1. Aˬ htoꞈ ma te Yeˍsuˆ suh ve dawˇ nawˇ tuˬ hpawnˬ daꞈ ve chi teˇ hkʼawꞈ hkʼaw ve a yeˇ uiˍ jaˇ ve awˬ nyi hpehꞈ ve le? (Luˉkaꞈ 22:19, 20)

 Yaˬhoˉvaˬ ve chaw awˬ pon kʼo, Yeˍsuˆ suh ve dawˇ nawˇ tuˬ hpawnˬ daꞈ ve lehˬ, Yeˍsuˆ ve a shaꞈ tanˇ laˇ ve htaꞈ dawˇ nyi tuˬ, chi teˇ hkʼawꞈ a yeˇ uiˍ jaˇ ve awˬ nyi hpehꞈ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve chi ve teˇ hkʼaˇ ceh tiˉ, yawˇ htaꞈ dawˇ nawˇ tuˬ te tehꞈ awˬ laꞈ gʼawˇ hui htaꞈ kʼoˆ piˇ ve yoˬ. (Luˉkaꞈ 22:19, 20 gʼaw sheˍ.) Yeˍsuˆ suh ve dawˇ nawˇ tuˬ hpawnˬ daꞈ ve te tuˬ, ngaˬ hui law taˍ tuˬ awˬ hkʼaˇ laiˉ hkʼaˇ cawˬ ve yoˬ. Ngaˬ hui awˬ hkʼaˇ teˇ hpaˍ hpaˍ htaꞈ teˇ geh nyi sheˍ.

2. Aˬ htoꞈ ma te ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve htaꞈ law chehˇ ve le?

² Yeˍsuˆ suh ve dawˇ nawˇ tuˬ hpawnˬ daꞈ ve lehˬ, Yeˍsuˆ ngaˬ hui awˬ pon tanˇ laˇ leh htaiˍ hkʼawꞈ laˇ ve htaꞈ dawˇ nyi tuˬ te laˇ ve yoˬ. Leh ngaˬ hui awˬ bon uiˍ hkawˇ kʼoˆ piˇ tuˬ awˬ hkʼaˇ htaꞈ dawˇ nyi tuˬ kaꞈ ga laˇ ve yoˬ. (2 Kawˇrenˍhtuˆ 5:14, 15) Chi hkʼoˆ kaꞈ, Yeˍsuˆ suh ve dawˇ nawˇ tuˬ hpawnˬ daꞈ ve lehˬ, ngaˬ hui “teˇ gʼaˇ leh teˇ gʼaˇ htaꞈ awˬ gʼaˇ piˇ daꞈ” ve awˬ yanˇ cawˬ tuˬ te laˇ ve yoˬ. (Roˉmaꞈ 1:12) Teˇ hkʼawꞈ le le laiˉ gʼaˇ maˇ hto toˇ˗o ve chaw htawˇ, Yeˍsuˆ suh ve dawˇ nawˇ tuˬ hpawnˬ daꞈ ve hkʼaw kʼawꞈ laˬ ve yoˬ. Yawˇ hui htaꞈ ha lehˬ ha kʼa ve hkʼaw haꞈ yuˬ piˇ ve pa taw, teˇ hpaˍ kʼo Yaˬhoˉvaˬ geh kʼawꞈ meuˆ daꞈ la ve yoˬ. Nyi ma pfuhˇ ve chaw laiˉ gʼaˇ hpawnˬ daꞈ ve chi hkʼaw gʼa mawˬ leh gʼa kaˇ ve pa taw, dawˇ cawˇ jaˇ leh Liꞈ hpu tanˬ henˇ ve yoˬ. Chi htaꞈ pa taw, Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui awˬ pon a yeˇ uiˍ jaˇ!

3. Yeˍsuˆ suh ve dawˇ nawˇ tuˬ hpawnˬ daꞈ ve lehˬ Yaˬhoˉvaˬ ve kanˉ te ve chaw miˬ guiˬ hkʼoˆ lo teˇ moˍ tiˉ hpehꞈ tuˬ hkʼaˬ hkʼe ga laˇ ve le? (Awˬ han htaꞈ nyi sheˍ.)

