa bantu bakaka mu longoka ka bwe bawu mpe balendi bakila tusakumunu twa nata nkûlulu. Buna, taseno miamiansoni mi tulenda mu bâ ba kubama mu bungu dia Mbambukulu ya muvu wu—tilumbu tiyôkele mfunu mu muvu!