1. Masiwa ngwan’ni dambo la Ithuulelo tofuneya maningi va yawa? (Luka 22:19, 20)

 WAATU a Yohova, dambo lothuulela wukwa wa Yesu Kristu, tofuneya maningi va yawa. Ngumwambo wenuo baa-i waongile Yesu ira anama-arelee tairengana. (Muleri Luka 22:19, 20.) Ninofuneela fwanyeyanga vamwambula va myasa mingasi. Dhoweni nitaphanyeni dhinango mwa myasa dhedhi.

2. Mwasiwa ngwan’ni ninofunechecha dhafwanyeya va Ithuuleloni?

² Mwambo wa Ithuulelo unonikami-a ira nithuulelenga funeya wa kuto. Unonithuucha vinaire i-yo vothonyi-edha ira ninosimba sembe ya Yesu. (2 Akor. 5:14, 15) Ninokaana ngari “yolimbi-ana” naabali naarongoli-u. (Aroma 1:12) Yawa iliyothene, abali naarongola anjinji ta-iidhe gumaneya vamigumanoni tanofwanyeya vamwambula. Enango anowelela wa Yohova namwasa oona moda abali naarongola mwaawachenle aliwa namandha menli. Thitho atu anjinji enao anothonyi-edha ifunelo, anoroma wenda vandhila yodhowa wu ingumi yo-omala, namwasa wa vyongo vionile aliwa thitho vivwidhe aliwa vamwambo wa Ithuulelo. Ngumwasiwa ninoona ira mwambo wa Ithuulelo ngofuneya maningi wa i-yo.

3. N’nga Ithuulelo inanikami-e a-vi ira nikale ovwelana vailambo yothene? (Muone thitho iruthiruthi.)

³ Kathuulelani mwemo mwambo wa Ithuulelo munokami-edhela aliwa abali naarongola kala ovwelana vailambo yothene yavathi. Va dambo leli dhuwa laviranga, Amboni dha Yohova vailambo y othene yavathi anoroma irana mwambula.  Ninovuruwana mwasa oonga funeya wa kuto. Ninoomba nyumbo mbinli dhosimba Yohova, wendi-a vizindiyelo thitho ninowakula mokumela vathi va rima ira “ame” malobelo 4 anoiriwa. Mahora 24 tamalanga, mipingo yothene ya vailambo yavathi inokala ingamadhi irana Ithuulelo. Kathuulelani moda munosangalalela Yohova na Yesu taonanga mwemo munoalemezela i-yo movwelana.

4. N’nga ninotapanin’ni muyofunjedha yei?

⁴ Muyofunjedha yei, ninotapanyani vyofuka vi: N’nga ninaire a-vi ira nikozeeli-edhe rimi-u va dambo la Ithuulelo? N’nga ninakami-e a-vi atu enango ira tadhaganyali na mwambula? N’nga ninakami-e a-vi atu enango enao ta-iidhe gumaneya vamigumanoni? Vyowakula vya vyofuka vyevi, vinonikami-a ira nikozeele phama mwambo ofuneya maningula.

N’NGA NINAIRE A-VI IRA NIKOZEELI-EDHE RIMI-U VA DAMBO LA ITHUULELO?

5. (a) Mwasiwa ngwan’ni ninofwanela onanga ira kuto ngwapereso yavadhulu? (Salimo 49:7, 8) (b) N’nga mufunjedhilevon’ni mu vidiyo ya muru oi Mwasiwa gwan’ni Yesu utokwa?

⁵ Ndhila yofuneya maningi inakozeeli-edhena i-yo rimi-u, ndi thuulela funeya wa sembe ya Yesu Kristu. Va-iyo okene, kaninaode vivulumucha wa vyodawa naukwa. (Muleri Salimo 49:7, 8; muone thitho vidiyo ya muru oi Mwasiwa ngwan’ni Yesu utokwa?) a Ee-no vokozeela ira Yesu adhavelele ingumiyee namwasa wa i-yo, Yohova na Mwanee odhiveliwiwa tatokozeela dhavelela kuto wa pereso yavadhulu maningi. (Aroma 6:23) Nathuulelanga maningi viniirele Yohova na Yesu, ninooda simbanga maningi kuto. Ninotapanyani vyongo vinango vyorucha vyevyo viirile Yohova na Yesu ira tavelele kuto. Yoroma, n’nga kuto chini?