³ Yeˍsuˆ suh ve dawˇ nawˬ tuˬ hpawnˬ daꞈ ve chi ngaˬ hui teˇ moˍ tiˉ hpehꞈ gʼa tuˬ hkʼaˬ hkʼe te laˇ gʼa ve htaꞈ dawˇ nyi sheˍ. Miˬ guiˬ chi hkʼoˆ lo Yaˬhoˉvaˬ ve Shaˉhkiˆhkanˍ ve chaw mvuhˇ nyi loꞈ˗e peuˬ hkʼawꞈ nawˉ hpawnˬ daꞈ ve chi te ve yoˬ. Hpawnˬ daꞈ ve chi hkʼaw htaiˍ hkʼawꞈ laˇ ve awˬ hpfuhˇ bon maˍ ve hkʼaw kʼoˆ maˍ laˇ leh, kʼa muiˬ hkawˇ 2 maˬ kʼa ve yoˬ. Hkaoˍ monˇ leh a pehˉ meuˇ gʼuiˬ chiˇ piˇ leh bon 4 pawˆ lawˬ ve  yoˬ. Miˬ guiˬ hkʼoˆ lo Hkriꞈ yaˇ awˬ moˍ teˇ kaˬ le le 24 naˍ riˍ hkʼaw te ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve hkʼaw, miˬ guiˬ chi hkʼoˆ lo Yaˬhoˉvaˬ ve kanˉ te ve chaw teˇ moˍ tiˉ hpehꞈ ve htaꞈ, Yaˬhoˉvaˬ leh Yeˍsuˆ hkʼaˬ hkʼe taw ha lehˬ jaˇ ve htaꞈ nawˬ dawˇ mawˬ gʼa˗aw laˇ?

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Awˬ lawn chi ve hkʼaw awˬ hawˉ lo cawˬ ve na hkawˇ chi htaꞈ caˉ daꞈ ve teˇ geh nyi sheˍ. Yeˍsuˆ suh ve dawˇ nawˇ tuˬ hpawnˬ daꞈ ve htaꞈ ngaˬ hui hkʼaˬ hkʼe te gu hehnˇ taˍ gʼa tuˬ le? Hpawnˬ daꞈ ve chi hkʼaw awˬ nu ve chaw awˬ bon gʼa tuˬ ngaˬ hui hkʼaˬ hkʼe ga piˇ gʼa tuˬ le? Leh maˇ hto toˇ˗o ve chaw htaꞈ ngaˬ hui hkʼaˬ hkʼe ga piˇ gʼa tuˬ le? Na hkawˇ chi teˇ hpaˍ htaꞈ hkʼawꞈ laˇ tuˬ ve lehˬ, Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui gu hehnˇ taˍ gʼa tuˬ ga laˇ ve yoˬ. Chi ve lehˬ hpawnˬ daꞈ ve a yeˇ uiˍ jaˇ.

YEˍSUˆ SUH VE DAWˇ NAWˇ TUˬ HPAWNˬ DAꞈ VE HTAꞈ NGAˬ HUI HKʼAˬ HKʼE TE GU HEHNˇ TAˍ GʼA TUˬ LE?

5. (a) Aˬ htoꞈ ma te htaiˍ hkʼawꞈ ve awˬ hpfuhˇ htaꞈ ngaˬ hui dawˇ nyi cawˇ ve le? (Chiˇ mvuh ve 49:7, 8) (b) Aˬ htoꞈ ma te Yeˍsuˆ suh˗e ve le? VDO hkʼaw nawˬ htaꞈ aˬ htoꞈ ma maˍ laˇ ve le?

⁵ Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ ve htaꞈ gu hehnˇ taˍ gʼa tuˬ a yeˇ uiˍ jaˇ ve teˇ hkʼaˇ lehˬ, Yeˍsuˆ htaiˍ hkʼawꞈ laˇ ve awˬ hpfuhˇ hkʼaˬ hkʼe taw hkʼaˆ ve htaꞈ dawˇ nyi ve yoˬ. Ngaˬ hui ve venˇ baˆ leh suh ve htaꞈ ponˬ gʼa tuˬ ngaˬ hui te maˇ gʼa. (Chiˇ mvuh ve 49:7, 8 gʼaw sheˍ; VDO Aˬ htoꞈ ma te Yeˍsuˆ suh˗e ve le? htaꞈ nyi sheˍ.) a Chi htaꞈ pa taw, ngaˬ hui ve a shaꞈ gʼa ponˬ tuˬ Yaˬhoˉvaˬ lehˬ Yeˍsuˆ ve a shaꞈ tanˇ laˇ leh htaiˍ hkʼawꞈ laˇ tcuh ve yoˬ. Chi ve lehˬ Yaˬhoˉvaˬ leh Yeˍsuˆ tanˇ laˇ ve a yeˇ uiˍ jaˇ ve yoˬ. (Roˉmaꞈ 6:23) Ngaˬ hui awˬ pon Yaˬhoˉvaˬ leh Yeˍsuˆ aˬ htoꞈ ma tanˇ laˇ ve htaꞈ hkʼa dehꞈ dawˇ nyi htaˇ, htaiˍ hkʼawꞈ laˇ ve htaꞈ ngaˬ hui awˬ hpfuhˇ shiˍ jaˇ ve yoˬ. Yaˬhoˉvaˬ leh Yeˍsuˆ htaiˍ hkʼawꞈ laˇ ve htaꞈ gu teh taˍ laˇ tuˬ, aˬ htoꞈ ma gʼa yuˬ tanˇ ve, awˬ lawn chi ve hkʼaw teˇ geh henˇ tuˬ yoˬ. Yaꞈ hkʼaˇ, htaiˍ hkʼawꞈ laˇ ve awˬ hpfuhˇ aˬ htoꞈ ma le? Chi ve awˉ lawˉ teˇ geh henˇ tuˬ yoˬ.

6. Htaiˍ hkʼawꞈ ve awˬ hpfuhˇ aˬ htoꞈ ma le?

⁶ Htaiˍ hkʼawꞈ laˇ ve lehˬ, mawˇ hawˇ piˇ˗oˬ ve teˇ ceuˬ ceuˬ htaꞈ kʼawꞈ vuiˬ hkʼawꞈ ve htaꞈ shuˍ ve yoˬ. Aˍdanˍ lehˬ chaw yaˇ awˉ lawˉ teˇ gʼaˇ biˇ jaˇ ve te hpanˍ taˍ ve yoˬ. Yaꞈ hkʼaˇ, yawˇ venˇ baˆ te htaˇ, yawˇ co co taiˍ taiˍ ve a shaꞈ shonˇ kʼai leh yawˇ ceh tiˉ maˇ heˆ. Yawˇ ve awˬ yaˇ awˬ duˬ kaꞈ co co taiˍ taiˍ ve a shaꞈ gʼa tuˬ shonˇ kʼai ve yoˬ. Aˍdanˍ te shonˇ kʼai taˍ ve awˬ ceuˬ htaꞈ kʼawꞈ vuiˬ hkʼawꞈ gʼa tuˬ, Yeˍsuˆ yawˇ ve a shaꞈ biˇ jaˇ ve tanˇ laˇ leh chaw yaˇ ve a shaꞈ htaiˍ hkʼawꞈ ve htaꞈ gʼa ve yoˬ. Yawˇ miˬ guiˬ hkʼoˆ lo a shaꞈ teꞈ chehˇ htaˇ, “yawˇ lehˬ venˇ baˆ maˇ te jaw. Yawˇ ve mawꞈ kʼaw hkʼaw lo heˍ ve tawˇ hkawˇ kaꞈ maˇ tawˆ la jaw.” (1 Peˍtruˆ 2:22) Chi htaꞈ pa taw, Yeˍsuˆ suh˗e htaˇ yawˇ biˇ jaˇ ve chaw hpehꞈ sheˍ ve yoˬ. Leh Aˍdanˍ te shonˇ kʼai taˍ ve biˇ jaˇ ve a shaꞈ htaꞈ, Yeˍsuˆ kʼawꞈ vuiˬ hkʼawꞈ gʼa tuˬ te laˇ ve yoˬ.—1 Kawˇrenˍhtuˆ 15:45; 1 Tiˆmoˉseˍ 2:6.

7. Yeˍsuˆ miˬ guiˬ hkʼoˆ lo chehˇ htaˇ beˬ ve lawˇ ve aˬ htoꞈ ma gʼa hpuˇ ve le?

⁷ Yeˍsuˆ miˬ guiˬ hkʼoˆ lo chehˇ htaˇ, yawˇ beˬ ve lawˇ ve laiˉ ceuˬ gʼa hpuˇ ve yoˬ. Yaꞈ hkʼaˇ, yawˇ ka tiꞈ yeˬ leh yawˇ ve Awˬ pa Yaˬhoˉvaˬ hkawˇ hkʼaˬ htaˆ kaꞈ na yuˬ ve yoˬ. Yeˍsuˆ maˇ uiˍ sheˍ htaˇ, yawˇ biˇ jaˇ ve chaw hpehꞈ ve htawˇ, yawˇ ve awˬ pa awˬ e maˇ biˇ ve chaw hkawˇ na yuˬ ve yoˬ. (Luˉkaꞈ 2:51) Yeˍsuˆ yaˇ nehˬ htaˇ, awˬ pa awˬ e hkawˇ maˇ na yuˬ tuˬ leh Yaˬhoˉvaˬ htaꞈ ka tiꞈ maˇ yeˬ tuˬ, awˬ nu ve chaw nyiˉ piˇ ve htaꞈ Yeˍsuˆ gʼa tawˍ daꞈ ve yoˬ. Leh yawˇ uiˍ la˗oˬ htaˇ, Saˍtanˍ lawˇ nyi piˇ ve laiˉ ceuˬ htaꞈ yawˇ gʼa tawˍ daꞈ ve yoˬ. Teˇ pawˆ pawˆ kʼo, yawˇ Yaˬhoˉvaˬ htaꞈ ka tiꞈ maˇ yeˬ tuˬ Saˍtanˍ kʼoˆ piˇ ve yoˬ. (Maꞈhtehˍ 4:1-11) Saˍtanˍ chi hkʼe te ve lehˬ, Yeˍsuˆ ve a shaꞈ htaiˍ hkʼawꞈ laˇ maˇ gʼa tuˬ, venˇ baˆ te yaꞈ tcuh gaˇ ve yoˬ.