6. N’nga vafuneelan’ni ira kuto uveleliwe?

⁶ N’nga kuto chini? Kuto chopagali inoveleliwa vofuna ombolana yongo inango. Adamu wenuo ali mutu oroma panduchiwa, ali olongomana. Angadawile, Adamu atooluza ngari yokaana ingumi yo-omala. Liye kaaluzile ingumiyee baa-i, mbwenye atooluza thitho ingumi yaa-imee othene. Ira Yohova aweleli-edhe vyongo vyaluzile Adamu, Yesu atoovelela ingumiyee yolongomana. Vahora yothene yali liye vailambo yavathila, Yesu “kaairile yodawa thitho kaaongilevo madhu ainyengo.” (1 Pe. 2:22) Vahora ya wukwawee, Yesu ali olongomana ninga mwemo mwakalele Adamu a-anadawe, ee-no vyali vyoodeya weleli-edha ingumi yaluzile Adamu.—1 Akor. 15:45; 1 Timo. 2:6.

7. N’nga Yesu angali vailambo yavathila, aguman’nena vyowedha vyoi a-vi?

⁷ Yesu angali vailambo yavathila, atoodhowanave m’vwela Babee wadhulu angalive ira anoogumanana vyowesedha vinjinji. Angali mwana, liye afuneela vwela anamabalee enao tali o-olongomana angalive ira liye ali olongomana. (Luka 2:51) Angali zombwe, liye afuneela rambela vyongo vyam’muiri-e a-vwela anamabalee venango ira a-akale ororomeleya wa Yohova. Angali zombwe, Yesu afwanela khonda vyowesedha vya Satana Namanami-a thangani-avo vyongo vyam’mwandela liye ira a-akale ororomeleya wa Nlungu. (Mat. 4:1-11) Satana atoovilimbi-edha ira Yesu adawe naifunelo yoi aimwanane velela kuto.

8. N’nga pyowesedha vinango viivi vyavilenle Yesu?

⁸ Vaurumiwee wavailambo yavathila, Yesu atoovilela vyowesedha vinjinji. Atooni-iwa nyarwa thitho amwidanee anjinji tanootucha ira anom’pha. (Luka 4:28, 29; 13:31) Afuneela thitho vilela vyongo vyadawi-a anamafunjedhee. (Marku 9:33, 34) Vahora yaombiwa liye landu, atooireliwa vyongo vyauwalanga nonyoziwa. Ee-no wukwa wee wali orucha thitho  ova-a manyadho. (Aeb. 12:1-3) Afuneela thitho vilela vaikundu yomari-a ya vyowesedha vyagumanana liye vaekene mo-okami-iwa na Yohova. b—Mat. 27:46.

9. N’nga ninovwivwa a-vi nathuulelanga vya sembe ivelenle Yesu? (1 Pedru 1:8)

⁹ Onga mwaimbarimbari, Yesu atoogumanana nyarwa dhilukulu ira avelele kuto. N’nga thuulela nyarwa dhaguman’nena Yesu namwasa ofunechecha velela ingumiyee, unouiri-ani ira mum’dhiveliwengana maningi?—Muleri 1 Pedru 1:8.

10. N’nga Yohova airilen’ni ira kuto uveleliwe?

¹⁰ N’nga a-vi voonga vya Yohova? N’nga Yohova athonyi-edhe a-vi dhimana vokozeela ira Yesu avelele kuto? Yohova na Yesu tanodhivelana maningi ninga mwemo munokalela baba na mwanee. (Sang. 8:30) Ee-no kathuulelani mwemo mwakuzeliwile Yohova ona Yesu aoni-iwanga nyarwa. Mo-okaikela vyam’toom’pha maningi rimani ona mwanee odhiveliwiwa aireliwanga vyongo vyauwalanga, khondiwa thitho wesedhiwa.

11. Muonge ifwanafwani-o yothonyi-edha mwemo mwavivwela Yohova va hora yaphiwa Yesu.

¹¹ Namabala uliwethene ukweliwile mwanee, unoidhiwa phama tangaranga dhinokalavo namwasa okweliwa. Ninororomela maningi ira atu okwa anodha venyathi-iwa, mbwenye vyevi kavinomali-a upha unovwa i-yo mutu unom’dhiveliwana i-yo akwa. Ifwanafwani-o yen’na, inonikami-a vwechecha phama mwemo mwavwela Yohova ona mwanee arucheyanga thitho wukwa vadambo la 33 EC. c—Mat. 3:17.