8. Yeˍsuˆ tuꞈ ve hkanˍ ve aˬ htoꞈ ma htaꞈ gʼa yeunˇ hkanˍ sheˍ ve le?

⁸ Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, yawˇ tuꞈ ve hkanˍ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, yawˇ fawˉ ve mehˍ ve gʼa hpuˇ leh, yawˇ htaꞈ kaꞈ shu tiˇ pehˍ gaˇ ve yoˬ. (Luˉkaꞈ 4:28, 29; 13:31) Yawˇ ve awˬ laꞈ gʼawˇ hui maˇ biˇ ve htaꞈ kaꞈ yawˇ gʼa  yeunˇ hkanˍ sheˍ ve yoˬ. (Maˍkuˆ 9:33, 34) Leh yawˇ htaꞈ suhˉ jehˬ piˇ ve, kʼoˆ guiˇ gʼuiˬ guiˇ piˇ ve, ciˍ yanˍ piˇ htaˇ, yaꞈ taw jaˇ leh naˬ jaˇ ve hkʼaw tiˇ pehˍ piˇ tuˬ suhˉ jehˬ cheˆ piˇ ve yoˬ. (Heˍbrehˇ 12:1-3) Chi hkʼe ceh tiˉ maˇ heˆ. Yeˍsuˆ suh˗e yoˬ te htaˇ, Yaˬhoˉvaˬ yawˇ htaꞈ maˇ ga piˇ leh gʼa yeunˇ hkanˍ sheˍ ve yoˬ. b—Maꞈhtehˍ 27:46.

9. Yeˍsuˆ htaiˍ hkʼawꞈ laˇ ve htaꞈ ngaˬ hui hkʼaˬ hkʼe dawˇ ve le? (1 Peˍtruˆ 1:8)

⁹ Yeˍsuˆ ngaˬ hui htaꞈ htaiˍ hkʼawꞈ laˇ tuˬ awˬ pon, yawˇ tuꞈ ve hkanˍ ve laiˉ ceuˬ gʼa hpuˇ ve htaꞈ ngaˬ hui gʼa mawˬ ve yoˬ. Yawˇ ngaˬ hui awˬ pon chi hkʼe taw taw te laˇ ve htaꞈ shiˍ htaˇ, ngaˬ hui yawˇ htaꞈ kʼawꞈ haꞈ maˇ la ve yoˬ.—1 Peˍtruˆ 1:8 gʼaw sheˍ.

10. Htaiˍ hkʼawꞈ ve gu teh taˍ laˇ tuˬ Yaˬhoˉvaˬ aˬ htoꞈ ma gʼa yuˬ tanˇ ve le?

¹⁰ Hkʼe kʼo Yaˬhoˉvaˬ lehˬ, Yeˍsuˆ htaꞈ peu laˇ leh htaiˍ hkʼawꞈ tcuh laˇ tuˬ yawˇ aˬ htoꞈ ma htaꞈ yuˬ tanˇ ve le? Yaˬhoˉvaˬ leh Yeˍsuˆ lehˬ Awˬ pa awˬ yaˇ hpehꞈ leh meuˆ daꞈ jaˇ ve yoˬ. Miˬ guiˬ hkʼoˆ lo ve awˬ pa leh awˬ yaˇ yawˇ huiˉ maˬ hkʼe taw meuˆ daꞈ ve teˇ gʼaˇ˗ehˬ kaꞈ maˇ cawˬ. (Tawˇ naˉ ve 8:30) Yeˍsuˆ shu dawˆ piˇ leh naˬ jaˇ ve, fawˉ ve mehˍ ve htaꞈ gʼa yeunˇ hkanˍ jaˇ ve, leh tuꞈ ve hkanˍ ve laiˉ ceuˬ htaꞈ gʼa hpuˇ htaˇ, Yaˬhoˉvaˬ nyi ma hkʼaˬ hkʼe taw naˬ ve htaꞈ dawˇ nyi sheˍ.

11. Yeˍsuˆ htaꞈ tiˇ pehˍ piˇ htaˇ Yaˬhoˉvaˬ hkʼaˬ hkʼe dawˇ ve le? Tawˇ pa haˉ kʼoˆ maˍ laˇ sheˍ.

¹¹ Awˬ pa awˬ e yaˇ suh˗e jaw ve lehˬ, nyi ma hkʼaˬ hkʼe taw naˬ ve htaꞈ na gʼa ve yoˬ. Suh˗oˬ ve chaw kʼawꞈ teꞈ tu la tuˬ dawˇ law kuiˬ htaꞈ ngaˬ hui yonˍ gʼa ve htawˇ, suh ve lehˬ ngaˬ hui nyi ma luˬ jaˇ tuˬ te laˇ ve yoˬ. 33 hkʼawꞈ C.E. htaˇ Yaˬhoˉvaˬ haꞈ jaˇ ve Yaˇ paˍ Yeˍsuˆ gʼa suh˗e ve htaꞈ yawˇ mawˬ htaˇ, yawˇ nyi ma hkʼaˬ hkʼe taw naˬ ve, chi ngaˬ hui na gʼa tuˬ te laˇ ve yoˬ. c—Maꞈhtehˍ 3:17.

12. Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ ngaˬ hui aˬ htoꞈ ma te cawˇ ve le?

¹² Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, nawˬ a shu yawˇ hkʼaˇ yawˇ Liꞈ hpu henˇ ve, maˇ heˆ leh yehˬ kʼa hkʼaw oˉ kʼoˍ pui htaˇ htaiˍ hkʼawꞈ laˇ ve awˬ hpfuhˇ htaꞈ caˉ daꞈ ve hkʼa dehꞈ na gʼa tuˬ, Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ hkʼaw maˇ heˆ leh, Gʼuiˬ sha ve kanˉ hkʼaˇ gu teh taˍ laˇ ve awˬ nu ve hkʼaw kaꞈ hpfuhˆ nyi gʼa ve yoˬ. d Chi hkʼoˆ kaꞈ, Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ hkʼaw Liꞈ hpu awˬ tawn chi ve, hpawnˬ daꞈ ve te jawˬ tuˬ liꞈ kʼoˆ hkʼaw gʼaw gʼa ve yoˬ. Leh Yeˍsuˆ suh ve dawˇ nawˇ tuˬ hpawnˬ daꞈ ve awˬ pon teˇ nyi le le Liꞈ hpu chaˬ nyi tuˬ bon maˍ keu taˍ ve htaꞈ kaꞈ nyi sheˍ. Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ ngaˬ hui gu hehnˇ taˍ ve kʼo, hpawnˬ daꞈ ve chi hkʼaw awˬ nu ve chaw kaꞈ awˬ bon gʼa tuˬ ngaˬ hui ga piˇ gʼa ve yoˬ.—Eˇzaˍraˆ 7:10.

 AWˬ NU VE CHAW AWˬ BON GʼA TUˬ GA PIˇ VE

13. Yeˍsuˆ suh ve dawˇ nawˇ tuˬ hpawnˬ daꞈ ve awˬ nu ve chaw awˬ bon gʼa tuˬ ngaˬ hui te gʼa ve teˇ ceuˬ lehˬ aˬ htoꞈ ma le?

¹³ Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ hkʼaw ngaˬ hui awˬ nu ve chaw awˬ bon gʼa tuˬ hkʼaˬ hkʼe ga piˇ gʼa ve le? Teˇ ceuˬ lehˬ, ngaˬ hui yawˇ hui htaꞈ gʼa jehˬ piˇ ve yoˬ. Ngaˬ hui teˇ yehˬ peuˬ teˇ yehˬ jehˬ piˇ ve awˬ hkʼoˆ kaꞈ, ngaˬ hui jehˬ piˇ gaˇ ve chaw awˬ meh kaꞈ bvuhꞈ tawˆ la leh jehˬ piˇ gʼa ve yoˬ. Tawˇ pa haˉ te kʼo, awˬ suhˍ awˬ shaˍ hpawˇ ve awˬ viˉ awˬ nyi, kanˉ te kuiˬ lo ve awˬ chawˇ, maˇ heˆ leh liꞈ henˇ yehˬ lo ve awˬ chawˇ htaꞈ jehˬ piˇ gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve jehˬ piˇ ve liꞈ kʼoˆ ehˉ maˇ lawꞈ ve htawˇ, tawˇ yaw tuˬ awˬ hkʼeun hkʼaw jehˬ piˇ ve liꞈ kʼoˆ ehˉ feu piˇ gʼa ve yoˬ. Ngaˬ hui coˇ caˇ leh chi hkʼe te ve kʼo, Yeˍsuˆ suh ve dawˇ nawˇ tuˬ hpawnˬ daꞈ ve chi ve hkʼaw ngaˬ hui dawˇ taˍ ve aꞈ kehˉ chaw laˬ maˇ jaˇ tuˬ yoˬ hehˉ!—Cuˇ yiˍ piˇ ve 11:6.