12. N’nga chini inaire i-yo dambo la Ithuulelo la-anafiye?

¹² La-anafiye dambo la Ithuulelo, munooda kozeela vamwekene venango volambela wavabanjani myasa yoonga vya kuto. Munooda i-ndi-edha basa Buku la Mboni za Yehova Lofufuzira Nkhani (akala litokalavo muiongelwinyu) venango mabukhu enango oonga vya Bibilya ira muidhiwe vyongo vinjinji va mwasula. d Munofwanela a-relanga thandha oleri Bibilya vahora ya Ithuulelo wenuo uli mu ixibukhu yamigumano yaingumi yi-u yau Kristau na Urumiwi. Thitho va dambo la Ithuulelo, kamudiwale onela porogarama yavakundu yolambela wanamaebe-i. Akala nitokozeeli-a rimi-u vadambo la Ithuulelo, ninodha kami-a atu enango ira taganyali na mwambula.—Ezara 7:10.

 NIKAMI-ENGA ATU ENANGO IRA TADHAGANYALI NA ITHUULELO

13. N’nga ndi yongo iivi yoroma inaire i-yo ira nikami-e atu enango ira taganyalina Ithuulelo?

¹³ N’nga ninakami-e a-vi atu enango ira tadhaganyali na mwambo wa Ithuulelo? Yongo yoroma inofwanela i-yo irana, kuwaitanela wu mwambula. Wenjedhela vaatu enao anoalaleela i-yo hora dhothene, ninooda lemba thitho madhina aatu anofuna i-yo aitana. Atwala anothangani-avo abali-u, afwi-u abasani, afwi-u axikolani na atu enango. Masiki na-akaena mwitano okwakwanela oitanela atu Ithuuleloni, ninooda atumizela malinki amwitano vatelefoni. Mwaira e-no munodha dabwa naatu anadhe.—Namal. 11:6.

14. Muonge ifwanafwani-o yothonyi-edha ira itanela atu aaidhi i-yo Ithuuleloni kokami-a maningi.

¹⁴ Nava-anga atu aaidhi i-yo mwitano oitanela atu Ithuuleloni, vinodha alimbi-a ira tadhafwanyeye va Ithuulelonivo. Dambo n’nango, rongola mwinango man’nee a-ali wa Mboni atoodabwa maningi man’nee angam’mwandenle mosangalala ira unodhowa vambo-i na i-yaneuo Ithuuleloni. Mwasiwa ngwan’ni rongoluo atoodabwa? Namwasa oi wa vyawa vinjinji, liye anom’mwandela man’neeuo ira amafwanyeye va Ithuuleloni mbwenye liye kaadhowa. N’nga chini yam’mwiiri-idhe ira adhowe vahora yeniyo? Man’neeuo atom’mwandela ira, “Nditowachela mwitano ondiitanela Ithuuleloni.” Liye atom’mwandela ira utowachela mwitano na ndimuwa wavapingoni wenuo um’muidhi liye. Yawa yeyo thitho vyawa vinango vyo-arela, man’neeuo anoodhowa mafwanyeya va Ithuuleloni.

15. N’nga ninofwanela thuulelanga n’ni naitanelanga atu Ithuuleloni?

¹⁵ Muthuulelenga ira atu anoaitanela nyo Ithuuleloni, tanodha kaana vyofuka simbwasimbwa akala ndi fendo yoroma fwanyeya vamigumanwi-u. ninooda ira phama idhiwa vyofuka vinanifuke aliwa thitho kozeela mwemo munawakulele i-yo. (Akol. 4:6) Mwaifwanafwani-o, atu enango anodha funanga idhiwa ira: ‘N’nga Ithuuleloniwo unodha ireya vyoi a-vi?’ ‘N’nga inomala mahora mangasi?’ ‘N’nga ndinofwanela wara vyowara vyoi a-vi?’ ‘N’nga vanofuneya kobiri yoi ndimavelele?’  ‘N’nga unowendi-iwa parato yavyovelela?’ Naitanelanga mutu Ithuuleloni, ninooda m’fuka ira, “N’nga mutokaana yofuka iliyothene?” Namala i-yo wakula vyofuka vina aliwa. Ninooda i-ndi-edha basa vidiyo ya muru oi Thuulela wukwa wa Yesu. Thitho vidiyo ya muru oi Chini inoireya va Nyumbani ya Umwene? Vofuna kami-a mutu idhiwa mwemo munoireela migumanwi-u, yofunjedha 28 ya bukhu loi Ingumi yokalao dhowa nodhowa, mutokala makundo manjinji aphama enao anataphanye i-yo naaliwa.