14. Awˬ nu ve chaw htaꞈ a shu yawˇ hkʼaˇ yawˇ jehˬ piˇ ve lehˬ awˬ bon hkʼaˬ hkʼe gʼa ve le? Hpehꞈ laˬ jaw ve awˬ lawn kʼoˆ maˍ laˇ sheˍ.

¹⁴ Chaw teˇ gʼaˇ htaꞈ a shu yawˇ hkʼaˇ yawˇ jehˬ piˇ ve lehˬ awˬ bon gʼa jaˇ. Awˬ lawn chi ve htaꞈ teˇ geh nyi sheˍ. Awˬ viˉ awˬ nyi yaˇ miˇ yawˇ ve awˬ hpawˇ Shaˉhkiˆhkanˍ ve chaw maˇ hpehꞈ ve, teˇ nyi htaˇ yawˇ ve awˬ hpawˇ Yeˍsuˆ suh ve dawˇ nawˇ tuˬ hpawnˬ daꞈ˗e ve kʼai gaˇ ve tehꞈ kʼoˆ laˇ htaˇ, yawˇ cheˆ˗ehꞈ kʼai ve yoˬ. Aˬ htoꞈ ma te yawˇ cheˆ˗ehꞈ kʼai ve le? Awˬ lawn kʼo, hpawnˬ daꞈ ve laiˉ hkʼawꞈ htaˇ yawˇ coˇ caˇ leh awˬ hpawˇ htaꞈ jehˬ piˇ˗oˬ ve htawˇ maˇ laˬ jaw. Chi teˇ hkʼawꞈ awˬ hpawˇ nyi ma pa tuˬ aˬ htoꞈ ma te piˇ ve le? Yawˇ kʼoˆ ve, “ngaˬ kaꞈ jehˬ laˇ ve liꞈ gʼa ve yoˬ.” Hkʼe te leh, yawˇ awˬ miˇ ma htaꞈ kʼoˆ maˍ piˇ ve, yawˇ shiˍ daꞈ ve Hkriꞈ yaˇ awˬ moˍ hkʼaw nyi haꞈ shaˉ paˍ teˇ gʼaˇ Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ laˇ ve yoˬ. Leh peuˬ hkʼawꞈ nawˉ teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve cawˬ htaˇ yawˇ hkʼaˬ htaˆ kaꞈ kʼai ve yoˬ.

15. Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ awˬ nu ve chaw htaꞈ ngaˬ hui jehˬ piˇ htaˇ, ngaˬ hui aˬ htoꞈ ma htaꞈ tawnˇ taˍ gaˇ ve le?

¹⁵ Ngaˬ hui jehˬ piˇ ve chaw maˇ hpawnˬ daꞈ la jaw sheˍ ve kʼo, na hkawˇ cawˬ tuˬ yoˬ tehꞈ tawnˇ taˍ sheˍ. Yawˇ ve na hkawˇ htaꞈ hkʼawꞈ piˇ tuˬ ngaˬ hui kaꞈ gu hehnˇ taˍ gʼa ve yoˬ. (Kawˇlawˇsehˇ 4:6) Tawˇ pa haˉ te kʼo, Yeˍsuˆ suh ve hpawnˬ daꞈ ve hkʼaw aˬ htoꞈ ma te ve, hpawnˬ daꞈ ve chi hkʼaˬ hkʼe maw maw cawˬ ve, veuꞈ kʼaˇ hkʼaˬ hkʼe veuꞈ cawˇ ve, hpawnˬ daꞈ ve hkʼaw kʼai tuˬ hpu peuˬ˗aw laˇ? Hpu tanˇ shaw ve cawˬ˗aw laˇ? Awˬ lawn chi ve, chaw teˇ hpaˍ htawˇ dawˇ nawˬ dawˇ cawˬ ve yoˬ. Yeˍsuˆ suh ve dawˇ nawˇ tuˬ ngaˬ  hui geh teˇ geh hpawnˬ daꞈ la ve chaw htaꞈ “nawˬ aˬ htoꞈ ma ve na hkawˇ cawˬ ve le?” yawˇ htaꞈ hkʼa sha sha˗ehꞈ na piˇ gʼa ve yoˬ. Leh yawˇ htawˇ dawˇ nawˬ dawˇ cawˬ ve htaꞈ hkʼawꞈ piˇ sheˍ. Chi hkʼoˆ kaꞈ, ngaˬ hui hpawnˬ daꞈ ve hkʼaˬ hkʼe te ve yawˇ na gʼa tuˬ, Yeˍsuˆ suh ve dawˇ nawˇ ve VDO hpaw maˍ piˇ leh Hpawnˬ daꞈ kuiˬ lo ngaˬ hui aˬ ma ca te ve le? kaꞈ hpaw maˍ piˇ gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve htaꞈ caˉ daꞈ ve yawˇ htaꞈ kʼoˆ maˍ piˇ tuˬ, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw awˬ lawn 28 htaꞈ yehˇ gʼa ve yoˬ.

16. Yeˍsuˆ suh ve dawˇ nawˇ tuˬ hpawnˬ daꞈ ve hkʼaw laˬ ve chaw lehˬ aˬ htoꞈ ma na hkawˇ cawˬ sheˍ ve le?

¹⁶ Yeˍsuˆ suh ve dawˇ nawˇ tuˬ hpawnˬ daꞈ ve peuˬ hkʼawꞈ nawˉ, nyi ma pfuhˇ ve chaw na hkawˇ cawˬ tuˬ yoˬ hehˉ. Tawˇ pa haˉ te kʼo, aˬ htoꞈ ma te hkaoˍ monˇ maˇ caˇ ve, leh a pehˉ meuˇ gʼuiˬ maˇ dawˬ ve, maˇ heˆ leh aˬ htoꞈ ma te caˇ ve leh dawˬ ve chaw hkʼaˬ nyiˇ gʼaˇ maˇ cawˬ ve tehꞈ, yawˇ htawˇ dawˇ nawˬ dawˇ cawˬ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve teˇ hkʼawꞈ ve hkʼaw hkʼaˬ nyiˇ pawˆ te ve, leh Yaˬhoˉvaˬ ve Shaˉhkiˆhkanˍ ve chaw awˬ nu ve hpawnˬ daꞈ ve kaꞈ chi hkʼe te˗aw laˇ tehꞈ yawˇ shiˍ gaˇ ve yoˬ. Awˬ lawn chi ve Yeˍsuˆ suh ve dawˇ nawˇ tuˬ hpawnˬ daꞈ ve bon maˍ ve gʼa kaˇ˗oˬ ve htawˇ, nyi ma pfuhˇ ve chaw awˬ leuˉ kʼawꞈ shiˍ gaˇ ve yoˬ. Chi hkʼoˆ kaꞈ, vehˆsaiˉ jw.org hkʼaw “Aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw Jawˇ mawˇ ve mvuhˇ haˉ awˍ caˇ ve hpawnˬ daꞈ ve te ve awˬ nu ve bon liˇ htaꞈ peun daꞈ ve le?” hkʼaw kaꞈ nyi gʼa ve yoˬ. Awˬ lawn chi ve hkʼaw yawˇ htawˇ dawˇ nawˬ dawˇ cawˬ ve na hkawˇ teˇ hpaˍ htaꞈ kaꞈ ngaˬ hui hkʼawꞈ piˇ gʼa ve yoˬ. “Co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui” lehˬ, Yeˍsuˆ suh ve dawˇ nawˇ tuˬ hpawnˬ daꞈ ve hkʼaw awˬ bon gʼa tuˬ, hpawnˬ daꞈ ve maˇ gaˬ sheˍ htaˇ leh hpawnˬ daꞈ ve awˬ yanˇ hkʼaw leh, hpawnˬ daꞈ ve peuˬ hkʼawꞈ nawˉ, yawˇ hui htaꞈ ngaˬ hui te gʼa ve hkʼe ga piˇ gaˇ ve yoˬ.—Tcuh yaˇ 13:48.