16. N’nga mbaatu avi anafwanyeye va Ithuuleloni?

¹⁶ Ithuulelo yamala, atu ana ifunelo enao tadhidhe va Ithuuleloni anodha kaana vyofuka. Aliwa anooda dabwa ira ndi atu oyeva (akala ira tatokalavo) enao tadyide vizindiyelo. Aliwa anooda nifuka ira ninoira fendo ungasi va yawa mwambo wa Ithuulelo. Thitho anodha funa idhiwa mwemo munoireela migumano ya Amboni dha Yohova mu ndhila yofwanafwana. Angalive ira makundo manjinjala anoongiwa mwari mwamwasa wa Ithuulelo, atu aromile wene gumaneya anofuneela wandeliwa mwaphama. Mwasa wava jw.org wa muru oi “N’chifukwa Chiyani a Mboni za Yehova Mumachita Mwambo wa Mgonero wa Ambuye Mosiyana ndi Zipembedzo Zina?” Unonikami-a wakula vyofuka vinokaana aliwa. Ninofwanela irana vyongo vyothene vinaode i-yo ira nikami-e atu “amathuulelo aphama” ira taganyali na mwambo wa Ithuulelo wa-anaireye, wadhaireyanga, thitho vasogolovee.—Mayir. 13:48.

MUDHAKAMI-E ATU TA-IIDHE UDHA VAMIGUMANONI

17. N’nga andimuwa avapingoni anakami-e a-vi atu ta-iidhe gumaneya va Ithuuleloni? (Zakiyeli 34:12, 16)

¹⁷ N’nga andimuwa avapingoni anakami-e a-vi atu ta-iidhe gumaneya va hora ya Ithuulelo? Mudha thonyi-edhe ira munoathuulela. (Muleri Zakiyeli 34:12, 16.) Ithuulelo ya-anaireye, muvilimbi-edhe ongana abali naarongola enala. Mwaasikimizele ira munoadhiveliwana thitho ira munofunechecha akami-a ira tawelele wa Yohova. Mwaaitanele Ithuuleloni. Tadha mwaawachele na mandha menli. Ithuulelo yamala, mudhaonge na abali naarongola odhiveliwiwala thitho mudhaire  yongo iliyothene inaode nyo ira mwaakami-e welela wa Yohova.—1 Pe. 2:25.

18. N’nga i-yo othene ninakami-e a-vi atu ta-iidhe udha migumanoni? (Aroma 12:10)

¹⁸ N’nga atu othene pingoni anakami-e a-vi atu ta-iidhe gumaneya enao tadhidhe va Ithuuleloni? Tanooda irana vyevi voira vyongo vambo-i naaliwa mwaudhivela, moriya rima na mwalemezo. (Muleri Aroma 12:10.) Idhiwani ira abali na arongolao mba pereso yavadhulu, venango tanookaikela ira tarome okoka dhowa migumanoni. Venango taova ira katinodha wacheliwa phama. e Ee-no murambelenga afuka vyofuka vinaava-e manyadho thitho onga vyongo vyevyo vinaaphi-e rimani. (1 Atez. 5:11) Abali naarongolala mba Makristau afwi-u thitho ninosangalala ona ira nitoroma okoka gumaneya vambo-i naaliwa.—Sal. 119:176; Mayir. 20:35.

19. N’nga thuulela wukwa wa Yesu unonikami-a a-vi?

¹⁹ Ninosimba maningi ira Yesu atoosaka-edha vyoi yawa na yawa niirenga mwambo othuulela wukwa wee. mwambula unonikami-a i-yo thitho atu enango mundhila dhinjinji. (Esaya 48:17, 18) Ninoroma m’dhiveliwana maningi Yohova na Yesu. Ninothonyi-edha ira ninosimba maningi vyongo viniirele aliwavi. Ninoroma vwelana na Makristau afwi-u thitho ninooda kami-a atu enango idhiwa ira tanooda sangalala na maraeli-o enao anoodeya namwasa wa kuto. Dhoweni niirengani vyongo vyothene vinaode i-yo ira nikozeele dhafwanyeya va Ithuuleloni, lelo ndi dambo lofuneya maningi va yawa.