MAˇ HTO TOˇ˗O VE CHAW HTAꞈ GA PIˇ VE

17. Maˇ hto toˇ˗o ve chaw htaꞈ nyi haꞈ shaˉ paˍ hkʼaˬ hkʼe ga piˇ gʼa tuˬ le? (Yeˍsaˍkeˍlaˆ 34:12, 16)

¹⁷ Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ, maˇ hto toˇ˗o ve chaw htaꞈ nyi haꞈ shaˉ paˍ hkʼaˬ hkʼe ga piˇ gʼa tuˬ le? Nawˬ yawˇ hui htaꞈ haꞈ leh dawˇ haˍ ve tehꞈ shiˍ tcuh sheˍ. (Yeˍsaˍkeˍlaˆ 34:12, 16 gʼaw sheˍ.) Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, nawˬ te gʼa ve hkʼe yawˇ hui htaꞈ caˉ daꞈ sheˍ. Nawˬ yawˇ hui htaꞈ haꞈ leh ga piˇ gaˇ jaˇ ve tehꞈ yawˇ hui yonˍ gʼa tuˬ te sheˍ. Peuˬ hkʼawꞈ  nawˉ yawˇ hui Yeˍsuˆ suh ve dawˇ nawˇ tuˬ hpawnˬ daꞈ la tuˬ jehˬ piˇ leh yawˇ hui hpawnˬ daꞈ la ve kʼo, ha lehˬ ha kʼa haꞈ yuˬ piˇ sheˍ. Yawˇ hui yonˍ yeˬ ve leh Yaˬhoˉvaˬ geh kʼawꞈ meuˆ daꞈ la tuˬ, hpawnˬ daꞈ ve peuˬ hkʼawꞈ nawˉ yawˇ hui geh kʼawꞈ caˉ daꞈ sheˍ.—1 Peˍtruˆ 2:25.

18. Maˇ hto toˇ˗o ve chaw htaꞈ ngaˬ hui teˇ gʼaˇ le le hkʼaˬ hkʼe ga piˇ gʼa tuˬ le?

¹⁸ Chi hkʼoˆ kaꞈ, maˇ hto toˇ˗o ve chaw htaꞈ ngaˬ hui teˇ gʼaˇ le le kaꞈ ga piˇ gʼa ve yoˬ. Chi ngaˬ hui hkʼaˬ hkʼe te gʼa tuˬ le? Yawˇ htaꞈ haꞈ ve, nuˇ nehˬ ve, leh yawˆ yan ve tehꞈ hpeuꞈ maw piˇ gʼa ve yoˬ. (Roˉmaꞈ 12:10 gʼaw sheˍ.) Awˬ viˉ awˬ nyi yawˇ htaꞈ maˇ haꞈ yuˬ laˇ ve htaꞈ kawˆ ve pa taw, hpawnˬ daꞈ la maˇ haˆ˗o ve tehꞈ tawnˇ taˍ sheˍ. e Chi htaꞈ pa taw, yawˇ yaꞈ taw tuˬ maˇ heˆ leh nyi ma luˬ tuˬ maˇ te piˇ cawˇ. (1 Hteˇsaˍlawˇniˆ 5:11) Yawˇ hui ngaˬ hui ve awˬ viˉ awˬ nyi hpehꞈ leh yawˇ hui geh Yaˬhoˉvaˬ htaꞈ oˉ kʼoˍ teˇ geh gʼa pui ve ha lehˬ jaˇ.—Chiˇ mvuh ve 119:176; Tcuh yaˇ 20:35.

19. Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui aˬ htoꞈ ma awˬ bon gʼa ve le?

¹⁹ Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve te tehꞈ Yeˍsuˆ kʼoˆ laˇ ve htaꞈ ngaˬ hui awˬ bon uiˍ jaˇ ve yoˬ. Hpawnˬ daꞈ ve chi a yeˇ uiˍ jaˇ ve tehꞈ ngaˬ hui shiˍ leh ngaˬ hui hpawnˬ daꞈ ve chi hkʼaw kʼai htaˇ, ngaˬ hui kaꞈ awˬ bon gʼa leh awˬ nu ve chaw awˬ bon gʼa tuˬ kaꞈ ga piˇ gʼa ve yoˬ. (Iˉsaˍyaˆ 48:17, 18) Ngaˬ hui Yaˬhoˉvaˬ leh Yeˍsuˆ htaꞈ haꞈ jaˇ. Yawˇ huiˉ maˬ ngaˬ hui awˬ pon teˇ ceuˬ le le te laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ gaˇ ve yoˬ. Chi ngaˬ hui awˬ viˉ awˬ nyi geh hkʼa dehꞈ meuˆ daꞈ leh yawˇ hui kaꞈ ngaˬ hui hkʼa shuˍ htaiˍ hkʼawꞈ ve htaꞈ awˬ bon gʼa tuˬ ga piˇ gaˇ ve yoˬ. Chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve awˬ pon ngaˬ hui hkʼa dehꞈ gu hehnˇ taˍ gʼa tuˬ, te gʼa ve hkʼe te sheˍ. Chi ve lehˬ chi teˇ hkʼawꞈ hkʼaw ve a yeˇ uiˍ jaˇ ve awˬ nyi hpehꞈ ve yoˬ!